នៅសល់ពេលមិនច្រើនទៀតទេ! បើយោងតាមកំណត់ត្រាមួយដែលជាការព្យាករណ៍របស់បិតារូបវិទ្យាសម័យទំនើប លោក អ៊ីសាក់ ញូវតុន បានបង្ហាញថា ទីបញ្ចប់នៃពិភពលោកដែលមនុស្សកំពុងរស់នៅសព្វថ្ងៃនេះ នឹងមកដល់នៅឆ្នាំ 2060 ខាងមុខ។ នេះបើតាមការចេញផ្សាយដោយគេហទំព័រ Hashem Al-Ghaili នាពេលថ្មីៗនេះ។

ផ្អែកទៅលើខ្លឹមសារដែលបានដកស្រង់ចេញពីសៀវភៅកំណត់ត្រាឯកជនមួយរបស់លោក អ៊ីសាក់ ញូវតុន ដែលបានព្យាករទុកតាំងពីឆ្នាំ 1704 បានឲ្យដឹងថា ដោយអនុវត្តតក្កវិជ្ជាដ៏ម៉ត់ចត់ ដែលគាត់បានប្រើសម្រាប់សិក្សាពីទំនាញផែនដី និងការគណនា លោក ញូវតុន ទាញបានការគណនាមួយដែលចង្អុលបង្ហាញថា ឆ្នាំ 2060 គឺជាចំណុចរបត់ដ៏ធំសម្រាប់មនុស្សជាតិ។

តាមរយៈការសន្និដ្ឋានរបស់អ្នកប្រាជ្ញរូបនេះ 1,260 ឆ្នាំបន្ទាប់ពីការកើនឡើងនៃចក្រភពរ៉ូមដ៏បរិសុទ្ធនៅឆ្នាំ 800 នៃគ.ស. សណ្តាប់ធ្នាប់ពិភពលោកបច្ចុប្បន្ននឹងឈានដល់ទីបញ្ចប់ ដោយនាំមកនូវយុគសម័យថ្មីមានការញាំញីទៅដោយជម្លោះឥតឈប់ឈរ និងគ្រោះមហន្តរាយធម្មជាតិ ដែលសុទ្ធតែបង្កឡើងដោយស្នាដៃមនុស្សខ្លួនឯង ។

នៅឆ្នាំ 2026 ពោលគឺនៅពេលដែលឆ្នាំ 2060 ខិតជិតមកដល់ ការគណនារបស់ អ៊ីសាក់ ញូវតុន មិនមែនត្រឹមតែជាការព្យាករណ៍បែបវិទ្យាសាស្ត្រប៉ុណ្ណោះទេ ប៉ុន្តែជាការមើលឃើញដ៏គួរឱ្យចាប់អារម្មណ៍មួយចូលទៅក្នុងចិត្តរបស់អ្នកប្រាជ្ញដ៏មានទេពកោសល្យម្នាក់ ដែលព្យាយាមភ្ជាប់គម្លាតរវាងភាពប្រាកដប្រជាខាងគណិតវិទ្យា ទៅនឹងការវិវត្តន៍នៃយុគសម័យរបស់មនុស្សលោក ។

ទោះបីជាយ៉ាងណាក៏ដោយ នេះគ្រាន់តែជាការព្យាកររបស់លោក ញូវតុន ប៉ុណ្ណោះ ហើយចំពោះភាពពិតជាក់ស្ដែងយ៉ាងណាយើងមានតែរង់ចាំមើលទាំងអស់គ្នា។ តួយ៉ាងដូចជាទំនាយរបស់គ្រូទាយពិករភ្នែកដ៏ល្បី លោកយាយ Baba Vanga ដែលទំនាយរបស់គាត់ខ្លះ បានក្លាយជាការពិតមែន ប៉ុន្តែមិនមែនគ្រប់គ្នាត្រូវតែជឿនោះទេ ព្រោះអ្វីៗសុទ្ធតែមើលមិនឃើញ ហើយវាអាស្រ័យលើហេតុនិងផល៕

ឥណ្ឌូនេស៊ីជាប្រទេសក្នុងអាស៊ានតែមួយគត់ដែលមានគម្រោងបញ្ជូនទាហានរហូតដល់ 8,000 នាក់សម្រាប់ការដាក់ពង្រាយទៅកាន់តំបន់ហ្គាហ្សា ដើម្បីគាំទ្រផែនការសន្តិភាពរបស់លោក ដូណាល់ត្រាំ ដែលធ្វើឲ្យឥណ្ឌូណេស៊ីក្លាយជាប្រទេសដំបូងគេដែលបានបញ្ជូនទ័ពទៅកាន់តំបន់ហ្គាហ្សាតាមផែនការសន្តិភាពរបស់សហរដ្ឋអាមេរិក ។ នេះបើយោងតាមការចុះផ្សាយរបស់សារព័ត៌មាន BBC។

កាលពីថ្ងៃទី១០ ខែកុម្ភៈ ឧត្តមសេនីយ៍ Maruli Simanjuntak នាយសេនាធិការកងទ័ពឥណ្ឌូណេស៊ីបាននិយាយថា ការបណ្តុះបណ្តាលសម្រាប់ទាហានបានចាប់ផ្តើមរួចហើយ ហើយពួកគេនឹងផ្តោតលើតួនាទីផ្នែកវេជ្ជសាស្ត្រ និងវិស្វកម្មនៅក្នុងតំបន់ហ្គាហ្សាក្រោយពេលបញ្ជូនចេញពីឥណ្ឌូណេស៊ី។

តាមលោក Maruli ផែនការនេះនៅតែជាជំហានដំបូង ហើយព័ត៌មានលម្អិតដូចជាចំនួនកងទ័ពដែលនឹងត្រូវដាក់ពង្រាយមិនទាន់ត្រូវបានបញ្ជាក់នៅឡើយទេ លោកអះអាងទៀតថាកងពលតូចមួយ ដែលនឹងត្រូវដាក់ពង្រាយអាចមានចន្លោះពី ៥០០០ ទៅ ៨០០០នាក់។ លោកមិនបានបញ្ជាក់ថាកងទ័ពនឹងត្រូវបានដាក់ពង្រាយសម្រាប់សកម្មភាពអ្វីនោះទេ ប៉ុន្តែនឹងផ្តោតលើតម្រូវការមនុស្សធម៌ និងការកសាងឡើងវិញនៃតំបន់ដែលរងការខូចខាត។

ដោយឡែកចំពោះពេលវេលាជាក់លាក់នៃការដាក់ពង្រាយកងទ័ពឥណ្ឌូនេស៊ី និងតួនាទីពិតប្រាកដរបស់ពួកគេនៅក្នុងតំបន់ហ្គាហ្សា លោកប្រធានាធិបតី Prabowo Subianto នៅមិនទាន់បញ្ជាក់ច្បាស់នៅឡើយទេ។ ទោះជាយ៉ាងណាក៏ដោយ Prabowo បានអះអាងថា ក្នុងនាមជាប្រទេសមូស្លីមធំជាងគេបំផុតរបស់ពិភពលោក ឥណ្ឌូនេស៊ីគួរតែជួយធ្វើឱ្យតំបន់ហ្គាហ្សាមានស្ថិរភាពឡើងវិញ ហើយបាននិយាយថា ការចូលរួមរបស់ខ្លួននឹងជាការបន្តដំណោះស្រាយរដ្ឋពីរនៅទីបំផុតចំពោះជម្លោះអ៊ីស្រាអែល-ប៉ាឡេស្ទីន។

ជាមួយគ្នានេះ ប្រទេសមូស្លីមផ្សេងទៀតដូចជាតួកគី និងប៉ាគីស្ថាន ក៏កំពុងពិចារណាបញ្ជូនកងទ័ពរបស់ពួកគេទៅតំបន់ ហ្គាហ្សា ផងដែរ ប៉ុន្តែបានបញ្ជាក់យ៉ាងច្បាស់ថា ពួកគេនឹងទៅក្នុងនាមជាអ្នករក្សាសន្តិភាពតែប៉ុណ្ណោះ ហើយនឹងមិនចូលរួមក្នុងការរំសាយអាវុធរបស់ក្រុមហាម៉ាសដែលបានគ្រោងទុកនោះទេ។

ប្រទេសគុយបា ៖ មន្ត្រីអាកាសចរណ៍គុយបា បានប្រកាសអាសន្នទៅកាន់ក្រុមហ៊ុនអាកាសចរណ៍នានា អំពីអាកាសយានដ្ឋានជាច្រើនកន្លែងក្នុងប្រទេសរបស់ខ្លួនខ្វះខាតប្រេងឥន្ធនៈសម្រាប់ចាក់យន្តហោះធ្វើដំណើរផ្លូវឆ្ងាយ ចាប់ពីថ្ងៃទី១០ ខែកុម្ភៈ រហូតដល់ថ្ងៃទី១១ ខែមីនា ដោយសារអាមេរិកដាក់សម្ពាធយ៉ាងខ្លាំងលើអាមេរិកឡាទីន ព្រមទាំងហាមឃាត់វេណេស៊ុយអេឡា និងម៉ិកស៊ិក មិនឱ្យបញ្ជូនប្រេងឥន្ធនៈមកគុយបា ។

សារព័ត៌មានបរទេសរាយការណ៍កាលពីថ្ងៃទី១០ ខែកុម្ភៈ ឆ្នាំ២០២៦ ថា មន្ត្រីអាកាសចរណ៍គុយបា បានជូនដំណឹងទៅក្រុមហ៊ុនអាកាសចរណ៍នានាពីការខ្វះខាតប្រេងឥន្ធនៈសម្រាប់ចាក់យន្តហោះ បើទោះជាគុយបាព្យាយាមសន្សំសំចៃប្រេងឥន្ធនៈក៏ដោយ ដោយសារអាមេរិករារាំងមិនឱ្យវេណេស៊ុយអេឡា និងម៉ិកស៊ិក ផ្គត់ផ្គង់ប្រេងឥន្ធនៈឱ្យគុយបា ។

រដ្ឋាភិបាលគុយបា បានជូនដំណឹងទៅក្រុមហ៊ុនអាកាសចរណ៍ និងអាកាសយានិក កាលពីថ្ងៃទី៨ ខែកុម្ភៈ ដោយបញ្ជាក់ថា អាកាសយានដ្ឋាននៅគុយបា ចំនួន៩កន្លែង ព្រមទាំងអាកាសយានដ្ឋានអន្តរជាតិ Jose Marti នៅទីក្រុងហាវ៉ាណា ខ្វះខាតប្រេងសម្រាប់ចាក់យន្តហោះ ចាប់ពីថ្ងៃទី១០ ខែកុម្ភៈ រហូតដល់ថ្ងៃទី១១ ខែមីនា ។ ការខ្វះខាតបណ្តាលមកពីរដ្ឋាភិបាលអាមេរិកក្រោមការដឹកនាំរបស់លោកប្រធានាធិបតី Donald Trump ដាក់សម្ពាធយ៉ាងខ្លាំងលើអាមេរិកឡាទីន និងហាមឃាត់វេណេស៊ុយអេឡា និងម៉ិកស៊ិក មិនឱ្យបញ្ជូនប្រេងមកគុយបា ។

លោកប្រធានាធិបតី Trump បានចុះហត្ថលេខាលើបទបញ្ជាប្រតិបត្តិកាលពីចុងខែមករា ដើម្បីដាក់ពន្ធទំនិញរបស់ប្រទេសណាដែលនៅតែលក់ ឬបញ្ជូនប្រេងឱ្យគុយបា ទើបធ្វើឱ្យគុយបាខ្វះខាតប្រេងយ៉ាងខ្លាំង ។ វាក៏ប៉ះពាល់ដល់យន្តហោះធ្វើដំណើរផ្លូវឆ្ងាយពីរុស្ស៊ី និងកាណាដា ដែលចូលមកកាន់គុយបាផងដែរ ខណៈគុយបាទទួលបានចំណូលសេដ្ឋកិច្ចចម្បងពីភ្ញៀវទេសចររុស្ស៊ី និងកាណាដា ។

កាលពីថ្ងៃទី៩ ខែកុម្ភៈ ក្រុមហ៊ុនអាកាសចរណ៍ Air Canada បានប្រកាសផ្អាកជើងហោះហើរមកកាន់គុយបា ខណៈក្រុមហ៊ុនអាកាសចរណ៍ផ្សេងៗប្រកាសពន្យារពេលហោះហើរ ព្រមទាំងត្រូវចុះចតយន្តហោះនៅសាធារណរដ្ឋដូមីនីកែន មុននឹងបន្តដំណើរទៅទីក្រុងហាវ៉ាណា ប្រទេសគុយបា ។

អាកាសយានិកចាត់ទុកការខ្វះខាតប្រេងនៅគុយបាពេលនេះខុសប្រក្រតីយ៉ាងខ្លាំង ខណៈគុយបាធ្លាប់ខ្វះខាតប្រេងសម្រាប់យន្តហោះកាលពីជាង១០ឆ្នាំមុន ដែលពេលនោះ យន្តហោះមានគោលដៅទៅតំបន់អឺរ៉ុប ត្រូវចុះចាក់ប្រេងនៅទីក្រុង Nassau ប្រទេស Bahamas ។ ពេលនេះ អាកាសយានិកណែនាំឱ្យក្រុមហ៊ុនអាកាសចរណ៍ត្រៀមប្រេង ឬអាចចាក់ប្រេងនៅទីក្រុង Cancun ប្រទេសម៉ិកស៊ិក ឬចាក់ប្រេងនៅសាធារណរដ្ឋដូមីនីកែន ៕

ទីក្រុងប៉េកាំង ៖ ក្រសួងសន្តិសុខសាធារណៈរបស់ចិន បានប្រកាសពីជោគជ័យធំមួយជាមួយនឹងការបង្រ្កាបបានជនសង្ស័យកម្រិតព្រហ្មទ័ណ្ឌពាក់ព័ន្ធនឹងអំពើឆបោ.កចំនួន 1,500 នាក់ ព្រមទាំងបានវា.យបំផ្លា.ញអគារដែលជាជម្រកក្រុមឆបោកជាង ៦៣០ ខ្នងនៅ Myawaddy KK complex ក្នុងតំបន់ព្រំដែនមីយ៉ាន់ម៉ា-ថៃផងដែរ។

យោងតាមប្រភពព័ត៌មានក្នុងស្រុករបស់ចិន អាជ្ញាធរចិនបានបញ្ជាក់ថា នេះគឺជាជោគជ័យដ៏ធំមួយ តាមរយៈប្រតិបត្តិការរួមគ្នារវាងកងកម្លាំងចិន មីយ៉ាន់ម៉ា និងថៃ ក្នុងការកម្ចាត់ក្រុមឧក្រិដ្ឋជនឆ្លងដែនទាំងនេះ ដើម្បីការពារសុវត្ថិភាពប្រជាពលរដ្ឋ និងពង្រឹងឡើងវិញនូវសន្តិសុខនៅក្នុងតំបន់។

អស់រយៈពេលជាយូរមកហើយ Myawaddy ជាពិសេស KK Complex ឬ KK Park ដែលស្ថិតព្រំដែនប្រទេសមីយ៉ាន់ម៉ានិងថៃ គឺជាជម្រករបស់ក្រុមល្បែងស៊ីសង កាស៊ីណូខុសច្បាប់ និងការឆ.បោកជាច្រើន ដែលចូលរួមក្នុងការក្លែងបន្លំតាមប្រព័ន្ធអនឡាញយ៉ាងទូលំទូលាយ និងបានបង្កគ្រោះថ្នាក់យ៉ាងធ្ងន់ធ្ងរដល់សង្គម។

សូមជម្រាបថា ប្រតិបត្តិការនេះបានចាប់ផ្តើមតាំងពីដើមឆ្នាំ ២០២៥ មកម្ល៉េះ ដោយសារសកម្មភាពបោកប្រាស់នៅតំបន់នោះមានការកើនឡើងខ្លាំងពេក។ គិតត្រឹមដើមឆ្នាំ ២០២៦ នេះ កម្លាំងសមត្ថកិច្ចនៃប្រទេសទាំងបីបានសហការគ្នាបញ្ជូនជនសង្ស័យត្រឡប់ទៅវិញបានចំនួន ១០ លើករួចមកហើយ ដែលបង្កើតការទប់ស្កាត់យ៉ាងខ្លាំងប្រឆាំងនឹងឧក្រិដ្ឋជន។

ជាមួយគ្នានេះ មន្ត្រីពាក់ព័ន្ធម្នាក់មកពីក្រសួងសន្តិសុខសាធារណៈចិនបាននិយាយថា ស្ថាប័នសន្តិសុខសាធារណៈនឹងបន្តពង្រឹងកិច្ចសហប្រតិបត្តិការអនុវត្តច្បាប់អន្តរជាតិ លើកកម្ពស់ប្រតិបត្តិការបង្ក្រាប និង លុបបំបាត់កន្លែងលាក់ខ្លួនរបស់ឧក្រិដ្ឋជនយ៉ាងម៉ឺងម៉ាត់ ព្រមទាំងខិតខំប្រឹងប្រែងគ្រប់បែបយ៉ាងដើម្បីចាប់ខ្លួនជនសង្ស័យព្រហ្មទណ្ឌ និងបន្តពង្រឹង និងពង្រីកលទ្ធផលនៃការបង្ក្រាបឲ្យមានប្រសិទ្ធភាពខ្ពស់បំផុត៕

ប្រទេសថៃ ៖ ប្រធានគណបក្សភូមិចៃថៃ លោក Anutin Charnvirakul ថា កងទ័ពថៃនឹងចាប់ផ្តើមធ្វើរបងព្រំដែនកម្ពុជា-ថៃភ្លាមៗនៅតំបន់មួយចំនួន ពលរដ្ឋមិនចាច់ព្រួយបារម្ភពីថវិកាសម្រាប់ធ្វើរបងទេ ពីព្រោះរដ្ឋាភិបាលថៃមានថវិកាគ្រប់គ្រាន់ដែលទទួលបានពីការបរិច្ចាគ និងថវិការបស់ព្រះរាជវាំង ដោយសារព្រះរាជវង្សគ្រប់អង្គបារម្ភពីស្ថានការណ៍ព្រំដែន ។

បន្ទាប់ពីលទ្ធផលរាប់សន្លឹកឆ្នោតមិនផ្លូវការបង្ហាញថា គណបក្សភូមិចៃថៃរបស់លោក Anutin ទទួលបានសំឡេងគាំទ្រច្រើនលើសលប់ ពលរដ្ឋថៃនៅខេត្តបុរីរាំ និងខេត្តត្រាត ទាមទារឱ្យរដ្ឋាភិបាលធ្វើរបងព្រំដែនកម្ពុជា-ថៃជាបន្ទាន់តាមការសន្យាពេលរកសំឡេងឆ្នោត ។ ជាការឆ្លើយតប លោក Anutin ប្រាប់ពលរដ្ឋកុំបារម្ភពីការធ្វើរបងព្រំដែននេះ រដ្ឋាភិបាលនឹងធ្វើចាប់ផ្តើមធ្វើភ្លាមៗ ពីព្រោះមានថវិកាគ្រប់គ្រាន់ ព្រមទាំងទទួលបានថវិកាពីព្រះរាជវាំងផងដែរ ។

ពលរដ្ឋថៃបានបោះឆ្នោតគាំទ្រគណបក្សភូមិចៃថៃយ៉ាងភ្លូកទឹកភ្លូកដី ដែលធ្វើឱ្យគណបក្សនេះទទួលបានអាសនៈក្នុងរដ្ឋសភាច្រើនជាងគណបក្សផ្សេងៗ បន្ទាប់ពីសន្យាជាមួយពលរដ្ឋ បើឈ្នះឆ្នោត នឹងធ្វើរបងព្រំដែនកម្ពុជា-ថៃ, បិទព្រំដែនជាមួយកម្ពុជារៀងរហូត និងលុបចោលអនុស្សរណៈនៃការយោគយល់ (MOU) ឆ្នាំ២០០១ ស្តីពីការបែងចែកផលប្រយោជន៍ដែនសមុទ្រ ខណៈលោក Anutin ជាមនុស្សជំនិតរបស់ព្រះមហាក្សត្រ ។

ការជ្រើសយកការធ្វើសង្គ្រាមបង្ហូរឈាមជាមួយកម្ពុជារបស់លោក Anutin គឺដើម្បីដូរនឹងសន្លឹកឆ្នោត ហើយលទ្ធផលឈ្នះឆ្នោតបង្ហាញថា ថៃបង្កសង្គ្រាមឈ្លានពានកម្ពុជាកន្លងមក គឺជាផែនការយ៉ាងច្បាស់លាស់ក្នុងបំណងដណ្តើមទឹកដីផង និងបំពេញមហិច្ឆតាស្តារអំណាចរបស់ព្រះមហាក្សត្រផង ដោយសារគណបក្សប្រជាជនទាមទារឱ្យធ្វើកំណែទម្រង់កាត់បន្ថយអំណាចរបស់ព្រះមហាក្សត្រ ។

កាលពីថ្ងៃទី១០ ខែកុម្ភៈ ឆ្នាំ២០២៦ លោក Anutin បានផ្តល់សម្ភាសន៍ជាមួយសារព័ត៌មាន បន្ទាប់ពីធ្វើជាអធិបតីក្នុងពិធីរំលឹកខួប៧២ឆ្នាំ នៃការបង្កើតកងទ័ពស្ម័គ្រចិត្តការពារជាតិ ថាពលរដ្ឋថៃទាមទារឱ្យធ្វើរបងព្រំដែនកម្ពុជា-ថៃជាបន្ទាន់ គឺកងទ័ពថៃនឹងរាយការណ៍ពីតំបន់ដែលអាចធ្វើរបងភ្លាមៗ រីឯថវិកាវិញបានត្រៀមរួចហើយ ។ ក្រៅពីនេះ ក៏មានការបរិច្ចាគថវិកាយ៉ាងច្រើនសម្រាប់ធ្វើរបង ព្រមទាំងថវិកាពីព្រះរាជវាំងផងដែរ ពលរដ្ឋមិនបាច់បារម្ភទេ ។

ចំណែកស្ថានការណ៍នៅតាមបណ្តោយព្រំដែនកម្ពុជា-ថៃបច្ចុប្បន្នស្ងប់ស្ងាត់ ប៉ុន្តែកងទ័ពថៃត្រៀមខ្លួនប្រយុទ្ធគ្រប់ពេលវេលា ។ បន្ទាប់ពីថៃបោះឆ្នោតរួចរាល់ បញ្ហាជាមួយកម្ពុជាត្រូវតែអនុវត្តតាមលក្ខខណ្ឌនៃការជជែកគ្នា ព្រមទាំងមានការងារជាច្រើនទៀតដែលប្រទេសទាំងពីរធ្វើរួមគ្នា ដូចជា ៖ ការបោសសម្អាតគ្រាប់មីនក្នុងដែនដីរៀងៗខ្លួន ភាគីណាទទួលខុសត្រូវតំបន់ណា ហើយគ្រប់យ៉ាងនឹងដំណើរការតាមគោលការណ៍មនុស្សធម៌ ព្រមទាំងការដកអាវុធធុនធ្ងន់ ។

គួរបញ្ជាក់ថា ពលរដ្ឋថៃនៅខេត្តព្រំដែនជាប់កម្ពុជា ដូចជា ខេត្តបុរីរាំ និងត្រាត ទាមទារឱ្យលោក Anutin ដែលពលរដ្ឋនៅទូទាំងប្រទេសបោះឆ្នោតគាំទ្រ ត្រូវធ្វើរបងព្រំដែនកម្ពុជា-ថៃឱ្យបានឆាប់បំផុតតាមការសន្យាពេលរកសំឡេងឆ្នោត និងផ្តោតលើបញ្ហាព្រំដែនជាមួយកម្ពុជាឱ្យខ្លាំងជាងការអភិវឌ្ឍសេដ្ឋកិច្ច ។ ក្រៅពីនេះ ពលរដ្ឋថៃបារម្ភពីកងទ័ពថៃអាចនឹងបើកការវាយប្រ.ហារធ្វើសង្គ្រា.មឈ្លាមពានកម្ពុជា លើកទី៣ ប៉ះពាល់ដល់ការប្រមូលផលដំណាំ ៕