កន្លែងទាំងនេះគឺជាគោលដៅទេសចរណ៍ដែលទាក់ទងទៅនឹងអតីតកាលសោកនាដ.កម្មដ៏ឈឺចាប់ ដែលកំពុងទាក់ទាញអ្នកទស្សនាឱ្យយល់កាន់តែច្បាស់ពីប្រវត្តិសាស្ត្រដ៏ជូចត់។ កន្លែងទាំងនេះត្រូវបានគេស្គាល់ថាជា តំបន់ទេសចរណ៍ងងឹត ដែលជារឿយៗត្រូវបានផ្សារភ្ជាប់ជាមួយនឹងប្រវត្តិនៃការឈឺ.ចាប់ សោកនាដកម្ម និងសង្រ្គាម។ ដូច្នេះហើយខាងក្រោមនេះយើងនឹងនាំលោកអ្នកមកស្គាល់តំបន់ទេសចរណ៍ងងឹត៖

១.សារមន្ទីរទួលស្លែង ឬគុ.កទួលស្លែង៖ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង ជាបូជនីយដ្ឋាននៃការចងចាំពីព្រឹត្តិការណ៍ដែលកើតឡើងក្នុងអតីត “មន្ទីរសន្ដិសុខ២១ ឬមន្ទីរស-២១” ក្នុងរបបកម្ពុជាប្រជាធិបតេយ្យ(សម័យខ្មែរក្រហម)។ អតីតមន្ទីរឃុំឃាំងនេះ ស្ថិតនៅចំកណ្តាលទីក្រុងភ្នំពេញដែលស្ងាត់ជ្រងំ ក្រោយខ្មែរក្រហមជម្លៀសប្រជាជនទាំងអស់ចេញកាលពីថ្ងៃទី១៧ ខែមេសា ឆ្នាំ១៩៧៥។

គុកនេះក៏ជាកន្លែងសម្ងាត់សម្រាប់ឃុំឃាំង សួរចម្លើយ ធ្វើទារុណកម្ម និងសម្លា.ប់អ្នកដែលត្រូវចាត់ទុកថាជា “អ្នកទោសនយោបាយ” របស់របបនេះផងដែរ។ បច្ចុប្បន្នសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ត្រូវបានគេចាត់ទុកថាជាកន្លែងដ៏ឈឺចាប់មួយ ដោយរក្សាទុកនូវរឿងរ៉ាវរបស់ជនរងគ្រោះ និងរំលឹកពីឧក្រិដ្ឋកម្មដ៏ឃោរឃៅរបស់ ប៉ុល ពត។

២.វិមាន Murambi៖ គឺជាវិមានដ៏ក្រៀមក្រំមួយ ដែលរំលឹកដល់ជនជាតិ Tutsis រាប់ពាន់នាក់ត្រូវបានគេសម្លាប់ក្នុងអំឡុងការប្រល័យពូជសាសន៍ Rwandan ឆ្នាំ១៩៩៤។ វិមាននេះរួមមានអដ្ឋិធាតុដែលបានរក្សាទុក ផ្នូរដ៏ធំ និងទ្រព្យសម្បត្តិផ្ទាល់ខ្លួនរបស់ជនរងគ្រោះ ដែលផ្តល់នូវទិដ្ឋភាពពិតនៃអំពើប្រល័យពូជសាសន៍។ ការទៅលេង Murambi គឺជាបទពិសោធន៍ផ្លូវចិត្តដែលទាមទារការគោរព និងរក្សាភាពស្ងៀមស្ងាត់។

៣.ជំរុំ Auschwitz-Birkenau៖ គឺជាកន្លែងប្រវត្តិសាស្ត្រដ៏ឈឺចាប់នៃអំពើឃោរឃៅរបស់មនុស្សដែលមានទីតាំងនៅប្រទេសប៉ូឡូញ។ កាលពីឆ្នាំ ១៩៤០ ដល់ឆ្នាំ ១៩៤៥ ពួកណាស៊ីបានសម្លាប់មនុស្សជាង ១.១ លាននាក់ ដែលភាគច្រើនជាជនជាតិយូដានៅទីនេះ។ ដូច្នេះពេលទៅលេងជំរុំ Auschwitz-Birkenau អ្នកទស្សនាគួរតែបង្ហាញការគោរពចំពោះអ្នកស្លាប់។

៤.ទីបញ្ចុះសព Père Lachaise ក្នុងទីក្រុងប៉ារីស៖ គឺជាកន្លែងសម្រាប់ដាក់សាកសពរបស់មនុស្សល្បីៗជាច្រើនដូចជា Jim Morrison, Oscar Wilde និង Edith Piaf ។ កន្លែងនេះត្រូវបានសាងសង់ក្នុងឆ្នាំ ១៨០៤ ជាទីបញ្ចុះសពឆ្លុះបញ្ចាំងពីប្រវត្តិសាស្រ្តដ៏សម្បូរបែប និងសិល្បៈនៃទីក្រុងប៉ារីស តាមរយៈផ្នូរ និងរូបចម្លាក់របស់វា។ ភ្ញៀវទេសចរដែលមកទស្សនាទីនេះត្រូវតែគោរពវិញ្ញាណក្ខន្ធ ហើយគួររក្សាភាពស្ងៀមស្ងាត់ ដើម្បីជៀសវាងការរំខានដល់គ្រួសារដែលមិនទាន់បានរួចផុតពីទុក្ខសោក។

៥.ព្រៃ Aokigahara ឬព្រៃអត្តឃាត៖ ព្រៃនេះមានទីតាំងនៅជើងភ្នំ Fuji ប្រទេសជប៉ុន ត្រូវបានគេស្គាល់ថាជាព្រៃដែលពោរពេញទៅដោយអាថ៌កំបាំង ខណៈមនុស្សជាច្រើនបានមកព្រៃនេះដើម្បីធ្វើអត្តឃាត។ បច្ចុប្បន្នជនជាតិជប៉ុនចាត់ទុកថាព្រៃ Aokigahara ជាកន្លែងគ្រោះថ្នាក់ ដូច្នេះអ្នកទេសចរគួរតែទៅជាមួយមគ្គុទ្ទេសក៍ទេសចរណ៍ដើម្បីធានាសុវត្ថិភាព និងមិនអាចធ្វើដំណើរចូលព្រៃនេះម្នាក់ឯងបានឡើយ៕

Elon Musk, Jeff Bezos និង Mark Zuckerberg សុទ្ធតែជាកំពូលមហាសេដ្ឋីល្បីៗនៅលើពិភពលោក ដោយពួកគាត់បានចែករំលែកដំបូន្មានល្អៗជាច្រើនសម្រាប់អ្នកដែលចង់បានជីវិតជោគជ័យ។ ជាការពិតណាស់អ្នកទាំងបីមិនត្រឹមតែល្បីល្បាញដោយសារការច្នៃប្រឌិតបច្ចេកវិទ្យាជឿនលឿនប៉ុណ្ណោះទេ ពួកគាត់ក៏មានទស្សនវិជ្ជាដ៏រឹងមាំ និងឆ្លាតវៃផងដែរ។ ខាងក្រោមនេះគឺជាទស្សនវិជ្ជាដ៏មានតម្លៃរបស់មហាសេដ្ឋីពិភពលោក។

១. Elon Musk៖ Elon Musk បានប្រកាន់ភ្ជាប់នៅទម្លាប់គោរពពេលវេលា និងឧស្សាហ៍ព្យាយាម។ លោកបាននិយាយថា ភាពខ្ជិល និងការពន្យាពេល ធ្វើអ្វីមួយយឺតយ៉ាវ គឺជាទម្លាប់ដ៏អាក្រក់បំផុត ដែលអាចធ្វើឱ្យមនុស្សបរាជ័យក្នុងជីវិត។ ដូច្នេះលោកជឿថា ភាពជោគជ័យគឺជាដំណើរការដ៏វែងមួយ ដែលទាមទារឱ្យមានការតស៊ូ ឧស្សាហ៍ព្យាយាម ការអំណត់អត់ធន់ និងការខិតខំប្រឹងប្រែងឥតឈប់ឈរ។ មហាសេដ្ឋី Elon Musk បានចែករំលែកបន្តថា លោកបានប្រឈមមុខជាមួយការបរាជ័យ និងបញ្ហាដែលហាក់ដូចជាមិនអាចយកឈ្នះបាន។ ប៉ុន្តែដោយសារការតស៊ូ និងការតាំងចិត្តមិនចុះចាញ់ រួមទាំងការគោរពពេលវេលា លោកក៏បានយកឈ្នះក្នុងរឿងគ្រប់យ៉ាង។

២. Jeff Bezos៖ Jeff Bezos ដែលជាមហាសេដ្ឋីទីពីររបស់ពិភពលោកបានប្រកាន់ភ្ជាប់នៅទម្លាប់គ្រប់គ្រងអារម្មណ៍។ លោកបាននិយាយថា ភាពវៃឆ្លាតខាងអារម្មណ៍ (EQ) គឺជាកត្តាចាំបាច់ និងសំខាន់បំផុតដែលមិនអាចខ្វះបានក្នុងដំណើរឆ្ពោះទៅរកភាពជោគជ័យរបស់មនុស្ស។ ស្ថាបនិក Amazon ណែនាំមនុស្សឱ្យយកចិត្តទុកដាក់ក្នុងការអភិវឌ្ឍន៍កត្តានេះ ដោយលោកជឿថា បុគ្គលដែលមានភាពវៃឆ្លាតខាងផ្លូវអារម្មណ៍ និងអាចគ្រប់គ្រងអារម្មណ៍បានល្អ មិនងាយខឹងផ្តេសផ្តាស់ គឺជាមនុស្សអស្ចារ្យបំផុតអាចកំណត់ជោគវាសនាជីវិតរបស់ខ្លួនបាន។

មនុស្សទាំងនេះមិនងាយស្ត្រេស ឬបាក់ទឹកចិត្តដោយសារការលំបាកឡើយ ពួកគេតែងតែរក្សាអាកប្បកិរិយាវិជ្ជមាន ខិតខំប្រឹងប្រែងឥតឈប់ឈរ និងមានឆន្ទៈក្នុងការរៀនអភិវឌ្ឍខ្លួនជានិច្ច។ មហាសេដ្ឋីរូបនេះក៏បានបន្តទៀតថា មនុស្សដែលឆាប់ខឹង ឆៀវឆាវ មិនចេះគ្រប់គ្រងអារម្មណ៍ខ្លួនឯង នឹងជួបប្រទះការលំបាកជាច្រើនទាំងក្នុងជីវិត និងការងារ។

៣. Mark Zuckerberg៖ នាយកប្រតិបត្តិ Meta លោក Mark Zuckerberg បានប្រកាន់ភ្ជាប់នៅទម្លាប់នៃការដាក់ខ្លួន ឬបន្ទាបខ្លួន។ មេរៀនដ៏សំខាន់មួយដែល Mark តែងតែចែករំលែកគឺការនៅឱ្យឆ្ងាយពីភាពក្រអឺតក្រទម ដោយលោកបានសង្កត់ធ្ងន់ថា ភាពជោគជ័យមិនអាចសម្រេចបានឡើយ ប្រសិនបើអ្នកមិនចេះបន្ទាបខ្លួនក្នុងការទំនាក់ទំនងជាមួយសង្គម។ មនុស្សដែលគិតតែពីខ្លួនឯង ហើយមិនព្រមស្តាប់អ្នកដ៏ទៃ ងាយធ្លាក់ចូលទៅក្នុងភាពបរាជ័យណាស់ និងមិនអាចអភិវឌ្ឍខ្លួនបាននោះទេ។ ដូច្នេះអ្នកត្រូវចាំថា គ្មាននរណាម្នាក់អាចជោគជ័យតែម្នាក់ឯងបានឡើយ បើគ្មានកិច្ចសហប្រតិបត្តិការ ការទំនាក់ទំនង និងការរៀនសូត្រពីអ្នកដទៃ៕

កាលពីថ្ងៃទី ៨ ខែមករា ឆ្នាំ២០២៥ នេះ សារព័ត៌មានវៀតណាមបានចុះផ្សាយថា អាជ្ញាធរវៀតណាមនឹងផ្តល់ប្រាក់រង្វាន់ប្រមាណ ២០០ ដុល្លារភ្លាមៗ ជូនទៅកាន់ពលរដ្ឋរូបណា ដែលរាយការណ៍អំពីអ្នកប្រព្រឹត្តិបទលើ្ម.សច.រាចរណ៍លើដងផ្លូវធ្វើដំណើរ។

ដូចដែលគ្រប់គ្នាជ្រាបមកហើយថា ការធ្វើដំណើរនៅលើដងផ្លូវប្រទេសវៀតណាម ហាក់មានភាពមមាលញឹកខ្លាំង ជាពិសេសគឺសម្បូរទៅដោយម៉ូតូ ជិះយ៉ាងត្រសេចត្រសាចពេញពេញផ្លូវតែម្តង ដែលជារឿយៗគឺបណ្តាលឲ្យមានការកកស្ទះចរាចរតាមដងវិថីសំខាន់ៗ ក្នុងទីក្រុងហាណូយ និងហូជីមិញជាដើម។

ដូច្នេះហើយ ដើម្បីអនុវត្តច្បាប់ចរាចរណ៍ឲ្យកាន់តែមានប្រសិទ្ធទ្វេដង អាជ្ញាធរវៀតណាមបានដាក់ចេញនូវគោលនយោបាយថ្មីមួយ គឺប្រកាសថានឹងផ្តល់ប្រាក់រង្វាន់ជាទឹកប្រាក់ប្រមាណ ៥ លានដុង ឬស្មើនឹង ១៩៦ ដុល្លារ ទៅកាន់នរណាម្នាក់ ដែលបានរាយការណ៍អំពីករណីអ្នកបំពានច្បាប់លើដងវិថី ដូចជា ការបើកបរមិនគោរពភ្លើងសញ្ញាចរាចរណ៍ និងចុចទូរស័ព្ទដៃអំឡុងពេលបើកបរជាដើម។ ចំពោះអ្នកដែលត្រូវបានផាកពិន័យ អ្នកបើកម៉ូតូនឹងពិន័យជាទឹកប្រាក់ ៦លានដុង ឬប្រមាណ ២៣៦ ដុល្លារ ,ខណៈអ្នកបើករថយន្តវិញនឹងត្រូវពិន័យរហូតដល់ ២០លានដុង ឬ៧៨៧ដុល្លារឯណ្ណោះ។

សម្រាប់អ្នកដែលរាយការណ៍ពីបទល្មើស គឺត្រូវតែបង្ហាញភស្តុតាងច្បាស់លាស់ទៅកាន់សមត្ថកិច្ច ដោយត្រូវមានវីដេអូបង្ហាញសកម្មភាពបទល្មើសទាំងនោះ ដើម្បីទទួលបានប្រាក់រង្វាន់ ខណៈសមត្ថកិច្ច ក៏សន្យាថានឹងធានាការសង្ងាត់ជូនផងដែរ។

យោងតាមស្ថិតិផ្លូវការវៀតណាម មានម៉ូតូប្រហែល ៧៧ លានគ្រឿង និងរថយន្ត ៦.៣លានគ្រឿង បានចរាចរណ៍លើដងវិថីទូទាំងជារៀងរាល់ថ្ងៃ។ របាយការណ៍វៀមណាមបង្ហាញទៀតថា ក្នុងឆ្នាំ ២០២៤ គ្រោះថ្នាក់ចរាចរណ៍បានឆក់យកជីវិតមនុស្សយ៉ាងហោចណាស់ ៣០ នាក់ក្នុងមួយថ្ងៃ ដែលបណ្តាលមកពីគ្រោះថ្នាក់ចៃដន្យផ្សេងៗដូចជាបើកបរហួសល្បឿនកំណត់ មិនគោរពច្បាប់ចរាចរណ៍ ក៏ដូចជាផឹកស្រវឹងហើយបើកបរជាដើម៕

សហរដ្ឋអាមេរិក ៖ ទោះបី ជ.នជាតិ Amish រស់នៅប្រទេសរីកចម្រើនខ្លាំងបំផុត គឺសហរដ្ឋអាមេរិក ប៉ុន្តែពួកគេបែរជាសម្រេចចិត្តរស់នៅដូចកាលពីសម័យរាប់រយឆ្នាំមុន ដោយបដិសេធការប្រើប្រាស់បច្ចេកវិទ្យាថ្មីៗស្ទើរទាំងអស់ ដូចជា ៖ អគ្គិសនី រថយន្ត ទូរស័ព្ទដៃ អ៊ីនធើរណេត និងកុំព្យូទ័រ ។ រហូតដល់បច្ចុប្បន្ន ពួកគេនៅតែជិះរទេះសេះ និងកង់ ហើយកាត់សម្លៀកបំពាក់ខ្លួនឯងទាំងអស់ ។ ហេតុអ្វីពួកគេរស់នៅក្នុងជីវិតបែបនេះ? តើពួកគេរស់នៅដោយគ្មានបច្ចេកវិទ្យាទំនើបរបៀបណា?

ជនជាតិ Amish មានដើមកំណើតនៅតំបន់អឺរ៉ុប ហើយជនជាតិ Amish រស់នៅប្រទេសស្វីស អាល្លឺម៉ង់ និងហូឡង់ បានផ្លាស់ទីលំនៅមករស់នៅរដ្ឋ Pennsylvania សហរដ្ឋអាមេរិក ចាប់ពីសតវត្សទី១៩ ដល់ទី២០ ។ ពួកគេរស់នៅក្នុងជីវិតដូចសម័យបុរាណ និងពុំផ្លាស់ប្តូរតាមការរីកចម្រើនលើពិភពលោក ។

ប៉ុន្តែចំនួនជនជាតិ Amish រស់នៅបែបបុរាណបានធ្លាក់ចុះជាបន្តបន្ទាប់ រហូតដល់សតវត្សទី២១ មានជនជាតិ Amish តែម្នាក់ប៉ុណ្ណោះ ក្នុងចំណោម៣នាក់ បានរស់នៅក្នុងជីវិតបុរាណ ហើយពួកគេក៏ចាប់ផ្តើមទៅរស់នៅរដ្ឋផ្សេងទៀតរបស់សហរដ្ឋអាមេរិក ។ ពេលមានកម្មវិធីជួបជុំម្តងៗ ពួកគេបានដឹកជញ្ជូនកៅអីវែង ចានឆ្នាំង និងអាហារតាមរទេះសេះ ទៅផ្ទះម្ចាស់កម្មវិធី ។

ភាពលេចធ្លោ គឺពួកគេតុបតែងខ្លួន និងស្លៀកពាក់ដូចកាលពី៣០០ឆ្នាំមុន ដោយហាមបុរសទុកពុកមាត់ ហើយស្ត្រីពុំកាត់សក់អស់មួយជីវិត និងពុំឱ្យពាក់គ្រឿងអលង្ការ ។ ការតុបតែងខ្លួនបង្ហាញថា ពួកគេពុំទទួលយកការផ្លាស់ប្តូរ ។ បើទោះពួកគេពុំប្រើទូរស័ព្ទដៃ ប៉ុន្តែមានទូរស័ព្ទលើតុនៅផ្ទះសម្រាប់ពេលចាំបាច់ រីឯរថយន្ត និងរថភ្លើង ក៏ដូចគ្នាដែរ គឺជិះពេលចាំបាច់ ។

សម្ភារៈអគ្គិសនី និងគ្រឿងយន្តកសិកម្មអាចប្រើប្រាស់បាន លុះត្រាតែមានការអនុញ្ញាតក្នុងករណីចាំបាច់សម្រាប់សេដ្ឋកិច្ចសហគមន៍ ។ ឧបករណ៍តន្ត្រីនានាក៏ត្រូវហាមឃាត់ដែរ ព្រោះរំខានផ្លូវចិត្តអ្នកដទៃ ប៉ុន្តែពួកគេអាចច្រៀងជាក្រុមបាន ។ ទោះយ៉ាងណា មានជនជាតិ Amish មួយចំនួនបានរស់នៅបែបសម័យថ្មី ដោយប្រើអគ្គិសនី រថយន្ត និងទូរស័ព្ទលើតុ ៕