សហគមន៍ទេសចរណ៍ធម្មជាតិកំពង់ភ្លុក នៅលើទឹកដីនៃខេត្តសៀមរាប បាននឹងកំពុងបង្អួតសម្រស់យ៉ាងទាក់ទាញ ទៅកាន់ភ្ញៀវទេសចរគ្រប់ៗរូប ជាពិសេសនោះគឺសេវាកម្មជិះទូកកម្សាន្ត គយគន់ព្រៃលិចទឹក ក៏ដូចជាទស្សនាទេសភាពថ្ងៃរៀបលិច និងភូមិបណ្តែតទឹកទាំងមូល។

វីដេអូចែកចាយនៅលើបណ្តាញសង្គមដោយគេហទំព័រ ទេសចរណ៍-Tourism នាពេលកន្លងមកបានបង្ហាញពីទិដ្ឋភាពទូកទេសចរណ៍ជាច្រើនបានដាក់បម្រៀបគ្នា ដែលអ្នកអុំទូកសុទ្ធសឹងតែជាស្រ្តីទាំងអស់ នៅឯភូមិបណ្តែតទឹកកំពង់ភ្លុក។ ខណៈដែលភ្ញៀវទេសចរ ទាំងខ្មែរនិងជនបរទេស បានបង្ហាញនូវស្នាមញញឹម និងរីករាយក្នុងការទទួលយកបទពិសោធន៍នៃការជិះទូកតាមដងទន្លេ។

ភាពលេចធ្លោនៃសហគមន៍ទេសចរណ៍កំពង់ភ្លុក ដែលភ្ញៀវជាតិ-អន្តរជាតិពេញចិត្តបំផុតនោះគឺ សេវាអុំទូកកម្សាន្ត ដែលមានអ្នកអុំទូកជាស្ត្រីទាំងអស់។ ក្រុមស្ត្រីអុំទូកនេះមិនត្រឹមតែជាអ្នកអុំទូកដ៏ជំនាញប៉ុណ្ណោះទេ ប៉ុន្តែថែមទាំងជាមគ្គុទ្ទេសក៍ទេសចរដែលអាចពន្យល់រៀបរាប់ដល់ភ្ញៀវអំពីលក្ខណ:ស្ថានភាព ធម្មជាតិ ប្រពៃណីទំនៀមទម្លាប់ និងសក្តានុពលដែលមានក្នុងសហគមន៍ ប្រកបដោយស្នាមញញឹម រួសរាយរាក់ទាក់ ស្និទ្ធស្នាល ផ្តល់នូវភាពកក់ក្តៅ។

ម៉្យាងវិញទៀត នៅឯសហគមន៍នេះ អ្នកទាំងអស់គ្នាអាចឈ្វេងយល់ពីជីវភាពរស់នៅប្រចាំថ្ងៃរបស់ប្រជាជននៅតាមមាត់បឹងទន្លេសាប ទស្សនាផ្ទះសង់ខ្ពស់ៗនៅលើផ្ទៃទឹក ទស្សនាភូមិបណ្តែតទឹក អុំទូកទស្សនាក្នុងភូមិ ទស្សនាព្រៃលិចទឹក និងផ្តិតយកនូវរូបភាពស្អាតៗ ហើយអ្វីដែលកាន់តែពិសេសគឺអាចទស្សនាផ្ទៃបឹងទន្លេសាបដ៏ធំល្វឹងល្វើយជាមួយនឹងភោជនីយដ្ឋានបណ្តែតទឹក បែចិញ្ជឹមត្រី រួមជាមួយនឹងទិដ្ឋភាពថ្ងៃរៀបលិចដ៏ស្រស់ស្អាតនៅលើផ្ទៃបឹង។

គួរជម្រាបថា សហគមន៍ទេសចរណ៍ធម្មជាតិកំពង់ភ្លុក ស្ថិតនៅតាមមាត់បឹងទន្លេសាប ក្នុងឃុំកំពង់ភ្លុក ដែលមាន០៣ភូមិ រួមមាន៖ ភូមិត្នោតកំបុត ភូមិគោកក្តុល និងភូមិដីក្រហម ស្រុកប្រាសាទបាគង ខេត្តសៀមរាប និងមានចំងាយប្រមាណ ៣០គីឡូម៉ែត្រពីទីរួមខេត្តសៀមរាប ដោយធ្វើដំណើរតាមផ្លូវជាតិលេខ៦ ឆ្ពោះទៅរាជធានីភ្នំពេញ៕

ជឿជាក់ថា មហាជនខ្មែរប្រាកដជាបានជ្រាបហើយអំពីព្រឹត្តិការណ៍«សំណេរអង្គរ» លើទឹកដីខេត្តសៀមរាប ដែលប្រារព្ធឡើងដំបូងក្នុងឆ្នាំ ២០២៤ និងបន្តប្រាព្ធឡើងជាលើកទី ២ ក្នុងឆ្នាំ ២០២៥ទៀត។ យ៉ាងណា អ្នកគ្រប់គ្នាប្រហែលជាមិនបានជ្រាបទេអំពីព្រឹត្តិការណ៍ប្រឡងសំណេរដ៏ធំ ដំបូងគេបំផុតរបស់ពិភពលោក គឺបានរៀបចំឡើងដោយប្រទេសបារាំង កាលពីឆ្នាំ ២០២៣។

នាថ្ងៃទី៤ ខែមិថុនា ឆ្នាំ២០២៣ ប្រទេសបារាំងបានរៀបចំព្រឹត្តិការណ៍ប្រកួតសរសេរតាមអានដ៏ធំ បំផុតក្នុងប្រវត្តិសាស្រ្តខ្លួន ដែលហៅថា «La Dictée Geante — ឬ Giant Dictation»។ ការប្រឡងនេះគឺបានធ្វើឡើងនៅលើដងវិថី Champs-Élysées ដ៏ល្បីនិងជាផ្លូវពាណិជ្ជកម្មដ៏មមាលញឹកមួយ ប្រចាំទីក្រុងប៉ារីស ប្រទេសបារំាង។

ក្នុងព្រឹត្តិការណ៍នោះ មានអ្នកដាក់ពាក្យចូលរួមប្រឡងរហូតដល់ជាង ៥០,០០០នាក់។ តែយ៉ាងណា មានតែបេក្ខជន៥ ០០០នាក់ ប៉ុណ្ណោះ ដែលត្រូវបានជ្រើសរើស។ ក្នុងចំណោមនោះ គេក៏បានជម្រុះបេក្ខជន នៅសល់តែ ១ ៦៥០នាក់ ឲ្យមកចូលរួមការប្រឡង។ ខណៈបេក្ខជនប្រឡង មានអាយុចាប់ពី១០-៩០ឆ្នាំផងដែរ។ ជាលទ្ធផលបញ្ចប់ការប្រឡង បេក្ខជនឯកចំនួន ១ ៣៩៧ នាក់ ត្រូវបានកត់ត្រាក្នុងបញ្ជីត្រាហ្គោណែសពិភពលោកផងដែរ។

សូមជម្រាបថា នៅលើទឹកដីប្រទេសកម្ពុជា ព្រឹត្តិការណ៍«សំណេរអង្គរ»លើកទី២ ប្រារព្ធឡើងនាថ្ងៃទី១៩ ខែមករា ឆ្នាំ២០២៥ នៅលើស្ពានហាលផ្នែកខាងលិច របស់ប្រាសាទអង្គរវត្ត នឹងមានបេក្ខជនចូលរួមប្រមាណ១២២០នាក់។ បេក្ខជនទាំងនោះ មានទាំងកុមារចាប់ពីអាយុ៦ឆ្នាំឡើងទៅ រហូតដល់មនុស្សចាស់ ដែលមានវ័យដល់៨០ឆ្នាំ។ ក្នុងនោះដែរក៏មានព្រះសង្ឃចូលរួមចំនួន៨២អង្គ ជនបរទេសរៀនភាសាខ្មែរមួយចំនួន ព្រមទាំងអនិកជនខ្មែរដែលរស់នៅបរទេសខ្លះទៀតផង៕

ពិធីសែនដកជើងធូប ជាពិធីមួយដ៏ចាំបាច់ ដែលជនជាតិចិនតែងធ្វើឡើងចន្លោះពី៥ថ្ងៃ ទៅ៧ថ្ងៃ នៅមុនថ្ងៃបុណ្យចូលឆ្នាំថ្មីឈានចូលមកដល់ ។

សម្រាប់ក្នុងឆ្នាំនេះ ថ្ងៃសែនដកជើងធូបនឹងត្រូវធ្វើឡើងនៅថ្ងៃទី២៣ ខែមករា ខណៈថ្ងៃសែនចូលឆ្នាំចិន នឹងប្រព្រឹត្តិទៅនៅថ្ងៃទី២៨ ខែមករា។

បើតាមជំនឿ ការដកជើងធូប គឺជាការដូរកំប៉ុងជើងពាន ហើយផ្លាស់ខ្សាច់ឬអង្ករ ក្នុងកំប៉ុងជើងធូបឬជើងពានចេញ រួចប្តូរថ្មី ដើម្បីទទួលសិរីសួរស្តីឆ្នាំថ្មី។

ពិធីនេះ ធ្វើឡើងជាការអរគុណ និងជូនដំណើរកុងម៉ា និងទេវតាឆ្នាំចាស់ដែលបានថែរក្សាការពារឱ្យចម្រុងចម្រើនអស់រយៈកាលមួយឆ្នាំកន្លងមកឱ្យត្រឡប់ទៅឋានសួគ៌វិញ។

ក្នុងក្បួនដកជើងធូបនេះ គេមានត្រណមមួយគឺនៅពេលដែលដកហើយបើជាជំនាងផ្ទះ ឬ ទី ជុយអៀ ត្រូវតែ ទុកធូបចាស់ចំនួន៥សរសៃ ប៉ុន្តែបើជាកុងម៉ាវិញទុកបន្សល់ជើងធូបចាស់អោយបាន៣សរសៃ៕

រោងចក្រកាត់ដេរសម្លៀកបំពាក់ម៉ាកល្បី Adidas របស់ ក្រុមហ៊ុន Sunfair Garment Co., Ltd. បោះទុនវិនិយោគសរុបចំនួន ៩០លានដុល្លារ បង្កើតរោងច្រកនៅខេត្តកណ្តាល។

រោងចក្រនេះ សាងសង់ឡើងរផ្តោតទៅលើការនាំចេញផលិតផលយកទៅលក់ តាមបណ្តាប្រទេសអាស៊ាន សហរដ្ឋអាម៉េរិក និងអឺរ៉ុប។

បើតាមការបញ្ជាក់ពីក្រុមប្រឹក្សាអភិវឌ្ឍន៍កម្ពុជា បានឱ្យដឹងថា៖”ការសាងសង់រោងចក្ររបស់ក្រុមហ៊ុន Sunfair Garment Co., Ltd. ស្ថិតលើផ្ទៃដីទំហំប្រមាណ ៣៣ហិកតា ស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប កណ្តាល”។

ក្រុមហ៊ុនគ្រោងនឹងបញ្ចប់ការសាងសង់រោងចក្រ និងដំណើរការផលិតកម្មនៅពេលឆាប់ៗខាងមុខនេះ។ ក្រោយសាងសង់រួច រោងចក្រនេះអាចផ្តល់ការងារប្រមាណជា៤.០០០កន្លែង។

គួរបញ្ជាក់ថា Sun Fair Garment ជាក្រុមហ៊ុនបុត្រសម្ព័ន្ធរបស់ក្រុមហ៊ុន Marvel Garment ដែលបានវិនិយោគលើការកាត់ដេរសម្លៀកបំពាក់ល្បីៗ ដូចជាម៉ាក Adidas Nike Polo និង Puma។

ក្រុមហ៊ុន Marvel Garment បានចាប់ដំណើរការវិនិយោគនៅកម្ពុជានាខែកុម្ភៈ ឆ្នាំ២០១៩ ក្នុងទុនវិនិយោគប្រមាណ ២៥០ លានដុល្លារ វិនិយោគលើផ្ទៃដីទំហំ ៤៥ ហិកតា និងបានបង្កើតការងារចំនួនជាង ១,៣ ម៉ឺនកន្លែង៕

ជារៀងរាល់ឆ្នាំ បងប្អូនជនជាតិចិន ឬបងប្អូនជនជាតិខ្មែរ ដែលជាប់សែស្រឡាយចិន តែងតែប្រារព្ធបុណ្យចូលឆ្នាំប្រពៃណីចិនមិនដែលអាក់ខានឡើយ។

ឆ្នាំនេះ ថ្ងៃសែនចូលឆ្នាំចិន នឹងប្រព្រឹត្តិទៅនៅថ្ងៃទី២៨ ខែមករា ខណៈពិធីសែនដកជើងធូបនឹងចាប់ផ្តើមនៅថ្ងៃទី២៣។

នៅក្នុងពិធីបុណ្យនេះ ក្រៅតែពីសំណែន និងក្រដាស ជូនពរឆ្នាំថ្មី ដាក់តាំងនៅក្នុងផ្ទះ បងប្អូនជនជាតិខ្មែរ ជាប់សែស្រឡាយចិន ក៏តែងដាក់តាំងលម្អគេហដ្ឋាន ជាមួយដើមរុក្ខជាតិ ឬដើមផ្កាផ្សេងៗ ដូចជាដើមក្រូច ឬផ្កាអង្គាសិល្ប៍ជាដើម។

ការដាក់តាំងដើមអង្គារសិល្ប៍ ត្រូវបានពលរដ្ឋមួយចំនួនមានជំនឿថា ដើមនេះនឹងជួយលើករាសី ឱ្យរកស៊ីមានបាន និងបញ្ចៀសរឿងរ៉ាវអាក្រក់។

គួរបញ្ជាក់ថា ផ្កានេះ ជាធម្មតាអាជីវករទាំងនាំគ្នាប្រមូលទិញពីខេត្តឆ្ងាយៗ ជាពិសេសខេត្តពោធិ៍សាត់ ដែលជាតំបន់សម្បូរព្រៃភ្នំ យកមកលក់នៅទីក្រុងភ្នំពេញ៕