សហរដ្ឋអាមេរិក៖ កាលពីថ្ងៃទី១៩ ខែមករា កម្មវិធី TikTok នៅសហរដ្ឋអាមេរិកបានបិទជាផ្លូវការ ខណៈពលរដ្ឋនៅទីនេះមិនអាចចូលប្រើប្រាស់កម្មវិធីនេះបានទៀតឡើយ។ ទោះជាយ៉ាងណាបន្ទាប់ពីបិទអស់រយៈពេល ១២ ម៉ោងនៅថ្ងៃទី២០ ខែមករា កម្មវិធី TikTok ក៏បានបើកដំណើរការឡើងវិញដោយសារមូលហេតុទាំងនេះ។

យោងតាម NBC News ការបើកដំណើរការឡើងវិញត្រូវបានចាត់ទុកថាជារឿងដ៏គួរឱ្យភ្ញាក់ផ្អើលមួយ ព្រោះកាលពីថ្ងៃទី១៩ ខែមករា កម្មវិធី TikTok រួមជាមួយនឹង Lemon8 និង CapCut ដែលជាកម្មសិទ្ធិរបស់ ByteDance ក៏ត្រូវបានលុបចេញពី App Store និង Google Play Store របស់អាមេរិកផងដែរ។

ប៉ុន្តែនៅថ្ងៃដដែលនោះលោក Donald Trump បានផ្តល់ការធានាដល់ក្រុមហ៊ុន ដោយបាននិយាយថា លោកនឹងពន្យារពេលការហាមឃាត់នៅលើ TikTok មួយរយៈទៀត ប្រសិនបើអាមេរិកបានកាន់កាប់ ៥០% នៃ TikTok នោះលោកនឹងស្តារសេវាកម្មនេះឡើងវិញ ហើយនឹងអនុញ្ញាតឱ្យអាជីវកម្មខ្នាតតូចជាង ៧ លានរីកចម្រើនបន្តទៅមុខទៀត។ ជាមួយគ្នានោះ TikTok ក៏បាននិយាយដែរថា “យើងនឹងធ្វើការជាមួយលោក Trump ដើម្បីស្វែងរកដំណោះស្រាយរយៈពេលវែង”។

មិនយូរប៉ុន្មានកម្មវិធីក៏បានបើកដំណើរការឡើងវិញ ដែលនេះត្រូវបានគេចាត់ទុកថាជាដំណឹងល្អសម្រាប់មនុស្សរាប់លាននាក់ ជាពិសេសអ្នកដែលកំពុងប្រើប្រាស់កម្មវិធីនេះជារៀងរាល់ថ្ងៃដើម្បីតាមដានព័ត៌មាន កម្សាន្ត និងរកស៊ីជាដើម។ គួរបញ្ជាក់ដែរថា TikTok បច្ចុប្បន្នមានអ្នកប្រើប្រាស់ ១៧០ លាននាក់នៅក្នុងសហរដ្ឋអាមេរិក ដែលស្មើនឹងពាក់កណ្តាលនៃចំនួនប្រជាជន និងជាដៃគូដ៏សំខាន់របស់អ្នកផ្តល់សេវានៅក្នុងការផ្ទុកទិន្នន័យ កម្មវិធី ឬសេវាកម្មទីផ្សារ។

គួររំលឹកដែរថា កាលពីខែមេសា ឆ្នាំ ២០២៤ លោក Joe Biden បានចុះហត្ថលេខាលើច្បាប់ការពារជនជាតិអាមេរិកពីកម្មវិធីដែលគ្រប់គ្រងដោយបរទេស (PAFACA) ដោយសារតែបារម្ភថាក្រុមហ៊ុនកំពុងចែករំលែកព័ត៌មានផ្ទាល់ខ្លួនរបស់ជនជាតិអាមេរិកជាមួយរដ្ឋាភិបាលចិន។ ដូច្នេះអាមេរិកក៏ហាមប្រាម TikTok មិនឱ្យដំណើរការមុនថ្ងៃទី ២០ ខែមករា ឆ្នាំ២០២៥៕

ប្រទេសអូស្ត្រាលី ៖ ស្របពេលពិភពលោក កំពុងចាប់អារម្មណ៍នឹងភ្លើងឆេះព្រៃនៅទីក្រុងឡូសអេនជឺឡេស រដ្ឋកាលីហ្វ័រញ៉ា សហរដ្ឋអាមេរិក ដែលបានបំផ្លា.ញ ទ្រព្យសម្បត្តិ និងផ្ទះពលរដ្ឋអស់យ៉ាងច្រើនមហាសាល នៅប្រទេសអូស្ត្រាលីវិញបែរជាមានខ្យល់ព្យុះ និងរន្ទះបា.ញ់ ជាច្រើនកន្លែង ។

កាលពីថ្ងៃទី១៨ ខែមករា ឆ្នាំ២០២៥ សារព័ត៌មាន AFP រាយការណ៍ថា អូស្ត្រាលីប្រកាសអាសន្នពីគ្រោះធម្មជាតិក្នុងតំបន់ភាគខាងកើតប្រទេស ដែលគ្របដណ្តប់លើទីក្រុងស៊ីដនី និងតំបន់ជាច្រើនក្នុងរដ្ឋ New South Wales ។

ខ្យល់ព្យុះបានបោកបក់មកលើអូស្ត្រាលី តាំងពីថ្ងៃទី១៥ ខែមករា កន្លងមក ដែលបណ្តាលឱ្យមានភ្លៀងធ្លាក់យ៉ាងខ្លាំង រន្ទះបាញ់ និងខ្យល់កន្ត្រាក់ខ្លាំង ដែលមានល្បឿនជាង១០០គីឡូម៉ែត្រក្នុង១ម៉ោង ។ ដើមឈើជាច្រើនបានដួលរលំពាសពេញផ្លូវ ខណៈអគារ និងផ្ទះពលរដ្ឋ ស្មើជាង៣ម៉ឺនខ្នង គ្មានអគ្គិសនីប្រើប្រាស់ ។

រដ្ឋមន្ត្រីក្រសួងគ្រប់គ្រងការសង្គ្រោះបន្ទាន់នៅរដ្ឋ New South Wales លោក Jihad Dib លើកឡើងថា ភ្នាក់ងារសង្គ្រោះបន្ទាន់បានទទួលសេចក្តីរាយការណ៍គ្រោះធម្មជាតិពីពលរដ្ឋ រហូតដល់ជាង៧,០០០លើកក្នុងរយៈពេលខ្លី ។

តាមសេចក្តីរាយការណ៍បឋម កាលពីថ្ងៃទី១៧ ខែមករា កន្លងមក គឺមានពលរដ្ឋអូស្ត្រាលីរងរបួសចំនួន២នាក់ ដោយសារដើមឈើក្នុងសួនច្បារបាក់រលំសង្កត់ពួកគេពេលកំពុងដើរនៅតាមផ្លូវ ។ រីឯផ្លូវផ្សេងទៀតដែលមានរថយន្តបើកបរជាច្រើន ក៏មានដើមឈើបាក់រលំដែរ ។

គួរបញ្ជាក់ថា នេះពុំមែនជាលើកទី១ទេ កាលពីខែកញ្ញា ឆ្នាំ២០២៤ ពលរដ្ឋអូស្ត្រាលីរាប់ម៉ឺននាក់នៅរដ្ឋ Tasmania គ្មានអគ្គិសនីប្រើប្រាស់ក្រោយពីខ្យល់ព្យុះធ្វើឱ្យភ្លៀងធ្លាក់ខ្លាំង រហូតដល់អាជ្ញាធរប្រកាសឱ្យប្រុងប្រយ័ត្នទឹកជំនន់ ។ ពេលនោះ ក្រុមហ៊ុនផលិតអគ្គិសនីបានប្រមូលកម្លាំងដោះស្រាយបញ្ហាដាច់ចរន្តអគ្គិសនី ដើម្បីឱ្យពលរដ្ឋមានអគ្គិសនីប្រើប្រាស់ ៕

សហរដ្ឋអាមេរិក ៖ រដ្ឋបាលចំណីអាហារ និងឱសថអាមេរិក (FDA) បានប្រកាសហាមឃាត់ការប្រើប្រាស់សារធាតុពណ៌ក្រហម (FD&C Red No.3) ក្នុងចំណីអាហារ និងថ្នាំរបស់អាមេរិក ចាប់ពីថ្ងៃទី១៥ ខែមករា ឆ្នាំ២០២៧ តទៅ ពីព្រោះសារធាតុនេះនឹងបង្កជំងឺមហារីក ។ អាមេរិកបានរកឃើញសារធាតុនេះនៅក្នុងចំណីអាហារជាច្រើននាពេលបច្ចុប្បន្ន ដូចជា ៖ ស្ករគ្រាប់ និងថ្នាំផ្តាសាយ ។

សារព័ត៌មានអាមេរិករាយការណ៍ថា សារធាតុពណ៌ក្រហម ត្រូវបានប្រើប្រាស់ក្នុងចំណីអាហារជាច្រើនប្រភេទនៅអាមេរិក ដូចជា ៖ ស្ករគ្រាប់ ដែលផលិតដោយក្រុមហ៊ុន Ferrara Candy, គ្រាប់ស្ករល្អិតៗសម្រាប់រោយលើនំ ផលិតដោយក្រុមហ៊ុន Betty Crocker និងផលិតផលអាហារបំប៉នក្លិនស្ត្របឺរី ម៉ាក Ensure ជារបស់ក្រុមហ៊ុន Abbott Laboratories ។

ក្រៅពីនេះ អាជ្ញាធរក៏បានរកឃើញសារធាតុពណ៌ក្រហមក្នុងថ្នាំមួយចំនួនផងដែរ ដូចជា ៖ ថ្នាំ Vyvanse របស់ក្រុមហ៊ុន Takeda Pharmaceutical Co. ដែលថ្នាំនេះសម្រាប់ព្យាបាលអ្នកជំងឺពាក់ព័ន្ធនឹងអារម្មណ៍, ថ្នាំព្យាបាលការក្រហល់ក្រហាយលើដើមទ្រូង និងចុងដង្ហើម ជារបស់ក្រុមហ៊ុន Costco Wholesale Corp. និងក្រុមហ៊ុន Rite Aid Corp. ។

សមាគមផលិតនំចំណីជាតិអាមេរិកបញ្ជាក់ថា សុវត្ថិភាពចំណីអាហារ គឺក្រុមហ៊ុនផលិតនំអាមេរិកផ្តល់ភាពសំខាន់ជាចម្បង ព្រមទាំងអនុវត្តតាមគោលការណ៍សុវត្ថិភាពអាហាររបស់រដ្ឋបាលចំណីអាហារ និងឱសថអាមេរិក ។ អាមេរិកហៅសារធាតុពណ៌ក្រហមថា FD&C Red No.3 រីឯនៅអឺរ៉ុបហៅថា Erythrosine (E127) ក៏បានហាមប្រើសារធាតុនេះក្នុងចំណីអាហារដែរ ដូចជា ៖ អូស្ត្រាលី និងនូវែលសេឡង់ ។

កាលពី៣០ឆ្នាំមុន រដ្ឋបាលចំណីអាហារ និងឱសថអាមេរិក បានហាមឃាត់ការប្រើប្រាស់សារធាតុពណ៌ក្រហមក្នុងគ្រឿងសម្អាង ក្រោយពីមានភស្តុតាងបញ្ជាក់ថា សារធាតុនេះបង្កជំងឺមហារីកលើសត្វកណ្តុរក្នុងបន្ទប់ពិសោធន៍ ។ ក្រោយមក នៅឆ្នាំ២០២២ ពលរដ្ឋអាមេរិកបានតវ៉ាឱ្យរដ្ឋបាលចំណីអាហារហាមឃាត់ការប្រើប្រាស់សារធាតុនេះក្នុងចំណីអាហារ ។ នេះបើតាមការចុះផ្សាយរបស់សារព័ត៌មានស៊ីនហួរ កាលពីថ្ងៃទី១៦ ខែមករា ឆ្នាំ២០២៥ ៕

ប្រទេសជប៉ុន ៖ ក្រុមហ៊ុនផលិតមនុស្សយន្តនៅទីក្រុងតូក្យូ ប្រទេសជប៉ុន ឈ្មោះ Yukai Engineering បានបង្ហាញឆ្មាយន្តខ្នាតតូច Nékojita FuFu ក្នុងកម្មវិធីតាំងពិព័រណ៍បច្ចេកវិទ្យា «CES 2025» ដែលឆ្មាយន្តនេះមានសមត្ថភាពពិសេសអាចជួយផ្លុំកាហ្វេក្តៅក្នុងកែវឱ្យឆាប់ត្រជាក់ ឬអាហារក្តៅក្នុងចាន ។ ការផលិតឆ្មាយន្តនេះ ក្នុងគោលបំណងជួយអ្នកដែលមានបញ្ហាអណ្តាតពេលផឹកភេសជ្ជៈក្តៅ និងជួយអ្នកមានកូនតូច ។

ឆ្មាយន្ត Nékojita FuFu ត្រូវបានបំពាក់កង្ហារខ្នាតតូចនៅខាងក្នុង និងប្រើប្រាស់បច្ចេកវិទ្យា AI ពិសេសឈ្មោះ Fuing System ដើម្បីឱ្យវាអាចផ្លុំកាហ្វេក្តៅដូចមនុស្សបំផុត ហើយក្រុមហ៊ុនមានគម្រោងលក់ឆ្មាយន្តនៅប្រទេសជប៉ុន នាពាក់កណ្តាលឆ្នាំ២០២៥ ក្នុងតម្លៃប្រមាណ ២៥ដុល្លារអាមេរិក ។ Nékojita FuFu គឺជាឧបករណ៍តូចមួយអាចដាក់លើកែវកាហ្វេ ឬចានអាហារតាមតម្រូវការ និងអាចបញ្ជាវាឱ្យផ្លុំកាហ្វេខ្លាំង ឬផ្លុំថ្នមៗ ។

ឆ្មាយន្តនេះមិនត្រឹមតែជួយលោកអ្នកឱ្យរីករាយក្នុងការផឹកកាហ្វេប៉ុណ្ណោះទេ ប៉ុន្តែវាជួយមនុស្សចាស់ងាយស្រួលផឹកភេសជ្ជៈក្តៅ ព្រមទាំងជួយឪពុក-ម្តាយងាយស្រួលបញ្ចុកអាហារកូនតូចៗផងដែរ ។ យើងរីករាយណាស់សម្រាប់ការបង្ហាញឆ្មាយន្តក្នុងកម្មវិធីតាំងពិព័រណ៍បច្ចេកវិទ្យា «CES 2025» ហើយសង្ឃឹមថា លោកអ្នកនឹងពេញចិត្តវា ។

លោកអ្នកអាចដាក់ឆ្មាយន្តតូចច្រឡឹងនេះលើកែវកាហ្វេក្តៅ រួចហើយ បញ្ជាវាឱ្យផ្លុំកាហ្វេឱ្យឆាប់ត្រជាក់ ។ បើទោះជាមើលទៅឃើញថា វាដូចជាឆ្មាជ័រធម្មតា ប៉ុន្តែបច្ចេកវិទ្យានៅផ្នែកខាងក្នុងគួរឱ្យចាប់អារម្មណ៍ខ្លាំងណាស់ ។ នេះបើតាមការលើកឡើងរបស់ប្រធានផ្នែកទីផ្សារក្រុមហ៊ុន Yukai Engineering ។

កាលពីឆ្នាំ២០១៨ ក្រុមហ៊ុន Yukai Engineering បានបង្ហាញខ្នើយទន់កន្ទុយឆ្មាសិប្បនិម្មិត ឈ្មោះ Qoobo ដែលអាចយកតាមខ្លួនដូចឆ្មាពិតប្រាកដ សម្រាប់ជួយព្យាបាលផ្លូវចិត្តអ្នកប្រើប្រាស់ ។ រីឯឆ្មាយន្ត Nékojita FuFu គឺសម្រាប់ផ្តល់ភាពងាយស្រួលដល់អ្នកប្រើប្រាស់ ពីព្រោះឪពុក-ម្តាយមួយចំនួននឿយហត់ក្នុងការផ្លុំអាហារបញ្ចុកកូនតូច ៕