តើហេតុអ្វីបានជាថៃចាប់អារម្មណ៍តែរឿងព្រំដែនជាមួយខាងកម្ពុជា ​រីឯរឿងជម្លោះនៅព្រំដែនភាគខាងត្បូង តើថៃមិនបារម្ភពីការបំបែករដ្ឋទេឬ? ឬក៏ជាល្បែងនយោបាយចលនាជាតិនិយមហួសហេតុជាខែលការពារអំណាចខ្លួន? សំណួរនេះបានចោទសួរចំៗទៅរដ្ឋាភិបាលលោក Anutin ដែលនឹងក្លាយជានាយករដ្ឋមន្ត្រីថ្មីល្បីល្បាញខាងកេងបន្លំលើលទ្ធផលបោះឆ្នោត ក្រោមរូបភាពចលនាជាតិនិយមថៃយ៉ាងងងិតងងុល មិនក្រែងចិត្តកម្ពុជាដែលតែងតែចង់បានសន្តិភាព ។

អ្នកជំនាញសន្តិសុខថៃដ៏ល្បីបានដាក់ចំៗទៅកាន់លោក Anutin Charnvirakul និងរដ្ឋាភិបាលថ្មី កុំផ្តោតតែលើជំរុញឱ្យពលរដ្ឋមានស្មារតីជាតិនិយមជ្រុលរឿងព្រំដែនកម្ពុជា-ថៃ រហូតភ្លេចដោះស្រាយបញ្ហាអសន្តិសុខនៅបណ្តាខេត្តភាគខាងត្បូងដែលបង្កឡើងដោយក្រុមបះបោរ ដូចជា ៖ ការដាក់គ្រាប់បែ.ក និងធ្វើសកម្មភាពហិង្សាស្ទើរគ្រប់ទីកន្លែង ដើម្បីផ្តាច់ទឹកដីចេញពីប្រទេសថៃ ។ បើរដ្ឋាភិបាលថៃ និងអ្នកនយោបាយជ្រុលនិយមមិនចាប់អារម្មណ៍ទេថៃនឹងបាត់បង់ទឹកដីនៅភាគខាងត្បូងមិនខាន ។

លោក Anutin ប្រធានគណបក្សភូមិចៃថៃ ត្រូវបានមហាជនមើលឃើញថា ទទួលជ័យជម្នះក្នុងការបោះឆ្នោតកាលពីថ្ងៃទី៨ ខែកុម្ភៈ ឆ្នាំ២០២៦ ដោយសារជំរុញឱ្យពលរដ្ឋមានស្មារតីជាតិនិយមជ្រុល និងកេងចំណេញផលប្រយោជន៍នយោបាយពីបញ្ហាព្រំដែនកម្ពុជា-ថៃ ។ លោក Anutin ផ្តោតតែលើការបិទព្រំដែនជាមួយកម្ពុជា សាងសង់របងព្រំដែន គ្រប់គ្រងទឹកដីកម្ពុជានៅព្រំដែនដោយខុសច្បាប់ រហូតភ្លេចដោះស្រាយបញ្ហាព្រំដែននៅភាគខាងត្បូងដែលកំពុងតែក្តៅគគុក ។

ការរិះគន់របស់អ្នកជំនាញសន្តិសុខ ស្របពេលបណ្តាខេត្តភាគខាងត្បូងប្រទេសថៃមានបញ្ហាអសន្តិសុខកើតឡើងស្ទើរគ្រប់ទីកន្លែង ជាពិសេស ការបំផ្ទុះគ្រាប់បែកជាបន្តបន្ទាប់របស់ក្រុមផ្តាច់ខ្លួន ដែលប៉ះពាល់ដល់ការរស់នៅរបស់ពលរដ្ឋថៃយ៉ាងខ្លាំង ។ អាជ្ញាធរ និងសមត្ថកិច្ចថៃបានព្យាយាមបង្ក្រាបក្រុមផ្តាច់ខ្លួនរហូតមក ប៉ុន្តែនៅតែមានការបះបោរមិនឈប់ឈរ ខណៈរដ្ឋាភិបាលថៃក្រោមការដឹកនាំរបស់លោក Anutin មិនសូវចាប់អារម្មណ៍ព្រំដែនភាគខាងត្បូងទេ ។

ការបណ្តុះស្មារតីជាតិនិយមជ្រុលរឿងព្រំដែនកម្ពុជា-ថៃ ធ្វើឱ្យគណបក្សភូមិចៃថៃរបស់លោក Anutin ទទួលបានការគាំទ្រពីពលរដ្ឋយ៉ាងខ្លាំង ដោយសារលោកសន្យាថា នឹងប្រកាន់គោលជំហរដាច់ខាតជាមួយកម្ពុជា ព្រមទាំងបន្តបិទព្រំដែន ។ ក្រៅពីនេះ ការបោះឆ្នោតគ្មានភាពសេរី ត្រឹមត្រូវ យុត្តិធម៌ និងគ្មានតម្លាភាព កេងបន្លំពេលរាប់សន្លឹកឆ្នោតនៅតាមមណ្ឌលនានាធ្វើឱ្យគណបក្សភូមិចៃថៃទទួលផលចំណេញ ។

តាមការចុះផ្សាយរបស់សារព័ត៌មាន Nation កាលពីថ្ងៃទី១៧ ខែកុម្ភៈ លោក សុឆាតិ បាំរុងសុខ អ្នកជំនាញសន្តិសុខនៅប្រទេសថៃ បានណែនាំឱ្យលោក Anutin កុំផ្តោតតែលើជំរុញឱ្យពលរដ្ឋមានស្មារតីជាតិនិយមជ្រុលរឿងព្រំដែនជាមួយកម្ពុជា រហូតភ្លេចព្រំដែនភាគខាងត្បូង ដោយលោកបានបង្ហោះសារក្នុងបណ្តាញសង្គមពីបញ្ហាអសន្តិសុខនៅភាគខាងត្បូងថា ពេលប្រទេសថៃចាប់ផ្តើមមានរដ្ឋាភិបាលថ្មី ជនល្មើសក៏បង្កប់គ្រាប់បែកចំនួន៧កន្លែង នៅខេត្តណារ៉ាធិវ៉ាត ទោះជាគ្រាប់បែកទាំងនេះមិនបណ្តាលឱ្យមនុស្សរងរបួស ប៉ុន្តែរដ្ឋាភិបាលត្រូវតែគិតពីបញ្ហានេះ ។

លោកចាត់ទុកការបង្កប់គ្រាប់បែករហូតដល់៧កន្លែងនៅភាគខាងត្បូង គឺជាការស្វាគមន៍រដ្ឋាភិបាលថ្មីដែលកំពុងរៀបចំបង្កើតរដ្ឋាភិបាលចម្រុះ ប៉ុន្តែគ្មានអ្នកណាចាប់អារម្មណ៍ពីបញ្ហាអសន្តិសុខនេះ ពីព្រោះបច្ចុប្បន្ន គ្រប់គ្នាចាប់អារម្មណ៍តែរឿងគណៈរដ្ឋមន្ត្រីថ្មី ។ ការបង្កប់គ្រាប់បែកជាច្រើនគ្រាប់ ក៏បញ្ជាក់ពីស្ថានការណ៍អសន្តិសុខភាគខាងត្បូងចាប់ផ្តើមកើតឡើងតាំងពីដើមឆ្នាំ២០២៦ និងបង្ហាញទៅរដ្ឋាភិបាលថៃថា កុំភ្លេចបញ្ហាព្រំដែនភាគខាងត្បូង ដោយសារមានអំពើហិង្សាជាបន្តបន្ទាប់ ។

ភាគខាងត្បូងកើតអសន្តិសុខតាំងពីការដុតស្ថានីយប្រេងឥន្ធនៈ PTT ចំនួន១១កន្លែង និងហេតុការណ៍អាក្រក់ជាច្រើនកើតឡើងជាប់ៗគ្នាដើម្បីបំផ្លាញប្រទេសថៃគួរឱ្យបារម្ភ ហើយក្រុមជនល្មើសនឹងបង្កៃសន្តិសុខថែមទៀតដើម្បីផ្តាច់ទឹកដីចេញពីប្រទេសថៃ ។ រីឯរដ្ឋាភិបាលថៃវិញបារម្ភតែរឿងដណ្តើមទឹកដីកម្ពុជា និងខ្លាចកម្ពុជាទាមទារទឹកដីត្រឡប់ទៅវិញ ប៉ុន្តែរដ្ឋាភិបាលថៃ និងអ្នកនយោបាយមិនចាប់អារម្មណ៍ពីការបាត់បង់ទឹកដីនៅភាគខាងត្បូងទេ ។

អ្នកជំនាញសន្តិសុខរូបនេះផ្តាំផ្ញើទៅកាន់រដ្ឋាភិបាល និងកងទ័ពថៃ បែងចែកពេលវេលាមកដោះស្រាយបញ្ហានៅភាគខាងត្បូងខ្លះផង កុំផ្តោតតែលើជំរុញឱ្យពលរដ្ឋមានស្មារតីជាតិនិយមជ្រុលរឿងព្រំដែនកម្ពុជា-ថៃខ្លាំងពេក រហូតភ្លេចពីការបះបោរផ្តាច់ទឹកដីនៅភាគខាងត្បូង ពីព្រោះជាច្រើនឆ្នាំមកនេះ ក្រុមផ្តាច់ខ្លួនបានបង្កសកម្មភាពអសន្តិសុខកាន់តែខ្លាំងគួរឱ្យបារម្ភ ៕

ក្រោយសមរភូមិយោធាត្រូវបានបញ្ចប់! សមរភូមិការទូត និងការប្រមូលឯកសារទាក់ទងនឹងខ្សែបន្ទាត់ព្រំដែនរវាងកម្ពុជា និង ថៃ កំពុងទទួលបានការចាប់អារម្មណ៍សារជាថ្មី ខណៈសារព័ត៌មានអន្តរជាតិល្បីៗកាលពីពេលថ្មីៗនេះបានលើកឡើងពីជំហានដ៏សំខាន់របស់កម្ពុជាក្នុងការស្នើសុំប្រទេសបារាំងដែលជាអតីតអាណាព្យាបាលឲ្យផ្ដល់ជំនួយជាឯកសារ និងផែនទីដើម ដើម្បីដោះស្រាយវិវាទជាមួយភាគីថៃ។

ផ្អែកតាមការចេញផ្សាយរបស់ទីភ្នាក់ងារ DW របស់អាល្លឺម៉ង់ និង France 24 របស់បារាំងបានឲ្យដឹងថា ឯកសារប្រវត្តិសាស្ត្រជាប់ពាក់ព័ន្ធនឹងការកំណត់ខ្សែបន្ទាត់ព្រំដែនដែលមានអាយុកាលរាប់រយឆ្នាំ បានក្លាយជាចំណុចដ៏ក្ដៅគគុកនៃសមរភូមិការទូតរវាងក្រុងភ្នំពេញ និងក្រុងបាងកក ខណៈស្ថាប័នសារព័ត៌មានអន្តរជាតិទាំងនេះ ផ្តោតសំខាន់លើការស្នើសុំដ៏សំខាន់របស់រាជរដ្ឋាភិបាលកម្ពុជា។

តាមអត្ថបទដែលចុះផ្សាយទីភ្នាក់ងារ DW កម្ពុជាបានស្នើសុំជំនួយជាផ្លូវការពីបារាំងក្នុងកិច្ចខិតខំប្រឹងប្រែងដើម្បីដោះស្រាយជម្លោះព្រំដែនដ៏យូរអង្វែងជាមួយប្រទេសថៃ ដោយបានបង្ហាញពីកិច្ចខិតខំប្រឹងប្រែងជាបន្តបន្ទាប់របស់ទីក្រុងភ្នំពេញសម្រាប់ដំណោះស្រាយដោយសន្តិវិធី និងផ្អែកលើច្បាប់។ នាយករដ្ឋមន្ត្រីកម្ពុជា លោក ហ៊ុន ម៉ាណែត បានសរសេរទៅកាន់ប្រធានាធិបតីបារាំង លោក អេម៉ានុយអែល ម៉ាក្រុង កាលពីដើមខែនេះ ដោយស្វែងរកការចូលមើលផែនទីសម័យអាណានិគម និងឯកសារព្រំដែនប្រវត្តិសាស្ត្រ ដែលត្រូវបានគូរជាលើកដំបូងនៅពេលដែលបារាំងគ្រប់គ្រងកម្ពុជាជាអាណាព្យាបាលពីឆ្នាំ 1863 ដល់ឆ្នាំ 1953។

កត្តាដែលជំរុញឲ្យសំណើររបស់កម្ពុជាក្លាយជាប្រធានបទគួរឲ្យចាប់អារម្មណ៍សម្រាបអន្តរជាតិ គឺដោយសារតែកម្ពុជាបានបង្ហាញចេតនារបស់ខ្លួនក្នុងការស្វែងរកការបំភ្លឺបន្ថែមពីតុលាការយុត្តិធម៌អន្តរជាតិ និងបានលើកឡើងពីការព្រួយបារម្ភនៅក្រុមប្រឹក្សាសន្តិសុខអង្គការសហប្រជាជាតិ ដែលផ្ទុយស្រឡះពីប្រទេសថៃ ដែលតែងសង្កត់ធ្ងន់ជាសាធារណៈលើចំណង់ចំណូលចិត្តរបស់ខ្លួនចំពោះការចរចាទ្វេភាគី ដោយមិនចង់បានការសម្របសម្រួលពីភាគីទីបី , ទាមទារប្រើប្រាស់ផែនទីខ្នាត 1:50,000 ដែលគូសដោយខ្លួនឯង និងបដិសេធផែនទីដែលផលិតដោយបារាំងខ្នាត 1:200,000 យោងតាមសន្ធិសញ្ញាបារាំង-សៀម ឆ្នាំ1907។

អ្នកវិភាគបរទេសយល់ឃើញថា តាមរយៈការទាញបញ្ហានេះទៅកាន់ទីក្រុងប៉ារីស កម្ពុជាកំពុងព្យាយាម «បញ្ជាក់ពីភាពស្របច្បាប់» នៃឯកសារប្រវត្តិសាស្ត្រទាំងនេះ ដែលជាជំហានដ៏មានឥទ្ធិពល ប្រសិនបើបញ្ហានេះត្រូវបញ្ជូនទៅកាន់តុលាការយុត្តិធម៌អន្តរជាតិ (ICJ)៕

ស្របពេលពិភពលោកមានចម្ងល់យូរមកហើយ តើមានមនុស្សក្រៅភពដែរឬទេ? កាលពីថ្ងៃទី១៤ ខែកុម្ភៈ ឆ្នាំ២០២៦ អតីតប្រធានាធិបតីអាមេរិក លោក បារ៉ាក់ អូបាម៉ា អះអាងថា មនុស្សក្រៅភព (Alien) មានពិតមែន យើងមានឱកាសតិចណាស់នឹងឃើញពួកគេ ។ ប៉ុន្តែលោកបដិសេធចំពោះការលើកឡើងពីរដ្ឋាភិបាលអាមេរិកលាក់ទុកមនុស្សក្រៅភពនៅតំបន់៥១ (Area 51) មានទីតាំងលើវាលខ្សាច់ក្នុងរដ្ឋ Nevada ដែលជាទីកន្លែងអាថ៌កំបាំងបំផុតរបស់កងទ័ពអាកាសអាមេរិក ។

ពិភពលោកភ្ញាក់ផ្អើលយ៉ាងខ្លាំងដែលអតីតប្រធានាធិបតីអាមេរិក លោក បារ៉ាក់ អូបាម៉ា (Barack Obama) ឆ្លើយតបសំណួររបស់ពិធីករក្នុងកម្មវិធី Podcast កាលពីថ្ងៃទី១៤ ខែកុម្ភៈ ឆ្នាំ២០២៦ ថា ពិតជាមានមនុស្សក្រៅភព ថែមទាំងទាក់ទងមកផែនដីក្នុងអំឡុងពេលលោកកាន់តំណែង ប៉ុន្តែមានឱកាសតិចណាស់ដែលអាចឃើញពួកគេ ។ វាធ្វើឱ្យមហាជនងឿងឆ្ងល់កាន់តែខ្លាំង តើលោកដឹងដោយរបៀបណា ហើយមនុស្សក្រៅភពរស់នៅទីណា ។

ឆ្លើយតបនឹងសំណួររបស់លោក Brian Tyler Cohen ពិធីករកម្មវិធី Podcast ដែលសួរថា ៖ «តើមានមនុស្សក្រៅភពដែរឬទេ?» លោក បារ៉ាក់ អូបាម៉ា ថា ពិតជាមានមនុស្សក្រៅភពមែន ពួកគេមិនបាននៅតំបន់៥១ (Area 51) ប៉ុន្តែលោកមិនធ្លាប់ឃើញទេ ។ មនុស្សក្រៅភពមិនត្រូវបានឃុំឃាំងនៅតំបន់៥១ ឬបង្ខាំងនៅក្រោមដីទេ លុះត្រាតែមានផែនការឃុបឃិតគ្នាលាក់ខ្លួនមនុស្សក្រៅភព សូម្បីប្រធានាធិបតីអាមេរិកក៏មិនដឹង ។

ពាក្យសម្តីរបស់លោក បារ៉ាក់ អូបាម៉ា ត្រូវបានសារព័ត៌មាននានាលើពិភពលោក ព្រមទាំងទស្សនាវដ្តីយកទៅផ្សព្វផ្សាយព្រោងព្រាតបណ្តាលឱ្យផ្ទុះការចាប់អារម្មណ៍ពេញពិភពលោក និងសន្និដ្ឋានថា លោក បារ៉ាក់ អូបាម៉ា អាចជ្រាបពីមនុស្សក្រៅភពស្ថិតនៅទីណា ។

បន្ទាប់ពីព័ត៌មានមនុស្សក្រៅភពល្បីសុះសាយខ្លាំង លោក បារ៉ាក់ អូបាម៉ា ក៏បានបង្ហោះសារក្នុង Instagram នៅថ្ងៃទី១៥ ខែកុម្ភៈ ថា ៖ «ខ្ញុំព្យាយាមទប់អារម្មណ៍ពេលឆ្លើយតបសំណួរយ៉ាងឆាប់រហ័ស វាទទួលបានការចាប់អារម្មណ៍ខ្លាំង ខ្ញុំសូមបញ្ជាក់ថា ចក្រវាឡពិតជាធំទូលំទូលាយ ហើយអាចមានមនុស្សក្រៅភពនៅក្រៅផែនដី ប៉ុន្តែមានចម្ងាយឆ្ងាយពីប្រព័ន្ធព្រះអាទិត្យ ទើបយើងមានឱកាសតិចនឹងឃើញពួកគេ» ។

លោកបញ្ជាក់ថា មនុស្សក្រៅភពបានទាក់ទងមកកាន់មនុស្សនៅលើផែនដីពិតមែនក្នុងអំឡុងពេលលោកកាន់តំណែងជាប្រធានាធិបតីអាមេរិក ប៉ុន្តែគ្មានភស្តុតាងបញ្ជាក់ ។ ពាក្យសម្តីរបស់លោកស្របគ្នានឹងការលើកឡើងជាយូរមកហើយថា រដ្ឋាភិបាលអាមេរិកបានលាក់ទុកមនុស្សក្រៅភពនៅតំបន់៥១ មានទីតាំងលើវាលខ្សាច់ក្នុងរដ្ឋ Nevada ដែលជាទីកន្លែងអាថ៌កំបាំងបំផុតរបស់កងទ័ពអាកាសអាមេរិក ។

ចំណែកលោកប្រធានាធិបតី Donald Trump មិនជឿថា មានមនុស្សក្រៅភពទេ បើទោះជាលោកធ្លាប់និយាយជាមួយមនុស្សមួយចំនួនអះអាងថា មនុស្សក្រៅភពមានពិតមែន និងធ្លាប់ឃើញយានរបស់មនុស្សក្រៅភពលើអវកាស ដែលអាចជា UFO ។

កាលពីឆ្នាំ២០១៩ មានមនុស្សរហូតដល់ជាង១លាន ៥សែននាក់ បានចុះឈ្មោះធ្វើដំណើរទៅតំបន់៥១ (Area 51) ក្នុងនោះក៏មាន Influencer ប្រមាណ១៥០នាក់ ប្រមូលផ្តុំគ្នានៅជុំវិញតំបន់៥១ ដោយសារចង់ដឹងច្បាស់ពីមនុស្សក្រៅភព ប៉ុន្តែវាគ្មានអ្វីគួរឱ្យភ្ញាក់ផ្អើលទេ ។

បើយោងតាមឯកសារសម្ងាត់ដែលបែកធ្លាយកាលពីឆ្នាំ២០១៣ ឱ្យដឹងថា តំបន់៥១ គឺជាកន្លែងសម្រាប់សាកល្បងគម្រោងអវកាសផ្សេងៗរបស់រដ្ឋាភិបាលអាមេរិក ព្រមទាំងជាកន្លែងអនុវត្តគម្រោងឃ្លាំមើលអវកាស U-2 និង Oxcart ៕

រុស្ស៊ីអះអាងថា នឹងបញ្ជូនប្រេងឱ្យគុយបា តើរុស្សុីបញ្ជូនដោយរបៀបណាវិញ បើសហរដ្ឋអាមេរិកបិទខ្ទប់ច្រកនាំចូលអស់ទៅហើយ ហើយការនាំចូលតាមនាវាត្រូវចំណាយពេលជិត២ខែ ត្រូវប្រឈមនឹងនាវាចំបាំងសហរដ្ឋអាមេរិកទៀត រីឯចិនវិញក៏បារម្ភមិនធម្មតាដែរ ណែនាំឱ្យគុយបាប្រើផ្ទាំងសូឡា តែតាមការដឹង យ៉ាងហោច គឺនៅឆ្នាំ២០២៨ ឯណោះទេ ។ តើគុយបាអាចទ្រាំទ្របានកម្រិតណា ប្រសិនបើ USA នៅតែបិទខ្ទប់ ឬមហាមិត្តទឹកកកបានតែមាត់ថា ជួយៗឱ្យតែឮ និងផ្តល់ក្តីសង្ឃឹមពីលើមេឃទេ ខណៈដែលប្រទេសខ្លួនកំពុងតែជាប់ដៃវាយអ៊ុយក្រែនដែរ?

ស្ថានការណ៍ខ្វះខាតប្រេងឥន្ធនៈនៅគុយបា បានធ្លាក់ក្នុងវិបត្តិ! ការដាក់សម្ពាធសេដ្ឋកិច្ចពីសំណាក់រដ្ឋាភិបាលអាមេរិកធ្វើឱ្យគុយបាជួបការលំបាកយ៉ាងខ្លាំង ដែលជំរុញឱ្យរុស្ស៊ីប្រកាសគាំទ្រ និងជួយសង្គ្រោះគុយបាជាមិត្តរបស់ខ្លួនពីការខ្វះខាតប្រេង ដោយត្រៀមបញ្ជូនប្រេងទៅកាន់គុយបាឆាប់ៗនេះ ។

ស្ថានទូតរុស្ស៊ីប្រចាំទីក្រុងហាបាណា ប្រទេសគុយបា ប្រកាសថា រុស្ស៊ីនឹងបញ្ជូនប្រេងឱ្យគុយបា ក្នុងនាមមនុស្សធម៌នាពេលឆាប់ៗ ដើម្បីដោះស្រាយបញ្ហាខ្វះខាតប្រេងយ៉ាងខ្លាំងក្នុងប្រទេសនេះ បន្ទាប់ពីការនាំចូលប្រេងរបស់គុយបាពីប្រទេសនានាត្រូវបានកាត់ផ្តាច់ជាបន្តបន្ទាប់ និងការដាក់សម្ពាធពីរដ្ឋាភិបាលអាមេរិក ។ នេះបើតាមការចុះផ្សាយរបស់សារព័ត៌មានបរទេសកាលពីថ្ងៃទី១៧ ខែកុម្ភៈ ឆ្នាំ២០២៦ ។

រុស្ស៊ីចេញមុខគាំទ្រគុយបា ស្របពេលរដ្ឋាភិបាលក្រុងវ៉ាស៊ីនតោនបង្កើនវិធានការដាក់សម្ពាធសេដ្ឋកិច្ចគុយបា និងគំរាមដំឡើងពន្ធទំនិញរបស់ប្រទេសណាដែលហ៊ានបញ្ជូនប្រេងទៅគុយបា ទើបធ្វើឱ្យប្រទេសនានាផ្អាកការនាំចេញប្រេង ។ បច្ចុប្បន្ន គុយបាខ្វះខាតប្រេងយ៉ាងខ្លាំង ខណៈប្រេងនៅសេសសល់អាចប្រើប្រាស់ត្រឹមតែ៣ខែទៀតប៉ុណ្ណោះ ។

កន្លងមក គុយបាពឹងផ្អែកលើការនាំចូលប្រេងពីទីក្រុង Caracas ប្រទេសវេណេស៊ុយអេឡា ប៉ុន្តែអតីតប្រធានាធិបតីវេណេស៊ុយអេឡា លោក Nicolas Maduro និងភរិយា ត្រូវបានឃុំខ្លួនដោយកងកម្លាំងពិសេសអាមេរិកកាលពីថ្ងៃទី៣ ខែមករា ឆ្នាំ២០២៦ ធ្វើឱ្យការនាំចេញប្រេងពីទីក្រុង Caracas មកកាន់គុយបា ត្រូវផ្អាកភ្លាមៗ ។

បើតាមមន្ត្រីទូតរុស្ស៊ី ការកាត់ផ្តាច់ប្រភពនាំចូលប្រេងធ្វើឱ្យគុយបាខ្វះខាតប្រេងយ៉ាងធ្ងន់ធ្ងរ និងរងផលប៉ះពាល់ខ្លាំងជាងពេលគុយបាធ្លាប់ខ្វះប្រេងកាលពីឆ្នាំ២០២៥ ។ ពេលនេះ រោងចក្រផលិតអគ្គិសនីជាច្រើនកន្លែងកាត់បន្ថយកម្លាំងផលិតបណ្តាលឱ្យដាច់ចរន្តអគ្គិសនីស្ទើរគ្រប់កន្លែង ជាពិសេស ការដឹកជញ្ជូនតាមមធ្យោបាយសាធារណៈ និងក្រសួងសុខាភិបាល រងផលប៉ះពាល់ជាងគេ ប្រសិនបើការបញ្ជូនប្រេងយឺតយ៉ាវ នឹងប៉ះពាល់ដល់ពលរដ្ឋគុយបា ប្រមាណ១១លាននាក់ ។

ការបញ្ជូនប្រេងពីរុស្ស៊ី គឺតាមផ្លូវសមុទ្រ ដោយចំណាយពេលចាប់ពី៤០ថ្ងៃ ទៅ៥០ថ្ងៃ ទើបប្រេងមកដាក់ទីក្រុងហាបាណា ។ កាលពីខែកុម្ភៈ ឆ្នាំ២០២៥ ប្រធានាធិបតីរុស្ស៊ី លោក Vladimir Putin បានអនុញ្ញាតឱ្យរដ្ឋាភិបាលរុស្ស៊ីបញ្ជូនប្រេងឱ្យគុយបា ចំនួន១សែនលីត្រ ស្មើទឹកប្រាក់៦០លានដុល្លារ ប៉ុន្តែប្រេងរុស្ស៊ីមិនអាចបំពេញតម្រូវការប្រើប្រាស់របស់គុយបាទេ គឺគុយបាត្រូវការប្រេងរហូតដល់៨លានលីត្រក្នុង១ឆ្នាំ ដើម្បីជំរុញសេដ្ឋកិច្ច ។

រុស្ស៊ីថ្កោលទោសវិធានការរបស់លោកប្រធានាធិបតី Donald Trump ជាការដាក់សម្ពាធសេដ្ឋកិច្ចគុយបា ខណៈលោក Trump ថា ដើម្បីជំរុញឱ្យរដ្ឋាភិបាលគុយបាផ្លាស់ប្តូរគោលជំហរនយោបាយ ។ តាមអ្នកវិភាគ គុយបាក្លាយជាទីកន្លែងប្រកួតប្រជែងរវាងក្រុមប្រទេសលោកខាងលិចជាមួយសម្ព័ន្ធមិត្តរបស់គុយបា ដោយសារគុយបាមានទំនាក់ទំនងជិតស្និទ្ធជាមួយក្រុមប្រទេស BRICS (ដែលមានសមាជិក១០ប្រទេស មានគោលដៅកាត់បន្ថយការពឹងផ្អែកលើប្រាក់ដុល្លារអាមេរិក ) ។

គួរបញ្ជាក់ថា ក្រៅពីរុស្ស៊ី ចិនក៏បារម្ភពីគុយបាខ្វះខាតប្រេងផងដែរ ដោយចិនជំរុញឱ្យគុយបាប្រើប្រាស់ផ្ទាំងសូឡាស្រូបពន្លឺព្រះអាទិត្យរបស់គម្រោងបង្កើតទីវាលតម្រៀបផ្ទាំងសូឡាទ្រង់ទ្រាយធំ ចំនួន៩២កន្លែង នៅឆ្នាំ២០២៨ ដំណើរការដោយក្រុមហ៊ុន Yangtze Ecology and Energy Development Co. ៕