ឃើញមានអ្នកមិនពេញចិត្តច្រើននិងមានការជជែកវែកញែកចំពោះចំណាត់ការរបស់ឯកឧត្តម ញ៉ែម សំអឿន អភិបាលខេត្តរតនៈគីរី រឿងឱ្យមន្ត្រីធ្វើបញ្ជីនិងប្រវត្តិសត្វឆ្កែតាមផ្ទះដើម្បីពង្រឹងសុវត្ថិភាព និងអនាម័យ លោកជំទាវ នឹម វណ្ណៈ ថារៀនមើលច្បាប់លេងៗក្រែងបានពន្លឺបញ្ញាខ្លះ។ ក្នុងនោះលោកជំទាវប្រកាន់ជំហរថាខ្លួនក៏ជាអ្នកស្រលាញ់សត្វតែក៏ស្រលាញ់និងគោរពអនុវត្តន៍ច្បាប់ដែលបានចែង។

នៅល្ងាចថ្ងៃទី១៩ មីនា លោកជំទាវ នឹម វណ្ណៈ ប្រធានក្រុមប្រឹក្សាភិបាល ក្រុមហ៊ុន អេស៊ីអ៊ី គ្រុប បានលើកឡើងនៅលើបណ្តាញសង្គមផ្ទាល់ខ្លួនថា « ស៊ីខ្សែខាងឆ្កែមេសឆ្កែឱ្យម៉ាណ??? រៀនមើលច្បាប់លេងៗក្រែងបានភ្លឺបញ្ញាខ្លះ។ ខ្ញុំស្រលាញ់សត្វឆ្កែ តែខ្ញុំស្រលាញ់និងគោរពអនុវត្តន៍តាមច្បាប់ដែលបានចែង។ ក្នុងរូបភាពដែលលោកជំទាវភ្ជាប់មកជាមួយនឹងសំណេរគឺបានបង្ហាញពីក្រមរដ្ឋប្បវេណី មាត្រា ៧៥០ ដែលបានចែងចំពោះការទទួលខុសត្រូវរបស់អ្នកកាន់កាប់សត្វ៖ បុគ្គលដែលកាន់កាប់សត្វ ត្រូវទទួលខុសត្រូវក្នុងការសងការខូចខាតដែលកើតឡើង ដល់អ្នកដទៃ ដោយសត្វដែលខ្លួនកាន់កាប់។

ជាមួយនឹងទំនួលខុសត្រូវលើសត្វចិញ្ចឹមដែលបង្កគ្រោះថ្នាក់លោកជំទាវ នឹម វណ្ណៈក៏បានបង្ហាញពីច្បាប់ស្តីពីចរាចរណ៍ផ្លូវគោកមាត្រា៣៣..អ្នកជិះ អ្នកដឹក ឬអ្នកបរសត្វ ត្រូវអនុវត្តដូចខាងក្រោម៖ ១- មិនត្រូវបង្កឱ្យមានឧបសគ្គឬគ្រោះថ្នាក់ដល់អ្នកប្រើប្រាស់ផ្លូវផ្សេងទៀត ដោយត្រូវដាក់ ចំនួនមនុស្សដឹកឱ្យសមស្របនឹងចំនួនសត្វដែលអាចបញ្ជាសត្វឱ្យទៅឬឈប់បានគ្រប់គ្រាន់និងទាន់ពេលវេលា។ ២-នៅពេលយប់ឬពេលថ្ងៃ កាលណាមើលមិនឃើញច្បាស់ ត្រូវប្រើភ្លើងពណ៌សនៅខាងមុខនិងពណ៌ក្រហមនៅខាងក្រោយ។ ៣-នៅពេលឈប់នៅលើទ្រូងផ្លូវ មិនត្រូវបង្កឱ្យរំខានដល់យានជំនិះផ្សេងៗទៀត ដែលកំពុងធ្វើចរាចរណ៍។ ៤-នៅក្នុងទីប្រជុំជន អ្នកជិះ អ្នកដឹក ឬអ្នកបរសត្វនៅលើទ្រូងផ្លូវ ត្រូវឈប់នៅតាមទិសដែលខ្លួនកំពុងធ្វើចរាចរណ៍ ដោយអនុវត្តដូចខាងក្រោម៖
– ចំពោះទ្រូងផ្លូវដែលមានទិសចរាចរណ៍ពីរ ត្រូវឈប់ខាងស្តាំតាមទិសចរាចរណ៍ របស់ខ្លួន
– ចំពោះទ្រូងផ្លូវឯកទិស ត្រូវឈប់ខាងស្តាំឬខាងឆ្វេងតាមទិសចរាចរណ៍លើក លែងតែមាន ផ្លាកសញ្ញាហាមឃាត់។ ៥- ហាមលែងសត្វឱ្យដើររហេតរហូតលើផ្លូវ។

គួរឱ្យដឹងថាកាលពីពេលថ្មីៗកន្លងមកនេះអភិបាលខេត្តរតនៈគីរីបានបញ្ជាមន្រ្តីក្រោមឱវាទធ្វើបញ្ជីវត្តមានសត្វឆ្កែចិញ្ចឹមតាមផ្ទះ និងតាមដងផ្លូវ ដើម្បីពង្រឹងសុវត្ថភាពចរាចរណ៍ រួមទាំងអនាម័យ ខណៈគ្រោះថ្នាក់ចរាចរណ៍មួយចំនួនក៏កើតចេញពីសត្វឆ្កែក្នុងឯកឧត្តមក៏បានបញ្ជាក់ដែរថាកន្លងមកក៏ធ្លាប់ប៉ះពារដោយសារតែសត្វឆ្កែនេះដូចគ្នា៕

ពោធិ៍សាត់៖ សង្គមស៊ីវិលបានសំដែងការព្រួយបារម្ភយ៉ាងខ្លាំង ក្រោយអាជ្ញាធរបានចាប់ផ្តើមរុះរើលំនៅដ្ឋានរបស់ប្រជាពលរដ្ឋ ដែលមិនព្រមចាកចេញពីតំបន់អន្ទង់អាំង(ភ្នំ១៥០០) ស្ថិតនៅភូមិដីក្រហម ឃុំអន្លង់រាប ស្រុកវាលវែង នៅពេលដែលផុតឱសានវាទ នៅថ្ងៃ អង្គារ ទី១៨ ខែមីនានេះ ដើម្បីរៀបចំឱ្យទៅជាតំបន់បៃតងឡើងវិញ។

កន្លងមក មានពលរដ្ឋសរុបចំនួន៩៨ គ្រួសារបានមករស់នៅក្នុងតំបន់អន្ទង់អាំងនេះ ហើយភាគច្រើនបានយល់ព្រមចាកចេញ ទៅរស់នៅទីតាំងថ្មីដែលខាងអជ្ញាធរបានរៀបចំជូន។ ដោយឡែក នៅសល់ពលរដ្ឋចំនួន ១៩គ្រួសារទៀត ដែលមិនព្រមចាកចេញពីលំនៅដ្ឋានរបស់ខ្លួននោះទេ។

សូមជម្រាបថា រដ្ឋបាលខេត្តពោធិ៍សាត់ បានជូនដំណឹងជាថ្មីម្តងទៀត នៅថ្ងៃទី ៣ ខែមីនា ដល់គ្រួសារដែលនៅសេសល់ ក្នុងតំបន់ហាមឃាត់ថា អោយធ្វើការរុះរើ និងចាកចេញពីតំបន់អន្ទង់អាំងដោយខ្លួនឯងក្នុងរយៈពេល១៥ថ្ងៃ។ ក្នុងករណីផុតពេលកំណត់ បើនៅតែមិនព្រមចាកចេញនោះទេ រដ្ឋបាលខេត្ត នឹងចាត់វិធានការទៅតាមផ្លូវច្បាប់ ដោយមិនទទួលខុសត្រូវចំពោះការខូចខាតទ្រព្យសម្បត្តិ សម្ភារនោះឡើយ។

សមាគមអាដហុក យល់ឃើញថា អាជ្ញាធរ និងស្ថាប័នពាក់ព័ន្ធ គួរតែចុះទៅជួបប្រជាពលរដ្ឋដើម្បីសាកសួរ ប្រមូលព័ត៌មានបន្ថែមទៀត ពីហេតុផលដែលពួកគាត់ មិនព្រមចាកចេញ និង ស្តាប់កង្វល់ពីពួកគាត់ល្អជាជាងការដាក់ឱសានវាទក្នុងការរុះរើ ព្រោះការធ្វើបែបនេះអាចធ្វើឱ្យខូចខាតដល់ទ្រព្យសម្បត្តិ និងប៉ះពាល់ដល់សេដ្ឋកិច្ចគ្រួសារប្រជាពលរដ្ឋនៅតំបន់នោះកាន់តែធ្ងន់ធ្ងរឡើង ហើយជាចុងក្រោយ នឹងប៉ះពាល់ដល់មុខមាត់រាជរដ្ឋាភិបាល។

ពលរដ្ឋម្នាក់នៅតំបន់អន្ទង់អាំង សុំមិនបញ្ចេញឈ្មោះរៀបរាប់ទាំងទឹកភ្នែកថា បច្ចុប្បន្ននេះ អ្នកស្រីរត់គេចចេញពីលំនៅឋានរបស់ខ្លួន ដោយភ័យខ្លាចកងកម្លាំងអាជ្ញាធរចាប់ខ្លួនអ្នកស្រី ពីព្រោះតែការតវ៉ាដីធ្លី។ សព្វថ្ងៃនេះ កូនៗអ្នកស្រីកំពុងរស់នៅក្នុងលំនៅឋានដែលរងផលប៉ះពាល់នោះ ពួកគេស្ថិតក្រោមការឃ្លាំមើលយ៉ាងតឹងរ៉ឹងពីសំណាក់អាជ្ញាធរ។ អ្នកស្រីថានឹងមិនទទួលយកសំណងដោះដូរដីដែលអាជ្ញាធរផ្ដល់ជូនឡើយ ពីព្រោះដីដែលដោះដូរឱ្យ គឺនៅឆ្ងាយពីផ្លូវជាតិ ពិបាកក្នុងការប្រកបរបររកស៊ី មិនដូចដីនៅតំបន់អន្ទង់អាំង អ្នកស្រីនិងគ្រួសារ អាចរកចំណូលពីការលក់ផលដំណាំរបស់ខ្លួន។

ដោយឡែកលោកអភិបាលខេត្តបានលើកឡើងថា អាជ្ញាធរបានពន្យាពេល ឱ្យពួកគាត់ជាច្រើនដងមកហើយ ហេតុនេះ អាជ្ញាធរត្រូវអនុវត្តតាមសេចក្តីជូនដំណឹង ដោយគ្មានការ ពន្យាពេលទៀតនោះទេ។ ចំណែកលោកអភិបាលសុ្រកវាលវែង លោកនាយប៉ុស្តិ៍នគរបាលរដ្ឋបាលអន្លង់រាប និងលោកនាយករដ្ឋបាលខេត្តពោធិ៍សាត់ មិនអាចទាក់ទងសុំអត្ថាធិប្បាយបាននោះទេ នាព្រឹកថ្ងៃពុធនេះ៕

ចាប់តាំងពីរដ្ឋបាលក្រុងភ្នំពេញ បានដាក់ដំណើរការបិទផ្លូវតំបន់មាត់ទន្លេអោយក្លាយជា Walk Street សម្រាប់ដើរកម្សាន្តចុងសប្ដាហ៍មក គេសង្កេតឃើញមានបងប្អូនប្រជាពលរដ្ឋខ្មែរ និងជនបរទេសជាច្រើនចូលរួមលេងកម្សាន្តជុំគ្នាសប្បាយ បង្កើតបានជាបរិយាកាសមួយដែលគួរអោយចង់ទៅលេងជាទីបំផុត។

គួររំលឹកថា ផ្លូវថ្មើរជើងសម្រាប់ដើរកម្សាន្តនៅចុងសប្ដាហ៍នេះ ស្ថិតនៅតាមបណ្ដោយមាត់ទន្លេ ចាប់ពីមុខប្រៃសណីយ៍កម្ពុជា រហូតដល់មុខព្រះបរមរាជវាំង។ Walk Street នេះទទួលបានការគាំទ្រយ៉ាងសន្ធឹកសន្ធាប់ពីសំណាក់មហារជន ព្រោះវារំលេចយ៉ាងច្បាស់នូវសម្រស់របស់មាត់ទន្លេដែលស្ថិតនៅចំពីមុខព្រះបរមរាជវាំង អមដោយភ្លើងពណ៌និងការតុបតែងគួរអោយចង់គយគន់ ជាពិសេសនៅពេលរាត្រី។

សកម្មភាពកម្សាន្តជាច្រើនរួមមានការទស្សនាសិល្បៈសៀករហ័សកម្ម ល្ខោនបាសាក់ សិល្បៈចម្រៀងបុរាណ និងសម័យ ញ៉ាំម្ហូបអាហារដ៏សម្បូរបែប ជិះស៊ីក្លូលេងមើលទេសភាព ព្រមទាំងអាចចូលរួមរាំលេងកម្សាន្តជុំគ្នានៅទីតាំងនោះផងដែរ។ សកម្មភាពលេងសប្បាយទាំងនេះ មិនត្រឹមបានទាក់ទាញចំណាប់អារម្មណ៍របស់បងប្អូនប្រជាពលរដ្ឋខ្មែរប៉ុណ្ណោះទេ តែគេក៏ឃើញមានជនបរទេសជាច្រើនបានចូលរួមរាំលេងសប្បាយជាមួយគ្នាទៀតផង។

តាមការបង្ហោះវីដេអូរបស់ជនបរទេសម្នាក់ដែលបានមកលេងកម្សាន្តនៅ Walk Street បានសរសេជាអក្សរក្នុងអត្ថន័យថា “ខ្ញុំរស់នៅជីវិតដែលល្អបំផុត នៅប្រទេសកម្ពុជា” នៅក្នុងវីដេអូនោះផងដែរ បានបង្ហាញពីសកម្មភាពរបស់គាត់ និងមិត្តរបស់គាត់ប៉ុន្មាននាក់ទៀត កំពុងរាំលេងយ៉ាងសប្បាយជាមួយប្រជាពលរដ្ឋខ្មែរជាច្រើន ហើយគាត់បានបន្ថែមទៀតថា បរិយាកាសនេះគួរតែមានរៀងរាល់ថ្ងៃ។

ពីមួយសប្ដាហ៍ទៅមួយសប្ដាហ៍ ទីតាំង Walk Street នេះបានទាក់ទាញភ្ញៀវទេសចរជាតិ និងអន្តរជាតិកាន់តែច្រើន មិនត្រឹមតែនាំមកនូវសប្បាយរីករាយតែប៉ុណ្ណោះទេ ប៉ុន្តែវាក៏បានចូលរួមចំណែកក្នុងបង្ហាញពីវប្បធម៌ អរិយធម៌ ទៅកាន់អន្តរជាតិ និងជួយជម្រុញដល់សេដ្ឋកិច្ចបងប្អូនជាអ្នកលក់ដូរ និងលោកតាធាក់ស៊ីក្លូផងដែរ៕

រាជធានីភ្នំពេញ៖ លោកប៊ុន រស្មី រឺ ប៊ុន ផាក ដែលត្រូវបានគេស្គាល់ថា ជាគ្រូលក់សៀវភៅជោគជ័យ បានចេញមុខបកស្រាយអត្ថន័យពាក្យថា “សន្តិភាព” បន្ទាប់ពីឯកឧត្តម ជួន ណារិន្ទ បានអញ្ជើញលោកអោយទៅពន្យល់ពាក្យនេះ នៅស្នងការនគរបាលរាជធានីភ្នំពេញ។

យោងតាមការបង្ហោះសំណេរ របស់លោកប៊ុន ផាក កាលពីថ្ងៃទី១៥ ខែមីនា ឆ្នាំ២០២៥ លោកបានសរសេដាក់ក្នុងផេករបស់លោកផ្ទាល់ថា ៖ កំចាត់ក្មេងទំនើង និងចោរប្លន់ឳ្យបានទៅ ទើបអាចនិយាយបានថាយើងមានសន្តិភាព។ ការសរសេបង្ហោះបែបនេះ គឺធ្វើឡើងក្រោយហេតុការណ៍ Youtuber ជនជាតិបរទេសដែលមានឈ្មោះថា Christ និងគូដណ្ដឹងរបស់គាត់ ត្រូវបានចោរឆក់កាបូប។

បន្ទាប់ពីការបង្ហោះសំណេរនេះរបស់លោកប៊ុន ផាក ក្រោយមកបានប៉ុន្មានម៉ោង ឯកឧត្តម ជួន ណារិន្ទ បានបង្ហោះសារខ្លីមួយ ដោយសូមអញ្ជើញលោកប៊ុន ផាក មកពន្យល់ពាក្យថា “សន្តិភាព” និងក្រោយមកនៅថ្ងៃទី១៧ ខែមីនា លោកប៊ុន ផាក ក៏ទទួលបានដីកាកោះហៅ “ដើម្បីស្រាយបំភ្លឺការបំភ្លៃព័ត៌មានមិនពិតលើបណ្ដាញទំនាក់ទំនងសង្គម” នៅស្នងការនគរបាលរាជធានីភ្នំពេញ ថ្ងៃទី ២១ ខែមីនា ខាងមុខនេះ។

លោកប៊ុន ផាកបានចេញមុខបកស្រាយនៅលើបណ្ដាញសង្គមនៅថ្ងៃទី ១៩ ខែមីនានេះថា៖ នេះជាការយល់ឃើញរបស់លោក ដោយជាក់ស្ដែងឃើញថាប្រទេសយើងមានសន្តិភាពពេញលេញហើយ ប៉ុន្តែបញ្ហាក្មេងទំនើង និងលួច ឆក់ ប្លន់ នៅតែមានបន្តជាហូរហែ។ ក្នុងនាមជាប្រជាពលរដ្ឋម្នាក់ យើងចង់រស់ដោយគ្មានការព្រួយបារម្ភ ទទួលបានការការពារពីស្ថាប័នមានសមត្ថកិច្ច និងមានសិទ្ធិសេរីភាពក្នុងការបញ្ចេញមតិ។

លើសពីនេះ លោកបានបន្ថែមថា៖ ក្នុងន័យនេះលោកគ្មានចេតនាបំភ្លៃការពិត ដើម្បីវាយប្រហារទៅកាន់ស្ថាប័នសាធារណៈណាមួយឡើយ វាគ្រាន់តែជាគំនិតដែលចង់ឈឺឆ្អើលរឿងអសន្តិសុខសង្គម ក្នុងនាមជាអ្នកចែករំលែកចំណេះដឹងមួយរូបប៉ុណ្ណោះ។

យោងតាមការបកស្រាយខាងលើនេះ ក៏មានមនុស្សមួយចំនួនយល់ស្របជាមួយលោកប៊ុន ផាកដែរ ដោយពួកគេលើកឡើងថា ការយល់ឃើញរបស់ប៊ុន ផាកគឺមានហេតុមានផលច្បាស់លាស់អាចទទួលយកបាន នេះអាចប្រហែលជាមានការយល់ច្រលំត្រង់ណាមួយហើយ ដូច្នេះសង្ឃឹមថាថ្នាក់ដឹកនាំយោគយល់ និងអធ្យាស្រ័យផង៕

ក្រសួងរៀបចំដែនដី នគរូបនីយកម្ម និងសំណង់ បានពិនិត្យពិភាក្សាសំណើសុំកិច្ចសហការសម្របសម្រួលរៀបចំកែលម្អរមណីយដ្ឋានភ្នំព្រះរាជទ្រព្យ និងលំហរសាធារណៈនានា ស្ថិតនៅក្នុងភូមិសាស្ត្រខេត្តកណ្តាល ។

គម្រោងនេះ មានគោលបំណងរៀបចំទីតាំងឱ្យមានសណ្តាប់ធ្នាប់ និងរបៀបរៀបរយឡើងវិញ ដោយរក្សាប្រពៃណីវប្បធម៌ក្នុងតំបន់ រៀបចំបរិស្ថានឱ្យមានផាសុកភាព ជួយលើកកម្ពស់ជីវភាពប្រជាជន។

ការបង្កើតនូវលំហបៃតងនៅទីសាធារណៈ ផ្តោតចម្បងទៅការពង្រីកកំណើនសេដ្ឋកិច្ច តាមរយៈការទាក់ទាញភ្ញៀវទេសចរ ក៏ដូចជាបង្កើតភាពស៊ីវិល័យជូនប្រជាពលរដ្ឋ។

ខេត្តកណ្តាល ជាខេត្តគោលដៅមួយក្នុងចំណោមរាជធានីខេត្តដទៃទៀត ដោយកំណត់យកស្រុកពញាឮ ជាស្រុកដំបូងគេបង្អស់ ក្នុងការបង្កើតនូវលំហបៃតងនៅទីសាធារណៈ។

តាមរយៈគម្រោងនេះ គេរំពឺងថា ពលរដ្ឋនៅតំបន់ភ្នំព្រះរាជទ្រព្យ នឹងទទួលបានគុណសម្បត្តិជាច្រើន ជាពិសេសជួយលើកកម្ពស់ជីវភាពប្រជាជន និងរបៀងសេដ្ឋកិច្ចនៅក្នុងតំបន់ថែមទៀតផងដែរ៕

ថ្មីៗនេះ មានករណីជនសង្ស័យម្នាក់ បានជិះម៉ូតូ ១គ្រឿង ធ្វើសកម្មភាពឆក់កាបូបជនបរទេសម្នាក់ឈ្ម៉ GLADYS ELISA ភេទស្រី ដែលកំពុងដើរ នៅចំណុចផ្លូវលេខ១០៦ កែងផ្លូវ លេខ១៣ សង្កាត់វត្តភ្នំ ខណ្ឌដូនពេញ រាជធានីភ្នំពេញ។

ក្រោយទទួលបានដំណឹងនេះភ្លាម សមត្ថកិច្ច បានធ្វើការស្រាវជ្រាវដោយចំណាយពេល៣ម៉ោង ឈានដល់ការឃាត់ខ្លួនជនសង្ស័យម្នាក់ឈ្មោះ ប៉ុល ខូចចិន្តា ភេទប្រុស អាយុ៣៧ឆ្នាំ ដែលជាទណ្ឌិត ទើបអនុវត្តទោស ពន្ធនាគាររយៈពេល៤ឆ្នាំ ពីបទ លួចមានស្ថានទម្ងន់ទោសកាលពីឆ្នាំ២០១៩។

បន្ទាប់ពីការឃាត់ខ្លួន ជនសង្ស័យខាងលើត្រូវបានតំណាងអយ្យការ សម្រេចចោទប្រកាន់៣បទល្មើសរួមមាន៖

• បទ លួចមានស្ថានទម្ងន់ទោស (ការមិនរាងចាលក្នុងបទឧក្រិដ្ឋ)
• បទ ប្រើប្រាស់ផ្លាកលេខសម្គាល់យានជំនិះក្លែងក្លាយ
• និងបទ ប្រើប្រាស់ដោយខុសច្បាប់នូវសារធាតុញៀន

បើតាមអ្នកនាំពាក្យនៃអយ្យការអមសាលាដំបូងរាជធានីភ្នំពេញ បានបញ្ជាក់ថា ជនសង្ស័យខាងលើបានប្រព្រឹត្តអំពើមិនរាងចាលក្នុងបទឧក្រិដ្ឋ ហើយផ្អែកតាមច្បាប់អាចនឹងផ្តន្ទាទោសដាក់ពន្ធនាគារ រហូតដល់២០ឆ្នាំ៕