ប្រទេសចិន ៖ កាលពីថ្ងៃទី៤ ខែឧសភា ឆ្នាំ២០២៥ សារព័ត៌មានបរទេសរាយការណ៍ថា ប្រទេសចិនបានយកមនុស្សយន្ត Humanoid ជាច្រើនគ្រឿងមកធ្វើការជាមគ្គុទ្ទេសក៍ទេសចរណ៍នៅតំបន់ទេសចរណ៍នានា ដូចជា ៖ ផ្តល់សេវាកម្មទៅភ្ញៀវទេសចរមកកម្សាន្តនៅភ្នំយ៉ាងមីង ក្នុងទីក្រុងសួនប៉ៃ ខេត្តហ៊ូណាន នាថ្ងៃទិវាពលកម្មកន្លងមក ហើយភ្ញៀវទេសចរជាច្រើនពេញចិត្តនឹងការណែនាំពីតំបន់ទេសចរណ៍របស់មនុស្សយន្ត ។

មនុស្សយន្តជាច្រើនគ្រឿងបានផ្តល់សេវាកម្មដល់ភ្ញៀវទេសចរ ចាប់ពីបរិវេណផ្លូវចូលភ្នំយ៉ាងមីង ក៏ដូចជានៅតាមទីកន្លែងនានា ដោយវានឹងរៀបរាប់ពីទិន្នន័យ និងប្រវត្តិសាស្ត្ររបស់តំបន់ទេសចរណ៍ផងដែរ ។ នៅកន្លែងដែលមានភ្ញៀវទេសចរប្រមូលផ្តុំគ្នាច្រើន គឺមនុស្សយន្តមគ្គុទ្ទេសក៍ទេសចរណ៍ទទួលបានការកោតសរសើរយ៉ាងខ្លាំងពីភ្ញៀវទេសចរ មិនចាញ់ការសរសើរទេសភាពដ៏ស្រស់ស្អាតរបស់ភ្នំយ៉ាងមីង ទេ ។

ភ្ញៀវទេសចរជាច្រើនបានថតរូបជាមួយមនុស្សយន្ត ខណៈអ្នកខ្លះទៀតបានឱប និងចាប់ដៃមនុស្សយន្តដ៏ឆ្លាតវៃ ។ បើយើងធ្វើដំណើរទៅកម្សាន្តនៅប្រទេសចិន ឆ្នាំ២០២៥នេះ យើងនឹងសង្កេតឃើញថា នៅតាមតំបន់ទេសចរណ៍ពេញនិយមផ្សេងៗបានយកមនុស្សយន្តមគ្គុទ្ទេសក៍ទេសចរណ៍មកធ្វើការជំនួសមនុស្សកាន់តែច្រើន ។

មនុស្សយន្តអាចផ្តល់សេវាកម្មច្រើនយ៉ាង ដូចជា ៖ នាំភ្ញៀវទេសចរឡើងលើភ្នំ, ជួយថតរូបភ្ញៀវទេសចរ, ផ្តល់ភាពសប្បាយរីករាយ រួមទាំងផ្តល់បទពិសោធន៍ថ្មីសម្រាប់ដំណើរកម្សាន្តរបស់ភ្ញៀវទេសចរ ។ ហេតុនេះ ធ្វើឱ្យវាកាន់តែទទួលបានការពេញនិយមខ្លាំងឡើងពីសំណាក់ភ្ញៀវទេសចរ ។

បើអ្នកណាបានទៅកម្សាន្តនៅប្រទេសចិន ហើយធ្លាប់ឃើញមនុស្សយន្តមគ្គុទ្ទេសក៍ទេសចរណ៍នេះដោយផ្ទាល់ភ្នែក គឺអាចបញ្ចេញមតិយោបល់នៅខាងក្រោមវីដេអូនេះថា តើវាមានលក្ខណៈពិសេសបែបណាខ្លះ?

សហរដ្ឋអាមេរិក ៖ រដ្ឋាភិបាលអាមេរិកស្ថិតក្រោមការដឹកនាំរបស់លោកប្រធានាធិបតី Donald Trump មានគម្រោងលុបចោលច្បាប់ការពារជម្រកសត្វជិតផុតពូ.ជ និងសត្វរងការគំរា.មកំហែង ដែលធ្វើឱ្យអ្នកបរិស្ថានបារម្ភយ៉ាងខ្លាំងថា វានឹងធ្វើឱ្យសត្វជាច្រើនប្រភេទនៅអាមេរិកកាន់តែឆាប់ផុតពូ.ជ ដោយសារច្បាប់ថ្មីពុំហាមឃាត់ការកាប់បំផ្លាញដើមឈើ ការជីករ៉ែ និងសកម្មភាពផ្សេងៗ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៤ ខែឧសភា ឆ្នាំ២០២៥ ។

អ្នកបរិស្ថានបញ្ជាក់ថា ច្បាប់ការពារសត្វជិតផុតពូជនៅអាមេរិកបានគ្របដណ្តប់លើការផ្លាស់ប្តូរ ឬការបំផ្លាញជម្រករស់នៅរបស់សត្វជិតផុតពូជ ពីព្រោះការបាត់បង់ជម្រកសត្វ គឺជាមូលហេតុចម្បងធ្វើឱ្យសត្វងា.ប់ ។ ប៉ុន្តែច្បាប់ថ្មីបញ្ជាក់ថា ការផ្លាស់ប្តូរជម្រករស់នៅរបស់សត្វ គឺពុំចាត់ទុកថាបំផ្លាញសត្វទេ ពីព្រោះពុំបានបំផ្លាញសត្វណាមួយដោយចេតនា ។ វាខុសគ្នាពីការចាប់សត្វ ដែលជាទង្វើបំផ្លាញសត្វដោយផ្ទាល់ ។

ដូចគ្នានេះ បើតាមអ្នកអភិរក្សសត្វ គឺការផ្លាស់ប្តូរជម្រករស់នៅរបស់សត្វ គឺនឹងធ្វើឱ្យសត្វកាន់តែឆាប់ផុតពូជ និងធ្វើឱ្យសត្វប្រឈមគ្រោះថ្នាក់ ខណៈកន្លងមក តុលាការកំពូលអាមេរិកបានកំណត់ឱ្យតំបន់ព្រៃរាប់លានហិកតាទទួលបានការអភិរក្ស ដើម្បីជួយឱ្យសត្វជាច្រើនក្បាលអាចរស់នៅក្នុងព្រៃបាន ។

នាយកគ្រប់គ្រងសត្វជិតផុតពូជនៅមជ្ឈមណ្ឌលជីវៈចម្រុះ លោក Noah Greenwald ឱ្យដឹងថា បើរដ្ឋាភិបាលអាមេរិកលុបចោលច្បាប់ការពារសត្វជិតផុតពូជ ដោយអះអាងថា ការផ្លាស់ប្តូរជម្រកសត្វ ឬធ្វើឱ្យប៉ះពាល់ជម្រកសត្វ មិនចាត់ទុកថា គ្រោះថ្នាក់ដល់សត្វនោះ មានន័យថា អាមេរិកពុំបានការពារសត្វជិតផុតពូជឡើយ ។ ជាក់ស្តែង សត្វស្លាប និងខ្លាតែងតែទទួលបានការការពារ ដោយសារច្បាប់បច្ចុប្បន្ន ហាមបំផ្លាញជម្រកពួកវា ប៉ុន្តែការអនុវត្តច្បាប់ថ្មី គឺពុំបានហាមឃាត់អ្នកកាប់បំផ្លាញព្រៃឈើទេ ។

លោក Greenwald បន្តថា ច្បាប់ថ្មីនេះគំរាមកំហែងដល់ការការពារសត្វ និងជួយសង្គ្រោះជីវិតសត្វជិតផុតពូជ ខណៈអាមេរិកបានព្យាយាមការពារសត្វអស់រយៈពេលជាច្រើនឆ្នាំ ជាពិសេស ការពារជម្រកសត្វឥន្ទ្រី ចចកពណ៌ប្រផេះ ផ្សោតផ្លរីដា និងត្រីបាឡែន ។

ការផ្លាស់ប្តូរច្បាប់ការពារសត្វ ក៏ធ្វើឱ្យមានក្តីកង្វល់យ៉ាងខ្លាំងនៅរដ្ឋហាវ៉ៃ ផងដែរ ពីព្រោះរដ្ឋនេះមានសត្វជិតផុតពូជរស់នៅច្រើនជាងរដ្ឋផ្សេងៗរបស់អាមេរិក ។ Max Phillips ជានាយកមជ្ឈមណ្ឌលជីវៈចម្រុះនៅរដ្ឋហាវ៉ៃ និងប្រជុំកោះប៉ាស៊ីហ្វិក ឱ្យដឹងថា ការលុបចោលច្បាប់ការពារជម្រកសត្វជិតផុតពូ.ជ នឹងធ្វើឱ្យការការពារសត្វនៅរដ្ឋហាវ៉ៃមានបញ្ហា ដោយសារសត្វនឹងងាប់ដោយសារបាត់បង់ជម្រក ។ ទីបំផុត អាមេរិកនឹងបាត់បង់សត្វជិតផុតពូជ ហើយអាមេរិកពុំអាចដោះស្រាយបញ្ហានេះបានទេ ៕

ប្រទេសឥណ្ឌា ៖ អង្គការសិទ្ធិមនុស្សនៅក្នុងប្រទេសឥណ្ឌាកំពុងស៊ើបអង្កេតលើករណីដែលមានកុមារជាង 100 នាក់បានធ្លាក់ខ្លួនឈឺចូលមន្ទីរពេទ្យភ្លាមៗ បន្ទាប់ពីពួកគេរបរិភោគអាហារថ្ងៃត្រង់របស់សាលា ហើយក្រោយមកទើបគេបានរកឃើញថាមានសា..កស..ពសត្វពស់មួយក្បាលងាប់នៅក្នុងអាហារនោះ។

ហេតុការណ៍នេះបានកើតឡើងកាលពីថ្ងៃទី ២៥ ខែមេសា ឆ្នាំ ២០២៥ ក្នុងទីក្រុង Mokama រដ្ឋ Bihar ភាគខាងកើត ដោយពីដំបូងឡើយចុងភៅក្នុងសាលាបានឃើញថាមានសត្វពស់មួយក្បាលងា..ប់នៅក្នុងអាហារ និងបានយកវាចេញរួចហើយ ប៉ុន្តែមិនស្មានថានៅតែអាចប៉ះពាល់ដល់ក្មេងៗបែបនេះសោះ។

គណៈកម្មាធិការសិទ្ធិមនុស្សជាតិ (NHRC) បាននិយាយនៅក្នុងសេចក្តីថ្លែងការណ៍មួយថា ៖ មានកុមារប្រហែល 500 នាក់បានញាំអាហារនៅក្នុងអាហារដ្ឋានរបស់សាលានោះ ហើយបន្ទាប់ក្មេងប្រហែល១០០នាក់ ស្រាប់តែកើតមានអក្ការៈវិលមុខ ក្អួតចង្អោរ និងដួលសន្លប់ ដែលធ្វើឲ្យមានកុមារយ៉ាងហោចណាស់២៤នាក់ ត្រូវបានបញ្ជូនទៅសង្រ្គោះនៅមន្ទីរពេទ្យភ្លាមៗ។

ក្រោយហេតុការណ៍នេះ បែរជាគ្រូៗនៅក្នុងសាលានោះនាំគ្នាបិទទ្វាសាលាហើយរត់គេចខ្លួន បន្សល់ទុកឲ្យក្រុមសមត្ថកិច្ចជាអ្នកនាំក្មេងៗទៅព្យាបាលទៅវិញ។ ប្រជាជនក្នុងតំបន់បានសម្ដែងនូវការខឹងសម្បារជាមួយទង្វើរបស់អ្នកគ្រប់គ្រងសាលាជាខ្លាំង ដោយពួកគេបានធ្វើការបិទផ្លូវដើម្បីទាមទារឲ្យច្បាប់ជួយដោះស្រាយ។

គួររំលឹកថា នេះមិនមែនជាលើកទី១ឡើយនៅក្នុងរដ្ឋ Bihar ដែលកើតមាននូវហេតុការណ៍បែបនេះ។ កាលពីឆ្នាំ ២០១៣ សិស្សចំនួន ២៣នាក់ បានស្លា..ប់ក្រោយពីពួកគេបរិភោគអាហារដែលមានសារធាតុពលនៅក្នុងសាលារៀន។

ដោយឡែកសម្រាប់ការរៀបចំឲ្យមានអាហារថ្ងៃត្រង់សម្រាប់ក្មេងៗញាំនៅសាលារៀនបែបនេះ គឺដើម្បីសម្រួលការចំណាយរបស់អាណាព្យាបាល ប៉ុន្តែបញ្ហាអនាម័យ និងសុវត្ថិភាពនៅតែជាកង្វល់ធំដែលរដ្ឋាភិបាលមិនទាន់ដោះស្រាយបាន៕

ទីក្រុងឌូបៃ ៖ ហាងកាហ្វេដែលទើបបើកដំណើរការមួយនៅក្នុងទីក្រុងឌូបៃកំពុងទទួលបានការកើតសរសើខ្លាំងពីមហាជន និងអ្នកលេងអ៊ីនធើណេត បន្ទាប់ពីហាងនេះបានផ្ដល់ឳកាសការងារដល់អ្នកជំងឺ “ដោនស៊ីនដ្រូម” ជាច្រើនឲ្យចូលបំពេញការងារនៅទីនេះ។

ហាងកាហ្វេខាងលើមានឈ្មោះថា “21 Café” មានទីតាំងនៅជាន់ទី២ នៃផ្សារទំនើប Al Ghurair Centre នៅតំបន់ Deira ក្នុងទីក្រុង Dubai នៃប្រទេសអារ៉ាប់រួម។ បានបើកដំណើរការកាលពីថ្ងៃទី ២៥ មេសាឆ្នាំ ២០២៥ ដែលទទួលបានការចាប់អារម្មណយ៉ាងច្រើនសន្ធឹកសន្ធាប់ និងការពេញចិត្តពីសំណាក់អ្នកលេងអ៊ីនធើណេតជាច្រើន។

ម្ចាស់ហាងនេះគឺលោក Ragu Raman Dan Dapani គឺជាឪពុកម្នាក់ដែលមានកូនប្រុសកើតជំងឺដោនស៊ីនដ្រូមនេះពីកំណើតមក ដូច្នេះលោកក៏ចាប់ផ្ដើមមានគំនិតបង្កើតហាងកាហ្វេមួយនេះឡើងមកដើម្បីផ្ដល់ឳកាសការងារដល់អ្នកដែលមានជំងឺនេះដូចកូនប្រុសរបស់គាត់។ លោក Ragu បាននិយាយថា ៖ គម្រោងនេះផ្ដល់ឳកាសការងារដ៏មានន័យ និងជំរុញឲ្យសង្គមមានទំនាក់ទំនងបានយ៉ាងជិតស្និតជាមួយមនុស្សដោនស៊ីនដ្រូម។

បើយោងតាមវីដេអូដែលបានចែករំលែកនៅលើប្រព័ន្ធផ្សព្វផ្សាយជាច្រើនបានបង្ហាញថា ៖ បុគ្គលិកផ្នែកបម្រើសេវាកម្មទូទៅនៅក្នុងហាងនេះភាគច្រើនគឺជាមនុស្សដែលមានជំងឺដោនស៊ីនដ្រូម។ ពួកគេបានហ្វឹកហាត់យ៉ាងយកចិត្តទុកដាក់មុនពេលហាងកាហ្វេចាប់បើកដំណើរការ។ អ្នកគ្រប់គ្រងហាងបានបង្រៀនការងារផ្នែកសេវាកម្មទូទៅដល់ពួកគេដូចជា ឆុងកាហ្វេ ឬភេសជ្ជៈ និងទទួលរាក់ទាក់អតិថិជនបានយ៉ាងល្អ។

ភ្ញៀវជាច្រើនដែលបានចូលមកក្នុងហាងនេះបាននិយាយថា ៖ នៅពេលដើរចូលក្នុងហាងពួកគេត្រូវបានស្វាគមន៍យ៉ាងកក់ក្ដៅពីសំណាក់បុគ្គលិកទាំងអស់នោះ ដោយម្នាក់ៗមានភាពស្នាមញញឹមរួសរាយរាក់ទាក់ ព្រមទាំងផ្ដល់សេវាកម្មយ៉ាងល្អមកកាន់ពួកគេ។ ក្រៅពីនោះ ក៏មានអ្នកខ្លះទៀតបាននិយាយថា ៖ វាបានផ្លាស់ប្ដូរការគិតរបស់ពួកគេដែលធ្លាប់យល់ថា “អ្នកជំងឺដោនស៊ីនដ្រូម” គឺពិបាកក្នុងការមានទំនាក់ទំនងជាមួយមនុស្សជុំវិញខ្លួន ប៉ុន្តែផ្ទុយទៅវិញ ពួកគេជាមនុស្សគ្មានល្បិចកល មានបេះដូងបរិសុទ្ធ ទន់ភ្លន់ និងគួរឲ្យស្រលាញ់ណាស់។

គួរជម្រាបផងដែរថា “ជំងឺដោនស៊ីនដ្រូម” (Down Syndrome) គឺជាជំងឺដែលកើតចេញពីហ្ស៊ែន។ ជាធម្មតាមនុស្សដែលមានជំងឺនេះ តែងជួបបញ្ហាក្នុងការលូតលាស់ផ្នែករាងកាយ ធ្វើឲ្យរូបរាង និងទម្រង់មុខរបស់ពួកគេខុសពីមនុស្សទូទៅ និងប៉ះពាល់ដល់ការរីកចម្រើនផ្នែកបញ្ញាស្មារតីមានភាពមិន្រក្រតី ដែលនាំឲ្យពួកគេមានកម្រិតIQ ទាបជាងមនុស្សធម្មតា។

ដោយឡែក ការបើកហាងកាហ្វេនិងអនុញ្ញាតឲ្យមនុស្សដែលមានតម្រូវការពិសេសដូចជាអ្នកជំងឺដោនស៊ីនដ្រុមចូលបំពេញការងារដូចនេះ គឺជាការលើកទឹកចិត្តយ៉ាងខ្លាំងក្លាដល់ពួកគេ។ លើសពីនេះ វាបានក្លាយជាកន្លែងដ៏សំខាន់មួយក្នុងការបង្រួបបង្រួមមនុស្សឲ្យស្វែងយល់ពីគ្នា ព្រមទាំងបញ្ចប់ទស្សនៈអវិជ្ជមានរបស់សង្គមចំពោះជនដែលមានពិការភាពទាំងឡាយ៕

សហរដ្ឋអាមេរិក ៖ ប្រធានាធិបតីអាមេរិក លោក Donald Trump បានទាក់ទាញការរិះគន់ពីសំណាក់អ្នកកាន់សាសនាកាតូលិកជាច្រើន បន្ទាប់ពីគណនីសេតវិមានបានបង្ហោះរូបភាពលោកដែលបង្កើតដោយ AI បង្ហាញថាលោកជាសម្តេចប៉ាបហ្វ្រង់ស៊ីស។

គណនីប្រព័ន្ធផ្សព្វផ្សាយសង្គមផ្លូវការរបស់សេតវិមានបានបង្ហោះរូបភាពប៉ុន្មានសន្លឹករបស់លោកTrump ដែលជារូបភាពរចនាដោយ AI ហើយនៅក្នុងនោះក៏មានរូបភាពមួយសន្លឹកដែលបង្ហាញពីលោក Trump មានសម្លៀកបំពាក់ និងឥរិយាបថអង្គុយប្រៀបដូចជាសម្ដេចប៉ាបទៀតផង។ ការចែករំលែករូបភាពនេះ គឺធ្វើឡើងខណៈពេលដែលអ្នកកាន់សាសនាកាតូលិកទូទាំងពិភពលោក កំពុងកាន់ទុក្ខចំពោះការសោយទិវង្គតរបស់សម្តេចប៉ាប Francis ដែលបានទទួលមរណៈភាពកាលពីថ្ងៃទី 21 ខែមេសា ឆ្នាំ២០២៥។

ការបង្ហោះនេះកើតឡើងប៉ុន្មានថ្ងៃបន្ទាប់ពីគាត់បាននិយាយលេងជាមួយប្រព័ន្ធផ្សព្វផ្សាយថា៖ “ខ្ញុំចង់ក្លាយជា Pope”។ សន្និសីទកាតូលិករដ្ឋញូវយ៉កបានចោទប្រកាន់លោក Trump ថាបានចំអកឱ្យសាសនាកាតូលិក។ មិនតែប៉ុណ្ណោះ អតីតនាយករដ្ឋមន្ត្រីអ៊ីតាលី Matteo Renzi ក៏បានរិះគន់មកកាន់លោក Trump ផងដែរ ដោយលោកបានសរសេសំណេរមួយបង្ហោះក្នុងបណ្ដាញសង្គម X ថា ៖ នេះគឺជារូបភាពដែលប្រមាថអ្នកជឿ ប្រមាថស្ថាប័ន និងបង្ហាញថាមេដឹកនាំនៃពិភពស្តាំនិយមគឺចូលចិត្តលេងសើច”។

មនុស្សម្នារជាច្រើនទៀតបានខមិនរិះគន់នៅលើគណនីរបស់សេតវិមាននៅលើបណ្ដាញសង្គម Truth Socail ថា ៖ “យើងទើបតែបញ្ចុះសពសម្តេចប៉ាប Francis ជាទីស្រឡាញ់របស់យើងរួច ហើយពេលនេះក៏កំពុងមមារញឹកនេងកាជ្រើសរើសអ្នកស្នងតំណែងថ្មីផងដែរ ដូចនេះកុំចំអកឱ្យយើង”។ លើសពីនេះ សូម្បីតែលោកឪពុក Timothy Dolan ដែលមានភាពស្និទ្ធស្នាលជាមួយលោក Trump អស់រយៈពេលជាច្រើនឆ្នាំ ក៏បានប្រាប់អ្នកសារព័ត៌មានដែរថាគាត់មិនចូលចិត្តរូបភាពនេះទេ។

ដោយឡែក ខាងសេតវិមានបានច្រានចោលនូវការចោទប្រកាន់ទាំងឡាយមកកាន់លោក Trump ដោយលេខាធិការសារព័ត៌មាន គឺលោកស្រី Karoline Leavitt បានអះអាងថា “លោកប្រធានាធិបតី Trump ធ្លាប់ហោះហើរទៅកាន់ប្រទេសអ៊ីតាលី ដើម្បីគោរពសម្តេច Pope Francis ហើយថ្មីៗនេះ លោកថែមទាំងបានចូលរួមពិធីបុណ្យស..ពរបស់គាត់ដោយផ្ទាល់ទៀតផង នេះបង្ហាញថាគាត់មានការគោរពយ៉ាងខ្ពង់ខ្ពស់សម្រាប់សាសនាកាតូលិក និងផ្ដល់សេរីភាពខាងសាសនាផងដែរ” ។

គួររំលឹកផងដែរថា អតីតប្រធានាធិបតីសហរដ្ឋអាមេរិកលោក Joe Biden ដែលជាអ្នកកាន់សាសនាកាតូលិក ក៏ធ្លាប់រិះគន់លោក Trumpផងដែរ នៅពេលដែលលោក Trump បានធ្វើសញ្ញាតំណាងរូបឈើឆ្កាង ក្នុងអំឡុងពេលចេញគោលការណ៍ហាមឃា..ត់ការរំលូតកូននៅរដ្ឋផ្លរីដាកាលពីឆ្នាំមុន៕

ប្រទេសចិន ៖ គ្រែសម្រាកនៅតាមច្រាំងថ្មខ្ពស់ៗកណ្តាលភ្នំបានក្លាយជាតំបន់ទេសចរណ៍ថ្មីដ៏ពេញនិយមនៅប្រទេសចិន ដែលភ្ញៀវទេសចរសម្រាកលំហែរកាយលើគ្រែនេះ អាចទស្សនាទេសភាពព្រៃភ្នំយ៉ាងស្រស់ស្អាតដែលមានកម្ពស់ខ្ពស់១,៦០០ម៉ែត្រពីនីវ៉ូទឹកសមុទ្រ និងទទួលបានកាហ្វេដ៏ឈ្ងុយឆ្ងាញ់មិនគិតថ្លៃ១កែវ ។ វាជាកន្លែង Check in ថ្មីទាក់ទាញចំណាប់អារម្មណ៍ភ្ញៀវទេសចរជាតិ និងបរទេសយ៉ាងខ្លាំង ដោយភ្ញៀវទេសចរម្នាក់ៗចំណាយប្រាក់ត្រឹមតែជាង១៣ដុល្លារប៉ុណ្ណោះ ។

កាលពីថ្ងៃទី៤ ខែឧសភា ឆ្នាំ២០២៥ សារព័ត៌មានបរទេសបានផ្សព្វផ្សាយពីតំបន់ទេសចរណ៍ថ្មីនៅចិន គឺការរៀបចំគ្រែសម្រាប់ឱ្យភ្ញៀវទេសចរសម្រាកតាមច្រាំងថ្មខ្ពស់ៗកណ្តាលព្រៃភ្នំ ដើម្បីគយគន់ទេសភាពនៅជុំវិញខ្លួនប្រកបដោយបរិយាកាសធម្មជាតិពិតៗ ។ គ្រែនីមួយៗមានដែកតភ្ជាប់ជាមួយច្រាំងថ្ម និងមានដែកទ្រពីក្រោម ប៉ុន្តែគ្មានអ្វីបិទបាំង បើពុំប្រុងប្រយ័ត្ន ភ្ញៀវទេសចរអាចធ្លាក់ចុះក្រោម ។ ភ្ញៀវទេសចរមកពីជុំវិញពិភពលោក បានសម្រាកលើគ្រែ និងថតរូបបង្កើតមាតិកាបង្ហោះក្នុងបណ្តាញសង្គមព្រោងព្រាត ។

តំបន់ទេសចរណ៍ដ៏ពេញនិយមនេះស្ថិតនៅកំពូលភ្នំ Wuzhi ទីក្រុង Chenzhou ខេត្ត Hunan ប្រទេសចិន ។ អ្នកលេងបណ្តាញសង្គមបរទេសបានចែកចាយរូបភាពគ្រែមានទំហំមិនធំប៉ុន្មាន ដែលត្រូវបានដាក់តាមច្រាំងថ្មខ្ពស់ ហើយគ្រែនីមួយៗមានពូក ខ្នើយ ភួយ និងឧបករណ៍សុវត្ថិភាព ។ តំបន់ទេសចរណ៍នេះអនុញ្ញាតឱ្យភ្ញៀវទេសចរឡើងទៅថតរូប, Check in ជាមួយទេសភាពដ៏ត្រជាក់ភ្នែក និងទទួលបានកាហ្វេមិនគិតថ្លៃ១កែវ ក្រោយពីចំណាយប្រាក់សមល្មម ។

បន្ទាប់ពីចងខ្សែសុវត្ថិភាព ភ្ញៀវទេសចរអាចសម្រាកយ៉ាងរីករាយលើគ្រែជាមួយខ្យល់អាកាសបរិសុទ្ធ ព្រមទាំងផឹកកាហ្វេបណ្តើរ មើលព្រៃភ្នំបណ្តើរ ហើយភ្ញៀវទេសចរក៏អាចបង្កើតមាតិកាថតវីដេអូបង្ហោះក្នុងបណ្តាញសង្គមផងដែរ ។ បុគ្គលិកធ្វើការនៅតំបន់ទេសចរណ៍ប្រាប់ថា ទីនេះទើបតែបើកដំណើរការ កាលពីខែមេសា ឆ្នាំ២០២៥ ។ កាលពីថ្ងៃទិវាពលកម្មកន្លងមក មានភ្ញៀវទេសចរជាច្រើនមកកម្សាន្ត ប៉ុន្តែភ្ញៀវទេសចរមួយចំនួនតូចពុំហ៊ានសម្រាកលើគ្រែ ។

តំបន់ទេសចរណ៍មានគោលការណ៍ការពារសុវត្ថិភាពយ៉ាងតឹងរ៉ឹង មុនពេលអនុញ្ញាតឱ្យភ្ញៀវទេសចរឡើងទៅសម្រាកលើគ្រែតាមច្រាំងថ្ម គឺត្រូវបំពេញព័ត៌មានផ្ទាល់ខ្លួន ដូចជា ៖ ទម្ងន់ អាយុ និងបញ្ជាក់ថា តើមានជំងឺប្រចាំកាយដែរឬអត់? ព្រមទាំងត្រូវពាក់ខ្សែសុវត្ថិភាពគ្រប់ពេលវេលា ។ រីឯលក្ខខណ្ឌសំខាន់ៗក្នុងការមកកម្សាន្ត រួមមាន ៖

-មានអាយុមិនលើស៦០ឆ្នាំ
-មានកម្ពស់ចាប់ពីជាង១.៤០ម៉ែត្រ ឡើងទៅ
-មានទម្ងន់មិនលើស១០០គីឡូក្រាម
-មានទំហំចង្កេះមិនលើស៣៦អ៊ីញ ពីព្រោះទោះជាគ្រែអាចទ្រទ្រង់ទម្ងន់បាន ប៉ុន្តែបើទំហំចង្កេះលើស៣៦អ៊ីញ គឺភ្ញៀវទេសចរពុំអាចពាក់ខ្សែការពារបានទេ ។

ទោះជាវាមានកម្ពស់ខ្ពស់១,៦០០ម៉ែត្រពីនីវ៉ូទឹកសមុទ្រ ប៉ុន្តែកម្ពស់ពិតប្រាកដពីគ្រែសម្រាកចុះទៅផ្នែកខាងក្រោម គឺស្មើ១០០ម៉ែត្រ ដែលបុគ្គលិកធ្វើការនៅតំបន់ទេសចរណ៍ប្រាប់ថា វានៅតែខ្ពស់ដដែល ។ តំបន់ទេសចរណ៍អនុញ្ញាតឱ្យអ្នកមកលេងអាចថតរូបប៉ុណ្ណោះ និងពុំអនុញ្ញាតឱ្យសម្រាកលើគ្រែឆ្លងយប់ទេ ៕

ញូវដែលី៖ ប្រទេសឥណ្ឌាបាននិយាយថា ខ្លួនបានហាមឃាត់ការនាំចូលទំនិញដែលមានប្រភព ឬឆ្លងកាត់ប្រទេសប៉ាគីស្ថាន ខណៈដែលភាពតានតឹងការទូតរវាងប្រទេសប្រដាប់អាវុធនុយក្លេអ៊ែរទាំងពីរបានផ្ទុះឡើង បន្ទាប់ពីការវាយប្រហារដ៏សាហាវមួយទៅលើភ្ញៀវទេសចរនៅក្នុងតំបន់ជម្លោះកាស្មៀរ។ អគ្គនាយកដ្ឋានពាណិជ្ជកម្មបរទេសរបស់ឥណ្ឌាក្នុងសេចក្តីជូនដំណឹងមួយបាននិយាយថា បម្រាមនេះនឹងចូលជាធរមានភ្លាមៗ ដោយនិយាយថា “ការរឹតបន្តឹងនេះត្រូវបានដាក់ផលប្រយោជន៍ទៅក្នុងសន្តិសុខជាតិ និងគោលនយោបាយសាធារណៈ”។

គួររំលឹកថា ក្រុមសកម្មប្រយុទ្ធដែលសង្ស័យថាបានសម្លាប់អ្នកទេសចរយ៉ាងតិច ២៦ នាក់នៅក្នុងការវាយប្រហារកាលពីសប្តាហ៍មុន នៅលើភ្នំមួយក្នុងតំបន់ Pahalgam នៃជ្រលងភ្នំ Kashmir ។ តំបន់ហិម៉ាឡៃយ៉ាននេះដែលភាគច្រើនរស់នៅដោយប្រជាជនមូស្លីម ត្រូវបានទាមទារដោយប្រទេសឥណ្ឌា និងប៉ាគីស្ថាន ហើយធ្លាប់ជាកន្លែងកើតមានសង្គ្រាម ការបះបោរ និងការប្រឈមមុខដាក់គ្នាផ្នែកការទូតជាច្រើនមកហើយ។

គួរបញ្ជាក់ថាប្រទេសឥណ្ឌាបានចោទប៉ាគីស្ថានពីការជាប់ពាក់ព័ន្ធនឹងការវាយប្រហារមួយដែលក្រុងអ៊ីស្លាម៉ាបាដបដិសេធ។ ហើយប៉ាគីស្ថានបាននិយាយថា ខ្លួនមាន “ការស៊ើបការណ៍សម្ងាត់” ដែលឥណ្ឌាមានបំណងបើកសកម្មភាពយោធាមកលើខ្លួន។

ប៉ាគីស្ថានក៏បានប្រកាសពីវិធានការសងសឹកដែលរួមមានការបញ្ឈប់រាល់ពាណិជ្ជកម្មតាមព្រំដែន ការបិទដែនអាកាសរបស់ខ្លួនចំពោះក្រុមហ៊ុនដឹកជញ្ជូនឥណ្ឌា និងការបណ្តេញមន្ត្រីការទូតឥណ្ឌា។ មិនតែប៉ុណ្ណោះព្រមទាំងបានព្រមានផងដែរថាការប៉ុនប៉ងណាមួយដើម្បីទប់ស្កាត់លំហូរទឹកទន្លេ ដែលបានសន្យានៅក្រោមសន្ធិសញ្ញាដែលមានអាយុកាលរាប់ទសវត្សរ៍រវាងប្រទេសទាំងពីរនឹងត្រូវបានចាត់ទុកថាជាទង្វើនៃសង្គ្រាម។ ពាណិជ្ជកម្មរវាងប្រទេសទាំងពីរបានធ្លាក់ចុះយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ។ នេះបើតាមការចុះផ្សាយរបស់សារពត័មាន រ៉យទ័រ កាលពីរសៀលថ្ងៃទី ៣ ខែឧសភា៕

លោក Donald Trump និយាយថា លោកកំពុងដឹកនាំរដ្ឋាភិបាលរបស់លោកឱ្យបើក និងពង្រីកឡើងវិញនូវអតីតគុកនៅលើកោះ Alcatraz នៅឆ្នេរសមុទ្ររដ្ឋកាលីហ្វ័រញ៉ា។ នៅក្នុងសារមួយនៅលើគេហទំព័រ Truth Social របស់គាត់កាលពីថ្ងៃអាទិត្យ លោកប្រធានាធិបតី Trump បាននិយាយថា “អស់រយៈពេលជាយូរមកហើយដែលអាមេរិចត្រូវបានញាំញីដោយឧក្រិដ្ឋជនដ៏កាចសាហាវ ឃោរឃៅ និងដដែលៗ”។ លោកបានបន្តថា ការបើកគុក Alcatraz ឡើងវិញនឹងបម្រើជា “និមិត្តសញ្ញានៃច្បាប់ សណ្តាប់ធ្នាប់ និងយុត្តិធម៌” ។ នេះបើតាមគេហ័រទំព័រសារព័តមាន BBC ចុះផ្សាយកាលពីព្រឹកថ្ងៃទី ៥ ខែឧសភា ឆ្នាំ ២០២៥ នេះ។

គុកនេះត្រូវបានបិទជាផ្លូវការកាលពីថ្ងៃទី ២១ ខែមីនា ឆ្នាំ១៩៦៣ ហើយកោះ Alcatraz បច្ចុប្បន្នកំពុងដំណើរការជាកន្លែងទេសចរណ៍ដ៏ល្បីល្បាញ។ លោក Trump បានសរសេរថា “ថ្ងៃនេះ ខ្ញុំកំពុងដឹកនាំការិយាល័យពន្ធនាគារ រួមជាមួយនឹងនាយកដ្ឋានយុត្តិធម៌ FBI និង Homeland Security ឱ្យបើក Alcatraz ដែលត្រូវបានពង្រីក និងសាងសង់ឡើងវិញយ៉ាងច្រើន” ។ ពន្ធនាគារនេះនឹងជា «ផ្ទះអ្នកដែលប្រព្រឹត្តអំពើគ្មានមេត្តា និងឃោរឃៅបំផុតរបស់អាមេរិក»។

ដំបូងឡើយជាបន្ទាយការពារកងទ័ពជើងទឹក Alcatraz ត្រូវបានសាងសង់ឡើងវិញនៅដើមសតវត្សទី ២០ ជាគុកយោធា។ ក្រសួងយុត្តិធម៌បានកាន់កាប់វានៅក្នុងទសវត្សរ៍ឆ្នាំ ១៩៣០ ហើយវាបានចាប់ផ្តើមទទួលយកអ្នកទោសពីប្រព័ន្ធពន្ធនាគារសហព័ន្ធ។ ក្នុងចំណោមអ្នកទោសដ៏ល្បីល្បាញជាងគេនោះគឺក្រុមក្មេងទំនើងដ៏ល្បីល្បាញរួមទាំង Al Capone, Mickey Cohen និង George “Machine Gun” Kelly ។

គុកនេះក៏ល្បីល្បាញដោយសារខ្សែភាពយន្តឆ្នាំ ១៩៦២ ដែលមានចំណងជើងថា Birdman of Alcatraz ដែលសម្តែងដោយ Burt Lancaster ហើយវាក៏ជាទីតាំងនៃខ្សែភាពយន្តឆ្នាំ ១៩៩៦ The Rock ដែលសម្តែងដោយ Sean Connery និង Nicolas Cage ផងដែរអំពីអតីតប្រធានក្រុម SAS និង FBI ដែលជួយសង្គ្រោះចំណាប់ខ្មាំងពីកោះ Alcatraz ។

គួរបញ្ជាក់ថា ពន្ធនាគារនេះបានបិទដោយសារតែតម្លៃក្នុងការបន្តប្រតិបត្តិការរបស់វាថ្លៃពេក នេះបើយោងតាមគេហទំព័ររបស់ការិយាល័យសហព័ន្ធពន្ធនាគារ ។ វាចំណាយរហូតដល់ជិតបីដងនៃប្រតិបត្តិការជាងពន្ធនាគារសហព័ន្ធផ្សេងទៀត ដែលភាគច្រើនដោយសារទីតាំងរបស់វាគឺជាកោះ៕