ប្រទេសថៃ ៖ សារព័ត៌មានថៃ Top News Online រាយការណ៍ថា កាលពីថ្ងៃទី២៤ ខែឧសភា ឆ្នាំ២០២៥ អតីតទាហានឈុតខ្មៅថៃ និងទាហានចូលនិវត្តន៍ ស្មើជាង៥០០នាក់ បានមកផ្តល់កម្លាំងចិត្តដល់ទាហានថៃនៅប្រាសាទតាមាន់ធំ ស្ថិតលើភ្នំដងរែក ឃុំគោកមន ស្រុកបន្ទាយអំពិល ខេត្តឧត្តរមានជ័យ ជាប់ព្រំដែនខេត្តសុរិន្ទ ។ អតីតទាហានឈុតខ្មៅ និងទាហានចូលនិវត្តន៍និយាយថា បើទោះជាចូលនិវត្តន៍ក្តី ប៉ុន្តែពួកគេនៅតែស្រឡាញ់ និងបារម្ភពីទឹកដី មិនឱ្យប្រទេសណាមកឈ្លានពានដាច់ខាត ។

តាមការចុះផ្សាយរបស់សារព័ត៌មានថៃ គឺបច្ចុប្បន្ន នៅប្រាសាទតាមាន់ធំ មានសភាពអ៊ូអរយ៉ាងខ្លាំង ដោយសារពលរដ្ឋថៃនាំគ្នាទៅផ្តល់កម្លាំងចិត្តដល់ទាហានថៃនៅប្រាសាទតាមាន់ធំ ។ កាលពីថ្ងៃទី២៤ ខែឧសភា កន្លងមក លោក កុលរ៉ាគត់ កេតកែវ អតីតទាហានថៃ បានបង្ហោះវីដេអូក្រុមទាហានឈុតខ្មៅថៃ និងទាហានចូលនិវត្តន៍ ជាង៥០០នាក់ ធ្វើដំណើរមកផ្តល់កម្លាំងចិត្តដល់ទាហានថៃនៅប្រាសាទតាមាន់ធំ ដែលថៃចាត់ទុកថា នេះជាថ្ងៃពិសេសយ៉ាងខ្លាំង ពីព្រោះជាការរួមគ្នាដើម្បីជាតិ ។

លោក កុលរ៉ាគត់ កេតកែវ អតីតទាហានថៃនិយាយថា យើងមកជួបជុំមិត្តភក្តិអតីតទាហានរបស់យើង ពីព្រោះធ្លាប់សន្យាថា យើងនឹងជួបគ្នាពេលប្រទេសជាតិត្រូវការ ។ យើងគ្រប់គ្នានឹងបង្ហាញឱ្យពលរដ្ឋថៃឃើញថា ទោះជាចូលនិវត្តន៍ក្តី ប៉ុន្តែយើងនៅតែស្រឡាញ់ជាតិ និងមកផ្តល់កម្លាំងចិត្តដល់ប្អូនៗទាហានឈរជើងនៅប្រាសាទតាមាន់ធំ ។

ចំណែកលោក កាំម៉ាណាត ណយភុប អតីតមេបញ្ជាការទាហានឈុតខ្មៅថៃនៅខេត្តប៉ាធុមថានី និយាយថា ការមកប្រមូលផ្តុំគ្នានៅប្រាសាទតាមាន់ធំ គឺមកផ្តល់កម្លាំងចិត្តដល់ទាហានថៃនៅព្រំដែន ។ យើងចង់បង្ហាញថា យើងជាអតីតទាហានឈុតខ្មៅនៅតែស្រឡាញ់ និងបារម្ភពីទឹកដីដែលយើងធ្លាប់ការពារសម្រាប់កូនចៅ ។ យើងនឹងពុំឱ្យអ្នកណាម្នាក់ ឬប្រទេសណាបំផ្លាញប្រទេសយើងទេ យើងនឹងបង្ហាញពីភក្តីភាពដល់ជាតិ សាសនា និងព្រះមហាក្សត្រ ។

គួរបញ្ជាក់ថា ក្រុមទាហានឈុតខ្មៅថៃមកពីជំរំប៉ាកថុងឆ័យ ខេត្តឧប៊ុនរ៉ាជថានី ដឹកនាំដោយវរសេនីយ៍ឯក ចរិយា ស៊ីរ៉ាក់ស៊ី, នាយកសមាគមទាហានល្បាតខេត្តឧប៊ុនរ៉ាជថានី ព្រមទាំងអតីតទាហានឈុតខ្មៅថៃមកពីតំបន់ជាច្រើន ដូចជា ៖ ឧប៊ុនរ៉ាជថានី ប៉ាកថុងឆ័យ កូរ៉ាជ និងសុរិន្ទ បានធ្វើដំណើរមកផ្តល់កម្លាំងចិត្តដល់ទាហានថៃ ដែលថៃចាត់ទុកថា បំពេញភារកិច្ចការពារអធិបតេយ្យនៅប្រាសាទតាមាន់ធំ ដោយមានអតីតទាហានឈុតខ្មៅ និងទាហានចូលនិវត្តន៍មកពីទូទាំងប្រទេស ជាង៥០០នាក់ ចូលរួម ។

នេះជាការតាំងចិត្តរបស់អតីតទាហានឈុតខ្មៅ និងទាហានចូលនិវត្តន៍ ដែលនៅតែស្រឡាញ់ជាតិ ទោះជាចូលនិវត្តន៍ពីការងារ ដើម្បីបង្ហាញកម្លាំង និងផ្តល់កម្លាំងចិត្តដល់ទាហានប្អូនៗនៅការពារទឹកដីថៃ ។ អតីតទាហានឈុតខ្មៅបានបង្ហាញពីភាពរឹងមាំ មិនថាពេលវេលាកន្លងផុតទៅជាច្រើនឆ្នាំ ប៉ុន្តែគ្រប់គ្នានៅតែស្រឡាញ់ជាតិ និងគាំទ្រប្អូនៗទាហានយ៉ាងពេញទំហឹង ។ វាធ្វើឱ្យបរិយាកាសនៅប្រាសាទតាមាន់ធំ ពោរពេញដោយស្នាមញញឹម និងកក់ក្តៅ ទោះជាមេឃធ្លាក់ភ្លៀង ប៉ុន្តែគ្មានអ្នកណាម្នាក់រាថយ ។ បន្ទាប់មក អតីតទាហានឈុតខ្មៅថៃក៏បានប្រគល់សម្ភារៈមួយចំនួនឱ្យទាហានថៃនៅប្រាសាទតាមាន់ធំ ព្រមទាំងបញ្ជាក់ថា នឹងពុំឱ្យអ្នកណាម្នាក់មកឈ្លានពានដាច់ខាត ។ នេះបើតាមការចុះផ្សាយរបស់សារព័ត៌មានថៃ ។

ដោយឡែក គេហទំព័រព័ត៌មាន Dongrak News បានបង្ហោះរូបភាព និងវីដេអូការជួបជុំគ្នារបស់អតីតទាហានឈុតខ្មៅ និងទាហានចូលនិវត្តន៍ ដោយសរសេរថា ៖ «អតីតទាហាននៅទូទាំងប្រទេស ស្មើជាង៥០០នាក់ បានមកផ្តល់កម្លាំងចិត្តដល់ប្អូនៗទាហាននៅប្រាសាទតាមាន់ធំ ទោះជាមានភ្លៀងធ្លាក់ ប៉ុន្តែបរិយាកាសពោរពេញទៅដោយស្នាមញញឹម និងកក់ក្តៅ» ៕

ហុងកុង ៖ កាលពីថ្ងៃទី២៦ ខែឧសភា ឆ្នាំ២០២៥ សារព័ត៌មាន Reuters រាយការណ៍ថា នាយកដ្ឋានអប់រំទីក្រុងហុងកុង បានអំពាវនាវឱ្យសាកលវិទ្យាល័យនានាទទួលស្វាគមន៍និស្សិត និងអ្នកជំនាញបរទេស ក្រោយពីរដ្ឋាភិបាលអាមេរិករបស់លោកប្រធានាធិបតី Donald Trump ហាមឃាត់សាកលវិទ្យាល័យ Harvard កុំឱ្យទទួលនិស្សិតបរទេសមកសិក្សា និងចោទប្រកាន់សាកលវិទ្យាល័យនេះថា បានសហការជាមួយគណបក្សកុម្មុយនិស្តចិន ។

រដ្ឋាភិបាលអាមេរិកបានដកហូតសិទ្ធិរបស់សាកលវិទ្យាល័យ Harvard កុំឱ្យទទួលនិស្សិតបរទេស និងបង្ខំឱ្យនិស្សិតបរទេសដែលកំពុងសិក្សាត្រូវផ្លាស់ប្តូរសាកលវិទ្យាល័យ បើមិនដូច្នោះទេ ពួកគេប្រឈមនឹងការលុបចោលទិដ្ឋាការសិក្សា ។ ការហាមឃាត់សាកលវិទ្យាល័យ Harvard គឺអនុវត្តក្នុងឆ្នាំសិក្សា២០២៥ ដល់ឆ្នាំ២០២៦ ហើយរដ្ឋាភិបាលអាមេរិកចោទប្រកាន់សាកលវិទ្យាល័យនេះថា ជំរុញឱ្យនិស្សិតប្រឆាំងនឹងជនជាតិ Semitism និងសហការជាមួយគណបក្សកុម្មុយនិស្តចិន ក្រោយពីសាកលវិទ្យាល័យ Harvard ទទួលនិស្សិតចិនម្នាក់ ក្នុងចំណោមនិស្សិតបរទេស៥នាក់ មកសិក្សានៅឆ្នាំ២០២៤ ។

ក្នុងអ៊ីម៉ែលរបស់នាយកដ្ឋានអប់រំទីក្រុងហុងកុងបញ្ជាក់ថា នាយកដ្ឋានសូមអំពាវនាវឱ្យសាកលវិទ្យាល័យទាំងអស់នៅទីក្រុងហុងកុង កំណត់វិធានការផ្តល់ភាពងាយស្រួលឱ្យបេក្ខជនមានគុណសម្បត្តិមកពីក្រៅប្រទេស ដើម្បីឱ្យនិស្សិត និងអ្នកជំនាញបរទេសទទួលបានសិទ្ធិ និងផលប្រយោជន៍ស្របច្បាប់ ។ ក្រៅពីនេះ នាយកដ្ឋានក៏បានទាក់ទងទៅកាន់ Harvard Club of Hong Kong ផងដែរ ដើម្បីគាំទ្រនិស្សិតបរទេស ដែលអនុញ្ញាតឱ្យចូលសិក្សានៅសាកលវិទ្យាល័យ Harvard ។

ខ្លឹមសារក្នុងអ៊ីម៉ែលរបស់នាយកដ្ឋានអប់រំទីក្រុងហុងកុង បញ្ជាក់ទៀតថា យើងនឹងតាមដាននិស្សិតបរទេសដែលមានផលប៉ះពាល់ក្នុងការសិក្សា ហើយយើងនឹងគាំទ្រពួកគេមកសិក្សានៅសាកលវិទ្យាល័យនានានៅហុងកុង ដើម្បីឱ្យហុងកុងក្លាយជាមជ្ឈមណ្ឌលអប់រំអន្តរជាតិ ។

គួរបញ្ជាក់ថា ទីក្រុងហុងកុង មានពលរដ្ឋរស់នៅប្រមាណ ៧លាន៥សែននាក់ ហើយមានសាកលវិទ្យាល័យចំនួន៥ បានជាប់ចំណាត់ថ្នាក់ជាសាកលវិទ្យាល័យល្អបំផុតលើពិភពលោក ក្នុងចំណោមសាកលវិទ្យាល័យចំនួន១០០ ដែលចាត់ចំណាត់ថ្នាក់ដោយ Times Higher Education World University Rankings ។ បច្ចុប្បន្ន ហុងកុង គឺជាកន្លែងដែលនិស្សិតមានសេរីភាពក្នុងការសិក្សានៅតំបន់អាស៊ី ៕

សហរដ្ឋអាមេរិក ៖ ភ្នំភ្លើង Kilauea នៃរដ្ឋហាវ៉ៃ បានបង្ហាញភាពគួរឲ្យខ្លាចរបស់វា កាលពីយប់ថ្ងៃអាទិត្យ ដោយបា.ញ់ចេញនូវកម្អែភ្នំភ្លើងជាង 1,000 ហ្វីតទៅលើអាកាសរយៈពេល6ម៉ោងពេញ បន្ទាប់មកបានស្ងប់ស្ងាត់ទៅវិញនៅម៉ោង១០និង២៥នាទីយប់ ។ វាបានធ្វើឲ្យអ្នកស្រុកក្នុងតំបន់មានការភ្ញាក់ផ្អើល និងព្រួយបារម្ភជាខ្លាំង ព្រោះពួកគេមិនដឹងទេថា តើវាអាចនឹងមានការផ្ទុះខ្លាំងក្លាជានេះទៀត ឬអត់?

យោងតាមការចុះផ្សាយរបស់ ABC News ផ្អែកលើរបាយការណ៍ដែលទទួលបានពីក្រុមអង្កេតភូមិសាស្ត្រភ្នំភ្លើងហាវ៉ៃ (HVO) របស់ហរដ្ឋអាមេរិកបានឲ្យដឹងថា ៖ កម្អែរភ្លើងដែលបានបា.ញ់ចេញមកក្រៅមានកម្ពស់ជាង 1000ហ្វីត (304.8ម៉េត្រ) ដែលកម្ពស់នេះគឺប្រហាក់ប្រហែលនឹងកម្ពស់នៃអគារ Empire State ឬប្រហែលពីរដងនៃកម្ពស់វិមាន Washington ។ កត្តានេះពិតជាគ្រោះថ្នា.ក់ខ្លាំងណាស់ ដែលក្នុងរយៈពេលត្រឹមតែ 30នាទីប៉ុណ្ណោះ យន្តហោះទាំងអស់ដែលហោះឆ្លងកាត់ទីនេះ ត្រូវបានផ្លាស់ប្តូរជើងហោះហើររបស់ពួកគេ ឬត្រូវហោះឲ្យបានខ្ពស់ជាងនេះ។

មន្ត្រីជំនាញនិយាយថា ការផ្ទុះនេះអាចបង្កគ្រោះថ្នាក់ជាច្រើន ដូច្នេះប្រជាពលរដ្ឋត្រូវប្រុងប្រយ័ត្ន។ ក្រៅពីភ្នំភ្លើងនេះបញ្ចេញកម្ដៅដ៏ក្ដៅ វាក៏បញ្ចេញនូវឧស្ម័នស្ពាន់ធ័រឌីអុកស៊ីតដ៏គ្រោះថ្នាក់ ដែលបង្កើតឲ្យមាននូវ “vog” (ផ្សែងអ័ព្ទភ្នំភ្លើង) នៅពេលដែលវាមានប្រតិកម្មនៅក្នុងបរិយាកាស នេះបើយោងតាម HVO ។

HVO បានព្រមានបន្ថែមទៀតថា កំទិចផេះភ្នំភ្លើងដែលអណ្តែតតាមអាកាស ក៏អាចប៉ះពាល់ដល់ស្បែក និងភ្នែករបស់មនុស្សផងដែរ។ លើសពីនេះទៀត កម្រិតខ្ពស់នៃឧស្ម័នភ្នំភ្លើងនៅក្នុងតំបន់នេះ បង្កហានិភ័យដល់អ្នកដែលនៅក្បែរនោះ ជាពិសេសអ្នកដែលមានបញ្ហាដកដង្ហើម។

គួរបញ្ជាក់ថា បច្ចុប្បន្នស្ថានភាពរបស់ភ្នំនេះមានភាពស្ងប់ស្ងាត់ទៅវិញហើយ ប៉ុន្តែគេនៅមិនទាន់អនុញ្ញាតឲ្យមានការចេញចូលនៅតំបន់នោះទេ ព្រោះកម្អែភ្លើងបានគ្របដណ្ដប់ជុំវិញផ្ទៃដីជាង 132ហិចតា។

ចំណែកឯការព្យាករណ៍របស់អ្នកវិទ្យាសាស្រ្តបានឲ្យដឹងផងដែរថា អាចនឹងមានការផ្ទុះមួយទៀតក្នុងពេលឆាប់ៗនេះ។ ព្រោះបន្ទាប់ពីការផ្ទុះនីមួយៗ ភ្នំភ្លើងនេះនឹងចាប់ផ្តើមផ្ទុះឡើងម្ដងទៀត នៅពេល magma ដែលស្ថិតនៅក្រោមស្រទាប់ដីបានបង្កើនបរិមាណច្រើនទៅៗ នោះការផ្ទុះនឹងកើតមានឡើង ៕

ប្រទេសចិន ៖ យ៉ាងហោចណាស់មនុស្ស5នាក់បានបា.ត់បង់ជីវិត 19 នាក់រងរបួស និង6នាក់ទៀតត្រូវបាត់ខ្លួនបន្ទាប់ពីមានការផ្ទុះរោងចក្រគីមីមួយយ៉ាងរន្ធ.ត់ កាលពីយប់ថ្ងៃអង្គារ ទី27 ខែឧសភា ឆ្នាំ2025 វេលាម៉ោង 11និង 57នាទី (ម៉ោងក្នុងតំបន់) រំលងអាធ្រាតឈានចូលថ្ងៃទី28 ខែឧសភា។ នេះបើយោងតាមសារព័ត៌ Reuters នៅព្រឹកថ្ងៃពុធនេះ។

ហេតុការណ៍នេះបានកើតឡើងនៅក្នុងទីក្រុង Gaomi ខេត្ត Shandong ប្រទេសចិន បានធ្វើឱ្យមនុស្សជាច្រើននាក់រងរបួស និងរកឃើញថាស្លា.ប់ចំនួន 5នាក់ ក្រៅពីនេះក៏នៅមានមនុស្សមួយចំនួនទៀតបានបាត់ខ្លួននៅក្រោមគំនរអគារដែលបានបា.ក់សង្កត់ដោយសារអគ្គីភ័យផងដែរ។

បើតាមសាក្សីដែលបានឃើញផ្ទាល់ភ្នែកជាច្រើនបានអះអាងថា ពួកគេបានលឺសម្លេងផ្ទុះកក្រើកឡើងរង្គើរដី និងឃើញអណ្ដាតភ្លើងពណ៌ទឹកក្រូចឆ្អិនឆ្អៅដ៏ធំសម្បើម បានលេចឡើងដូចជាផ្សិតនៅលើមេឃ និងមានផ្សែងព័ទ្ធជុំវិញយ៉ាងគួរឲ្យតក់ស្លុ.ត។ សាក្សីជាច្រើនទៀត បានថតបង្ហោះនូវរូបភាពបង្អួចកញ្ចក់នៅផ្ទះរបស់ពួកគេដែលបានប្រេះបែ.ក ដោយសារកម្លាំងនៃការផ្ទុះមានឥទ្ធិពលខ្លាំងពេក។

ចំណែករបាយការណ៍ទូទៅអំពីរោងចក្រមួយនេះមានឈ្មោះថា Shandong Youdao Chemical ដែលជារោងចក្រគីមីដ៏ធំបំផុតមួយ ត្រូវបានបង្កើតឡើងក្នុងឆ្នាំ 2019 និងមានកម្មករធ្វើការជាង 300នាក់។ រោងចក្រនេះ ផលិតថ្នាំសម្លា.ប់សត្វល្អិត «chlorpyrifos«» ឱសថ និងផលិតផលគីមីជាច្រើនផ្សេងទៀត។

ចំពោះមូលហេតុដែលនាំឲ្យមានហេតុការណ៍ខាងលើនេះ នៅមិនទាន់អាចបញ្ជាក់បាននៅឡើយទេ។ ប៉ុន្តែសម្រាប់ការសន្និដ្ឋានជំហានបឋមគេសង្ស័យថា វាអាចបណ្ដាលមកពីកត្តាឆ្លងចរន្តអគ្គិសនី និងប៉ះគ្នាជាមួយសារធាតុគីមីមួយចំនួនដែលមាននៅទីនោះ ទើបបង្កើតបានជាការផ្ទុះឆេះដ៏អាក្រ.ក់បែបនេះ។

ជុំវិញការផ្ទុះរោងចក្រគីមីខាងលើ វាបានធ្វើឱ្យអគារជាច្រើនរងការខូចខាតធ្ងន់ធ្ងរ និង សាលារៀននៅជុំវិញបរិវេណទីតាំងផ្ទុះនោះត្រូវបានផ្អាកជាបណ្ដោះអាសន្ន និងធ្វើការជម្លៀសសិស្សចេញ ទៅកាន់ទីតាំងដែលមានសុវត្ថិភាពភ្លាមៗផងដែរ។ បច្ចុប្បន្ន ខាងក្រុមសង្គ្រោះចំនួន 232នាក់ និង រថយន្តសង្គ្រោះ 55គ្រឿង ត្រូវបានបញ្ជូនទៅទីតាំងកើតហេតុ ដោយពួកគេកំពុងប្រតិបត្តិការយ៉ាងស្វិតស្វាញបំផុត៕