ប្រទេសថៃ ៖ នៅថ្ងៃទី១ ខែកក្កដា ឆ្នាំ២០២៥ សារព័ត៌មាន Thairath រាយការណ៍ថា ក្រោយពីតុលាការធម្មនុញ្ញថៃទទួលយកញត្តិសមាជិកព្រឹទ្ធសភា និងសម្រេចព្យួរតំណែងនាយករដ្ឋមន្រ្តីថៃ លោកស្រី ផេថងថាន ស៊ីណាវ៉ាត់ ដោយសម្លេង៧ ទល់២ លោកស្រីនិយាយថា ធ្វើគ្រប់យ៉ាងដើម្បីជាតិ ការពារអធិបតេយ្យភាព និងសូមទោសពលរដ្ឋថៃ ដែលទង្វើលោកស្រីធ្វើឱ្យពលរដ្ឋជាច្រើនពុំពេញចិត្ត ។ លោកស្រីនឹងបំពេញការងារបន្តទៀតក្នុងនាមជាពលរដ្ឋថៃម្នាក់ មិនថាកាន់តំណែងអ្វីក៏ដោយ ។

នាវេលាម៉ោង២ ថ្ងៃទី១ ខែកក្កដា លោកស្រី ផេថងថាន ស៊ីណាវ៉ាត់ ដែលត្រូវបានតែងតាំងជារដ្ឋមន្ត្រីក្រសួងវប្បធម៌ បាននិយាយក្រោយពីតុលាការធម្មនុញ្ញព្យួរតំណែងជានាយករដ្ឋមន្ត្រីចាប់ពីថ្ងៃទី១ ខែកក្កដា ដោយសារការបែកធ្លាយកិច្ចសន្ទនារវាងលោកស្រីជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា ។ លោកស្រីបញ្ជាក់ថា ការសម្រេចរបស់តុលាការធម្មនុញ្ញចេញមកហើយ ខ្ញុំទទួលយកការសម្រេចដែលឱ្យខ្ញុំផ្អាកតួនាទីក្នុងរយៈពេលមិនពិតប្រាកដ ។

ចំណែកការបែកធ្លាយកិច្ចសន្ទនា គឺខ្ញុំតាំងចិត្តធ្វើដើម្បីប្រទេសជាតិ និងរក្សាអធិបតេយ្យភាព រួមទាំងការពារអាយុជីវិតកងទ័ពគ្រប់រូបដើម្បីឱ្យប្រទេសថៃមានសន្តិភាព ប៉ុន្តែវាអាចធ្វើឱ្យពលរដ្ឋពេញចិត្ត និងមិនពេញចិត្តនឹងទង្វើរបស់ខ្ញុំ ។ ខ្ញុំបានតាំងចិត្ត និងព្យាយាមដើម្បីប្រទេសជាតិពិតមែន ខ្ញុំគិតតែម្យ៉ាងគត់ គឺចៀសវាងភាពចលាចល ធ្វើយ៉ាងណា កុំឱ្យមានការប៉ះទង្គិចគ្នា ។ កងទ័ពថៃនឹងពុំបង្ហូរឈាម ខ្ញុំគ្មានចេតនាអាក្រក់ឡើយ ។ នេះជាអ្វីដែលខ្ញុំតាំងចិត្ត និងចំណាយពេលវេលាបញ្ជាក់ឱ្យបានច្បាស់លាស់ ។

អរគុណគ្រប់គ្នាដែលផ្តល់កម្លាំងចិត្ត ហើយចាប់ពីយប់នេះ (ថ្ងៃទី១ ខែកក្កដា) នឹងមានអ្នកផ្តល់កម្លាំងចិត្តជាបន្តបន្ទាប់ ហើយក៏សូមទោសពលរដ្ឋថៃទាំងអស់ដែលពុំសប្បាយចិត្តជាមួយរឿងនេះ ឬមានអារម្មណ៍ខឹងសម្បារ ។ ចាប់ពីពេលនេះតទៅ ពេលខ្ញុំត្រូវបានព្យួរតំណែងជានាយករដ្ឋមន្ត្រី ខ្ញុំនឹងបំពេញការងារបន្តទៀតដើម្បីប្រទេសជាតិ មិនថាកាន់តំណែងអ្វីទេ ក្នុងនាមជាពលរដ្ឋថៃម្នាក់ ។ នេះបើតាមការលើកឡើងរបស់លោកស្រី ផេថងថាន ។

គួរបញ្ជាក់ថា លោកស្រី ផេថងថាន បានចំណាយពេលនិយាយទៅកាន់ពលរដ្ឋ ប្រមាណ៤នាទី ប៉ុន្តែលោកស្រីពុំបានឆ្លើយតបសំណួររបស់អ្នកសារព័ត៌មានទេក្រោយពីនិយាយរួច ។ បន្ទាប់មក លោកស្រីក៏ឡើងជិះរថយន្តចាកចេញពីវិមានរដ្ឋាភិបាល ៕

ថៃ ៖ បន្ទាប់ពីត្រូវតុលាការធម្មនុញ្ញដកចេញពីកៅអីនាយករដ្ឋមន្រ្តីជាបណ្ដោះអាសន្ន ពេលនេះលោកស្រី ផែថងថាន ត្រូវបានតែងតាំងជារដ្ឋមន្រ្តីក្រសួងវប្បធម៌ ក្រោមការបោះឆ្នោតដែលមានសម្លេង 9-0 ពីចៅក្រមកំពូលចំនួន9រូប។

នារសៀលថ្ងៃអង្គារ ទី១ ខែកក្កដា ឆ្នាំ២០២៥ ក្រោយតុលាការធម្មនុញ្ញថៃ សម្រេចទទួលយកញត្តិសមាជិកព្រឹទ្ធសភា ដើម្បីព្យួរតំណែងជានាយករដ្ឋមន្រ្តីរបស់ លោកស្រី ផែថងថាន ស៊ីណាវ៉ាត់ ដោយសម្លេង៧ ទល់ ២ ពេលនេះ នៅលើទំព័រផ្លូវការរបស់ក្រសួងវប្បធម៌ថៃ បានប្រកាសស្វាកគមន៍ជាផ្លូវការ នូវការចូលមកកាន់តំណែងថ្មីជារដ្ឋមន្រ្តីនៅក្នុងក្រសួង របស់លោកស្រីផែថងថាន។

ជាមួយគ្នានេះ បន្ទាប់ពីដើរចេញមកពីតុលាការ នៅចំពោះមុខអ្នកសារព័ត៌មានលោកស្រីផែថងថាន បានសម្ដែងនូវការសុំអភ័យទោសពីពលរដ្ឋទាំងអស់ដោយនិយាយថា ៖ ខ្ញុំសុំទោសប្រជាជនថៃ ដែលធ្វើឲ្យអ្នកទាំងអស់គ្នាមានអារម្មណ៍មិនស្រួល ឬខឹង។ ខ្ញុំសូមបញ្ជាក់ថា ខ្ញុំពិតជាមានបំណងធ្វើការដើម្បីប្រទេសជាតិពិតមែន។ ខ្ញុំនឹងបន្តធ្វើការឱ្យប្រទេសក្នុងនាមជាជនជាតិថៃ។ ខ្ញុំបានត្រៀមខ្លួនជាស្រេចដើម្បីបន្តធ្វើការសម្រាប់ជាតិ មិនថាខ្ញុំស្ថិតនៅក្នុងមុខតំណែងអ្វីនោះទេ»។

គួរជម្រាបថា សេចក្ដីអនុម័តរបស់តុលាការខាងលើនេះ គឺត្រូវបានធ្វើឡើងបន្ទាប់ពីកិច្ចសន្ទនាតាមទូរស័ព្ទរវាងលោកស្រី ផែថងថាន ជាមួយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជាត្រូវបានលេចធ្លាយ។ ករណីនេះ បានបណ្ដាលឲ្យពលរដ្ឋថៃនាំមានការខឹ.ងសម្បា.រជាខ្លាំង ព្រមទាំងជំរុញឲ្យមានភាពល្អក់កករនៅក្នុងប្រ័ន្ធនយោបាយថៃផងដែរ។

ទន្ទឹនឹងនេះ ខណៈពេលដែលលោកស្រី ផែថងថាន ត្រូវបានតុលាការព្យួរតំណែងជានាយករដ្ឋមន្រ្តី លោក ស៊ុរិយៈ ជឹងរុងរឿងកិច្ច ដែលជារដ្ឋមន្រ្តីក្រសួងគមនាគមន៍ ត្រូវបានតែងតាំងជានាយករដ្ឋមន្ត្រីស្តីទីជាបណ្ដោះអាសន្នសិន។ ដូច្នេះរាល់កិច្ចទាំងអស់របស់ប្រទេសជាតិ នឹងត្រូវបានលោក ស៊ុរិយៈ កាន់កាប់បន្តពីលោកស្រី ផែថងថាន។

ក្នុងស្ថានភាពបែបនេះ ពលរដ្ឋថៃសង្ឃឹមថា ការឡើងកាន់តំណែងជានាយករដ្ឋមន្ត្រីស្តីទីរបស់លោក ស៊ុរិយៈ ជឹងរុងរឿងកិច្ច នឹងអាចជួយដោះស្រាយបញ្ហាផ្សេងៗទាំងក្នុង និងក្រៅប្រទេស រួមទាំងបញ្ហាព្រំដែនដែលថៃកំពុងប្រឈមបាន ដោយសារលោកមានបទពិសោធន៍ផ្នែកនយោបាយជាច្រើនឆ្នាំមកហើយ៕

ប្រទេសថៃ ៖ នៅថ្ងៃទី១ ខែកក្កដា ឆ្នាំ២០២៥ សារព័ត៌មានថៃ Khaosod រាយការណ៍ថា ក្រោយពីតុលាការធម្មនុញ្ញបានសម្រេចទទួលយកញត្តិសមាជិកព្រឹទ្ធសភា ហើយសម្រេចព្យួរតំណែងនាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ ដោយសំឡេង៧ ទល់២ ដោយសារការបែកធ្លាយកិច្ចសន្ទនារវាងលោកស្រីជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា គឺលេខាធិការដ្ឋានគណៈរដ្ឋមន្ត្រីចាត់ឱ្យលោក ស៊ុរិយៈ ជឹងរុងរឿងកិច្ច ឧបនាយករដ្ឋមន្ត្រី និងរដ្ឋមន្ត្រីក្រសួងគមនាគមន៍ ឡើងកាន់តំណែងជានាយករដ្ឋមន្ត្រីស្តីទី បន្ទាប់ពីលោកស្រី ផេថងថាន ។

លោក Phumtham Wechayachai រដ្ឋមន្ត្រីក្រសួងមហាផ្ទៃឱ្យដឹងថា លោក ស៊ុរិយៈ ជឹងរុងរឿងកិច្ច នឹងស្បថកាន់តំណែង នាថ្ងៃទី៣ ខែកក្កដា ឆ្នាំ២០២៥ ហើយបំពេញតួនាទីជំនួសលោកស្រី ផេថងថាន ដែលលេខាធិការដ្ឋានគណៈរដ្ឋមន្ត្រីបានកំណត់រួចហើយ មិនថាអ្នកណាឡើងកាន់តំណែង ឬធ្លាក់ពីតំណែង គឺចាត់ទុកថា ត្រូវតែឈរលើគោលការណ៍ដែលប្រទេសថៃត្រូវដើរទៅមុខបន្តទៀត ពីព្រោះការងាររដ្ឋាភិបាលពុំអាចផ្អាកសូម្បីតែមួយថ្ងៃ ។ ហេតុនេះ លោក ស៊ុរិយៈ ជឹងរុងរឿងកិច្ច នឹងប្រញាប់បំពេញតួនាទីឆាប់ៗ ។

នាយករដ្ឋមន្ត្រីស្តីទីនឹងចូលធ្វើការភ្លាមៗ ហើយត្រូវតាំងចិត្តធ្វើការ ពីព្រោះមន្ត្រីរដ្ឋាភិបាលគ្រប់រូបជឿជាក់ថា នាយករដ្ឋមន្ត្រីស្តីទីនឹងអាចដោះស្រាយបញ្ហាផ្សេងៗបាន អ្វីៗគ្រប់យ៉ាងត្រូវបានកំណត់រួចហើយ ។ ករណីមានការប្តឹងផ្តល់ ឬមានរឿងក្តីកើតឡើងត្រូវតែចាត់វិធានការតាមផ្លូវច្បាប់ ដែលនឹងពុំប៉ះពាល់ដល់ភារកិច្ចឡើយ ។

គួរបញ្ជាក់ថា លោក ស៊ុរិយៈ ជឹងរុងរឿងកិច្ច បានចូលប្រឡូកក្នុងផ្នែកនយោបាយកាលពីឆ្នាំ១៩៩៨ មានតួនាទីជាអនុរដ្ឋមន្ត្រីក្រសួងឧស្សាហកម្ម ។ នៅឆ្នាំ២០០១លោកបានចូលរួមជាមួយគណបក្សថៃស្រឡាញ់ថៃ និងកាន់តំណែងជាលេខាបក្ស ប៉ុន្តែគណបក្សនេះត្រូវបានរំលាយ និងដកហូតសិទ្ធិនយោបាយរយៈពេល៥ឆ្នាំ ។ លោកក៏ចូលរួមជាមួយគណបក្សផ្លាំងប្រាឆារ៉ាត់ នៅឆ្នាំ២០១៨ មានតួនាទីជាមេដឹកនាំក្រុមសមមិត្ត ហើយលោកបានកាន់តំណែងជារដ្ឋមន្ត្រីក្រសួងគមនាគមន៍ នៅឆ្នាំ២០០១ ។

ពលរដ្ឋថៃសង្ឃឹមថា ការឡើងកាន់តំណែងជានាយករដ្ឋមន្ត្រីស្តីទីរបស់លោក ស៊ុរិយៈ ជឹងរុងរឿងកិច្ច នឹងអាចជួយដោះស្រាយបញ្ហាផ្សេងៗទាំងក្នុងប្រទេស និងក្រៅប្រទេស ដែលថៃកំពុងប្រឈម ដោយសារលោកមានបទពិសោធន៍ផ្នែកនយោបាយជាច្រើនឆ្នាំ ៕

ថៃ ៖ តុលាការធម្មនុញ្ញថៃបានសម្រេចសេចក្តី ៧-២ ក្នុងការព្យួរតំណែងលោកស្រី Paetongtarn Shinawatra ពីតួនាទីជានាយករដ្ឋមន្ត្រី។ ការកាត់ក្ដីនេះ តុលាការបានសម្រេចជាឯកច្ឆ័ន្ទក្នុងការពិចារណាលើកចោទប្រកាន់របស់លោកស្រី ជុំវិញឃ្លីបសន្ទនាដ៏ចម្រូងចម្រាសរវាងលោកស្រី និងប្រធានព្រឹទ្ធសភាកម្ពុជា សម្ដេចតេជោ ហ៊ុន សែន។

យោងតាមការចេញផ្សាយរបស់សាព័ត៌មានថៃនាថ្ងៃអង្គារ ទី០១ កក្កដា បានឲ្យដឹងថា តុលាការធម្មនុញ្ញថៃ សម្រេចទទួលយកញត្តិសមាជិកព្រឹទ្ធសភា និងសម្រេចព្យួរតំណែងនាយករដ្ឋមន្រ្តីថៃ ផែថងថាន ស៊ីណាវ៉ាត់ ដោយសម្លេង៧ ទល់ ២។

គួររំលឹកថា បន្ទាប់ពី Paethongtarn បានសារភាពថា ខ្សែអាត់សំឡេងនៃការសន្ទនារវាងនាង និងសម្តេច ហ៊ុន សែន គឺជាការពិត ហើយមានខ្លឹមសារប្រមា.ថលើមេទ័ពភូមិភាគទី២ រួមទាំងអាកប្បកិរិយាមួយចំនួនទៀត បានបង្ហាញថាវាជាទង្វើ«ជនក្បត់ជាតិ»។

ការណ៍នេះបានប៉ះពាល់ដល់អធិបតេយ្យភាព កងទ័ព និងប្រជាជនថៃ ដែលក្រោយមកទៀត បានជំរុញឲ្យនាយឧត្តមសេនីយ៍ សាវ៉ាត និងសមាជិកព្រឹទ្ធសភាចំនួន ៣៦រូបផ្សេងទៀត បានដាក់លិខិតជូនប្រធានាព្រឹទ្ធសភាថៃ ដើម្បីបញ្ជូនញត្តិនេះទៅតុលាការធម្មនុញ្ញ។

ជាលទ្ធផល នៅថ្ងៃនេះ (ថ្ងៃទី 1 ខែកក្កដា) តុលាការធម្មនុញ្ញបានសម្រេចអនុម័តជាឯកច្ឆ័ន្ទ លើញត្តិសម្រាប់ការពិចារណា និងទទួលបានការបោះឆ្នោតក្នុងសម្លេង 7:2 ដើម្បីឲ្យ លោកស្រី Paethongtarn Shinawatra ឈប់បំពេញតួនាទីជានាយករដ្ឋមន្ត្រីជាបណ្ដោះអាសន្ន រហូតដល់ការសម្រេចចិត្តថ្មីត្រូវបានធ្វើឡើង៕

ប្រទេសជប៉ុន ៖ កាលពីថ្ងៃទី២៨ ខែមិថុនា ឆ្នាំ២០២៥ សារព័ត៌មានបរទេសរាយការណ៍ថា ជប៉ុនបានដាស់តឿនពលរដ្ឋដែលដើរបេះបន្លែក្នុងព្រៃ និង Influencer បង្កើតមាតិកាពីខ្លាឃ្មុំ ត្រូវប្រុងប្រយ័ត្នឱ្យបានខ្ពស់ដោយសារខ្លាឃ្មុំព្រៃចេញមកវាយប្រ.ហារពលរដ្ឋរហូតដល់បាត់ប.ង់ជីវិត ។ ពលរដ្ឋគួរផ្អាកចូលព្រៃដើម្បីការពារអាយុជីវិត រីឯ Influencer ទាំងឡាយក៏ដូចគ្នាដែរ គួរផ្អាកថតរូប ឬថតវីដេអូខ្លាឃ្មុំក្នុងព្រៃ ពីព្រោះខ្លាឃ្មុំមួយចំនួនធ្វើបាបមនុស្ស ។

តាមការផ្សព្វផ្សាយរបស់សារព័ត៌មានជប៉ុន គឺមានបុរសម្នាក់អាយុ៤៦ឆ្នាំ បានស្លាប់នៅក្នុងព្រៃក្បែរទីក្រុងអូមាឈិ ខេត្តណាកាណុ ពេលបុរសរូបនេះកំពុងបេះស្លឹកឫស្សី ។ នាថ្ងៃបន្ទាប់ ក៏មានសេចក្តីរាយការណ៍ថា កម្មករធ្វើការក្នុងព្រៃឫស្សី ចំនួន២នាក់ ត្រូវខ្លាឃ្មុំវាយប្រហារនៅខេត្តណាកាណុ ដូចគ្នា ។

ក្រៅពីនេះ ខ្លាឃ្មុំព្រៃបានសម្រុកចូលកន្លែងរស់នៅរបស់មនុស្សខុសប្រក្រតី ដូចជា ៖ ចូលក្នុងអាកាសយានដ្ឋាន, ចូលសាលារៀន២កន្លែង នៅខេត្តអាអុម៉ូរិ ដែលធ្វើឱ្យសាលារៀនត្រូវលុបចោលកម្មវិធីការប្រកួតកីឡា ដោយសារមានអ្នកប្រទះឃើញខ្លាឃ្មុំព្រៃ ៤ក្បាល ។ សមត្ថកិច្ចបានដាស់តឿនពលរដ្ឋឱ្យបើកបរយានជំនិះដោយប្រុងប្រយ័ត្ន ផ្អាកចូលព្រៃ ឬធ្វើដំណើរក្បែរព្រៃ ។

លោក ខេវីន ឆត អតីតសាស្ត្រាចារ្យផ្នែកវប្បធម៌នៅសាកលវិទ្យាល័យបច្ចេកវិទ្យាព័ត៌មានទីក្រុងតូក្យូ បានលើកឡើងពីមូលហេតុជាច្រើនដែលធ្វើឱ្យខ្លាឃ្មុំចូលមកក្បែរ និងវាយប្រហារមនុស្សជាញឹកញាប់ ដូចជា ៖ បម្រែបម្រួលអាកាសធាតុ និងសីតុណ្ហភាពកើនឡើងអាចធ្វើឱ្យខ្លាឃ្មុំចេញធ្វើសកម្មភាព និងសម្របខ្លួនសម្ងំនៅកន្លែងកក់ក្កៅ ។

មូលហេតុមួយទៀត ចំនួនអ្នកបរបាញ់សត្វនៅប្រទេសជប៉ុនកើនឡើងយ៉ាងឆាប់រហ័ស ពួកគេតែងតែទៅបរបាញ់សត្វក្នុងព្រៃធ្វើឱ្យចំនួនសត្វព្រៃគ្រប់ប្រភេទធ្លាក់ចុះ ដូចជា ៖ ក្តាន់ ជ្រូកព្រៃ ស្វា និងខ្លាឃ្មុំ ។ ក្រៅពីនេះ ការឈូសឆាយព្រៃធ្វើផ្លូវ និងសំណង់ ក៏ជាមូលហេតុសំខាន់ធ្វើឱ្យខ្លាឃ្មុំឃ្លានចំណីទាំងនេះត្រូវដើរស្វែងរកចំណីឆ្ងាយជាងមុន ពួកវាក៏ដើរមកកាន់ទីក្រុង ទីប្រជុំជន និងភូមិអ្នកស្រុក ។

ទោះជាមានការដាស់តឿនយ៉ាងតឹងរ៉ឹងពីរដ្ឋាភិបាកក៏ដោយ ប៉ុន្តែមានក្រុម Influencer ជាច្រើននាក់ពុំចាប់អារម្មណ៍ និងចូលព្រៃបង្កើតមាតិកាថតវីដេអូខ្លាឃ្មុំដើម្បីទាក់ទាញអ្នកទស្សនា ។ សមត្ថកិច្ចរាយការណ៍ថា បានឃើញក្រុម Influencer ថតវីដេអូក្នុងព្រៃ ហើយសមត្ថកិច្ចក៏ដាស់តឿនពីគ្រោះថ្នាក់ ។

បើតាមអ្នកជំនាញ គឺខ្លាឃ្មុំព្រៃមួយចំនួនស៊ីរុក្ខជាតិ និងពុំស៊ីមនុស្សជាអាហារទេ ប៉ុន្តែពូជខ្លាឃ្មុំខ្លះកាចសាហាវអាចធ្វើបាបមនុស្ស ។ ហេតុនេះ កុំប្រមាថ ឬមើលស្រាលខ្លាឃ្មុំខ្លាំងពេក ៕