ប្រទេសថៃ ៖ អ្នកនាំពាក្យរដ្ឋាភិបាលថៃបានច្រានចោលព័ត៌មានថា រដ្ឋាភិបាលថៃកោះប្រជុំរដ្ឋសភាដើម្បីប្រកាសសង្គ្រាមជាមួយកម្ពុជា គឺរដ្ឋាភិបាលថៃគ្មានការកោះហៅរដ្ឋសភាប្រជុំប្រកាសសង្គ្រាមអ្វីឡើយ នេះជាព័ត៌មានក្លែងក្លាយមានចេតនាបង្កាច់បង្ខូចថៃ រដ្ឋាភិបាលថៃប្រកាន់ខ្ជាប់នូវការដោះស្រាយជម្លោះដោយសន្តិវិធី ។ នេះបើតាមការផ្សព្វផ្សាយរបស់សារព័ត៌មាន Thairath កាលពីថ្ងៃទី២២ ខែសីហា ឆ្នាំ២០២៥ ។

នៅថ្ងៃទី២២ ខែសីហា លោក ជិរ៉ាយុ ហួងសាប់ អ្នកនាំពាក្យរដ្ឋាភិបាលថៃ និងជាគណៈកម្មការនៃមជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ និយាយថា តាមការផ្សព្វផ្សាយវីដេអូក្នុងហ្វេសប៊ុកផេកនៅកម្ពុជា ដែលដកស្រង់ប្រភពព័ត៌មានពីប្រព័ន្ធផ្សព្វផ្សាយក្នុងស្រុកថា ប្រទេសថៃបានប្រជុំរដ្ឋសភាដើម្បីប្រកាសសង្គ្រាមជាមួយកម្ពុជា គឺរដ្ឋាភិបាលថៃសូមបញ្ជាក់ថា ពុំមែនជាការពិតទេ នេះជាការប៉ុនប៉ងដោយចេតនាដើម្បីបង្កើតព័ត៌មានក្លែងក្លាយ និងចង់ឱ្យពលរដ្ឋខ្មែរ ក៏ដូចជាអន្តរជាតិយល់ខុស ។

ប្រទេសថៃគ្មានការប្រជុំរដ្ឋសភាដើម្បីប្រកាសសង្គ្រាមជាមួយប្រទេសណា ឬជាមួយកម្ពុជា ហើយថៃគ្មានសកម្មភាពណាមួយឈានទៅរកសង្គ្រាមទេ ។ រដ្ឋសភាថៃប្រជុំតាមធម្មតា គឺសមាជិកព្រឹទ្ធសភាតែងតែប្រជុំនៅរៀងរាល់ថ្ងៃច័ន្ទ និងអង្គារ រីឯសភាតំណាងរាស្ត្រប្រជុំនៅថ្ងៃពុធ និងព្រហស្បតិ៍ រៀងរាល់សប្តាហ៍ ។ រីឯការលើកឡើងថា ថៃពុំត្រូវការសន្តិភាព ឬនឹងវាយប្រហារកម្ពុជានោះ គឺថៃចាត់ទុកជាការលាបពណ៌ និងអាចធ្វើឱ្យប៉ះពាល់ដល់ការធ្វើឱ្យប្រសើរឡើងនូវទំនាក់ទំនងរវាងប្រទេសទាំងពីរ ។

លោក ជិរ៉ាយុ បន្តថា ថៃប្រកាន់ខ្ជាប់នូវការដោះស្រាយបញ្ហាដោយសន្តិវិធីតាមរយៈយន្តការទ្វេភាគីគ្រប់ផ្នែក និងដោះស្រាយបញ្ហាព្រំដែនប្រកបដោយការស្ថាបនា ។ ថៃត្រៀមខ្លួនសហការចូលរួមគ្រប់កិច្ចប្រជុំទ្វេភាគី រួមទាំងជំរុញឱ្យមានការបោះសម្អាតមីននៅព្រំដែនជាបន្តបន្ទាប់ ហើយថៃសង្ឃឹមកម្ពុជានឹងចូលរួមពិភាក្សាដោយស្មោះត្រង់ផងដែរ ។ ថៃចាត់ទុកការផ្សព្វផ្សាយព័ត៌មាននាពេលបច្ចុប្បន្ន គឺមានបំណងធ្វើឱ្យស្ថានការណ៍តានតឹងក្នុងការឆ្ពោះទៅរកសន្តិភាពរវាងកម្ពុជា-ថៃ និងក្នុងតំបន់ ។

រដ្ឋាភិបាលថៃបានសុំការសហការពីពលរដ្ឋកុំជឿព័ត៌មាន ឬចែកចាយព័ត៌មានក្លែងក្លាយ បើឃើញព័ត៌មានណាគួរឱ្យសង្ស័យ សូមត្រួតពិនិត្យជាមួយស្ថាប័នរដ្ឋាភិបាល ឬស្ថាប័នពាក់ព័ន្ធ មុននឹងចែកចាយបន្ត ពីព្រោះព័ត៌មានក្លែងក្លាយនឹងបង្កគ្រោះថ្នាក់ដល់ពលរដ្ឋ ។ ថៃប្រកាន់យកសន្តិវិធី និងសហការរក្សាសន្តិភាពក្នុងតំបន់ ស្ថាប័នរដ្ឋាភិបាលបានពិនិត្យព័ត៌មានជាបន្តបន្ទាប់ និងចាត់វិធានការតាមច្បាប់លើបុគ្គលជាច្រើនកន្លងមក ដែលមានចេតនាបង្កើតព័ត៌មានក្លែងក្លាយ និងចែកចាយបន្តជាច្រើន ។ នេះបើតាមការអះអាងរបស់លោក ជិរ៉ាយុ ៕

សុីសាកេត៖ ម្ចាស់ហាងទំនិញ 7/11 នៅខេត្តសុីសាកេត ដែលរងការទម្លាក់គ្រាប់បែ.ក កំពុងស្នើសុំជំនួយជាបន្ទាន់ពីរដ្ឋាភិបាលដើម្បីជួសជូលហាង និងបើកប្រាក់ខែឲ្យបុគ្គលិក ខណៈចាប់តាំងពីការប៉ះទង្គិចគ្នាជាមួយកម្ពុជារហូតមកទល់នឹងពេលនេះ វារយៈពេលជិត1ខែទៅហើយ ប៉ុន្តែគាត់ទទួលបានត្រឹមសន្យាខ្យល់។

យោងតាមការចុះផ្សាយរបស់សារព័ត៌មាន Khaosod នាថ្ងៃទី២២ ខែសីហា ឆ្នាំ២០២៥ នេះបានឲ្យដឹងថា៖ លោកស្រី Kamolrat Phonsalert ម្ចាស់ហាង7/11 ស្ថិតក្នុងស្រុក Kantharalak ខេត្ត Sisaket ដែលទទួលរងការខូចខាតទាំងស្រុងដោយសារគ្រាប់បែ.ក BM-21 ដែលថៃចោ.ទថាជារបស់កម្ពុជា បានចេញមកទទូចសុំជំនួយជាបន្ទាន់ដើម្បីដោះស្រាយបញ្ហាផ្សេងៗ ខណៈគាត់ត្រូវរុះរើហាងផង និងសងថ្លៃប្រាក់ខែឲ្យបុគ្គលិកប្រចាំថ្ងៃផង ប៉ុន្តែមិនទាន់ទទួលបានជំនួយអ្វីសោះ។

លោកស្រី Kamolrat បានបង្ហើបថា៖ ទោះជាហាងបិទក៏ដោយ ប៉ុន្តែគាត់នៅតែត្រូវបន្តបើកប្រាក់ឈ្នួលឲ្យបុគ្គលិក ប្រហែល 50,000 បាតក្នុងមួយថ្ងៃ (ប្រហែល 1,400$) សម្រាប់បុគ្គលិកគ្រប់ផ្នែក។ លោកស្រីបន្តថា៖ ប្រសិនបើសាងសង់ហាងឡើងវិញ គាត់នឹងត្រូវចំណាយពេលដល់ទៅ 4ខែ ហើយបន្ទុកហិរញ្ញវត្ថុនឹងកាន់តែធ្ងន់សម្រាប់គាត់។ ចំណែកការចរចាជាមួយក្រុមហ៊ុនធានារ៉ាប់រង គឺនៅតែមិនអាចរកដោះស្រាយបាន រីឯរដ្ឋាភិបាលក៏មិនទាន់ផ្តល់ការគាំទ្រច្បាស់លាស់ណាមួយនៅឡើយទេ។

លោកស្រីក៏បានបញ្ជាក់ផងដែរថា៖ របាយការណ៍របស់រដ្ឋាភិបាលដែលថានឹងផ្តល់សំណង២៥លានបាត (ប្រហែលជាង 76មុឺនដុល្លារ) គឺជារឿងមិនពិតទេ។ តួលេខនោះគ្រាន់តែជាការប៉ាន់ប្រមាណនៃការខូចខាតសរុប រួមទាំងទ្រព្យសម្បត្តិ និងប្រាក់ដែលបានបាត់បង់ក្នុងគ្រោះអគ្គិភ័យតែប៉ុណ្ណោះ។ តែតាមពិតទៅមិនទាន់មានជំនួយពីរដ្ឋាភិបាលនៅឡើយទេ។

ម្ចាស់រូបនេះបានជំរុញឱ្យរដ្ឋាភិបាលផ្តល់ចម្លើយច្បាស់លាស់សម្រាប់គាត់ និងផ្ដល់ការគាំទ្រដល់អ្នករស់នៅតាមព្រំដែន ដែលបន្តរស់នៅក្រោមស្ថានភាពតានតឹងផ្លូវចិត្ត និងការលំបាកផ្នែកហិរញ្ញវត្ថុឲ្យបានដឹតដល់ផង។ ដោយលោកស្រីបានសង្កត់ធ្ងន់ថា ប្រជាជននៅតំបន់ទាំងនោះនៅតែមានការភ័យខ្លាច សូម្បីតែសម្លេងផ្គរលាន់ ចំណែកជីវភាពវិញកាន់តែធ្ងន់ធ្ងរ។

គួរបញ្ជាក់ថា ទាក់ទងនឹងការផ្ទុះនៅទីតាំងខាងលើនេះ រដ្ឋាភិបាលថៃបានចោ.ទប្រកាន់ថា វាគឺជាស្នាដៃរបស់កម្ពុជា ដែលប្រើប្រាស់អាវុ.ធ BM-21 បំផ្លោងមកគោលដៅជនសុីវិលថៃ ធ្វើឲ្យមនុស្សយ៉ាងហោចណាស់ 7នាក់បានបាត់បង់ជីវិត ច្រើននាក់ផ្សេងទៀតរងរបួស និងខូចខាតទ្រព្យសម្បត្តិយ៉ាងតំណម។

ទោះជាយ៉ាងណា មិនមានភស្តុងតាងណាមួយបញ្ជាក់បានថាវាជាស្នាដៃរបស់កម្ពុជានោះទេ តែផ្ទុយទៅវិញមានអ្នកវិភាគជាច្រើនបានរកឃើញភស្តុតាងមួយចំនួន ដែលសង្ស័យថាវាគឺជាការបំផ្ទុះដោយខ្លួនឯងពីសំណាក់យោធាថៃទៅលើជនសុីវិលខ្លួនឯង ប៉ុន្តែទម្លាក់កំហុសមកឲ្យកម្ពុជា។ លើសពីនេះ ដើម្បីទាក់ទាញទំនុកចិត្តរបស់ពលរដ្ឋ រដ្ឋាភិបាលថៃថែមទាំងបានសន្យាថានឹងផ្ដល់សំណងទាំងស្រុង ជូនដល់អ្នករងការខូចខាតទាំងអស់ផងដែរ។ ប៉ុន្តែមកដល់ពេលនេះ ពលរដ្ឋថៃជាច្រើនបានអះអាងថាពួកគឺមិនទាន់ទទួលបានជំនួយណាមួយឡើយ ខណៈចម្លើយដែលអាជ្ញាធរផ្ដល់មកនៅតែមានភាពមិនច្បាស់លាស់៕

ថៃ៖ លោក Pravit Rojanapruk អតីតអ្នកកាសែតឆ្នើមរបស់សារព័ត៌មាន KHAOSOD បាននិយាយរិះគ.ន់រដ្ឋាភិបាល និងក្រុមជ្រុលនិយមថៃដែលញុះញង់ចង់បានសង្រ្គា.មជាមួយកម្ពុជាថា សុទ្ធតែជាមនុស្សចាស់តែគ្មានការគិត កំពុងបំផ្លាញទីផ្សារទំនិញថៃនៅកម្ពុជា មិនចេះបើកភ្នែកមើលសេដ្ឋកិច្ចប្រទេសជិតខាង គេដើរដល់ណាហើយ? បន្តិចទៀតកូនចៅជំនាន់ក្រោយថៃនឹងទៅធ្វើជាពលករចំណាកស្រុកទៅប្រទេសគេជាមិនខាន។

យោងតាមការបង្ហោះដោយផ្ទាល់នៅទំព័រហ្វេសប៊ុកនាថ្ងៃទី២២ ខែសីហា ឆ្នាំ២០២៥ លោក Pravit Rojanapruk បានចែករំលែកនូវរបាយការណ៍មួយដែលបង្ហាញពីភាពរីកចម្រើនផ្នែកសេដ្ឋកិច្ចរបស់ប្រទេសវៀតណាម និង ហ្វីលីពីន ថានឹងវ៉ាដាច់សេដ្ឋកិច្ចថៃក្នុងរយៈពេល១០ឆ្នាំខាងមុខ។

ជាមួយនឹងការចែករំលែកព័ត៌មាននេះ លោក Pravit បានសរសេសំណេរថា៖ ក្នុងរយៈពេល ១០ឆ្នាំ សេដ្ឋកិច្ចរបស់ប្រទេសវៀតណាម និងហ្វីលីពីន នឹងវ៉ាដាច់ប្រទេសថៃ វាមកពីយើងរវល់ស្អប់កម្ពុជាពេក។ តែមិនអីទេ! នៅបន្តស្អប់ខ្មែរឲ្យដល់ឆ្អឹងចុះ មួយរយៈទៀតប្រហែល៥ឆ្នាំអាចបំផ្លាញស្រុកខ្មែរបានហើយ…អូ៎! ខ្ញុំចង់និយាយថា បន្តិចទៀតបំផ្លាញទីផ្សារទំនិញថៃនៅខ្មែរបានសម្រេចហើយ។

អតីតអ្នកកាសែតជើងចាស់រូបនេះបន្តទៀតថា៖ កុំបារម្ភអី! ព្រោះប្រជាជនថៃភាគច្រើនដែលអបអរសាទរសង្គ្រាមសព្វថ្ងៃនេះ គឺសុទ្ធតែជាមនុស្សចាស់ ដែលប្រហែលជាត្រឹម១០ឆ្នាំទៀត ចាស់ជរា ឬខ្លះប្រហែលជាអាចស្លា.ប់អស់ហើយ ដូច្នេះកុំគិតច្រើនអី។ ទុកឲ្យមនុស្សជំនាន់ក្រោយដោះស្រាយបញ្ហានៅពេលខាងមុខខ្លួនឯងទៅ (បញ្ហាដែលយើងបានបង្កឡើង) ហើយឲ្យពួកគេទៅធ្វើជាពលករចំណាកស្រុកនៅប្រទេសក្រៅចុះ។

គួរជម្រាបថា ការលើកឡើងរបស់លោក Pravit Rojanapruk បានធ្វើឡើងបន្ទាប់ពីមានការព្យាករណ៍ថា បន្តិចទៀតសេដ្ឋកិច្ចរបស់បណ្ដារប្រទេសមួយចំនួននៅអាស៊ាននឹងកើនឡើងជាលំដាប់លើសប្រទេសថៃ ខណៈថៃបច្ចុប្បន្នកំពុងជួបបញ្ហាជាច្រើនទាំងផ្ទៃក្នុងនិងជាមួយប្រទេសជិតខាង ធ្វើឲ្យប្រាក់ចំណូលក្នុងវិស័យផ្សេងៗមានការធ្លាក់ចុះជាបន្តបន្ទាប់ ជាពិសេសវិស័យទេសចរណ៍ និងការនាំចេញ។

លើសពីការជួបប្រទះនឹងវិបត្តិហិរញ្ញវត្ថុ និងសេដ្ឋកិច្ចដូចនេះ បញ្ហានយោបាយក្នុងប្រទេសថៃក៏មិនមានស្ថិរភាពផងដែរ ដែលកត្តានេះបានជំរុញប្រាក់ចំណូលជាតិខាតបង់កាន់តែធ្ងន់ធ្ងរ ព្រោះរដ្ឋាភិបាលមិនទាន់អាចរកដំណោះស្រាយសមស្របសម្រាប់ទប់ទល់បាន ចំពេលដែលប្រទេសនេះនៅមិនទាន់មានមេដឹកនាំច្បាស់លាស់នៅឡើយ៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ The Reporters នៅថ្ងៃទី២២ ខែសីហា ឆ្នាំ២០២៥ ឱ្យដឹងថា លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិថៃ បានបញ្ជាក់ពីការឃុំខ្លួនកងទ័ពកម្ពុជាចំនួន១៨នាក់ដែលទាហានថៃចាប់ដោយខុសច្បាប់ គឺស្របតាមអនុសញ្ញាទីក្រុងហ្សឺណែវ ។ លោកមើលឃើញប្រទេសទាំងពីរពុំទាន់បញ្ចប់ជម្លោះ គ្រាន់តែស្ថានការណ៍ធូរស្រាលប៉ុណ្ណោះ ទើបថៃពុំទាន់ដោះលែងកងទ័ពកម្ពុជាទាំង១៨នាក់ ។

នៅថ្ងៃទី២២ ខែសីហា លោក ណាត់ថាផុង ណាកផានិច អនុរដ្ឋមន្ត្រីក្រសួងការពារជាតិបាននិយាយពីកម្ពុជាអំពាវនាវឱ្យដោះលែងកងទ័ពកម្ពុជាចំនួន១៨នាក់ ថា ថៃអនុវត្តតាមអនុសញ្ញាទីក្រុងហ្សឺណែវ គឺពុំអាចឃុំខ្លួនកងទ័ពកម្ពុជារហូតដល់បញ្ចប់ការបាញ់គ្នាទាំងស្រុងទេ ។ លោកអះអាងថា ថៃបានថែទាំកងទ័ពទាំង១៨នាក់របស់កម្ពុជាយ៉ាងល្អ ហើយគណៈកម្មការកាកបាទក្រហមអន្តរជាតិ (ICRC) ដែលបានមកពិនិត្យមើលកងទ័ពកម្ពុជាដែលថៃឃុំខ្លួន ក៏ថាថៃថែទាំកងទ័ពកម្ពុជាល្អដែរ ។

ចំណែកស្ថានការណ៍បច្ចុប្បន្ន លោកយល់ថា ស្ថានការណ៍ធូរស្រាលជាបន្តបន្ទាប់ ប៉ុន្តែប្រទេសទាំងពីរពុំទាន់បញ្ចប់ជម្លោះ ។ វាជាសញ្ញាល្អដែលស្ថានការណ៍ធូរស្រាល ពេលនេះ មជ្ឈមណ្ឌលគ្រប់គ្រងស្ថានការណ៍ព្រំដែនកម្ពុជា-ថៃ និងគណៈកម្មការកិច្ចការព្រំដែនទូទៅ (GBC) បានកំណត់ចាប់ពីពេលនេះ តើនឹងធ្វើដូចម្តេចបន្តទៀត ។

ចំណែកការស្នើឱ្យលុបចោលកិច្ចព្រមព្រៀង MOU ឆ្នាំ២០០០ និងឆ្នាំ២០០១ គឺជាបញ្ហារបស់រដ្ឋាភិបាល ដោយសារមានចំណុចលម្អិតយ៉ាងច្រើន និងផលប្រយោជន៍ក៏ច្រើន ។ រីឯផលប៉ះពាល់សម្រាប់ប្រទេសថៃដោយសារការលុបកិច្ចព្រមព្រៀងទាំង២ច្បាប់នេះក៏មានដែរ ប៉ុន្តែវាអាស្រ័យលើការជជែករបស់រដ្ឋាភិបាល និងរដ្ឋសភា បើរដ្ឋសភាអនុម័ត យើងនឹងអនុវត្តតាមក្របខណ្ឌរដ្ឋសភា ។

យោងតាមក្រសួងការពារជាតិកម្ពុជាឱ្យដឹងថា ទាហានថៃបានចាប់ខ្លួនកងកម្លាំងកម្ពុជាដោយខុសច្បាប់ក្រោយពីបទឈប់បាញ់ចូលជាធរមានភ្លាមៗកាលពីព្រឹកថ្ងៃទី២៩ ខែកក្កដា ឆ្នាំ២០២៥ ។ រហូតមកដល់ពេលនេះ គិតត្រឹមថ្ងៃទី២២ ខែសីហា ឆ្នាំ២០២៥ គឺមានរយៈពេល២៤ថ្ងៃហើយដែលកងកម្លាំងកម្ពុជាត្រូវបានទាហានថៃចាប់ខ្លួនដោយខុសច្បាប់ មិនទាន់ដោះលែង ៕

ប្រទេសថៃ ៖ តាំងពីរដ្ឋាភិបាលថៃប្រគល់អំណាចឱ្យកងទ័ពបិទព្រំដែនកម្ពុជា-ថៃកន្លងមក ធ្វើឱ្យផលប៉ះពាល់ផ្សេងៗធ្លាក់មកលើពលរដ្ឋថៃខ្លួនឯង ដូចជា ៖ បាត់បង់ប្រាក់ចំណូល គ្មានការងារ អាជីវកម្មបិទទ្វារ ទំនិញគ្មានទីផ្សារ តម្លៃបន្លែ ផ្លែឈើធ្លាក់ចុះថោក ព្រមទាំងប៉ះពាល់ដល់សណ្ឋាគារដោយសារគ្មានភ្ញៀវទេសចរ ។ បច្ចុប្បន្ន ក្រុមរថយន្តឈ្នួលនៅខេត្តសុរិន្ទ គ្មានចំណូលសម្រាប់បង់រំលោះរថយន្ត និងអង្វររដ្ឋាភិបាលថៃបញ្ចប់ជម្លោះព្រំដែនជាមួយកម្ពុជាឆាប់ៗ ពីព្រោះពលរដ្ឋកំពុងជិតដាច់ពោះស្លា.ប់ ។

នៅថ្ងៃទី២២ ខែសីហា ឆ្នាំ២០២៥ សារព័ត៌មានថៃរាយការណ៍ថា ក្រុមរថយន្តឈ្នួលថៃនៅព្រំដែនបានត្អូញត្អែរគ្មានប្រាក់បង់រំលោះរថយន្ត និងអង្វរឱ្យរដ្ឋាភិបាលជួយពន្យារពេលបង់រំលោះ ពីព្រោះពលរដ្ឋនៅព្រំដែនពុំអាចប្រកបមុខរបរអ្វីបាន ។ ក្រៅពីនេះ ក៏បានអង្វររដ្ឋាភិបាលបញ្ចប់ជម្លោះព្រំដែនជាមួយកម្ពុជាឆាប់ៗ បើមិនចង់ឱ្យពលរដ្ឋនៅព្រំដែនដាច់ពោះស្លាប់ ។

ក្រុមរថយន្តឈ្នួលជាច្រើនបានបើករថយន្តទៅចតនៅទីធ្លាមួយកន្លែងក្នុងស្រុកមឿង ខេត្តសុរិន្ទ ដើម្បីរង់ចាំដឹកកូនសិស្សចេញពីសាលារៀនក្បែរព្រំដែនកម្ពុជា-ថៃ ហើយក្រុមរថយន្តឈ្នួលបាននិយាយពីផលប៉ះពាល់ដោយសារការបិទព្រំដែន គឺបាត់បង់អតិថិជនទាំងអស់ដែលធ្លាប់ម៉ៅរថយន្តជិះកន្លងមក ។

លើសពីនេះ ក្រុមរថយន្តឈ្នួលគ្មានប្រាក់ចំណូលសម្រាប់បង់រំលោះរថយន្តទេ ហើយត្រូវមកដឹកកូនសិស្សជំនួសវិញ ប៉ុន្តែនៅតែទទួលបានចំណូលពុំគ្រប់គ្រាន់សម្រាប់ការចំណាយ ។ ពួកគេបានអង្វររដ្ឋាភិបាលកំណត់គោលនយោបាយពន្យារពេលបង់រំលោះរថយន្ត និងពន្យារពេលសងបំណុលសម្រាប់ពលរដ្ឋនៅព្រំដែន រហូតដល់ស្ថានការណ៍ត្រឡប់មកធម្មតាវិញ ពីព្រោះពេលនេះ ពលរដ្ឋកំពុងជួបការលំបាកខ្លាំងណាស់ ។

អ្នកស្រី អារិតា មុមឌី ម្ចាស់រថយន្តឈ្នួលនិយាយថា ពួកយើងរកស៊ីដឹកភ្ញៀវនៅព្រំដែនបានរងផលប៉ះពាល់យ៉ាងខ្លាំង ។ កាលពីមុន យើងមានអតិថិជន មានចំណូលរាល់ថ្ងៃ ប៉ុន្តែពេលនេះ គ្មានអតិថិជនសោះ និងត្រូវរកប្រាក់បង់រំលោះរថយន្ត ។ អ្នកស្រីចង់ឱ្យស្ថានការណ៍ត្រឡប់មកប្រក្រតីដូចមុនឆាប់ៗដើម្បីឱ្យគ្រប់គ្នាអាចប្រកបរបរទទួលបានចំណូល និងរស់នៅក្នុងជីវភាពដូចមុនម្តងទៀត ។

ចុងក្រោយ អ្នកស្រីសំណូមពរឱ្យរដ្ឋាភិបាលថៃកំណត់គោលនយោបាយពន្យារពេលបង់រំលោះរថយន្ត ម៉ូតូ លំនៅឋាន និងទ្រព្យសម្បត្តិផ្សេងៗរបស់ពលរដ្ឋនៅព្រំដែនជាបន្ទាន់ ពីព្រោះពេលនេះ ពលរដ្ឋលំបាកគ្មានដំណោះស្រាយ ។

បច្ចុប្បន្ន ថៃប្រឈមនឹងផលប៉ះពាល់សេដ្ឋកិច្ចធ្ងន់ធ្ងរដោយសារមីយ៉ាន់ម៉ាបិទព្រំដែនមិនឱ្យថៃនាំចេញទំនិញទៅមីយ៉ាន់ម៉ា ខណៈទិន្នផលកសិកម្មផលិតបានហើយគ្មានទីផ្សារក្រៅប្រទេស ។ លើសពីនេះ ថៃបាត់បង់ពលករខ្មែរធ្វើឱ្យការងារក្នុងវិស័យផ្សេងៗរាំងស្ទះ ជាពិសេស ការងារបេះផ្លែមៀន និងសំណង់ ដែលធ្វើឱ្យរដ្ឋាភិបាលថៃស្វះស្វែងរកពលករប្រទេសផ្សេង ។

ពលរដ្ឋថៃរស់នៅព្រំដែនក្នុងខេត្តទាំង៧ រងផលប៉ះពាល់ខ្លាំងជាងគេដោយសារការបិទព្រំដែនជាឯកតោភាគីរបស់កងទ័ពថៃ មិនថាអ្នកបើករថយន្តឈ្នួលដឹកភ្ញៀវ ការប្រមុខរបរតូចតាច និងការលក់អាហារតាមផ្លូវ ប៉ុន្តែរដ្ឋាភិបាលថៃពុំបានស្តាប់សំឡេងអំពាវនាវរបស់ពលរដ្ឋខ្លួនឡើយ ៕

ក្រុងកូតាបារូ៖ ដោយសង្កេតឃើញពីបញ្ហាអសន្តិសុខនៅក្នុងប្រទេសថៃកើតមានញឹកញាប់ពេក រដ្ឋាភិបាលម៉ាឡេសុីបានណែនាំប្រជាជនខ្លួនឲ្យផ្អាក ឬពន្យាពេលការធ្វើដំណើរដែលមិនចាំបាច់ទៅកាន់ប្រទេសថៃជាបណ្ដោះអាសន្នសិន បន្ទាប់ពីការវា.យប្រហារដោយគ្រាប់បែកនៅខេត្តភាគខាងត្បូងរបស់ថៃចេះតែកើតមានជាបន្តបន្ទាប់។ នេះបើតាមការចុះផ្សាយរបស់សារព័ត៌មាន Malay Mail របស់ម៉ាឡេសុី។

នៅថ្ងៃទី២២ ខែសីហា ឆ្នាំ២០២៥ ប្រធានគណៈកម្មាធិការរដ្ឋទទួលបន្ទុកទេសចរណ៍ វប្បធម៌ សិល្បៈ និងបេតិកភណ្ឌ លោក Datuk Kamaruddin Md Nor មានប្រសាសន៍ថា សុវត្ថិភាពត្រូវតែជាអាទិភាពចម្បង សម្រាប់អ្នកដែលនៅតែត្រូវធ្វើដំណើរទៅកាន់ប្រទេសថៃ។

លោកថា៖ ឧប្បត្តិហេតុបំផ្ទុះគ្រាប់បែកនៅក្នុងប្រទេសថៃមិនមែនជារឿងថ្មីទេ។ ដូច្នេះខណៈពេលដែលស្ថានភាពនៅតែអាចប្រែប្រួល វាជាការល្អបំផុតសម្រាប់ប្រជាជនយើងក្នុងការពន្យារពេលផែនការធ្វើដំណើរទៅទីនោះ ជាពិសេសជាមួយនឹងរដូវកាលវិស្សមកាលខាងមុខនេះ។

លោក Datuk បន្តទៀតថា “វិធានការបង្ការនេះគឺមានសារៈសំខាន់ដើម្បីជៀសវាងឧប្បត្តិហេតុដែលអាចគំរាមកំហែងដល់សុវត្ថិភាពផ្ទាល់ខ្លួនរបស់ពលរដ្ឋ។ នៅពេលដែលបញ្ហាបែបនោះបានកើតឡើង វាគួរតែត្រូវបានគេយកជាឧទាហរណ៍ក្នុងការព្រមានមិនឱ្យទៅទីនោះ” ។

គួររំលឹកថា កាលពីថ្ងៃពុធកន្លងទៅ ប្រព័ន្ធផ្សព្វផ្សាយបានរាយការណ៍ថា កងកម្លាំងស្ម័គ្រចិត្តការពារជាតិថៃយ៉ាងហោចណាស់៤នាក់បានរងរបួស បន្ទាប់ពីរថយន្តបំផ្ទុះគ្រាប់បែ.កមួយ បានបើកមកបំផ្ទុះនៅជិតប៉ុស្តិ៍ត្រួតពិនិត្យមួយក្នុងឃុំកំពង់ខុកម៉ាហ្វឿង ស្រុកសាឡាម៉ៃ ក្រុងតាកបៃ ខេត្តណារ៉ាធីវ៉ាត់ ដែលជាឧបទ្ទវហេតុមួយបង្កឡើងដោយក្រុមបះបោរមកពីភាគខាងត្បូងរបស់ថៃ។

ក្រៅពីខេត្តភាគខាងត្បូងនេះ សូម្បីតែទីក្រុងបាងកកដែលជាទីប្រជុំជនដ៏ល្បីល្បាញ ក៏ប្រជាជនម៉ាឡេសុីជាច្រើនបានសម្ដែងក្ដីព្រួយបារម្ភ និងភាពខ្លាចរអារបស់ពួកគេ ក្នុងការទៅកម្សាន្តនៅទីនោះផងដែរ។ កត្តាព្រួយបារម្ភនេះ ពុំមែនកើតឡើងដោយសារតែសង្រ្គាម ឬហិង្សាប្រដាប់អាវុ.ធនៅតាមព្រំដែនប៉ុណ្ណោះទេ ប៉ុន្តែវាបណ្ដាលមកពីករណីវា.យធ្វើបាបភ្ញៀវទេសចរបរទេសពីសំណាក់ជនជាតិថៃបានកើតមានញឹកញាប់ពេក ជាហេតុជំរុញឲ្យពលរដ្ឋម៉ាឡេសុីជាច្រើនដែលមានគម្រោងមកលេងថៃ បានលុបចោ.លការធ្វើដំណើររបស់ពួកគេ ធ្វើឲ្យចំណូលដែលបានមកពីវិស័យទេសចរណ៍ថៃថយចុះគួរឲ្យកត់សម្គាល់៕

ប្រទេសថៃ ៖ តាមការផ្សព្វផ្សាយរបស់សារព័ត៌មានថៃ នៅថ្ងៃទី២២ ខែសីហា ឆ្នាំ២០២៥ ឱ្យដឹងថា នាយកដ្ឋានពាណិជ្ជកម្មអន្តរជាតិនៃក្រសួងពាណិជ្ជកម្មថៃគ្រោងអញ្ជើញឯកអគ្គរដ្ឋទូតមីយ៉ាន់ម៉ានៅប្រទេសថៃមកជជែកពីការបន្ធូរបន្ថយវិធានការបិទព្រំដែន ឬសម្រួលឱ្យរថយន្តដឹកទំនិញថៃឆ្លងដែន ។ វិធានការបិទព្រំដែនមេស៊ត-មៀវឌី នៅភូមិវាំងតាខៀនតាយ ឃុំថាសាយលួត ស្រុកមេស៊ត ខេត្តតាក ធ្វើឱ្យប៉ះពាល់ដល់ការនាំចេញទំនិញថៃទៅមីយ៉ាន់ម៉ា រថយន្តដឹកទំនិញថៃប្រមាណ៤០០គ្រឿងនៅកកស្ទះពុំអាចឆ្លងដែន ។

អគ្គនាយកនៃនាយកដ្ឋានពាណិជ្ជកម្មអន្តរជាតិក្រសួងពាណិជ្ជកម្ម អ្នកស្រី អារ៉ាដា ហ្វឿងថង បាននិយាយពីមីយ៉ាន់ម៉ាបិទព្រំដែនមេស៊ត-មៀវឌី នៅបរិវេណស្ពានមិត្តភាពមីយ៉ាន់ម៉ា-ថៃ ទី២ កាលពីថ្ងៃទី១៨ ខែសីហា ដើម្បីទប់ស្កាត់ការលួចនាំចូលទំនិញ ឬទំនិញគ្មានលិខិតអនុញ្ញាតនាំចូល (Import License) ថា នាយកដ្ឋានពាណិជ្ជកម្មអន្តរជាតិ និងនាយកដ្ឋានលើកកម្ពស់ពាណិជ្ជកម្មអន្តរជាតិ ធ្លាប់បានអញ្ជើញមន្ត្រីទូតមីយ៉ាន់ម៉ានៅថៃមកសួររឿងបិទព្រំដែនម្តងហើយកាលពីថ្ងៃទី១៩ ខែសីហា ។ ការសួរនាំមន្ត្រីទូតមីយ៉ាន់ម៉ា គឺធ្វើតាមបញ្ជារបស់លោក ចតុផល ប៊ុរុតផាត រដ្ឋមន្ត្រីក្រសួងពាណិជ្ជកម្ម ។

មន្ត្រីទូតមីយ៉ាន់ម៉ានិយាយថា តាំងពីដើមខែសីហា ឆ្នាំ២០២៥ រដ្ឋាភិបាលមីយ៉ាន់ម៉ាបានរឹតបន្តឹងការត្រួតពិនិត្យទំនិញនាំចូលខុសច្បាប់ ឬនាំចូលគ្មានលិខិតអនុញ្ញាត ពីព្រោះធ្វើឱ្យរដ្ឋាភិបាលមីយ៉ាន់ម៉ាបាត់បង់ចំណូល និងមានឱនភាពពាណិជ្ជកម្មកាន់តែខ្លាំង ។ ហេតុនេះ មីយ៉ាន់ម៉ាត្រូវបង្កើនការរឹតបន្តឹងព្រំដែនដើម្បីដោះស្រាយបញ្ហានេះ និងធ្វើឱ្យរថយន្តដឹកទំនិញថៃជាច្រើនគ្រឿង រួមទាំងរថយន្តដឹកទំនិញមកពីប្រទេសផ្សេងៗកកស្ទះនៅព្រំដែន ។

បើតាមសេចក្តីរាយការណ៍ចុងក្រោយពីការិយាល័យលើកកម្ពស់ពាណិជ្ជកម្មអន្តរជាតិនៅទីក្រុងយ៉ាំងហ្គន ប្រទេសមីយ៉ាន់ម៉ា គឺមានរថយន្តដឹកទំនិញថៃកកស្ទះនៅព្រំដែនមីយ៉ាន់ម៉ា ប្រមាណ៤០០គ្រឿង ហើយរថយន្តទាំងនេះរង់ចាំឆ្លងដែនចូលមីយ៉ាន់ម៉ា តាមខេត្តតាក ។ បន្ទាប់មក មន្ត្រីមីយ៉ាន់ម៉ាក៏ប្រកាសឱ្យរថយន្តដឹកទំនិញប្តូរគោលដៅទៅកំពង់ផែរ៉ាក់ណង ដើម្បីចូលទៅកោះសងរបស់មីយ៉ាន់ម៉ាវិញ ។

អ្នកស្រី អារ៉ាដា អគ្គនាយកនៃនាយកដ្ឋានពាណិជ្ជកម្មអន្តរជាតិក្រសួងពាណិជ្ជកម្មបន្តថា នាយកដ្ឋានពាណិជ្ជកម្មនឹងប្រញាប់រាយការណ៍ព័ត៌មានដែលទទួលបានពីការពិភាក្សាជាមួយមន្ត្រីទូតមីយ៉ាន់ម៉ាកន្លងមកប្រាប់រដ្ឋមន្ត្រីក្រសួងពាណិជ្ជកម្ម ដើម្បីអញ្ជើញឯកអគ្គរដ្ឋទូតមីយ៉ាន់ម៉ានៅថៃមកពិភាក្សាគ្នាបន្តទៀត និងចរចាឱ្យមីយ៉ាន់ម៉ាបន្ធូរបន្ថយវិធានការបិទព្រំដែន ។

តម្លៃពាណិជ្ជកម្មព្រំដែនមីយ៉ាន់ម៉ា-ថៃ រយៈពេល៦ខែ (ចាប់ពីមករា ដល់មិថុនា) ឆ្នាំ២០២៥ គឺស្មើ១០៥,១៤៩លានបាត ធ្លាក់ចុះ២៤.៩១% បើធៀបនឹងរយៈពេលដូចគ្នានៅឆ្នាំ២០២៤ ។ ថៃបាននាំចេញទំនិញទៅមីយ៉ាន់ម៉ា ស្មើ៦៣,៥៧២លានបាត ធ្លាក់ចុះ១៦.៣៦% និងនាំចូលទំនិញស្មើ៤១,៥៧៨លានបាត ធ្លាក់ចុះ៣៥.០៧% ៕