ប្រទេសថៃ ៖ សភាពាណិជ្ជកម្មថៃបានគាំទ្ររដ្ឋាភិបាល និងកងទ័ព ដែលចរចាបើកព្រំដែនកម្ពុជា-ថៃមួយចំនួនក្នុងកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) នៅខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២៥ ដោយថៃគ្រោងបើកព្រំដែននៅខេត្តចាន់បុរី និងខេត្តត្រាតមុនគេដោយសារមានហានិភ័យទាប ។ សភាពាណិជ្ជកម្មថៃរំពឹងថា ការបើកព្រំដែននឹងជួយឱ្យអាជីវកម្មនានាដំណើរការឡើងវិញ ហើយការរស់នៅរបស់ពលរដ្ឋនឹងវិលមករកភាពប្រក្រតី ។

លោក ផុតអារ៉ាម វឌ្ឍនាណុន ប្រធានសភាពាណិជ្ជកម្មថៃបានគាំទ្រលទ្ធផលកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) កម្ពុជា-ថៃ ដែលរៀបចំនៅខេត្តកោះកុង ហើយលោកចាត់ទុកកិច្ចប្រជុំនេះជាការបោះជំហ៊ានយ៉ាងសំខាន់តាមរយៈយន្តការទ្វេភាគីឈានទៅរកសន្តិភាព និងកិច្ចសហការរវាងប្រទេសទាំងពីរ ។ កិច្ចប្រជុំបានឯកភាពលើការគ្រប់គ្រងតំបន់ព្រំដែន និងពិចារណាបើកព្រំដែនមួយចំនួនដើម្បីកាត់បន្ថយផលប៉ះពាល់អាជីវកម្ម ពាណិជ្ជកម្មព្រំដែន និងការដឹកទំនិញ ។

ប្រទេសថៃបានបែងចែកព្រំដែនកម្ពុជា-ថៃជា៣តំបន់ អាស្រ័យលើស្ថានការណ៍តានតឹងខ្លាំង ឬតិច រួមមាន ៖

-តំបន់ទី១ ៖ ស្ថានការណ៍តានតឹងខ្លាំងស្ថិតក្រោមការគ្រប់គ្រងរបស់កងទ័ពភូមិភាគ២ ដូចជា ៖ ខេត្តឧប៊ុនរ៉ាជថានី ស៊ីសាកេត សុរិន្ទ និងបុរីរាំ
-តំបន់ទី២ ៖ ស្ថិតក្រោមការគ្រប់គ្រងរបស់កងទ័ពភូមិភាគ២ គឺខេត្តស្រះកែវ និង
-តំបន់ទី៣ ៖ ស្ថានការណ៍តានតឹងតិចជាងតំបន់ផ្សេងៗ ដែលតំបន់នេះមានខេត្តចាន់បុរី និងខេត្តត្រាត ។

ក្រោយមានការសំណូមពរពីអ្នកប្រកបអាជីវកម្មឱ្យបើកព្រំដែនដើម្បីសម្រួលការដឹកទំនិញ ទើបថៃគ្រោងបើកព្រំដែននៅតំបន់ទី៣មុនគេ គឺព្រំដែនខេត្តចាន់បុរី និងខេត្តត្រាត ដោយសារតំបន់នេះមានស្ថានការណ៍តានតឹងតិចជាងតំបន់ផ្សេងៗ ។ ជំហ៊ានដំបូង ត្រូវទំនាក់ទំនងជាមួយនាយកដ្ឋានគយ ក្រសួងពាណិជ្ជកម្ម និងឧស្សាហកម្ម ដើម្បីប្រមូលទិន្នន័យសម្រាប់ការចរចាបើកព្រំដែន ។

លោក ផុតអារ៉ាម វឌ្ឍនាណុន ប្រធានសភាពាណិជ្ជកម្មបានអរគុណរដ្ឋាភិបាល, ក្រសួងការពារជាតិ, លោក ណាត់ថាផុង ណាកផានិច រដ្ឋមន្ត្រីក្រសួងការពារជាតិ, កងទ័ព និងអរគុណគ្រប់ស្ថាប័ន ដែលបានរួមគ្នាជំរុញ និងចរចាក្នុងកិច្ចប្រជុំ GBC ឱ្យសម្រេចបាននូវលទ្ធផលជាវិជ្ជមាន ។ ការបើកព្រំដែនមួយចំនួននឹងធ្វើឱ្យពលរដ្ឋរស់នៅដោយសន្តិភាព ក៏ដូចជាជួយឱ្យអាជីវកម្មរងផលប៉ះពាល់ដោយសារការបិទព្រំដែន អាចដំណើរការឡើងវិញ ។

ទោះជាសភាពាណិជ្ជកម្មថៃគាំទ្រការបើកព្រំដែនកម្ពុជា-ថៃនៅតំបន់មានហានិភ័យទាបក្តី ប៉ុន្តែពលរដ្ឋថៃភាគច្រើនពុំគាំទ្រការបើកព្រំដែនឡើងវិញទេ ជាពិសេស ពលរដ្ឋនៅខេត្តសុរិន្ទ ស្នើឱ្យរដ្ឋាភិបាលបិទព្រំដែនបន្តទៀតដោយសារពុំទុកចិត្តស្ថានការណ៍ ។ ពលរដ្ឋខេត្តសុរិន្ទចង់ឱ្យដោះស្រាយបញ្ហានៅប្រាសាទតាក្របី និងតំបន់ផ្សេងៗឱ្យរួចរាល់ ទើបអាចបើកព្រំដែន បើថៃបើកព្រំដែនបញ្ជូនផលិតផល និងចំណីអាហារទៅកម្ពុជាពេលនេះ នឹងធ្វើឱ្យពលរដ្ឋខ្មែរបរិភោគអាហារថៃមានកម្លាំងកំហែងធ្វើសង្គ្រាមជាមួយថៃទៀត ។

រហូតមកដល់ពេលនេះ ពលរដ្ឋថៃភាគច្រើននៅតែគិតថា កម្ពុជាពឹងផ្អែកយ៉ាងខ្លាំងលើការនាំចូលផលិតផលពីថៃ និងពុំអាចខ្វះផលិតផលថៃបាន ទើបពួកគេសំណូមពរឱ្យរដ្ឋាភិបាលបិទព្រំដែនបន្តដើម្បីបញ្ឈប់ការនាំចេញផលិតផលមកកម្ពុជា ។ នេះជាការគិតខុស ពីព្រោះពលរដ្ឋខ្មែរឈប់ទិញផលិតផលថៃយូរហើយ និងងាកមកគាំទ្រផលិតផលខ្មែរខ្លាំងជាងមុនដើម្បីជំរុញសេដ្ឋកិច្ចជាតិ និងឱ្យពលរដ្ឋខ្មែរមានការងារធ្វើក្នុងប្រទេសរបស់ខ្លួន ៕

ខេត្តសុងក្លា៖ ប្រញាប់ទៅបង្រ្កាបក្រុមបះបោរផង ស្គាល់ផ្លូវមិនច្បាស់ផង ឡានយោធាថៃមួយគ្រឿងដែលកំពុងបើកបរយ៉ាងលឿនបានជួបប្រទះនឹងបញ្ហាដាច់ហ្វ្រាំងរអិលធ្លាក់ចូលជ្រោះទាំងកម្រោលធ្វើឲ្យទាហាន8នាក់រងរបួសធ្ងន់ ខណៈពេលដែលកំពុងធ្វើដំណើរទៅអន្តរាគមន៍ការប៉ះទង្គិចប្រដាប់អាវុ.ធរវាងកងកម្លាំងសន្តិសុខជាតិ និងក្រុមផ្តាច់ខ្លួនថៃ-ម៉ាឡេមូស្លីម នៅស្រុក Saba Yoi ខេត្ត Songkhla។ នេះបើតាមការចុះផ្សាយដោយសារព័ត៌មាន Khaosod ។

នៅថ្ងៃទី 11 ខែកញ្ញា ឆ្នាំ 2025 មានទាហានថៃចំនួន 8នាក់បានរងរបួសខ្លះបា.ក់ឆ្អឹង ខ្លះសន្លប់ស្ដូកស្ដឹង នៅក្នុងឧបទ្ទវហេតុរថពាសដែក ឬឡានយោធាមួយគ្រឿងបានរមាលក្រឡាប់ធ្លាក់ផ្លូវនៅក្នុងភូមិលេខ 16 ឃុំណាថាវី ស្រុកណាថាវី ខេត្តសុងក្លា។ ក្នុងនោះមាន6នាក់ដែលរបួសធ្ងន់ធ្ងរខ្លាំងត្រូវបានគេបញ្ជូនទៅមន្ទីរពេទ្យ Na Thawi រួចហើយ។

ភ្លាមៗមិនមានមន្ត្រីជំនាញ ឬអាជ្ញាធរក្នុងតំបន់បានដឹងនិងចុះទៅសម្របសម្រួលនៅក្នុងហេតុការណ៍នេះឡើយ ដោយសារតែតំបន់ខាងលើមិនមានសេវាទូរស័ព្ទដើម្បីទំនាក់ទំនង។ រហូតក្រោយមកទើបមានប្រជាពលរដ្ឋបានប្រទះឃើញ នឹងរាយការណ៍ពីរឿងនេះទើបក្រុមសង្រ្គោះបានចុះមកបើកប្រតិបត្តិការ។

ចំពោះការស៊ើបអង្កេតបឋមបានបង្ហាញថា ឧបទ្ទវហេតុនេះគឺបណ្តាលមកពីការមិនស្គាល់ពីទីតាំងភូមិសាស្រ្តនៃផ្លូវច្បាស់លាស់ រួមផ្សុំនឹងការប្រញាប់ប្រញាល់ទៅបង្រ្កាបក្រុមបះបោរនៅ ដែលកំពុងបង្កភាពចលាចលនៅក្នុងតំបន់។

គួរជម្រាបថា នៅថ្ងៃទី11 ខែកញ្ញានេះ មានសេចក្ដីរាយការណ៍បន្ទាន់ថាក្រុមបះបោរនៅភាគខាងត្បូង បានបើកប្រតិបត្តិការវា.យប្រហារលើមូលដ្ឋានប៉ុស្តិ៍ត្រួតពិនិត្យរបស់ប៉ូលីសនៅស្រុក Baan Huai Tao ក្នុងខេត្ត Songkhla ទាំងព្រឹកព្រលឹម។ ស្ថានភាពដ៏តានតឹងនិងមិនអាចស្មានដឹងមុននេះ បានជំរុញឲ្យកងកម្លាំងសន្តិសុខជាតិក្នុងតំបន់ ប្រកាសប្រមូលផ្ដុំកម្លាំងភ្លាមៗ ដើម្បីយកទៅទប់ទល់ជាមួយក្រុមឧទ្ទាមផ្ដាច់ខ្លួន។

ប្រទេសថៃ ៖ រដ្ឋមន្ត្រីក្រសួងការពារជាតិថៃ លោក ណាត់ថាផុង ណាកផានិច បានរងការខឹងសម្បារយ៉ាងខ្លាំងពីពលរដ្ឋដែលគ្រោងបើកព្រំដែននៅខេត្តចាន់បុរី-ខេត្តត្រាតមុនគេ និងបើកព្រំដែនផ្សេងៗសម្រាប់ដឹកទំនិញក្រោយពីជប៉ុនសំណូមពរ ។ គម្រោងបើកព្រំដែននេះ គឺបន្ទាប់ពីលោកចូលរួមប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) នៅខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២៥ ។ ពលរដ្ឋថៃប្រឆាំងដាច់ខាតក្នុងបណ្តាញសង្គមមិនគាំទ្រការបើកព្រំដែន មិនថាសម្រាប់ដឹកទំនិញ និងឱ្យមនុស្សឆ្លងកាត់ ពួកគេសួរថា បើចង់បើកព្រំដែន ហេតុអ្វីមិនសួរមតិពលរដ្ឋ និងកងទ័ព ។

កាលពីថ្ងៃទី១០ ខែកញ្ញា លោក ណាត់ថាផុង ណាកផានិច រដ្ឋមន្ត្រីក្រសួងការពារជាតិថៃបានធ្វើដំណើរមកខេត្តកោះកុង ដើម្បីចូលរួមប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) ជាមួយឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា រួមទាំងមន្ត្រីពាក់ព័ន្ធជាច្រើនរូប ។ ពេលត្រឡប់ទៅថៃវិញ លោក ណាត់ថាផុង ក៏បានប្រកាសពីលទ្ធផលកិច្ចប្រជុំសម្រេចបានច្រើនចំណុច ក្នុងនោះកម្ពុជា និងថៃពិចារណាបើកច្រកព្រំដែនសម្រាប់ដឹកទំនិញចាំបាច់ ដោយសារជប៉ុនសំណូមពរ ។

លោក ណាត់ថាផុង បានប្រកាសពីលទ្ធផលកិច្ចប្រជុំ GBC កាលពីថ្ងៃទី១០ ខែកញ្ញា ថា ប្រទេសទាំងពីរបានព្រមព្រៀងគ្នាកាត់បន្ថយភាពតានតឹង តាមរយៈការកែសម្រួលនូវយុទ្ធោបករណ៍ និងសម្ភារៈយោធា, ការបោសសម្អាតមីន, ការបង្ក្រាបឧក្រិដ្ឋកម្មអនឡាញ, ដោះស្រាយបញ្ហានៅព្រំដែនភូមិណងចាន់ (ទល់មុខភូមិជោគជ័យ) និងបើកច្រកព្រំដែនកម្ពុជា-ថៃមួយចំនួនសម្រាប់ដឹកទំនិញដោយសារការស្នើរបស់ជប៉ុន ដោយជំហ៊ានដំបូង ថៃគ្រោងបើកព្រំដែននៅខេត្តចាន់បុរី-ខេត្តត្រាត ។

ប៉ុន្តែពលរដ្ឋថៃបានប្រឆាំងដាច់ខាត និងរិះគន់រដ្ឋមន្ត្រីក្រសួងការពារជាតិក្នុងបណ្តាញសង្គមថា ពុំគួរបើកព្រំដែនពេលនេះទេ ទោះជាបើកព្រំដែនសម្រាប់ដឹកជញ្ជូនទំនិញក្តី ហើយពួកគេសួរទៅកាន់រដ្ឋាភិបាលមុនពេលបើកព្រំដែនកម្ពុជា-ថៃ តើបានសួរមតិពលរដ្ឋ និងកងទ័ពហើយឬនៅ ។ ពលរដ្ឋថៃរិះគន់ថា នាយករដ្ឋមន្ត្រីថ្មី លោក អនុថីន ឆាន់វីរៈគូន កាន់តំណែងភ្លាម ចង់បើកព្រំដែនភ្លាម ដូច្នេះ ពលរដ្ឋនឹងបណ្តេញលោកចុះចេញពីតំណែង គឺលោកអាចកាន់តំណែងត្រឹមតែ២ខែប៉ុណ្ណោះ មិនដល់៤ខែទេ ។

ជាការឆ្លើយតបនឹងការរិះគន់ពីសំណាក់ពលរដ្ឋ លោក ណាត់ថាផុង រដ្ឋមន្ត្រីក្រសួងការពារជាតិបញ្ជាក់ថា ថៃគ្រោងបើកព្រំដែនខេត្តចាន់បុរី-ខេត្តត្រាតសម្រាប់តែដឹកទំនិញប៉ុណ្ណោះ ពុំមែនបើកឱ្យមនុស្សឆ្លងដែនទេ ហើយក៏ពុំអនុញ្ញាតឱ្យរថយន្តដឹកទំនិញឆ្លងដែនសេរីដែរ គឺកំណត់ចំនួនរថយន្ត ។ កម្ពុជា និងថៃពុំបានលើកឡើងក្នុងកិច្ចប្រជុំ GBC ពីការបើកព្រំដែន ប៉ុន្តែនេះជាការសំណូមពររបស់ប្រទេសទី៣ (ជប៉ុន) ឱ្យកម្ពុជា-ថៃបើកព្រំដែនមួយចំនួន ដូច្នេះ សូមពលរដ្ឋយល់ពីរដ្ឋាភិបាលមុននឹងប្រឆាំងការបើកព្រំដែន ។

ប្រទេសជប៉ុនថា បើកម្ពុជា-ថៃមានជម្លោះជាមួយគ្នា តើវាពាក់ព័ន្ធអ្វីនឹងជប៉ុនដែរ គឺជប៉ុនរងផលប៉ះពាល់ពុំអាចបញ្ជូនទំនិញតាមរយៈព្រំដែនកម្ពុជា-ថៃ ទើបប្រទេសទាំងពីរយល់ពីផលប៉ះពាល់របស់ជប៉ុន និងស្វែងរកវិធីដោះស្រាយដោយការបើកព្រំដែនមួយចំនួនសម្រាប់ដឹកទំនិញ ។ ក្រៅពីនេះ លោក ណាត់ថាផុង បានលើកឡើងពីការផ្សព្វផ្សាយព័ត៌មានក្លែងក្លាយប៉ះពាល់ទំនាក់ទំនងរវាងប្រទេសទាំងពីរ និងធ្វើឱ្យពលរដ្ឋខ្មែរ-ថៃស្អប់ខ្ពើមគ្នា លោកសំណូមពរឱ្យកាត់បន្ថយការចែកចាយព័ត៌មានក្លែងក្លាយ ពីព្រោះជាមូលហេតុដែលពលរដ្ឋខ្មែរ-ថៃស្អប់ខ្ពើមគ្នា ៕

ប្រទេសរុស្ស៊ី ៖ ក្រោយពីរដ្ឋាភិបាលប៉ូឡូញប្រកាសប្រទះឃើញដ្រូនរបស់រុស្ស៊ីចំនួន១៩គ្រឿង ហោះចូលដែនអាកាសរបស់ខ្លួន និងបញ្ជាឱ្យបា.ញ់ទម្លាក់ ក្រសួងការពារជាតិរុស្ស៊ីបានចេញសេចក្តីថ្លែងការណ៍នៅថ្ងៃទី១០ ខែកញ្ញា ឆ្នាំ២០២៥ ថា គ្មានផែនការវាយប្រ.ហារដោយដ្រូនលើគោលដៅនានាក្នុងប្រទេសប៉ូឡូញដូចការចោទប្រកាន់របស់រដ្ឋាភិបាលប៉ូឡូញទេ ។ រីឯអង្គការណាតូ និងសហភាពអឺរ៉ុបបានថ្កោលទោសវត្តមានដ្រូនរុស្ស៊ីលើដែនអាកាសប៉ូឡូញ ព្រមទាំងប្រជុំបន្ទាន់ដើម្បីចាត់វិធានការ និងដាក់ទណ្ឌកម្មរុស្ស៊ី ។

តាមការលើកឡើងរបស់មន្ត្រីក្រសួងការពារជាតិរុស្ស៊ីកាលពីថ្ងៃទី៩ ខែកញ្ញា កន្លងមក គឺពួកគេបានវាយប្រហារយ៉ាងខ្លាំងទៅលើទីតាំងកងទ័ព និងតំបន់ឧស្សាហកម្មនៅភាគខាងលិចប្រទេសអ៊ុយក្រែន ដោយប្រើប្រាស់ទាំងមីស៊ីល និងដ្រូន ប៉ុន្តែគ្មានផែនការវាយប្រហារគោលដៅនានានៅប៉ូឡូញទេ ។ ដ្រូនដែលរដ្ឋាភិបាលប៉ូឡូញចោទប្រកាន់ជារបស់រុស្ស៊ីនោះ គឺហោះខ្ពស់បំផុតមិនលើស៧០០គីឡូម៉ែត្រ ប៉ុន្តែរុស្ស៊ីត្រៀមខ្លួនពិភាក្សាជាមួយក្រសួងការពារជាតិប៉ូឡូញពាក់ព័ន្ធនឹងរឿងនេះ ។

ការច្រានចោលរបស់រុស្ស៊ីកើតឡើងក្រោយពីនាយករដ្ឋមន្ត្រីប៉ូឡូញ លោក Donald Tusk និយាយថា កងទ័ពប៉ូឡូញបានឃើញដ្រូនយ៉ាងហោចណាស់១៩គ្រឿង ហោះចូលដែនអាកាសប៉ូឡូញកាលពីយប់ថ្ងៃទី៩ ខែកញ្ញា ក្នុងនោះដ្រូនចំនួន៤គ្រឿងត្រូវបានយន្តហោះរបស់ប៉ូឡូញ និងអង្គការណាតូបាញ់ទម្លាក់ ។ លោកសន្និដ្ឋានថា ដ្រូនទាំង១៩គ្រឿងបានហោះចូលដែនអាកាសប៉ូឡូសពីខាងប្រទេសបេឡារុសដែលមានព្រំដែនជាប់រុស្ស៊ី ។

នេះជាលើកទី១ ដែលដ្រូនរុស្ស៊ីត្រូវបានបាញ់ទម្លាក់នៅទឹកដីប្រទេសសមាជិកអង្គការសន្ធិសញ្ញាអាត្លង់ទិកខាងជើង (ណាតូ) ហើយលោក Tusk នាយករដ្ឋមន្ត្រីប៉ូឡូញថា ប៉ូឡូញជិតមានសង្គ្រាមហើយ តាំងពីសង្គ្រាមលោកលើកទី២ ។ ទោះជាគ្មានហេតុផលបញ្ជាក់ថា ប៉ូឡូញឈានទៅរកសង្គ្រាម ប៉ុន្តែដែនអាកាសរបស់យើងត្រូវបានឈ្លានពាន ហើយវាមានគ្រោះថ្នាក់ជាងពេលមុន ។

ចំណែកមេដឹកនាំបណ្តាប្រទេសសមាជិកណាតូ និងសហភាពអឺរ៉ុបពុំអាចទទួលយកទង្វើរបស់រុស្ស៊ីទេ ដែលបង្ហោះដ្រូនរំលោភដែនអាកាសប៉ូឡូញ ។ ក្រោយពីប្រទះឃើញដ្រូនរុស្ស៊ី រដ្ឋាភិបាលប៉ូឡូញក៏បញ្ជាឱ្យបាញ់ទម្លាក់មួយចំនួនបណ្តាលឱ្យដ្រូនធ្លាក់លើលំនៅឋានពលរដ្ឋប៉ូឡូញខូចខាត សំណាងល្អ គ្មានអ្នករងរបួស ។ អង្គការណាតូ និងសហភាពអឺរ៉ុបបានប្រជុំជាបន្ទាន់ដើម្បីរកវិធានការទប់ស្កាត់ការបង្ហោះដ្រូន និងដាក់ទណ្ឌកម្មរុស្ស៊ី ។

គួរបញ្ជាក់ថា ប្រទេសប៉ូឡូញគ្មានព្រំដែនជាប់រុស្ស៊ីទេ ប៉ុន្តែប៉ូឡូញមានព្រំដែនជាប់អ៊ុយក្រែន និងបេឡារុស ខណៈបេឡារុសស្ថិតនៅចំណុចកណ្តាលរវាងរុស្ស៊ី និងប៉ូឡូញ ។ ដ្រូនរុស្ស៊ីបានបាញ់ហោះផុតដែនអាកាសបេឡារុស ឆ្ងាយរហូតដល់ប៉ូឡូញធ្វើឱ្យអាកាសយានដ្ឋានសំខាន់ៗរបស់ប៉ូឡូញបិទដំណើរការបណ្តោះអាសន្ន ហើយអាជ្ញាធរប៉ូឡូញបង្កើនការយាមល្បាតនៅព្រំដែនជាប់បេឡារុស ៕

ភ្នំពេញ៖ ដូចដែលបានរៀបចំជាច្រើនឆ្នាំកន្លងមក ដើម្បីជួយសម្រាលបន្ទុកចំណាយរបស់បងប្អូនប្រជាពលរដ្ឋ ក្នុងការធ្វើដំណើរទៅលេងស្រុកកំណើតក្នុងឱកាសបុណ្យភ្ជុំបិណ្ឌប្រពៃណីជាតិខ្មែរ ខ្ញុំបានផ្តល់គោលការណ៍ជូនរដ្ឋបាលរាជធានីភ្នំពេញរៀបចំនូវរថយន្តក្រុង សម្រាប់ដឹកជញ្ជូនបងប្អូនប្រជាពលរដ្ឋធ្វើដំណើរទៅលេងស្រុកកំណើតដោយឥតគិតថ្លៃ។ នេះបើតាមប្រសាសន៍របស់សម្ដេចបវរធិបតីហ៊ុន ម៉ាណែត។

តាមរយៈការបង្ហោះនៅលើទំព័រហ្វេសប៊ុករបស់សម្ដេច នាព្រឹកថ្ងៃទី11 ខែកញ្ញា ឆ្នាំ2025 បានឲ្យដឹងថា៖ ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ បានបញ្ជាក់ថា រដ្ឋបាលរាជធានីភ្នំពេញ បានត្រៀមរៀបចំរថយន្តក្រុង ចំនួន ៥៩៧គ្រឿង សម្រាប់បម្រើសេវាដឹកជញ្ជូនប្រជាពលរដ្ឋ ក្នុងរាជធានីភ្នំពេញប្រចាំថ្ងៃ និងសម្រាប់ដឹកជញ្ជូនប្រជាពលរដ្ឋទៅលេងស្រុកកំណើតក្នុងឱកាសបុណ្យភ្ជុំបិណ្ឌ ប្រពៃណីជាតិខ្មែរ ឆ្នាំ២០២៥។

ការផ្ដល់ជូនសេវាដឹកជញ្ជូនដោយឥតគិតថ្លៃនេះនឹងមានរយ់ពេលចំនួន ៦ថ្ងៃ ដោយគិតចាប់ពីថ្ងៃទី២០ ដល់ថ្ងៃទី២៥ ខែកញ្ញាឆ្នាំ២០២៥ ដោយក្នុងនោះមានខ្សែរត់នៅក្នុងក្រុងភ្នំពេញ និងទៅតាមបណ្ដារខេត្តដូចខាងក្រោម៖

១. រថយន្តក្រុងចំនួន ១០០គ្រឿង នឹងដាក់ឲ្យប្រើប្រាស់សម្រាប់បម្រើសេវាដឹកជញ្ជូនប្រជាពលរដ្ឋប្រចាំថ្ងៃក្នុង រាជធានីភ្នំពេញ និងសេវារថយន្តក្រុងសាធារណៈអាកាសយានដ្ឋានអន្តរជាតិតេជោ (AIRPORT EXPRESS BUS)។

២. រថយន្តក្រុងចំនួន ៤៩៧គ្រឿង នឹងត្រូវប្រើប្រាស់សម្រាប់ដឹកជញ្ជូនប្រជាពលរដ្ឋពីរាជធានីភ្នំពេញទៅ លេងស្រុកកំណើត និងការវិលត្រលប់មកវិញ ដោយមានបែងចែកជាខ្សែរត់ធំៗចំនួន ៧ គោលដៅ។ ព័ត៌មានលម្អិត សាលារាជធានីភ្នំពេញនិងផ្ដល់ជូនសាធារណៈជនក្នុងពេលឆាប់ៗខាងមុខ។

ជាមួយនឹងការដាក់ចេញនូវវិធានការផ្ដល់ជូនមធ្យោបាយធ្វើដំណើរដោយឥតគិតថ្លៃដូចខាងលើ សម្ដេចធិបតីសង្ឃឹមថា ការរៀបចំនេះនឹងអាចជួយសម្រួលនិងសម្រាលបន្ទុកខ្លះ ក្នុងការធ្វើដំណើររបស់បងប្អូនប្រជាពលរដ្ឋក្នុងឱកាសបុណ្យភ្ជុំបិណ្ឌប្រពៃណីជាតិខ្មែរក្នុងឆ្នាំនេះ៕

ថៃ៖ ឲ្យតែចប់កិច្ចប្រជុំដឹងតែមានរឿងថ្មី! អស់ពីមីន PMN2 ពេលនេះកងទ័ពថៃបានចេញមុខមកចោ.ទប្រកាន់កម្ពុជាសារជាថ្មីជាមួយនឹងស្ទាយចាស់ ដោយប្រកាសថាបានរកឃើញគ្រាប់មីនថ្មីដែលមិនទាន់ស្គាល់ប្រភេទច្បាស់មួយទៀត នៅតាមបន្ទាត់ព្រំដែននៃផ្លូវដើរល្បាត ក្បែរៗបរិវេណប្រាសាទតាក្របី និងសន្មត់ដោយមិនគិតច្រើនថា នោះគឺជារបស់កម្ពុជា។ នេះបើយោងតាមសារព័ត៌មាន Khaosod។

តាមការចុះផ្សាយរបស់ Khaosod បានឲ្យដឹងថា កងទ័ពភូមិភាគទី២ នៅថ្ងៃទី ៩ ខែកញ្ញា ឆ្នាំ ២០២៥ វេលាម៉ោង ២ និង៣០ នាទីរសៀល គឺអង្គភាពអាវុធធុនស្រាលទី១ នៃកងវរសេនាតូចថ្មើរជើងលេខ ២៧ បានរកឃើញគ្រាប់មីនមិនស្គាល់ចំនួន ៤ ប្រភេទបន្ថែម (ស្រដៀងនឹង MD82B) នៅក្នុងតំបន់ប៉ុស្តិ៍ Tik Boe ភាគខាងលិចប្រាសាទតាក្របី។ កងទ័ពថៃជឿថា គ្រាប់មីនប្រភេទនេះប្រហែលជាអាចនៅមានទៀតនៅក្បែរៗនោះ ដោយសារតែមានសញ្ញាព្រមានពីឧបករណ៍ចាប់សញ្ញាលោហៈធាតុ។

ប្រភពខាងលើនេះ បានអះអាងបន្តទៀតថា៖ គ្រាប់មីននៅចម្ងាយប្រហែលបីម៉ែត្រពីរបងលួសបន្លាយុទ្ធសាស្ត្ររបស់អង្គភាព។ តំបន់ដែលរកឃើញគ្រាប់មីននេះ គឺជាប៉ុស្តិ៍ដែលទាហានកម្ពុជាតែងតែប្រើជាផ្លូវល្បាតដើម្បីចូលជិតរបងលួសបន្លាយុទ្ធសាស្ត្រដើម្បីឃ្លាំមើលកងទ័ពខាងថៃ។

បច្ចុប្បន្ន កម្លាំងនៃភាគីទាំងពីរកំពុងរក្សាជំហររបស់ខ្លួន ហើយថៃបានដាក់កម្លាំងប្រចាំការនៅកន្លែងសង្កេតការណ៍ ដើម្បីតាមដានចលនារបស់ភាគីប្រឆាំងដែលចង់សំដៅដល់កម្ពុជា ព្រមទាំងបានត្រៀមខ្លួនរួចជាស្រេចក្នុងការឆ្លើយតបទៅវិញទៅតាមស្ថានការណ៍ជាក់ស្ដែង។

បើតាមការលើកឡើងរបស់អ្នកនាំពាក្យកងទ័ពជើងគោកថៃបានឲ្យដឹងថា ការរកឃើញមីនថ្មីនេះគឺបង្ហាញពីការរំលោ.ភលើកិច្ចព្រមព្រៀងបទឈប់បា.ញ់ ដែលបានចុះហត្ថលេខានៅក្នុងកិច្ចប្រជុំគណៈកម្មាធិការព្រំដែនទូទៅ (GBC) នៅថ្ងៃទី 7 ខែសីហា ឆ្នាំ 2025 នៅទីក្រុងគូឡាឡាំពួ ប្រទេសម៉ាឡេស៊ី (រំលោភលើមាត្រា 1 និង 4) ។

បើតាមការកត់សម្គាល់ ស្ទើតែរៀងរាល់ពេលនៃកិច្ចប្រជុំការទូតណាមួយរវាងថ្នាក់ដឹកនាំនៃប្រទេសទាំងពីរ មិនថាJBC RBC ឬGBC នោះទេ គឺក្រោយបញ្ចប់កិច្ចប្រជុំទាំងនោះ កងទ័ពថៃតែងតែមានលេសចោ.ទប្រកាន់កម្ពុជាដដែលជាដដែល ជាក់ស្ដែងដូចជារឿងគ្រាប់មីននេះជាដើម។

ទោះជាយ៉ាងណា ក្នុងនាមជារដ្ឋភាគីនៃអនុសញ្ញាអូតាវ៉ា កម្ពុជានៅតែបញ្ជាក់ជំហររបស់ខ្លួនជានិច្ចថានឹងព្យាយាមដោះស្រាយនិងកម្ចាត់ចោលឲ្យអស់នូវសំណល់គ្រាប់មិនទាន់ផ្ទុះដែលសល់ពីសម័យសង្រ្គា.មកាលពីអតីត ព្រមទាំងប្ដេជ្ញាចិត្តថាពុំប្រើប្រាស់គ្រាប់មីនថ្មីប្រឆាំងមនុស្សជាដាច់ខាត។ ជាមួយគ្នានេះ កម្ពុជាក៏បានធ្វើការច្រានចោលនូវការចោ.ទប្រកាន់ទម្លាក់កំហុសមកឲ្យកម្ពុជាថាបានដាក់បង្កប់មីនថ្មី ទាំងគ្មានមូលដ្ឋានច្បាស់លាស់របស់ភាគីថៃ៕

ក្រោយពីកម្ពុជា-ថៃបានបញ្ចប់កិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) នៅខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២៥ ក្រសួងការបរទេសជប៉ុនបានចេញសេចក្តីថ្លែងការណ៍អបអរប្រទេសទាំងពីរដែលឯកភាពគ្នាជាច្រើនចំណុច រួមទាំងការបោសសម្អាតមីន និងបើកព្រំដែនមួយចំនួនសម្រាប់ដឹកជញ្ជូនទំនិញតាមសំណើរបស់ជប៉ុន ។

កម្ពុជា-ថៃបានឯកភាពពង្រឹងកិច្ចសហប្រតិបត្តិការដើម្បីទប់ស្កាត់ និងបង្ក្រាបបទល្មើសឆ្លងដែន ការឆបោកតាមប្រព័ន្ធបច្ចេកវិទ្យា ការជួញដូរអាវុធ ការជួញដូរគ្រឿងញៀន ការជួញដូរមនុស្ស ការងារដោយបង្ខំ និងការឆ្លងដែនខុសច្បាប់ ។ កម្ពុជាបន្តប្តេជ្ញាចិត្តយ៉ាងមុតមាំក្នុងការរក្សា និងលើកកម្ពស់សន្តិភាព ស្ថិរភាព និងកិច្ចសហប្រតិបត្តិការជាមួយប្រទេសជិតខាង ។

ខ្លឹមសារក្នុងសេចក្តីថ្លែងការណ៍របស់ក្រសួងការបរទេសជប៉ុនបានបញ្ជាក់ចំណុចសំខាន់ៗ ៣ចំណុច រួមមាន ៖

១-រដ្ឋាភិបាលជប៉ុនរីករាយយ៉ាងខ្លាំងចំពោះការរៀបចំកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) នៅខេត្តកោះកុង កាលពីថ្ងៃទី១០ ខែកញ្ញា ឆ្នាំ២០២៥ ដោយប្រទេសទាំងពីរបានពិភាក្សាឆ្ពោះទៅមុខពីការបង្កើតក្រុមសង្កេតការណ៍អាស៊ាន ការបោសសម្អាតមីន និងបើកព្រំដែនមួយចំនួនសម្រាប់ដឹកជញ្ជូនទំនិញ ។ វាជាជោគជ័យសំខាន់យ៉ាងខ្លាំងក្នុងការឈានទៅរកបទឈប់បាញ់រវាងប្រទេសទាំងពីរ ។

២-រដ្ឋាភិបាលជប៉ុនសូមសរសើរការខិតខំប្រឹងប្រែងផ្នែកការទូតរបស់គ្រប់ភាគីពាក់ព័ន្ធនឹងការរៀបចំកិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅ (GBC) លើកនេះ រួមទាំងសរសើរប្រទេសម៉ាឡេស៊ីដែលបានប្តេជ្ញាជំរុញកិច្ចព្រមព្រៀងឈប់បាញ់រវាងកម្ពុជា-ថៃ ក្នុងឋានៈម៉ាឡេស៊ីជាប្រធានអាស៊ាន ។

៣-ទំនាក់ទំនង និងកិច្ចសហការល្អរវាងកម្ពុជា-ថៃមានសារៈសំខាន់យ៉ាងខ្លាំងចំពោះសន្តិភាព និងការអភិវឌ្ឍប្រកបដោយចីរភាពក្នុងតំបន់ ។ រដ្ឋាភិបាលជប៉ុនសង្ឃឹមយ៉ាងមុតមាំថា ប្រទេសទាំងពីរនឹងបន្តអនុវត្តបទឈប់បាញ់ និងកាត់បន្ថយភាពតានតឹងដោយសន្តិវិធីតាមរយៈការចរចា ហើយរដ្ឋាភិបាលជប៉ុននឹងព្យាយាមសហការជាមួយប្រទេសពាក់ព័ន្ធដើម្បីកាត់បន្ថយភាពតានតឹង ក៏ដូចជាជំរុញប្រទេសទាំងពីរបន្តអនុវត្តកិច្ចព្រមព្រៀងឈប់បាញ់ ។

គួរបញ្ជាក់ថា កិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅកម្ពុជា-ថៃ (GBC) បានប្រព្រឹត្តទៅនាព្រឹកថ្ងៃទី១០ ខែកញ្ញា ឆ្នាំ២០២៥ នៅខេត្តកោះកុង ដោយកម្ពុជាធ្វើជាម្ចាស់ផ្ទះ។ គណៈប្រតិភូកម្ពុជាដឹកនាំដោយឯកឧត្តមនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិកម្ពុជា និងជាសហប្រធានគណៈកម្មាធិការព្រំដែនទូទៅ (GBC) ។ រីឯគណៈប្រតិភូថៃដឹកនាំដោយលោក ណាត់ថាផុង ណាកផានចត រដ្ឋមន្ត្រីក្រសួងការពារជាតិថៃ និងជាសហប្រធានគណៈកម្មាធិការព្រំដែនទូទៅ (GBC) ។

កិច្ចប្រជុំពិសេស GBC នេះធ្វើឡើងដើម្បីពិនិត្យលើលទ្ធផលការអនុវត្តគោលការណ៍ឯកភាពគ្នាដែលសម្រេចក្នុងកិច្ចប្រជុំវិសាមញ្ញរបស់ GBC កាលពីថ្ងៃទី៧ ខែសីហា ឆ្នាំ២០២៥ នៅប្រទេសម៉ាឡេស៊ី ។ កម្ពុជាសង្ឃឹមយ៉ាងមុតមាំថា កិច្ចប្រជុំពិសេសលើកទី១ របស់គណៈកម្មាធិការព្រំដែនទូទៅកម្ពុជា-ថៃ (GBC) ពេលនេះនឹងទទួលបានលទ្ធផលជាវិជ្ជមានបន្ថែមទៀត ដើម្បីអនុញ្ញាតឱ្យភាគីទាំងពីរអាចបន្តជំរុញការអនុវត្តបទឈប់បាញ់ឱ្យមានប្រសិទ្ធភាពពេញលេញ សំដៅនាំមកនូវសន្តិភាព ស្ថិរភាព និងការវិលត្រឡប់ទៅរកប្រក្រតីភាពវិញឆាប់រហ័ស ៕