Park Bom ប្រកាសប្តឹ.ង YG រឿងលុយកាក់ប៉ុន្តែអ្នកគ្រប់គ្រងនាងច្រា.នចោ.ល

Park Bom សមាជិក 2NE1 បានប្រកាសថានាងបានដាក់ពាក្យប្តឹង Yang Hyun Suk ដែលជាស្ថាបនិក និងជាអតីតនាយកប្រតិបត្តិ YG ពីបទក្លែងបន្លំ និងកេងប្រវ័ញ្ចនូវទឹកប្រាក់យ៉ាងសន្ធឹកសន្ធាប់។ ទោះយ៉ាងណាក្រុមហ៊ុនគ្រប់គ្រងរបស់ Park Bom បានបដិសេធដោយបានបញ្ជាក់ថាបានទូទាត់កម្រៃរួចរាល់ហើយ។

កាលពីថ្ងៃទី ២២ ខែតុលា Park Bom បានបង្ហោះនៅលើគណនី Instagram ផ្ទាល់ខ្លួន ដែលគេជឿថាជាពាក្យបណ្ដឹង ដែលបញ្ជាក់ថាដើមបណ្ដឹងគឺ Park Bom ហើយចុងចោទគឺ Yang Hyun Suk អតីតនាយកប្រតិបត្តិ YG ។ Park Bom បានប្តឹង Yang Hyun Suk ពីបទក្លែងបន្លំ និងកេងប្រវ័ញ្ច ដោយនិយាយថា «ចុងចោទមិនបានសងប្រាក់ចំណេញផ្លូវច្បាប់ដល់ដើមបណ្តឹង ដែលគាត់គួរទទួលបានជាយូរមកហើយ។ ខ្ញុំស្នើសុំឱ្យមានការស៊ើបអង្កេតឱ្យបានហ្មត់ចត់ និងចាត់វិធានការផ្លូវច្បាប់សមរម្យប្រឆាំងនឹងទង្វើនេះ»។

គួរកត់សម្គាល់ថា បណ្តឹងនេះបញ្ជាក់ថា Yang Hyun Suk មិនបានបង់លុយស្របច្បាប់ដែលកើតចេញពីសកម្មភាពទាំងអស់របស់ Park Bom រួមទាំងការចេញផ្សាយតន្ត្រីឌីជីថល ការសម្តែង កម្មវិធីទូរទស្សន៍ ការផ្សាយពាណិជ្ជកម្ម ព្រឹត្តិការណ៍ និងការតែងនិពន្ធតន្ត្រី។ ចំនួនទឹកប្រាក់ប៉ាន់ស្មានដែលបានសរសេរនៅក្នុងពាក្យបណ្ដឹងគឺច្រើនខ្លាំងមិនធ្លាប់មាន (១០០,២០០,៣០០,៤០០,៦០០,៧០០,១០០,០០៣៤ ‘៦៤២,៧២ពាន់លានវ៉ុន)។ ប្រព័ន្ធផ្សព្វផ្សាយកូរ៉េបាននិយាយថានេះជាកំហុសបញ្ចូលទិន្នន័យ ប៉ុន្តែវាបង្ហាញចំនួនដ៏ច្រើន។ Park Bom បាននិយាយថា៖ «នេះបានធ្វើឱ្យខ្ញុំបាត់បង់សេដ្ឋកិច្ចយ៉ាងធ្ងន់ធ្ងរ និងរបួសផ្លូវចិត្ត ដែលបង្កើតជាទង្វើច្បាស់លាស់នៃការក្លែងបន្លំ និងការកេងបន្លំ»។ តារាចម្រៀងរូបនេះបានដាក់ពាក្យបណ្ដឹងកាលពីថ្ងៃទី១៩ ខែតុលា។

ទោះយ៉ាងណាក្រោយពី Park Bom បានបង្ហោះពាក្យបណ្តឹងនេះនាងក៏បានលុបចេញវិញផងដែរ។ ក្រុមហ៊ុនគ្រប់គ្រងបច្ចុប្បន្នរបស់ Park Bom គឺ D-Nation បានឆ្លើយតបនៅថ្ងៃទី២៣ ខែតុលា នេះថា «លុយទាំងអស់ដែល Park Bom រកបានទាក់ទងនឹង 2NE1 ត្រូវបានបង់រួចហើយ។ នាងក៏មិនបានដាក់ពាក្យបណ្តឹងជាផ្លូវការដែរ»។

កាលពីខែសីហា ក្រុមហ៊ុនគ្រប់គ្រងរបស់ Park Bom បានប្រកាសថា តារាចម្រៀងរូបនេះត្រូវបញ្ឈប់សកម្មភាពសិល្បៈជាបណ្តោះអាសន្ន ដើម្បីសម្រាក និងរក្សាសុខភាពរបស់នាង។ នៅពេលនោះ អ្នកតំណាងរបស់ D-Nation Entertainment បាននិយាយថា Park Bom នឹងមិនអាចចូលរួមក្នុងកាលវិភាគនាពេលខាងមុខរបស់ 2NE1 បានទេ។ យោងតាមការវិនិច្ឆ័យរបស់ក្រុមគ្រូពេទ្យ នាងត្រូវការសម្រាក និងរក្សាលំនឹងទាំងស្រុង ដូច្នេះបន្ទាប់ពីការពិភាក្សាយ៉ាងយកចិត្តទុកដាក់ ពួកយើងត្រូវបានបង្ខំឱ្យធ្វើការសម្រេចចិត្តនេះ។

ទោះជាយ៉ាងណា ក្នុងអំឡុងពេលសម្រាកថែទាំសុខភាព Park Bom នៅតែបង្កឱ្យមានការរំជើបរំជួលលើបណ្ដាញសង្គមជាមួយនឹងទង្វើរបស់នាងដែលទាក់ទងនឹង Lee Min Ho ។
បន្ទាប់ពីការបង្ហោះរូបថតភ្ជាប់ជាមួយ Lee Min Ho និងហៅតារាសម្តែងនេះថាជាប្តីរបស់នាងកាលពីឆ្នាំ២០២៤ ធ្វើឱ្យភាគី Lee Min Ho បដិសេធទំនាក់ទំនង ។ នាងក៏បាន unfollow គ្រប់គ្នានៅលើ Instagram លើកលែងតែគណនី Lee Min Ho ប៉ុណ្ណោះ។មនុស្សជាច្រើនគិតថា Park Bom ស្ថិតក្នុងស្ថានភាពគួរឱ្យបារម្ភនៃសុខភាព និងអស្ថិរភាពផ្លូវចិត្ត៕