ប្រទេសអ៊ីតាលី ៖ ទីក្រុងបូលហ្សាណូ ស្ថិតនៅភាគខាងជើងប្រទេសអ៊ីតាលី បានបង្កើតច្បាប់ថ្មីសម្រាប់ម្ចាស់សត្វចិញ្ចឹមដើម្បីដោះស្រាយបញ្ហាកខ្វក់ទីក្រុង គឺច្បាប់ថ្មីតម្រូវឱ្យភ្ញៀវទេសចរបរទេស និងពលរដ្ឋអ៊ីតាលីដែលយកឆ្កែមកដើរលេងក្នុងទីក្រុងនេះ ត្រូវតែមានលិខិតឆ្លងដែនសត្វ (Pet Passport) ចាក់វ៉ាក់សាំងការពារជំងឺឆ្កែឆ្កួត និងបង់ប្រាក់ ទើបអាចនាំឆ្កែមកលេងតាមទីសាធារណៈក្នុងទីក្រុងបាន ។ នេះបើតាមការផ្សព្វផ្សាយរបស់សារព័ត៌មាន CNN កាលពីថ្ងៃទី២៤ ខែកញ្ញា ឆ្នាំ២០២៥ ។

ការបង្កើតច្បាប់ថ្មីក្រោយពីភ្ញៀវទេសចរបរទេសជាច្រើនបាននាំឆ្កែមកលេងតាមទីសាធារណៈ និងបន្ទោរបង់ធ្វើឱ្យកខ្វក់ទីក្រុង ឬមានគ្រោះថ្នាក់តាមផ្លូវ ។ ពលរដ្ឋអ៊ីតាលីបាននិយាយពីបញ្ហានេះថា តើគួរហាមឃាត់ភ្ញៀវទេសចរនាំឆ្កែមកទីសាធារណៈដែរឬទេ ដែលមានទាំងអ្នកយល់ស្រប និងជំទាស់ ទើបទីក្រុងបូលហ្សាណូបង្កើតច្បាប់ថ្មី គឺចាប់ពីឆ្នាំ២០២៦ ភ្ញៀវទេសចរបរទេសដែលនាំឆ្កែមកលេងទីក្រុង ត្រូវបង់ប្រាក់១.៥០អឺរ៉ូក្នុង១ថ្ងៃ (ឬជាង៥ពាន់រៀល) ។ រីឯពលរដ្ឋអ៊ីតាលីត្រូវបង់ប្រាក់ចំនួន១០០អឺរ៉ូក្នុង១ឆ្នាំ (ឬជាង១០០ដុល្លារ) ។

គោលបំណងនៃការប្រមូលប្រាក់ពីម្ចាស់ឆ្កែ គឺសម្រាប់ចំណាយលើការសម្អាតផ្លូវ និងបង្កើតសួនច្បារថ្មីដែលធ្វើឡើងសម្រាប់សត្វឆ្កែ និងម្ចាស់ ។ រីឯពាក្យចចាមអារ៉ាមថា អ៊ីតាលីនឹងហាមឃាត់ការនាំឆ្កែមកកាន់ទីសាធារណៈ គឺពុំទាន់ច្បាស់លាស់ទេ ។ កន្លងមក ទីក្រុងបូលហ្សាណូ កំណត់ឱ្យពលរដ្ឋបង់ប្រាក់ចុះឈ្មោះពិនិត្យ DNA ឆ្កែ ដើម្បីឱ្យអាជ្ញាធរអាចពិន័យប្រាក់អ្នកដែលពុំប្រមូលលាមកឆ្កែតាមផ្លូវ ស្មើ៦០០អឺរ៉ូក្នុង១លើក ។

សមាជិកក្រុមប្រឹក្សាខេត្ត លោក Louis Walcher ជាអ្នកទាមទារឱ្យបង្កើតច្បាប់ថ្មីនិយាយថា ពលរដ្ឋដែលបានចុះឈ្មោះពិនិត្យ DNA ឆ្កែ នឹងទទួលបានការលើកលែងពន្ធរយៈពេល២ឆ្នាំ ។ ប៉ុន្តែភ្នាក់ងារជាតិការពារសត្វបានប្រឆាំងនឹងការចុះឈ្មោះពិនិត្យ DNA ថា គ្មានប្រយោជន៍ ដោយអាជ្ញាធរគួរផ្តោតលើការអប់រំពលរដ្ឋ និងភ្ញៀវទេសចរឱ្យយល់ពីភាពកខ្វក់ក្នុងទីក្រុង ។

ទីក្រុងគួរទាក់ទាញភ្ញៀវទេសចរដើម្បីបង្កើនចំណូលចូលជាតិ បែរជាតម្រូវឱ្យភ្ញៀវទេសចរដែលនាំឆ្កែចូលទីក្រុងត្រូវបង់ប្រាក់ ។ បច្ចុប្បន្ន ភ្ញៀវទេសចរនិយមនាំឆ្កែដើរលេងគ្រប់កន្លែង ពីព្រោះសត្វជាសមាជិកគ្រួសារ ដែលដំណើរកម្សាន្តបែបនេះហៅថា «Pet-Friendly Tourism» ដោយសារពួកគេចង់ទទួលបទពិសោធន៍ធ្វើដំណើរជាមួយសត្វ ។ ហេតុនេះ ការរឹតបន្តឹង ឬទាមទារប្រាក់ពីភ្ញៀវទេសចរដែលមានសត្វចិញ្ចឹម នឹងធ្វើឱ្យភ្ញៀវទេសចរស្ទាក់ស្ទើរក្នុងការធ្វើដំណើរមកលេងទីក្រុងបូលហ្សាណូ ។

អាជ្ញាធរគួរពិចារណាពីការរក្សាអនាម័យ សណ្តាប់ធ្នាប់ទីក្រុង និងស្វាគមន៍ភ្ញៀវទេសចរបរទេសដែលបានធ្វើដំណើរមកលេងទីក្រុងជាមួយសត្វចិញ្ចឹម ល្អជាងប្រមូលប្រាក់តែម្យ៉ាង ។ ដំណោះស្រាយ គឺរៀបចំកន្លែងសាធារណៈសម្រាប់ឆ្កែ ដាក់ធុងសំរាមជាច្រើន ផ្តល់ឧបករណ៍សម្អាត ព្រមទាំងអប់រំភ្ញៀវទេសចរ និងពលរដ្ឋអ៊ីតាលីឱ្យយល់ពីផលប៉ះពាល់ដោយសារទីក្រុងកខ្វក់ ។ នេះបើតាមការលើកឡើងរបស់ភ្នាក់ងារជាតិការពារសត្វ ៕

បាងកក៖ ក្រោយការបាក់ស្រុតដីដែលបង្កើតបានជារណ្ដៅដ៏ធំសម្បើម និងមានជម្រៅប្រមាណ៥០ម៉ែត្រ នៅទីក្រុងបាងកក កាលពីថ្ងៃពុធកន្លងទៅ អាជ្ញាធរថៃបានសម្រេចចិត្តធ្វើការចាក់បេតុងរហូតដល់ ២៤០០ តោនចូលទៅក្នុងរណ្ដៅនោះដើម្បីការពារការបា.ក់ថ្មី ប៉ុន្តែបែរជាធ្ងន់កលើសដើម ព្រោះបេតុងរាវទាំងនោះបានធ្លាយជ្រាបចូលពេញផ្លូវរូងក្រោមដីអស់ ១៥០០តោន ធ្វើឲ្យដំណើរជួសជុលកាន់តែមានភាពស្មុគស្មាញ។

យោងតាមសារព័ត៌មានក្នុងស្រុករបស់ថៃ និងកាសែត The Straits Times នាថ្ងៃសុក្រ ទី២៦ កញ្ញា បានឲ្យដឹងថា អភិបាលក្រុងបាងកក លោក Chadchart Sittipunt ដែលបានចុះទៅពិនិត្យទីតាំងនៅផ្លូវ Samsen មុខមន្ទីរពេទ្យ Vajira ដើម្បីត្រួតពិនិត្យប្រតិបត្តិការជួសជុលនេះបានពន្យល់ថា វិស្វករត្រូវរង់ចាំការចាក់បំពេញសុីម៉ង់ត៍ដំបូងឱ្យស្ងួតសិន មុនពេលចាប់ផ្តើមជំហានបន្តបន្ទាប់នៅថ្ងៃដដែលនោះ។

ពួកគេបានប៉ាន់ប្រមាណថាសុីម៉ង់ត៍សរុបដែលគេបានយកមកប្រើប្រាស់ក្នុងប្រតិបត្តិការតំបូងនេះមានរហូតដល់ 2,400 តោន ដើម្បីទប់ដីកុំឲ្យបាក់ស្រុតបន្ថែម មុនការសាងសង់ជញ្ជាំងបេតុងតាមលំដាប់អចិន្ត្រៃយ៍អាចចាប់ផ្តើមបាន។

ក្នុងកំឡុងពេលដែលក្រុមបច្ចេកទេសកំពុងដុតដៃដុតជើងក្នុងការជួសជុលរន្ធនោះ រឿងឈឺក្បាលថ្មីមួយទៀតក៏បានកើតឡើង នោះគឺសុីម៉ង់ត៍ប្រមាណ ១៥០០តោន ដែលមិនទាន់ស្ងួតបានធ្លាយជ្រាបចូលពេលរូងក្រោមដី ធ្វើឲ្យប្រតិបត្តិការចាក់បំពេញត្រូវបានបញ្ឈប់ភ្លាមៗ ហើយអាជ្ញាធរដឹកជញ្ជូនរហ័សថៃ (MRTA) ក៏បានចុះមកសម្របសម្រួលបញ្ហានេះជាបន្ទាន់ផងដែរ។

ដើម្បីកែប្រែស្ថានការណ៍ជុំវិញកំហុសបច្ចេកទេសនេះ ជំនួយការសាស្រ្តាចារ្យ លោក Thanet Veerasiri ទីប្រឹក្សាវិទ្យាស្ថានវិស្វកម្មនៃប្រទេសថៃ បាននិយាយថា៖ បើទោះជាមានការជ្រាបបេតុងបែបនេះក៏ពិតមែន ប៉ុន្តែវាមិនត្រូវបានគេចាត់ទុកថាមានគ្រោះថ្នាក់នោះទេ។ លោក Thanet ថែមទាំងបានគូសបញ្ជាក់ថា៖ ផ្ទុយទៅវិញ វានឹងអាចជួយទប់ស្កាត់ការជ្រៀតចូលទឹកទៅក្នុងផ្លូវរូងក្រោមដី ហើយជួយទប់ស្កាត់ការហូរច្រោះថែមទៀតផង។

យ៉ាងណាមិញ គិតមកត្រឹមថ្ងៃទី២៧ ខែកញ្ញា ស្ថានភាពលិចធ្លាយបេតុងត្រូវបានក្រុមការងារបច្ចេកទេសថៃព្យាយាមស្ដារឡើងវិញឲ្យមានសភាពប្រក្រតីវិញបានមួយផ្នែកធំហើយ ជាមួយនឹងការដាក់ពង្រាយបាវខ្សាច់ និងចាក់ដីបង្ហាប់ឲ្យវារឹងមាំក្នុងគោលបំណងពង្រឹងស្ថេរភាព និងពង្រឹងគ្រឹះដែលគាំទ្រដល់រចនាសម្ព័ន្ធអគារនៅក្បែរនោះ។

អាជ្ញាធរថៃនឹងបន្តតាមដានស្ថានការណ៍នេះបន្ថែមទៀត ជាពិសេសទាក់ទងនឹងស្ថានភាពនៃអគារមួយចំនួន រួមទាំងប៉ុស្តិ៍ប៉ូលីស SamSen ដែលហាក់កំពុងរំកិលទ្រេតទៅរកមាត់រណ្ដៅនោះ ដោយពួកគេបានធ្វើការផ្អាកការធ្វើចរាចរណ៍ឆ្លងកាត់ជាបណ្ឌោះអាសន្ន និងហាមឃាត់ការចេញចូលរបស់សាធារណជនយ៉ាងតឹងរឹងបំផុតដើម្បីធានាសុវត្ថិភាព៕

ប្រទេសថៃ ៖ ជាច្រើនខែមកនេះ ប្រទេសថៃប្រឈមនឹងខ្យល់ព្យុះមួយហើយមួយទៀតធ្វើឱ្យបណ្តាខេត្តជាច្រើន រួមទាំងទីក្រុងបាងកក លិចលង់ដោយទឹកជំនន់បង្កផលប៉ះពាល់យ៉ាងខ្លាំងដល់ការរស់នៅរបស់ពលរដ្ឋ ។ នៅខេត្តខ្លះ ទឹកជំនន់កើនឡើងខ្ពស់រហូតដល់ដំបូលផ្ទះខូចខាតទ្រព្យសម្បត្តិ បំផ្លា.ញដំណាំក្នុងចម្ការ កាត់ផ្តាច់ផ្លូវធ្វើដំណើរ ថែមទាំងធ្វើឱ្យពលរដ្ឋថៃលង់ទឹកស្លា.ប់ជាបន្តបន្ទាប់ ខណៈទីក្រុងបាងកកបាក់ស្រុតផ្លូវក្លាយជារណ្តៅយ៉ាងជ្រៅកាលពីថ្ងៃទី២៤ ខែកញ្ញា ឆ្នាំ២០២៥ ។

តាមការផ្សព្វផ្សាយរបស់សារព័ត៌មានថៃ Kapook នៅថ្ងៃទី២៧ ខែកញ្ញា ឆ្នាំ២០២៥ ឱ្យដឹងថា ប្រទេសថៃប្រឈមនឹងខ្យល់ព្យុះថ្មីមួយទៀតមានកម្លាំងខ្លាំង ឈ្មោះថា ព្យុះបួឡយ (Bualoi) ដែលនឹងបោកបក់មកលើប្រទេសថៃចាប់ពីថ្ងៃទី២៨ ដល់ថ្ងៃទី៣០ ខែកញ្ញា ។ ឥទ្ធិពលខ្យល់ព្យុះនេះនឹងធ្វើឱ្យបណ្តាខេត្តនៅភាគខាងជើង និងឦសានមានភ្លៀងធ្លាក់យ៉ាងខ្លាំង ។

ព្យុះបួឡយ មានប្រភពពីសមុទ្រចិនខាងត្បូង និងមានកម្លាំងខ្យល់ក្នុងល្បឿនលឿនបំផុតប្រមាណ១១០គីឡូម៉ែត្រក្នុង១ម៉ោង ហើយវាកំពុងផ្លាស់ទីទៅទិសខាងលិចក្នុងល្បឿន៣០គីឡូម៉ែត្រក្នុង១ម៉ោង ។ ឧតុនិយមថៃប្រកាសថា ព្យុះនេះនឹងផ្លាស់ទីតាមឆ្នេរសមុទ្រប្រទេសវៀតណាមចាប់ពីថ្ងៃទី២៨ ដល់ថ្ងៃទី២៩ ខែកញ្ញា បន្ទាប់មក វានឹងខ្សោយកម្លាំងបន្តិច ។

ឥទ្ធិពលរបស់ព្យុះបួឡយ នឹងធ្វើឱ្យប្រទេសថៃមានខ្យល់កន្ត្រាក់ខ្លាំងនៅភាគខាងជើង និងឦសាន ព្រមទាំងមានខ្យល់បក់ខ្លាំងមកពីទិសនិរតីគ្របដណ្តប់លើសមុទ្រអាន់ដាម៉ាន់ និងឈូងសមុទ្រថៃ ។ ក្នុងចន្លោះថ្ងៃទី២៨-៣០ ខែកញ្ញា ប្រទេសថៃនឹងមានភ្លៀងធ្លាក់ខ្លាំងនៅតំបន់ជាច្រើន រួមទាំងធ្លាក់ខ្លាំងនៅភាគខាងជើង និងឦសាន ។

ចំណែកភាគខាងត្បូង និងខាងកើតប្រទេសថៃ នឹងរងនូវឥទ្ធិពលខ្យល់មូសុង ដោយឧតុនិយមថៃបានជូនដំណឹងឱ្យពលរដ្ឋប្រុងប្រយ័ត្នគ្រោះថ្នាក់ដោយសារភ្លៀងធ្លាក់កាន់តែខ្លាំង ខណៈទឹករលកនៅសមុទ្រអាន់ដាម៉ាន់ និងឈូងសមុទ្រថៃ គឺមានកម្រិតពីមធ្យមទៅខ្លាំង ។ ហេតុនេះ ឧតុនិយមថៃសំណូមពរឱ្យពលរដ្ឋតាមដានព័ត៌មានអាកាសធាតុ និងត្រៀមខ្លួនក្នុងរដូវវស្សា ។

គួរបញ្ជាក់ថា ថៃទើបតែរងឥទ្ធិពលព្យុះ Ragasa ដែលនាំមកនូវភ្លៀងធ្លាក់យ៉ាងខ្លាំងនៅទូទាំងប្រទេសចាប់ពីថ្ងៃទី២៤ ដល់ថ្ងៃទី២៦ ខែកញ្ញា កន្លងមក ជាមួយហានិភ័យទឹកជំនន់ភ្លាមៗ និងការហូរច្រោះទឹកខ្លាំង ។ តាមការជូនដំណឹងរបស់ឧតុនិយមថៃកាលពីថ្ងៃទី២៤ ខែកញ្ញា ឱ្យដឹងថា ព្យុះ Ragasa ស្ថិតនៅក្បែរឆ្នេរសមុទ្រភាគខាងត្បូងខេត្ត Guangdong ប្រទេសចិន ដែលមានកម្លាំងខ្យល់ស្មើ១៥៥គីឡូម៉ែត្រក្នុង១ម៉ោង ៕

នាយកប្រតិបត្តិក្រុមហ៊ុនកាហ្វេយក្ស Starbucks លោក Brian Niccol បានចេញសេចក្ដីប្រកាសមួយជូនបុគ្គលិកកាលពីថ្ងៃព្រហស្បតិ៍ ថា ក្រុមហ៊ុនកាហ្វេ Starbucks នឹងបញ្ឈប់បុគ្គលិក និងបិទហាងមួយចំនួន ដែលជាផ្នែកមួយនៃការរៀបចំរចនាសម្ព័ន្ធឡើងវិញ ដែលមានតម្លៃប្រមាណ ១ ពាន់លានដុល្លារអាមេរិក។

លោក Niccol បានបញ្ជាក់ថា ការកាត់បន្ថយនឹងប៉ះពាល់ដល់បុគ្គលិកប្រមាណ ៩០០ នាក់ នៅតាមហាងក្នុងតំបន់អាមេរិកខាងជើង។ ខណៈពេលជាមួយគ្នា ការបិទនេះនឹងបណ្ដាលឲ្យចំនួនហាងកាហ្វេ Starbucks សរុបនៅតំបន់នេះធ្លាក់ចុះប្រមាណ ១% ក្នុងឆ្នាំសារពើពន្ធនេះ បន្ទាប់ពីបានគណនាការបើកហាងថ្មីជាច្រើន។ លោក Niccol បាននិយាយថា “ទោះបីជាក្រុមហ៊ុនកំពុងមានកំណើនល្អក្តី ក៏យើងនៅតែត្រូវធ្វើអ្វីៗជាច្រើន ដើម្បីកសាង Starbucks ឲ្យកាន់តែរឹងមាំ និងប្រសើរឡើង”។ទោះជាយ៉ាងណា បន្ទាប់ពីការប្រកាសនេះរួច ភាគហ៊ុនរបស់ Starbucks បានកើនឡើងបន្តិចផងដែរ។

អ្នកវិភាគបានប្រាប់សារព័ត៌មាន ABC News ថា Starbucks កំពុងប្រឈមមុខនឹងបញ្ហា ការលក់ធ្លាក់ចុះជាបន្តបន្ទាប់ ក្នុងរយៈពេលចុងក្រោយនេះ ដោយសារអតិថិជនរងផលប៉ះពាល់ពីអតិផរណាកើនឡើង។ ក្រុមហ៊ុនបានចុះខ្សោយការលក់ ៦ ត្រីមាសជាប់ៗគ្នា នៅក្នុងហាងដដែលៗ។

យ៉ាងណាមិញ ក្នុងកិច្ចខិតខំប្រឹងប្រែងដើម្បីទាក់ទាញអតិថិជន ក្រុមហ៊ុនបានធ្វើការកែលម្អបរិវេណ និងសេវាកម្មនៅហាងជាច្រើន។ ទោះយ៉ាងណា លោក Niccol បានប្រាប់ថា ក្នុងការពិនិត្យឡើងវិញ ក្រុមហ៊ុនបានរកឃើញហាងមួយចំនួនដែល មិនអាចបង្កើតបទពិសោធន៍ដ៏ល្អឲ្យអតិថិជន ឬ មិនមានសក្តានុពលផ្នែកហិរញ្ញវត្ថុ ដូចដែលរំពឹងទុក ដូច្នេះហាងទាំងនេះនឹងត្រូវបិទ។
លោកបន្តថា “ជារៀងរាល់ឆ្នាំ យើងមានការបើក និងបិទហាង ដោយហេតុផលផ្សេងៗចាប់ពីការបញ្ចប់កិច្ចជួល ដល់បញ្ហាហិរញ្ញវត្ថុ។ តែសកម្មភាពនេះមានទំហំធំជាង យើងដឹងថាវានឹងប៉ះពាល់ដល់ទាំងបុគ្គលិក និងអតិថិជន” ។

Starbucks រំពឹងថានឹងបញ្ចប់ឆ្នាំសារពើពន្ធ ២០២៥ ជាមួយនឹងហាងសរុបប្រមាណ ១៨,៣០០ កន្លែង នៅសហរដ្ឋអាមេរិក និងកាណាដា ហើយក្រុមហ៊ុននឹងជូនដំណឹងដល់បុគ្គលិកនៅតាមហាងដែលត្រូវបិទ នៅក្នុងសប្តាហ៍ដដែល។ គួរបញ្ជាក់ថា លោក Niccol មានបំណង ផ្លាស់ប្តូរបុគ្គលិកទៅហាងផ្សេង នៅក្បែរៗគ្នា។ ប៉ុន្តែបើមិនអាចធ្វើបានទេ Starbucks នឹងផ្តល់នូវ សំណង និងការគាំទ្រពិសេស ដល់បុគ្គលិកដែលរងផលប៉ះពាល់៕

ប្រទេសថៃ ៖ នាយករដ្ឋមន្ត្រីថៃ លោក អនុថីន ឆាន់វីរៈគូន បានប្រគល់អំណាចពេញលេញឱ្យកងទ័ពសម្រេចចិត្តលើជម្លោះព្រំដែនកម្ពុជា-ថៃ និងធ្វើប្រតិបត្តិការប្រឆាំងកម្ពុជាភ្លាមៗបើស្ថានការណ៍កាន់តែតានតឹង ដោយលោកចោទប្រកាន់កម្ពុជាបង្កហេតុគ្រប់ពេលវេលា ទើបគ្មានការចរចាជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ។ លោកប្រគល់តួនាទីឱ្យក្រសួងការបរទេសទទួលខុសត្រូវការទូត និងបន្តបិទព្រំដែន លុះត្រាតែថៃយល់ថា កម្ពុជាលែងបង្កគ្រោះថ្នា.ក់ ។ នេះបើតាមការផ្សព្វផ្សាយរបស់សារព័ត៌មាន Thairath កាលពីថ្ងៃទី២៦ ខែកញ្ញា ឆ្នាំ២០២៥ ។

លោក អនុថីន នាយករដ្ឋមន្ត្រីថៃ និងជារដ្ឋមន្ត្រីក្រសួងមហាផ្ទៃបានផ្តល់សម្ភាសន៍ជាមួយសារព័ត៌មានកាលពីថ្ងៃទី២៦ ខែកញ្ញា អំពីស្ថានការណ៍ព្រំដែនកម្ពុជា-ថៃថា ការស្នើឱ្យលុបចោល MOU ឆ្នាំ២០០០ និង MOU ឆ្នាំ២០០១ គឺស្ថិតក្រោមនយោបាយរបស់រដ្ឋាភិបាលនៅឡើយដើម្បីកុំឱ្យប្រទេសទាំងពីរមានជម្លោះកាន់តែខ្លាំង ។ ពេលនេះ លោកបានឱ្យសភាតំណាងរាស្ត្របង្កើតគណៈកម្មការសិក្សាពី MOU ។

នាយករដ្ឋមន្ត្រីថៃបានចោទប្រកាន់កម្ពុជាបង្កហេតុគ្រប់ពេលវេលានៅតំបន់ព្រំដែនជាច្រើនកន្លែង ហើយថាកងទ័ពថៃអត់ធ្មត់ខ្លាំង និងត្រៀមខ្លួនរួចហើយ ។ លោកបានផ្តល់អំណាចពេញលេញឱ្យកងទ័ពធ្វើប្រតិបត្តិការនៅព្រំដែន និងនិយាយជាមួយលោក ណាត់ថាផុង ណាកផានិច រដ្ឋមន្ត្រីក្រសួងការពារជាតិ និងលោក អាឌុល ប៊ុនថាំចារើន អនុរដ្ឋមន្ត្រីក្រសួងការពារជាតិ អំពីគោលជំហររបស់រដ្ឋាភិបាលថៃ និងគោលជំហរនាយករដ្ឋមន្ត្រី រួមទាំងជជែកតាមទូរស័ព្ទជាមួយលោក ផាណា ក្លេវប្លតថុក មេបញ្ជាការកងទ័ពជើងគោក ឱ្យយល់ពីតួនាទី ក៏ដូចជាបើកដៃឱ្យកងទ័ពធ្វើប្រតិបត្តិការប្រឆាំងកម្ពុជា ។

ឆ្លើយតបនឹងសំណួររបស់អ្នកសារព័ត៌មានដែលសួរថា ពេលនេះ លោក អនុថីន មានអំណាចពេញលេញជានាយករដ្ឋមន្ត្រីថៃ តើលោកនឹងជជែកជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាដែរឬទេ ដើម្បីឱ្យស្ថានការណ៍ធូរស្រាល បើមិនចរចាជម្លោះនឹងអូសបន្លាយបែបនេះ? លោក អនុថីន ឆ្លើយថា ពុំចរចាជាមួយថ្នាក់ដឹកនាំកម្ពុជាទេ ការការពារទឹកដី អធិបតេយ្យ រួមទាំងសុវត្ថិភាពប្រទេស និងពលរដ្ឋ គឺជាអំណាចរបស់កងទ័ព ។ លោកបន្តបិទព្រំដែន លុះត្រាតែថៃយល់ថាកម្ពុជាលែងបង្កគ្រោះថ្នាក់ ។

ដោយឡែក រឿងការទូត លោកបានប្រគល់តួនាទីឱ្យរដ្ឋមន្ត្រីក្រសួងការបរទេស ពីព្រោះមានជំនាញខាងកិច្ចការបរទេស និងការទូត ។ រីឯការរក្សាទំនាក់ទំនងល្អ ឬដោះស្រាយជម្លោះ គឺលោកនឹងពិភាក្សាជាមួយរដ្ឋមន្ត្រីក្រសួងការបរទេសដើម្បីកំណត់វិធានការបន្តទៀត ។

កាលពីថ្ងៃទី២៥ ខែកញ្ញា ផេកផ្លូវការរបស់មជ្ឈមណ្ឌលប្រតិបត្តិការតំបន់កងទ័ពទី២របស់ថៃ និងសារព័ត៌មានថៃមួយចំនួនផ្សាយថា កម្ពុជាបង្កហេតុដោយមានសកម្មភាពចល័តរថក្រោះចូល និងឮសំឡេងកាំភ្លើង ឮសំឡេងផ្ទុះគ្រាប់បែក និងរកឃើញការចូលជិតបន្លាលួស ព្រមទាំងមានការបាញ់ដើម្បីពិនិត្យមើលរយៈចម្ងាយ ។ ក្រសួងការពារជាតិកម្ពុជាបានស្រាយបំភ្លឺថា កងកម្លាំងរបស់កម្ពុជាមិនបានបង្កហេតុ ឬធ្វើសកម្មភាពណាមួយដែលរំលោភបំពានលើកិច្ចព្រមព្រៀងបទឈប់បា.ញ់ ដូចការលើកឡើងរបស់ថៃឡើយ ។

កម្ពុជាប្តេជ្ញាចិត្តយ៉ាងពេញលេញចំពោះការគោរព និងអនុវត្តនូវកិច្ចព្រមព្រៀងបទឈប់បាញ់រវាងកងទ័ពកម្ពុជា និងកងទ័ពថៃ បានយ៉ាងម៉ឺងម៉ាត់ និងខ្ជាប់ខ្ជួនបំផុត ជាមួយនឹងស្មារតីនៃការប្តេជ្ញាចិត្តក្នុងការសហការគ្នានៅគ្រប់កម្រិត កម្ពុជាតែងតែរក្សាកិច្ចសហការល្អជាមួយគ្នា ៕