ប្រទេសថៃ ៖ ចាប់តាំងពីនាយករដ្ឋមន្ត្រីថៃប្រកាសបញ្ចប់កិច្ចព្រមព្រៀងសន្តិភាព និងឈប់ចរចាជាមួយកម្ពុជា ក្រោមហេតុផលកងទ័ពថៃជាន់មីនរងរបួសនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ថៃបានបញ្ជូនកម្លាំងទ័ព អាវុ.ធ និងរថក្រោះជាច្រើនគ្រឿងមកកាន់តំបន់ព្រំដែនជាថ្មី ដោយចោទប្រកាន់កម្ពុជាបង្កប់មីនដើម្បីយកលេសបង្កសង្គ្រា.ម ។ ក្នុងស្ថានការណ៍តានតឹងនេះ ពលរដ្ឋខេត្តសុរិន្ទបានបង្ហាញជំហរគាំទ្រកងទ័ព និងរដ្ឋាភិបាលថៃយ៉ាងពេញទំហឹងឱ្យបង្ក្រាបកម្ពុជាឱ្យរាប និងដណ្តើមទឹកដីកម្ពុជានៅតំបន់ព្រំដែន ។

កាលពីថ្ងៃទី១២ ខែវិច្ឆិកា ពលរដ្ឋខេត្តសុរិន្ទបានសំណូមពរទៅកាន់កងទ័ព និងរដ្ឋាភិបាលថៃបង្ក្រាបកម្ពុជាឱ្យរាប ដោយសារមិនចង់រស់នៅភ័យខ្លាចទេ ។ ពួកគេត្រៀមខ្លួនជម្លៀសចេញពីលំនៅឋានទៅកាន់កន្លែងភៀសសឹកដើម្បីឱ្យកងទ័ពថៃធ្វើប្រតិបត្តិការប្រឆាំងកម្ពុជា និងដណ្តើមទឹកដីកម្ពុជានៅតំបន់ព្រំដែនឱ្យបាន ។ ពលរដ្ឋសុរិន្ទជំរុញឱ្យកងទ័ពថៃប៉ះទង្គិចដោយអាវុធនេះ ក្រោយពីសារព័ត៌មាននានារបស់ថៃផ្សាយព័ត៌មានបំភ្លៃថា កម្ពុជាបំពានកិច្ចព្រមព្រៀងសន្តិភាពដោយបង្កប់មីនថ្មី ខណៈរដ្ឋាភិបាលថៃទម្លាក់កំហុសលើកម្ពុជាដោយនិយាយកុហកប្រាប់ពិភពលោក ។

តាមការចុះផ្សាយរបស់សារព័ត៌មាន Naewna News កាលពីថ្ងៃទី១២ ខែវិច្ឆិកា នាយករដ្ឋមន្ត្រីថៃ លោក Anutin Charnvirakul បានទៅសួរសុខទុក្ខកងទ័ពនៅខេត្តឧប៊ុនរ៉ាជថានី និងខេត្តស៊ីសាកេត ព្រមទាំងចោទប្រកាន់កម្ពុជាបង្កប់មីនថ្មីនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត ធ្វើឱ្យកងទ័ពថៃរងរបួសពេលយាមល្បាត ទើបសម្រេចចិត្តបញ្ចប់កិច្ចព្រមព្រៀងសន្តិភាពជាមួយកម្ពុជា ដែលចុះហត្ថលេខានៅទីក្រុងកូឡាឡាំពួរ ។ លោកបញ្ជាឱ្យក្រសួងការពារជាតិពង្រាយកងទ័ពនៅតាមបណ្តោយព្រំដែនកម្ពុជា-ថៃ និងបញ្ជាឱ្យអភិបាលខេត្តទាំង៧នៅជាប់ព្រំដែនកម្ពុជា ត្រៀមជួយពលរដ្ឋពេលស្ថានការណ៍ព្រំដែនឡើងកំដៅខ្លាំង ។

ក្រោយពីនាយករដ្ឋមន្ត្រីថៃប្រកាសបញ្ចប់កិច្ចព្រមព្រៀងសន្តិភាពធ្វើឱ្យស្ថានការណ៍ព្រំដែនកម្ពុជា-ថៃតានតឹងឡើងវិញ ពលរដ្ឋខេត្តសុរិន្ទប្រញាប់ប្រមូលផលស្រូវមុនពេលជម្លៀសចេញពីលំនៅឋាន ដោយបង្ហាញជំហរគាំទ្រកងទ័ពថៃយ៉ាងពេញទំហឹងក្នុងការធ្វើប្រតិបត្តិការប្រឆាំងកម្ពុជា ។ ពលរដ្ឋសុរិន្ទជឿជាក់លើការផ្សព្វផ្សាយព័ត៌មានបំភ្លៃនៅប្រទេសថៃ និងជឿការកុហកបោកប្រាស់របស់រដ្ឋាភិបាលថៃថា កម្ពុជាបង្កប់មីនបំពានកិច្ចព្រមព្រៀងសន្តិភាព ។

ពលរដ្ឋខេត្តសុរិន្ទបារម្ភពីស្ថានការណ៍ព្រំដែន ខណៈអាជ្ញាធរមូលដ្ឋានប្រកាសឱ្យពលរដ្ឋត្រៀមខ្លួនជម្លៀសចេញពីលំនៅឋានពេលស្ថានការណ៍តានតឹងខ្លាំង ។ បើទោះជាកម្ពុជា-ថៃធ្លាប់ប៉ះទង្គិចដោយអាវុធកន្លងមក ក៏នៅតែបារម្ភដែរ ពួកគេចង់ឱ្យកងទ័ពថៃចាត់ការកម្ពុជាយ៉ាងចាស់ដៃដើម្បីបញ្ចប់ជម្លោះឆាប់ៗឱ្យពលរដ្ឋអាចប្រកបរបររកស៊ីធម្មតា ។ ពួកគេថែមទាំងគាំទ្រឱ្យកងទ័ពថៃដណ្តើមប្រាសាទបុរាណរបស់កម្ពុជាឱ្យបាន ប្រសិនបើប៉ះទង្គិចគ្នាម្តងទៀត ។

ពលរដ្ឋសុរិន្ទខ្លះទៀតបានត្រៀមសម្ភារៈប្រើប្រាស់ចាំបាច់ដាក់រថយន្តរួចរាល់ និងចង់ឱ្យកងទ័ពថៃធ្វើសង្គ្រាមឈ្លានពានកម្ពុជាម្តងទៀត ។ ពួកគេបានផ្តាំផ្ញើទៅរដ្ឋាភិបាលថៃត្រូវសម្រេចចិត្តយ៉ាងម៉ឺងម៉ាត់ជាមួយកម្ពុជា មិនចាំបាច់តវ៉ា មិនចាំបាច់ចរចាអ្វីទាំងអស់ និងចោទប្រកាន់កម្ពុជាបង្កប់មីនធ្វើឱ្យកងទ័ពថៃដាច់ជើងសរុបចំនួន៧នាក់ ។ ពលរដ្ឋសុរិន្ទគាំទ្រលោកនាយករដ្ឋមន្ត្រី Anutin ដែលលុបចោលកិច្ចព្រមព្រៀងសន្តិភាព និងចង់ឱ្យនាយករដ្ឋមន្ត្រីបញ្ជាឱ្យមានការបាញ់ប្រហារដើម្បីដណ្តើមប្រាសាទរបស់កម្ពុជា ។

គួរបញ្ជាក់ថា ថៃបានចោទប្រកាន់កម្ពុជាបង្កប់មីនថ្មីធ្វើឱ្យកងទ័ពខ្លួនរងរបួសជាបន្តបន្ទាប់ ប៉ុន្តែការចោទប្រកាន់នេះគ្មានភស្តុតាងឡើយ វាគ្រាន់តែជាការទម្លាក់កំហុសយកលេសធ្វើសង្គ្រាមឈ្លានពានកម្ពុជាប៉ុណ្ណោះ ។ ថ្មីៗនេះ បុគ្គល ប៊ុនស៊ីន ផាកក្លាង អង្គរក្សពិសេសរបស់ស្តេចថៃ និយាយថា ថៃមានយុទ្ធសាស្ត្រដណ្តើមយកប្រាសាទបុរាណរបស់កម្ពុជា ហើយមិនយូរប៉ុន្មាន ស្រាប់តែមានព័ត៌មានកងទ័ពថៃជាន់មីនដាច់ជើង ។ នេះមិនមែនជារឿងចៃដន្យទេ វាជាហេតុការណ៍ដែលថៃបានរៀបចំឡើងដើម្បីយកលេសលុបចោលកិច្ចព្រមព្រៀងសន្តិភាព និងបង្កសង្គ្រាមជាថ្មី ។

ក្រសួងការពារជាតិកម្ពុជា សោកស្តាយចំពោះឧបទ្ទវហេតុនៃការផ្ទុះគ្រាប់មីនដែលបណ្តាលឱ្យកងទ័ពថៃមួយចំនួនរងរបួសពេលដើរល្បាតចូលតំបន់ចម្ការមីនចាស់ដែលបន្សល់ទុកពីសង្គ្រាមស៊ីវិលរបស់កម្ពុជា កាលពីថ្ងៃទី១០ ខែវិច្ឆិកា ឆ្នាំ២០២៥ និងបដិសេធការចោទប្រកាន់របស់ថៃមកលើកម្ពុជា ។ តាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីគំរាមកំហែងដល់សន្តិសុខ និងសុវត្ថិភាពមនុស្សជាតិឡើយ ៕

ប្រទេសថៃ ៖ ក្រោយប្រកាសបញ្ចប់កិច្ចព្រមព្រៀងសន្តិភាពជាមួយកម្ពុជាក្រោមហេតុផលកងទ័ពថៃជាន់មីនរងរបួសនៅតំបន់ហួយតាម៉ារៀ ស្រុកកាន់ថាឡាក់ ខេត្តស៊ីសាកេត នាយករដ្ឋមន្ត្រីថៃបានបញ្ជាឱ្យត្រៀមកម្លាំងទ័ព និងអាវុ.ធនៅតាមតំបន់ព្រំដែនដើម្បីប្រើប្រាស់សិទ្ធិការពារខ្លួន ។ លោកថា ការបញ្ចប់កិច្ចព្រមព្រៀងនេះមិនបាច់រាយការណ៍ប្រាប់ប្រធានាធិបតីអាមេរិកពីព្រោះប្រទេសថៃឯករាជ្យ មានអធិបតេយ្យភាព លោកមិនបារម្ភពីអាមេរិកដំឡើងពន្ធទំនិញថៃក្នុងអត្រាខ្ពស់ទេ បើមិនអាចនាំចេញទំនិញទៅអាមេរិក ថៃនឹងរកទីផ្សារថ្មី ។ ប៉ុន្តែអតីតជំនួយការរដ្ឋមន្ត្រីការបរទេសបារម្ភពីការបាត់បង់មិត្តជាមហាអំណាចដោយសារនាយករដ្ឋមន្ត្រីថៃនិយាយប៉ះពាល់អាមេរិក និងធ្វើឱ្យអាមេរិកកាន់តែមានទំនាក់ទំនងជិតស្និទ្ធជាមួយកម្ពុជា ។

កាលពីថ្ងៃទី១២ ខែវិច្ឆិកា ឆ្នាំ២០២៥ អតីតជំនួយការរដ្ឋមន្ត្រីការបរទេស លោក រ៉ាត់ ឆាលីចាន់ និយាយថា ពាក្យសម្តីរបស់លោកនាយករដ្ឋមន្ត្រី Anutin Charnvirakul ដែលនិយាយមិនខ្លាចអាមេរិកដំឡើងពន្ធទំនិញថៃខ្ពស់ គឺអាចបង្កគ្រោះថ្នាក់ដល់ប្រទេសថៃ ខណៈកន្លងមក នាយករដ្ឋមន្ត្រីថៃនិយាយពីថៃល្មើសអធិបតេយ្យកម្ពុជានៅតំបន់ព្រំដែនខេត្តស្រះកែវ ។ លោកយល់ពីថៃចាំបាច់ត្រូវការពារអធិបតេយ្យ ផ្តល់សុវត្ថិភាពឱ្យពលរដ្ឋ និងបង្កើនវិធានការកងទ័ពយ៉ាងតឹងរ៉ឹងដើម្បីចាត់ការកម្ពុជា ក្រោយថៃចោទប្រកាន់កម្ពុជាបំពានកិច្ចព្រមព្រៀងសន្តិភាពដោយបង្កប់មីនថ្មីនៅតំបន់ព្រំដែន ប៉ុន្តែការនិយាយប៉ះពាល់អាមេរិកដែលជាមិត្តរបស់ថៃអាចនឹងខាតប្រយោជន៍ ។ តើនាយករដ្ឋមន្ត្រីថៃនិយាយដើម្បីអ្វី? តើថៃនឹងទទួលបានប្រយោជន៍ច្រើនជាងការខាតបង់ មែនទេ?

នាយករដ្ឋមន្ត្រីថៃបាននិយាយកាលពីថ្ងៃទី១២ ខែវិច្ឆិកា មិនបារម្ភពីអាមេរិកដំឡើងពន្ធទំនិញថៃក្នុងអត្រាខ្ពស់ ហើយអាមេរិកមិនអាចដាក់សម្ពាធលើថៃដោយសារការបញ្ចប់កិច្ចព្រមព្រៀងសន្តិភាពជាមួយកម្ពុជាទេ ដែលការនិយាយបែបនេះនឹងធ្វើឱ្យកម្ពុជាទទួលបានប្រយោជន៍ខ្លាំងបំផុត ។ ការនិយាយប៉ះពាល់អាមេរិកនឹងធ្វើឱ្យថៃបាត់បង់មិត្តជាប្រទេសមហាអំណាចនៅលើពិភពលោក ថែមទាំងជំរុញឱ្យកម្ពុជាមានទំនាក់ទំនងកាន់តែជិតស្និទ្ធជាមួយអាមេរិក ។

លើសពីនេះ ក្រៅពីបាត់បង់មិត្តជាប្រទេសមហាអំណាចលើពិភពលោកហើយ វានឹងប៉ះពាល់ដល់ជីវភាពពលរដ្ឋថៃផងដែរ ដោយសារអាមេរិកដំឡើងពន្ធទំនិញថៃក្នុងអត្រាខ្ពស់ ដែលបណ្តាលមកពីពាក្យសម្តីមិនពិចារណារបស់នាយករដ្ឋមន្ត្រីថៃ ។ បន្ទាប់ពីបង្ហាញអាកប្បកិរិយាមិនកោតខ្លាច និងប្រឆាំងជាមួយអាមេរិក តើនាយករដ្ឋមន្ត្រីថៃបានពិចារណា និងទទួលខុសត្រូវចំពោះពាក្យសម្តីរបស់ខ្លួនដែរឬទេ?

អតីតជំនួយការរដ្ឋមន្ត្រីការបរទេស លោក រ៉ាត់ ឆាលីចាន់ បន្តថា ថៃចាំបាច់ត្រូវការពារអធិបតេយ្យ ផ្តល់សុវត្ថិភាពឱ្យពលរដ្ឋ និងបង្កើនវិធានការកងទ័ពយ៉ាងតឹងរ៉ឹងដើម្បីចាត់ការកម្ពុជា ប៉ុន្តែការនិយាយប៉ះពាល់អាមេរិកដែលជាមិត្តនោះ តើនាយករដ្ឋមន្ត្រីថៃនិយាយដើម្បីអ្វី? តើថៃនឹងទទួលបានប្រយោជន៍ច្រើនជាងការខាតបង់ មែនទេ? ពាក្យសម្តីរបស់លោក Anutin ទាំងលើកមុន និងលើកនេះ មិនធ្វើឱ្យថៃទទួលបានប្រយោជន៍ឡើយ ប្រទេសដែលទទួលបានប្រយោជន៍ខ្លាំងបំផុតនាពេលនេះ គឺកម្ពុជា ។ វាគួរឱ្យបារម្ភណាស់ តើលោក Anutin មានគោលបំណងអ្វីឱ្យប្រាកដ?

គួរបញ្ជាក់ថា កាលពីថ្ងៃទី១២ ខែវិច្ឆិកា លោកនាយករដ្ឋមន្ត្រី Anutin បាននិយាយមិនកោតក្រែងអាមេរិក និងមិនចាប់អារម្មណ៍លោក Donald Trump ដំឡើងពន្ធទំនិញថៃដោយសារការបញ្ចប់កិច្ចព្រមព្រៀងសន្តិភាពជាមួយកម្ពុជា ដែលចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ នៅទីក្រុងកូឡាឡាំពួរ ប្រទេសម៉ាឡេស៊ី ក្រោមវត្តមានប្រធានាធិបតីអាមេរិក និងនាយករដ្ឋមន្ត្រីម៉ាឡេស៊ី លោក Anwar Ibrahim ។ ពាក្យសម្តីនេះធ្វើឱ្យមជ្ឈដ្ឋាននានាបារម្ភពីការបាត់បង់ប្រយោជន៍ ជាពិសេស បាត់បង់មិត្តជាប្រទេសមហាអំណាច នៅទីបំផុត ថៃនឹងក្លាយជាប្រទេសឯកកោដោយសារការឈ្លានពានកម្ពុជា ៕

ប្រទេសថៃ៖ សហរដ្ឋអាមេរិកទើបតែជំរុញឲ្យបន្តអនុវត្តតាមកិច្ចព្រមព្រៀងសន្តិភាពមិនទាន់បានប៉ុន្មានផង ពេលនេះថៃប្រកាសអួតក្ដែងៗថា យន្តហោះ F-16 បានត្រៀមរួចរាល់ហើយ ខណៈកងទ័ពអាកាសរក្សាការត្រៀមខ្លួន 24/7 ដើម្បីប្រយុទ្ធក្រោមហេតុផលការពារអធិបតេយ្យភាពជាតិ និងសុវត្ថិភាពរបស់ប្រជាជន។ នេះបើតាមការចុះផ្សាយរបស់សារព័ត៌មាន Khaosod។

នៅថ្ងៃទី 12 ខែវិច្ឆិកា ឆ្នាំ 2025 បន្ទាប់ពីបានធ្វើការត្រួតពិនិត្យការត្រៀមខ្លួននៅកងពលលេខ 1 ខេត្តនគររាជសីមា មេបញ្ជាការកងទ័ពអាកាសថៃ លោក រ៉ាវីន ថាណុមស៊ីង មេបញ្ជាការបញ្ជាការដ្ឋានត្រួតពិនិត្យប្រតិបត្តិការអាកាស (AOCC) បានធ្វើការប្រកាសថា យន្តហោះចម្បាំង F-16 បានត្រៀមលក្ខណៈរួចរាល់សម្រាប់ប្រតិបត្តិការហោះហើរ 24ម៉ោង ដោយនៅពេលនេះកងកម្លាំងទាំងអស់រង់ចាំតែការចេញបញ្ជាតែប៉ុណ្ណោះ។

សេចក្ដីថ្លែងការណ៍ខាងលើរបស់មេបញ្ជាការកងទ័ពអាកាសថៃ ត្រូវបានធ្វើឡើងស្របពេលដែលសហរដ្ឋអាមេរិក និងម៉ាឡេសុី កំពុងជំរុញឲ្យថៃបន្តគោរពនិងអនុវត្តតាមសេចក្ដីថ្លែងការណ៍រួមជាមួយកម្ពុជា ដើម្បីបញ្ឈប់អំពើហិង្សា និងរក្សាសន្តិភាពរយៈពេលវែងសម្រាប់ប្រទេសជិតខាងទាំងពីរ។

ក្រោយការប្រកាសរបស់នាយករដ្ឋមន្រ្តីថៃ លោក អនុទីន ក្នុងការបញ្ចប់សន្តិភាពទាំងស្រុងជាមួយនឹងកម្ពុជា និងលុបចោលកិច្ចព្រមព្រៀងនានា ព្រមទាំងផ្ដល់សិទ្ធិឲ្យអំណាចឲ្យយោធាក្នុងការដោះស្រាយជម្លោះ គេសង្កេតឃើញថា យោធាថៃកាន់តែបង្កើនសកម្មភាពក្អេងក្អាង ចង់ប្រើប្រាស់ច្បាប់ព្រៃដើម្បីគំរាមកំហែងកម្ពុជា ដោយមិនខ្វល់រាយការណ៍ ឬពិភាក្សាជាមួយភាគីណាទាំងអស់សូម្បីតែសហរដ្ឋអាមេរិក។

ទន្ទឹមនឹងនេះ សមាជិកសភា រួមទាំងគណបក្សប្រឆាំងរបស់ថៃ បាននាំគ្នាអំពាវនាវឱ្យលោកនាយករដ្ឋមន្ត្រីកាន់អំណាច អនុទីន ឆាន់វីរៈគុល ងាកមកប្រើការទូតវិញជាបន្ទាន់ ដើម្បីបញ្ឈប់ការគំរាមកំហែងដល់សន្តិភាពជាមួយកម្ពុជា ដោយព្រួយបារម្ភថាវិធានយោធានៅពេលនេះ នឹងលក់មុខថៃក្នុងឆាកអន្តរជាតិ និងធ្វើប្រទេសផ្សេងៗទៀតកាន់តែលែងទុកចិត្ត ព្រោះវាបង្ហាញថាថៃកំពុងអនុវត្តផ្ទុយពីគោលជំហររបស់ខ្លួននៅក្នុងកិច្ចព្រមព្រៀងដើម្បីសន្តិភាពកន្លងមក ។

ទោះជាយ៉ាងណាមកទល់ពេលនេះ រាជរដ្ឋាភិបាលកម្ពុជានៅតែប្ដេជ្ញាចិត្តអនុវត្តសេចក្ដីថ្លែងការណ៍រួមឲ្យទទួលបានប្រសិទ្ធភាពខ្ពស់បំផុត និងសូមអំពាវនាវឲ្យថៃបន្តចូលរួមសហការណ៍ ដើម្បីលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេសធានាដល់សន្តិសុខ និងសុវត្ថិភាពរបស់ប្រជាជនស៊ីវិល ស្របតាមកិច្ចព្រមព្រៀងសន្តិភាពដែលបានចុះហត្ថលេខានៅប្រទេសម៉ាឡេសុី កាលពីថ្ងៃទី២៦ ខែតុលា ឆ្នាំ២០២៥៕

ប្រទេសថៃ ៖ តាមការចុះផ្សាយរបស់សារព័ត៌មានថៃនៅថ្ងៃទី១២ ខែវិច្ឆិកា ឆ្នាំ២០២៥ ក្រោយពីនាយករដ្ឋមន្ត្រីថៃ លោក Anutin Charnvirakul បានប្រកាសបញ្ចប់កិច្ចព្រមព្រៀងសន្តិភាពដែលចុះហត្ថលេខានៅទីក្រុងកូឡាឡាំពួរ ប្រទេសម៉ាឡេស៊ី លោកក៏បញ្ជាឱ្យត្រៀមកម្លាំងទ័ពនៅតាមបណ្តោយព្រំដែនកម្ពុជា-ថៃដើម្បីការពារអធិបតេយ្យ និងបញ្ចប់ការចរចាជាមួយកម្ពុជា ។ នាយករដ្ឋមន្ត្រីថៃថែមទាំងចោទប្រកាន់កម្ពុជាបំពានកិច្ចព្រមព្រៀងសន្តិភាព ទើបថៃចាំបាច់ប្រើប្រាស់សិទ្ធិការពារខ្លួន និងមិនបារម្ភពីប្រធានាធិបតីអាមេរិក លោក Donald Trump ដំឡើងពន្ធទំនិញថៃ ។

នៅថ្ងៃទី១២ ខែវិច្ឆិកា លោកនាយករដ្ឋមន្ត្រី Anutin បាននិយាយពីស្ថានការណ៍ព្រំដែនកម្ពុជា-ថៃនាពេលនេះថា កិច្ចប្រជុំក្រុមប្រឹក្សាសន្តិសុខជាតិកាលពីថ្ងៃទី១១ ខែវិច្ឆិកា បានឯកភាពបញ្ចប់កិច្ចព្រមព្រៀងសន្តិភាព ដោយសារកម្ពុជាមិនគោរពកិច្ចព្រមព្រៀងនេះ ។ ថៃនឹងបញ្ចប់ការចរចាទាំងអស់ក្រោយពីកម្ពុជាមិនអនុវត្តតាម៤លក្ខខណ្ឌ ខណៈថៃអនុវត្តគ្រប់លក្ខខណ្ឌដើម្បីទទួលបានសន្តិភាពឆាប់ៗ ។

ប្រទេសថៃផ្តោតតែលើផលប្រយោជន៍ និងសុវត្ថិភាពពលរដ្ឋរបស់ខ្លួនប៉ុណ្ណោះ ហើយលោកពុំចាប់អារម្មណ៍នឹងអាមេរិកដំឡើងពន្ធទំនិញថៃខ្ពស់ទេ ។ ប្រសិនបើមិនអាចលក់ទំនិញទៅអាមេរិកបាន ថៃនឹងលក់ឱ្យប្រទេសផ្សេងវិញ អាមេរិកមិនអាចយកអត្រាពន្ធមកដាក់សម្ពាធទេ ។ ការបញ្ចប់កិច្ចព្រមព្រៀងសន្តិភាពជាមួយកម្ពុជា ក៏ពុំចាំបាច់រាយការណ៍ប្រាប់លោក Donald Trump ដែរ ពីព្រោះថៃជាប្រទេសឯករាជ្យ និងមានអធិបតេយ្យ ។

លោក Anutin បន្តថា ប្រទេសថៃបានត្រៀមខ្លួនគ្រប់ពេលវេលា ករណីលោក Trump ដំឡើងពន្ធទំនិញថៃដោយសារការបញ្ចប់កិច្ចព្រមព្រៀងសន្តិភាព ។ ថៃជាប្រទេសពឹងផ្អែកលើប្រាក់ចំណូលពីការនាំចេញទំនិញទៅក្រៅប្រទេសជាចម្បង ទើបត្រូវស្វែងរកទីផ្សារថ្មីសម្រាប់លក់ទំនិញជានិច្ច និងកែលម្អគុណភាពទំនិញដើម្បីបំពេញតម្រូវការអតិថិជនលើពិភពលោក យើងមិនយកបញ្ហាពន្ធធ្វើឱ្យចាញ់ប្រៀប ឬប៉ះពាល់អធិបតេយ្យដាច់ខាត ។

ចំណែកពលរដ្ឋថៃមួយចំនួនគាំទ្រឱ្យមានការប៉ះទង្គិចដោយអាវុធដើម្បីបញ្ចប់ជម្លោះឆាប់ៗ និងពលរដ្ឋខ្លះទៀតបារម្ភពីការប៉ះទង្គិចនោះ លោក Anutin ថា បានរៀបចំផែនការរួចហើយ ប៉ុន្តែរឿងសន្តិសុខ ការការពារប្រទេស មិនអាចនិយាយជាសាធារណៈទេ ។ រដ្ឋាភិបាលថៃបានដឹកនាំកិច្ចប្រជុំក្រុមប្រឹក្សាសន្តិសុខជាតិដើម្បីកំណត់វិធានការអនុវត្តឱ្យទទួលបានលទ្ធផលខ្ពស់ ការពារអធិបតេយ្យ និងសុវត្ថិភាពពលរដ្ឋ កងទ័ព បច្ចុប្បន្ន បានត្រៀមកម្លាំងទ័ពនៅតាមបណ្តោយព្រំដែនរួចរាល់ហើយ ។

ដោយឡែក អតីតនាយករដ្ឋមន្ត្រីថៃ លោក Abhisit Vejjajiva ដែលបច្ចុប្បន្ន ជាប្រធានគណបក្សប្រជាធិបតេយ្យ នៅថ្ងៃទី១២ ខែវិច្ឆិកា បានចោទប្រកាន់កម្ពុជាបំពានកិច្ចព្រមព្រៀងសន្តិភាពដោយការបង្កប់មីនថ្មី មិនមែនថៃទេ ហើយស្នើឱ្យពលរដ្ឋ និងសារព័ត៌មានថៃជួយគ្នាផ្សព្វផ្សាយទម្លាក់កំហុសលើកម្ពុជា ឬប្រាប់ទៅពិភពលោក ថាកម្ពុជាបំពានកិច្ចព្រមព្រៀង ។

នេះបញ្ជាក់ពីសន្តានរបស់ថៃដែលលុបចោលកិច្ចព្រមព្រៀងសន្តិភាពដោយខ្លួនឯង បែរជាមកចោទប្រកាន់កម្ពុជាជាអ្នកបំពានទៅវិញ ។ ថៃយកលេសការផ្ទុះមីនទម្លាក់កំហុសលើកម្ពុជារហូតមក ខណៈកម្ពុជាមិនដែលមានចិត្តបង្កជម្លោះ ឬបង្កប់មីនថ្មីដូចការចោទប្រកាន់ឡើយ កម្ពុជាមានតែប្រឹងប្រែងដោះមីននៅលើទឹកដីកម្ពុជា និងចង់មានសន្តិភាពជាមួយប្រទេសជិតខាង ។

ក្រសួងការពារជាតិកម្ពុជា សោកស្តាយចំពោះឧបទ្ទវហេតុការផ្ទុះមីនដែលបណ្តាលឱ្យកងទ័ពថៃមួយចំនួនរងរបួសពេលដើរល្បាតចូលតំបន់ចម្ការមីនចាស់ដែលបន្សល់ទុកពីសង្គ្រាមស៊ីវិលរបស់កម្ពុជា កាលពីថ្ងៃទី១០ ខែវិច្ឆិកា ឆ្នាំ២០២៥ និងបដិសេធការចោទប្រកាន់ទាំងនេះរបស់ភាគីថៃមកលើកម្ពុជា ។ តាំងពីក្លាយជារដ្ឋភាគីនៃអនុសញ្ញាអូតាវ៉ា កម្ពុជាប្រកាន់ខ្ជាប់នូវគោលការណ៍ និងកាតព្វកិច្ចរបស់ខ្លួននៅក្រោមច្បាប់អន្តរជាតិ ដោយមិនដែលដាក់មីនថ្មីគំរាមកំហែងសន្តិសុខ និងសុវត្ថិភាពមនុស្សជាតិឡើយ ។

ក្រសួងការពារកម្ពុជាបន្តប្តេជ្ញាចិត្តធ្វើការឱ្យបានជិតស្និទ្ធជាមួយភាគីថៃក្នុងការលើកកម្ពស់សន្តិភាព និងស្ថិរភាពរវាងប្រទេសទាំងពីរ ជាពិសេស ធានាដល់សន្តិសុខ និងសុវត្ថិភាពរបស់ប្រជាជនស៊ីវិល ស្របតាមសេចក្តីថ្លែងការណ៍រួមស្តីពីសន្តិភាពរវាងកម្ពុជានិងថៃ ដែលត្រូវបានចុះហត្ថលេខាកាលពីថ្ងៃទី២៦ ខែតុលា ឆ្នាំ២០២៥ ៕