មហាជនគ្រប់គ្នាច្បាស់ជាបានស្គាល់ជាមួយនឹង អ្នកគ្រប់គ្រង និងជា CEO របស់ Miss Grand International ដ៏លេចធ្លោមួយរូបលោក Nawath ជាជនជាតិថៃ។ តែអ្វីដែលធ្វើឱ្យមហាជនកាន់តែចាប់អារម្មណ៍នោះគឺលោកបានបង្ហោះបទចម្រៀងរបស់តារាចម្រៀងខ្មែរដ៏ល្បីលោកវណ្ណដាក្នុងបណ្ដាញIG ផ្ទាល់ខ្លួន។

នាថ្ងៃទី ៣ ខែវិច្ឆិការ ឆ្នាំ២០២២ នេះលោក Nawat ដែលជាអ្នកគ្រប់គ្រងកម្មវិធីដ៏ល្បី Miss Grand International ត្រូវបានមហាជនមានការចាប់អារម្មណ៍ជាខ្លាំងក្រោយពីរូបលោកក៏ជាអ្នកគាំទ្រតារាចម្រៀងខ្មែរវ័យក្មេងមួយរូបដ៏ល្បីលោក វណ្ណដា ក្រោយពី CEO របស់ Miss Grand ជនជាតិថៃម្នាក់នេះបានធ្វើការបង្ហោះ នៅក្នុង Story IG ផ្ទាល់ខ្លួនទាំងព្រឹក ​ពីបទចម្រៀងរបស់វណ្ណដា មានចំណងជើងថា “នារីជឿនលឿន”។

ការបង្ហោះនេះបានធ្វើឱ្យមហាជទាំងជនជាតិថៃ និងខ្មែរមានការភ្ញាក់ផ្អើល និងចាប់អារម្មណ៍ជាខ្លាំង ព្រោះលោកមិនដែល ស៊ែរ ឬក៏ផុសគាំទ្រជាមួយនឹងតារាចម្រៀងរូបណានោះទេ ដូច្នេះនេះបញ្ជាក់បានថាលោក Nawat គឺជាអ្នកគាំទ្រតារាចម្រៀងខ្មែរមួយរូបផងដែរ។

គួរបញ្ជាក់ផងដែរថាតារាចម្រៀងប្រុសវ័យក្មេងលោក វណ្ណដាបានក្លាយជាទីចំណាប់អារម្មណ៍អារម្មណ៍របស់មហាជនក្នុងស្រុក និងក្រៅស្រុក ជាពិសេសគឺអ្នកគាំទ្រនៅក្នុងប្រទេសថៃ ដែលតែងតែស្រឡាញ់ និងពេញចិត្តជាមួយនឹងទេពកោសល្យ។

ដោយក្នុងនោះ អ្នកគាំទ្រថៃ បានចាប់ទុកគុណតំលៃរបស់វណ្ណដាដែលសាងគឺមានអត្តន័យជ្រាលជ្រៅ វណ្ណដាជានិមិត្តរូបនៃភាពតស៊ូ អំនត់ ឈ្លាស់វៃ ថ្លៃថ្នូរ (ថៃប្រៀបធៀបនឹងតារារ៉ាប់ស្រុកថៃ) ពូកែ មានសមត្ថភាពឆ្នៃប្រឌិតខ្ពស់អាចបង្កើតអត្តសញ្ញាណដោយមានឯក្ខណៈរបស់ខ្លួន មិនមែនជាការចម្លងរបស់គេមកជារបស់ខ្លួន ជាពិសេសគឺការយករបស់ចាស់មកឆ្នៃជារបស់ថ្មីទំនើប និងការគោរពដឹងគុណ លើកតម្កើងគ្រូបាអាចារ្យក្នុងនាមជាតារារ៉ាប់”៕

អន្តរជាតិ៖ បន្ទាប់ពីការប្រកាសលាលែងពីតំណែងជាបន្តបន្ទាប់ពីអ្នកកាន់តំណែងធំៗក្នុងក្រុមហ៊ុនបណ្តាញផ្សព្វផ្សាយសង្គម Twitter ឥឡូវនេះទទួលបានដំណឹងបន្ថែមថា នាយកប្រតិបត្តិថ្មីលោក Elon Musk គ្រោងនឹងបញ្ឈប់បុគ្គលិក Twitter សរុបប្រមាណ ៣៧០០នាក់បន្ថែមទៀត។ នេះបើយោងតាមការចេញផ្សាយរបស់សារព័ត៌មាន Reuters នៅថ្ងៃទី០៣ ខែវិច្ឆិកា ឆ្នាំ២០២២។

ជុំវិញរបាយការណ៍នេះត្រូវបានគេរំពឹងថា គោលដៅរបស់ Musk នឹងចាប់ផ្តើមបញ្ឈប់បុគ្គលិក Twitter ដែលធ្លាប់ត្រូវបានអនុញ្ញាតឱ្យធ្វើការពីចម្ងាយ ក៏ដូចជាបុគ្គលិកដែលប្រចាំការនៅខាងក្រៅដែលជាអ្នកទទួលតួនាទីរាយការណ៍ទៅការិយាល័យ Twitter ទាំងក្នុង និងក្រៅទីក្រុង San Francisco នេះបើយោងតាមការចេញផ្សាយរបស់សារព័ត៌មាន Bloomberg។

ប្រភពពី CNBC ដដែលបានឱ្យដឹងទៀតថា ទាក់ទិននឹងការបញ្ឈប់បុគ្គលិកប្រមាណ ៣៧០០នាក់នេះមិនទាន់ទទួលបានការបញ្ជាក់ច្បាស់លាស់នោះទេ ខណៈម្ចាស់ Twitter ថ្មីលោក Musk គ្រោងនឹងជួបពិភាក្សាជាមួយទីប្រឹក្សារបស់លោកចំពោះការសម្រចចិត្តមួយនេះ។ យ៉ាងណាមិញក្នុងកិច្ចពិភាក្សានោះត្រូវបានគេឱ្យដឹងថា Musk គ្រោងអញ្ជើញមនុស្សជំនិតរួមមាន លោក David Oliver Sacks គឺជាសហគ្រិន និងជាអ្នកវិនិយោគនៅក្នុងក្រុមហ៊ុនបច្ចេកវិទ្យាអ៊ីនធឺណិត ប្រធានក្រុមហ៊ុន The Boring Company លោក Steve Davis រួមជាមួយនឹងលោក Sam Telle និង Antonio Gracias ដែលមកពីក្រុមហ៊ុនវិនិយោគ Valor Equity។

គួរបញ្ជាក់ដែរថា របាយការណ៍ខាងលើនេះទំនងជាត្រូវបានអនុវត្តទៅពិតមែន ដោយមុនពេលទិញយក Twitter បានសម្រេច Musk ធ្លាប់បានប្រកាសរួចទៅហើយថាលោកមានបំណងកាត់បន្ថយបុគ្គលិកនៅ Twitter ជិត ៧៥ភាគរយនៃបុគ្គលិកសរុបចំនួន ៧,៥០០នាក់ឯណោះ​ ៕

អន្តរជាតិ៖ អ្នកស្រាវជ្រាវបានព្យាករណ៍ថា ខ្ពង់រាបទីបេ (Qinghai-Tibet) នឹងរងផលប៉ះពាល់ដោយការរលាយនៃដីកក ដូចជាការដួលរលំ សំណឹក និងវាលខ្សាច់។

ការរលាយនៃ permafrost នៅលើខ្ពង់រាបទីបេ នៅហិម៉ាឡៃយ៉ាកើតឡើងពីរដងលឿនជាងមធ្យមភាគពិភពលោកក្នុងប៉ុន្មានទសវត្សរ៍ថ្មីៗនេះ ដែលគំរាមកំហែងដល់ស្ថិរភាពនៃហេដ្ឋារចនាសម្ព័ន្ធក្នុងស្រុក។ នេះបើយោង​តាម​ការ​ស្រាវ​ជ្រាវ​ដែល​បាន​ចេញ​ផ្សាយ​កាល​ពី​ខែ​តុលា​ក្នុង​ទស្សនាវដ្ដី Nature Communications Earth & Environment។ ការ​រលាយ​នេះ​នាំ​ឱ្យ​មាន​តម្រូវ​ការ​ក្នុង​ការ​ជួស​ជុល​និង​ជំនួស​ហេដ្ឋារចនាសម្ព័ន្ធ​កើនឡើង ការប៉ាន់ប្រមាណ៣៨ភាគរយ នៃផ្លូវថ្នល់ ៣៩ភាគរយ នៃផ្លូវរថភ្លើង និងបណ្តាញអគ្គិសនី ២១ភាគរយនៃអគារត្រូវបានគំរាមកំហែងដោយការរលាយទឹកកកនៅឆ្នាំ២០៥០ ។

ខ្ពង់រាបទីបេ មានផ្ទៃដីជាង២.៥លានគីឡូម៉ែត្រការ៉េ ប្រហែលប្រាំដងនៃផ្ទៃដីរបស់ប្រទេសបារាំង ដែលលាតសន្ធឹងពីភាគខាងលិចប្រទេសចិនទៅកាន់ប្រទេសប៉ាគីស្ថាន រួមទាំងផ្នែកខ្លះនៃប្រទេសនេប៉ាល់ ឥណ្ឌា ភាគខាងកើតតាហ្ស៊ីគីស្ថាន និងភាគខាងត្បូង Kyrgyzstan ។ នៅពេលដែលឥទ្ធិពលនៃការប្រែប្រួលអាកាសធាតុបង្កើនសីតុណ្ហភាពពិភពលោក ការសាយភាយជុំវិញពិភពលោកចាប់ផ្តើមរលាយក្នុងអត្រាយ៉ាងលឿន។ ដីមានលំនឹងតិច និងងាយស្រួលផ្លាស់ទី។ យោងតាមលោក Mathieu Morlighem សាស្ត្រាចារ្យផ្នែកវិទ្យាសាស្ត្រផែនដីនៅសាកលវិទ្យាល័យកាលីហ្វ័រញ៉ា ឡូសអេនជឺលេស បាននិយាយថា កន្លែងជាច្រើនបានជួបប្រទះនឹងការដួលរលំដ៏ធំ បង្កើតជារណ្ដៅនៅលើផ្ទៃផ្លូវ ប៉ះពាល់ដល់អាកាសយានដ្ឋាន ផ្លូវរថភ្លើង បំពង់បង្ហូរប្រេង និងសូម្បីតែផ្ទះ។

នៅចុងបញ្ចប់នៃដំណើរការរលាយ ការបាត់បង់ទឹកដីនឹងឈានដល់កម្រិតមួយដែលបណ្តាលឱ្យបឹងស្ងួតយ៉ាងឆាប់រហ័ស។ ការសង្កេតតាមផ្កាយរណប និងការអង្កេតលើដីបង្ហាញថា និន្នាការនេះកំពុងលាតសន្ធឹងលើតំបន់ permafrost នៅអឌ្ឍគោលខាងជើង រួមទាំងខ្ពង់រាបទីបេផងដែរ។

ជាពិសេសនៅលើខ្ពង់រាបទីបេ ទឹកកកពីដីកក ផ្ទាំងទឹកកក និងបឹងទឹកសាបដែលមានកម្ពស់ខ្ពស់ហូរចូលទៅក្នុងទន្លេវែងបំផុតទាំងបីនៅអាស៊ី ដែលជាប្រភពទឹកសំខាន់សម្រាប់ប្រហែល ២០ភាគរយ នៃចំនួនប្រជាជនពិភពលោក។ សំណើមពីបឹង និងស្ទ្រីមខ្ពស់ក៏ជួយរក្សាប្រព័ន្ធអេកូឡូស៊ីនៃវាលស្មៅពាក់កណ្តាលស្ងួតផងដែរ។ ប្រសិនបើដីកក និងផ្ទាំងទឹកកកនៅតែបន្តរលាយ នោះទន្លេនៅទូទាំងខ្ពង់រាបនឹងចាប់ផ្តើមរីងស្ងួត ដែលរួមចំណែកដល់ការហូរច្រោះដី និងចុងក្រោយក្លាយជាវាលខ្សាច់ដែលអាចកាត់បន្ថយទឹកភ្លៀង និងព្រិលធ្លាក់ ដែលនាំឱ្យការផ្គត់ផ្គង់ទឹកធ្លាក់ចុះយ៉ាងខ្លាំង ៕

សុខភាព៖ ជាតិស្ករច្រើនពេក គឺជាសត្រូវរបស់រាងកាយក្នុងការបន្ថែម ខ្លាញ់ក្រាស់នៅជុំវិញចង្កេះ ភ្លៅ ត្រគាកនិងបង្កើនហានិភ័យនៃជំងឺទឹកនោមផ្អែម ក៏ដូចជាជំងឺគ្រោះថ្នាក់ផ្សេងៗទៀត។

បន្ថែមពីនោះមានមនុស្សជាយល់ឃើញថាជាតិស្ករក៏ជាសត្រូវនៃភាពស្រស់ស្អាតផងដែរ ព្រោះវាពិតជាធ្វើឱ្យយើងមើលទៅចាស់ជាងមុនមែនទេ?

ទាក់ទងនឹងការទទួលទានជាតិស្ករច្រើនលើសកម្រិត ទិន្នន័យពីរដ្ឋបាលចំណីអាហារ និងឱសថ (FDA) បានបង្ហាញថា ស្ករគឺជាសារធាតុដ៏ពេញនិយមដែលប្រើក្នុងអាហារ និងភេសជ្ជៈ ក្នុងនោះវាមិនត្រឹមតែបង្កើនហានិភ័យនៃជំងឺរ៉ាំរ៉ៃដូចជា ធាត់ ទឹកនោមផ្អែម និងជំងឺសរសៃឈាមបេះដូងប៉ុណ្ណោះទេ ប៉ុន្តែវាក៏ត្រូវបានផ្សារភ្ជាប់ជាមួយនឹងភាពចាស់ និងភាពចាស់មុនអាយុផងដែរ។

ស្ករដែលប្រើប្រាស់នឹងត្រូវបំបែកទៅជាឯកតាតូចៗ ហើយស្រូបចូលទៅក្នុងចរន្តឈាមយ៉ាងឆាប់រហ័សោយ ដជាតិស្ករក្នុងឈាមទាំងនេះអាចភ្ជាប់ទៅនឹងប្រូតេអ៊ីន Elastin និង Collagen  ដែលការបង្កើតសមាសធាតុហៅថា Advanced glycation end products ឬ AGEs  នាំឱ្យមានការថយចុះនៃប្រូតេអ៊ីន Elastin និង Collagen ក៏ដូចជាកាត់បន្ថយការបត់បែននៃស្បែក ព្រមទាំងធ្វើឱ្យមានការយារធ្លាក់ស្បែកផងដែរ។

មិនតែប៉ុណ្ណោះជាទូទៅនៅពេលដែលយើងកាន់តែចាស់ការប្រមូលផ្តុំសារធាតុ AGEs នៅក្នុងស្បែកក៏កើនឡើងផងដែរ ប៉ុន្តែប្រសិនបើយើងទទួលទានអាហារដែលមានជាតិស្ករខ្ពស់ នោះវារិតតែអាចជំរុញដំណើរការបែបនេះឱ្យកើតឡើងលឿន និងច្រើនទៀតខុសពីធម្មតា ដែលបណ្តាលឱ្យមានស្នាមជ្រីវជ្រួញ និងឆាប់ចាស់មុនអាយុ។

ដូច្នេះគួរលោកអ្នកគួរទទួលទានជាតិស្ករក្នុងបរិមាណត្រឹមត្រូវ ដោយអង្គការសុខភាពពិភពលោកបានណែនាំថា បរិមាណស្ករដែលអ្នកគួរទទួលទានគឺមិនលើសពី ៦ ស្លាបព្រាក្នុងមួយថ្ងៃនោះទេ។

វិធីងាយៗដើម្បីកាត់បន្ថយការប្រើប្រាស់ស្ករ

១. កាត់បន្ថយការទទួលទានភេសជ្ជៈដែលមានជាតិស្ករច្រើន ដូចជា តែ កាហ្វេដែលមានជាតិស្ករ សូកូឡា កាកាវ ទឹកដោះគោក្រឡុក តែទឹកដោះគោ ភេសជ្ជៈផ្អែមផ្សេងៗ រួមទាំងទឹកផ្លែឈើផងដែរ។

២. កាត់បន្ថយការទទួលទានអាហារសម្រន់ ដូចជានំផ្អែម ដែលមានជាតិស្ករខ្ពស់។

៣. គួរទទួលទានផ្លែឈើ និងបន្លែឱ្យបានច្រើន ប៉ុន្តែត្រូវប្រយ័ត្នចំពោះផ្លែឈើដែលមានជាតិស្ករខ្ពស់ មិនគួរទទួលទានច្រើនពេកទេ ដូចជា ស្វាយទុំ ធុរេន សាវម៉ាវ ខ្នុរ ផ្លែទាប និង មៀនជាដើម៕ ប្រភព៖ Sanook

រដ្ឋធានីសេអ៊ូល៖ ការធ្វើសមយុទ្ធទ័ពអាកាសទ្រង់ទ្រាយធំ រវាងកងទ័ពសហរដ្ឋអាមេរិក និង កូរ៉េខាងត្បូង ធ្វើឲ្យក្រុងព្យុងយ៉ាង ចាត់ទុកជាការហាត់សម ដើម្បីឈ្លានពាន ទើបកូរ៉េខាងជើង បន្ដបាញ់មីស៊ីលជាច្រើនគ្រាប់ សង័្សយ ជាមីស៊ីលអន្ដរទ្វីប (ICBM) ធ្វើឲ្យរដ្ឋាផិបាលជប៉ុន ប្រកាសអាសន្ន ដល់ប្រជាជន នៅតាមតំបន់ជាច្រើនឲ្យស្វែងរកទីមានសុវត្ថិភាព។

សារព័ត៌មានឥណ្ឌា Prothomalo បានចេញផ្សាយ កាលពីព្រឹក ថ្ងៃព្រហស្បតិ៍ ទី៣ ខែវិច្ឆិកា ថា កូរ៉េខាងជើង បានបាញ់មីស៊ីលបាលិស្ទីកចម្រុះ រួមជាមួយនឹងមីស៊ីល ដែលគេសង័្សយ ជាមីស៊ីលបាលិស្ទីកអន្ដរទ្វីប (ICBM) ផងដែរ។ សកម្មភាពយោធារបស់ក្រុងព្យុងយ៉ាង បានបង្ខំឲ្យរដ្ឋាភិបាលជប៉ុន ចេញសញ្ញាប្រកាសអាសន្ន ជម្លៀសប្រជាជន នៅតំបន់ភាគខាងជើង និង ភាគកណ្ដាល ប្រទេសអាស៊ីបូព៌ាមួយនេះ។

ការិយាល័យរបស់នាយករដ្ឋមន្រ្ដីជប៉ុន លោក ហ្វូមីអូ គីស៊ីដា (Fumio Kishida) បានបញ្ចេញសំឡេងប្រកាសអាសន្នដល់ប្រជាជន នៅភាគខាងជើង និង កណ្តាល នៃខេត្តមីយ៉ាហ្គិ (Miyagi), យ៉ាម៉ាហ្កាតា (Yamagata) និង នីអ៊ីហ្គាតា (Niigata) ដោយណែនាំឲ្យពួកគេ ចូលទៅក្នុងអគារដ៏រឹងមាំ ឬ នៅក្រោមដី។ ចំណែកសេវាកម្មរថភ្លើង នៅក្នុងតំបន់ទាំងនោះ ត្រូវបានផ្អាកជាបណ្តោះអាសន្ន ក្រោយពេលមានការជូនដំណឹង អំពីការបាញ់មីស៊ីលរបស់កូរ៉េខាងជើង មុនពេលការបាញ់ភ្លាមៗ។

លោក ហ្វូមីអូ គីស៊ីដា (Fumio Kishida) នាយករដ្ឋមន្រ្ដីជប៉ុន បានថ្កោលទោសដល់ការបាញ់មីស៊ីលរបស់កូរ៉េខាងជើង។ លោកនាយករដ្ឋមន្រ្ដី បានបញ្ជាក់ ថា ក្រុមមន្រ្ដីជប៉ុន កំពុងតែវិភាគឲ្យបានល្អិតល្អន់ អំពីមីស៊ីលទាំងនោះ។

លោក យ៉ាស៊ូកាហ្ស៊ូ ហាម៉ាដា (Yasukazu Hamada) រដ្ឋមន្រ្ដីក្រសួងការពារជាតិជប៉ុន បានបញ្ជាក់ ថា មីស៊ីលនោះបានបាញ់ នៅវេលាម៉ោង៧ និង ៤០នាទីព្រឹក ថ្ងៃទី៣ ខែវិច្ឆិកា (វេលាក្នុងតំបន់។ មីស៊ីលនោះ បានបាត់ពីរ៉ាដា នៅលើសមុទ្រជប៉ុន។

លោករដ្ឋមន្រ្ដីក្រសួងការពារជាតិជប៉ុន បានប្រាប់ដល់ក្រុមអ្នកសារព័ត៌មាន ថា «យើងបានឃើញការបាញ់បង្ហោះមីស៊ីល បង្ហាញពីសក្ដានុពលហោះមកលើប្រទេសជប៉ុន។ ដូច្នេះហើយទើបជប៉ុនប្រកាសអាសន្ន ប៉ុន្តែបន្ទាប់ពីពិនិត្យមើលការហោះរបស់មីស៊ីលនោះ យើង បានបញ្ជាក់ ថា វាមិនបានឆ្លងកាត់ ពីលើប្រទេសជប៉ុន នោះឡើយ។ មីស៊ីលនោះ បានហោះដល់រយៈកម្ពស់ប្រហែល ២០០០គីឡូម៉ែត្រ និង រយៈចម្ងាយ៧៥០គីឡូម៉ែត្រ។

ការបាញ់មីស៊ីល កាលពីព្រឹក ថ្ងៃព្រហស្បតិ៍នេះ ជាការបាញ់សាកល្បងអាវុធជាបន្ដបន្ទាប់ចុងក្រោយរបស់កូរ៉េខាងជើង នៅក្នុងរយៈពេលប៉ុន្មានខែថ្មីៗនេះ ខណៈមានភាពតានតឹង កាន់តែខ្លាំងឡើង នៅក្នុងតំបន់។ ការបាញ់មីស៊ីលទាំងនេះ បានកើតឡើង រយៈពេលត្រឹមតែ១ថ្ងៃ ក្រោយពេលក្រុងព្យុងយ៉ាង បានបាញ់មីស៊ីល ជាង២០គ្រាប់ ត្រឹមតែរយៈពេល១ថ្ងៃប៉ុណ្ណោះ។

កងទ័ពកូរ៉េខាងត្បូង បានអះអាង ថា កូរ៉េខាងជើង កាលពីថ្ងៃពុធ បានបាញ់កាំភ្លើងធំ ចំនួន១០០គ្រាប់ ធ្លាក់ចូលទៅក្នុងតំបន់ទ្រនាប់ក្បែរខ្សែបន្ទាត់ព្រំដែនទឹក រវាងប្រទេសទាំងពីរ ត្រឹមតែរយៈពេលប៉ុន្មានម៉ោងប៉ុណ្ណោះ ក្រោយពេលក្រុងព្យុងយ៉ាង បានបាញ់សាកល្បងមីស៊ីលជាច្រើនប្រភេទប្រហែល១០គ្រាប់ ទៅកាន់តំបន់ភាគខាងកើត និង ខាងលិចប្រទេសកូរ៉េខាងជើង។ ប៉ុន្ដែក្នុងចំណោមមីស៊ីលទាំងនោះ មានមីស៊ីល១គ្រាប់ បានធ្លាក់នៅក្បែរដែនទឹករបស់កូរ៉េខាងត្បូង។

កូរ៉េខាងត្បូង កាលពីព្រឹក ថ្ងៃពុធ បានបាញ់មីស៊ីល ចំនួន៣គ្រាប់ ចេញពីយន្តហោះចម្បាំង ធ្លាក់នៅចំណុចមួយក្បែរខ្សែបន្ទាត់ NLL ដើម្បីជាការឆ្លើយតប ចំពោះការបាញ់សាកល្បងមីស៊ីលជាច្រើនប្រភេទ សរុប១០គ្រាប់ ពីកូរ៉េខាងជើង កាលពីប៉ុន្មានម៉ោងមុននោះ។ ចំណែកការបាញ់តេស្តមីស៊ីលរបស់ក្រុងព្យុងយ៉ាង គឺក្រុងសេអ៊ូល បានរកឃើញថា មានមីស៊ីល១គ្រាប់ បានធ្លាក់នៅក្បែរដែនទឹកកូរ៉េខាងត្បូង ជាលើកដំបូង។

ការធ្វើតេស្ដមីស៊ីលរបស់កូរ៉េខាងជើង បានកើតមានឡើង ក្រោយពេលក្រុងព្យុងយ៉ាង កាលពីថ្ងៃអង្គារ បានស្នើដល់សហរដ្ឋអាមេរិក និង កូរ៉េខាងត្បូង ត្រូវតែបញ្ឈប់ការធ្វើសមយុទ្ធទ័ពអាកសទ្រង់ទ្រាយធំរបស់ពួកគេ។ កូរ៉េខាងជើង បានចាត់ទុកសកម្មភាពបែបនេះ ជាទង្វើបង្កហេតុ នឹងជំរុញឱ្យមានការចាត់វិធានការឆ្លើយតប ពីក្រុងព្យុងយ៉ាង។ សហរដ្ឋអាមេរិក និងកូរ៉េខាងត្បូង បាននិងកំពុងធ្វើសមយុទ្ធទ័ពអាកាសរួមគ្នា ដោយមានការចូលរួមពីយន្ដហោះចម្បាំងសរុបជាង ២៤០គ្រឿង ហើយនឹងត្រូវបិទបញ្ចប់ នៅថ្ងៃសុក្រ ចុងសប្ដាហ៍នេះ។

ស្របពេលមានភាពតានតឹង នៅក្នុងតំបន់នោះ នាវាផ្ទុកយន្ដហោះរបស់សហរដ្ឋអាមេរិក ដើរដោយថាមពលនុយក្លេអ៊ែរ USS Ronald Reagan កាលពីដើមខែតុលា កន្លងទៅនេះ ក៏បានទៅចូលរួម ធ្វើសមយុទ្ធយោធា នៅលើដែនទឹករបស់កូរ៉េខាងត្បូង ផងដែរ។ ការធ្វើសមយុទ្ធយោធារបស់សហរដ្ឋអាមេរិក និង សម្ពន្ធមិត្ត នៅអាស៊ីបូព៌ា ជាញឹកញាប់នេះ បានកើតឡើង ចំពេលកូរ៉េខាងជើង បាញ់ផ្លោងមីស៊ីល ជាញឹកញាប់ បង្កអសន្ដិសុខ និង ស្ថិរភាព នៅក្នុងតំបន់ និង សហគមន៍អន្ដរជាតិ៕