ភ្នំពេញ៖ កម្ពុជាបានឈ្នះក្តីលើបណ្តឹងតវ៉ា ចំពោះសេចក្តីសម្រេចរបស់គណៈកម្មការអឺរ៉ុប ដែលបានដកហូតការអនុគ្រោះពន្ធ សម្រាប់ការនាំចូលអង្ករគ្រាប់វែង (Indica Rice) ពីកម្ពុជាទៅកាន់សហភាពអឺរ៉ុប។ នេះបើតាមសេចក្តីប្រកាសព័ត៌មាន របស់សហព័ន្ធស្រូវអង្ករកម្ពុជា។

សហព័ន្ធស្រូវអង្ករកម្ពុជាបានបញ្ជាក់ឲ្យដឹងថា នៅដើមខែវិច្ឆិកា ឆ្នាំ២០២២ ព្រះរាជាណាចក្រកម្ពុជា បានឈ្នះក្តីក្នុងសំណុំរឿងលេខT-269/19 ដែលគណៈកម្មការអឺរ៉ុប បានដាក់វិធានការរឹតត្បិតការអនុគ្រោះពន្ធ សម្រាប់ការនាំចូលអង្ករពីកម្ពុជា ទៅកាន់សហភាពអឺរ៉ុប តាមបទប្បញ្ញត្តិអនុវត្តលេខ2019/76 ចុះថ្ងៃទី១៦ ខែមករា ឆ្នាំ២០១៩ (“បទប្បញ្ញត្តិអនុវត្ត”)។

សំណុំរឿងនេះ ត្រូវបានប្តឹងកាលពីថ្ងៃទី១០ ខែមេសា ឆ្នាំ២០១៩ ទៅកាន់តុលាការនៃសហភាពអឺរ៉ុប ដោយសហព័ន្ធស្រូវអង្ករកម្ពុជាដែលដឹកនាំដោយលោក សុខ ពុទ្ធិវុធ ជាមួយនឹងមេធាវីអន្តរជាតិ ក្នុងគោលបំណងរកយុត្តិធម៌ សម្រាប់ការនាំចេញអង្ករកម្ពុជា ទៅកាន់សហភាពអឺរ៉ុប ជាពិសេសអង្ករគ្រាប់វែង ដែលគណៈកម្មការអឺរ៉ុបបានដាក់ពន្ធពីលើ។

សាលក្រមចុះថ្ងៃទី៩ ខែវិច្ឆិកា ឆ្នាំ២០២២ របស់សាលាដំបូង (The General Court) នៃសហភាពអឺរ៉ុបបញ្ជាក់ថា ការដាក់ពន្ធរបស់គណៈកម្មការអឺរ៉ុប មកលើអង្ករគ្រាប់វែងរបស់កម្ពុជា នៅទីផ្សារសហភាពអឺរ៉ុប គឺជាវិធានការខុសច្បាប់ និងមិនមានភស្តុតាងគ្រប់គ្រាន់។

ជោគជ័យនៃការឈ្នះក្តីនេះ គឺជាការឆ្លុះបញ្ចាំងពីភាពត្រឹមត្រូវ នៃការអភិវឌ្ឍវិស័យស្រូវអង្ករកម្ពុជា ក្រោមគោលនយោបាយអភិវឌ្ឍន៍ច្បាស់លាស់ របស់រាជរដ្ឋាភិបាលកម្ពុជា ដែលដឹកនាំដោយ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។

សម្រាប់ព័ត៌មានបន្ថែម អំពីសាលក្រមតុលាការ សូមស្វែងរកនៅលើគេហទំព័រ https://curia.europa.eu ផ្លូវការរបស់តុលាការនៃសហភាពអឺរ៉ុប។

សូមបញ្ជាក់ថា សហភាពអឺរ៉ុប បានសម្រេចយកពន្ធអង្ករដែលនាំចូលពីប្រទេសកម្ពុជា សម្រាប់រយៈពេល៣ឆ្នាំ ដោយចាប់ផ្តើមអនុវត្តចាប់ពីថ្ងៃទី១៨ ខែមករា ឆ្នាំ២០១៩តទៅ ដោយឆ្នាំដំបូង ឆ្នាំ២០១៩ តម្លៃពន្ធមានចំនួន១៧៥អឺរ៉ូ (ប្រហែល២០០ដុល្លារ) ក្នុង១តោន, ឆ្នាំទី២ គឺឆ្នាំ២០២០ តម្លៃ១៥០អឺរ៉ូ (ប្រហែល១៧០ដុល្លារ) ក្នុង១តោន និងឆ្នាំទី៣ ឆ្នាំ២០២១ តម្លៃ១២៥អឺរ៉ូ (ប្រហែល១៤២ដុល្លារ) ក្នុង១តោន។ ការសម្រេចយកពន្ធនេះ ធ្វើឡើងបន្ទាប់ពីមានការតវ៉ាពីសំណាក់ប្រទេសអ៉ីតាលី និងប្រទេសអេស្ប៉ាញ ដែលជាប្រទេសនាំចេញអង្ករទៅកាន់អឺរ៉ុប៕

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបញ្ជាក់ថា នៅឱកាសបុណ្យចូលឆ្នាំខ្មែរខាងមុខនេះ កម្ពុជានឹងធ្វើអង្គរសង្ក្រាន្តសារជាថ្មីឡើងវិញ។

សម្តេចតេជោ បានមានប្រសាសន៍បែបនេះ នៅល្ងាច ថ្ងៃទី៣០ ខែវិច្ឆិកា ឆ្នាំ២០២២ ខណៈអញ្ជើញបិទ ការប្រកួតកីឡាជាតិ លើកទី៣ និងកីឡាជនពិការជាតិ លើកទី១ នៅពហុកីឡដ្ឋាន ជាតិមរតកតេជោ។

សម្តេចតេជោ ហ៊ុន សែន បានអបអរសាទរដល់ជ័យលាភី ដែលបានខិតខំហ្វឹកហាត់ និងខិតខំប្រឹងប្រែងក្នុងការប្រកួត រហូតដល់ទទួលបានជ័យជំនះជាទីមោទនៈនេះ។

សម្តេចតេជោ បានយកឱកាសនេះ អបអរសាទរចំពោះការដាក់បញ្ចូលល្បែង «គុនល្បុក្កតោ» ក្នុងបញ្ជីតំណាងបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ។ នៅថ្ងៃនេះ សម្តេចតេជោ ហ៊ុន សែន

សម្តេចតេជោ ហ៊ុន សែន ថ្លែងថា ចាប់តាំងពីឆ្នាំ២០០៨ មកដល់ពេលនេះ កម្ពុជាបានបញ្ចូលជាបន្តបន្ទាប់នូវបេតិកភណ្ឌពិភពលោក ទាំងរូបិយ និងអរូបិយ ហើយនៅពេលខាងមុខកម្ពុជានឹងបញ្ចូលទ្រព្យសម្បត្តិដូនតាខ្មែរ ជាសម្បត្តិបេតិកភណ្ឌពិភពលោកបន្តបន្ទាប់ថែមទៀត។

សម្តេចតេជោបានថ្លែងថា សម្តេចពិតជាមានមោទនភាពចំពោះការរៀបចំពិធី និងដំណើរការនៃការប្រកួតដ៏ល្អនេះ ដែលបានទាក់ទាញអ្នកទស្សនាផ្ទាល់ជាង៤ម៉ឺននាក់ និងអ្នកទស្សនាតាមប្រព័ន្ធផ្សព្វផ្សាយសង្គមរាប់លាននាក់ផងដែរ។

សម្តេចតេជោសូមកោតសរសើរដល់ថ្នាក់ដឹកនាំ និងគណៈកម្មាធិការរៀបចំការប្រកួត ជាពិសេសសិល្បករ-សិល្បការិនី និងយោធិនបញ្ជាការដ្ឋាន- អង្គរក្សចំពោះកិច្ចខិតខំប្រឹងប្រែងហ្វឹកហាត់ និងការសម្ដែង ប្រកបដោយ ទេពកោសល្យ ដែលនេះបង្ហាញនូវកិច្ចសហការល្អ ក្នុងស្មារតីសាមគ្គីភាព និងការទទួលខុសត្រូវខ្ពស់ ។

ជាមួយគ្នានោញសម្តេចតេជោ ហ៊ុន សែន បានរំលឹកដល់ក្មួយៗកីឡាករ-កីឡាការិនីថា ការឈ្នះចាញ់ពីការប្រកួតកីឡា គឺជាមេរៀននិងបទពិសោធន៍ សម្រាប់ក្មួយៗ ក្នុងការពង្រឹងសមត្ថភាពរបស់ខ្លួនឱ្យកាន់តែប្រសើរ ដើម្បីលើកកម្ពស់ជំនាញវិជ្ជាជីវៈកីឡាបន្ថែមទៀត ។ ផ្ទុយទៅវិញ ការអាក់អន់ចិត្ត ឬ ការបាក់ទឹកចិត្តដោយសារការចាញ់ក្នុងការ ប្រកួតអាចធ្វើឱ្យក្មួយៗបាត់បង់នូវការតស៊ូនិងការខិតខំប្រឹងប្រែង បន្តដើម្បីយកឈ្នះក្នុងការប្រកួតនៅពេលអនាគត។ ចំពោះអ្នកឈ្នះត្រូវបន្តការខិតខំប្រឹងប្រែងបន្ថែមទៀត ដើម្បីរក្សាគុណផលកីឡារបស់ខ្លួនសម្រាប់ឈានដល់ការដណ្តើម បានជ័យជំនះជូនជាតិមាតុភូមិក្នុងការប្រកួតកម្រិតអន្តរជាតិ៕

សម្ដេច​តេជោ​នាយករដ្ឋមន្ត្រី ហ៊ុន សែន នឹង​ចូល​រួម​ជា​កីឡាករ​អុក​ចត្រង្គ​នៅ​ក្នុង​កម្មវិធី​កីឡា​ជាតិ​ឆ្នាំ២០២៤។ នេះ​បើ​តាម​ការ​ប្រកាស​របស់​លោក​នៅ​ក្នុង​ល្ងាច​ថ្ងៃ​ពុធ​នេះ។

ថ្លែង​នៅ​ក្នុង​កម្មវិធី​បិទ​កីឡា​ជាតិ​នៅ​ពេល​អម្បាញ់មិញ​នេះ សម្ដេច​បាន​ស្នើ​ឱ្យ​គណៈកម្មាធិការ​រៀបចំ​ការ​ប្រកួត​ចុះ​ឈ្មោះ​សម្ដេច​ឱ្យ​ហើយ សម្រាប់​វិញ្ញាសា​កីឡា​លេង​អុក​ខ្មែរ​មួយ​នេះ។

សូម​ជម្រាប​ផង​ដែរ កីឡា​អុក​ចត្រង្គ​ជា​កីឡា​មួយ​ ក្នុង​ចំណោម​កីឡា​ដែល​សម្ដេច​ចូលចិត្ត​លេង​។ កន្លង​មក​ សម្ដេច​បាន​បង្ហោះ​រូបភាព​សម្ដេច​លេង​អុក​ជាមួយ​ដៃគូ​របស់​លោក៕

បន្ទាប់ពីអបអរចំពោះការដាក់បញ្ចូល «គុនល្បុក្កតោ» បានចុះ​បញ្ជី​សម្បត្តិបេតិកភណ្ឌពិភពលោក​ កម្ពុជា​មាន​សម្បត្តិ​បេតិកភណ្ឌ​ពិភពលោក​ នៅក្នុងខែ វិច្ឆិកា នេះក៏មានការដាក់បញ្ចូលសម្បត្តិវប្បធម៌ជាច្រើនទៀតបានចុះបញ្ចីរបស់អង្គការយូណេស្កូ។ តើអ្នកដឹងទេថាមានអ្វីខ្លះ?

1. ក្បាច់​គុន​ក្បុក្ក​តោ​ខ្មែរ​ត្រូវ​បាន​ចុះ​បញ្ជី​ជា​សម្បត្តិ​បេតិ​កភណ្ឌ​វប្បធម៌​អរូបី​នៃ​មនុស្ស​ជាតិ​របស់​អង្គការ​យូណេស្កូ​នៅ​ថ្ងៃ​ទី​២៩​វិច្ឆិកា​២០២២​ បន្ទាប់ពីមានការអនុម័តនៅ​ក្នុង​កិច្ច​ប្រជុំ​លើក​ទី ១៧​នៃកិច្ច​ប្រជុំ​គណៈកម្មាធិការ​អន្តរ​រដ្ឋាភិបាល​ដើម្បី​ការពារ​បេតិកភណ្ឌ​វប្បធម៌​របស់​អង្គការ​យូណេស្កូ​ដែល​ប្រារព្ធ​ឡើង​នៅទីក្រុង​រ៉ាបាត នៃ​ប្រទេស​ម៉ារុក​។
2. របាំ​ព្រះរាជ​ទ្រព្យ​បាន​ចុះបញ្ជី​ជា​សម្បត្តិ​បេតិកភណ្ឌ​អរូបី​នៃ​មនុស្សជាតិ នៅ​ថ្ងៃទី៧ ខែវិច្ឆិកា ឆ្នាំ២០០៣។ របាំ​ដែលមាន​វ័យ​ចំណាស់​របស់​ព្រះរាជាណាចក្រ​កម្ពុជា​មួយ​នេះ គឺជា​អ្នកថែរក្សា​ប្រពៃណី សិល្បៈ​នាដកម្ម​បុរាណ​ខ្មែរ និង​ជា​របាំ​ក្បាច់​ខ្មែរ​បុរាណ​មាន​កាយវិការ ទន់ភ្លន់ ទ្រង់​ខ្លួន​ចែងចាំង​ភ្លឺផ្លេកៗ គួរឱ្យ​ចង់​ទស្សនា។
3. ល្ខោនស្រមោល​ស្បែក​ធំ​នេះ​បាន​ចុះ​ជា​សម្បត្តិ​បេតិកភណ្ឌ​អរូបី​នៃ​មនុស្សជាតិ ចុះ​នៅ​ថ្ងៃទី ២៥ ខែវិច្ឆិកា ឆ្នាំ២០០៥។ ល្ខោនស្បែក​ធំ ជា​សិល្បៈ​បង្ហាញ​ពី​បួងសួង​បូជា ដែល​យក​ដំណើររឿង រាមកេរ្ដិ៍​មក​ពោល។ ល្ខោន​នេះ​គេ​សម្ដែង​នៅមុខ​ភ្លើង​គប់។
4. ចាប៉ីដងវែង​បាន​ចុះ​ជា​សម្បត្តិ​បេតិកភណ្ឌ​អរូបី​នៃ​មនុស្សជាតិ នៅ​ថ្ងៃទី៣០ ខែវិច្ឆិកា ឆ្នាំ២០១៦។ ចាប៉ីដងវែង ជា​ឧបករណ៍​ភ្លេងខ្មែរ​សម្រាប់​ប្រគំ​ក្នុង​វង់ភ្លេង​ការ​បុរាណ វង់​ហ្លួង​អារក្ស វង់ភ្លេង​មហោរី​ជាដើម និង​ប្រើ​ទោល សម្រាប់​លេង​កំដរ​ចម្រៀង​កំណាព្យ។
5. ល្ខោនខោលវត្តស្វាយអណ្តែត ត្រូវបានចុះក្នុងបញ្ជីបេតិកភណ្ឌវប្បធម៌អរូបី នៃមនុស្សជាតិ របស់អង្គការយូណេស្កូ នៅថ្ងៃទី ២៨ ខែវិច្ឆិកា ២០១៨៕

បរទេស៖ គិតត្រឹមពេលនេះ អាលីបាបា (Alibaba) ជាក្រុមហ៊ុនលក់ទំនិញតាមអនឡាញយក្សមួយរបស់ចិន និងជាក្រុមហ៊ុន​បច្ចេកវិទ្យាមួយលំដាប់ពិភពលោក។ ក្រោមស្នាដៃដឹកនាំរបស់កំពូលមហាសេដ្ឋីមាឌល្អិត ជែក ម៉ា (Jack Ma) បានធ្វើឱ្យ​ក្រុមហ៊ុន​មួយនេះដំណើរការ និងពង្រីកខ្លួនបានយ៉ាងទូលំទូលាយ ខណៈដែលមនុស្សគ្រប់គ្នាបានដឹងថា Alibaba បានកើតចេញពី​លុយត្រឹមតែ ៥០ម៉ឺនយ៉ន់។

តើ Alibaba ពិតជាពង្រីកខ្លួនក្លាយជាក្រុមហ៊ុនយក្សដោយសារតែលុយ ៥០ម៉ឺនយ៉ន់ មែនទេ?

នៅថ្ងៃទី២៨ ខែមិថុនា ឆ្នាំ ១៩៩៩ លោក Jack Ma និងមនុស្សស្និទ្ធស្នាល ១៨នាក់ផ្សេងទៀត បានរ៉ៃអង្គាសគ្នាបានប្រាក់ ៥០ម៉ឺនយ៉ន់ ដើម្បីបង្កើត​ក្រុមហ៊ុន Alibaba ឡើង ដែលវាជាគេហទំព័រលក់ទំនិញអនឡាញលក្ខខណ្ឌ B2B។ លោក Jack បានដឹងច្បាស់ថា លុយត្រឹម ៥០ម៉ឺនយ៉ន់ មិនអាចធ្វើឱ្យអាជីវកម្មមួយនេះដំណើរការទៅមុនបាននោះទេ ដូច្នេះហើយ​លោកក៏មានគម្រោងទៅស្នើសុំទុនវិនិយោគពីសំណាក់កំពូលក្រុមហ៊ុនមួយ។

យោងតាមការកំណត់ត្រាវិនិយោគរបស់ Alibaba បានឱ្យដឹងថា លោក Jack Ma បានទៅជួបខាង​ក្រុមហ៊ុនសូសបេង (Softbank) កាល​ពីអំឡុងខែតុលា ឆ្នាំ១៩៩៩ ពោលគឺប៉ុន្មានខែបន្ទាប់ពីដាក់ឱ្យដំណើរការគេហទំព័រ Alibaba។ ដោយក្នុងកិច្ចជំនួប​នោះ Softbank បានទម្លាក់ទុនខ្លះមកឱ្យ Jack Ma ដើម្បីពង្រីកអាជីវកម្ម ហើយនៅដើមឆ្នាំ ២០០០ Alibaba ក៏ទទួល​បាន​ទុនបន្ថែមទៀតពី គូលមែន សាច់ (Goldman Sachs) និង Softbank។ បើតាមការបញ្ជាក់ Alibaba ទទួលបានទុនសរុបចំនួន ២៥លានដុល្លារ​អាមេរិក​ពី Goldman Sachs និង Softbank ចន្លោះពីខែតុលា ឆ្នាំ១៩៩៩ ដល់ខែមករា ឆ្នាំ២០០០។

បីឆ្នាំក្រោយពីគេហទំព័រ Alibaba.com ដាក់ឱ្យដំណើរការ ទើប​ក្រុមហ៊ុនទទួលបានប្រាក់ចំណេញ ហើយនៅឆ្នាំ ២០០៣ លោក Jack Ma ចង់ពង្រីកសក្កដានុពលទៅកាន់ពិភពលោក ដោយបានបង្កើត​គេហទំព័រថ្មីមួយឡើងដែល​មានឈ្មោះ​ថា តាវបាវ (Taobao.com) ដែលវាជាប្រភេទ C2C និង អ៊ីខមមើស (E-commerce) ។ អ្វីដែលពិសេសជាងនេះគឺ Alibaba បានបង្កើត អាលីផេ (Alipay) ដែល​ជា​កម្មវិធីទូទាត់ប្រាក់តាមអនឡាញសម្រាប់ប្រើផ្ទាល់ខ្លួនថែមទៀតផង។

ស្របពេលដែល Taobao.com ដាក់ឱ្យដំណើរការមិនទាន់បានប៉ុន្មានផង ស្រាប់តែ អ៊ីបេ (eBay) ក្រុមហ៊ុនលក់ទំនិញយក្សមួយ​របស់អាមេរិក បានឈានជើងចូលទីផ្សារប្រទេសចិន និងបានស្នើសុំទិញ Taobao.com ប៉ុន្តែត្រូវបាន លោក Jack Ma ច្រានចោល ហើយ eBay ក៏ដកខ្លួនចេញពីទីផ្សារប្រទេសចិនវិញ ក្រោយពេល​អាជីវកម្ម​មិនអាចស្វែងរកប្រាក់ចំណេញបាន។

ត្បិតតែលោក Jack Ma បានច្រានចោលការស្នើសុំទិញ Taobao.com ពីសំណាក់ eBay ក្ដី ប៉ុន្តែ Alibaba គឺទទួលបានទុន​វិនិយោគបន្ថែមរហូតដល់ ១ពាន់លានដុល្លារអាមេរិកពីសំណាក់លោក ជឺរី យ៉ាង (Jerry Yang) សហស្ថាបនិក​ក្រុមហ៊ុន យ៉ាហ៊ូ (Yahoo) នៅឆ្នាំ២០០៥ ដោយទទួលបានចំណែកភាគហ៊ុនរហូតដល់ ៤០ភាគរយ។

បន្ទាប់ពីនេះ ក្រុមហ៊ុន Alibaba ក៏ទទួលបានទុនវិនិយោគជាច្រើនបន្ថែមទៀត និងមានការទិញលក់ភាគហ៊ុន​ចុះឡើង​ជា​បន្តបន្ទាប់ផងដែរ ខណៈដែលបច្ចុប្បន្ន SoftBank Group គឺជា​ម្ចាស់​ក្រុមហ៊ុន Alibaba ជាមួយនឹងការកាន់កាប់ចំណែក​ភាគហ៊ុន​ច្រើនជាងគេសរុបចំនួន ២៣,៩ភាគរយ។

គួរបញ្ជាក់ផងដែរថា នៅក្នុងឆ្នាំ ២០២២ ក្រុមហ៊ុន Alibaba រកចំណូលបានសរុបចំនួន ១៣៤,៥ពាន់លានដុល្លារអាមេរិក និងចំណេញសុទ្ធ ៧,៥ពាន់លានដុល្លារអាមេរិក ៕