បរទេស៖ អាជ្ញាធរឈីលីបានបញ្ជាឱ្យមានការស៊ើបអង្កេតជាបន្ទាន់មួយ បន្ទាប់ពីមេរោគរលាកថ្លើមប្រភេទ A ត្រូវបានគេរកឃើញនៅក្នុងផ្លែរ៉ាសប័ររី (Raspberries) ដែលនាំចេញទៅកាន់សហរដ្ឋអាមេរិក។

កាលពីពេលថ្មីៗនេះការធ្វើតេស្តរបស់រដ្ឋបាលចំណីអាហារ និងឱសថរបស់សហរដ្ឋអាមេរិក (FDA) បានរកឃើញវត្តមាននៃជំងឺរលាកថ្លើមប្រភេទ A នៅក្នុងម៉ាក James Farm ដែលបង្កកឡើងពីផ្លែឈើរ៉ាសប័ររី ដែលនាំចូលមកពីប្រទេសឈីលី មកកាន់អាមេរិកខាងត្បូង។

យោងតាម  FDA ក្រុមហ៊ុន Exportadora Copramar របស់ឈីលីកំពុងប្រមូលមកវិញនូវផ្លែរ៉ាសប័ររី ចំនួន ១,២៦០ ប្រអប់ ដែលត្រូវបានវេចខ្ចប់ក្នុងប្រអប់ក្រដាសកាតុងធ្វើជាកេសម៉ាក James Farm ហើយត្រូវបានលក់ផ្តាច់មុខនៅទីតាំងជាច្រើនកន្លែងក្នុងទីក្រុង New York។

យ៉ាងណាមិញនាយក SAG លោក Andrea Collado បានប្រាប់ថា សេវាកសិកម្ម និងបសុសត្វ (SAG) កំពុងបញ្ជាឱ្យធ្វើសវនកម្មរបស់ក្រុមហ៊ុន ដោយបន្ថែមថា ការស៊ើបអង្កេតអាចនាំឱ្យមានការដាក់ទណ្ឌកម្មចំពោះបញ្ហានៃជំងឺនេះ។

បន្ថែមពីនោះគេបាននិយាយថាញ្ហានេះអាចកើតឡើងដោយថាមេរោគអាចត្រូវបានឆ្លងទៅផ្លែរ៉ាសប័ររីនៅចំណុចផ្សេងៗ ក្នុងខ្សែសង្វាក់នៃការផ្គត់ផ្គង់ នេះរាប់បញ្ចូលទាំងកម្មករដែលអាចមានផ្ទុកមេរោគថ្លើម  ទឹកកខ្វក់ ឬផ្ទៃទំនាក់ទំនងអាហារដែលមានមេរោគជាដើម។

ទោះជាយ៉ាងណារដ្ឋមន្ត្រីក្រសួងកសិកម្មឈីលី លោក Esteban Valenzuela បាននិយាយថា នឹងមិនមានការបញ្ឈប់ ឬផ្អាកការនាំចូល និងការនាំចេញផ្លែ រ៉ាសប័ររី រវាងប្រទេសទាំងពីរឡើយ។ លុះត្រាតែរកឃើញនៃប្រភពចម្លងជំងឺជាក់លាក់ថាជាកំហុសអ្នកណា ដោយខាងមន្ត្រីពាក់ព័ន្ធកំពុងតែធ្វើការស៊ើបអង្កេតបន្ត៕ ប្រភព៖ cbs4indy

អន្តរជាតិ៖ ប្រមុខកងទ័ពកំពូលរបស់សហរដ្ឋអាមេរិក បានឱ្យដឹងកាលពីថ្ងៃអង្គារសប្តាហ៍នេះថា យោធាអាមេរិកកំពុងតែសិក្សា ទៅលើអត្រានៃការប្រើប្រាស់គ្រាប់សព្វាវុធផ្សេងៗ ក្នុងវិបត្តិសង្រ្គាមនៅអ៊ុយក្រែន ដើម្បីធានាថាមន្ទីរបញ្ចកោណ អាចគណនាបាន​​ត្រឹមត្រូវ នូវបរិមាណអាវុធដែលខ្លួននឹងត្រូវការ ក្នុងករណីដែលសង្រ្គាមឬជម្លោះផ្សេងៗទៀត កើតឡើងនាពេលអនាគត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី៧ ខែធ្នូ ឆ្នាំ២០២២។

ក្រុមមន្រ្តីប្រទេសលោកខាងលិចបានអះអាងថា រុស្ស៉ីបានចំណាយគ្រាប់សព្វាវុធប្រភេទសម្រាប់វាយប្រហារចំៗគោលដៅ អស់ចំនួនយ៉ាងច្រើនក្នុងសង្រ្គាមឈ្លានពានរបស់ខ្លួននៅអ៊ុយក្រែន ហើយឧស្សាហកម្មរបស់រុស្ស៉ី មិនមានសមត្ថភាពក្នុងការផលិត ប្រព័ន្ធសព្វាវុធនិងគ្រាប់គ្រប់ប្រភេទទាំងអស់នោះឡើយ ដោយសារតែទណ្ឌកម្មរបស់លោកខាងលិច។ ចំណែកខាងអ៊ុយក្រែនវិញ ដែលទទួលបានការបំពាក់សព្វាវុធពីក្រុមលោកខាងលិច ក៏កំពុងប្រើប្រាស់គ្រាប់រ៉ុក្កែតផ្លោងនិងកាំភ្លើងធំ ក៏ដូចជាគ្រាប់ប្រភេទ​ផ្សេងៗទៀត អស់ក្នុងល្បឿនយ៉ាងរហ័សខ្លាំងផងដែរ។

លោក ម៉ាក មីលី (Mark Milley) ប្រធានអគ្គសេនាធិការយោធាចម្រុះអាមេរិក បានប្រាប់ឱ្យដឹងយ៉ាងដូច្នេះថា «យើងកំពុងតែសិក្សាវិភាគ ដើម្បីធានាថាយើងអាចធ្វើការគណនាក៏ដូចជាប៉ាន់ប្រមាណត្រឹមត្រូវ សម្រាប់ផែនការសង្រ្គាមនិងផែនការបម្រុងនានា ដែលយើងមានសម្រាប់តំបន់ភូមិសាស្រ្តខុសៗជុំវិញពិភពលោក។ យើងនឹងត្រឡប់ទៅមើលផ្នែកឧស្សាហកម្ម ហើយចាត់វិធានការកែតម្រូវផ្សេងៗ ដើម្បីធានាថាយើងនឹងមានចំនួនអាវុធ ក្នុងបរិមាណសមស្រប សម្រាប់អ្វីដែលនឹងអាចកើតឡើងនាពេលខាងមុខ»។

កន្លងមក ទីក្រុងវ៉ាស៉ីនតោនធ្លាប់បានអះអាងថា កូរ៉េខាងជើងលួចផ្គអាត់ផ្គង់ជាសម្ងាត់ នូវគ្រាប់កាំភ្លើងធំនិងរ៉ុក្កែតផ្លោង ក្នុងចំនួនយ៉ាងច្រើនដល់រុស្ស៉ី សម្រាប់សង្រ្គាមនៅអ៊ុយក្រែន។ ម៉្យាងវិញទៀត រុស្ស៉ីក៏បានទិញដ្រូនពីអ៉ីរ៉ង់ដែលត្រូវបានប្រើប្រាស់ ដើម្បីវាយប្រហារទៅលើ ទីក្រុងនិងហេដ្ឋារចនាសម្ពន្ធថាមពល នៅអ៊ុយក្រែនផងដែរ៕

ប្រទេសថៃ៖ មានហេតុការណ៍ផ្ទុះគ្រាប់បែកមួយបានកើតឡើងនៅផ្លូវរថភ្លើងមួយកន្លែងក្នុងស្រុក Sadao ខេត្ត Songkhla ដែលបានសម្លាប់មនុស្សយ៉ាងហោចណាស់ ៣នាក់ និង ៤នាក់ទៀតរងរបួស បញ្ជូនទៅកាន់មន្ទីរពេទ្យ។

កាលពីថ្ងៃទី ៦ ខែធ្នូ ឆ្នាំ ២០២២ ត្រូវបានគេរាយការណ៍ថាការផ្ទុះគ្រាប់បែកលើកទីពីរបានកើតឡើងនៅលើផ្លូវរថភ្លើងនៃឃុំថាផូ ស្រុក Sadao ខេត្ត Songkhla ចម្ងាយត្រឹមតែ ៤០០ គីឡូម៉ែត្រពីកន្លែងផ្ទុះចាស់កាលពីថ្ងៃទី ៣ ខែធ្នូកន្លងទៅ។

ប្រភពដដែលបានរាយការណ៍មកថាមានអ្នកស្លាប់ចំនួន ៣ នាក់ ដែលជាជំនួយការអធិការស្រុកហាត យៃ និងបុគ្គលិក ក្បាលរថភ្លើងផងដែរ លើសពីនេះក៏មានអ្នករងរបួស៤នាក់ផ្សេងទៀត និងត្រូវបានបញ្ជូនទៅកាន់មន្ទីរពេទ្យក្បែរនោះ។

គួរបញ្ជាក់ថាហេតុការណ៍នេះបានកើតឡើងនៅវេលាម៉ោង ៦ និង ២០ នាទីព្រឹក ខណៈ មន្ត្រី ៧ នាក់បានចុះទៅ ប្រមូលបំណែក រថភ្លើងមកជួសជុលផ្លូវដែកដែល ត្រូវរងការខូចខាតកាលពីមុន។

ទោះជាយ៉ាងណាផ្នែក SRT បានសម្របសម្រួលដើម្បីស្នើសុំកិច្ចសហការជាមួយនឹងផ្នែកសន្តិសុខ ដើម្បីប្រញាប់ចុះទៅពិនិត្យកន្លែងកើតហេតុរកនូវមូលហេតុនៃហេតុការណ៍បំផ្ទុះនេះ ព្រមទាំងបង្កើន ការរឹតបន្តឹងសន្តិសុខដល់បុគ្គលិកដែលបំពេញភារកិច្ចក្នុងតំបន់ ក៏ដូចជាអ្នកដំណើរដែលមកប្រើប្រាស់សេវាដើម្បីទទួលបានសុវត្ថិភាព និងទំនុកចិត្តខ្ពស់បំផុតក្នុងការធ្វើដំណើរ៕ ប្រភព៖ pptvhd36

រដ្ឋធានីកៀវ៖ ស្របពេលសង្គ្រាម វាយប្រយុទ្ធគ្នា រវាងកងទ័ពការពារទឹកដីរបស់ក្រុងកៀវ និង កម្លាំងទាហានរុស្ស៊ី មានសភាពសាហាវខ្លាំងបំផុត ចាប់តាំងពីសង្គ្រាមលោកលើកទី២មក ខណៈភាគីជម្លោះ បាន និង កំពុងតែបន្ដបាញ់ផ្លោងស្រោចដាក់គ្នាទៅវិញទៅមក អស់រាប់ម៉ឺនគ្រាប់ ក្នុង១សប្ដាហ៍ៗ ទើបបណ្ដាប្រទេសជាសម្ពន្ធមិត្តលោកខាងលិច បង្កើនការបញ្ជូនគ្រឿងសឹក យកទៅផ្គត់ផ្គង់ រហូតខ្សោះស្ទើរអស់ពីឃ្លាំង រហូតធ្វើឲ្យក្រុមផលិតអាវុធដ៏ធំបំផុតមួយ ដកដង្ហើមធំ ហើយសុំពេលវេលា ចន្លោះពី១០ ទៅ១៥ឆ្នាំ ទើបអាចបំពេញឃ្លាំងស្ដុកអាវុធរបស់បស្ចិលោក ឡើងវិញបាន។

សារព័ត៌មាន Al Jazeeera បានចេញផ្សាយ កាលពីថ្ងៃទី៧ ខែធ្នូ ថា លោក មីឆាល ស្ដ្រណាដ (Michal Strnad ) ជាសហគ្រិនជនជាតិឆែក ហើយជាម្ចាស់ក្រុមហ៊ុនផលិតគ្រឿងសព្វាវុធដ៏ធំបំផុតមួយ នៅតំបន់អឺរ៉ុប បានថ្លែង ថា ក្រុមហ៊ុនឆែកចូស្លូវ៉ាក់ គ្រូប (Czechoslovak Group) របស់គាត់ នឹងត្រូវចំណាយពេលវេលា ចន្លោះពី១០ទៅ១៥ឆ្នាំ ដើម្បីបំពេញស្ដុកគ្រឿងសព្វាវុធរបស់លោកខាងលិច ក្រោយពេលពួកគេ បាន និង កំពុងតែបន្ដបញ្ជូនគ្រឿងយុទ្ធោបករណ៍ទាំងនោះ ទៅជួយដល់កងទ័ពអ៊ុយក្រែន ដែលកំពុងតែធ្វើសង្គ្រាមការពារទឹកដី និង សេរីភាពរបស់ពួកគេ។

លោកប្រធានក្រុមហ៊ុន រូបនេះ បានបន្ដ ថា ឥឡូវ កងទ័ពការពារទឹកដីរបស់អ៊ុយក្រែន កំពុងតែប្រឈមមុខនឹងការខ្វះខាតគ្រាប់រំសេវ។ ស្របគ្នានេះដែរ បណ្ដារដ្ឋាភិបាលបស្ចិមលោក ក៏កំពុងតែខ្សោះគ្រាប់ ចេញពីឃ្លាំងស្ដុកអាវុធរបស់ពួកគេផងដែរ ខណៈសមត្ថភាពផលិតគ្រឿងសឹក នៅមានកម្រិតនៅឡើយ។

ម្ចាស់ក្រុមហ៊ុនឆែកចូស្លូវ៉ាក់ គ្រូប បានប្រាប់ដល់ទីភ្នាក់ងារសារព័ត៌មានរបស់ចក្រភពអង់គ្លេស Reuters ថា បច្ចុប្បន្ននេះ ក្រុមហ៊ុនរបស់គាត់ មានសមត្ថភាពផលិត បានត្រឹមតែ ប្រហែល២៥ ទៅ៣០ភាគរយ នៃតម្រូវការរបស់អឺរ៉ុប ដែលធ្វើឲ្យស្របតាមមាត្រដ្ឋាន ឬស្ដង់ដាររបស់អង្គការណាតូ សម្រាប់កាំភ្លើងផ្លោង ទំហំ១៥៥មិល្លីម៉ែត្រ។ ឥឡូវ ការផលិតគ្រាប់រំសេវ សម្រាប់កាំភ្លើងផ្លោងប្រភេទនេះ មានការខ្វះខាតកម្លាំងពលកម្មខ្លាំងណាស់។

លោក មីឆាល ស្ដ្រណាដ (Michal Strnad ) បានបញ្ជាក់ ថា រដ្ឋាភិបាល នៅតំបន់អឺរ៉ុប បានបង្ហូរគ្រឿងសព្វាវុធ ចេញពីឃ្លាំងស្ដុកអាវុធរបស់ពួកគេ នាំទៅជួយដល់ប្រទេសអ៊ុយក្រែន នៅក្នុងការធ្វើសង្គ្រាម ប្រឆាំងនឹងការលុកលុយរបស់រុស្ស៊ី។ ជាមួយគ្នានេះ កងទ័ពអ៊ុយក្រែន បានបាញ់គ្រាប់ ចេញពីកាំភ្លើងផ្លោង ហូវីតហ្ស៊ើរ រាប់រយគ្រឿង ដែលផ្គង់ផ្គង់ ដោយលោកខាងលិច ក្នុងមួយសប្ដាហ៍ៗ មានចំនួន រហូតដល់ ៤០ ០០០គ្រាប់។

លោកប្រធានក្រុមហ៊ុន បានសង្កត់ធ្ងន់ ថា «បើស្ថិតក្នុងស្ថានភាពបែបនេះ ខ្ញុំបានប៉ាន់ប្រមាណ ថា ក្រុមហ៊ុនរបស់ខ្ញុំ ក៏នឹងត្រូវការចំណាយពេលវេលា ចន្លោះពី១០ទៅ១៥ឆ្នាំ ដើម្បីផលិតគ្រាប់រំសេវ បំពេញឃ្លាំងស្ដុកគ្រឿងសព្វាវុធរបស់កងទ័ពលោកខាងលិច នៅក្នុងអំឡុងពេលមានសង្គ្រាម នៅអ៊ុយក្រែន នាពេលនេះ»៕