អន្តរជាតិ៖ ក្រុមជម្រើសជាតិអាហ្សង់ទីន បានក្លាយជាម្ចាស់ជើងឯក FIFA World Cup 2022 នៅប្រទេសកាតា ក្រោយឈ្នះបារាំង ដោយបាល់ប៉េណាល់ទីកាត់សេចក្តី ៤ទល់២ បន្ទាប់ពីស្មើគ្នា ៣-៣ ក្នុងម៉ោងធម្មតា៩០នាទី និងម៉ោងបន្ថែម១៥នាទី២ដង នៅកីឡដ្ឋាន Lusail ទីក្រុងដូហា ក្រោមក្រសែរភ្នែកអ្នកគាំទ្រជិត៩ម៉ឺននាក់។

ខាងក្រោមនេះជាចំនួនទឹកប្រាក់ដែលក្រុមនីមួយៗទទួលបាន៖

ម្ចាស់ជើងឯក៖ អាហ្សង់ទីន ទទួលបាន ៤២ លានដុល្លារ
ជើងឯករង៖ បារាំង ទទួលបាន ៣០ លានដុល្លារ
ចំណាត់ថ្នាក់លេខ៣៖ ក្រូអាត ទទួលបាន ២៧ លានដុល្លារ
ចំណាត់ថ្នាក់ទី៤៖ ម៉ារ៉ុក ទទួលបាន ២៥ លានដុល្លារ

វគ្គ៨ក្រុមចុងក្រោយ៖ ហូឡង់, ប្រេស៊ីល, ព័រទុយហ្គាល់ និងអង់គ្លេស ទទួលបាន ១៧ លានដុល្លារ
វគ្គ១៦ក្រុមចុងក្រោយ៖ សហរដ្ឋអាមេរិក, អូស្ត្រាលី, ប៉ូឡូញ, សេណេហ្គាល់, ជប៉ុន, កូរ៉េខាងត្បូង, អេស្ប៉ាញ និងស្វីស ទទួលបាន ១៤ លានដុល្លារ
វគ្គចែកពូល៖ អេក្វាឌ័រ, កាតា, អ៊ីរ៉ង់, វេលស៍, ម៉ិកស៊ិក, អារ៉ាប៊ីសាអូឌីត, ទុយនេស៊ី, ដាណឺម៉ាក, អាឡឺម៉ង់, កូស្តារីកា, បែលហ្សិក, កាណាដា, កាមេរូន, ស៊ែប៊ី, អ៊ុយរូហ្គាយ, និងហ្គាណា ទទួលបាន ៩ លានដុល្លារ។

គួរបញ្ជាក់ឱ្យដឹងផងដែរថា ម្ចាស់ជើងឯក World Cup 2022 នឹងទទួលបានប្រាក់រង្វាន់ចំនួន 42 លានដុល្លារ កើនឡើង 4 លានដុល្លារបើធៀបនឹងកាលពី 4 ឆ្នាំមុននៅក្នុងប្រទេសរុស្ស៊ី ៕

ប្រទេសចិន៖ ពិតជាឆ្លាតខ្លាំងណាស់ វេជ្ជបណ្ឌិតនៅឯមន្ទីរពេទ្យជាច្រើនកន្លែងក្នុងប្រទេសចិនបានសម្រេចចិត្តយក “មនុស្សយន្តឆ្លាតវៃ” សម្រាប់ជួយសម្រាលបន្ទុកក្នុងការវះកាត់លើអ្នកជំងឺដែលមានជំងឺឆ្អឹងផ្សេងៗ។

កាលពីថ្ងៃទី ១៧ ខែធ្នូ ឆ្នាំ២០២២ កន្លងទៅនេះទីភ្នាក់ងារ Xinhua បានរាយការណ៍ពីទីក្រុង Dalian ប្រទេសចិន បង្ហាញពីមន្ទីរពេទ្យជាច្រើនក្នុងប្រទេសចិនកំពុងតែប្រើប្រាស់ការវះកាត់ដោយយកមនុស្សយន្តអភិវឌ្ឍនៅក្នុងប្រទេសជាជំនួយក្នុងការវះកាត់ឆ្អឹង ដូចជាមន្ទីរពេទ្យ “ប្រជាជនទី២” នៅដាលីន ក្នុងខេត្ត Liaoning ភាគឦសាននៃប្រទេសចិនជាដើម។

ក្នុងនោះក្រុមវេជ្ជសាស្រ្តបាននិយាយថាការអនុវត្តដោយយកមនុស្សយន្តជាជំនួយវះកាត់ជំងឺឆ្អឹងខាងលើ គឺបានអនុវត្តចាប់តាំងពី ឆ្នាំ ២០២០មកម្លេះ ដោយមនុស្សយន្តអាចធ្វើឱ្យប្រសើរឡើងនូវភាពត្រឹមត្រូវនៃការវះកាត់របស់វេជ្ជបណ្ឌិតកាន់តែប្រសើរឡើង។

យ៉ាងណាមិញលោកវេជ្ជបណ្ឌិត Qi Zhiming ប្រធានមន្ទីរពេទ្យ “ប្រជាជនទី២” បាននិយាយថា មនុស្សយន្តទាំងនេះគាំទ្រ និងជាផ្នែកមួយសម្រួលដល់ការងាររបស់ក្រុមគ្រូពេទ្យ ដោយមនុស្សយន្តវៃឆ្លាតនោះបានចូលរួមការវះកាត់ឆ្អឹងខ្នងជាង ៥០ដង ការវះកាត់ជង្គង់ ៤០ដង និងការវះកាត់ត្រគាកប្រហែល ១០ដងយ៉ាងជោគជ័យ។

ហើយក្រុមគ្រូពេទ្យបន្ថែមថា ពួកគេពិតជាមានទំនុកចិត្ត លើកិច្ចខិតខំប្រឹងប្រែងរួមគ្នានឹងការអនុញ្ញាតឱ្យអនុវត្តការវះកាត់ជាមួយមនុស្សយន្ត ហើយសង្ឃឹមថាវាជាអត្ថប្រយោជន៍សម្រាប់វេជ្ជសាស្រ្តនាពេលអនាគត៕ ប្រភព៖ Dailynews

អន្តរជាំតិ៖ នៅថ្ងៃសុក្រម្សិលមិញនេះសហភាពអឺរ៉ុប (EU) បានធ្វើការព្រមានកំពូលមហាសេដ្ឋីលោក Elon Musk ជាមួយការដាក់ទណ្ឌកម្មមួយចំនួន បន្ទាប់ពី Twitter បានបានបិទគណនីរបស់អ្នកសារព័ត៌មានជាច្រើន ដោយក្នុងនោះមានអ្នកសារព័ត៌មានមកពីស្ថាប័ន CNN, New York Times និង Washington Post ជាដើម។ នេះបើយោងតាមការចេញផ្សាយរបស់សារព័ត៌មាន CNBC នៅថ្ងៃទី១៧ ខែធ្នូ ឆ្នាំ២០២២។

ប្រភពបានឱ្យដឹងថា Musk កំពុងស្ថិតនៅក្នុងបន្ទាត់ក្រហមរបស់សហភាពអឺរ៉ុប ដែលទំនងជាទទួលរងការដាក់ទណ្ឌកម្មឆាប់ៗខាងមុខនេះ។ យ៉ាងណាមិញបើយោងតាមច្បាប់សេវាកម្មឌីជីថលរបស់សហភាពអឺរ៉ុប ក្រុមហ៊ុន Twitter អាចនឹងត្រូវបានផាកពិន័យរហូតដល់ ៦ភាគរយឯណោះនៃប្រាក់ចំណូលប្រចាំឆ្នាំជាសកលរបស់ខ្លួនសម្រាប់ការបំពានសិទ្ធិអ្នកប្រើប្រាស់។

ជុំវិញបញ្ហានេះអ្នកស្រី Vera Jourova ដែលជាអនុប្រធានគណៈកម្មការអឺរ៉ុបទទួលបន្ទុកវាយតម្លៃ និងតម្លាភាពបាននិយាយនៅក្នុងការបង្ហោះសារនៅលើ Twitter ថាព័ត៌មាននៃ«ការបិទគណនីអ្នកសារព័ត៌មានតាមអំពើចិត្តនៅលើ Twitter របស់ Musk គឺគួរឱ្យព្រួយបារម្ភ»។ Jourova បានបន្តទៀតថា «ច្បាប់សេវាកម្មឌីជីថលរបស់សហភាពអឺរ៉ុបគឺទាមទារការគោរពសេរីភាពប្រេព័ន្ធផ្សព្វផ្សាយ និងសិទ្ធនិជាមូលដ្ឋាន» ហើយ «Elon Musk គួរតែដឹងអំពីរឿងនេះ ដែលនេះស្ថិតនៅក្រោមច្បាប់ #MediaFreedomAct របស់យើង»៕

រដ្ឋធានីកៀវ៖ កងទ័ពអ៊ុយក្រែន បានអះអាង អំពីទាហានរបស់រុស្ស៊ី បានស្លាប់ ចំនួន៥៩០នាក់ នៅលើសមរភូមិប្រយុទ្ធ នៅក្នុងរយៈពេល២៤ម៉ោងកន្លងមកនេះ ហើយតួលេខថ្មីនេះ បានធ្វើឲ្យក្រុងមូស្គូ បាត់បង់កម្លាំងទ័ព កើនឡើងដល់ជាង៩៨ ០០០នាក់ ចាប់តាំងពីការផ្ទុះសង្គ្រាមរហូតមកដល់ពេលនេះ។

ទីភ្នាក់ងារសារព័ត៌មាន Ukrinform បានចេញផ្សាយ កាលពីថ្ងៃចន្ទ ទី១៩ ខែធ្នូ ថា អគ្គសេនាធិការកងទ័ពអ៊ុយក្រែន សរសេរ នៅលើបណ្ដាញសង្គមហ្វេសប៊ុក ថា ចាប់តាំងពីការផ្ទុះសង្គ្រាម កាលពីថ្ងៃទី២៤ ខែកុម្ភៈ រហូតមកដល់ថ្ងៃទី១៨ ខែធ្នូ ឆ្នាំ២០២២ រុស្ស៊ី បានបាត់បង់ទាហាន នៅលើសមរភូមិប្រយុទ្ធជាមួយនឹងកងទ័ពអ៊ុយក្រែន ប្រហែល ៩៨ ២៨០នាក់។

ក្រៅពីការបាត់បង់កម្លាំងទាហាននោះ រុស្ស៊ី បានខាតបង់គ្រឿងសឹក មានតម្លៃរាប់ពាន់លានដុល្លារ រួមមាន រថក្រោះ ចំនួន ២ ៩៨៧គ្រឿង, រថពាសដែក ចំនួន ៥ ៩៦៣គ្រឿង, យន្ដហោះចម្បាំង ចំនួន ២៨១គ្រឿង, ឧទ្ធម្ភាគចក្រ ចំនួន ២៦៤គ្រឿង, យានយន្ដផ្សេងៗ និង រថយន្ដដឹកប្រេងឥន្ធនៈ ចំនួន ៤ ៥៧៩គ្រឿង, ប្រព័ន្ធកាំភ្លើងធំ ចំនួន ១ ៩៤៨គ្រឿង, ប្រព័ន្ធបាញ់គ្រាប់រ៉ុក្កែត ចំនួន ៤១០គ្រឿង, ប្រព័ន្ធកាំភ្លើងបាញ់យន្ដហោះ ចំនួន ២១១គ្រឿង … និង គ្រឿងសឹកជាច្រើនទៀត។

បើតាមអគ្គសេនាធិការកងទ័ពអ៊ុយក្រែន បានអះអាង ថា ទាហានរុស្ស៊ី បានរងគ្រោះថ្នាក់ខ្លាំងបំផុត នៅលើសមរភូមិលីម៉ាន់ (Lyman) និង បាឃ្មូត (Bakhmut)។

ទោះជាយ៉ាងណា តួលេខ នៃការស្លាប់របស់ទាហានរុស្ស៊ី ទាំងនេះ មិនមែន ជាការអះអាង ចេញពីប្រភពឯករាជ្យណាមួយនោះឡើយ ហើយវាគ្រាន់តែជាការបញ្ជាក់ ពីភាគីអ៊ុយក្រែន តែប៉ុណ្ណោះ។ ដោយឡែក រុស្ស៊ី វិញ ក៏មិនបានបញ្ជាក់អំពីចំនួនទាហានរបស់ខ្លួន បាត់បង់ នៅក្នុងសង្គ្រាមនោះដែរ ដោយលើកហេតុផល អំពីការងារសម្ងាត់របស់ជិត។

ដោយឡែក លោក ឡយ អូស្ទីន (Lloyd Austin) រដ្ឋមន្រ្ដីក្រសួងការពារជាតិសហរដ្ឋអាមេរិក ធ្លប់លើកឡើង កាលពីខែមុន ថា កម្លាំងទាហានរុស្ស៊ី ប្រហែល ១០ម៉ឺននាក់ បានស្លាប់ និង រងរបួស។ ចំណែកកងទ័ពអ៊ុយក្រែន បានរងគ្រោះថ្នាក់ ប្រហាក់ប្រហែលគ្នានេះដែរ៕

ប្រទេសថៃ៖ នាវារាជសុខោទ័យ ដែលជានាវារបស់រាជវង្សថៃ ត្រូវបានលិចនៅកណ្តាលឈូងសមុទ្រថៃ បន្ទាប់ពីម៉ាស៊ីនមានបញ្ហា ហើយបានពន្លិចកងទ័ពចំនួន ១០៦នាក់ ជួយសង្គ្រោះបានចំនួន ៧៨ នាក់ ​បាត់ខ្លួន២៨នាក់ និង ៣ នាក់ស្ថិតក្នុងស្ថានភាពធ្ងន់ធ្ងរ។

នាថ្ងៃទី ១៩ ខែធ្នូ ឆ្នាំ ២០២២ មានសេចក្ដីរាយការណ៍បីឧប្បត្តិហេតុនៃការលិចនាវារបស់រាជវង្ស “រាជសុខោទ័យ” បន្ទាប់ពីមានព្យុះ និងខ្យល់បក់ខ្លាំងនៅកណ្តាលឈូងសមុទ្រថៃ ក្នុងស្រុកបាងសាផាន ខេត្ត ប្រាជួបគិរីខាន់។

ប្រភពដដែលបានបង្ហាញថាមុនពេលកើតហេតុកងទ័ពចំនួន១០៦នាក់មានបេសកកម្មធ្វើដំណើរទៅចូលរួមព្រឹត្តិការណ៍មួយ ដើម្បីគោរពដល់ឧត្តមនាវាឯក ព្រះមហាក្សត្រី មហាចក្រី សិរិន្ទថន ព្រះអង្គម្ចាស់ អាផាកន គៀតវង្ស ក្រុម លួង ឈុម ផន ឬ “បិតានៃកងទ័ពជើងទឹកថៃ” ក្នុងឱកាសគម្រប់ខួប ១០០ ឆ្នាំនៃការសោយទីវង្គតរបស់ព្រះអង្គនៅទីសក្ការៈបូជា ក្រុម លួង ឈុម ផន(Krom Luang Chumphon) ខេត្តឈុនបុរី។

ជាសំណាងមិនល្អ ខណៈពេលធ្វើដំណើរស្រាប់តែមានព្យុះ និងខ្យល់បក់យ៉ាងខ្លាំងនៅកណ្តាលឈូងសមុទ្រថៃ បណ្ដាលឱ្យមានទឹកហូរចូលប្រព័ន្ធអគ្គិសនីតាមបំពង់ផ្សែងក្បែរទូក និងបណ្ដាលឱ្យរលត់ម៉ាស៊ីន ជាមួយគ្នានោះស្រាប់តែនាវាបានក្រឡាប់ហើយក៏ចាប់ផ្ដើមលិចចូលក្នុងទឹកសន្សឹម ពន្លិចក្រុមទាហានទាំងអស់។

ស្របពេលនោះក្រុមអ្នកជួយសង្គ្រោះបានព្យាយាមចុះមកកន្លែងកើតហេតុភ្លាមៗ ព្រមទាំងបានជួយសង្គ្រោះបានទាហាន ចំនួន ៧៨ នាក់ទៅមាត់ច្រាំងដោយ ​ ៣ នាក់ស្ថិតក្នុងស្ថានភាពធ្ងន់ធ្ងរ និងមនុស្សចំនួន ២៨នាក់ផ្សេងទៀតត្រូវបានបាត់ខ្លួន។

បច្ចុប្បន្នឧបទ្ទវហេតុនេះកំពុងស្ថិតក្រោមការស៊ើបអង្កេតយ៉ាងក្ដៅគគុក។

គួរបញ្ជាក់ផងដែរថានាវារាជសុខោទ័យបានសាងសង់ដោយក្រុមហ៊ុន Tacoma Boat Building Co, USAកាលពីថ្ងៃទី ១៩ ខែកុម្ភៈ ឆ្នាំ ១៩៨៧ មានប្រវែងសរុប ៧៦,៨ ម៉ែត្រ ទទឹង ៩,៦ ម៉ែត្រ ជម្រៅទឹក ៤,៥ ម៉ែត្រ។

បេសកកម្មចម្បងរបស់កប៉ាល់សុខោទ័យគឺដើម្បីកម្ចាត់នាវាមុជទឹក ការល្បាតស៊ើបការណ៍ អមដំណើរក្បួន ការគាំទ្រភ្លើងនៅឆ្នេរសមុទ្រ បេសកកម្មបន្ទាប់បន្សំគឺគាំទ្របេសកកម្មកងទ័ពជើងទឹកជាចម្បង៕ ប្រភព៖ ​Sanook

អន្តរជាតិ៖ ការិយាល័យរបស់មន្ទីរប៉ង់តាហ្គោនថ្មី ដែលបង្កើតឡើងដើម្បីតាមដានរបាយការណ៍នៃវត្ថុហោះហើរដែលមិនស្គាល់អត្តសញ្ញាណ ឬ UFO បានរាយការណ៍ថា ខ្លួនបានទទួលរបាយការណ៍ថ្មីៗរាប់រយរហូតមកទល់ពេលនេះ នេះបើតាមថ្នាក់ដឹកនាំរបស់ទីភ្នាក់ងារបានឱ្យដឹងកាលពីថ្ងៃសុក្រ។ ការិយាល័យ All-domain Anomaly Resolution Office (AARO) ត្រូវបានបង្កើតកាលពីខែកក្កដា និងទទួលខុសត្រូវមិនត្រឹមតែ UFO នៅលើមេឃប៉ុណ្ណោះទេ ប៉ុន្តែនៅក្រោមទឹក ឬក្នុងលំហរ ក៏ដូចជា UFO ដែលបង្កើតដោយយោធា។ កន្លងមកអ្នកបើកបរយន្តហោះបានឃើញ UFO ជាច្រើន ប៉ុន្តែពួកគេមិនដែលបានរាយការណ៍ឱ្យបានច្រើននោះទេ ដោយសារខ្លាចថាគ្មានអ្នកជឿ ឬខ្មាសគេ ដែលជាហេតុនាំឱ្យមានការបង្កើតការិយាល័យមួយនេះ។

នៅខែមិថុនា ឆ្នាំ២០២១ លោក Sean Kirkpatrick មកពីការិយាល័យនាយកស៊ើបការណ៍ជាតិបានឱ្យដឹងថា ចន្លោះឆ្នាំ២០០៤ ដល់ឆ្នាំ២០២១ មានការជួបវត្ថុចម្លែកបែបនេះ ១៤៤ ករណី ដែល ៨០ ក្នុងចំណោមនោះ ត្រូវបានចាប់យកនៅលើឧបករណ៍ចាប់សញ្ញាច្រើនដង។ ម្យ៉ាងទៀត ក្រៅពីវត្តមានរបស់ UFO ពួកគេក៏មានការព្រួយបារម្ភពាក់ព័ន្ធនឹងបច្ចេកវិទ្យាទំនើបក្នុងវិស័យយោធា ដូចជា៖ យន្តហោះទម្លាក់គ្រាប់បែក យន្តហោះចម្បាំង ដ្រូនគ្មានមនុស្សបើក និងមីស៊ីលឿនជាងសំឡេង Hypersonic ដែលទាំងសហរដ្ឋអាមេរិក និងប្រទេសចិន កំពុងបង្កើនការផលិតដូចគ្នា ហើយវាអាចច្រឡំថាជា UFO ក៏ថាបាន។

លោក Kirkpatrick បាននិយាយថា ការិយាល័យ AARO បាននឹងកំពុងសម្របសម្រួលជាមួយមន្ទីរបញ្ចកោណ និងសហគមន៍ស៊ើបការណ៍សម្ងាត់អាមេរិក ដើម្បីទទួលបានបច្ចេកវិទ្យាខ្ពស់របស់សហរដ្ឋអាមេរិក ដើម្បីគ្រប់គ្រងយន្តហោះ ឬដ្រូនទាំងនោះ។ ជម្រាបដែរថា កាលពីខែឧសភានេះ សភាអាមេរិកក៏បានបើកសវនាការលើកដំបូងរបស់ខ្លួនក្នុងរយៈពេលជាងកន្លះសតវត្ស លើប្រធានបទទាំងអស់នេះ ស្របពេលឥទ្ធិពលរបស់រុស្ស៊ី និងចិន កាន់តែមានសន្ទុះឡើង ជាពិសេសការវាយលុករបស់រុស្ស៊ីនៅអ៊ុយក្រែន៕

រដ្ឋធានីកៀវ៖ ចាប់តាំងពីប្រធានាធិបតីរុស្ស៊ី បានបញ្ជាកងទ័ពរបស់ខ្លួន ឲ្យបើកទ្វារព្រំដែន ធ្វើសង្គ្រាមវាយលុក ចូលទៅក្នុងប្រទេសអ៊ុយក្រែន កាលពីថ្ងៃទី២៤ ខែកុម្ភៈ រហូតមកដល់ពេលនេះ ចក្រភពអង់គ្លេស ក្លាយជាប្រទេសបស្ចិមលោកនាំមុខគេមួយ បញ្ជូនគ្រឿងយុទ្ធោបករណ៍ ទៅជួយដល់ក្រុងកៀវ ហើយឥឡូវ ប្រទេសមហាអំណាចមួយនេះ បានសម្រេចចិត្ត បញ្ជូនមីស៊ីលនាំផ្លូវដ៏ទំនើបរបស់ខ្លួន ទៅជួយប្រទេសដែលកំពុងតែហែកហួរ ដោយសារសង្គ្រាមមួយនេះបន្ដទៀត។

ទីភ្នាក់ងារសារព័ត៌មាន Ukrinform បានចេញផ្សាយ កាលពីថ្ងៃអាទិត្យ ទី១៨ ខែធ្នូ ថា ចក្រភពអង់គ្លេស បានអះអាង អំពីការបញ្ជូនមីស៊ីលនាំផ្លូវ ប្រភេទ Brimstone 2 ទៅកាន់ប្រទេសអ៊ុយក្រែន ដែលជាផ្នែកមួយ នៃកញ្ចប់ជំនួយយោធារបស់ក្រុងឡុងដ៍។ក្រសួងការពាជាតិ ចក្រភពអង់គ្លេស បានសរសេរ នៅលើបណ្ដាញសង្គមធ្វីធើរ ថា ចក្រភពអង់គ្លេស បានសម្រេចផ្ដល់មីស៊ីល Brimstone 2 ដែលជាប្រភេទមីស៊ីលនាំផ្លូវជាក់លាក់មួយ បញ្ជូនទៅឲ្យកងទ័ពការពារទឹកដីរបស់អ៊ុយក្រែន ហើយនេះក៏ជាផ្នែកមួយ នៃកញ្ចប់ជំនួយសន្ដិសុខរបស់ក្រុងឡុងដ៍ ផងដែរ។ កញ្ចប់ជំនួយនេះ នឹងតួនាទីយ៉ាងសំខាន់ សម្រាប់ការបញ្ឈប់ល្បឿន វាយរុលទៅមុខ ពីកម្លាំងទាហានរុស្ស៊ី។

បើតាមសេចក្ដីរាយការណ៍ បានអះអាង ថា មីស៊ីល Brimstone 2 ចុងក្រោយបង្អស់របស់ចក្រភពអង់គ្លេស មានសមត្ថភាពខ្លាំងជាងមុនទ្វេដង ហើយត្រូវបានផ្តល់ ទៅឲ្យកងទ័ពការពារទឹកដីរបស់អ៊ុយក្រែន។ ប្រព័ន្ធមីស៊ីលប្រភេទនេះ អនុញ្ញាតឱ្យកាំជ្រួចស្កែន ទៅលើសមរភូមិ និង ជ្រើសរើស អំពីគោលដៅសមស្របបំផុត ខណៈកំពុងពិនិត្យលើយានស៊ីវិល ឬ ឧបករណ៍យោធាមិនសូវសំខាន់។

ចាប់តាំងពីក្រុងមូស្គូ បានប្រកាសធ្វើសង្គ្រាម ប្រឆាំងនឹងអ៊ុយក្រែន រហូតមកដល់ពេលនេះ ចក្រភពអង់គ្លេស បានផ្លាស់ប្ដូរនាយករដ្ឋមន្រ្ដី ចំនួន៣រូបរួចមកហើយ ប៉ុន្ដែប្រទេសមហាអំណាចបស្ចិមលោកមួយនេះ នៅតែប្រកាន់គោលជំហរ មិនងាកថយ នៅក្នុងការជួយដល់អ៊ុយក្រែន ដើម្បីការពារទឹកដី និង សេរីភាពរបស់ពួកគេ។ កាលពីនៅក្នុងឋានៈជានាយករដ្ឋមន្រ្ដី លោក បូរីស ចនសុន (Boris Johnson) បានទៅធ្វើដំណើរទៅជួយមេដឹកនាំអ៊ុយក្រែន ដល់រដ្ឋធានីកៀវ ចំនួន៣លើក ដើម្បីសិក្សា អំពីតម្រូវការចាំបាច់របស់ពួកគេ។ លើសពីនេះទៅទៀត សូម្បីតែជិតដល់ពេលគាត់ត្រូវដើរចេញ ពីតំណែងទៅហើយ ក៏លោក ចនសុន ថែមទាំងទៅជួយបង្ហាត់បង្រៀន ដល់កងទ័ពអ៊ុយក្រែន ដោយផ្ទាល់ទៀតផង។

ស្របគ្នានឹងសកម្មភាពរបស់លោក បូរីស ចនសុន នោះ លោក រីស៊ី ស៊ុនណាក់ (Rishi Sunak) នាយករដ្ឋមន្រ្ដីបច្ចុប្បន្នរបស់ចក្រភពអង់គ្លេស ក៏បានធ្វើដំណើរទៅជួយមេដឹកនាំរបស់អ៊ុយក្រែន ដល់រដ្ឋធានីកៀវ ដើម្បីប្រកាស អំពីគោលជំហររបស់ប្រទេសមហាអំណាចបស្ចិមលោកមួយនេះ សម្រាប់កិច្ចគាំទ្រ ជួយដល់ប្រជាជនអ៊ុយក្រែន។ ចក្រភពអង់គ្លេស នៅតែប្រកាន់ជំហរយ៉ាងម៉ឺងម៉ាត់ ជួយដល់អ៊ុយក្រែន រហូតទទួលបានជ័យជម្នះយ៉ាងពិតប្រាកដ៕