ការសិក្សាស្រាវជ្រាវរបស់ TRC បានបង្ហាញលទ្ធផលស្រាវជ្រាវជាង ៧,០០០ ដែលបញ្ជាក់ថា “បារីអេឡិចត្រូនិច” ឬ “វ៉ែប” មានគ្រោះថ្នាក់ដល់ប្រព័ន្ធផ្សេងៗ នៃរាងកាយយ៉ាងធ្ងន់ធ្ងរ ដោយបានបង្ហាញថា ចំហាយបារីអេឡិចត្រូនិកមាន « ជាតិពុល ជាង ១០០ ប្រភេទ » ដែលជាហានិភ័យនៃជំងឺបេះដូង និង មហារីក។

នាថ្ងៃទី ២២ ខែធ្នូ ឆ្នាំ ២០២២សាស្រ្តាចារ្យបណ្ឌិត Wich Kasemsub នាយកនៃមជ្ឈមណ្ឌលស្រាវជ្រាវ និងគ្រប់គ្រងចំណេះដឹងសម្រាប់ការគ្រប់គ្រងថ្នាំជក់ (TRC) ក្នុងប្រទេសថៃ បាននិយាយថាយោងតាមព័ត៌មានអំពីរបាយការណ៍លទ្ធផលត្រួតពិនិត្យថ្នាំជក់ពាណិជ្ជកម្ម និងការសិក្សាផ្នែកបារី របស់ស្នងការពាណិជ្ជកម្ម និងកម្មសិទ្ធិបញ្ញា សភាតំណាងរាស្រ្ត មតិរបស់គណៈកម្មាធិការពាណិជ្ជកម្ម អំពីគោលការណ៍ណែនាំបារីអេឡិចត្រូនិច ដែលមិនអាចបញ្ជាក់បានច្បាស់លាស់ទេថាបារីអេឡិចត្រូនិកមាន គ្រោះថ្នាក់តិចជាងបារីធម្មតា។

ប៉ុន្តែយោងតាមរបាយការណ៍ស្រាវជ្រាវពី NASEM (National Academies of Science, Engineering and Medicine, USA) ពីឆ្នាំ ២០១៨-២០២១ មានរបាយការណ៍ស្រាវជ្រាវថ្មីជាង ៧,០០០ ដែលជាការពិតជាក់ស្តែង បានបង្ហាញពីគ្រោះថ្នាក់នៃបារីអេឡិចត្រូនិចចំពោះប្រព័ន្ធផ្សេងៗយ៉ាងធ្ងន់ធ្ងរ ដល់រាងកាយយ៉ាងច្បាស់។

ប្រភពដដែលបានបង្ហាញពីឥទ្ធិពលនៃចំហាយបារីអេឡិចត្រូនិចលើប្រព័ន្ធផ្លូវដង្ហើម ដែលវាបានបង្កើនជាហានិភ័យនៃជំងឺបេះដូង និងមហារីកយ៉ាងច្បាស់  រហូតក្រុមអ្នកស្រាវជ្រាវ និងអ្នកសិក្សាជុំវិញពិភពលោក មានការព្រួយបារម្ភអំពីផលប៉ះពាល់សុខភាពនៃបារីអេឡិចត្រូនិចនេះជាខ្លាំង ហើយពួកគេបានអំពាវនាវឱ្យមានវិធានការតឹងរ៉ឹងបន្ថែមទៀតដើម្បីគ្រប់គ្រងបារីអេឡិចត្រូនិចលើពិភពលោក។

បន្ថែមពីនោះ “របាយការណ៍របស់សាកលវិទ្យាល័យជាតិអូស្ត្រាលី (ANU) ២០២២ បានចែងថា បារីអេឡិចត្រូនិច មានគ្រោះថ្នាក់ដល់សុខភាព ដោយវាមានសារធាតុពុលជាង ១០០ នៅក្នុងចំហាយបារីអេឡិចត្រូនិច ដែលជាគ្រោះថ្នាក់នៃជាតិនីកូទីននៅក្នុងបារីអេឡិចត្រូនិច ព្រមទាំងប៉ះពាល់ដល់រចនាសម្ព័ន្ធ និងមុខងាររបស់ខួរក្បាល ជាពិសេសក្នុងចំណោមកុមារ និងយុវជនជាខ្លាំង។

ដូច្នេះដើម្បីដោះស្រាយនូវបញ្ហាខាងលើ របាយការណ៍របស់គណៈកម្មការពាណិជ្ជកម្ម បានមានដំណោះស្រាយក្នុងការដោះស្រាយបញ្ហាពាណិជ្ជកម្មខុសច្បាប់លើផលិតផលបារីអេឡិចត្រូនិក រួមមាន ការចូលរួមក្នុងពិធីស្តីពីការលុបបំបាត់ការជួញដូរខុសច្បាប់លើផលិតផលថ្នាំជក់ ក្នុងក្របខ័ណ្ឌនៃការអនុសញ្ញាត្រួតពិនិត្យថ្នាំជក់របស់អង្គការសុខភាពពិភពលោក ។

មិនតែប៉ុណ្ណោះស្ថាប័នរដ្ឋាភិបាលផ្សេងៗ រួមទាំងសភា គួរចាំបាច់ត្រូវគាំទ្រគោលនយោបាយនេះ ដើម្បីការពារកុមារ និងយុវជនក្នុងប្រទេសនីមួយ ពីបារីអេឡិចត្រូនិច និងមិនបង្កគ្រោះមហន្តរាយសុខភាពសាធារណៈ៕ ប្រភព៖ Thairath

ទីក្រុងតៃប៉ិ៖ នៅក្នុងរយៈពេល២ឆ្នាំចុងក្រោយនេះ ក្រុងប៉េកាំង បង្កើនសកម្មភាពយោធា កាន់តែខ្លាំងឡើង ទាំងផ្លូវទឹក និង អាកាស នៅតំបន់ ជុំវិញកោះតៃវ៉ាន់ ហើយសូម្បីត្រឹមតែរយៈពេល២៤ម៉ោងកន្លងមកនេះ ចិន បានបញ្ជូនយន្ដហោះចម្បាំងទំនើបៗ ជិត៤០គ្រឿង ចូលទៅកាន់តំបន់កំណត់ព្រំដែនអាកាសរបស់តៃវ៉ាន់ ប៉ុន្ដែត្រូវបានកងទ័ពអាកាសរបស់ក្រុងតៃប៉ិ ដេញស្ទាក់ ឲ្យបកត្រឡប់ក្រោយវិញ។

សារព័ត៌មាន Channel News Asia បានចេញផ្សាយ កាលពីព្រឹក ថ្ងៃព្រហស្បតិ៍ ទី២២ ខែធ្នូ ថា ក្រសួងការពារជាតិតៃវ៉ាន់ បានបញ្ជាក់ នៅថ្ងៃព្រហស្បតិ៍នេះ ថា កងទ័ពអាកាសរបស់តៃវ៉ាន់ បានបើកយន្ដហោះប្រយុទ្ធ ដេញស្ទាក់ ជាមួយនឹងការបញ្ចេញការព្រមាន ដល់យន្ដហោះចម្បាំងរបស់ចិន ចំនួន៣៩គ្រឿង ចូលមកកាន់តំបន់កំណត់ព្រំដែនការពារដែនអាកាសរបស់តៃវ៉ាន់ នាភាគខាងត្បូងកោះមួយនេះ។

តៃវ៉ាន់ តែងតែត្អូញត្អែរជាដដែលៗ អំពីបេសកកម្មរបស់កងទ័ពអាកាសរំដោះប្រជាជនចិន នៅក្នុងរយៈពេល២ឆ្នាំចុងក្រោយនេះ តែងតែហោះហើរ ចូលមកជារឿយៗ រំលោភមកលើតំបន់កំណត់ការពារដែនអាកាស (ADIZ) នៅភាគខាងត្បូង ដែនកោះរបស់ខ្លួន។

ក្រសួងការពារជាតិតៃវ៉ាន់ បានបញ្ជាក់ នៅក្នុងរបាយការណ៍លម្អិត អំពីសកម្មភាពរបស់កងទ័ពអាកាសចិន រំលោភមកលើ ADIZ របស់ខ្លួន នៅក្នុងរយៈពេល២៤ម៉ោងចុងក្រោយនេះ ថា ការឈ្លានពានរបស់ចិន នៅថ្ងៃព្រហស្បតិ៍នេះ រួមមាន យន្ដហោះប្រដេញ ចំនួន២១គ្រឿង និង យន្ដហោះទម្លាក់គ្រាប់បែក ប្រភេទ H-6 ចំនួន៤គ្រឿង ហើយយន្ដហោះប្រឆាំងនឹងនាវាមុជទឹក ផងដែរ។ ប៉ុន្ដែជាការឆ្លើយតបវិញនោះ តៃវ៉ាន់ បានបញ្ជូនយន្ដហោះប្រយុទ្ធ បណ្ដេញយន្ដហោះចិនទាំងនោះ ជាមួយនឹងការបញ្ចេញការព្រមាន ស្របពេលប្រព័ន្ធមីស៊ីលរបស់ដែនកោះមួយនេះ បានដានយ៉ាងដិតដល់ លើសកម្មភាពហោះហើររបស់កងទ័ពអាកាសចិន។

ការគំរាមកំហែងរបស់ក្រុងប៉េកាំង ធ្វើឲ្យតៃវ៉ាន់ បង្កើនកញ្ចប់ថវិកា លើវិស័យការពារជាតិ រាប់ពាន់លានដុល្លារ ដោយទិញគ្រឿងសឹកទំនើបៗ មកពីសហរដ្ឋអាមេរិក។ បន្ថែមពីលើការទិញគ្រឿងសឹករបស់ក្រុងតៃប៉ិ នោះ ក្រុងវ៉ាស៊ីនតោន ក៏បានរៀបចំកញ្ចប់ជំនួយសន្ដិសុខ ជួយដល់តៃវ៉ាន់ រហូតដល់១០ពាន់លានដុល្លារផងដែរ សម្រាប់រយៈពេល៥ឆ្នាំ។

ជាមួយគ្នានេះដែរ រដ្ឋាភិបាលក្រុងតៃប៉ិ ក៏បានអះអាង ថា វិទ្យាស្ថានវិទ្យាសាស្ត្រ និង បច្ចេកវិទ្យាជាតិចុងសាន (Chung-Shan) ដែលជាស្ថាប័នស្រាវជ្រាវ និង អភិវឌ្ឍន៍របស់ក្រសួងការពារជាតិតៃវ៉ាន់ នៅសប្ដាហ៍នេះ កំពុងធ្វើតែសមយុទ្ធបាញ់មីស៊ីល នៅលើឆ្នេរសមុទ្រ នាភាគអាគ្នេយ៍ នៃដែនកោះមួយនេះ។

ចិន តែងតែអះអាង អំពីដែនអធិបតេយ្យរបស់ខ្លួន នៅលើកោះតៃវ៉ាន់។ ជាមួយនឹងការអះអាងនោះ ក្រុងប៉េកាំង មិនដែលបដិសេធ អំពីការប្រើប្រាស់កម្លាំងយោធា ដើម្បីរឹបអូសដែនកោះមួយនេះ យកមកគ្រប់គ្រងវិញនោះឡើយ។ ដោយឡែក រដ្ឋាភិបាលក្រុងតៃប៉ិ ក៏តែងតែបដិសេធការអះអាងរបស់ចិន ដោយលើកឡើង ថា តៃវ៉ាន់ ចង់បានសន្តិភាព ប៉ុន្តែនឹងការពារខ្លួន ប្រសិនបើមានការវាយប្រហារ ពីប្រទេសចិន៕

ថៃ៖ កម្លាំងទាហានជើងទឹកថៃបានប្រកាសរកឃើញសាកសពកម្លាំងទាហានជើងទឹកវាយឡើងគោក៦នាក់ ក្រោយពេលនាវាធុនតូចមួយគ្រឿងរបស់កម្លាំងនេះបានលិចនៅឈូងសមុទ្រប្រទេសថៃ ។ នៅពេលនេះនៅមានទាហាន២៣នាក់ទៀតបាត់ខ្លួននៅឡើយទេ។

តាមសារព័ត៌មាន The Guardianបានឱ្យដឹងថា នាវាចម្បាំង HTMS Sukhothai បានលិចដោយសារតែខ្យល់ខ្លាំង រលកសមុទ្រធំៗ កម្ពស់៤ម៉ែត្របានវាយលិចនាវានៅយប់ថ្ងៃទី ១៨ខែសីហា។ ក្នុងពេលគ្រោះថ្នាក់កើតឡើង នៅលើនាវាមានមនុស្ស សរុប១០៦នាក់ ដោយមានមនុស្សមួយចំនួនមិនមានអាវពោងពាក់គ្រប់គ្នានោះឡើយ។
យោធាជើងទឹកថៃបានឱ្យដឹងថា មកទល់ពេលនេះ នាវិកសរុប៧៥នាក់ត្រូវបានជួយសង្រ្គោះ ក្រោយការលិចនាវាចម្បាំងធុនតូច ឈ្មោះ អេកធីអឹមអេស សុខោទ័យ (HTMS Sukhothai) ដោយម្នាក់ត្រូវបានរកឃើញនៅរស់រានមានជីវិតកាលពីថ្ងៃអង្គារ នៅចម្ងាយ៦០គីឡូម៉ែត្រពីកន្លែងដែលនាវាបានលិច ខណៈដែលក្នុងថ្ងៃជាមួយគ្នានោះ សាកសពនាវិក៦នាក់ ក៏ត្រូវបានរកឃើញផងដែរ។ ដូច្នេះនៅសល់នាវិក២៣នាក់ដែលកំពុងបន្តបាត់ខ្លួន។

នាវាចម្បាំង សុខោទ័យ ដែលមានផ្ទុកនាវិកសរុប១០៥នាក់ បានជួបបញ្ហាគាំងគ្រឿងម៉ាស៉ីន ហើយលិចនៅចម្ងាយខ្ទង់៣៧គីឡូម៉ែត្រពីខេត្តប្រជួបគីរីខន្ធ (Prachuap Khiri Khan) ភាគខាងត្បូងប្រទេសថៃ កាលពីវេលាម៉ោងប្រហែល ១១ៈ៣០នាទីយប់ថ្ងៃអាទិត្យអំឡុងពេលមានព្យុះបោកបក់ខ្លាំង។ យោធាថៃបានចល័តនាវា យន្តហោះ និងឧទ្ធម្ភាគចក្រជាច្រើនគ្រឿង សម្រាប់ប្រតិបត្តិការរុករកនិងជួយសង្រ្គោះ ៕

ប្រទេសថៃ៖ ពិតជារឿងដ៏គួរឱ្យប្រុងប្រយ័ត្ន និងគួរឱ្យសោកស្ដាយចំពោះនារីវ័យក្មេងជនជាតិថៃ ដែលត្រូវមកទទួលរងនូវជំងឺមហារីកដំណាក់កាលចុងក្រោយ បន្ទាប់ពីមានអាការក្អកពីរខែជាប់គ្នា ហើយមានការសង្ស័យក៏ទៅពិនិត្យមើលនៅមន្ទីរពេទ្យពីរដង តែមិនឃើញមានអ្វី លុះអាការធ្ងន់ធ្ងរពេកទៅពិនិត្យម្ដងទៀត ទើបរកឃើញថាជាជំងឺមហារីកសួតដំណាក់កាលចុងក្រោយ ដោយសង្ស័យថាជំងឺនេះកើតមានដោយសារនាងនៅក្បែរអ្នកជក់បារីពេក។

កាលពីក​ន្លងទៅថ្មីៗនេះមានរឿងរ៉ាវដ៏គួរឱ្យភ្ញាក់ផ្អើល និងអាណិតអាសូរជាខ្លាំង បន្ទាប់ពីមាន​នារីវ័យក្មេង អាយុទើបតែ ២៤ឆ្នាំ ម្នាក់ បានធ្វើការចែករំលែកនូវបទពិសោធនៃជំងឺផ្ទាល់ខ្លួន និងបានដាល់តឿនទៅកាន់មនុស្សគ្រប់គ្នាយ៉ាងដូច្នេះថា៖

“ខ្ញុំបានកើតជំងឺមហារីកសួតដំណាក់កាលទី៤ ឬហៅថាដំណាក់កាលចុងក្រោយ ដោយអាការកាលពីដំបូង នៅចុងឆ្នាំ២០២១ ខ្លួនបានចាប់ផ្ដើមមានអាការក្អករយៈពេល២ខែជាប់គ្នា ខ្ញុំគិតថាវាជាអាឡែស៊ី ដូច្នេះខ្ញុំបានទៅជួបគ្រូពេទ្យនៅផ្នែកត្រចៀក ច្រមុះ និង បំពង់ក បានពិនិត្យកាំរស្មីអ៊ិចនៃសួត និង ថតចុងដង្ហើមដើម្បីមើលផ្លូវដង្ហើម ប៉ុន្តែការពិនិត្យនោះ មិនមានភាពមិនប្រក្រតីត្រូវបានរកឃើញនោះឡើយ ដោយគ្រាន់យកថ្នាំក្អកផ្សេងៗមកលេប។

ក្នុងនោះរយៈពេលពីរសប្ដាហ៍ក៏នៅតែមិនបាត់ ដូច្នេះខ្ញុំបានទៅជួបគ្រូពេទ្យឯកទេសខាងឆ្អឹង នៅពេលនោះគ្រូពេទ្យបានប្រាប់ខ្ញុំថា សាច់ដុំរលាក ហើយទទួលបានថ្នាំបំបាត់ការឈឺចាប់ បន្ទាប់មកពេលភ្ញាក់ ពីព្រលឹម ក៏ចាប់ផ្ដើមក្អកមានអារម្មណ៍ថាមានកំហាកធម្មតា ក្អកស្ងួតគ្រប់ពេល ហើយមានចេញឈាម។ ពេលនោះខ្ញុំរន្ធត់ចិត្តជាខ្លាំងហើយបាន មកជួបគ្រូពេទ្យនៅត្រចៀកច្រមុះ និង បំពង់ក គ្រូពេទ្យ បានថតកាំរស្មីអ៊ិចសួតដូចមុនពុំឃើញមានភាពខុសប្រក្រតីអ្វីឡើយ។

ប៉ុន្តែគ្រូពេទ្យក៏បានធ្វើការណាត់ជួបខ្ញុំម្តងទៀតនៅ ៣ ខែក្រោយបន្ទាបទៀត ខណៈរងចាំទៅជួបគ្រូពេទ្យក្នុងបីខែនោះ អាការកាន់តែធ្វើទុក្ខខ្លាំង មានទាំងក្អកខ្លាំងគ្រប់ពេល និងស្ពិកជើងជាខ្លាំង ហើយចំពោះទម្ងន់វិញស្រកអស់ ពីរគីឡូក្រាម។

លុះដល់ថ្ងៃធ្វើការណាត់ជួបគេបានពិនិត្យសុខភាពផ្នែកខាងក្នុង លើកទីមួយ និងតេស្តឈាម ថតកាំរស្មីអ៊ិច មួយឈុតធំ ពន្លឺភ្លើង លទ្ធផល x-ray នៅតែធម្មតា ប៉ុន្តែលទ្ធផលឈាម និងថ្លើមមិនល្អ ប៉ុន្តែគ្រូពេទ្យបាននាំខ្ញុំទៅកាន់គ្រូពេទ្យជំនាញផ្នែកសួត។

ខណៈពេលដែលគ្រូពេទ្យសួតបានបញ្ជូនការពិនិត្យ CT Chest លទ្ធផលបានរកឃើញថាមានដុំពកជាច្រើននៅក្នុងសួត ដែលមានទំហំធំបំផុត ៤ សង់ទីម៉ែត្រ និង ២សង់ទីម៉ែត្រ នៅក្នុងថ្លើម ដូច្នេះការណាត់ជួបដើម្បីធ្វើកោសល្យវិច័យត្រូវបានធ្វើឡើង។ លទ្ធផលគឺមហារីកមេតាស្ទិកនៅក្នុងសួត ថ្លើមកូនកណ្តុរ និងឆ្អឹង។

ក្នុងនោះបន្ទាប់ពីជិតមួយខែនៅក្នុងមន្ទីរពេទ្យ និងនៅក្នុងបន្ទប់ RCU ហើយទទួលថ្នាំសំលាប់មេរោគ ព្រមទាំងប្រើម៉ាស៊ីនខ្យល់ (លំហូរខ្ពស់) ដែលមានការរងទុក្ខច្រើន ហើយពេលនេះខ្ញុំកំពុងទទួលការព្យាបាលដោយវិទ្យុសកម្ម ១០ ដង។”

ទោះជាយ៉ាងណានារីដែលជាអ្នកជំងឺគិតថានេះអាចបណ្ដាលមកពីនាងនៅក្បែរអ្នកដែលជក់បារីច្រើនពេក ហើយនាងក៏បានផ្ដាំទៅដល់អ្នកដែលកំពុងតែជក់បារីគួរតែគិតសារឡើងវិញជាមួយនឹងក្រុមគ្រួសារដែលមិនដឹងអី អាចនឹងរងទុក្ខជាមួយជំងឺគ្រប់ប្រភេទដែលបានមកពីការស្រូបយកផ្សែងបារីពីអ្នកជក់ផ្ទាល់៕ ប្រភព៖ Thairath

បរទេស៖ រដ្ឋជាច្រើននៅក្នុងប្រទេសម៉ាឡេស៊ី លិចនៅក្រោមកម្រិតទឹកជំនន់ដ៏ខ្ពស់ និងធ្ងន់ធ្ងរ បន្ទាប់ពីមានភ្លៀងធ្លាក់ខ្លាំងក្នុងសប្តាហ៍នេះ ជាលទ្ធផលបានបណ្តាលឱ្យមនុស្សយ៉ាងហោចណាស់ ៥ នាក់បានស្លាប់។

ទីភ្នាក់ងារសារព័ត៌មានបរទេសបានរាយការណ៍ពីទីក្រុងកូឡាឡាំពួរ នៃប្រទេសម៉ាឡេស៊ី នាថ្ងៃទី ២២ ខែធ្នូ ឆ្នាំ២០២២នេះថា ទីភ្នាក់ងារឧតុនិយមជាតិម៉ាឡេស៊ី បានបង្ហាញពីស្ថានភាពទឹកជំនន់នៅក្នុងរដ្ឋ ជាច្រើនដែលស្ថិតក្នុងស្ថានភាពធ្ងន់ធ្ងរ ដោយសារគ្រោះទឹកជំនន់បន្ទាប់ពីមានព្យុះផ្គររន្ទះ និងមានភ្លៀងធ្លាក់ខ្លាំងយ៉ាងលឿន ចាប់តាំងពី ដើមសប្តាហ៍នេះ។

ជាលទ្ធផលគ្រោះធម្មជាតិនេះ ត្រូវបានទីភ្នាក់ងារបង្ការ និង កាត់បន្ថយគ្រោះមហន្តរាយម៉ាឡេស៊ីបាន បញ្ជាក់យ៉ាងដូច្នេះថា គ្រោះធម្មជាតិនេះបានបណ្តាលឱ្យមនុស្សយ៉ាងហោចណាស់៥នាក់បានស្លាប់ និងមនុស្សសរុបជាង ៧២,០០០ នាក់នៅក្នុងរដ្ឋដែលរងផលប៉ះពាល់យ៉ាងធ្ងន់ធ្ងរ ដែលត្រូវតែជម្លៀសចេញពីផ្ទះរបស់ពួកគេជាបន្ទាន់។

លើសពីនោះគេបានព្រមានថាភ្លៀងធ្លាក់ខ្លាំងនឹងបន្តគ្របដណ្តប់នៅតំបន់ទាំងនេះរហូតដល់ថ្ងៃខាងមុខ និងអាជ្ញាធរបានណែនាំប្រជាជនដែលរស់នៅក្នុងតំបន់គ្រោះថ្នាក់គួរធ្វើជម្លៀសខ្លួនទៅនៅឯជម្រកបណ្តោះអាសន្នក្នុងរដ្ឋ Kelantan ក៏ដូចជាបានពិភាក្សាអំពីការបែងចែកថវិកាគ្រាអាសន្នដំបូងចំនួន ៤០ លានរីងហ្គីត ឬប្រហែល១០ដុល្លារក្នុងម្នាក់ ដល់ទីភ្នាក់ងារគ្រោះមហន្តរាយជាតិ ដើម្បីបង្កើនប្រសិទ្ធភាពនៃការជួយប្រជាជន៕ ប្រភព៖ Dailynews