រដ្ឋធានីតេអ៊ីរ៉ង់៖ ក្រោយពេលអ៊ុយក្រែន និង បណ្ដាប្រទេសមហាអំណាចលោកខាងលិច បានចោទប្រកាន់ជាញឹកញាប់ដល់អ៊ីរ៉ង់ អំពីការបញ្ជូនយន្ដហោះគ្មានមនុស្សបើក ឬ ដ្រូន ទៅកាន់រុស្ស៊ី នោះមក ក្រុងតេអ៊ីរ៉ង់ កាលពីដើមខែវិច្ឆិកា ក៏បានទទួលស្គាល់ អំពីសកម្មភាពរបស់ខ្លួន បានបញ្ជូនគ្រឿងសឹកប្រភេទនេះ ទៅឲ្យក្រុងមូស្គូ ហើយឥឡូវនេះ ថែមទាំងអួតអាង អំពីដ្រូនរបស់ខ្លួនមានប្រសិទ្ធភាព។

សារព័ត៌មាន ARAB NEWS បានចេញផ្សាយ កាលពីព្រឹក ថ្ងៃពុធ ទី២៨ ខែធ្នូ ដោយដកស្រង់ប្រភពពីបណ្ដាញផ្សព្វផ្សាយរបស់អ៊ីរ៉ង់ បានរាយការណ៍ ថា មេទ័ពកំពូលរបស់អ៊ីរ៉ង់ បានអះអាង ថា ការអះអាងរបស់បណ្ដាប្រទេសមហាអំណាចលោកខាងលិច អំពីដ្រូនរបស់ខ្លួន ដែលកម្លាំងទាហានរុស្ស៊ី កំពុងតែប្រើប្រាស់ វាយប្រហារ ប្រឆាំងនឹងអ៊ុយក្រែន កំពុងតែបង្ហាញ អំពីដ្រូនរបស់ក្រុងតេអ៊ីរ៉ង់ មានប្រសិទ្ធភាពកម្រិតខ្ពស់។

រដ្ឋាភិបាលក្រុងកៀវ និង សម្ពន្ធមិត្តបស្ចិមលោក បានចោទប្រកាន់ដល់រុស្ស៊ី អំពីការប្រើប្រាស់ដ្រូន ផលិតដោយប្រទេសអ៊ីរ៉ង់ វាយប្រហារ ប្រឆាំងនឹងអ៊ុយក្រែន នៅក្នុងជម្លោះ អស់រយៈពេលប្រហែល១០ខែកន្លងមកនេះ ដោយបានបំផ្លិចបំផ្លាញហេដ្ឋារចនាសម្ព័ន្ធស៊ីវិល និង ថាមពលសំខាន់ៗ នៅទូទាំងប្រទេស ខណៈអាកាសធាតុ នៅក្នុងប្រទេសអឺរ៉ុបខាងកើតមួយនេះ កាន់តែធ្លាក់ចុះត្រជាក់ខ្លាំងបំផុត។

ជាការឆ្លើយតបប្រឆាំងនឹងក្រុងតេអ៊ីរ៉ង់នោះ បណ្ដាប្រទេសបស្ចិមលោក បានដាក់ទណ្ឌកម្ម ប្រឆាំងនឹងក្រុមហ៊ុន និង ពួកឧត្ដមសេនីយ៍មួយចំនួនរបស់អ៊ីរ៉ង់ រួមទាំង នាយអគ្គសេនាធិការកងទ័ពអ៊ីរ៉ង់ លោកឧត្ដមសេនីយ៍ ម៉ូហាមម៉ាដ បាហ្គេរី (Mohammad Bagheri) ផងដែរ។

រដ្ឋាភិបាលក្រុងតេអ៊ីរ៉ង់ តែងតែបដិសេធជាដដែលៗ ប្រឆាំងនឹងការចោទប្រកាន់ អំពីការបញ្ជូនដ្រូនរបស់ខ្លួន ទៅឲ្យរុស្ស៊ី ប្រើប្រាស់ នៅក្នុងសង្គ្រាម ប្រឆាំងនឹងប្រទេសអ៊ុយក្រែន។ ប៉ុន្ដែនៅដើមខែវិច្ឆិកា អ៊ីរ៉ង់ ក៏បានទទួលស្គាល់ ថា ក្រុងតេអ៊ីរ៉ង់ បានបញ្ជូនដ្រូនមួយចំនួន ទៅឲ្យក្រុងមូស្គូ តាំងពីមុនការផ្ទុះសង្គ្រាម នៅក្នុងប្រទេសអ៊ុយក្រែន នាថ្ងៃទី២៤ ខែកុម្ភៈ ឆ្នាំ២០២២មកម៉្លេះ។

ទីភ្នាក់ងារសារព័ត៌មាន ពាក់កណ្ដាលផ្លូវការ Tasnim មានទំនាក់ទំនងជាមួយនឹងរដ្ឋាភិបាលក្រុងតេអ៊ីរ៉ង់ បានដកស្រង់សម្ដីរបស់លោកឧត្ដមសេនីយ៍ Mohammad Bagheri ដែលបានអះអាង ថា «បរិយាកាសបច្ចុប្បន្ន បង្កើតដោយពិភពក្រអឺតក្រទម ទាក់ទងនឹងការប្រើប្រាស់យន្តហោះគ្មានមនុស្សបើក ឬ ដ្រូនរបស់អ៊ីរ៉ង់ នៅក្នុងសង្គ្រាមអ៊ុយក្រែន គ្រាន់តែជាផ្នែកមួយ នៃសង្គ្រាមចិត្តសាស្ត្ររបស់សត្រូវតែប៉ុណ្ណោះ។ អ្វីដែលជាការពិត បង្ហាញ អំពីប្រសិទ្ធភាព សារៈសំខាន់ និង ឋានៈដ៏ខ្ពស់ សម្រាប់សាធារណរដ្ឋអ៊ិស្លាមអ៊ីរ៉ង់ នៅក្នុងវិស័យយន្តហោះគ្មានមនុស្សបើក ឬ ដ្រូន»។

សហរដ្ឋអាមេរិក និង អ៊ីស្រាអែល ជាសត្រូវរបស់អ៊ីរ៉ង់ បានចោទប្រកាន់ ដល់ក្រុងតេអេរ៉ង់ ថា បានបញ្ជូនកងយន្តហោះគ្មានមនុស្សបើក ឬ ដ្រូន ទៅឲ្យទីភ្នាក់ងាររបស់់ខ្លួន នៅមជ្ឈិមបូព៌ា រួមទាំង ចលនាហេសបូលឡាហ៍ (Hezbollah) នៅក្នុងប្រទេសលីបង់, ជួយដល់របបគ្រប់គ្រងរបស់ប្រធានាធិបតីស៊ីរី លោក បាសា អាល់អាសាដ (Bashar al-Assad) និង ក្រុមឧទ្ទាមហ៊ូធី (Houthi) នៅក្នុងប្រទេសយេម៉ែន។

អ៊ីរ៉ង់ បានចាប់ផ្តើមអភិវឌ្ឍយន្តហោះគ្មានមនុស្សបើក ឬ យានហោះគ្មានមនុស្សបើក (UAVs) នៅក្នុងទសវត្សរ៍ ឆ្នាំ១៩៨០ នាអំឡុងសង្គ្រាម រយៈពេល៨របស់ក្រុងតេអ៊ីរ៉ង់ ប្រឆាំងនឹងអ៊ីរ៉ាក់ ដែលជាប្រទេសជិតខាង។

លោកឧត្ដមសេនីយ៍ ម៉ូហាមម៉ាដ បាហ្គេរី (Mohammad Bagheri) បានបញ្ជាក់ ថា ឥឡូវនេះ អ៊ីរ៉ង់ នឹងបន្ដអភិវឌ្ឍដ្រូនបន្ថែមទៀត។ កងទ័ពរបស់ប្រទេសមជ្ឈិមបូព៌ាមួយនេះ នឹងបន្ដរីកចម្រើន និង អភិវឌ្ឍដ្រូន…យើងនឹងធ្វើកិច្ចសហប្រតិបត្ដិការ ជាមួយនឹងបណ្ដាប្រទេសផ្សេងៗទៀត ដោយផ្ដោតទៅលើវិស័យយន្ដហោះគ្មានមនុស្សបើក។ ប្រព័ន្ធដ្រូនរបស់យើង ស្ថិតក្នុងចំណាត់ថ្នាក់ខ្ពស់ នៅលើពិភពលោក ទាក់ទងនឹងភាពត្រឹមត្រូវ ភាពធន់ ការបន្តប្រតិបត្តិការ ការបំពេញប្រតិបត្តិបេសកកម្ម ហើយបំផ្លាញដល់បេសកកម្មផ្សេងៗរបស់សត្រូវ»៕

ប្រទេសវៀតណាម  បានបិទហាងខារ៉ាអូខេ និងបារជាង ១,១០០កន្លែង  នៅទីក្រុងហាណូយ ដោយសារវិធានការសុវត្ថិភាពអគ្គីភ័យមិនគ្រប់គ្រាន់។

នៅក្នុងសន្និសីទស្តីពីសុវត្ថិភាពអគ្គីភ័យដែលរៀបចំឡើងដោយគណៈកម្មាធិការប្រជាជនទីក្រុងហាណូយ កាលពីដើមសប្តាហ៍នេះ លោក Pham Trung Hieu ប្រធានការិយាល័យពន្លត់អគ្គីភ័យ និងជួយសង្គ្រោះនៃនាយកដ្ឋានប៉ូលីសហាណូយ បាននិយាយថា មានហាងខារ៉ាអូខេ បារ និងក្លឹបរាំជាង ១,៥០០ នៅក្នុងទីក្រុង Cong An។

បន្ទាប់ពីរយៈពេលពីរខែចុងក្រោយនៃការត្រួតពិនិត្យកន្លែងនៅក្នុងទីក្រុងសម្រាប់វិធានការសុវត្ថិភាពអគ្គីភ័យ ទីក្រុងហាណូយបានផ្អាកជាង ១,១០០កន្លែង ក្នុងចំណោមចំនួនសរុបខាងលើនេះ។

នាយករដ្ឋមន្ត្រីវៀតណាម លោក Pham Minh Chinh កាលពីខែកញ្ញា បានស្នើឱ្យក្រសួងសន្តិសុខសាធារណៈ និងស្ថាប័នពាក់ព័ន្ធផ្សេងទៀត ធ្វើការត្រួតពិនិត្យសុវត្ថិភាពអគ្គីភ័យ ដោយផ្តោតលើហាងខារ៉ាអូខេ សហគ្រាសដែលមានមនុស្សច្រើន និងអគារផ្ទះល្វែង។

សំណើនេះបានធ្វើឡើងបន្ទាប់ពីមានអគ្គីភ័យឆាបឆេះហាងខារ៉ាអូខេមួយកន្លែងក្នុងក្រុង Thuan An នៃខេត្ត Binh Duong បានសម្លាប់មនុស្ស ៣២នាក់កាលពីថ្ងៃទី ៦ ខែកញ្ញាកន្លងទៅនេះ៕

ប្រភព: VN Express 

បរទេស៖ ស្ត្រីជន់ជាតិកូរ៉េម្នាក់ នឹងត្រូវទទួលទោស ព្រមទាំងទទួលការផាកពិន័យ បន្ទាប់ពីគេរកឃើញថាគាត់មានគម្រោងបរិច្ចាគថ្លើមរបស់គាត់ជាថ្នូរនឹងទឹកប្រាក់មួយចំនួន ព្រមទាំងដើម្បីឱ្យកូនប្រុសអាចមានការងារ និងទទួលបានដំណែងល្អពីម្ចាស់ក្រុមហ៊ុនដែលបានទទួលយកថ្លើមរបស់គាត់។

នាថ្ងៃទី ២៧ ខែធ្នូ ឆ្នាំ២០២២នេះ មានប្រព័ន្ធផ្សព្វផ្សាយក្នុងស្រុកក្នុងប្រទេសកូរ៉េខាងត្បូងបានរាយការណ៍កាលពីសប្តាហ៍មុនថាស្ត្រីជនជាតិកូរ៉េខាងត្បូងម្នាក់ក្នុងវ័យ ៥០ ឆ្នាំ ម្នាក់ ត្រូវបានគេស្គាល់ឈ្មោះថា អ្នកស្រី កា ត្រូវបានប៉ូលិសធ្វើការចាប់ខ្លួននិងបញ្ជូនទៅកាន់តុលាការដើម្បីកាត់ទោសខណៈពេលដែលគេបានរកឃើញថានាង គ្រោងនឹងបរិច្ចាគការធ្វើកោសល្យវិច័យនៃថ្លើមរបស់ខ្លួនជាថ្នូរនឹងប្រាក់១០០លានវ៉ុន ឬប្រហែល ៧៨,៥៦៧ដុល្លារ រួមទាំងដើម្បីទទួលបាននូវមុខតំណែងការងារសម្រាប់កូនប្រុសក្នុងក្រុមហ៊ុនផងដែរ។

គួរបញ្ជាក់ថានៅថ្ងៃទី ៧ ខែមីនា ឆ្នាំ ២០២២ លោកស្រី កា ត្រូវបានបញ្ជូនទៅមន្ទីរពេទ្យក្នុងទីក្រុងសេអ៊ូល ដើម្បីពិនិត្យរាងកាយមុនពេលទទួលការវះកាត់សម្រាប់ការបរិច្ចាគថ្លើម ក្នុងនោះនាងបានក្លែងខ្លួន ជាកូនប្រសាប្រធានាក្រុមហ៊ុនរបស់កូនប្រុសគាត់ ដែលបានធ្លាក់ខ្លួនឈឺ ដែលនឹងត្រៀមទទួលការបរិច្ចាគថ្លើមរបស់នាង។

លុះសប្តាហ៍បន្ទាប់ នាងត្រូវបានបញ្ជាក់ និងចុះឈ្មោះជាអ្នកបរិច្ចាគសរីរាង្គដោយវិទ្យាស្ថានគ្រប់គ្រងមជ្ឈមណ្ឌលឈាម ជាលិកា និងសរីរាង្គជាតិកូរ៉េខាងត្បូង។ ប៉ុន្តែបន្ទាប់ពីសម្រាកនៅមន្ទីរពេទ្យដើម្បី ត្រៀមវះកាត់ស្រាប់នាងបានឆ្លងកូវីដ-១៩ មុនពេលការវះកាត់ត្រូវពន្យារពេល។

ទោះជាយ៉ាងណាការស៊ើបអង្គេតក៏បានរកឃើញថាអ្នកស្រី អាចជាប់ពាក់ព័ន្ធនឹងការចូលរួមក្នុងការជួញដូរសរីរាង្គដែលជាទង្វើខុសច្បាប់របស់កូរ៉េខាងត្បូង។

យ៉ាងណាមិញ តុលាការកូរ៉េខាងត្បូងក៏បានផាកពិន័យលោកស្រី កា ៣លាន វ៉ុន ឬប្រហែល ២,៣៥៤  ខណៈ ដែលអ្នកជំងឺដែលបានទទួលការបរិច្ចាគនេះនឹងត្រូវផ្ដន្ទាទោសដាក់ពន្ធនាគារ រយៈពេល ១ ឆ្នាំ៕ ប្រភព៖ Dailynews

បរទេស៖ សោកនាដកម្មនៅក្នុងប្រទេសអេស្ប៉ាញ ដោយមានរថយន្តក្រុងមួយគ្រឿងបានធ្លាក់ពីលើស្ពានចូលទន្លេទាំងកំរោល ជាលទ្ធិផលបានបណ្ដាលឱ្យមនុស្សចំនួន ៦នាក់បានបាត់បង់ជីវិត និង២នាក់ផ្សេងទៀតបានរួចពីសេចក្ដីស្លាប់។

នៅយប់ ថ្ងៃទី ២៤ខែធ្នូ ឆ្នាំ២០២២ មានសោកនាដកម្មនៅប្រទេសអេស្ប៉ាញ ដោយមានឡានក្រុងដឹកអ្នកដំណើរមួយគ្រឿងបានធ្លាក់ពីលើស្ពានចូលទៅក្នុងទន្លេ Lerez ក្នុង Galicia ភាគខាងលិចនៃប្រទេសអេស្ប៉ាញយ៉ាងគួរឱ្យតក់ស្លុត។

ជាមួយគ្នានោះក្រុមអ្នកជួយសង្គ្រោះក៏បានប្រញាប់ប្រញាល់មកកាន់កន្លែងកើតហេតុចំពេលដែលមានភ្លៀងធ្លាក់ខ្លាំង និងចរន្តទឹកជ្រោះក្រោមស្ពានហូរខ្លាំង រហូតការស្វែងរកត្រូវបានពន្យារពេលជាច្រើនម៉ោងដោយសារភ្លៀងធ្លាក់យ៉ាងខ្លាំង ពាសពេញទាំងតំបន់ Galicia ។

ទោះជាយ៉ាងណាជាលទ្ធិផលចុងក្រោយបើតាមទិន្នន័យពីអ្នកឆ្លើយតបគ្រាអាសន្នបង្ហាញថាក្នុងហេតុការណ៍ដ៏អាក្រក់នេះបានបណ្ដាលឱ្យមានមនុស្សចំនួន៦នាក់បានបាត់បង់ជីវិត និងពីរនាក់ផ្សេងទៀតបានរងរបួស និងរួចរស់មានជីវិតដែលគាត់ជាអ្នកបើករថយន្តក្រុង អាយុ ៦៣ ឆ្នាំ និងម្នាក់ទៀតជាអ្នករួមដំណើរជាស្ត្រី។ ភ្លាមនោះអ្នកទាំងពីរត្រូវបានគេបញ្ជូនទៅសង្គ្រោះបន្ទាន់នៅមន្ទីរពេទ្យ។

តាមប្រភពបានឱ្យដឹងពីក្រុមអ្នកជួយសង្គ្រោះបន្ទាន់ ដោយបានបញ្ជាក់ថា កន្លែងដែលរថយន្តធ្លាក់ចូលទឹកនៅ ក្នុងកម្ពស់ ៤០ ម៉ែត្រ មូលហេតុពព្រោះរថយន្តបានក្រឡាប់ធ្លាក់ពីលើស្ពានដោយមិនដឹងមូលហេតុ ប៉ុន្តែក៏មានការសន្និដ្ឋានថាវាអាចទាក់ទងនឹងអាកាសធាតុភ្លៀងធ្លាក់ខ្លាំង។

ទោះជាយ៉ាងណាឧបទ្ទវហេតុនេះអាជ្ញាធរនៅតែបន្តធ្វើការស៊ើបអង្កេតយ៉ាងលម្អិត និងក្ដៅគគុកសម្រាបើដោះស្រាយជូនក្រុមគ្រួសារជនរងគ្រោះ៕ ប្រភព៖ PPTVHD36

ការស្ទង់មតិថ្មីមួយបង្ហាញថាលោកស្រី Paetongtarn Shinawatra កូនស្រីពៅរបស់អតីតនាយករដ្ឋមន្ត្រីថាក់ស៊ីន ស៊ីណាវ៉ាត្រា មានប្រជាប្រិយភាពជាងគេ សម្រាប់នាយករដ្ឋមន្ត្រីក្នុងចំណោមអ្នកបោះឆ្នោតថៃ។

ការស្ទង់មតិនេះត្រូវបានធ្វើឡើងដោយវិទ្យាស្ថានជាតិគ្រប់គ្រងការអភិវឌ្ឍន៍ (Nida) ចាប់ពីថ្ងៃទី ១៧ដល់ថ្ងៃទី ២២ខែធ្នូ ក្នុងចំណោមអ្នកឆ្លើយសំណួរចំនួន ២ ០០០ នៅទូទាំងប្រទេស។ អ្នកឆ្លើយសំណួរដែលមានអាយុ ១៨ ឆ្នាំ ឡើងទៅបានសាទរពីកម្រិតផ្សេងគ្នានៃប្រាក់ចំណូល និងប្រវត្តិសិក្សា។

លទ្ធផលស្ទង់មតិដែលប្រកាសដោយ Nida Poll កាលពីថ្ងៃអាទិត្យ បានរកឃើញថា អ្នកឆ្លើយសំណួរ ៣៤ ភាគរយពេញចិត្តអ្នកនាងPaetongtarn ជានាយករដ្ឋមន្ត្រី ។បន្ទាប់មក ១៤.០៥ភាគរយចង់ឱ្យនាយករដ្ឋមន្ត្រីដែលកំពុងកាន់អំណាច ឧត្តមសេនីយ៍ Prayut Chan-o-cha បន្តធ្វើដដែល។ នេះជាការស្ទង់មតិកម្រិតប្រជាប្រិយភាពទីបួនដែលធ្វើឡើង ដោយ NIDA ក្នុង ឆ្នាំ នេះ។ ការស្ទង់មតិមុននេះក៏បានរកឃើញថា Paetongtarn ជាជម្រើសដ៏ពេញនិយមបំផុតសម្រាប់នាយករដ្ឋមន្ត្រីដូចលើកទី០៤ដែរ។

គណៈកម្មាធិការរៀបចំការបោះឆ្នោតរបស់ប្រទេសថៃ (EC) បានកំណត់យកថ្ងៃទី៧ខែឧសភាឆ្នាំ២០២៣ ជាកាលបរិច្ឆេទសម្រាប់ការបោះឆ្នោតសកល ប្រសិនបើសភាតំណាងរាស្រ្តមិនត្រូវបានរំលាយដោយនាយករដ្ឋមន្ត្រីមុនការបញ្ចប់អាណត្តិទេនោះ៕

ប្រភព៖  The Nation Thailand