ខេត្តព្រះសីហនុ ៖ ឯកឧត្តម គួច ចំរើន អភិបាលខេត្តព្រះសីហនុ កាលពីថ្ងៃទី២៨ ខែធ្នូ ឆ្នាំ២០២២ បានចុះពិនិត្យទីតាំងសាងសង់រោងចក្រផលិតសំបកកង់រថយន្ត ដំណើរការចង្វាក់ផលិតកម្ម របស់រោងចក្រផលិតគ្រឿងសង្ហារឹម និងរោងចក្រផលិតបន្ទះសូឡា នៅតំបន់សេដ្ឋកិច្ចពិសេសក្រុងព្រះសីហនុ ស្ថិតនៅឃុំបិតត្រាំង ស្រុកព្រៃនប់ ខេត្តព្រះសីហនុ។

បច្ចុប្បន្នរោងចក្រផលិតសំបកកង់រថយន្ត ត្រូវការកម្លាំងពលកម្មចំនួន ១៥០០នាក់ ដំណាក់កាលតំបូងអាចផលិតសំបករថយន្តប្រភេទឡានតូច ១៥០០០គ្រឿង ក្នុងមួយថ្ងៃ ក្នុងកង់មួយអាចចំណាយពេល ៣៨វិនាទី ដោយឡែកសំបកកង់ឡានធំ អាចផលិតបាន ២៥០០ក្នុងមួយថ្ងៃ ក្នុងសំបកមួយអាចប្រើពេល៦០វិនាទី។ វត្ថុធាតុដើមក្នុង១ថ្ងៃ ត្រូវប្រើប្រាស់ជ័រកៅស៊ូ ចំនួន ៣០០តោន វត្ថុធាតុដើមនាំចូលពីប្រទេសថៃ និងម៉ាឡេស៊ី។ ក្រុមហ៊ុនខាងលើបច្ចុប្បន្ន មានរោងចក្រនៅប្រទេសចិន និងប្រទេសថៃ សំបកកង់ដែលផលិតរួចនាំទៅកាន់សហរដ្ឋអាមេរិក៕

ព្រះមហាក្សត្រ​ខ្មែរ​មួយ​អង្គ​ដែល​ជា​អ្នក​ផ្ដួចផ្ដើម​សំណង់​ស្ថាបត្យកម្ម​ដ៏​ល្បីល្បាញ និង​ជា​និមិត្ត​រូប​នៃ​ប្រទេស​កម្ពុជា គឺ​ព្រះបាទ​សូរ្យវរ្ម័នទី២។

នៅ​ក្នុង​រាជ្យ​របស់​ព្រះអង្គ បដិមា​តំណាង​ព្រះរាជា​ដែល​គេ​តម្កល់​ក្នុង​ប្រាសាទ​ធំៗ លែង​ជា​សិវលិង្គ​របស់​ព្រះ​ឥសូរ ទៀត​ហើយ តែ​ជា​ព្រះវិស្ណុ​បដិមា​វិញ។ ខាង​វិស័យ​សំណង់ ព្រះបាទ​សូរ្យវរ្ម័នទី២ ទ្រង់​ជា​ព្រះមហាក្សត្រ​មួយ​អង្គ​ដែល​មាន​ស្នា​ព្រះហស្ត​យ៉ាង​ច្រើន​សម្បើម ដោយ​ព្រះអង្គ​បាន​បន្ត​ការ​ស្ថាបនា​ប្រាសាទ​ភ្នំ​ជីសូរ ប្រាសាទ​ភ្នំ​សណ្ដក ប្រាសាទ​វត្ត​ភូ និង​ប្រាសាទ​ព្រះវិហារ។ លើសពីនេះទទៀតនោះគឹការផ្តួចផ្តើមកសាងប្រាសាទអង្គរដ៏ល្អឯក ដែលគ្មាននៅលើពិភពលោកតែម្តង។

មិនតែប៉ុណ្ណោះ ប្រាសាទ​អង្គរវត្ត ក៏​ជា​ទី​ដែល​គេ​តម្កល់​បដិមា​ព្រះវិស្ណុ និង​ក៏​ប្រហែល​ជា​ទី​ដែល​គេ​បញ្ចុះ​ព្រះ​ធាតុ​របស់​ព្រះអង្គ ក្នុង​ពេល​ដែល​ព្រះអង្គ​សោយ​ទិវង្គត​ទៅ​នោះ។ ព្រះបាទ​សូរ្យវរ្ម័នទី២ ទ្រង់​ឡើង​គ្រងរាជ្យ​ពី​ឆ្នាំ​១១១៣ ហើយ​ប្រហែល​ជា​ទ្រង់​សោយ​ទិវង្គត នៅ​ឆ្នាំ​១១៤៩ ឬ​ឆ្នាំ​១១៥០ នៃ​គ្រិស្ដសករាជ ដោយ​មាន​ព្រះ​មរណនាម​ថា បរមវិស្ណុលោក៕

មានហេតុការណ៍គ្រោះអគ្គីភ័យបានឆាបឆេះសណ្ឋាគារ និងកាស៊ីណូ Grand Diamond City ក្នុងក្រុងប៉ោយប៉ែត ដោយភ្លើងបានរាលដាលពីខាងកាស៊ីណូមកខាងសណ្ឋាគារមនុស្សជាច្រើនបានលោតចេញពីអគារ ហើយការចុងក្រោយបានបញ្ជាក់ថាមានអ្នកស្លាប់ ១០នាក់ និងរបួល៣០នាក់។

នាថ្ងៃទី ២៩ ខែធ្នូ ឆ្នាំ២០២២ មានសេចក្ដីរាយការណ៍ក្នុងស្រុកបានបញ្ជាក់ថា ​មានគ្រោះអគ្គិភ័យយ៉ាងសន្ទោសន្ធៅបានឆាបឆេះសណ្ឋាគារ និងកាស៊ីណូ Grand Diamond City ក្នុងក្រុងប៉ោយប៉ែត ខេត្តបន្ទាយមានជ័យ ជាប់នឹងព្រំដែនថៃ។

បើតាមប្រភពដដែលបានបញ្ជាក់ថាអគ្គិភ័យនេះបានកើតឡើងនៅវេលាម៉ោងប្រហែល ២ ទៀបភ្លឺ ថ្ងៃព្រហស្បតិ៍ ទី ២៩ ខែធ្នូ ឆ្នាំ ២០២២ ដោយភ្លើងចាប់ផ្តើមនៅជាន់ទី ២ បន្ទាប់ពីមានសំឡេងផ្ទុះជាច្រើនចេញពីអគារខាង កាស៊ីណូ ខណៈភ្លើងបានឆេះរាលដាលដល់ខាងសណ្ឋាគារ។

ទោះជាយ៉ាងណាបន្ទាប់ពីកើតហេតុអាជ្ញាធរក្នុងតំបន់ បានបញ្ជូនបុគ្គលិកសង្គ្រោះបន្ទាន់ចំនួន ៣៦០នាក់ និងរថយន្តសង្គ្រោះបន្ទាន់ ១១គ្រឿង ទៅ កាន់កន្លែងកើតហេតុ ខណៈពេលដែលគេបានរាយការណ៍បន្ថែមថាមានកម្លាំងមន្ត្រីមកពីប្រទេសថៃចូលរួមជួយផងដែរជាមួយនឹងឧទ្ធធម្ភាគចក្រជាច្រើនគ្រឿងក្នុងការចុះប្រតិបត្តិការជួយសង្គ្រោះ។

យ៉ាងណាមិញក្នុងហេតុការណ៍នេះគេបានឃើញមានជនរងគ្រោះចំនួន៥នាក់ បានសម្រេចចិត្តលោតចុះពីលើសណ្ឋាគារពីជាន់ទី៥ ដើម្បីគេចចេញពីសេចក្ដីស្លាប់នៃអគ្គិភ័យ ខណៈគេដឹងទៀតថាមានជនរងគ្រោះជាច្រើនផ្សេងទៀត ជាប់ក្នុងបន្ទប់ និងដំបូលអគារ។

ជាលទ្ធិផលរបាយការណ៍បឋមគេបានដឹងថា ​មនុស្សក្នុងសណ្ឋាគារ និងកាស៊ីណូ Grand Diamond City សរុបចំនួន៤០០នាក់ និងមានអ្នកស្លាប់ចំនួន១០នាក់ និងអ្នករងរបួសចំនួន៣០នាក់។

ទោះជាយ៉ាងណាចុងក្រោយនៅម៉ោង៧:០០ ព្រឹក  ភ្លើងនៅតែមិនអាចគ្រប់គ្រងបាន ហើយចំនួនអ្នកស្លាប់ ឬ របួសពិតប្រាកដ មិនទាន់ត្រូវបានគេបញ្ជាក់បន្ថែមទេ។

ខណៈដែលអាជ្ញាធរកំពុងតែដុតដៃដុតជើងក្នុងការស៊ើបអង្កេតបន្ថែម និងឈ្វែងរកពីមូលហេតុដែលបណ្តាលឱ្យភ្លើងឆាបឆេះ សណ្ឋាគារ និងកាស៊ីណូ Grand Diamond Cityនេះ៕

ភ្នំពេញ៖ លោក ព្រុំ សុខា រដ្ឋមន្ត្រីក្រសួងមុខងារសាធារណៈ បានថ្លែងបញ្ជាក់ថា ការដាក់ឱ្យប្រើប្រាស់អត្តសញ្ញាណប័ណ្ណមន្ត្រីរាជការស៉ីវិលប្រភេទថ្មី ដើម្បីប្រើប្រាស់ជាកាតសម្គាល់ខ្លួន និងជាប័ណ្ណ អេធីអឹម (ATM) សម្រាប់បើកប្រាក់បៀរវត្សពីធនាគារ រួមទាំងអាចប្រើប្រាស់ជាសម្រាប់មុខងារដទៃទៀតនេះ គឺជាធ្វើកំណែរទម្រង់រដ្ឋបាលសាធារណៈ ស្របទៅនឹងកម្មវិធីសម្រាប់អនុវត្តន៍ នូវគោលនយោបាយរបស់រដ្ឋាភិបាលឌីជីថល។

លោក ព្រុំ សុខា បានថ្លែងយ៉ាងដូចនេះ នាល្ងាចថ្ងៃទី២៨ ខែធ្នូ ឆ្នាំ២០២២នេះ បានអញ្ជើញជាអធិបតីភាពប្រកាសដាក់ឱ្យដំណើរការជាផ្លូវការ ការប្រើប្រាសស់អត្តសញ្ញាណប័ណ្ណមន្ត្រីរាជការស៉ីវិលប្រភេទថ្មី ដែលបានរៀបចំឡើងនៅសណ្ឋាគារ Cambodianna និងដោយមានការចូលរួមពីតំណាងធនាគារ រួមទាំងមន្ត្រីជំនាញពាក់ព័ន្ធជាច្រើនរូបទៀតផងដែរ។

លោក ព្រុំ សុខា បានបន្ថែមទៀតថា «ការប្រកាសដាក់ឱ្យប្រើប្រាស់ស្មាតកាតនេះ បានសញ្ជាក់ថា យើងបានសម្រេចនូវស្នាដៃមួយ ជាស្នាដៃពន្លកនៃកិច្ចខិតខំប្រឹងប្រែង ក្នុងកម្មវិធីសម្រាប់អនុវត្តន៍នូវគោលនយោបាយរដ្ឋាភិបាលឌីជីថល របស់រាជរដ្ឋាភិបាលនៃព្រះរាជជាណាចក្រកម្ពុជា ដែលមានសម្តេចតេជោ ហ៊ុន សែន ជាប្រមុខ [..] ក្នុងការប្រើបច្ចេកវិទ្យាទំនើប នៅក្នុងយុគសម័យនៃសម័យនៃបច្ចេកវិទ្យា 4.0»។

លោករដ្ឋមន្ត្រី ព្រុំ សុខា បានបញ្ជាក់ដែរថា ការប្រកាសដាក់ឱ្យប្រើប្រាស់អត្តសញ្ញាណប័ណ្ណមន្ត្រីរាជការប្រភេទថ្មីនេះ ក៏ជាជំហ៊ានមួយក្នុងការធ្វើកំណែរទម្រង់រដ្ឋបាលសាធារណៈ ដើម្បីធ្វើយ៉ាងណាក្នុងការអភិវឌ្ឍ និងការក៏សាងធនធានមនុស្ស ក៏សាងអភិវឌ្ឍស្ថាប័ន ហើយការបោះពុម្ពស្មានកាតនេះ ក៏ជាដើរឱ្យទាន់នៃការអភិវឌ្ឍបច្ចេកវិទ្យាផងដែរ។

លោក ព្រុំ សុខា បានបន្ថែមទៀតថា ដំណើរការប្រើប្រាស់អត្តសញ្ញាណប័ណ្ណ មន្ត្រីរាជការស៉ីវិលប្រភេទថ្មីនេះ គឺជាការកែប្រែក្តីស្រម៉ៃ ឱ្យក្លាយជាការពិត តាមរយៈការកែរប្រែពីកាតមន្ត្រីរាជការ ឱ្យបានក្លាយទៅជាកាតមន្ត្រីរាជការផង និងអាចប្រើប្រាស់ដើម្បីបើកប្រាក់ខែ តាមរយៈធនាគារជាដៃគូផង រួមទាំងការប្រើប្រាស់ទៅមធ្យោបាយផ្សេងៗមួយចំនួនទៀត។

លោកបានអះអាងទៀតថា ក្រសួងក៏នឹងចាប់ផ្តើមធ្វើការអភិវឌ្ឍលើបញ្ហាផ្សេងៗទៀត ដែលក្នុងនោះក្រសួងក៏នឹងរៀបចំលើគម្រោងគាំពារសុខុមាលភាព របស់មន្ត្រីរាជការរួមទាំងបញ្ហាមួយចំនួនទៀតផងដែរ។

បើតាមលោក ព្រុំ សុខា សម្រាប់អត្តសញ្ញាណប័ណ្ណមន្ត្រីរាជការស៊ីវិលថ្មីនេះ គឺមានសុពលភាពរហូតដល់១០ឆ្នាំ ហើយបន្ទាប់ពីការធ្វើជូនមន្ត្រីរាជការស៊ីវិលនេះរួចហើយ ក៏និងមានការរៀបចំធ្វើសម្រាប់មន្ត្រីជាប់កិច្ចសន្យា រួមទាំងបុគ្គលិកបណ្តែតផងដែរ។ ជាមួយគ្នានោះលោកបានបន្ថែមថា សម្រាប់ការប្រើប្រាស់កាតនេះ ក្នុងការបើកប្រាក់ខែបាននៅពេលណានោះ គឺអាស្រ័យទៅលើតាមបណ្តាក្រសួងស្ថាប័ន បានធ្វើការផ្ញើព័ត៍មានពីមន្ត្រីរបស់ខ្លួន មកកាន់អគ្គនាយកដ្ឋានព័ត៍មានវិទ្យារបស់ក្រសួង ដើម្បីបញ្ជូលឈ្មោះផ្ញើទៅកាន់បណ្តាធនាគារ ដែលជាដៃគូផងដែរ។

បើតាមរបាយការណ៍ ការដាក់ឱ្យប្រើប្រាស់អត្តសញ្ញាណប័ណ្ណមន្ត្រីរាជការស៉ីវិលប្រភេទថ្មីនេះ ដើម្បីឆ្លើយតបទៅនឹងដំណើរការនៃបដិវត្តន៍ឧស្សាហកម្មជំនាន់ទី៤ ស្របពេលជាមួយនឹងការ
រីករាលដាលនៃជំងឺកូវីដ១៩ ក្របខណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ ហើយត្រូវបានរៀបចំឡើងកាលពីឆ្នាំ២០២១ ដែលមានលក្ខណៈជាក្របខណ្ឌរួម និងជាផែនទី
ចង្អុលផ្លូវ ក្នុងគោលដៅជំរុញដំណើរការបរិវត្តកម្មឌីជីថល លើគ្រប់តួអង្គ ក្នុងសេដ្ឋកិច្ច និងសង្គមកម្ពុជាទាំងមូល។

ក្របខណ្ឌគោលនយោបាយនេះ មានសសរស្តម្ភចំនួន៣ គឺ (១) ការកសាងរដ្ឋាភិបាលឌីជីថល (២) ការកសាងពលរដ្ឋឌីជីថល និង(៣)ការកសាងធុរកិច្ចឌីជីថល។ អនុលោមតាមក្របខណ្ឌគោលនយោបាយខាងលើនេះ រាជរដ្ឋាភិបាលបានដាក់ចេញ នូវគោលនយោបាយរដ្ឋាភិបាលឌីជីថល កម្ពុជា ២០២២-២០៣៥ ដោយផ្តោតលើចក្ខុវិស័យ «ការកសាងរដ្ឋាភិបាលឌីជីថល ដើម្បីលើកកម្ពស់ គុណភាពជីវិតនិងទំនុកចិត្តប្រជាពលរដ្ឋ តាមរយៈការបម្រើសេវាសាធារណៈឱ្យកាន់តែប្រសើរ»។

ការបោះពុម្ព និងផ្តល់ជូនអត្តសញ្ញាណប័ណ្ណ មន្ត្រីរាជការប្រភេទថ្មី បានឆ្លុះបញ្ចាំងយ៉ាងប្រត្យក្សនូវកិច្ចខិតខំប្រឹងប្រែង និងការឆ្លើយតបថ្មីមួយទៀត របស់ក្រសួងមុខងារសាធារណៈ ក្នុងការរួមចំណែក
ជំរុញការកសាង រដ្ឋាភិបាលឌីជីថល តាមរយៈការធ្វើទំនើបកម្មនិងនវានុវត្ត ក្នុងរដ្ឋបាលសាធារណៈផងដែរ៕

ភ្នំពេញ៖ អភិបាលខេត្តកណ្ដាល លោក គង់ សោភ័ណ្ឌ បានបញ្ជាដល់នគរបាលខេត្តកណ្ដាល ត្រូវកសាងសុំណុំរឿងបញ្ជូនម្ចាស់ទូក-ដ ទៅតុលាការ ក្រោយករណីធ្លាក់ម៉ូតូកង់៣ឥណ្ឌាមួយគ្រឿង ចូលទន្លេបណ្ដាលឲ្យកុមារីម្នាក់ ស្លាប់យ៉ាងខ្លោចផ្សារ ។

នៅក្នុងពេលចុះជួបសំណេះសំណាល និងចែកវិញ្ញាប័ណ្ណបត្រម្ចាស់ម្ចាស់អចលនវត្ថុ នៅស្រុកលើកដែក នាថ្ងៃទី២៨ ខែធ្នូ ឆ្នាំ២០២២លោកអភិបាលខេត្តបានថ្លែងថា «លោកឈឺចាប់ម្ដងរួចមកហើយអំពីការលិចទូក-ដបណ្ដាលឲ្យសិស្សសាលាស្លាប់១១នាក់នៅកំពង់ភ្នំ ហើយបានដាក់បទបញ្ជា ឲ្យរឹតបន្តឹងចំពោះម្ចាស់អាជីវកម្មទូក-ដ ឲ្យមានបច្ចេកទេសត្រឹមត្រូវ ចុះហេតុអីបានជាមានករណីធ្លាក់កង់៣ឥណ្ឌាស្លាប់ក្មេងស្រីម្នាក់ទៀតនៅស្រុកស្អាងអីចឹង? ខ្ញុំឈឺចាប់ណាស់! កាលទូក-ដ នៅកំពង់ភ្នំលិចស្លាប់១១នាក់ ខ្ញុំហៅថាទូក-ដ នោះឈ្មោះថា ទូក-ដ សម្លាប់មនុស្សម្ដងរួចមកហើយ ចុះទូក-ដ នេះទៀត តើទូក-ដ អ្វី? គឺទូក-ដ ពិឃាតមនុស្ស។ ខ្ញុំក៏ស្នើរទៅមន្ទីរសេដ្ចកិច្ច និងហិរញ្ញវត្ថុខេត្តឲ្យលុបចោលអារឿងទូក-ដ បែបបុរាណដែលដាក់ទូក២ទន្ទឹមគ្នា ហើយបើកកាត់ទន្លេនេះ ខ្ញុំបញ្ជាឲ្យឈប់ភ្លាម ត្រូវមើលឡើងវិញអារឿងទូក-ដនេះ មើលហើយត្រូវធ្វើផងច្បាស់លាស់មក»។

សូមរម្លឹកថា ករណីសោកនាដកម្មលិចទូក-ដបណ្ដាលឲ្យសិស្សសាលាស្លាប់ចំនួន១១នាក់បានបាត់បង់ជីវិត និងរួចខ្លួនបាន៤នាក់ បានកើតឡើងនៅយប់ថ្ងៃព្រហស្បតិ៍ថ្ងៃទី១៣ ខែតុលា ឆ្នាំ២០២២ កាលពីវេលាម៉ោង៧យប់ ស្ថិតនៅចំណុច ទូកដទទឹងស្ថិតនៅ ភូមិកោះចំរើន ឃុំកំពង់ភ្នំ ស្រុកលើកដែក ។ រីឯមួយករណីទៀតគឺ កង់៣ឥណ្ឌាបានរអិលធ្លាក់ចូលទន្លេបាសាក់ភូមិសាស្ត្រស្រុកស្អាង បណ្ដាលឲ្យកុមារីម្នាក់ស្លាប់។

ហេតុការណ៍នេះ បានកើតឡើង ល្ងាចថ្ងៃទី២៦ ធ្នូ ២០២២ ត្រង់ចំណុចកំពង់ចម្លងក្បាលកោះគរ-ស្វាយប្រទាល ស្ថិតក្នុងភូមិឫស្សីជ្រោយ ឃុំស្វាយប្រទាល ស្រុកស្អាង ខេត្តកណ្តាល ។

សូមជម្រាបថា ម្ចាស់ទូក-ដ នៅកំពង់ភ្នំត្រូវបានកសាងសុំណុំរឿងឡើងតុលាការ ហើយត្រូវលោក លាវ ស្រេង ព្រះរាជអាជ្ញាអមសាលាដំបូងខេត្តកណ្ដាល បានសម្រេចចោទប្រកាន់ទោស ប៉ុន្តែអនុញ្ញាតឲ្យត្រឡប់ទៅផ្ទះបណ្ដោះអាសន្នសិន ។ រីឯករណីស្លាប់ក្មេងស្រីនៅឯស្រុកស្អាងវិញ អភិបាលខេត្តកណ្ដាលបានបញ្ជាឲ្យនគរបាលកសាងសំណុំរឿងបញ្ជូនទៅតុលាការផងដែរ៕

ភ្នំពេញ៖ មានការប៉ះទង្កិចគ្នាដោយអាវុធជាច្រើនគ្រាប់ ក្នុងប្រតិបត្តិការបង្ក្រាបបទល្មើសគ្រឿងញៀន នៅតាមបណ្ដោយផ្លូវ៦០ម៉ែត្រ ស្ថិតក្នុងខណ្ឌដង្កោ រាជធានីភ្នំពេញ បណ្ដាលឲ្យមន្ដ្រីនគរបាលម្នាក់ស្លាប់។ ហេតុការណ៍នេះ បានកើតឡើងនៅវេលាម៉ោងប្រមាណ៨យប់ ថ្ងៃទី២៨ ខែធ្នូ ឆ្នាំ២០២២នេះ។

សេចក្ដីរាយការណ៍ពីភ្នាក់ងារជំហ៊ានដំបូងបានឲ្យដឹងថា ប្រតិបត្តិការបង្ក្រាបបទល្មើសគ្រឿងនេះ ធ្វើឡើងដោយកម្លាំងរបស់មន្ទីរប្រឆាំងគ្រឿងញៀន នៃអគ្គស្នងការដ្ឋាននគរបាលជាតិ។

បើតាមសេចក្ដីរាយការណ៍ ពេលកម្លាំងជំនាញកំពុងតាមប្រមាញ់ឧក្រិដ្ឋជនគ្រឿងញៀន ដែលជាជនជាតិបរទេស (មិនទាន់បញ្ជាក់ច្បាស់ថា ចិន ឬជនជាតិវៀតណាម) ស្រាប់តែពួកគេបើកការបាញ់ប្រហារមកលើកម្លាំងនគរបាលតែម្ដង បានបណ្ដាលឲ្យមន្ដ្រីម្នាក់ស្លាប់នៅកន្លែងកើត។

សេចក្ដីរាយការណ៍បានបញ្ជាក់បន្ថែមថា មន្ដ្រីនគរបាលដែលរងរបួសរហូតបាត់បង់ជីវិតនេះ ឈ្មោះ ម៉ិច ឆាយភីវ័យ ពាក់ស័ក្ដិ៤ និងមានតួនាទីជារងការិយាល័យ។ ដោយឡែក ឧក្រិដ្ឋជនដែលចាប់ខ្លួនបាននោះ គេមិនទាន់ដឹងថាប៉ុន្មាននាក់នៅឡើយទេ៕