ប្រទេសថៃ៖ ថៃទទួលភ្ញៀវទេសចរមកពីចិនថ្ងៃដំបូងបន្ទាប់ពីប្រទេសនេះបានបើកសេរី ជាមួយនឹង១៥ ជើងហោះហើរមកពីចិនមានចំនួន ៣៤៦៥ នាក់ ខណៈដែលចិនកក់ជើងហោះហើរចំនួន ៣៨៨ ជើងទៀត ដែលមានអ្នកដំណើរ ១០០.០០០ នាក់បន្ថែមទៀត។ លើសពីនោះថៃរំពឹងថានៅចុងឆ្នាំនេះ អ្នកដំណើរចិននឹងកើនលើស ១០ លាននាក់។ ខណៈប្រទេសថៃបានទទួលភ្ញៀវទេសចរមកពីគ្រប់ប្រទេស ដោយមិនចាំបាច់បង្ហាញវ៉ាក់សាំង ២ ដង  និងមិនចាំបាច់ មានកាតធានារ៉ាប់រង១០,០០០ដុល្លារនោះឡើយ។

កាលពីថ្ងៃទី១០ ខែមករា ឆ្នាំ២០២៣  លោក Anutin Charnvirakul ឧបនាយករដ្ឋមន្ត្រី និងរដ្ឋមន្ត្រីក្រសួងសុខាភិបាល បានបង្ហាញពីទិន្នន័យ ក្រោយទទួលភ្ញៀវទេសចរមកពីប្រទេសចិនដែលធ្វើដំណើរមកកាន់ប្រទេសថៃ បន្ទាប់ពីចិនបានប្រកាសបើកប្រទេសតាំងពីថ្ងៃទី ៨ ខែ មករា កន្លងទៅនេះ។

ការបញ្ជាក់របស់លោកបានឱ្យដឹងថា ជើងហោះហើរមកពីប្រទេសចិន មកដល់អាកាសយានដ្ឋានសុវណ្ណភូមិនៃប្រទេសថៃសម្រាប់ថ្ងៃដំបូងនេះ មានចំនួន ១៥ជើងហោះហើរ ដែលសរុបមានចំនួន ៣,៤៦៥ នាក់។

ទន្ទឹមនឹងនោះចំពោះគោលការណ៍ណែនាំសម្រាប់ការទទួល ភ្ញៀវទេសចរ គឺស្របតាមវិធានការសុខភាពសាធារណៈទូទៅ ដោយប្រទេសថៃបើកទូលាយសម្រាប់ភ្ញៀវទេសចរមកពីគ្រប់ប្រទេស ជាមួយនឹងតម្រូវការ និងគោលការណ៍ណែនាំដូចៗគ្នា។ ក្រោយពីកិច្ចប្រជុំគណៈកម្មាធិការសិក្សាក្រោមច្បាប់ស្តីពីជំងឺឆ្លង ដែលមានអ្នកជំនាញសុខភាពសាធារណៈជាសមាជិក រួមគ្នា ពិភាក្សាអំពីតម្រូវការសម្រាប់ពិនិត្យមើលភ្ញៀវទេសចរអន្តរជាតិ។

ជាលទ្ធិផល ការសន្និដ្ឋានសមស្របមួយបានសម្រេច មិនរឹតបន្តឹងលក្ខខណ្ឌក្នុងការបង្ហាញព័ត៌មាន អំពី ការទទួលបានការចាក់វ៉ាក់សាំងចំនួន ២ ដង និង មិនមានការធ្វើតេស្តដោយចៃដន្យសម្រាប់កូវីត-១៩ ពីអ្នកទេសចរនោះទេ។

បន្ថែមពីនោះរួមទាំងការលុបចោលការតម្រូវឱ្យអ្នកទេសចរមានការធានារ៉ាប់រងចំនួន ១០,០០០ ដុល្លារ ព្រោះវាត្រូវបានគេរកឃើញថាឥឡូវនេះអ្នកដំណើរភាគច្រើនកំពុងទទួលបានការចាក់វ៉ាក់សាំងជាមូលដ្ឋានចំនួន ២ ដងគ្រប់ៗគ្នា ស្ថិតក្នុងប្រទេសនីមួយៗដែលមានវិធានការគ្រប់គ្រងជំងឺកូវីដក្នុងប្រទេសរបស់ពួកគេរួចទៅហើយ។

យ៉ាងណាមិញ បើតាមការប៉ាន់ប្រមាណបានបង្ហាញឱ្យដឹងថា នៅពេញមួយឆ្នាំ២០២៣ នេះ ប្រទេសថៃ នឹងមានភ្ញៀវទេសចរមកពីប្រទេសចិនប្រមាណពី ៧ ទៅ ១០ លាននាក់ ខណៈក្រសួងដឹកជញ្ជូនបានត្រៀមខ្លួនរួចជាស្រេចដើម្បីទទួលភ្ញៀវទេសចរបរទេសនៅគ្រប់អាកាសយានដ្ឋានជាមួយនឹងសមត្ថភាពគ្រប់គ្រាន់សម្រាប់ផ្ទុកអ្នកដំណើរ សម្រាប់ភ្ញៀវសរុប ២០.៥លាននាក់៕ ប្រភព៖ Thai Post

បរទេស៖ កម្លាំងទាហានស៊ីឈ្នួល Wagner ទាមទារការគ្រប់គ្រងទីក្រុង Soledar ដែលជាទីក្រុងរ៉ែអំបិលដ៏ធំរបស់អ៊ុយក្រែន និងជាទីតាំងដែលមានសារៈសំខាន់ខាងសេដ្ឋកិច្ច ផលប្រយោជន៍អាជីវកម្ម និងយុទ្ធសាស្ត្រហើយទីនេះក៏ជា “ទីក្រុងអំបិលដ៏ធំបំផុតនៅអឺរ៉ុប”ផងដែរ។

នាថ្ងៃទី ១១ ខែ មករា ឆ្នាំ២០២៣ទីភ្នាក់ងារព័ត៌មានបរទេសរាយការណ៍ពី ទីក្រុងគៀវ ប្រទេសអ៊ុយក្រែន បានឱ្យដឹងថា លោក Yevkini Prigozin មហាសេដ្ឋីពាណិជ្ជកររបស់ រុស្ស៊ី និងជាស្ថាបនិក ក៏ដូចជាម្ចាស់នៃ “Wagner Group” ដែលជាអង្គការទាហានស៊ីឈ្នួលអន្តរជាតិដ៏ធំមួយ ហើយលោកក៏ជាមនុស្សម្នាក់ក្នុង ចំណោមអ្នកជិតស្និទ្ធបំផុតរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន។

ដោយក្នុងនោះលោកបាននិយាយថា អ្នកចម្បាំងរបស់ Wagner ដែលជាអ្នកគាំទ្រកងទ័ពរុស្ស៊ី អាចនឹងកាន់កាប់ទឹកដីទាំងមូលនៃ Soledar City នៅភាគខាងកើតប្រទេសអ៊ុយក្រែន។

ហើយឥឡូវនេះអ្នកចម្បាំង Wagner បានបង្កើតបន្ទាយមួយនៅចំណុចកណ្ដាលដែលជាបេះដូងនៃទីក្រុង Soledar  ដើម្បីគ្រប់គ្រងការប្រយុទ្ធគ្នាដែលបន្តកើតឡើងនៅតាមដងផ្លូវ។

ជាមួយគ្នានោះ បើតាមក្រសួងការពារជាតិអង់គ្លេស ក៏បានបញ្ចេញទិន្នន័យស៊ើបការណ៍សម្ងាត់របស់ខ្លួន និងបាននិយាយស្រដៀងគ្នានេះថា ក្រុងទាហាន Wagner នឹងអាចគ្រប់គ្រង Soledar City ដោយជោគជ័យបន្ទាប់ពីការប្រយុទ្ធគា្នរយៈជាមួយអ៊ុយក្រេន រយៈពេល៤ថ្ងៃនៅតំបន់នេះ។

ដោយឡែកក្រសួងការពារជាតិអ៊ុយក្រែនបានចេញសេចក្តីថ្លែងការណ៍មួយដោយនិយាយថា៖ កងទ័ពអ៊ុយក្រែននៅតែឈរជើងក្នុងមូលដ្ឋាននៅ Soledar  ដើម្បីទប់ទល់នឹងការវាយលុករបស់កងទ័ពរុស្ស៊ី និងទាហាន Wagner ដែលនៅតែព្យាយាមចង់កាន់កាប់ទីក្រុង Soledar ដែលជាអណ្តូងរ៉ែអំបិលធំជាងគេនៅអឺរ៉ុប។

ខណៈដែល សេតវិមាននៅតែវិភាគរឿងនេះថា លោក Prigozin នៅតែបញ្ជូនអ្នកប្រយុទ្ធ Wagner ទៅប្រយុទ្ធនៅសមរភូមិ Bagmut   និងSoleda ដោយសារពួកគេចង់កាន់កាប់អណ្តូងរ៉ែ អំបិល និង អណ្តូងរ៉ែ ហ្គីបស៊ូម ក្នុងតំបន់នោះ សម្រាប់ផលប្រយោជន៍អាជីវកម្មផ្ទាល់ខ្លួនរបស់ពួកគេ ប៉ុន្តែលោក Prigozin នៅតែរក្សាឥរិយាបទក្នុងការធ្វើ អត្ថាធិប្បាយ ដោយលើកឡើង និងយកលេសថាធ្វើសម្រាប់ “ផលប្រយោជន៍យោធា” ទៅវិញ៕ ប្រភព៖​Dailynews

រដ្ឋធានីស៊េអ៊ូល៖ ជាមួយនឹងការបង្កើនសកម្មភាពយោធារបស់ក្រុងប៉េកាំង នៅក្នុងតំបន់ ធ្វើឲ្យប្រទេសជប៉ុន និង កូរ៉េខាងត្បូង និង សម្ពន្ធមិត្ត ចាត់ទុកជាការគំរាមកំហែងដល់សន្ដិសុខជាតិរបស់ខ្លួន ទើបសហរដ្ឋអាមេរិក បានបង្កើនការធ្វើសមយុទ្ធយោធារួមគ្នា ជាមួយនឹងកងទ័ពរបស់ប្រទេសជិតខាងចិន។

សារព័ត៌មាន The Eurasia Times បានចេញផ្សាយ កាលពីថ្ងៃអង្គារ ទី១០ ខែមករា ថា កងទ័ពសហរដ្ឋអាមេរិក បាន និង កំពុងតែធ្វើសមយុទ្ធ កាន់តែច្រើនឡើងៗ ជាមួយសម្ពន្ធមិត្តរបស់ខ្លួន នៅក្នុងតំបន់ឥណ្ឌូ-ប៉ាស៊ីហ្វិក សម្រាប់បង្កើននូវការត្រៀមខ្លួនរបស់ពួកគេ និង ពង្រឹងទំនាក់ទំនងដល់សន្តិសុខជាតិ ចំពេលមានភាពតានតឹង នៅក្នុងតំបន់។

នៅក្នុងរយៈពេលប៉ុន្មានខែកន្លងមកនេះ សហរដ្ឋអាមេរិក បានចូលរួមធ្វើសមយុទ្ធយោធាយ៉ាងច្រើន ជាមួយនឹងប្រទេសមហាអំណាចសេដ្ឋកិច្ចនានា នៅជុំវិញប្រទេសចិន រួមមាន ជប៉ុន ឥណ្ឌា កូរ៉េខាងត្បូង និង តៃវ៉ាន់…ជាដើម។ ការបង្កើនសកម្មភាពយោធារបស់ក្រុងវ៉ាស៊ីនតោន កំពុងតែធ្វើឲ្យក្រុមអ្នកជំនាញ ប៉ាន់ប្រមាណ អំពីគោលបំណង បញ្ជូនសារព្រមាន ទៅដល់ក្រុងប៉េកាំង និង រារាំងដល់សកម្មភាពយោធារបស់កូរ៉េខាងជើង។

សហរដ្ឋអាមេរិក និង កូរ៉េខាងត្បូង កាលពីថ្ងៃទី២០ ខែធ្នូ ឆ្នាំ២០២២កន្លងទៅនេះ បានធ្វើសមយុទ្ធទ័ពអាកាសរួមគ្នា ដោយមានចូលរួម ពីយន្ដហោះទម្លាក់គ្រាប់បែកយុទ្ធសាស្រ្ដ B-52H, យន្ដហោះចម្បាំងបំកាយ F-22 ជាច្រើនគ្រឿង និង យន្ដហោះបំបាំងកាយ F-35A ហើយយន្ដហោះប្រដេញ F-15K របស់កូរ៉េខាងត្បូង។ ការធ្វើសមយុទ្ធយោធារួមគ្នានេះ ក៏ជាការបង្ហាញវត្ដមានយន្ដហោះបំបាំងកាយដ៏ទំនើបបំផុតរបស់សហរដ្ឋអាមេរិក ទៅកាន់ប្រទេសកូរ៉េខាងត្បូង ជាលើកដំបូង ចាប់តាំងពីខែឧសភា ឆ្នាំ២០១៨មក។

សមយុទ្ធកងទ័ពអកាសនេះ បានធ្វើឡើង ត្រឹមតែរយៈពេលថ្ងៃ២ ក្រោយពេលកូរ៉េខាងជើង បានអះអាង អំពីការអនុវត្ដនូវការបាញ់សាកល្បងផ្កាយរណបឈ្លបយកការណ៍យោធា ដែលអាចនឹងធ្វើឡើង នៅដើមឆ្នាំ២០២៣។ ស្របពេលកូរ៉េខាងជើង កំពុងតែបង្កើននូវការគំរាមកំហែងកាន់តែខ្លាំងក្លាឡើងនោះ សហរដ្ឋអាមេរិក និង កូរ៉េខាងត្បូង បានប្តេជ្ញា ថា នឹងបង្កើននូវការត្រៀមខ្លួនប្រយុទ្ធ និង ធ្វើអន្តរប្រតិបត្តិការរបស់ប្រទេសទាំង២។

ចន្លោះពីខែតុលា ដល់ ខែវិច្ឆិកា សហរដ្ឋអាមេរិក និង កូរ៉េខាងជើង បានធ្វើសមយុទ្ធយោធារួមគ្នាដ៏ធំ នៅក្នុងរយៈពេលជាច្រើនឆ្នាំ។ សមយុទ្ធយោធានេះ មានការចូលរួម ពីយន្ដហោះចម្បាំងជាង២០០គ្រឿង និង មានកងទ័ពរាប់ម៉ឺននាក់ មកពីកងទ័ពអាកាសរបស់កូរ៉េខាងត្បូង និង កងទ័ពអាកាស កងម៉ារីន កងទ័ពជើងទឹក កងទ័ពជើងគោករបស់សហរដ្ឋអាមេរិក។

ជាមួយគ្នានេះដែរ សហរដ្ឋអាមេរិក ក៏បានបញ្ជូននាវាផ្ទុកយន្ដហោះ ដើរដោយថាមពលនុយក្លេអ៊ែរ ប្រភេទ USS Ronald Reagan សម្រាប់ការធ្វើសមយុទ្ធយោធា ជាមួយនឹងកូរ៉េខាងត្បូង។ ទន្ទឹមគ្នានេះ រដ្ឋាភិបាលក្រុងសេអ៊ូល បានប្រកាស អំពីផែនការធ្វើសមយុទ្ធយោធារួមគ្នា ទ្រង់ទ្រាយធំ ជាមួយនឹងកងទ័ពសហរដ្ឋអាមេរិក នៅក្នុងឆ្នាំ២០២៣ ដោយរួមទាំងការធ្វើសមយុទ្ធបាញ់គ្រាប់ពិតទ្រង់ទ្រាយធំ នៅក្នុងរយៈពេល៦ឆ្នាំបន្ដទៅមុខទៀត។

ក្រសួងការបរទេសសហរដ្ឋអាមេរិក កាលពីខែសីហា ឆ្នាំ២០២២ បានអនុម័តនូវកញ្ចប់គ្រឿងសព្វាវុធ មានទំហំទឹកប្រាក់ ១,១ពាន់លានដុល្លារ សម្រាប់តៃវ៉ាន់ ក្រោយពេលមានភាពតានតឹតជាមួយនឹងតៃវ៉ាន់ នៅច្រកសមុទ្រតៃវ៉ាន់ ក្រោយដំណើរទស្សនកិច្ចរបស់ប្រធានសភាដ៏មានឥទ្ធិពលរបស់សហរដ្ឋអាមេររិក លោកស្រី ណាន់ស៊ី ផេឡូស៊ី (Nancy Pelosi) នៅក្នុងទីក្រុងតៃប៉ិ ចន្លោះពីថ្ងៃទី២-៣ ខែសីហា។ កញ្ចប់គ្រឿងសព្វាវុធទាំងនោះ មានទាំងកម្មវិធីរ៉ាដាស៊ើបការណ៍សម្ងាត់, មីស៊ីល Harpoon ចំនួន៦០ដើម ផលិតដោយក្រុមហ៊ុន Boeing និង មីស៊ីលបាញ់ពីលើអាកាសតាក់តិក ប្រភេទ Sidewinder ចំនួន១០០ដើម ផលិតដោយក្រុមហ៊ុនរ៉ៃថុន (Raytheon) ។

លោក ចូ បៃដិន (Joe Biden) ប្រធានាធិបតីសហរដ្ឋអាមេរិក កាលពីខែធ្នូ បានចុះហត្ថលេខាលើច្បាប់អនុញ្ញាតការពារជាតិ (National Defense Authorization Act) ដោយបានបែងចែកប្រាក់ ចំនួន១០ពាន់លានដុល្លារ សម្រាប់ជំនួយសន្ដិសុខ សម្រាប់កោះតៃវ៉ាន់ នៅក្នុងរយៈពេល៥ឆ្នាំទៅមុខទៀត។ សកម្មភាពរបស់ក្រុងវ៉ាស៊ីនតោន បានផ្ដល់មាគ៌ាមួយបន្ថែមទៀត សម្រាប់ការផ្ទេរគ្រឿងសឹកចម្បាំង បន្ថែមពីការលក់គ្រឿងយុទ្ធោបករណ៍ទំនើបៗ ដល់ក្រុងតៃប៉ិ។

ច្បាប់នេះ ក៏ផ្តល់សិទ្ធិអំណាចដល់ប្រធានាធិបតីសហរដ្ឋអាមេរិក អាចបង្ហូរគ្រឿងយុទ្ធភណ្ឌ ដែលមានស្រាប់ ចេញពីឃ្លាំងអាវុធរបស់កងទ័ពអាមេរិក សម្រាប់ផ្ទេរទៅកោះតៃវ៉ាន់ នៅក្នុងករណីមានការវាយប្រហារពីប្រទេសចិន ឬ សកម្មភាពឈ្លានពានណាមួយ មានលក្ខណៈស្រដៀងទៅនឹងអ្វីដែលរដ្ឋបាលរបស់លោក Biden កំពុងតែធ្វើ សម្រាប់អ៊ុយក្រែន។

ការបង្កើនសមត្ថភាពការពារជាតិរបស់តៃវ៉ាន់ កំពុងតែក្លាយជាអាទិភាពបន្ទាន់មួយ សម្រាប់សហរដ្ឋអាមេរិក ក្រោយពេលក្រុមមន្រ្ដីជាន់ខ្ពស់ នៃមន្ទីរបញ្ចកោណ បានព្រមាន ថា កងទ័ពចិន កំពុងតែធ្វើដំណើរឆ្ពោះទៅមុខ បង្កើនសមត្ថភាព វាយប្រហារទៅលើតៃវ៉ាន់ នៅក្នុងឆ្នាំ២០២៧៕

អន្តរជាតិ៖ មន្ទីរបញ្ចកោណ នៅថ្ងៃអង្គារសប្ដាហ៍នេះ បាននិយាយថាសហរដ្ឋអាមេរិកនឹងបណ្ដុះបណ្ដាលទាហានអ៊ុយក្រែន នៅឯមូលទ័ពមួយកន្លែងស្ថិតនៅក្នុង រដ្ឋអូក្លាហូម៉ា (Oklahoma) ពីរបៀបប្រើប្រាស់ និងការថែទាំប្រព័ន្ធខែលប្រឆាំងមីស៊ីល ប៉ាទ្រីយ៉ូត (Patriot) ដែលទីក្រុងវ៉ាស៊ីនតោនប្រកាសបញ្ជូនឱ្យទីក្រុងកៀវ។ នេះបើតាមការចេញផ្សាយ ដោយទីភ្នាក់ងារសារព័ត៌មាន Nbcnews ។

ទីក្រុងវ៉ាស៊ីនតោន បានសន្យាផ្ដល់ប្រព័ន្ធខែលប្រឆាំងមីស៊ីល ប៉ាទ្រីយ៉ូត (Patriot) មួយគ្រឿងដល់អ៊ុយក្រែន កាលពីចុងឆ្នាំ២០២២កន្លងទៅ ដើម្បីជួយទីក្រុងកៀវទប់ទល់នឹងការវាយប្រហារ បំផ្លិចបំផ្លាញតាមផ្លូវអាកាសពីសំណាក់កងទ័ពរុស្ស៉ី។ ថ្លែងប្រាប់អ្នកសារព័ត៌មានអ្នកនាំពាក្យមន្ទីរបញ្ចកោណ លោក ផាត រ៉ៃដឺ (Pat Ryder) បានគូសបញ្ជាក់ដូច្នេះថា «ការបណ្ដុះបណ្ដាល ទាហានអ៊ុយក្រែនពីរបៀបប្រើប្រព័ន្ធមីស៊ីលប៉ាទ្រីយ៉ូត (Patriot) នឹងត្រូវចាប់ផ្ដើមក្នុងការពេលឆាប់ៗខាងមុខនេះ ឬអាចនៅសប្ដាហ៍ក្រោយ នៅឯមូលដ្ឋាន Fort Sill នៃរដ្ឋ Oklahoma។ លោក រ៉ៃដឺ បន្តទៀតថាទាហានអ៊ុយក្រែនប្រហែលពី៩០ ដល់១០០នាក់ នឹងត្រូវចូលរួមក្នុងការបណ្ដុះបណ្ដាលនេះដែលអាចនឹងត្រូវចំណាយពេលជាច្រើនខែ។

គួរបញ្ជាក់ថា ផលិតដោយក្រុមហ៊ុន Raytheon ប្រព័ន្ធខែលប្រឆាំងមីស៊ីល ប៉ាទ្រីយ៉ូត (Patriot) គឺជាប្រព័ន្ធមីស៊ីលបាញ់ចេញពីផ្ទៃដី ទៅអាកាស និងត្រូវបានរចនាឡើងដើម្បីស្ទាក់ចាប់បំផ្លាញ មីស៊ីលបាលិស្ទីគ និងយន្ដហោះចម្បាំង។ ប្រព័ន្ធមីស៊ីលនេះត្រូវបានប្រើប្រាស់ជាលើកដំបូងនៅក្នុងសង្រ្គាមឈ្លានពានអ៉ីរ៉ាក់របស់សហរដ្ឋអាមេរិក នៅអំឡុងទសវត្សរ៍ឆ្នាំ១៩៨០ ហើយបើតាម ក្រុមហ៊ុន Raytheon ប្រព័ន្ធខែលប្រឆាំងមីស៊ីល ប៉ាទ្រីយ៉ូត (Patriot) បានស្ទាក់ចាប់បំផ្លាញមីស៊ីលបាលិស្ទីគច្រើនជាង ១៥០គ្រាប់ នៅក្នុងសមរភូមិចាប់តាំងពីឆ្នាំ២០១៥មក​ ៕

ប្រទេសបង់ក្លាដេស ៖ ប្រទេសបង់ក្លាដេសកំពុងតែប្រឈមនឹងអាកាសធាតុត្រជាក់ វាជាផ្នែកមួយនៃការផ្លាស់ប្តូរអាកាសធាតុក្នុងរយៈពេលជាច្រើនឆ្នាំកន្លងមកនេះ ។ បច្ចុប្បន្ន អាកាសធាតុត្រជាក់បានគ្របដណ្តប់តំបន់ជាច្រើនរបស់បង់ក្លាដេស ដែលបង្កការពិបាកដល់អ្នកភូមិ ជាពិសេស អ្នកមានអាយុច្រើន អ្នកក្រីក្រ និងអ្នកគ្មានផ្ទះសម្បែង ខណៈពលរដ្ឋមួយចំនួនគ្មានអាវរងា និងខ្វះខាតស្បៀង ។

រដូវរងាឆ្នាំនេះមានអាកាសធាតុត្រជាក់ខ្លាំងជាងរយៈពេលប៉ុន្មានឆ្នាំកន្លងមក ដោយសីតុណ្ហភាពក្នុងទីក្រុងដាការបស់បង់ក្លាដេស គឺ១២អង្សាសេ ចំណែកសីតុណ្ហភាពទាបបំផុតក្នុងក្រុងនេះគឺ៩អង្សាសេ ។ អាកាសធាតុធ្លាក់ចុះ គេជឿថាមកពីការផ្លាស់ប្តូរអាកាសធាតុ (Climate Change) ឬធម្មជាតិតស៊ូជាមួយមនុស្សវិញ ។ បង់ក្លាដេសបានចុះអ័ព្ទខ្លាំងបណ្តាលឱ្យប៉ះពាល់ដល់ជើងហោះហើរក្នុងព្រលានយន្តហោះអន្តរជាតិ Hazrat Shahjalal ។

នាយកដ្ឋានឧតុនិយមបញ្ជាក់ថា កាលពីចុងសប្តាហ៍មុន អាកាសធាតុត្រជាក់ក្នុងកម្រិតកណ្តាលរហូតដល់កម្រិតខ្លាំង ដោយគ្របដណ្តប់ភាគខាងជើង ភាគពាយ័ព្យ ហើយពលរដ្ឋនៅតែប្រឈមនឹងអាកាសធាតុអាក្រក់បែបនេះបន្តទៀត ។

បង់ក្លាដេសមិនមែនជាប្រទេសតែមួយទេ ដែលកំពុងតែជួបនឹងអាកាសធាតុប្រែប្រួល ព្រោះបច្ចុប្បន្នទីក្រុងមូស្គូ ប្រទេសរុស្ស៊ី ក៏កំពុងប្រឈមនឹងអាកាសធាតុត្រជាក់ខ្លាំងដូចគ្នាដែរ ដោយសីតុណ្ហភាពធ្លាក់ចុះខ្លាំងរហូតដល់-២៦អង្សាសេក្នុងសប្តាហ៍ចុងក្រោយនេះ ហើយមនុស្សម្នាក៏រស់នៅយ៉ាងលំបាក ៕

ប្រភព ៖ springnews

បរទេស៖ ម្ចាស់ភោជនីយដ្ឋាន និងជាមេចុងភៅនៅក្នុងហាងមួយកន្លែង ក្នុងរដ្ឋ Kerala របស់ប្រទេសឥណ្ឌាត្រូវបានចាប់ខ្លួនក្នុងការកាត់ទោស បន្ទាប់ពីអតិថិជនបានពុលអាហាររហូតដល់ស្លាប់ បន្ទាប់ពីកុម្ម៉ង់ម្ហូបពីហាងនេះ។

កាលពីពេលថ្មីៗនេះ មានសេចក្ដីរាយការណ៍ពីសារព័ត៌មាន BBC បានឱ្យដឹងថា ​ប៉ូលីសនៅខេរ៉ាឡា ប្រទេសឥណ្ឌាខាងត្បូង បានធ្វើការចាប់ខ្លួនម្ចាស់ភោជនីយដ្ឋាន រួមទាំងមេចុងភៅរបស់ភោជនីយដ្ឋានមួយកន្លែង ដោយចោទប្រកាន់ពីបទមនុស្សឃាតដោយអចេតនា ក្រោយពីមនុស្ស ២១ នាក់បានកុម្ម៉ង់អាហារពីភោជនីយដ្ឋាននេះហើយធ្លាក់ខ្លួនឈឺដោយសារពុលអាហារ។

ហើយម្នាក់ក្នុងចំណោមពួកគេបានស្លាប់ ដោយអ្នកស្លាប់គឺជាគិលានុបដ្ឋាយិកាធ្វើការនៅ Kottayam ដែលបញ្ជាទិញបាយ និងសាច់មាន់ BBQ ពីភោជនីយដ្ឋាននេះតាមអ៊ីនធឺណិត ប៉ុន្តែមិនយូរប៉ុន្មានបន្ទាប់ពីនាងទទួលទាន ក៏ចាប់ផ្ដើមធ្លាក់ខ្លួនឈឺរហូតដល់ត្រូវចូលមន្ទីរពេទ្យនៅថ្ងៃទី ៣០ ធ្នូ ឆ្នាំ២០២២កន្លងទៅ។

ជាមួយគ្នានោះប្រព័ន្ធផ្សព្វផ្សាយក្នុងស្រុកបាននិយាយថាមុនពេលនាងស្លាប់នៅ ថ្ងៃ ទី ២ ខែ មករា ការធ្វើកោសល្យវិច័យបឋមនៃការស្លាប់បានបង្ហាញថានាងស្លាប់ដោយសារឆ្លងមេរោគក្នុងសរីរាង្គខាងក្នុង។

បន្ថែមពីនោះប៉ូលីសបាននិយាយពីការស៊ើបអង្កេតត្រូវបានគេបញ្ជាក់ថាគិលានុបដ្ឋាយិកាពិតជាបានស្លាប់ដោយសារពុលអាហារ។ ហើយបានរកឃើញថាពីការចុះត្រួតពិនិត្យគុណភាពម្ហូបអាហារក្នុង ភោជនីយដ្ឋាននោះគឺស្ថិតក្នុងកម្រិតទាប។

ទោះជាយ៉ាងណាឧបទ្ទវហេតុនេះគឺជាករណីមួយក្នុងចំណោមករណីជាច្រើនទាក់ទងនឹងការពុលអាហារនៅក្នុងរដ្ឋ Kerala ។ ដោយករណីពុលអាហារជាច្រើនករណីក៏ត្រូវបានគេរាយការណ៍នៅផ្នែកផ្សេងទៀតនៃរដ្ឋក្នុងសប្តាហ៍កន្លងទៅ ដូចជាមានសេចក្តីរាយការណ៍កាលពីកន្លងទៅថាសិស្ស និង ឪពុកម្តាយរបស់ពួកគេបានធ្លាក់ខ្លួនឈឺក្រោយ ហូបបាយសាលា។ ហើយមនុស្សជិត ១០០ នាក់ក៏ត្រូវបានគេរាយការណ៍ថាបានធ្លាក់ខ្លួនឈឺបន្ទាប់ពីបានបរិភោគអាហារដែលបានផ្តល់ជូននៅឯពិធីបុណ្យជ្រមុជទឹក។

យ៉ាងណាមិញនេះបានបង្កើនការព្រួយបារម្ភអំពីស្តង់ដារសុវត្ថិភាពអាហារពី ភោជនីយដ្ឋាន។

បន្ទាប់ពីករណីនេះកើតឡើង បុគ្គលិកទទួលបន្ទុកសុវត្ថិភាពចំណីអាហារ បានបញ្ជូនកងកម្លាំងរបស់ខ្លួនទៅត្រួតពិនិត្យភោជនីយដ្ឋានជាង ៥០០ កន្លែងនៅទូទាំងរដ្ឋ Kerala ហើយភោជនីយដ្ឋានប្រហែល ៤៨ ត្រូវបានបញ្ជាឱ្យបិទ បន្ទាប់ពីពួកគេត្រូវបានរកឃើញថាស្ថិតក្នុងស្ថានភាពគ្មានអនាម័យ ឬរកឃើញថាមិនមានអាជ្ញាប័ណ្ណត្រឹមត្រូវ ហើយនឹងបន្តស៊ើបអង្កេតបន្តទៀត៕ ប្រភព៖ Thairath