រដ្ឋសភាវៀតណាមបានអនុម័ត ឱ្យប្រធានរដ្ឋវៀតណាម ង្វៀន សួនហ្វុក (Nguyen Xuan Phuc) ចេញពីតំណែងតាមការស្នើសុំរបស់លោកហើយ ដូច្នេះលោកគឺជាប្រធានាធិបតីវៀតណាមដំបូងគេ ដែលចូលនិវត្តន៍ ពីតំណែងពាក់កណ្តាលអាណត្តិ ចាប់តាំងពីឆ្នាំ១៩៧៦ ឬស្មើនឹងរយៈពេល៤៧ឆ្នាំ មកនេះ។

លោក ង្វៀន សួនហ្វុក បានចាកចេញពីកៅអីជាប្រធានាធិបតី នៅអាយុ ៦៩ ឆ្នាំ បន្ទាប់ពីកាន់តំណែងនេះ អស់រយៈពេលជិត ២ឆ្នាំ។ មិនតែប៉ុណ្ណោះការចាកចេញនេះ បានបន្សល់ទុក្ខប្រវត្តិសាស្ត្រមួយ ដោយក្លាយជាប្រធានាធិបតីដំបូងគេដែលចូលនិវត្តន៍ពីតំណែងពាក់កណ្តាលអាណត្តិចាប់តាំងពីឆ្នាំ ១៩៧៦។

សូមបញ្ជាក់ផងដែរថា លោក លោក ង្វៀន សួនហ្វុក បានជាប់ឆ្នោតជាប្រធានាធីបតីវៀតណាម កាលពីខែមេសា ឆ្នាំ២០២១៕

បរទេស៖ យន្តហោះដឹកអ្នកដំណើរអូស្ត្រាលីចំនួន ១៤៥ នាក់ មានបញ្ហាម៉ាស៊ីន ក្រោយមកអ្នកបើកបរយន្តហោះបានផ្តល់សញ្ញា Maydayស្នើសុំជំនួយសង្គ្រោះបន្ទាន់ពីប៉មត្រួតពិនិត្យចរាចរណ៍ផ្លូវអាកាស  និងបានចុះចតដោយសុវត្ថិភាព។

កាលពីថ្ងៃទី ១៨ ខែមករា ឆ្នាំ ២០២៣ ក្រុមហ៊ុនអាកាសចរណ៍ Qantas ឬជើងហោះហើរ Qantas “QF144” បានហោះចេញពីអាកាសយានដ្ឋាន Auckland  ក្នុងប្រទេសនូវែលសេឡង់ ដោយបានដឹកអ្នកដំណើរទាំង១៤៥នាក់។

ជាមួយគ្នានោះ ខណៈកំពុងតែហោះហើរ ស្រាប់តែអ្នកបើកយន្តហោះបានបញ្ជូនសញ្ញា Mayday ស្នើសុំជំនួយសង្គ្រោះបន្ទាន់ ដោយសារតែម៉ាស៊ីនមួយក្នុងចំណោមម៉ាស៊ីនទាំងពីរនៅលើយន្តហោះបានធ្លាក់ខណៈពេលកំពុងហោះហើរឆ្លងកាត់ក្នុងសមុទ្រ Tasman ។

ហេតុការណ៍នេះបានបង្ខំឱ្យអ្នកបើកយន្តហោះសុំជំនួយពីការគ្រប់គ្រងចរាចរណ៍ផ្លូវអាកាស និងបានព្យាយាមចុះចតយន្តហោះយ៉ាងប្រញាប់ប្រញាល់។

ទោះជាយ៉ាងណាការព្យាយាមចុះចតរបស់អ្នកបើកបរគឺទទួលបានដោយសុវត្ថិភាពនៅអាកាសយានដ្ឋានស៊ីដនី នៃប្រទេសអូស្ត្រាលី នៅវេលាម៉ោង ៣:៣០ នាទីរសៀល ម៉ោងក្នុងស្រុក។

ក្នុងនោះរបាយការណ៍ព័ត៌មានបានបញ្ជាក់បន្ថែមថា បន្ទាប់ពីចុះចត អ្នកដំណើរទាំងអស់ត្រូវបានដឹកជញ្ជូនទៅកាន់ស្ថានីយដោយសុវត្ថិភាព ខណៈពេលដែលយន្តហោះត្រូវបានត្រួតពិនិត្យតាមស្តង់ដារអាកាសចរណ៍យ៉ាងយកចិត្តទុកដាក់។

យ៉ាងណាមិញអ្នកដំណើរបាននិយាយពីពេលវេលានៃស្ថានភាពនៅលើយន្តហោះ ដែលបញ្ជាក់ថាមើលទៅស្ថានភាពពេលនោះហាក់ដូចជាធម្មតា ទោះបីជាគេបានឮសំឡេងម៉ាស៊ីនខ្លាំងក៏ដោយ ហើយក្នុងនោះអ្នកបើកបរមិនបានប្រកាសប្រាប់អ្នកដំណើរអំពីបញ្ហាម៉ាស៊ីននោះទេ៕ ប្រភព៖ Thairath

ប្រទេសហ្វីលីពីន ៖ ប្រទេសជាច្រើនត្រូវការខ្ទឹមបារាំងសម្រាប់ចម្អិនអាហារ ហើយសាច់សត្វមានតម្លៃថ្លៃជាងខ្ទឹមបារាំង ប៉ុន្តែនៅប្រទេសហ្វីលីពីនវិញ បច្ចុប្បន្ន ខ្ទឹមបារាំងមានតម្លៃខ្ពស់ជាងសាច់ជ្រូក សាច់មាន់ និងសាច់គោទៀត ។

ពលរដ្ឋហ្វីលីពីនបានទទួលវប្បធម៌ចម្អិនអាហារដោយការយកខ្ទឹមស-ខ្ទឹមក្រហម និងខ្ទឹមបារាំងទៅឆាច្របល់ចូលគ្នា ខណៈប្រទេសនេះស្ថិតក្រោមអាណានិគមប្រទេសអេស្ប៉ាញរវាងឆ្នាំ១៥២១ ដល់ឆ្នាំ១៨៩៨ ហើយបច្ចុប្បន្ន ខ្ទឹមបារាំងក៏ក្លាយជាគ្រឿងផ្សំដ៏សំខាន់ក្នុងអាហារ ។

នៅសប្តាហ៍នេះ ខ្ទឹមបារាំង និងខ្ទឹមក្រហម ១គីឡូក្រាមតម្លៃ១១ដុល្លារអាមេរិកឯណោះ ខណៈមាន់១ក្បាលតម្លៃតែ៤ដុល្លារអាមេរិក ។ ចំណែកថ្លៃកម្លាំងពលកម្មទាបបំផុតក្នុង១ថ្ងៃរបស់ហ្វីលីពីន គឺ៩ដុល្លារអាមេរិក ។ កាលពីដើមខែមករា អាជ្ញាធរហ្វីលីពីនបានចាប់អ្នកលួចដឹកជញ្ជូនខ្ទឹមបារាំងខុសច្បាប់ពីប្រទេសចិន ក្នុងតម្លៃ៣,‌១សែនដុល្លារអាមេរិក ។

ខ្ទឺមបារាំងឡើងថ្លៃធ្វើឱ្យពលរដ្ឋហ្វីលីពីនជាច្រើននាក់ដែលធ្វើដំណើរទៅបរទេស ជ្រើសរើសទិញខ្ទឹមបារាំងទៅផ្ញើមិត្តភក្តិ និងគ្រួសារពួកគេ ជំនួសការទិញសូកូឡា ។ ជនជាតិហ្វីលីនម្នាក់ឈ្មោះ ម៉ែននី មកក្រុងបាងកក ប្រទេសថៃ និយាយថា តម្លៃខ្ទឹមបារាំងនៅថៃថោកជាងហ្វីលីពីន១០ដង គាត់ក៏បានទិញខ្ទឹមបារាំងផ្ញើបងប្អូននៅហ្វីលីពីន ។

លោក នីកូឡា ម៉ាប៉ា សេដ្ឋវិទូជាន់ខ្ពស់នៅធនាគារ ING ទីក្រុងម៉ានិឡា និយាយថា ហាងអាហារខ្លះឈប់ធ្វើមុខម្ហូបដែលត្រូវការខ្ទឹមបារាំងទៀតហើយ ពួកគេងាកទៅរកជម្រើសផ្សេងវិញ ។ ជាក់ស្តែង លោក Jam Melker អ្នកបង្កើតក្រុមអភិរក្សអាហាររបស់ហ្វីលីពីន “Movement to Preserve the Culinary Heritage of the Philippines” បានងាកមកប្រើប្រាស់ខ្ទឹមបារាំង lasona ជាពូជក្នុងស្រុកជំនួសវិញ វាមានរសជាតិខុសគ្នា និងមានទំហំតូចស្មើផ្លែទំពាំងបាយជូរ ។ លោក Jam Melker ថា ហាងអាហារ និងពលរដ្ឋទូទៅត្រូវលំបាកដោយសារខ្ទឹមបារាំងឡើងថ្លៃខ្លាំង ។

លោក នីកូឡា ម៉ាប៉ា បន្តថា ខ្ទឹមបារាំងឡើងថ្លៃខ្ពស់ដោយសារនៅពេលប្រមូលផលខែសីហា និងកញ្ញា ហ្វីលីពីនជួបនឹងខ្យល់ព្យុះ ។ ម្យ៉ាងទៀត រដ្ឋាភិបាលបាននាំចូលខ្ទឹមបារាំងយឺតយ៉ាវពេកកាលពីដើមខែមករា ដោយបាននាំចូលខ្ទឹមបារាំងចំនួន២២លានតោនដើម្បីទប់ទល់នឹងតម្លៃខ្ពស់ក្នុងប្រទេស ។

គួរបញ្ជាក់ថា ហ្វីលីពីនជាប្រទេសមួយដែលនាំចូលខ្ទឹមបារាំងច្រើនជាងការផលិតនៅក្នុងស្រុក ។ ហ្វីលីពីនបាននាំចូលពីប្រទេសឥណ្ឌា ចិន និងហូឡង់ ហើយហេតុផលដែលតម្លៃឡើងថ្លៃ ដោយសារត្រូវចំណាយដើមទុនផលិតខ្ពស់ដូចជា ជី និងថ្នាំសម្លាប់សត្វល្អិត ៕

ប្រភព ៖ BBC News

អន្តរជាតិ៖ កាលពីពេលថ្មីៗនេះក្រុមបុរាណវិទូ បានរកឃើញស៊ុតហ្វូស៊ីលរបស់ដាយណូស័រស្មៅដ៏ធំនៅក្នុងការរកឃើញដ៏កម្រមួយនៅក្នុងប្រទេសឥណ្ឌា។ នេះបើយោងតាមការចុះផ្សាយរបស់សារព័ត៌មាន VN Express ។

ការស្រាវជ្រាវថ្មីដែលត្រូវបានចេញផ្សាយនៅក្នុងទស្សនាវដ្តី Plos One នៅថ្ងៃទី  ខែមករាបាននិយាយថា យ៉ាងហោចណាស់សំបុកចំនួន៩២ ដែលមានពងដាយណូស័រហ្វូស៊ីលចំនួន ២៥៦ ដែលមានអាយុកាលប្រហែល៦៦ លានឆ្នាំមុន ត្រូវបានគេរកឃើញនៅក្នុង Lameta Formation ក្នុងសង្កាត់ Dhar រដ្ឋ Madhya Pradesh ភាគកណ្តាលប្រទេសឥណ្ឌា កន្លែងភ្ញាស់ដាយណូស័រដ៏ធំបំផុតមួយក្នុងពិភពលោក។

ស៊ុតដែលមានអង្កត់ផ្ចិតពី ១៥ ទៅ ១៧សង់ទីម៉ែត្ រត្រូវបានគេជឿថាជាកម្មសិទ្ធិរបស់ប្រភេទសត្វដាយណូស័រស្មៅដ៏ធំ។ ចំនួនពងនៅក្នុងសំបុកនីមួយៗមានចាប់ពី ១ ដល់ ២០ ដែលភាគច្រើនត្រូវបានរកឃើញនៅជិតគ្នា ដែលបង្ហាញថា ដាយណូស័រមេមិននៅដើម្បីថែរក្សាពងនោះទេ។

លោកវេជ្ជបណ្ឌិត Susannah Maidment មកពីសារមន្ទីរប្រវត្តិសាស្ត្រធម្មជាតិ (NHM) ដែលជាសហអ្នកនិពន្ធនៃការសិក្សាបានមានប្រសាសន៍ថា “យើងគិតថា Sauropods ដូចជា Titanosaur បានរស់នៅក្នុងក្រុមដែលមានមូលដ្ឋានលើស្នាមជើងជាមួយគ្នាដូចសត្វបក្សីខ្លះ។

អ្នកដឹកនាំអ្នកនិពន្ធ Guntupalli Prasad អ្នកជំនាញខាងបុរាណវិទ្យានៅនាយកដ្ឋានភូគព្ភសាស្ត្រនៅសាកលវិទ្យាល័យ Delhi បានពន្យល់បន្ថែមថា សំបុកស្ថិតនៅជិតគ្នា ដែលធ្វើឱ្យដាយណូស័រមេយក្សពិបាកផ្លាស់ទីដើម្បីភ្ញាស់ពង ឬផ្តល់កំណើតឱ្យកូនតូចៗរបស់ពួកគេបរិភោគ ព្រោះវាងាយស្រួល បំបែកពងហើយជាន់ឈ្លីក្មេង។

លោកវេជ្ជបណ្ឌិត Darla Zelenitsky សាស្ត្រាចារ្យរងនៃ Paleontology ដាយណូស័រនៅសាកលវិទ្យាល័យ Calgary ក្នុងប្រទេសកាណាដា បានសង្កត់ធ្ងន់ថា ការស្វែងរកសំបុកពងកូនដាយណូស័រដ៏ច្រើនបែបនេះ គឺកម្រមានណាស់ ព្រោះវាទាមទារលក្ខខណ្ឌផ្ទុកដ៏ល្អឥតខ្ចោះ។ ភូមិរបស់ Lameta Formation ទំនងជាត្រូវបានកប់ដោយកម្អែលកំឡុងពេលការផ្ទុះភ្នំភ្លើងដែលគេស្គាល់ថាជា “អន្ទាក់ Deccan” ៕

ទីភ្នាក់ងារសារព័ត៌មាន AP រាយការណ៍ថា បរិយាកាសកិច្ចពិភាក្សាគ្នារវាងលោក លីវ ហេ ឧបនាយករដ្ឋមន្ត្រីចិន និងលោកស្រី Janet Yellen រដ្ឋមន្ត្រីក្រសួងហិរញ្ញវត្ថុអាមេរិក នៅទីក្រុងហ្សូរីច ប្រទេសស្វីស កាលពីថ្ងៃទី១៨ ខែមករា បានដំណើរការទៅដោយភាពរីករាយ ។ ភាគីទាំងពីរបានព្រមព្រៀងសហការគ្នាដោះស្រាយបញ្ហាការឡើងកំដៅផែនដី សេដ្ឋកិច្ច សម្ព័ន្ធភាព រួមទាំងរារាំងការប្រកួតប្រជែងមិនឱ្យក្លាយទៅជាជម្លោះផងដែរ ។

ខណៈរដ្ឋមន្ត្រីក្រសួងហិរញ្ញវត្ថុអាមេរិក លោកស្រី Janet Yellen ថ្លែងថា នឹងស្វែងរកកិច្ចសហការគ្នាបន្ថែមទៀតជាមួយចិន លោក លីវ ហេ ឧបនាយករដ្ឋមន្ត្រីចិនតបថា ចិនព្រមធ្វើការរួមគ្នាដើម្បីស្វែងរកចំណុចរួមរវាងប្រទេសទាំងពីរ មិនថាស្ថានការណ៍ផ្លាស់ប្តូរយ៉ាងណា ចិននិងអាមេរិកគួរតែចរចាគ្នា និងធ្វើពាណិជ្ជកម្មរួមគ្នាជានិច្ច ។

ក្រសួងហិរញ្ញវត្ថុអាមេរិកឱ្យដឹងថា ក្នុងកិច្ចប្រជុំនេះ ទាំងពីរភាគីនឹងរួមសហការគ្នាស្វែងរកប្រាក់ដើម្បីទប់ទល់នឹងបម្រែបម្រួលអាកាសធាតុ ហើយនៅពេលឆាប់ៗនេះ លោកស្រី Janet Yellen មានគម្រោងធ្វើដំណើរទៅកាន់ប្រទេសចិន ។ កិច្ចប្រជុំក៏បានពិភាក្សាគ្នាផងដែរអំពីសេដ្ឋកិច្ចរបស់អាមេរិកនិងចិន កំពុងប្រឈមនឹងបញ្ហាពាណិជ្ជកម្ម បច្ចេកវិទ្យា និងបញ្ហាផ្សេងទៀត ។

លោកស្រី Janet Yellen បន្តថា អាមេរិកនិងចិនគួរតែជជែកគ្នាត្រង់ៗ និងមិនគួរបណ្តោយឱ្យយល់ខុសទេ ជាពិសេស ការខ្វះទំនាក់ទំនងធ្វើឱ្យសេដ្ឋកិច្ចប្រទេសទាំងពីរ និងទំនាក់ទំនងហិរញ្ញវត្ថុអាមេរិកជាមួយចិនកាន់តែអាក្រក់ទៅ ។

សារព័ត៌មានស៊ីនហួររបស់ចិនរាយការណ៍ថា លោក លីវ ហេ បារម្ភអំពីបញ្ហានយោបាយសេដ្ឋកិច្ច ពាណិជ្ជកម្ម និងបច្ចេកវិទ្យារបស់អាមេរិកជាមួយចិន និងសង្ឃឹមថា អាមេរិកនឹងចាប់អារម្មណ៍ពីផលប៉ះពាល់របស់នយោបាយទាំងនេះ ។ ជាមួយគ្នានេះ ភាគីទាំងពីរត្រូវសម្លឹងមើលទិដ្ឋភាពរួម និងព្យាយាមចាត់ការជម្លោះដើម្បីរក្សាស្ថិរភាព និងសម្ព័ន្ធភាព ៕

ប្រភព ៖ The Standard

បរទេស៖ ក្រុមអ្នកជំនាញអ៊ីស្រាអែលបានបង្ហាញពីភាពជោគជ័យដំបូងរបស់ពិភពលោក ក្នុងការបង្កើនមនុស្សយន្តជំនាញហិតក្លិន តាមរយៈឧបករណ៍ចាប់សញ្ញាជីវសាស្រ្ត។

នាថ្ងៃទី ១៩ ខែមករា ឆ្នាំ២០២៣ ​ទីភ្នាក់ងារសារព័ត៌មាន Xinhua News រាយការណ៍ពីទីក្រុង Jerusalem ប្រទេសអ៊ីស្រាអែល បានបង្ហាញថាអ្នកស្រាវជ្រាវមកពីសាកលវិទ្យាល័យ Tel Aviv (TAU) បានអភិវឌ្ឍមនុស្សយន្តមានសមត្ថភាពហិតក្លិន ក្នុងប្រព័ន្ធប្រតិបត្តិការ Android ដោយប្រើឧបករណ៍ចាប់សញ្ញាជីវសាស្រ្តដ៏ទំណើបមួយ។

ពិតណាស់ការផលិតនេះវាជាលើកដំបូងសម្រាប់ពិភពលោក ដោយមនុស្សយន្តនេះអាចរកឃើញ និងស្រង់ក្លិននៅក្នុងបរិស្ថានតាមរយៈប្រព័ន្ធឧបករណ៍ចាប់សញ្ញាជីវសាស្រ្តរបស់វា ខណៈពេលដែលមនុស្សយន្តនេះក៏អាចបញ្ជូនសញ្ញាអគ្គិសនីផងដែរ ដែលអាចត្រូវបានចាត់ថ្នាក់តំណត់តាមប្រភេទនៃក្លិននីមួយៗខុសៗគ្នា។

ជាមួយគ្នានោះរបាយការបានបញ្ជាក់បន្ថែមថា ក្រុមអ្នកស្រាវជ្រាវក៏បានធ្វើការពិសោធន៍ជាមួយនឹងការភ្ជាប់ឧបករណ៍ចាប់សញ្ញាជីវសាស្រ្តទៅនឹងប្រព័ន្ធអេឡិចត្រូនិច ដោយពួកគេបានរកឃើញថា វាអាចបែងចែកក្លិនជាមួយនឹងភាពខុសគ្នាបានដល់ទៅ ១០,០០០ ដង។

ដោយក្នុងនោះវាអាចសម្គាល់ក្លិនជាច្រើនប្រភេទ រួមមាន ផ្កាចំរុះច្រើនប្រភេទ ក្រូចឆ្មា និងសូម្បីតែស្រាវីស្គី មួយចំនួនទៀតផងដែរ។

យ៉ាងណាមិញនេះក៏ជាក្ដីសង្ឃឹមសម្រាប់អ្នកស្រាវជ្រាវ និងពិភពលោក សម្រាប់ការការពារជីវិតមនុស្ស និងការកំណត់អត្តសញ្ញាណគ្រោះថ្នាក់ដូចជា គ្រឿងផ្ទុះ គ្រឿងញៀន គ្រោះធម្មជាតិ និងជំងឺផ្សេងៗ នាថ្ងៃអនាគត ជាមួយនឹងការប្រើប្រាស់មនុស្សយន្តដ៏ឆ្លាតវៃនេះ៕ ប្រភព៖ ប្រភព៖ Dailynews