វប្បធម៌ខ្មែរនិងថៃគឺជាជម្លោះនៅលើបណ្តាញសង្គមដែលមានអាយុកាលជាច្រើនឆ្នាំមកហើយដែលគ្មានវិធីដោះស្រាយណាមួយឡើយដោយសារតែការមិនព្រមទទួលស្គាល់នូវអ្វី ជាការពិតនិងរៀនសូត្រតែប្រវត្តិសាស្រ្តដែលក្លែងបន្លំ។ ស្របពេលនិន្នាការស្បៃកាន់តែរីកដុះដាលរាល់ពេលសិល្បការិនីខ្មែរគ្រងនូវឈុតស្បៃតែងតែត្រូវបានជនជាតិថៃមួយចំនួនចោទប្រកាន់ថាជាឈុតស្បៃរបស់ថៃ។ ហត់ចិត្តនឹងជនជាតិថៃមួយចំនួនពេក លីវ ជីលី ស្រាប់តែលើកឡើងចំៗបែបនេះតែម្តង។

ជាមួយនឹងឈុតស្បៃខ្មែរដ៏ស្រស់ស្អាត លីវ ជីលី បាននិយាយនៅលើបណ្តាញសង្គមរបស់ខ្លួនកាលពីពេលថ្មីៗនេះ(២៦ មីនា) ថា «ពេលខ្លះហត់ជាមួយប្រជាជនសៀមមួយចំនួនហ្នឹងម៉េស ទឹកដីក៏លួច វប្បធម៌ក៏លួច សំខាន់ឈុតខ្មែរស្បៃខ្មែរ អីហ្នឹងក៏វាថារបស់វា ឆ្ងល់ប្រាសាទពីរ៉ាមីត កំផែងរបស់ចិនអីហ្នឹងហាស់កាលណាវាថារបស់វាម្តងហត់ម៉េស»។

Miss Supranational Cambodia 2023 បានផ្តាំផ្ញើទៅកាន់ជនជាតិសៀមថាគួររៀនប្រវត្តិសាស្រ្តសាថ្មី កុំរៀនតាម ដូនតាដែលក្លែងប្រវត្តិសាស្រ្ត សម័យនេះជាសម័យ AI ហើយ។ ពិតប្រាកដណាស់នៅពេល លីវ ជីលី លើកឡើងខាងលើនេះក៏មានជនជាតិថៃមួយចំនួនចូលមកខម្មិនបញ្ចេញមតិជាច្រើនហូរហែផងដែរ។ លើសពីនេះទៅទៀត គណនីជនជាតិថៃខ្លះហេតុតែចង់ឈ្នះនឹងការបង្ហោះរបស់ លីវ ជីលី ថែមទាំងខម្មិនជាភាសាខ្មែរទាំងទទឹងទិសចូលក្នុងការបង្ហោះនោះទៀតផង។

ជារឿយៗនិងជាញឹកញាប់ឱ្យតែសិល្បការិនីខ្មែរគ្រងនូវឈុតស្បៃខ្មែរ ឬជនបរទេសណាក៏ដោយស្លៀកឈុតប្រពៃណីខ្មែរ ជនជាតិថៃតែងតែបញ្ចេញមតិថាជាសំលៀកបំពាក់របស់ពួកគេ មិនលើកលែងសូម្បីតែព្រះនាង ចេណ្ណា ក៏ត្រូវបានជនជាតិថៃមួយចំនួនបញ្ចេញមតិស្អប់ខ្ពើមដូចគ្នា៕

ថ្មីៗនេះតារាសម្តែងចិន Fan Bingbing បានបង្កឱ្យមានការភ្ញាក់ផ្អើលយ៉ាងខ្លាំង នៅពេលដែលនាងបានចែករំលែករូបថតមួយសន្លឹកជាមួយអ្នកដឹកនាំរឿង Squid Game លោក Hwang Dong Hyuk។ ការជួបគ្នារវាងអ្នកទាំងពីរបានកើតឡើងនៅឯមហោស្រពភាពយន្តអាស៊ីលើកទី១៩។ យោងតាមប្រព័ន្ធផ្សព្វផ្សាយ ជាធម្មតាវាអាចគ្រាន់តែជាការជួបគ្នាធម្មតាមួយប៉ុណ្ណោះ ប៉ុន្តែវាគឺជាចំណងជើងដែលភ្ជាប់មកជាមួយរូបថតដែលទាក់ទាញចំណាប់អារម្មណ៍បំផុត។

Fan Bingbing បានពិពណ៌នាវាថាជា «ការជួបគ្នានៃស្មារតី និងភាពច្នៃប្រឌិត» ដែលបង្កឱ្យមានការសង្ស័យអំពីកិច្ចសហការដែលអាចកើតមានរវាងអ្នកទាំងពីរ។ សកម្មភាពរបស់ Fan Bingbing នៅពេលនេះ គឺកាន់តែគួរឲ្យកត់សម្គាល់ថែមទៀត ខណៈដែលអ្នកដឹកនាំរឿង Hwang ទើបតែបានប្រកាសពីគម្រោងភាពយន្តថ្មីមួយ ដែលមានចំណងជើងថា «KO Club»។ យោងតាមរបាយការណ៍ គំនិតដំបូងសម្រាប់រឿងនេះត្រូវបានបង្កើតឡើងដោយអ្នកដឹកនាំរឿងភ្លាមៗបន្ទាប់ពីភាពជោគជ័យយ៉ាងខ្លាំងនៃ «Squid Game»។ ស្គ្រីបឥឡូវនេះត្រូវបានបញ្ចប់ ហើយខ្សែភាពយន្តនេះកំពុងស្ថិតក្នុងដំណាក់កាលជ្រើសរើសតួសម្តែង។

ទោះបីជាការអភិវឌ្ឍន៍ត្រូវបានពន្យារពេលដោយសាររឿងភាគដ៏ល្បីរបស់ Netflix ក៏ដោយ អ្នកដឹកនាំរឿង Hwang Dong Hyuk បានបង្ហាញជាយូរមកហើយនូវបំណងប្រាថ្នាចង់សម្រេចគំនិតដិតដល់នេះឱ្យបាន។ ខ្សែភាពយន្តនេះបានបំផុសគំនិតដោយអត្ថបទមួយរបស់អ្នកនិពន្ធជនជាតិអ៊ីតាលី Umberto Eco ដែលពិភាក្សាអំពីជម្លោះមួយជំនាន់ក្នុងសង្គមទំនើប។ អ្នកដឹកនាំរឿងរូបនេះថាខ្សែភាពយន្តនេះនឹងដោះស្រាយបញ្ហារសើបដូចជា បន្ទុកប្រាក់សោធននិវត្តន៍ វិសមភាពទ្រព្យសម្បត្តិ និងគម្លាតអំណាចនយោបាយរវាងជំនាន់នីមួយៗ ហើយអាចនឹងវ៉ាដាច់ «Squid Game»។ បន្ទាប់ពីដំណើរការជ្រើសរើសតួសម្តែងត្រូវបានបញ្ចប់ ការថតត្រូវបានគេរំពឹងថានឹងចាប់ផ្តើមនៅនិទាឃរដូវឆ្នាំ ២០២៧។

Fan Bingbing ធ្លាប់ជាតារាសម្តែងដ៏ល្បីល្បាញ និងជាបុគ្គលដ៏មានឥទ្ធិពលម្នាក់នៅក្នុងឧស្សាហកម្មកម្សាន្តចិន។ ទោះជាយ៉ាងណាក៏ដោយ បន្ទាប់ពីរឿងអាស្រូវគេចពន្ធក្នុងឆ្នាំ ២០១៨ សកម្មភាពរបស់នាងនៅក្នុងប្រទេសចិនត្រូវបានរឹតត្បិត។ ចាប់តាំងពីពេលនោះមក Fan Bingbing បានផ្លាស់ប្តូរការផ្តោតអារម្មណ៍របស់នាងបន្តិចម្តងៗទៅលើគម្រោងសកលលោក ដើម្បីស្វែងរកឱកាសសម្រាប់ការវិលត្រឡប់មកវិញ។ នៅក្នុងខែវិច្ឆិកា ឆ្នាំ២០២៥ Fan Bingbing បានឈ្នះពានរង្វាន់តារាសម្តែងស្រីល្អបំផុតនៅក្នុងពិធីប្រគល់រង្វាន់ Golden Horse Film Awards លើកទី៦២ របស់ តៃវ៉ាន់ សម្រាប់តួនាទីរបស់នាងនៅក្នុងខ្សែភាពយន្ត «Mother Bhumi» ។ ក្រៅពីការសម្ដែង នាងក៏ចូលរួមយ៉ាងសកម្មលើឆាកអន្តរជាតិផងដែរ៕

លោក ទេព និមិត្ត ហៅប្រុសពេជ្រ ដែលជាប្អូនប្រុសរបស់តារាចម្រៀង ទេព បូព្រឹក្ស បានដឹកដៃភរិយារបស់ខ្លួនដែលទើបរៀបការហើយថ្មីថ្មោងចូលក្នុងកម្មវិធីផតខាស់របស់ ខេ។ នៅក្នុងការសម្ភាសន៍នេះទស្សនិកជននឹងបានដឹងកាន់តែច្រើនពីទំនាក់ទំនងនៃការចាប់ផ្តើមរបស់អ្នកទាំងពីរនិងការងារដែល និមិត្ត កំពុងតែធ្វើនាពេលបច្ចុប្បន្ន។

លោក ទេព និមិត្ត បានបង្ហើបថាការងារដែលខ្លួនស្រលាញ់បំផុតគឺជាអ្នករាំ ប៉ុន្តែអាចធ្វើការងារជាច្រើនទៀតនៅក្នុងអាជីពសិល្បៈ។ គម្រោងដែលធំៗបំផុតដែលលោកបានធ្វើគឺជាការថតបទ «ទេពរាជ»។ ទាក់ទងនឹងការថតនៅប្រាសាទដែលមនុស្សមួយចំនួនចាត់ទុកថាពិបាកនឹងថតប្អូនប្រុសរបស់តារាចម្រៀង ទេព បូព្រឹក្ស បានបង្ហើបថាកន្លែងទេសចរណ៍ដែលមានប្រាសាទនានាគឺអាចថតបានទាំងអស់ប៉ុន្តែស្ថិតនៅក្នុងកម្រិតមួយដែលយើងត្រូវធ្វើឱ្យត្រឹមត្រូវតាមក្បួនខ្នាត។

ត្រង់ចំណុចនេះ ទេព និមិត្តពន្យល់ថាយើងត្រូវមានលិខិតសុំអនុញ្ញាតត្រឹមត្រូវ សំលៀកបំពាក់ឱ្យត្រូវនឹងវប្បធម៌ខ្មែរយើងដែលមានន័យថាមុនពេលទៅថតគឺត្រូវឆ្លងទាំងអស់ទាំងសុំការអនុញ្ញាតពីក្រសួងវប្បធម៌ អាជ្ញាធរអប្សរា សុំយោបល់ពីលោកគ្រូអ្នកគ្រូផ្នែកសិល្បៈបុរាណ។ និមិត្ត បន្តទៀតថា ទាក់ទងនឹងអត្ថបទបទចម្រៀងក៏ត្រូវស្នើសុំឱ្យក្រសួងដឹងឮស័ក្តិសមនឹងការថតនៅប្រាសាទឬអត់ ហើយក្នុងនោះសំលៀកបំពាក់ក៏ត្រូវឆ្លងកាត់ដែរថាត្រូវតាមក្បួនខ្នាតខ្មែរឬអត់។ ជាឧទាហរណ៍មួយ និមិត្ត ថាបើយើងស្លៀកពាក់សម័យ ហើយអត្ថន័យពីស្នេហា ឬអត្ថន័យផ្សេងៗដែលខុសហើយថតនៅមុខប្រាសាទជាធម្មតាគឺមិនអនុញ្ញាតនោះទេ។

លោក ទេព និមិត្ត ថាសម្រាប់លោកឱ្យពិបាកគឺមិនពិបាកទេក្នុងការថតឱ្យតែយើងធ្វើឱ្យត្រូវតាមក្បួនច្បាប់ហើយមានការស្នើសុំត្រឹមត្រូវ មានពេលវេលាច្បាស់លាស់។ លោកក៏សង្កត់ធ្ងន់ដែរថាខាងក្រសួង ខាងអាជ្ញាធរអប្សរា គឺពិតជាចង់ឱ្យយើងផ្សព្វផ្សាយពីប្រាសាទ ពីវប្បធម៌ ប៉ុន្តែក្នុងកម្រិតមួយឱ្យបានត្រឹមត្រូវ៕

ពិតជាអស្ចារ្យណាស់! ក្រោយចំណាយរយៈពេលអស់ជាង ៥ឆ្នាំ នៅទីបំផុត ប្រតិមាព្រះឥសូរ ដែលជាបដិមាដ៏ធំជាងគេមួយនៅក្នុងប្រទេសកម្ពុជាដែលមានកម្ពស់រហូតដល់ ៥ម៉ែត្រ និងទម្ងន់ប្រមាណ ៧តោន និងមានការបែ.កបាក់ដល់ទៅជាង ១ម៉ឺនបំណែកមកពីកោះកេរ្ដិ៍ បានចាប់កំណើតឡើងវិញក្រោយជួសជុលរួចរាល់។

យោងតាមការបង្ហោះរបស់ក្រសួងវប្បធម៌ និងវិចិត្រសិល្បៈ នៅថ្ងៃទី១៨ ខែមីនា ឆ្នាំ២០២៦ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញជាអធិបតីភាព ចូលរួមក្នុងពិធីអបអរសាទរការបញ្ចប់ការជួសជុលដោយជោគជ័យនៃប្រតិមាព្រះឥសូររាំដ៏ធំមួយនៅក្នុងតំបន់អាស៊ីអាគ្នេយ៍ នៅអភិរក្សដ្ឋានអង្គរ ខេត្តសៀមរាប។

តាមបញ្ជាក់របស់ក្រសួង ប្រតិមាព្រះឥសូរដ៏ធំមួយនេះត្រូវប្រើពេលជួសជុលអស់រយៈពេលជាង ៥ឆ្នាំ ចាប់ពីឆ្នាំ២០២០ ដល់ឆ្នាំ២០២៦ ក្រោមកិច្ចសហការរវាងអាជ្ញាធរជាតិព្រះវិហារ និងសាលាបារាំងចុងបូព៌ា និងមានការគាំទ្រដោយសម្ព័ន្ធភាពបេតិកភណ្ឌ។ នេះជាវត្ថុបុរាណដែលមានកម្ពស់ ៥ម៉ែត្រ មានព្រះភក្ត្រ៥ ព្រះហស្ថ១០ និងទម្ងន់ប្រមាណ ៧តោន។ ប្រតិមានេះបានរលំបាក់ក្នុងសតវត្សទី១៤ មានសភាពបែកបាក់ចំនួនជាង ១ម៉ឺនបំណែក និងត្រូវបានចោរចូលលួចក្នុងសម័យសង្គ្រាមស៊ីវិល។ បច្ចុប្បន្នប្រតិមានេះត្រូវបានតម្កល់នៅ អភិរក្សស្ថានអង្គរជាបណ្ដោះអាសន្នសិន។

លោកជំទាវបណ្ឌិតសភាចារ្យរដ្ឋមន្ត្រី បានថ្លែងដោយក្តីសោមនស្ស និងអរគុណយ៉ាងជ្រាលជ្រៅដល់ក្រុមអ្នកជំនាញ នៃសាលាបារាំងចុងបូព៌ា គណៈកម្មាធិការបច្ចេកទេស និងដៃគូសម្ព័ន្ឋភាពការពារបេតិកភ័ណ្ឌ ចំពោះការខិតខំស្តារនិងស្រោចស្រង់ផ្គុំរូបរាងប្រតិមាព្រះឥសូរដែលមានអាយុកាលជាងមួយពាន់ឆ្នាំនេះមកល្អឡើងវិញ ។

លោកជំទាវសង្ឃឹមថា ប្រតិមាដ៏ធំនេះនឹងវិលត្រឡប់ទៅកាន់ទីតាំងដើមនៅប្រាសាទកោះកេរ្តិ៍វិញទុកជាទីសក្ការៈសម្រាប់ការគោរពទៅតាមេជំនឿទំនៀមទំលាប់ពីដូនតាខ្មែរនិងជាការទាក់ទាញលំហូរទេសចរទៅកាន់តំបន់ប្រាសាទកោះកេរ្តិ៍កាន់តែច្រើនឡើងជាលំដាប់៕