ប្រទេសថៃ ៖ និន្នាការក្តៅបំផុតមួយក្នុងឧស្សាហកម្មអចលនទ្រព្យថៃ គឺវិនិយោគិនចិនកំពុងទិញខុនដូទំនើបៗ និងផ្ទះវីឡាមានអាងហែលទឹកសម្រាប់វិនិយោគផង និងចូលនិវត្តន៍ផង ប៉ុន្តែអ្វីគួរឱ្យចាប់អារម្មណ៍ជាងនេះទៀត គឺវិនិយោគិនចិនបានទិញចម្ការទុរេនក្នុងតម្លៃខ្ពស់ទៀតផង ។

លោក Nattha Kahapana នាយកគ្រប់គ្រងក្រុមហ៊ុន Knight Frank ផ្នែកប្រឹក្សាយោបល់អចលនទ្រព្យបានថ្លែងថា ជនជាតិចិនបានទិញអចលនទ្រព្យនៅខេត្តភូកេតស្ទើរគ្រប់ប្រភេទដូចជា ខុនដូ ផ្ទះវីឡា ផ្ទះល្វែង ហើយរយៈពេលចុងក្រោយនេះ ពួកគេនាំគ្នាទិញចម្ការទុរេន ។ លោកថ្លែងថា ៖ «ជនជាតិចិនដែលទិញអចលនទ្រព្យទាំងនេះ ចាប់ផ្តើមដំបូង គឺការមកកម្សាន្តនៅប្រទេសថៃសិន បន្ទាប់មកទើបទិញអចលនទ្រព្យ ។ ពួកគេបានទិញផ្ទះល្វែងដើម្បីប្រកបអាជីវកម្មលក់ដូរឱ្យជនជាតិចិនគ្នាឯង រីឯខុនដូ និងផ្ទះវីឡា ទិញទុកជួលឱ្យជនជាតិចិន ហើយបច្ចុប្បន្ននេះ ពួកគេកំពុងស្វែងរកទិញចម្ការទុរេនដើម្បីនាំភ្ញៀវទេសចរចិនមកកម្សាន្តក្នុងចម្ការផងដែរ» ។

គួរបញ្ជាក់ថា ជនជាតិចិននាំគ្នាទិញចម្ការទុរេននៅប្រទេសថៃ មិនមែនទើបតែកើតឡើងទេ គឺពួកគេបានទិញចម្ការទុរេនតាំងពីមុនពេលផ្ទុះជំងឺកូវីដម៉្លេះ ហើយពេលនេះ ពួកគេចាប់អារម្មណ៍ទិញចម្ការទុរេនម្តងទៀត បន្ទាប់ពីចិនបានបើកប្រទេសឱ្យពលរដ្ឋខ្លួនអាចធ្វើដំណើរចេញទៅក្រៅប្រទេស ។ អាជ្ញាធរទេសចរណ៍ថៃប៉ាន់ស្មានថា នៅឆ្នាំ២០២៣នេះ ភ្ញៀវទេសចរចិននឹងមកកម្សាន្តនៅប្រទេសថៃ ស្មើប្រមាណពី៧លាន ទៅ៨លាននាក់ ។

កន្លងមក វិនិយោគិនចិនតែងទិញអាជីវកម្មពាក់ព័ន្ធនឹងផ្នែកទេសចរណ៍ ដូចជា ការជួលរថយន្ត ជួលទូក និងភោជនីយដ្ឋាន ប៉ុន្តែពេលនេះ ពួកគេហ៊ានទិញចម្ការទុរេនក្នុងតម្លៃខ្ពស់ចាប់ពី៣លាន ទៅ៥លានបាត/១រ៉ៃ ហើយមានទីតាំងនៅមិនឆ្ងាយពីខេត្តកូកេត ។

លោក Nattha Kahapana បន្តថា ៖ «ជនជាតិចិនទិញចម្ការទុរេនដែលគេបានដាំដុះរយៈពេលពី៤ ទៅ៥ឆ្នាំ ឬទិញចម្ការណាដែលអាចប្រមូលផលបានតែម្តង គឺពួកគេមិនទិញចម្ការទើបតែដាំទេ» ។

តាមទិន្នន័យរបស់សភាពាណិជ្ជកម្មចិនបង្ហាញថា ទុរេន គឺជាផ្លែឈើនាំចូលលំដាប់ទី១ របស់ចិន ក្នុងទឹកប្រាក់៤,០៣ពាន់លានដុល្លារអាមេរិកនៅឆ្នាំ២០២២ ហើយប្រទេសចិនបាននាំចូលទុរេនចំនួន៨,២៥សែនតោន ក្នុងនោះនាំចូលទុរេនពីថៃស្មើ៩៦% ។ ចិនកំពុងត្រៀមប្រមូលផលទុរេនជាលើកដំបូងក្នុងរដូវក្តៅនេះ ក្រោយពីបានដាំអស់រយៈពេល៤ឆ្នាំនៅកោះហៃណាន និងតំបន់ភាគខាងត្បូងប្រទេសចិន ។ បើទោះជាការប្រមូលផលទុរេនលើកដំបូងនេះមិនច្រើនប៉ុន្មាន ប៉ុន្តែគេសង្ឃឹមថា ក្នុងរយៈពេល៣-៥ឆ្នាំខាងមុខ ចិននឹងពង្រីកផ្ទៃដីដាំដុះបន្ថែមទៀត និងអាចទទួលបានប្រាក់ចំណូលចំនួន៥ពាន់លានយាន់នៅឆ្នាំ២០២៨ ៕ ប្រភព ៖ The standard wealth

តាមរយៈផេក មូលនិធិគន្ធបុផ្ផាកម្ពុជាបានឱ្យដឹងនៅព្រឹកថ្ងៃទី២៨ ខែមីនា ឆ្នាំ២០២៣ នេះថា ក្រុមគ្រូពេទ្យឯកទេសផ្នែកបេះដូងនៃមន្ទីរពេទ្យគន្ធបុប្ផា បានជួយសង្រ្គោះក្មេងប្រុសម្នាក់បានដោយជោគជ័យ ដោយការព្យាបាលបាញ់ភ្ជិតបេះដូង។

តាមការបញ្ជាក់បន្ថែមបានឱ្យដឹងថា ក្មេងប្រុសរូបនោះមានអាយុ ១៣ឆ្នាំ មកពីស្រុកជើងព្រៃ ខេត្តកំពង់ចាម បានចូលមកសង្រ្គោះបន្ទាន់ បន្ទាប់ពីបានចុកទ្រូងខ្លាំងរយៈពេល ៥ថ្ងៃ។

ក្មេងប្រុសខាងលើត្រូវបានជួយសង្រោះជាបន្ទាន់ដោយក្រុមគ្រូពេទ្យឯកទេសផ្នែកបេះដូងនៃមន្ទីរពេទ្យគន្ធបុប្ផាសៀមរាប ដោយរៀបចំដាក់កម្មវិធីបាញ់ភ្ជិតបេះដូង ដោយបច្ចេកទេសទំនើបបំផុត catheterization to close RCA fistula to RA by vascular plug ប្រកបដោយភាពជោគជ័យ។

សូមជម្រាបជូនថា មន្ទីរពេទ្យគន្ធបុប្ផាទាំង ៥ទីតាំង នៅទូទាំងប្រទេសកម្ពុជាទទួលពិនិត្យ និងព្យាបាលទារក និងកុមារ ដោយឥតគិតថ្លៃ និងមិនមានការរើសអើង ហើយបងប្អូនប្រជាបលរដ្ឋទាំងអស់អាចចូលរួមបរិច្ចាគថវិកាទៅដល់មន្ទីរពេទ្យផងដែរ ដើម្បីរួចចំណែកជួយសង្គមជាតិ ជួយសង្គ្រោះជីវិតកុមារនៅកម្ពុជា៕

រាជធានីបាងកក៖ ការបោះឆ្នោត នៅក្នុងប្រទេសថៃ នាខែឧសភា ខាងមុខនេះ ត្រូវគេរំពឹង ថា នឹងក្លាយជាការប្រកួតប្រជែងយ៉ាងស្វិតស្វាញបំផុត ខណៈគណបក្សប្រឆាំងដ៏ធំបំផុតរបស់រាជាណាចក្រអាស៊ានមួយនេះ ហាក់បីដូចជានាំមុខ នៅក្នុងការស្ទង់មតិមួយ លើគណបក្សចម្រុះ កំពុងតែគ្រប់គ្រងអំណាច។

សារព័ត៌មាន Channel News Asia បានចេញផ្សាយ កាលពីថ្ងៃចន្ទ ទី២៧ ខែមីនា ឆ្នាំ២០២៣ ថា ថៃ រៀបចំបោះឆ្នោតសកល នៅថ្ងៃទី១៤ ខែឧសភា ឆ្នាំ២០២៣ ហើយវានឹងក្លាយជាការបោះឆ្នោតប្រកួតប្រជែងដ៏ស្វិតស្វាញបំផុតមួយ រវាងគណបក្ស គាំទ្រ ដោយយោធា ក្រោមការដឹកនាំរបស់លោកនាយករដ្ឋមន្ត្រី ប្រាយុទ្ធ ចាន់អូចា (Prayut Chan-o-cha) វ័យ៦៩ឆ្នាំ និង គណបក្សភឿថៃ គាំទ្រដោយគ្រួសារមហាសេដ្ឋី ស៊ីណាវ៉ាត្រា (Shinawatra) បច្ចុប្បន្ន ដឹកនាំដោយលោកស្រី ភើថុងថាន (Paetongtarn) វ័យ៣៦ឆ្នាំ ត្រូវជាកូនស្រីរបស់លោក ថាក់ស៊ីន ស៊ីណាវ៉ាត្រា អតីតនាយករដ្ឋមន្រ្ដី និង ជាក្មួយស្រីរបស់លោកស្រី យីងឡាក់ ស៊ីណាវ៉ាត្រា អតីតនាយករដ្ឋមន្ត្រីថៃ។

គណបក្សភឿថៃ បានឈ្នះ នៅក្នុងការបោះឆ្នោត ចាប់តាំងពីឆ្នាំ២០០១រហូតមក ប៉ុន្ដែរដ្ឋាភិបាលរបស់គណបក្សនេះ មិនបានគ្រប់គ្រងអំណាចនោះឡើយ ដោយសារតែការសម្រេចចិត្តរបស់តុលាការ ឬ រដ្ឋប្រហារយោធា។ គណបក្សជាច្រើន នឹងប្រជែងយកអាសនៈរបស់រដ្ឋសភា នៅថ្ងៃទី១៤ ខែឧសភា ឆ្នាំ២០២៣។ សមាជិកសភា ទើបជាប់ឆ្នោតថ្មី និងព្រឹទ្ធសភា ដែលត្រូវតែងតាំង រំពឹង ថា នឹងសម្រេចចិត្តជ្រើសរើសនាយករដ្ឋមន្ត្រីមួយ នៅចុងខែកក្កដា ឆ្នាំ២០២៣។

ការស្ទង់មតិមួយ កាលពីចុងសប្ដាហ៍កន្លងទៅនេះ បានបង្ហាញ ថា គណបក្សភឿថៃ ដែលបច្ចុប្បន្ន ដឹកនាំដោយក្មួយស្រីរបស់លោកស្រី យីងឡាក់ អតីតនាយករដ្ឋមន្រ្ដីថៃ មានសំឡេងគាំទ្រ ចំនួន៣៧ភាគរយ ហើយនឹងធ្វើឲ្យគណបក្សមួយនេះ ទទួលបានជ័យជម្នះ នៅក្នុងការបោះឆ្នោត នាពេលខាងមុខ។ ដោយឡែកគណបក្សធំចំនួន៤ផ្សេងទៀត នៅក្នុងរដ្ឋាភិបាលចម្រុះ និង គណបក្សជាសម្ពន្ធមិត្ត មានសំឡេងគាំទ្រ ត្រឹមតែជាងពាក់កណ្តាលប៉ុណ្ណោះ។

ការស្ទង់មតិរបស់ Suan Dusit Poll បានដឹងដែរ ថា គណបក្សភឿថៃ នាំមុខ ៤៦ ភាគរយ ហើយគណបក្សកាន់អំណាចធំៗទាំងបួន ទទួលបានសំឡេងគាំទ្រ ចំនួន៣៥ភាគរយ។ លោក ប្រាយុទ្ធ ចាន់អូចា ជាអតីតមេទ័ពកំពូលរបស់ថៃ កាលពី២០១៤ បានធ្វើរដ្ឋប្រហារយោធា បណ្តេញរដ្ឋាភិបាលរបស់លោកស្រី យីងឡាក់ ត្រូវជាម្ដាយមីងរបស់លោកស្រី Paetongtarn ក៏បានឈរឈ្មោះបោះឆ្នោតជាថ្មី ជាមួយនឹងគណបក្សរួបរួមជាតិថៃ។ បើតាមការស្ទង់មតិ កាលពីពេលថ្មីៗនេះ បង្ហាញ ថា សំឡេងគាំទ្ររបស់លោក ប្រាយុទ្ធ បានធ្លាក់ចុះ ចំពេលគួប្រជែងដ៏សំខាន់របស់គាត់ គឺលោកស្រី Paetongtarn កំពុងតែនាំមុខ៕

ប្រទេសសិង្ហបុរី ៖ នាយករដ្ឋមន្ត្រីសិង្ហបុរី លោក Lee Hsien Loong បានដាស់តឿនពីជម្លោះរវាងប្រទេសចិន និងអាមេរិកថា នឹងបង្កភាពក្តៅក្រហាយដល់ប្រទេសនានា ជាពិសេស នៅពេលក្រុងប៉េកាំងមានឥទ្ធិពលផ្នែកនយោបាយ និងសេដ្ឋកិច្ចកាន់តែខ្លាំងឡើងនៅលើពិភពលោក ។

លោក Lee Hsien Loong បានថ្លែងទៅកាន់ស្ថានីយទូរទស្សន៍ CCTV របស់ប្រទេសចិនកាលពីដើមខែមីនា ហើយការិយាល័យនាយករដ្ឋមន្ត្រីសិង្ហបុរីបានយកបទសម្ភាសន៍នេះមកផ្សព្វផ្សាយកាលពីថ្ងៃទី២៥ ខែមីនា ថា ៖ «ជម្លោះរវាងប្រទេសចិនជាមួយប្រទេសផ្សេងៗ គឺជារឿងមួយដែលពិភពលោកមិនអាចដោះស្រាយបាន ជាពិសេស ជម្លោះជាមួយអាមេរិក ។ ប្រទេសចិនកាន់តែមានភាពរីកចម្រើនខ្លាំងឡើង និងបានគាំទ្រសេដ្ឋកិច្ចពិភពលោកកាន់តែច្រើន ហើយមានសំឡេងកាន់តែច្រើនក្នុងកិច្ចការអន្តរជាតិ» ។

លោក Lee Hsien Loong បន្តថា ៖ «ខ្ញុំគិតថា យើងចាំបាច់ត្រូវដើរទៅមុខ១ជំហាន ដោយធ្វើឱ្យទំនាក់ទំនងមានស្ថេរភាព និងស្តារទំនុកចិត្តឡើងវិញបន្តិចម្តងៗ ហើយព្យាយាមដើរទៅមុខរួមគ្នា ។ ទោះយ៉ាងណា យើងត្រូវការប្រើពេលវេលាផងដែរ ហើយវាមិនមែនជារឿងងាយស្រួលឡើយ ដោយសារសម្ពាធនយោបាយពីភាគីទាំងពីរ» ។

នៅឆ្នាំ២០២៣នេះ សម្ព័ន្ធភាពរវាងប្រទេសចិន និងអាមេរិកបានធ្លាក់ចុះដល់ចំណុចទាបលើសដើម ក្រោយពីក្រុងវ៉ាស៊ីនតោនបានបញ្ជូនយន្តហោះចម្បាំងទៅបាញ់កំទេចបាឡុងរបស់ចិន ខណៈអាមេរិកលើកឡើងថា ចិនបានបញ្ជូនបាឡុងមកស៊ើបការណ៍លើទឹកដីរបស់ខ្លួន ហើយចោទប្រកាន់ចិនថា មានផែនការបញ្ជូនអាវុធជួយរុស្ស៊ីដើម្បីធ្វើសង្គ្រាមជាមួយអ៊ុយក្រែនផងដែរ ។

បើតាមប្រភពព័ត៌មានច្បាស់ការណ៍បានបញ្ជាក់ថា មន្ត្រីអាមេរិកគិតថា ការជជែកគ្នាតាមទូរស័ព្ទរវាងប្រធានាធិបតីអាមេរិក លោក ចូ បៃដិន និងប្រធានាធិបតីចិន លោក ស៊ី ជិនពីង អាចមិនកើតឡើងឆាប់ៗតាមភាគីជាច្រើនរំពឹងទុកទេ ។ វាបានឆ្លុះបញ្ចាំងពីសម្ព័ន្ធភាពតឹងតែងរវាងប្រទេសមហាអំណាចទាំងពីរនេះ ដោយសារក្នុងរយៈពេល២-៣ខែកន្លងមក ប្រទេសទាំងពីរបានប្រឈមមុខនូវបញ្ហាផ្សេងៗជាមួយគ្នា៕
ប្រភព ៖ mgronline

Jack Ma ដែលជាស្ថាបនិកក្រុមហ៊ុន Alibaba Group Holding បានត្រលប់ទៅប្រទេសចិនដីគោកវិញកាលពីពេលថ្មីៗនេះ បន្ទាប់ពីធ្វើដំណើរទៅក្រៅប្រទេសអស់រយៈពេលជាងមួយឆ្នាំ។ ក្នុងដំណើរការវិលត្រលប់នេះមហាសេដ្ឋីរូបនេះ បានទៅទស្សនៈកិច្ចនៅសាលា Yungu ក្នុងទីក្រុង Hangzhou ដែលជាស្រុកកំណើតរបស់លោកផ្ទាល់ផងដែរ។ នេះបើយោងតាមការចុះផ្សាយរបស់សារព័ត៌មាន scmp( South China Morning Post) ចុះផ្សាយនៅថ្ងៃទី២៧ ខែមីនា ឆ្នាំ២០២៣។

កាលពីថ្ងៃច័ន្ទ លោក Ma បានជួបជាមួយលោកគ្រូ អ្នកគ្រូ និងសិស្សានុសិស្សនៅសាលា Yungu ដែលជាសាលាឯកជនដែលសិក្សាពីថ្នាក់មត្តេយ្យដល់វិទ្យាល័យ បានផ្តល់មូលនិធិដោយស្ថាបនិក Alibaba ក្នុងឆ្នាំ ២០១៧។ មហាសេដ្ឋីរូបនេះបានពិភាក្សាអំពីបញ្ហាអប់រំ និងបច្ចេកវិទ្យា ChatGPT ជាមួយសាលាផងដែរ។

គួរបញ្ជាក់ថា លោក Jack Ma បានចូលនិវត្តន៍ក្នុងនាមជាប្រធាន Alibaba ក្នុងថ្ងៃខួបកំណើតអាយុ៥៥ឆ្នាំរបស់លោកក្នុងឆ្នាំ២០១៩ ដោយបានធ្វើដំណើរទៅកាន់ប្រទេសផ្សេងៗគ្នាដើម្បីស្វែងយល់អំពីបច្ចេកវិទ្យាកសិកម្ម។ ការធ្វើដំណើររបស់លោកត្រូវបានតាមដានយ៉ាងជិតស្និទ្ធដោយអ្នកឃ្លាំមើលប្រទេសចិន។

ទោះបីជាលោក Ma បានបាត់ខ្លួនពីទិដ្ឋភាពសាធារណៈក្នុងរយៈពេលប៉ុន្មានឆ្នាំចុងក្រោយនេះក៏ដោយ ប៉ុន្តែកន្លែងរស់នៅរបស់លោកត្រូវបានឃ្លាំមើលយ៉ាងដិតដល់ ជាពិសេសបន្ទាប់ពីក្រុមហ៊ុនដែលលោកបានបង្កើត – រួមទាំង Alibaba និងក្រុមហ៊ុន Ant Group ដែលជាសាខារបស់ក្រុមហ៊ុន Fintech ស្ថិតនៅក្រោមការត្រួតពិនិត្យបទប្បញ្ញត្តិចំពេលមានការបង្ក្រាបកាន់តែខ្លាំងរបស់ទីក្រុងប៉េកាំងលើវិស័យបច្ចេកវិទ្យា។

បន្ទាប់ពីបានលាឈប់ពីតំណែងជាប្រធានប្រតិបត្តិរបស់ Alibaba អតីតគ្រូបង្រៀនភាសាអង់គ្លេស រូបនេះបាននិយាយថា លោកចង់លះបង់ថ្ងៃក្រោយចូលនិវត្តន៍របស់លោក ដើម្បីសប្បុរសធម៌ ការអប់រំជនបទ និងបន្តចំណាប់អារម្មណ៍របស់ខ្លួនក្នុងការធ្វើឱ្យវិស័យជនបទរបស់ប្រទេសចិនរស់ឡើងវិញ៕