ទីភ្នាក់ងារសារព័ត៌មានរដ្ឋវៀតណាម (VNA) បានចុះផ្សាយថា នាវាល្បាតឆ្នេរបំពាក់មីស៊ីលការពារដែនទឹករបស់កងទ័ពជើងទឹកភូមិន្ទថៃ HTMS Prachuap Khiri Khan ​ បានចូលចតនៅកំពង់ផែអន្តរជាតិ Nha Rong – Khanh Hoi ក្នុងទីក្រុងហូជីមិញ ដើម្បីចាប់ផ្តើមទស្សនកិច្ចមិត្តភាពរយៈពេល ៦ ថ្ងៃ ចាប់ពីថ្ងៃទី១៨ ដល់ថ្ងៃទី២៣ ខែឧសភា ឆ្នាំ២០២៦។

ដំណើរទស្សនកិច្ចរបស់នាវាចម្បាំងដ៏មានឥទ្ធិពលនេះ គឺជាព្រឹត្តិការណ៍ដ៏មានសារៈសំខាន់បំផុតមួយ ដើម្បីអបអរសាទរខួបលើកទី៥០ នៃការបង្កើតទំនាក់ទំនងឌីប្លូហ្គាសិបជាផ្លូវការរវាងវៀតណាម និងថៃ (១៩៧៦–២០២៦) ព្រមទាំងបង្ហាញពីសាមគ្គីភាពកាន់តែស៊ីជម្រៅក្នុងវិស័យការពារជាតិ។​ នាវា HTMS Prachuap Khiri Khan គឺជាប្រភេទនាវាល្បាតលំដាប់ Krabi-class ទីពីររបស់ថៃ ដែលមានប្រវែង ៩០.៥ ម៉ែត្រ និងទទឹង ១៣.៥ ម៉ែត្រ ដែលត្រូវបានបំពាក់ដោយកាំភ្លើងធំ និងមីស៊ីលប្រឆាំងនាវាចម្បាំង Harpoon anti-ship missiles សម្រាប់បម្រើដល់បេសកកម្មការពារអធិបតេយ្យភាពដែនសមុទ្រ។

តំណាងឱ្យភាគីម្ចាស់ផ្ទះ លោក Trần Văn Bảy អនុប្រធានគណៈកម្មាធិការប្រជាជនទីក្រុងហូជីមិញ បានគូសបញ្ជាក់ពីសារៈសំខាន់ដ៏ជ្រាលជ្រៅនៃព្រឹត្តិការណ៍នេះថា៖ «ដំណើរទស្សនកិច្ចប្រកបដោយសុឆន្ទៈរបស់នាវា HTMS Prachuap Khiri Khan គឺជសកម្មភាពជាក់ស្តែងឆ្ពោះទៅរកការអបអរសាទរខួប៥០ឆ្នាំនៃទំនាក់ទំនងការទូត ហើយវាឆ្លុះបញ្ចាំងពីទំនុកចិត្តនយោបាយដ៏រឹងមាំរវាងវៀតណាម និងថៃ។ ព្រឹត្តិការណ៍នេះក៏បានរួមចំណែកយ៉ាងធំធេងក្នុងការធ្វើឱ្យកាន់តែស៊ីជម្រៅនូវកិច្ចសហប្រតិបត្តិការរវាងកងទ័ពជើងទឹកទាំងពីរ និងលើកកម្ពស់វិស័យឌីប្លូហ្គាសិបការពារជាតិទ្វេភាគីផងដែរ។»

ស្របពេលជាមួយគ្នានោះ លោកស្រី Urawadee Sriphiromya ឯកអគ្គរាជទូតថៃប្រចាំនៅវៀតណាម ក៏បានបង្ហាញចំណាប់អារម្មណ៍យ៉ាងខ្លាំង ដោយលោកស្រីបានសង្កត់ធ្ងន់ថា ទំនាក់ទំនងរវាងប្រទេសទាំងពីរបានឈានដល់ចំណុចកំពូលថ្មីមួយ បន្ទាប់ពីការតម្លើងទៅជា «ដៃគូយុទ្ធសាស្ត្រគ្រប់ជ្រុងជ្រោយ (Comprehensive Strategic Partnership)»។ លោកស្រីឯកអគ្គរាជទូតបានមានប្រសាសន៍ថា៖ «ដំណើរទស្សនកិច្ចរបស់នាវានៅពេលនេះ មិនត្រឹមតែជានិមិត្តរូបនៃកិច្ចសហប្រតិបត្តិការកងទ័ពជើងទឹកប៉ុណ្ណោះទេ ប៉ុន្តែវាបានបង្ហាញពីទំនាក់ទំនងនយោបាយ សេដ្ឋកិច្ច និងប្រជាជនយ៉ាងជិតស្និទ្ធក្នុងរយៈពេលកន្លះសតវត្សកន្លងមកនេះ។ ប្រទេសថៃ និងវៀតណាម មានផលប្រយោជន៍រួមគ្នាយ៉ាងសំខាន់ក្នុងការរក្សាសន្តិសុខ និងស្ថិរភាពដែនសមុទ្រនៅក្នុងតំបន់។»

ក្រៅពីកិច្ចសហប្រតិបត្តិការយោធានៅចំពោះមុខ ដំណើរទស្សនកិច្ចនេះក៏បានរំលឹកឡើងវិញនូវទំព័រប្រវត្តិសាស្ត្រដ៏មានន័យ រវាងលោកប្រធាន ហូជីមិញ និងប្រទេសថៃ។ កាលពីអំឡុងចុងទសវត្សរ៍ឆ្នាំ១៩២០ លោក ហូជីមិញ (ក្រោមឈ្មោះក្លែងក្លាយថា ថៅ ឈីន – Thau Chín) បានមកស្នាក់នៅ និងធ្វើសកម្មភាពបដិវត្តន៍នៅលើទឹកដីថៃ ជាពិសេសនៅក្នុងខេត្តអ៊ូដនធានី (Udon Thani) និងខេត្តណាខនភ្នំ (Nakhon Phanom)។ ក្នុងអំឡុងពេលនោះ លោកទទួលបានការជួយជ្រោមជ្រែង និងការការពារយ៉ាងកក់ក្តៅពីសំណាក់ប្រជាជនថៃ និងសហគមន៍ជនជាតិវៀតណាមនៅទីនោះ។ ទីតាំងប្រវត្តិសាស្ត្រទាំងនោះ ត្រូវបានរដ្ឋាភិបាលថៃថែរក្សាយ៉ាងល្អ ហើយបច្ចុប្បន្នបានក្លាយជា «មជ្ឈមណ្ឌលប្រវត្តិសាស្ត្រហូជីមិញ» ដែលជានិមិត្តរូបនៃចំណងមិត្តភាពដ៏យូរអង្វែង និងជាស្ពានតភ្ជាប់ទំនាក់ទំនងវប្បធម៌រវាងប្រជាជាតិទាំងពីររហូតមកដល់សព្វថ្ងៃ។

តាមរយៈការជួបជុំផ្លូវការ ការផ្លាស់ប្តូរបទពិសោធន៍យោធារវាងនាយទាហានវ័យក្មេង និងការប្រកួតកីឡាមិត្តភាពនានាក្នុងអំឡុងពេលស្នាក់នៅ ដំណើរទស្សនកិច្ចរបស់នាវាចម្បាំងថៃ HTMS Prachuap Khiri Khan នៅទីក្រុងហូជីមិញ បានក្លាយជាព្រឹត្តិការណ៍ប្រវត្តិសាស្ត្រថ្មីមួយទៀត។ វាមិនត្រឹមតែជាការរំលឹកដល់ចំណងមិត្តភាពរយៈពេល ៥០ ឆ្នាំ និងដានប្រវត្តិសាស្ត្រតាំងពីសម័យលោកប្រធាន ហូជីមិញ ប៉ុណ្ណោះទេ ប៉ុន្តែវាគឺជាការបើកទំព័រថ្មីនៃការដើរទន្ទឹមគ្នាយ៉ាងរឹងមាំរវាងកងទ័ពនៃប្រទេសទាំងពីរ ដើម្បីធានាសន្តិភាព ស្ថិរភាព និងភាពរីកចម្រើននៅក្នុងតំបន់អាស៊ានទាំងមូល៕

យុទ្ធនាការដេញតាមបង្ក្រាបយ៉ាងក្តៅគគុក និងឥតថយដៃរបស់អាជ្ញាធរមានសមត្ថកិច្ចកម្ពុជា ទៅលើសម្បុកបទល្មើសបច្ចេកវិទ្យាឆ្លងដែន កំពុងតែទទួលបានការចាប់អារម្មណ៍ និងចុះផ្សាយយ៉ាងព្រោងព្រាតពីសំណាក់ប្រព័ន្ធផ្សព្វផ្សាយឈានមុខគេនៅលើពិភពលោក។ ក្នុងនោះ សារព័ត៌មានអន្តរជាតិល្បីឈ្មោះ South China Morning Post (SCMP) បានរំលេចយ៉ាងច្បាស់ពីវិធានការច្បាប់ដ៏តឹងរ៉ឹង និងប្រតិបត្តិការចុះឆែកឆេរដ៏ស្វិតស្វាញរបស់កម្ពុជា ដែលជាសក្ខីកម្មបង្ហាញពីការប្តេជ្ញាចិត្តខ្ពស់បំផុតក្នុងការលុបបំបាត់រាល់អាណាចក្របោកប្រាស់អនឡាញខុសច្បាប់។

នៅក្នុងរបាយការណ៍ស៊ើបអង្កេតរបស់ខ្លួន សារព័ត៌មាន SCMP បានបង្ហាញពីទិដ្ឋភាពនៃប្រតិបត្តិការរួមគ្នាយ៉ាងម៉ឺងម៉ាត់ ដឹកនាំដោយកងកម្លាំងនគរបាលជាតិ និងគណៈកម្មការប្រយុទ្ធប្រឆាំងបទល្មើសបច្ចេកវិទ្យា (CCTC) ក្នុងការចុះវាយឆ្មក់ទីតាំងសង្ស័យចំនួនពីរនៅក្នុងមជ្ឈមណ្ឌល ព្រីនស៍ ប្លាហ្សា (Prince Plaza Centre) ក្រុងភ្នំពេញ។ ប្រព័ន្ធផ្សព្វផ្សាយអន្តរជាតិបានកត់សម្គាល់ពីភាពហ្មត់ចត់ និងភាពស្វិតស្វាញរបស់សមត្ថកិច្ចកម្ពុជា ដែលអាចឈានទៅដល់ការឃាត់ខ្លួនជនសង្ស័យជាជនបរទេសបានរហូតដល់ ១០៤ នាក់ ព្រមទាំងដកហូតឧបករណ៍បច្ចេកវិទ្យាបម្រើឱ្យការបោកប្រាស់ រួមមានទូរស័ព្ទដៃ ៨០០ គ្រឿង និងកុំព្យូទ័រជាង ១០០ គ្រឿង ក្នុងពេលតែមួយ។

ក្រៅពីការបង្ក្រាបលើដី សារព័ត៌មានអន្តរជាតិធំៗក៏បានធ្វើការកោតសរសើរផងដែរចំពោះចំណាត់ការកាត់ឫសគល់នៃបណ្តាញឧក្រិដ្ឋកម្មនេះ ដោយអាជ្ញាធរកម្ពុជាបានប្រើប្រាស់វិធានការច្បាប់យ៉ាងក្តៅ ក្នុងការចាប់ខ្លួន និងធ្វើបត្យាប័នអតីតមហាសេដ្ឋី ចេន ហ្ស៊ី (Chen Zhi) ទៅកាន់ប្រទេសចិន។ ការចុះផ្សាយរបស់ SCMP បានបង្ហាញឱ្យពិភពលោកឃើញថា កម្ពុជាកំពុងតែធ្វើការសម្អាតប្រព័ន្ធសេដ្ឋកិច្ច និងហិរញ្ញវត្ថុរបស់ខ្លួនយ៉ាងសកម្ម ដោយមិនត្រឹមតែបង្ក្រាបក្រុមការងារថ្នាក់ក្រោមនោះទេ ប៉ុន្តែគឺដេញតាមរំលាយរហូតដល់ទ្រព្យសម្បត្តិ និងបុត្រសម្ព័ន្ធធនាគារ (Prince Bank) ដែលមានការពាក់ព័ន្ធ ដើម្បីធានាឱ្យបាននូវតម្លាភាពដាច់ខាត។

ឆ្លងតាមរយៈការរាយការណ៍របស់ប្រព័ន្ធផ្សព្វផ្សាយបរទេស រូបភាពអន្តរជាតិនៃប្រទេសកម្ពុជាត្រូវបានលើកកម្ពស់ក្នុងនាមជា «ដៃគូសកលដ៏គួរឱ្យទុកចិត្ត»។ ភាពជោគជ័យនៃការបង្ក្រាបនេះ មិនមែនកើតឡើងដោយចៃដន្យឡើយ ប៉ុន្តែវាជាលទ្ធផលនៃការបើកចំហចិត្ត និងការសហការយ៉ាងស្អិតរមួតរវាងអាជ្ញាធរភ្នំពេញ ជាមួយស្ថាប័នច្បាប់អន្តរជាតិ រួមមានសហរដ្ឋអាមេរិក ចក្រភពអង់គ្លេស និងតុលាការទីក្រុងហុងកុង ដែលទើបតែបានចេញដីកាបង្កកទ្រព្យសម្បត្តិខុសច្បាប់របស់បណ្តាញនេះតម្លៃរាប់ពាន់លានដុល្លារ។

តាមរយៈការចុះបង្ក្រាបទ្រង់ទ្រាយធំ និងការអនុវត្តវិធានការច្បាប់យ៉ាងតឹងរ៉ឹងទៅលើបុត្រសម្ព័ន្ធហិរញ្ញវត្ថុដែលពាក់ព័ន្ធនឹងសកម្មភាពឆបោ.កទាំងនេះ គឺជាសក្ខីកម្មឆ្លុះបញ្ចាំងថា កម្ពុជាមិនមែនជាជម្រកប្រកបដោយសុវត្ថិភាពសម្រាប់ក្រុមឧក្រិដ្ឋជនបច្ចេកវិទ្យានោះឡើយ។ តាមរយៈការបន្តរឹតបន្តឹងការអនុវត្តច្បាប់ និងការបើកចំហកិច្ចសហប្រតិបត្តិការជាមួយសហគមន៍អន្តរជាតិ រាជរដ្ឋាភិបាលកម្ពុជានៅតែបន្តដើរតួនាទីយ៉ាងសំខាន់ក្នុងការកសាងបរិយាកាសវិនិយោគមួយដ៏ស្អាតស្អំ មានសុវត្ថិភាព និងមានទំនុកចិត្តខ្ពស់សម្រាប់ធុរជនស្របច្បាប់មកពីជុំវិញពិភពលោក៕

មេដឹកនាំគណបក្សប្រឆាំង លោក Natthaphong Ruengpanyawut នៅថ្ងៃទី២១ ខែឧសភា ឆ្នាំ២០២៦ បានណែនាំទៅនាយករដ្ឋមន្ត្រីថៃ លោក Anutin Charnvirakul អញ្ជើញប្រធានាធិបតីបារាំង លោក Emmanuel Macron មកបំពេញទស្សនកិច្ចនៅប្រទេសថៃ ដើម្បីជួយសម្របសម្រួល និងដោះស្រាយបញ្ហាជម្លោះព្រំដែនរវាងកម្ពុជា-ថៃ ។ ការណែនាំនេះ ស្របពេលលោក Anutin ធ្វើដំណើរទៅប្រទេសបារាំង ចាប់ពីថ្ងៃទី២១ ដល់ថ្ងៃទី២៧ ខែឧសភា ក្នុងបំណងពិភាក្សាការងារឆ្ពោះទៅលើកកម្ពស់ទំនាក់ទំនងទ្វេភាគីឱ្យក្លាយជាដៃគូយុទ្ធសាស្ត្រ ។

លោក Natthaphong មេដឹកនាំគណបក្សប្រឆាំង បានណែនាំឱ្យនាយករដ្ឋមន្ត្រីថៃគួរតែប្រើប្រាស់ឱកាសនៃការទំនាក់ទំនងការទូតជាមួយបារាំង ដើម្បីអញ្ជើញលោក Macron មកបំពេញទស្សនកិច្ចនៅប្រទេសថៃជាមុនសិន មុនពេលប្រធានាធិបតីបារាំងរូបនេះមានគម្រោងអញ្ជើញទៅបំពេញទស្សនកិច្ចនៅប្រទេសកម្ពុជា នាចុងឆ្នាំ២០២៦ ។ លោកយល់ឃើញថា ការធ្វើជាម្ចាស់ផ្ទះទទួលស្វាគមន៍មេដឹកនាំបារាំង នឹងជួយផ្តល់ឱកាស និងបរិយាកាសការទូតដ៏ល្អប្រសើរក្នុងការដោះស្រាយជម្លោះព្រំដែនដ៏តានតឹងរវាងកម្ពុជា និងថៃ ។

ក្រៅពីដោះស្រាយជម្លោះព្រំដែន លោកសង្ឃឹមថា ការអញ្ជើញប្រធានាធិបតីបារាំងមកបំពេញទស្សនកិច្ចនៅប្រទេសថៃ ក៏ជាការទាក់ទាញវិនិយោគិនបរទេសមានគុណភាពមកវិនិយោគនៅថៃផងដែរ ដូចជា ៖ វិនិយោគផ្នែកថាមពលស្អាត ពីព្រោះបារាំង គឺជាប្រទេសឈានមុខគេមួយដែលបំភាយកាបូនទាបក្នុងវិស័យថាមពល ។ នេះបើតាមការចុះផ្សាយរបស់សារព័ត៌មាន Thairath ។

គួរបញ្ជាក់ថា មេដឹកនាំគណបក្សប្រឆាំងចង់ឱ្យប្រធានាធិបតីបារាំងមកជួយដោះស្រាយជម្លោះព្រំដែនកម្ពុជា-ថៃ ពីព្រោះមើលឃើញថា ប្រទេសបារាំងក្រោមការដឹកនាំរបស់លោក Macron បានបង្ហាញនូវគោលជំហរចង់ជួយសម្របសម្រួលអព្យាក្រឹត និងផ្តល់ឯកសារប្រវត្តិសាស្ត្រ/ផែនទីនានាតាំងពីសម័យអាណានិគមដល់ប្រទេសទាំងពីរ ប្រសិនបើមានការស្នើសុំ ដើម្បីជំរុញឱ្យមានកិច្ចចរចាទ្វេភាគីដោយសន្តិវិធី ។

កន្លងមក មេដឹកនាំគណបក្សប្រជាជន ឬគណបក្សប្រឆាំងថៃ តែងតែរិះគន់ពីការដឹកនាំប្រទេសគាំទ្រក្រុមជ្រុលនិយម និងពឹងផ្អែកលើកម្លាំងកងទ័ពតែម្យ៉ាងរបស់លោក Anutin ដោយគណបក្សប្រឆាំងជំរុញឱ្យរដ្ឋាភិបាលថៃប្រើប្រាស់យុទ្ធសាស្ត្រការទូតអន្តរជាតិ បង្កើនភាពស្របច្បាប់លើឆាកអន្តរជាតិ ។

ចំណែកលោក Anutin ធ្វើដំណើរទៅប្រទេសបារាំង ចាប់ពីថ្ងៃទី២១ ដល់ថ្ងៃទី២៧ ខែឧសភា គឺក្នុងបំណងពិភាក្សាការងារឆ្ពោះទៅលើកកម្ពស់ទំនាក់ទំនងទ្វេភាគីឱ្យក្លាយជាដៃគូយុទ្ធសាស្ត្រ និងទាក់ទាញការវិនិយោគលើវិស័យអាកាសចរណ៍ ។ ដំណើរទស្សនកិច្ចនេះដែរ នឹងពង្រឹងកិច្ចសហការសេដ្ឋកិច្ច ការទូតឱ្យកាន់តែស៊ីជម្រៅ ក្នុងឱកាសប្រទេសទាំងពីរប្រារព្ធខួបលើកទី១៧០ នៃទំនាក់ទំនងការទូតរវាងគ្នា ៕

ពលរដ្ឋថៃបារម្ភពីការបាត់បង់មច្ឆជាតិគ្រប់ប្រភេទ និងពិបាកទប់ស្កាត់ បន្ទាប់ពីប្រទះឃើញត្រីទីឡាបយ៉ាខ្មៅ (Blackchin Tilapia) រាប់ម៉ឺនក្បាលក្នុងទន្លេចៅប្រាយ៉ា ដែលហូរឆ្លងកាត់ខេត្តសមុទ្រប្រាកាន ទីក្រុងបាងកក និងខេត្តជាច្រើនទៀត ហើយទន្លេនេះជាបណ្តាញទឹកដ៏សំខាន់តភ្ជាប់ទៅកាន់ស្ទឹង បឹងបួរ និងប្រឡាយខ្វាត់ខ្វែងរាប់ពាន់កន្លែង ។ ពួកគេស្នើឱ្យរដ្ឋាភិបាល និងនាយកដ្ឋានជលផលកំណត់វិធានការកម្ចា.ត់ជាបន្ទាន់ ដើម្បីទប់ស្កាត់ការបំផ្លា.ញប្រព័ន្ធអេកូឡូស៊ី និងការបាត់បង់ពូជត្រីផ្សេងៗ បន្ទាប់ពីទើបឃើញត្រីនេះនៅឆ្នេរសមុទ្រប៉ាតាយ៉ា ខេត្តឈុនបុរី និងត្រាត ។

ការប្រទះឃើញត្រីទីឡាបយ៉ាខ្មៅក្នុងទន្លេចៅប្រាយ៉ា ដែលហូរឆ្លងកាត់ខេត្តសមុទ្រប្រាកាន, ទីក្រុងបាងកក និងប្រឡាយជាច្រើននៅទីក្រុងបាងកកនាពេលនេះ គឺជាសញ្ញាប្រកាសអាសន្នកាន់តែខ្លាំងសម្រាប់ប្រទេសថៃ ដែលបង្ហាញថា ការកើនឡើងនៃពូជត្រីនេះ បានចូលមកដល់ទីតាំងសេដ្ឋកិច្ចដ៏សំខាន់ហើយ ។ កន្លងមក រដ្ឋាភិបាលថៃ និងនាយកដ្ឋានជលផល ធ្លាប់កំណត់វិធានការក្តៅ ដោយបើកយុទ្ធនាការឱ្យពលរដ្ឋចាប់ និងផ្តល់ប្រាក់រង្វាន់គិតជាគីឡូក្រាម រួមទាំងជំរុញឱ្យយកទៅធ្វើជីកសិកម្ម ចំណីសត្វ ធ្វើម្ហូប ប៉ុន្តែនៅតែមិនអាចទប់ស្កាត់បាន ។

កាលពីថ្ងៃទី២០ ខែឧសភា ឆ្នាំ២០២៦ ពលរដ្ឋខេត្តសមុទ្រប្រាកាន និងក្រុងបាងកក បានឃើញត្រីប្រភេទនេះហែលទាំងហ្វូងៗរាប់ម៉ឺនក្បាលនៅទន្លេចៅប្រាយ៉ា និងទឹកប្រឡាយនានាក្នុងទីក្រុង ពួកគេនាំគ្នាចាប់ពីក្នុងប្រឡាយយកទៅធ្វើម្ហូប ប៉ុន្តែបារម្ភពីទឹកប្រឡាយកខ្វក់ មានក្លិនភក់ គ្មានអនាម័យ ។ អ្នកនេសាទ និងអ្នកអភិរក្សបរិស្ថានថា ការកើនឡើងយ៉ាងឆាប់រហ័សមិនអាចទប់ស្កាត់បានបែបនេះ គឺជាការបំផ្លាញចំណីធម្មជាតិ បំផ្លាញប្រភពទឹក រហូតប៉ះពាល់ដល់សេដ្ឋកិច្ចថៃរយៈពេលយូរ ។

ពលរដ្ឋ ក៏ដូចជាអ្នកអភិរក្សបរិស្ថាន ស្នើឱ្យមន្ត្រីស្ថាប័នពាក់ព័ន្ធប្រញាប់ចុះមកត្រួតពិនិត្យ និងកំណត់វិធានការទប់ស្កាត់ការបង្កាត់ពូជ មុនពេលប្រព័ន្ធអេកូឡូស៊ីតាមបណ្តាខេត្ត និងក្រុងបាងកក រងផលប៉ះពាល់ខ្លាំងជាងនេះ មិនអាចដោះស្រាយបាន ។

គួរបញ្ជាក់ថា ត្រីទីឡាបយ៉ាខ្មៅ ឬត្រីទីឡាបយ៉ាចង្ការខ្មៅ គឺស៊ីកូនត្រី កូនបង្គា លៀស និងខ្មៅ ជាអាហារ ។ វត្តមានរបស់វាធ្វើឱ្យប្រទេសថៃប្រឈមនឹងការដាច់ពូជត្រី បង្គា ដោយសារត្រីទីឡាបយ៉ាញី១ក្បាល អាចបង្កើតកូនរហូតដល់៥០០ក្បាលក្នុង១លើក ហើយអាចរស់នៅក្នុងទឹកសាប ទឹកប្រៃ និងទឹកប្រឡាយក្នុងទីក្រុងបាងកក បើទោះជាទឹកកខ្វក់ក៏ដោយ ៕

យោងតាមទិន្នន័យចុងក្រោយដែលផ្សាយដោយស្ថាប័ន SEA Trends ផ្អែកលើរបាយការណ៍របស់ World Population Review បានឱ្យដឹងថា ប្រទេសវៀតណាម និងប្រទេសថៃ បានក្លាយជាប្រទេសឈានមុខគេក្នុងតំបន់អាស៊ី ខាងប្រើប្រាស់គ្រឿងស្រវឹងខ្ពស់ជាងគេ ដោយវៀតណាមឈរនៅចំណាត់ថ្នាក់លេខ១ រីឯថៃស្ថិតនៅចំណាត់ថ្នាក់លេខ៣។

ផ្អែកលើទិន្នន័យដែលបានបង្ហាញ ប្រទេសវៀតណាមបាននាំមុខគេនៅលើកំពូលតារាង ដោយប្រជាជនម្នាក់ៗប្រើប្រាស់គ្រឿងស្រវឹងជាមធ្យមរហូតដល់ ១០.៧ លីត្រក្នុងមួយឆ្នាំ។ បរិមាណដ៏ច្រើនលើសលប់នេះ បានធ្វើឱ្យវៀតណាមក្លាយជាប្រទេសដែលមានការប្រើប្រាស់គ្រឿងស្រវឹងខ្ពស់ជាងគេបំផុតនៅក្នុងតំបន់អាស៊ី។

ទន្ទឹមនឹងនេះដែរ ប្រទេសថៃដែលជាសមាជិកអាស៊ានមួយទៀត បានជាប់ចំណាត់ថ្នាក់លេខ ៣ ដោយមានកម្រិតប្រើប្រាស់គ្រឿងស្រវឹងមធ្យម ៧.៦ លីត្រក្នុងមួយឆ្នាំ ក្នុងម្នាក់ បន្ទាប់ពីប្រទេសកូរ៉េខាងត្បូងដែលឈរនៅចំណាត់ថ្នាក់លេខ ២ ជាមួយនឹងតួលេខ ៨.៤ លីត្រក្នុងមួយឆ្នាំ។ ចំណែកឯប្រទេសជប៉ុន ដែលល្បីល្បាញខាងវប្បធម៌ជួបជុំសេពគ្រឿងស្រវឹងក្រោយចេញពីធ្វើការនោះ គឺស្ថិតនៅចំណាត់ថ្នាក់លេខ ៤ ដោយប្រជាជនម្នាក់ៗញ៉ាំមធ្យម ៦.៣ លីត្រក្នុងមួយឆ្នាំ។នៅក្នុងចំណោមប្រទេសទាំង ១០ នេះ គេសង្កេតឃើញមានវត្តមានប្រទេសក្នុងតំបន់អាស៊ីអាគ្នេយ៍ (អាស៊ាន) រហូតដល់ទៅ ៤ ប្រទេស។

នៅក្នុងចំណោមប្រទេសទាំង ១០ ដែលមានអត្រាផឹកស្រាច្រើនជាងគេនេះ គេសង្កេតឃើញមានវត្តមានប្រទេសក្នុងតំបន់អាស៊ីអាគ្នេយ៍ (អាស៊ាន) រហូតដល់ទៅ ៤ ប្រទេស។ ក្រៅពីវៀតណាម និងថៃ ប្រទេសហ្វីលីពីនឈរនៅចំណាត់ថ្នាក់លេខ ៥ (៥.៧ លីត្រ) ខណៈពេលដែលប្រទេសកម្ពុជា ស្ថិតនៅចំណាត់ថ្នាក់លេខ ៧ ដោយប្រជាជនម្នាក់ៗញ៉ាំគ្រឿងស្រវឹងមធ្យម ៥.៤ លីត្រក្នុងមួយឆ្នាំ ស្មើនឹងប្រទេសកាហ្សាក់ស្ថាន។

បើតាមការកត់សម្គាល់ពីអ្នកជំនាញ តួលេខនៃការប្រើប្រាស់គ្រឿងស្រវឹងដ៏ខ្ពស់នៅក្នុងបណ្តាប្រទេសអាស៊ីទាំងនេះ ភាគច្រើនរុញច្រានដោយការកើនឡើងនៃឧស្សាហកម្មស្រាបៀរក្នុងស្រុក ការផ្សព្វផ្សាយពាណិជ្ជកម្មយ៉ាងទូលំទូលាយ និងទម្លាប់នៃការជួបជុំសង្គម។ ទោះជាយ៉ាងណាក៏ដោយ និន្នាការនៃការកើនឡើងនេះ ក៏កំពុងបង្កើតជាក្តីបារម្ភកាន់តែខ្លាំងឡើង ពីសំណាក់អាជ្ញាធរសុខាភិបាល ពាក់ព័ន្ធនឹងផលប៉ះពាល់សុខភាពរាងកាយ គ្រោះថ្នាក់ចរាចរណ៍ និងបន្ទុកសេដ្ឋកិច្ចគ្រួសារផងដែរ។

ដោយឡែក ប្រទេសដែលមានចំនួនប្រជាជនច្រើនជាងគេបំផុតលើពិភពលោកទាំងពីរ គឺឥណ្ឌា និងចិន បែរជាស្ថិតនៅបាតតារាងនៃកំពូលទាំង១០នេះទៅវិញ ដោយប្រទេសឥណ្ឌាឈរនៅលេខ ៩ និងប្រទេសចិនឈរនៅលេខ ១០ ជាមួយនឹងអត្រាប្រើប្រាស់ស្មើគ្នាគឺ ៤.៥ លីត្រក្នុងម្នាក់សម្រាប់មួយឆ្នាំ។

បើតាមការកត់សម្គាល់ពីអ្នកជំនាញ ទោះបីជាប្រទេសមួយចំនួនដូចជា ចិន និងឥណ្ឌា មានអត្រាប្រើប្រាស់មធ្យមក្នុងម្នាក់ទាបជាងវៀតណាម ឬកូរ៉េខាងត្បូងក៏ដោយ ប៉ុន្តែដោយសារតែចំនួនប្រជាសាស្ត្រដ៏ច្រើនមហិមារបស់ប្រទេសទាំងពីរ បរិមាណគ្រឿងស្រវឹងសរុបដែលត្រូវបានប្រើប្រាស់នៅលើទីផ្សារគឺនៅតែមានទំហំធំធេងខ្លាំង ដែលជះឥទ្ធិពលយ៉ាងខ្លាំងដល់សង្វាក់ផលិតកម្មគ្រឿងស្រវឹងនៅក្នុងតំបន់អាស៊ីទាំងមូល៕