ប្រទេសថៃ ៖ ស្ត្រីមីយ៉ាន់ម៉ាម្នាក់បានបង្ហោះវីដេអូឃ្លីបមួយ ហើយធ្វើឱ្យមានការជជែកតវ៉ាគ្នាក្នុងបណ្តាញសង្គមប្រទេសថៃ រហូតមានពលរដ្ឋថៃបណ្តេញឱ្យស្ត្រីរូបនេះចេញពីប្រទេសថៃផងដែរ ប៉ុន្តែមិនយូរប៉ុន្មាន ស្ត្រីរូបនេះបានបង្ហោះវីដេអូមួយទៀតសូមទោស ។ អ្នកជំនាញផ្នែកពលករបរទេសប្រចាំប្រទេសថៃបង្ហាញថា ពលករមីយ៉ាន់ម៉ាបាននាំគ្នាតវ៉ាក្នុងថ្ងៃទិវាពលកម្មកន្លងមក រហូតមានរឿងកើតឡើង ព្រោះពួកគេអំពាវនាវឱ្យមានប្រព័ន្ធគ្រប់គ្រងការងារត្រឹមត្រូវសម្រាប់ពលករបរទេស ។

កាលពីថ្ងៃទី១ ខែឧសភា ពលករបរទេសបានប្រមូលផ្តុំគ្នាតវ៉ានៅបរិវេណផ្លូវបំបែករ៉ាជព្រះសុង ។ ក្រោយមក មានស្ត្រីពលករមីយ៉ាន់ម៉ាម្នាក់បានបង្ហោះវីដេអូឃ្លីបទាមទារសិទ្ធិពលករបរទេសដែលធ្វើការនៅប្រទេសថៃ ដើម្បីឱ្យពួកគេមានសិទ្ធិស្មើគ្នា ។ ប៉ុន្តែនៅចុងបញ្ចប់នៃវីដេអូឃ្លីប ស្ត្រីរូបនេះបាននិយាយស្តីមិនសមរម្យ រហូតធ្វើឱ្យពលរដ្ឋថៃខ្លះដែលមើលវីដេអូរបស់នាងក្នុងតិកតុកចេញមកប្រកែក ។ បន្ទាប់មក ស្ត្រីរូបនេះបានចេញវីដេអូសូមទោស ហើយមានអ្នកចូលមកបញ្ចេញយោបល់ជាច្រើនម៉ឺននាក់ ។

លោក Siwawong Suktawee មន្ត្រីតំណាងមកពី Migrant Working Group ដែលធ្វើការផ្នែកពលករបរទេស បាននិយាយមកកាន់សារព័ត៌មានថៃរ៉ាត់ថា ការចេញមកតវ៉ារបស់ពលករមីយ៉ាន់ម៉ាជាច្រើននាក់ក្នុងថ្ងៃទិវាពលកម្ម គឺពាក់ព័ន្ធនឹងបញ្ហាការធ្វើលិខិតឆ្លងដែនដែលកំពុងជាប់គាំងនៅឡើយ ព្រោះនៅព្រំដែនខ្លះ ពលករមីយ៉ាន់ម៉ាមិនអាចឆ្លងដែនទៅធ្វើលិខិតឆ្លងដែនបានទេ ។ លើសពីនេះ មានបញ្ហានយោបាយក្នុងប្រទេសធ្វើឱ្យពលករមួយចំនួនមិនហ៊ានត្រឡប់ទៅប្រទេសរបស់ខ្លួនវិញ ព្រោះខ្លាចមិនអាចត្រឡប់មកធ្វើការនៅថៃបន្តទៀត ។ កន្លងមក ប្រទេសថៃបានលើកលែងដោយសារមានជំងឺកូវីដរាតត្បាត ប៉ុន្តែប្រទេសថៃនឹងឈប់លើកលែងចាប់ពីថ្ងៃទី១៥ ខែឧសភា ឆ្នាំ២០២៣ ។

បញ្ហាប្រឈមពេលនេះ គឺស្ថានទូតមីយ៉ាន់ម៉ានៅថៃបានកំណត់ចំនួនមនុស្សមកបន្តសុពលភាពលិខិតឆ្លងដែន ដោយសារបារម្ភពីរដ្ឋាភិបាលយោធាមីយ៉ាន់ម៉ា ខណៈថៃនឹងបោះឆ្នោតនៅថ្ងៃទី១៤ ខែឧសភា ។ ដូច្នេះ វាពិបាកដោះស្រាយបញ្ហារបស់ពលករទាំងនេះណាស់ ទើបធ្វើឱ្យពលករមីយ៉ាន់ម៉ាជាង១សែននាក់រស់នៅថៃ ត្រូវក្លាយជាពលករខុសច្បាប់ ។ បើគ្មានដំណោះស្រាយទេ វានឹងក្លាយជាបញ្ហាសំខាន់ចំពោះពលករមីយ៉ាន់ម៉ា ហើយពួកគេចេញមកតវ៉ាកាន់តែច្រើន ។

កន្លងមក ពលករមីយ៉ាន់ម៉ាបានធ្វើឯកសារធ្វើការនៅថៃ២ឆ្នាំម្តង ហើយពួកគេបានចំណាយប្រាក់ថ្លៃឯកសារមិនដល់១ម៉ឺនបាតទេ ប៉ុន្តែក្រោយមក ឈ្មួញកណ្តាលបានដំឡើងថ្លៃឈ្នួលធ្វើឯកសារ គឺធ្វើឯកសារម្តងអស់២ម៉ឺនបាត ។ ហេតុនេះ ពលករមីយ៉ាន់ម៉ាជាច្រើននាក់មានអារម្មណ៍ថា ធ្វើការស្ទើរស្លាប់នៅថៃ ហើយត្រូវយកប្រាក់យ៉ាងច្រើនមកធ្វើឯកសារតែម្យ៉ាង និងគ្មានប្រាក់សល់ជាប់ខ្លួន ពួកគេក៏រងសម្ពាធកាន់តែខ្លាំង ។ លើសពីនេះ បើឯកសារធ្វើការនៅថៃមិនត្រឹមត្រូវ ពួកគេត្រូវប្រឈមនឹងអាជ្ញាធរថៃចាប់ខ្លួន និងត្រូវបង់ប្រាក់ពិន័យទៀត ។

ក្រោយពីជំងឺកូវីដធូរស្រាល ពលករមីយ៉ាន់ម៉ាបានចូលមកប្រទេសថៃកាន់តែច្រើន អ្នកខ្លះមកថៃដោយសារបញ្ហានយោបាយក្នុងប្រទេសរបស់ខ្លួន ។ ដូច្នេះ មានអ្នកចូលមកត្រឹមត្រូវតាមច្បាប់ និងលួចចូលមកតាមច្រកធម្មជាតិ ។ ភ្នាក់ងាររដ្ឋាភិបាលថៃ គួរកុំយកប្រាក់ខ្ពស់ពេកសម្រាប់ការចុះឈ្មោះពលករបរទេស ព្រោះពួកគេមានចំណែករួមក្នុងការអភិវឌ្ឍសេដ្ឋកិច្ចថៃ ហើយពលករខ្លះក៏បានធ្វើជាឈ្មួញកណ្តាលជួយនាំផលិតផលថៃទៅលក់នៅប្រទេសរបស់ខ្លួនដែរ ។ ដូច្នេះ ប្រទេសថៃមិនអាចរីកចម្រើនតែឯងបានទេ ប៉ុន្តែត្រូវមានប្រទេសជិតខាងជួយ ៕ ប្រភព ៖ Thairath

ការប្រកួតប្រភេទកីឡាទូកក្ដោង សម្រាប់ព្រឹត្តិការណ៍កីឡាអាស៊ីអាគ្នេយ៍ លើកទី៣២ ឆ្នាំ២០២៣ ពីតំបន់ឆ្នេរសមុទ្រដ៏ស្រស់ស្អាតនៃខេត្តព្រះសីហនុ ដែលមាន ៩ វិញ្ញាសា បញ្ចប់ទៅដោយភាពជោគជ័យហើយព្រមទាំងរកឃើញម្ចាស់មេដាសផងដែរគឺបានទៅលើអត្តពលិកប្រទេសថៃដោយមានការអញ្ជើញចូលរួមបំពាក់មេដាយដោយ ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ ។

ក្នុងប្រភេទកីឡាទូកក្ដោង អត្តពលិកមកពីប្រទេសថៃ ប្រមូលមេដាយមាសបានច្រើនជាងគេដោយទទួលបានចំនួន ៤គ្រឿង ចំណែកសិង្ហបុរី ទទួលបានមេដាយមាស ៣គ្រឿង និងម៉ាឡេស៊ី រកបានមេដាយមាស ២គ្រឿង ដោយឡែកម្ចាស់ផ្ទះកម្ពុជា ជាមួយ ហ្វីលីពីន ទទួលបានមេដាយប្រាក់ ១គ្រឿង និងសំរឹទ្ធ ២គ្រឿងដូចគ្នា។

គួរបញ្ជាក់ផងដែរថា កីឡាទូកក្តោង បានចាប់ផ្តើមប្រកួតនៅថ្ងៃទី២ ខែឧសភា វេលាម៉ោង១០ និង ៣០នាទីព្រឹក និងបានបញ្ចប់នៅថ្ងៃទី៨ ខែឧសភា ឆ្នាំ២០២៣។ ទូកក្តោងផ្នែកបុរស និងកីឡាទូកក្តោងផ្នែកនារី មានកីឡាមកពីប្រទេសចំនួន៦ ស្មើនឹង ១០១នាក់ ចូលរួមប្រកួត ក្នុងនោះរួមមាន៖៖ កម្ពុជា មានកីឡាករចូលរួមចំនួន ១៨រូប , ថៃ មានកីឡាករចូលរួមចំនួន ២៧រូប, សិង្ហបុរី មានកីឡាករចូលរួមចំនួន ១៦រូប, ម៉ាឡេស៊ី មានកីឡាករចូលរួមចំនួន ១៥រូប ហ្វីលីពីន មានកីឡាករចូលរួមចំនួន ១៤រូប , វៀតណាម មានកីឡាករចូលរួមចំនួន ១១រូប៕

ប្រទេសមីយ៉ាន់ម៉ា ៖ កាលពីដើមខែឧសភា ឆ្នាំ២០២៣ លោក Qin Kang រដ្ឋមន្ត្រីក្រសួងការបរទេសចិនបានធ្វើដំណើរទៅកាន់ប្រទេសមីយ៉ាន់ម៉ា និងចូលជួបឧត្តមសេនីយជាន់ខ្ពស់របស់មីយ៉ាន់ម៉ា លោក Min Aung Lai នៅទីក្រុងណៃពិដោ ។ ប្រទេសចិនត្រូវបានចាត់ទុកថា ជាសម្ព័ន្ធមិត្តដ៏សំខាន់មួយ និងជាប្រទេសស្វែងរកអាវុធឱ្យមីយ៉ាន់ម៉ា ខណៈប្រទេសចិនមិនបានថ្កោលទោសរដ្ឋាភិបាលយោធាដែលចូលមកគ្រប់គ្រងប្រទេសនេះទេ ។

តាមសេចក្តីថ្លែងការណ៍ពីនាយកដ្ឋានព័ត៌មានមីយ៉ាន់ម៉ាបញ្ជាក់ថា លោក Qin Kang បានថ្លែងទៅកាន់លោកឧត្តមសេនីយ Min Aung Lai ថា ប្រទេសចិននឹងឈរនៅខាងមីយ៉ាន់ម៉ាលើឆាកអន្តរជាតិ, គាំទ្រឱ្យសហគមន៍ពិភពលោកគោរពអធិបតេយ្យភាពរបស់មីយ៉ាន់ម៉ា និងចូលរួមដើរតួនាទីដើម្បីជួយឱ្យប្រទេសនេះសម្រេចបាននូវសុខសន្តិភាពផងដែរ ។ ក្រៅពីនេះ ប្រទេសចិននឹងបន្តជំរុញការអភិវឌ្ឍរបស់មីយ៉ាន់ម៉ា, ពន្លឿនគម្រោងសហការសំខាន់ៗនៅច្រករបៀងសេដ្ឋកិច្ចចិន-មីយ៉ាន់ម៉ាឱ្យបានឆាប់រហ័ស និងដំណើរការគម្រោងផ្សេងៗក្នុងផ្នែកកសិកម្ម ការអប់រំ និងសុខាភិបាល ។

ក្នុងការពិភាក្សាជាមួយគ្នានេះ ភាគីទាំងពីរបានពិភាក្សាអំពីប្រធានបទសំខាន់ៗដូចជា ទំនាក់ទំនងការទូត, កិច្ចសហការមិត្តភាព, ស្ថានការណ៍បច្ចុប្បន្ននៅមីយ៉ាន់ម៉ា, ពាណិជ្ជកម្មតាមព្រំដែន, ការវិនិយោគ និងកិច្ចសហការផ្នែកថាមពល និងអគ្គិសនី ។ក្រោយពីដំណើរទស្សនកិច្ចមកកាន់ប្រទេសមីយ៉ាន់ម៉ា លោក Qin Kang បានធ្វើដំណើរបន្តទៅកាន់ប្រទេសឥណ្ឌា ដើម្បីជួបជាមួយក្រុមរដ្ឋមន្ត្រីការបរទេសមកពីប្រទេសផ្សេងៗរបស់អង្គការសហប្រតិបត្តិការសៀងហៃ ។ ចិន និងឥណ្ឌា គឺជាប្រទេសតំណាងឱ្យការពិភាក្សាលើកចុងក្រោយនៅទីក្រុងញូវដេលីរបស់ឥណ្ឌា អំពីការដោះស្រាយវិបត្តិនៅមីយ៉ាន់ម៉ា ។ ដូច្នេះ ប្រទេសថៃក៏មានចំណែករួមផងដែរ ស្របពេលមានការខកបំណងដោយសារអាស៊ានមិនអាចធ្វើឱ្យមីយ៉ាន់ម៉ាយល់ព្រមធ្វើតាមកិច្ចព្រមព្រៀងនៅឆ្នាំ២០២១ ដើម្បីស្វែងរកវិធីដោះស្រាយបញ្ហាបន្តទៀត ៕ ប្រភព ៖ AEC Connect

ប្រសិនបើយើងមើលឃើញផ្កាយដុះកន្ទុយជាច្រើនហោះឆ្លងកាត់លើផ្ទៃមេឃពេលរាត្រី ហើយហាក់ចេញមកពីចំណុចតែមួយ បាតុភូតនោះគេហៅថា “ទេពច្យុត”។

ពួកវាគឺជាបំណែកឬកម្ទេចកម្ទី ភាគច្រើនបន្សល់ទុកដោយអាចម៍ផ្កាយប្រភេទ Comet ដែលរសាត់អណ្តែតជុំវិញព្រះអាទិត្យ។ អាចម៍ផ្កាយមួយប្រភេទទៀតគឺ Asteroid។

នៅពេលផែនដីគោចរកាត់កម្ទេចកម្ទីទាំងនេះ ពួកវាក៏ត្រូវធ្លាក់ចូលក្នុងស្រទាប់បរិយាកាសភពយើង ហើយកកិតឆេះក្នុងល្បឿនយ៉ាងលឿន ដែលបង្កើតទៅជាផ្កាយដុះកន្ទុយជាច្រើននៅលើផ្ទៃមេឃ។

ឈ្មោះ “ទេពច្យុត” នីមួយៗ ត្រូវបានគេដាក់ឱ្យតាមកញ្ចុំផ្កាយលើផ្ទៃមេឃ ដែលចំណុចចាប់ផ្តើមនៃទេពច្យុតទាំងនោះហៅថា Radiant Point ស្ថិតនៅ។

គួរបញ្ជាក់ផងដែរថា តាមជំនឿមួយចំនួនគេយល់ឃើញថា ប្រសិនបើយយើងឃើញទេពច្យុតកាលណា សូមឱ្យយើងបួងសួងដើម្បីសម្រេចបំណងដែលបានប្រាថ្នា៕

ខាន់ ចេសា ជាកីឡាការិនីជឺជិតស៊ូ កូនកាត់ខ្មែរ-អាម៉េរិក- ម៉ិកស៊ិក ដែលទទួលបានការស្រលាញ់ចូលឆ្នាំពីមហាជន រួមទាំងថ្នាក់ដឹកនាំផងដែរ ទោះបីអាយុត្រឹមតែ២២ឆ្នាំ តែ ខាន់ ចេសា បានសាងភាពល្បីល្បាញខ្លាំងលើកីឡាជឺជិតស៊ូ ប្រកួតឈ្នះបានមេដាយជាច្រើនទាំងកម្រិតពិភពលោក និងតំបន់អាស៊ី។

យ៉ាងណាមិញ យើងមកដឹងទាំងអស់គ្នាពីប្រវត្តិត្រួសៗរបស់ ខាន់ ចេសា រួមទាំងជីវិតឯកជននាងផងដែលកំពុងទទួលបានការចាប់អារម្មណ៍ខ្លាំងពីអ្នកគាំទ្រ។

ម្ចាស់មេដាយមាសជឺជិតស៊ូ No-Gi ក្នុងព្រឹត្តិការណ៍ស៊ីហ្គេម ឆ្នាំ២០២៣ រូបនេះកើតនៅថ្ងៃទី០៨ ខែតុលា ឆ្នាំ២០០១ នៅរដ្ឋតិចសាស់ ហើយរស់នៅក្នុងរដ្ឋកាលីហ្វ័រញ៉ាខាងត្បូង មានម្តាយឈ្មោះ April Marie Khan ជាកូនកាត់ម៉ិកស៊ិក-អាម៉េរិក និងឪពុក ឈ្មោះPeter El Khan ជាកូនកាត់ខ្មែរ-អាម៉េរិក។
ចេសា បានប្រកួតតំណាងឱ្យ កម្ពុជាក្នុងការប្រកួតកីឡាអាស៊ីឆ្នាំ២០១៨ និងដណ្តើមបានមេដាយមាសក្នុង វិញ្ញាសានេវ៉ាហ្សាទម្ងន់៤៩គីឡូផ្នែកនារី។ នេះក៏ជាមេដាយមាសដំបូងគេដែល កម្ពុជា ទទួលបានផងដែរក្នុងប្រភេទកីឡាជឺជិតស៊ូ ក្នុងព្រឹត្តិការណ៍ស៊ីហ្គេមឆ្នាំ២០១៨។

នៅថ្ងៃទី ៦ ខែតុលា ឆ្នាំ២០២០ ខាន់ ចេសា បានទទួលខ្សែក្រវាត់ខ្មៅក្នុងប្រភេទកីឡាជឺជិតស៊ូរបស់ប្រទេសប្រេស៊ីល ដែលជាថ្ងៃពិសេសមុនថ្ងៃខួបកំណើតនាងឈានដល់អាយុ១៩ឆ្នាំ។ បើតាមទិន្នន័យខ្លះបាននិយាយថា ចេសា បានហ្វឹកហាត់ជឺជិតស៊ូ នៅអាយុ១២ឆ្នាំ និងខ្លះទៀតថានាងហ្វឹកហាត់នៅអាយុ៨ឆ្នាំ ។

ក្រៅពីវិស័យកីឡាងាកមកកាន់រឿងឯកជនវិញ ខាន់ ចេសា មានគូស្នេហ៍រួចហើយខណៈគូស្នេហ៍នាងក៏មានប្រវត្តិមិនធម្មតាលើវិស័យនេះ។

លោក Zach Kaina ជាជនជាតិអាម៉េរិក ជាកីឡាករជឺជីតស៊ូខ្សែក្រវាត់ខ្មៅ ដែលដូចគូស្នេហ៍ខ្លួនគឺ ខាន់ ចេសា ។ ត្រឹមតែជាកីឡាករជឺជីតស៊ូដែលធ្លាប់វាយដណ្តើមមេដាយមាស និង មេដាយផ្សេងៗទៀតជាច្រើននោះទេ លោកក៏ជាគ្រូបង្វឹកកីឡាជឺជីតស៊ូម្នាក់ផងដែរ ខណៈ ខាន់ ចេសា ក៏ជាគ្រូបង្វឹកម្នាក់ផ្នែកកីឡាជឺជីតស៊ូដូចគ្នា។

លោក Zach Kaina កើតនៅថ្ងៃទី២៣ ខែឧសភា ឆ្នាំ២០០២ នៅ Oahu រដ្ឋ Hawaii សហរដ្ឋអាមេរិក ខណៈបានផ្លាស់ទៅរស់នៅរដ្ឋ California នៅអាយុ ១០ឆ្នាំ។ នៅកុមរាភាព Zach Kaina ត្រូវបានណែនាំឱ្យស្គាល់កីឡាការ៉ាតេនៅអាយុ ៥ ឆ្នាំ ដែលជាបទពិសោធន៍រយៈពេលខ្លីមួយខណៈដែល លោកមិនបានរកឃើញរចនាប័ទ្មប្រយុទ្ធដែលមានមូលដ្ឋានគួរឱ្យទាក់ទាញ។ ដោយសារកីឡាការ៉ាតេមិនបានធ្វើឱ្យ Zach Kaina ចាប់អារម្មណ៍ម្តាយរបស់លោកបានប្រញាប់បញ្ចូលលោកទៅសាលាជឺជីតស៊ូក្នុងតំបន់ ដោយចាប់ផ្តើមហាត់រៀននៅអាយុ៦ឆ្នាំ ។ ទីបំផុត កីឡាជឺជីតស៊ូ បានធ្វើឱ្យគូស្នេហ៍ ចេសា ទទួលបានផ្លែផ្កាជាច្រើនពីវិស័យនេះដោយទទួលបានមេដាយជាច្រើន ខណៈលោក Zach Kaina ទទួលបានខ្សែក្រវ៉ាត់ខ្មៅនៅថ្ងៃទី ០៩ ខែធ្នូ ឆ្នាំ ២០២៣ ពីដៃរបស់ Guilherme Mendes ៕

កូរ៉េខាងត្បូង៖ Aespa បានត្រឡប់មកវិញជាមួយនឹងអាល់ប៊ុមខ្នាតតូចទី ៣ MY WORLD ដែលមានសរុបចំនួន ៦ បទ។

Aespa បានបំបែកកំណត់ត្រាផ្ទាល់ខ្លួន ជាមួយនឹងការបញ្ជាទិញជាមុននៃអាល់ប៊ុមខ្នាតតូចទី ៣ MY WORLD លើសពី ១.៨ លានឈុត (ស្ថិតិគិតត្រឹមថ្ងៃទី ៨ ខែឧសភា ឆ្នាំ ២០២៣) ជាមួយនឹងការបញ្ជាទិញជាមុននៃអាល់ប៊ុមតូចទី ២ Girls ឈានដល់ ១.៦១ លានឈុត ដែលនេះធ្វើឱ្យ Aespa បំបែកកំណត់ត្រាផ្ទាល់ខ្លួននឹងដាក់ឈ្មោះថា Million Seller ជាលើកទីពីរជាប់ៗគ្នា។

ក្នុងចំណោមបទចម្រៀងទាំង ៦ ដែលនៅក្នុងអាល់ប៊ុមខ្នាតតូចទី៣ MY WORLD បទចម្រៀង Spicy ដែលចេញផ្សាយនៅថ្ងៃទី៨ ខែឧសភា គឺជាបទដែលមានភាពទាក់ទាញនិងលេចធ្លោរជាងគេបំផុតក្នុងឆ្នាំ២០២៣នេះ។ បទនេះមានភាពពេញនិយម អមជាមួយក្បាច់រាំដ៏ទាន់សម័យ នឹងស្ទាយតែងខ្លួនប្លែកៗ ដែលធ្វើឱ្យអ្នកគាំទ្រ តន្ត្រី រំភើបជុំវិញពិភពលោក។

លើសពីនេះបទចម្រៀង Welcome To MY World (Feat. nævis) ដែលចេញផ្សាយនៅថ្ងៃទី២ ខែឧសភា របស់ Aespa ក៏ជាបទដែលមានភាពទាក់ទាញទីពីរផងដែរបន្ទាប់ពីបទ Spicy ៕

ប្រទេសថៃ ៖ បើតាមទិន្នន័យរបស់គេហទំព័រ Trip.com បញ្ជាក់ថា ថៃជាប្រទេសមួយដែលភ្ញៀវទេសចរចិនបានធ្វើដំណើរមកកម្សាន្តច្រើនបំផុតក្នុងថ្ងៃទិវាពលកម្មកន្លងមក បន្ទាប់មក គឺភ្ញៀវទេសចរជប៉ុន និងកូរ៉េខាងត្បូង ។ ក្រៅពីនេះ ប្រទេសថៃមានសាលារៀនអន្តរជាតិល្អៗជាច្រើន និងមន្ទីរពេទ្យមានគុណភាព គឺជាកត្តាទាក់ទាញជនជាតិចិនជាច្រើននាក់ដែលកំពុងស្វែងរកទិញផ្ទះទី២ ។

រដ្ឋាភិបាលថៃសង្ឃឹមថា នឹងមានភ្ញៀវទេសចរចិនមកកាន់ប្រទេសថៃ យ៉ាងតិចចំនួន៥លាននាក់នៅឆ្នាំ២០២៣ ។ ភ្ញៀវទេសចរចិនខ្លះមកប្រទេសថៃដើម្បីទិញអចលនទ្រព្យ បើទោះជាចំនួនភ្ញៀវទេសចរចិនខាងលើខុសគ្នាឆ្ងាយពីអំឡុងពេលមុនផ្ទុះជំងឺកូវីដ-១៩ ក្តី ។ ដូច្នេះ នៅមុនពេលជំងឺកូវីដរាតត្បាត ភ្ញៀវទេសចរចិនបានមកកាន់ប្រទេសថៃស្មើជិត១ ក្នុងចំណោម៣ របស់ចំនួនភ្ញៀវទេសចរសរុបចំនួន៤០លាននាក់ ។

លោក Meesak Chunharakchot នាយកសមាគមអចលនទ្រព្យប្រទេសថៃថ្លែងថា គេសង្កេតឃើញច្បាស់ថា ពលរដ្ឋចិនមានតម្រូវការទិញអចលនទ្រព្យរបស់ថៃ ។ អចលនទ្រព្យថៃដែលពួកគេចាប់អារម្មណ៍ជាងគេនោះ គឺស្ថិតនៅទីក្រុងធំៗដូចជា ក្រុងបាងកក ឈៀងម៉ៃ ផាត់តាយ៉ា និងទីក្រុងស្ថិតនៅភាគឦសានប្រទេស ។
លោកនិយាយថា ៖ «ពលរដ្ឋចិនបានមកទិញលំនៅឋាននៅប្រទេសថៃ និងបញ្ជូនកូនទៅរៀននៅសាលារៀនអន្តរជាតិ ខណៈឪពុកម្តាយពួកគេក៏បានមករស់នៅប្រទេសថៃដែរដើម្បីថែទាំកូនចៅ» ។

តាមទិន្នន័យរបស់ភ្នាក់ងាររដ្ឋាភិបាលថៃបញ្ជាក់ថា នៅខែមីនា ឆ្នាំ២០២៣ មានភ្ញៀវទេសចរចិនជិត២៧ម៉ឺននាក់បានធ្វើដំណើរមកកាន់ប្រទេសថៃ ដែលវាជាចំនួនខ្ពស់បំផុតក្នុងរយៈពេល៣ឆ្នាំ ។ ប៉ុន្តែវាតិចជាងចំនួន៩៨៥.២២៧នាក់នៅខែមីនា ឆ្នាំ២០១៩ មុនពេលជំងឺកូវីដរាតត្បាត ។

សារព័ត៌មានរ៉យទ័ររាយការណ៍ថា លោក Daniel Pien ជាភ្ញៀវទេសចរចិនម្នាក់ក្នុងចំណោមភ្ញៀវទេសចរចិនទាំងអស់ដែលបានមកទិញលំនៅឋាននៅថៃ ។ លោកមកពីក្រុងសៀងហៃ និងបានស្នាក់នៅជាន់ទី១៩ ក្នុងខុនដូប្រណីតមួយកន្លែងនៅក្រុងបាងកក បាននិយាយថា ៖ «ខ្ញុំមានអារម្មណ៍ថា ជីវិតស្រស់ថ្លា មានសេរីភាព ហើយនេះជាក្តីសុបិនរបស់ខ្ញុំ» ។

លោក Daniel Pien បានជាប់នៅប្រទេសចិនអស់រយៈពេល៣ឆ្នាំ ដោយសារប្រទេសចិនបានប្រើវិធានការតឹងរ៉ឹងខ្លាំងដើម្បីគ្រប់គ្រងជំងឺកូវីដ ។ លោកបានសម្លឹងរកទិញអចលនទ្រព្យនៅប្រទេសថៃ ចាប់តាំងពីចិនបើកព្រំដែនជាថ្មីនៅឆ្នាំ២០២៣ ។

ពលរដ្ឋចិនជាច្រើននាក់បានចាប់អារម្មណ៍វិនិយោគលើលំនៅឋាននៅក្រៅប្រទេស និងត្រូវការកន្លែងស្នាក់នៅមួយមានសុវត្ថិភាពដើម្បីចៀសវាងពីការឆ្លងរោគស្រដៀងគ្នានេះ ហើយពួកគេចង់គេចពីហានិភ័យសេដ្ឋកិច្ចនៅប្រទេសចិនផងដែរ ៕ ប្រភព ៖ bangkokbiznews