ក្រុមហ៊ុន Apple ត្រូវបានរំពឹងថា នឹងចាប់ផ្តើមផលិត iPhone15 នៅក្នុងខែមិថុនានេះ ហើយនឹងគ្រោងចេញលក់ជាផ្លូវការនៅក្នុងខែកញ្ញា តាមទម្លាប់រាល់ដង។
បើតាមព័ត៌មានដែលបែកធ្លាយ បានចេញផ្សាយថា iPhone 15 ទាំងអស់ គឺសុទ្ធតែមាន Dynamic Island, រន្ធ USB-C និងបំពាក់ឈីប A17 ដូចៗគ្នា។ មិនតែប៉ុណ្ណោះម៉ូឌែល iPhone 15, iPhone 15 Plus, iPhone 15 Pro និង iPhone 15 Pro Max។ សម្រាប់ម៉ូឌែល Pro និង Pro Max នឹងមានគែម bezel តូចជាងមុន និងជ្រុងរាងកោង។

អ្វីដែលគេសង្ស័យថាទៀតនោះគឺថា Apple ប្រហែលជាត្រូវបង្ខំចិត្តផ្លាស់ប្តូររន្ធសាក មកខ្សែ Type C វិញ ដើម្បីអាចលក់នៅទ្វីបអឺរ៉ុបបាន។

ការផ្លាស់ប្តូរមកប្រើប្រាស់រន្ធដោត USB-C បែបនេះ ក៏ដោយសភាអឺរ៉ុប និងរដ្ឋសមាជិកសហភាពអឺរ៉ុបចំនួន ២៧ បានព្រមព្រៀងគ្នាលើសេចក្តីសម្រេច កំណត់ឱ្យទូរសព្ទចល័ត និងឧបករណ៍អេឡិចត្រូនិកផ្សេងទៀតនៅក្នុងសហភាពអឺរ៉ុប ត្រូវតែប្រើប្រាស់រន្ធសាកថ្មស្តង់ដាតែមួយជាកំហិត ដែលនោះគឺរន្ធសាក Type- C ៕

ប្រភព៖ Mac Rumors 

បរទេស៖ យោងតាមការវិភាគដែលបានចេញផ្សាយនៅថ្ងៃទី១ ខែមិថុនា នៅក្នុងទស្សនាវដ្តី Nature បានឱ្យដឹងថា បច្ចុប្បន្នភពផែនដីកំពុងប្រឈមមុខនឹងវិបត្តិនៃធនធានទឹក សារធាតុចិញ្ចឹមនៅក្នុងបរិស្ថាន ការរក្សាប្រព័ន្ធអេកូឡូស៊ី និងការបំពុលដោយ aerosol ។ បាតុភូតនៃការបំពុល aerosol គឺបណ្តាលមកពីការប្រមូលផ្តុំនៃផ្សែងចេញពីរថយន្ត រោងចក្រធ្យូងថ្ម រោងចក្រថាមពល ប្រេង និងឧស្ម័នជាដើម ដែលកំពុងកើតឡើងជាសកល។

គុណភាពទឹក និងការបាត់បង់ទីជម្រកសម្រាប់ប្រភេទទឹកសាបក៏ត្រូវបានកាត់បន្ថយផងដែរ។ ខ្សែសុវត្ថិភាពនឹងត្រូវបានឆ្លងកាត់មួយភាគបីនៃផ្ទៃដីរបស់ពិភពលោក ដោយសារទំនប់វារីអគ្គិសនី ប្រព័ន្ធធារាសាស្ត្រ និងការសាងសង់។

សារធាតុចិញ្ចឹមក៏ជាកង្វល់មួយទៀតដែរ ដោយសារកសិករនៅក្នុងប្រទេសអ្នកមានកំពុងបាញ់ថ្នាំអាសូត និងផូស្វ័រច្រើនជាងដំណាំ។ ដែលសកម្មភាពនេះផ្តល់នូវការកើនឡើងបណ្តោះអាសន្ននៃផលិតកម្ម ប៉ុន្តែជាលទ្ធផល សារធាតុគីមីនឹងត្រូវបានបញ្ចេញទៅក្នុងប្រព័ន្ធទន្លេ ដែលនាំឱ្យផ្កាសារាយ និងទឹកមិនមានគុណភាពល្អគ្រប់គ្រាន់សម្រាប់ការផឹក។

ទាក់ទងនឹងអាកាសធាតុរបស់ពិភពលោក គណៈកម្មាការផែនដីបានសង្កត់ធ្ងន់ថា នេះគឺជាសញ្ញាសម្គាល់ដ៏គ្រោះថ្នាក់មួយ ដោយសារមនុស្សជាច្រើនកំពុងទទួលរងនូវឥទ្ធិពលអវិជ្ជមាននៃកំដៅខ្លាំង គ្រោះរាំងស្ងួត និងទឹកជំនន់ អមដោយការកើនឡើងនៃសីតុណ្ហភាពបច្ចុប្បន្ន ១.២ អង្សាសេ។

យោតាមអ្នកវិទ្យាសាស្រ្ត បានឱ្យដឹងថា ការវិភាគអំពីស្ថានភាពនៃផែនដីគឺពិតជាអាក្រក់ណាស់។ សាស្ត្រាចារ្យ Johan Rockström អ្នកដឹកនាំការស្រាវជ្រាវផែនដី បាននិយាយថា បច្ចុប្បន្នមានប្រទេសត្រឹមតែ ៤០%-៥០% ប៉ុណ្ណោះដែលមានប្រព័ន្ធអេកូធម្មជាតិ៕ ប្រភព៖ vnexpress

ប្រទេសថៃ ៖ សាស្ត្រាចារ្យផ្នែកវិទ្យាសាស្ត្របរិស្ថាននៃសាកលវិទ្យាល័យធម្មសាតប្រទេសថៃ បានលើកឡើងថា ក្នុងរយៈពេល៥០ឆ្នាំខាងមុខ ទីក្រុងបាងកកនឹងមានគ្រោះទឹកជំនន់ដោយសារការឡើងកំដៅផែនដី ដែលបណ្តាលឱ្យទឹកសមុទ្រកើនឡើងខ្ពស់ ។ សាស្ត្រាចារ្យរូបនេះបានដាស់តឿនឱ្យប្រទេសថៃប្រញាប់រៀបចំផែនការការពារទីក្រុងបាងកកទុកជាមុន និងកាត់បន្ថយផលប៉ះពាល់ដែលនឹងកើតមានឡើងនាថ្ងៃអនាគត ។

លោក Trithep Witkowitten សាស្ត្រាចារ្យផ្នែកវិទ្យាសាស្ត្របរិស្ថាននៃសាកលវិទ្យាល័យធម្មសាត បានបញ្ជាក់ពីផលប៉ះពាល់ដោយសារអាកាសធាតុក្តៅ ដែលធ្វើឱ្យទឹកសមុទ្រកើនឡើងខ្ពស់ ។ កម្រិតទឹកសមុទ្រកើនឡើងខ្ពស់នឹងកើតមានឡើងយ៉ាងពិតប្រាកដ ហើយវានឹងកើតឡើងជាបន្តបន្ទាប់ ដោយសារបម្រែបម្រួលអាកាសធាតុនៅលើពិភពលោក ។ លោកនិយាយថា បច្ចុប្បន្ន កម្រិតទឹកសមុទ្របានកើនឡើងពី៣មីលីម៉ែត្រ ទៅ៤មីលីម៉ែត្រក្នុង១ឆ្នាំ ហើយបើទោះវាជាកម្រិតកើនឡើងបន្តិចបន្តួចក្តី ប៉ុន្តែយើងនឹងសង្កេតឃើញថា ជាកម្រិតទឹកសមុទ្រកើនឡើងនៅទូទាំងពិភពលោក ។ ដូច្នេះ គេចាត់ទុកថា វាជាបរិមាណកើនឡើងដ៏ច្រើនមហាសាល ហើយវានឹងមានផលប៉ះពាល់ដោយផ្ទាល់មកលើតំបន់ឆ្នេរសមុទ្រនានា ។

លោក Trithep Witkowitten បន្តថា សម្រាប់ប្រទេសថៃវិញ តំបន់ដែលនឹងទទួលរងផលប៉ះពាល់ដោយសារកម្រិតទឹកសមុទ្រកើនឡើង គឺនៅតំបន់បរិវេណឆ្នេរសមុទ្រ ហើយតើបរិវេណឆ្នេរសមុទ្រនីមួយៗនៅប្រទេសថៃបានប្រើប្រាស់ធ្វើជាប្រយោជន៍អ្វីខ្លះ ? ប្រសិនបើបរិវេណឆ្នេរសមុទ្រនោះជាកន្លែងទីប្រជុំជនរបស់ពលរដ្ឋ ហើយកម្រិតទឹកសមុទ្រកើនឡើងខ្ពស់ វានឹងធ្វើឱ្យប៉ះពាល់ដោយផ្ទាល់លើការរស់នៅរបស់ពលរដ្ឋ ។

លោក Trithep Witkowitten បន្ថែមថា កម្រិតទឹកសមុទ្របានកើនឡើងពី៣មីលីម៉ែត្រ ទៅ៤មីលីម៉ែត្រក្នុង១ឆ្នាំ បើធៀបនឹងសណ្ឋានដីនៅបរិវេណមាត់ទន្លេចៅព្រះយ៉ា ជាពិសេស ទីក្រុងបាងកក ខេត្តសមុទ្រប្រាកាន ខេត្តប៉ាធុមថានី និងខេត្តណុនថៈបុរី ដែលមានសណ្ឋានដីស្រុតចុះប្រមាណពី២សង់ទីម៉ែត្រ ទៅ៣សង់ទីម៉ែត្រក្នុង១ឆ្នាំ ។ ម្យ៉ាងទៀត ដីនៅទីក្រុងបាងកកខ្ពស់ជាងកម្រិតទឹកសមុទ្រត្រឹមតែ១,៥ម៉ែត្រប៉ុណ្ណោះ ដូច្នេះ បើកម្រិតទឹកកើនឡើង រួមជាមួយសណ្ឋានដីស្រុតចុះ បានធ្វើឱ្យគេវាយតម្លៃថា ក្នុងរយៈពេលពី៤០ឆ្នាំ ទៅ៥០ឆ្នាំទៀត ទីក្រុងបាងកកនឹងរងផលប៉ះពាល់ដោយផ្ទាល់ ដោយសារកម្រិតទឹកសមុទ្រកើនឡើងខ្ពស់ ៕

ប្រភព ៖ TNN Earth

ប្រទេសថៃ ៖ ការិយាល័យឱសថប្រទេសថៃបានផ្សព្វផ្សាយព័ត៌មានមួយ ដែលដកស្រង់ពីការិយាល័យស្ថិតិជាតិ ឆ្នាំ២០២១ បង្ហាញថា ពលរដ្ឋថៃមានអាយុចាប់ពី១៥ឆ្នាំឡើងទៅបានជក់បារីរហូតដល់៩,៩លាននាក់ និងបណ្តាលឱ្យស្លា.ប់ដោយសារជំងឺផ្សេងៗដូចជា ជំងឺមហារីកសួត មហារីកបំពង់អាហារ ស្ទះសួត និងជំងឺបេះដូង ជាដើម ។

បច្ចុប្បន្ន ប្រទេសថៃមានថ្នាំចំនួន៥ប្រភេទសម្រាប់ផ្តាច់បារី ដូចជា ថ្នាំគ្រាប់ Varenicline, ថ្នាំគ្រាប់ Bupropion, Nicotine replacement therapy, ថ្នាំគ្រាប់ nortriptyline និងឱសថបុរាណផលិតពីស្មៅពណ៌ស ហើយក្នុងចំណោមថ្នាំទាំងនេះ គឺមានតែថ្នាំគ្រាប់ nortriptyline និងឱសថបុរាណផលិតពីស្មៅពណ៌សប៉ុណ្ណោះ ដែលបានចុះឈ្មោះក្នុងបញ្ជីឱសថសំខាន់ៗ ។

ហេតុនេះ ដើម្បីជួយអ្នកញៀនបារីអាចប្រើប្រាស់ថ្នាំផ្តាច់បារីប្រកបដោយប្រសិទ្ធភាព ការិយាល័យឱសថប្រទេសថៃ សហការជាមួយសាកលវិទ្យាល័យឱសថ Srinakharinwirot បានធ្វើការស្រាវជ្រាវ និងអភិវឌ្ឍន៍ថ្នាំផ្តាច់បារីប្រភេទថ្មីមួយឈ្មោះ «ថ្នាំគ្រាប់ Zytisin GPO» ជាលើកដំបូងនៅប្រទេសថៃ ។ តាមលទ្ធផលនៃការស្រាវជ្រាវបង្ហាញថា ថ្នាំផ្តាច់បារីប្រភេទថ្មីនេះមានសុវត្ថិភាព និងមានប្រសិទ្ធភាពខ្ពស់ ហើយបច្ចុប្បន្ន ថ្នាំផ្តាច់បារីថ្មីនេះកំពុងស្នើសុំការអនុម័តយល់ព្រមពីរដ្ឋបាលចំណីអាហារ និងឱសថ ។ គេចាត់ទុកថា វាជាថ្នាំពិសេសមួយ និងអាចរកបានពីតាមមន្ទីរពេទ្យប៉ុណ្ណោះ ។

បើគេផ្លាស់ប្តូរមកប្រើប្រាស់ «ថ្នាំគ្រាប់ Zytisin GPO» ជំនួសការប្រើថ្នាំគ្រាប់ Varenicline គឺនឹងអាចជួយសន្សំសំចៃថវិកាលើការព្យាបាល និងកាត់បន្ថយពេលវេលាក្នុងការព្យាបាលពី៣ដង ទៅ៤ដងឯណោះ ។ លើសពីនេះ ប្រទេសថៃនឹងអាចកាត់បន្ថយការនាំចូលថ្នាំពីក្រៅប្រទេសទៀតផង ខណៈថៃបានចំណាយប្រាក់ទិញថ្នាំប្រមាណ១២លានបាតក្នុង១ឆ្នាំៗ ។ ប្រទេសថៃរំពឹងថា នឹងចាប់ផ្តើមផលិត និងចែកចាយថ្នាំផ្តាច់បារីប្រភេទថ្មីនេះ នៅខែមករា ឆ្នាំ២០២៤ ខាងមុខ ។

ហេតុនេះ ការផលិតថ្នាំផ្តាច់បារីលើកនេះ គឺជាការបោះជំហានទៅមុខមួយយ៉ាងសំខាន់សម្រាប់ពលរដ្ឋថៃដែលមានបំណងផ្តាច់បារី ព្រមទាំងជួយឱ្យពលរដ្ឋមានសុខភាពល្អផងដែរ៕ ប្រភព ៖ Bangkok Future

ជប៉ុន៖ ប្រទេសជប៉ុនបានជួបប្រទះនិទាឃរដូវដ៏ក្តៅបំផុតរបស់ខ្លួនក្នុងកំណត់ត្រាថ្មីដោយសារឧស្ម័នផ្ទះកញ្ចក់និង El Niño បានធ្វើឱ្យសីតុណ្ហភាពពិភពលោកកើនឡើងយ៉ាងខ្លាំងក្នុងឆ្នាំនេះ។
ទីភ្នាក់ងារឧតុនិយមជប៉ុន (JMA) បាននិយាយកាលពីថ្ងៃទី ១ ខែមិថុនា ថា សីតុណ្ហភាពក្នុងខែមីនា មេសា និងឧសភា នៃប្រទេសនេះ គឺខ្ពស់ជាងមធ្យមភាគ ១.៥៩ អង្សាសេ។ នេះធ្វើឱ្យរដូវធ្លាក់ខ្យល់ឆ្នាំនេះ ក្លាយជារដូវក្តៅបំផុតចាប់តាំងពី JMA បានចាប់ផ្តើមធ្វើការវាស់វែងនៅឆ្នាំ ១៨៩៨ ។

យោងតាមទីភ្នាក់ងារនេះ សីតុណ្ហភាពជាមធ្យមនៃផ្ទៃសមុទ្រជុំវិញប្រទេសជប៉ុនក្នុងអំឡុងខែមីនា មេសា និងឧសភា គឺជាសីតុណ្ហភាពខ្ពស់បំផុតទីបីចាប់តាំងពីឆ្នាំ ១៩៨២ ។ កាលពីខែមុន អង្គការសហប្រជាជាតិបាននិយាយថានៅឆ្នាំ ២០២៣-២០២៧ នឹងក្លាយជារយៈពេលប្រាំឆ្នាំដ៏ក្តៅបំផុតក្នុងកំណត់ត្រាប្រវត្តិសាស្រ្តរបស់ប្រទេជប៉ុន។ កាលពីថ្ងៃទី ២៩ ខែឧសភា ទីក្រុងសៀងហៃក៏បានកត់ត្រាថ្ងៃខែ ដែលក្តៅបំផុតក្នុងរយៈពេលជាង ១០០ ឆ្នាំផងដែរ។

សីតុណ្ហភាពជាមធ្យមរបស់ពិភពលោកក្នុងឆ្នាំ ២០២២ គឺ ១.១៥ អង្សាសេខ្ពស់ជាងមធ្យមភាគក្នុងកំឡុងឆ្នាំ ១៨៥០-១៩០០ ។ ភាគច្រើននៃអាស៊ីខាងត្បូង និងអាស៊ីអាគ្នេយ៍បានជួបប្រទះនឹងរលកកំដៅនៅនិទាឃរដូវ ដោយសារការឡើងកំដៅផែនដីធ្វើឱ្យអាកាសធាតុកាន់តែធ្ងន់ធ្ងរ។ អ្នកវិទ្យាសាស្ត្របាននិយាយថា ការប្រែប្រួលអាកាសធាតុកំពុងបង្កើនហានិភ័យនៃភ្លៀងធ្លាក់ខ្លាំងនៅក្នុងប្រទេសជប៉ុន និងកន្លែងផ្សេងទៀត ដោយសារតែបរិយាកាសកាន់តែក្តៅមានទឹកក៏កាន់ច្រើនផងដែរ៕ ប្រភព៖vnexpress