រដ្ឋធានីកៀវ៖ ការចាប់ផ្ដើមផែនការវាយបក ទៅលើកម្លាំងទាហានរុស្ស៊ី ខណៈរង់ចាំ អស់រយៈពេលយ៉ាងយូរនោះ ឥឡូវកងទ័ពរបស់អ៊ុយក្រែន បានសម្រេចជាលទ្ធផល រំដោះបានភូមិជាច្រើន នៅតំបន់ភាគខាងកើត ដូណែត (Donetsk) ប៉ុន្ដែក្រុងមូស្គូ បានច្រានចោលនូវការអះអាងទាំងនេះ។

សារព័ត៌មាន Al Jazeera បានចេញផ្សាយ កាលពីថ្ងៃចន្ទ ទី១២ ខែមិថុនា ថា ក្រុមន្ដ្រីក្រុងកៀវ បានបញ្ជាក់ ថា កងទ័ពការពារទឹកដីរបស់អ៊ុយក្រែន បានរំដោះភូមិជាច្រើន ពីកម្លាំងទាហានរុស្ស៊ី ត្រឡប់មកវិញ នៅតំបន់ភាគខាងអាគ្នេយ៍របស់ប្រទេស។ នេះជាការរំដោះទឹកដីលើកដំបូង ចាប់តាំងពីការវាយបក ទៅលើទាហានរុស្ស៊ី។

លោក វ៉ាឡេរី ស៊ើរសេន ( Valeriy Shershen) អ្នកនាំពាក្យកងទ័ពអ៊ុយក្រែន បានថ្លែង នៅតាមទូរទស្សន៍ ថា «យើងកំពុងតែមើលឃើញលទ្ធផលជាលើកដំបូង នៃការវាយលុករបស់អ៊ុយក្រែន ប្រឆាំងនឹងកម្លាំងទាហានរុស្ស៊ី»។

បើតាមវីដេអូមួយ ត្រូវបានផ្សព្វផ្សាយ នៅតាមបណ្ដាញសង្គម កាលពីថ្ងៃអាទិត្យ ថា កងពលតូចជេហ្គ័រ (Jaeger) ទី៦៨របស់ក្រុងកៀវ បានបង្ហូតទង់ជាតិរបស់អ៊ុយក្រែន នៅលើអគារដែលត្រូវបានទម្លាក់គ្រាប់បែកទម្លាក់ ដោយបានកំណត់អត្តសញ្ញាណ ជាទីតាំងប្លាហូដេតនេ (Blahodatne) ស្ថិតក្នុងតំបន់ដូណែតស្ក៍ (Donetsk)។

លោកស្រី ហានណា ម៉ាលីយ៉ា (Hanna Maliar) អនុរដ្ឋមន្រ្ដី ក្រសួងការពារជាតិអ៊ុយក្រេន បានសរសេរ នៅក្នុងសេចក្ដីថ្លែងការណ៍មួយ ថា «កងទ័ពរបស់យើង បានរំដោះភូមិម៉ាការីវកា (Makarivka) ទៅភាគតំបន់ភាគខាងត្បូង ខណៈការវាយរុលទៅមុខ ចន្លោះពី៣០០ម៉ែត្រ ទៅ១៥០០ម៉ែត្រ ជាមួយនឹងមុខព្រួញចំនួន២។ ប៉ុន្ដែគ្មានទីតាំងណាមួយ ត្រូវបានបាត់បង់ នៅក្នុងទិសដៅដែលកងកម្លាំងរបស់យើង ស្ថិតនៅលើការការពារនោះឡើយ»។

កងទ័ពការពារទឹកដីរបស់អ៊ុយក្រែន ក៏បានបង្ហោះវីដេអូមួយ អំពីទាហានរបស់ខ្លួន កាន់ទង់ជាតិរបស់ពួកគេ នៅក្នុងភូមិនេស្គូចណេ ( Neskuchne) ជាភូមិដែលនៅជិតបំផុត នឹងទីតាំងឈរជើររបស់អ៊ុយក្រែន នៅក្នុងតំបន់នោះ៕

ប្រទេសចិន៖ ក្នុងរយៈពេលត្រឹមតែមួយខែ នារីជនជាតិចិនម្នាក់ បានផ្ទេរប្រាក់ចំនួន ២.៨ លានដុល្លារដើម្បីទិញរូបិយប័ណ្ណឌីជីថលយោងទៅតាមបុគ្គលដែលដើរតួជាកូនអ្នកមានដែលនាងបានជួបតាម អ៊ីនធឺណែត ។

ថ្មីៗនេះនារីជនជាតិចិនម្នាក់ដែលមានឈ្មោះថា Giang បានលង់ស្រឡាញ់បុរសអ្នកមានម្នាក់តាមអ៊ីនធឺណែត មានឈ្មោះថា Ton ដោយមានភាពសង្ស័យ Giang ក៏បានស្រាវជ្រាវប្រវត្តិរបស់ Ton ប៉ុន្តែព័ត៌មានទាំងនោះបានផ្តល់ឱ្យគឺត្រឹមត្រូវទាំងអស់។ មិនយូរប៉ុន្មានពួកគេទាំងពីរក៏បានទាក់ទងគ្នា ហើយថែមទាំងមានគម្រោងណែនាំឱ្យស្គាល់ឪពុកម្តាយរបស់ពួកគេទៀតផង។

ស្របពេលជាមួយគ្នានោះដែរ Giang បាននិយាយថាយើងត្រូវតែខិតខំរកប្រាក់បន្ថែមដើម្បីអនាគតរបស់ពួកយើង។ ភ្លាមៗនោះ Ton ក៏បានអួតអំពីសមត្ថភាពវិនិយោគ និងទំនាក់ទំនងរបស់គាត់ជាមួយប្រភពខាងក្នុងជាច្រើន ហើយក៏បានបញ្ចុះបញ្ចូល Giang ឱ្យទាញយក និងបង្កើតគណនីនៅលើកម្មវិធីដែលគាត់បានប្រើដើម្បីធ្វើពាណិជ្ជកម្មរូបិយប័ណ្ណគ្រីបតូ ។ អ្នកទាំងពីរក៏បានព្រមព្រៀងគ្នា ហើយ Giang ក៏បានសម្រេចចិត្តចាក់លុយផ្ទាល់ខ្លួនចំនួន ២.៨ លានដុល្លារ នឹងបានខ្ចីពីគ្រួសារខ្លះ រួមជាមួយមិត្តភក្តិផងដែរ។

អស់រយៈមួយខែបន្ទាប់ពីអ្នកទាំងពីរបានជួបគ្នាតាមអនឡាញ Giang បានឆែកប្រាក់របស់នាងនៅក្នុងកម្មវិធីរូបិយប័ណ្ណឌីជីថលនោះ ប៉ុន្តែនាងមិនអាចចូលប្រើ ឬដកប្រាក់របស់នាងបានឡើយ ភ្លាមនោះនាងក៏ដឹងថាត្រូវគេបោកប្រាស់ ដូច្នេះ Giang ក៏បានរាយការណ៍ទៅប៉ូលីសភ្លាមៗ។ ជាមួយនឹងការស៊ើបអង្កេតអស់រយៈពេលកន្លះថ្ងៃ ប៉ូលីសក៏បានរកឃើញជនបោកប្រាស់ នឹងអ្នកផ្សំគំនិត ដែលពួកគេបានឆបោកប្រាក់របស់ជនរងគ្រោះអស់ជាច្រើននាក់សរុបចំនួន ១១ លានដុល្លារ។ មន្ត្រីចិនក៏បានកាត់ទោសពួកគេឱ្យជាប់គុករយៈពេល ៣ ឆ្នាំនិងត្រូវបង់ប្រាក់ពិន័យចំនួន ១,៣០០០ ដុល្លារ។

គួរបញ្ជាក់ដែរថា បច្ចុប្បន្នការឆបោកប្រាក់តាមអ៊ីនធឺណែត កំពុងក្លាយជារឿងដ៏ក្តៅគគុក នឹងគ្រោះថ្នាក់បំផុតសម្រាប់ប្រទេសចិន និងតាមបណ្តាប្រទេសផ្សេងៗទៀត ដូច្នេះអ្នកគួរតែប្រុងប្រយ័ត្នឱ្យបានគ្រប់ពេលវេលា ដើម្បីធានាថាខ្លួនមានសុវត្ថិភាពគ្រប់គ្រាន់៕ ប្រភព៖vnexpress

ប្រទេសឥណ្ឌូណេស៊ី ៖ BYD ជាក្រុមហ៊ុនផលិតរថយន្តអគ្គិសនីដ៏ធំមួយរបស់ប្រទេសចិនបានត្រៀមខ្លួនចូលមកកាន់តំបន់អាស៊ាន ដើម្បីប្រជែងជាមួយក្រុមហ៊ុនផលិតរថយន្តជប៉ុន ដែលជាក្រុមហ៊ុននាំមុខគេក្នុងតំបន់អាស៊ាន ។ ក្រុមហ៊ុន BYD នឹងសាងសង់រោងចក្រដំឡើងរថយន្តអគ្គិសនីទី២ នៅភូមិភាគអាស៊ីអាគ្នេយ៍ តាមរយៈការចុះហត្ថលេខាលើកិច្ចព្រមព្រៀងបឋមជាមួយរដ្ឋាភិបាលឥណ្ឌូណេស៊ី ។

អ្នកវិភាគឯករាជ្យមកពីទីក្រុងសៀងហៃលើកឡើងថា អាស៊ាននឹងក្លាយជាទីផ្សារសំខាន់របស់បណ្តាក្រុមហ៊ុនផលិតរថយន្តអគ្គិសនីចិន ។ ក្រុមហ៊ុនផលិតរថយន្តអគ្គិសនីចិនមើលឃើញថា អាស៊ានមានចំនួនមនុស្សរស់នៅច្រើន ហើយមានតម្រូវការប្រើប្រាស់រថយន្តអគ្គិសនីកាន់តែច្រើនផងដែរ ។ ក្រុមហ៊ុន BYD បានសាងសង់រោងចក្រដំបូងគេនៅប្រទេសថៃ កាលពីខែមីនា ឆ្នាំ២០២៣ ។

ក្រៅពីប្រទេសឥណ្ឌូណេស៊ី ក៏មានប្រទេសវៀតណាម និងហ្វីលីពីនផងដែរបានព្យាយាមទាក់ទាញក្រុមហ៊ុន BYD មកសាងសង់រោងចក្រផលិតរថយន្តអគ្គិសនីក្នុងប្រទេសរបស់ខ្លួន ។ កន្លងមក នៅតំបន់អាស៊ានមានការលក់រថយន្តជាមធ្យមប្រមាណ៤លានគ្រឿងក្នុង១ឆ្នាំ ហើយនៅពេលរោងចក្ររបស់ក្រុមហ៊ុន BYD សាងសង់រួចរាល់ តំបន់អាស៊ាននឹងអាចផលិតរថយន្តអគ្គិសនីប្រមាណ១៥ម៉ឺនគ្រឿងក្នុង១ឆ្នាំ ។

ក្រុមហ៊ុន BYD បានយកឈ្នះក្រុមហ៊ុន Tesla ហើយក្លាយជាក្រុមហ៊ុនផលិតរថយន្តអគ្គិសនីដ៏ធំបំផុតលើពិភពលោក ស្មើនឹង១,៨៦លានគ្រឿងកាលពីឆ្នាំ២០២២ ។ ចំណែកចំនួនលក់រថយន្តរបស់ក្រុមហ៊ុន BYD បានកើនឡើងដល់៣ដង បើធៀបនឹងឆ្នាំ២០២២ ខណៈក្រុមហ៊ុន Tesla បានផលិតរថយន្តអគ្គិសនីស្មើតែ១,៣១លានគ្រឿងប៉ុណ្ណោះ ។

ទោះយ៉ាងណា កាលពីឆ្នាំ២០២២ ការលក់រថយន្តអគ្គិសនីប្រើប្រាស់ថ្មតែម្យ៉ាង និងរថយន្តអគ្គិសនី Plug-in Hybrid នៅប្រទេសចិនរបស់ក្រុមហ៊ុន BYD
គឺស្មើប្រមាណ៦០% ឬស្មើ៦,៥លានគ្រឿង នៃចំនួនការលក់រថយន្តអគ្គិសនីសរុបនៅទូទាំងពិភពលោក ។ ក្រុមហ៊ុនរំពឹងថា ចំនួនការលក់រថយន្តអគ្គិសនីនៅប្រទេសចិននឹងកើនឡើង៣៥% ស្មើប្រមាណ៨,៨លានគ្រឿងនៅឆ្នាំ២០២៣ ហើយអាចនាំមុខក្រុមហ៊ុនរបស់ជប៉ុនផងដែរ ដែលជាក្រុមហ៊ុននាំចេញរថយន្តធំបំផុតនៅលើពិភពលោក ។

បើតាមការចុះផ្សាយរបស់ China Business បង្ហាញថា ក្រុមហ៊ុនផលិតរថយន្តនៅប្រទេសចិនបាននាំចេញរថយន្តប្រើប្រាស់ប្រេងឥន្ធនៈ និងរថយន្តអគ្គិសនី ចំនួន១,០៧លានគ្រឿងនៅត្រីមាសដំបូងឆ្នាំ២០២៣ និងបានវ៉ាដាច់ក្រុមហ៊ុនជប៉ុនដែលបាននាំចេញរថយន្តចំនួន១,០៤លានគ្រឿង ៕ ប្រភព ៖ AEC connect