ប្រទេសម៉ាឡេស៊ី ៖ ស្ត្រីចំណាស់ម្នាក់រស់នៅប្រទេសម៉ាឡេស៊ីបានភ្ញាក់ផ្អើលជាខ្លាំងនៅពេលឃើញប្រាក់ចំនួន៣ម៉ឺនរីងហ្គីត ដែលគាត់បានសន្សំទុកក្នុងឡាំងក្រដាសមួយសម្រាប់ធ្វើបុណ្យនៅក្រៅប្រទេស បានខូចខាតអស់នៅសល់តែកម្ទេចកម្ទី ដោយសារសត្វកណ្តៀរបានចូលស៊ីប្រាក់ទាំងនេះ ។ គាត់លើកឡើងថា គាត់សោកស្តាយខ្លាំងណាស់ដែលបានសន្សំប្រាក់ក្នុងឡាំងក្រដាស ហើយគាត់ពុំអាចបន្ទោសអ្នកណាបានទេ ។

លោក Khairul Azar រស់នៅក្នុងរដ្ឋកាឡាន់តាន់ និងជាចៅប្រុសរបស់ស្ត្រីចំណាស់ខាងលើ បានបង្ហោះក្នុងហ្វេសប៊ុកអំពីរូបភាពក្រដាសប្រាក់ដាក់ក្នុងឡាំងក្រដាសមួយ ហើយបានក្លាយជាកម្ទេចក្រដាស ដោយសារសត្វកណ្តៀរស៊ីបំផ្លាញ ។ ក្រោយមក គាត់បានព្យាយាមប្រមូលប្រាក់ជាងពាក់កណ្តាលដែលមានសភាពល្អខ្លះៗ ដើម្បីទុកប្តូរយកប្រាក់ថ្មីជាមួយធនាគារកណ្តាលម៉ាឡេស៊ី ហើយគាត់សង្ឃឹមថា នឹងទទួលបានប្រាក់ថ្មីជំនួសវិញ ។

លោក Khairul Azar បានសរសេរនៅក្នុងហ្វេសប៊ុកថា ៖ «នៅឆ្នាំ២០២៤ លោកយាយរបស់ខ្ញុំមានផែនការទៅធ្វើបុណ្យនៅក្រៅប្រទេស ហើយលោកយាយអាចត្រូវបានគេកំណត់មិនឱ្យគាត់ទៅធ្វើបុណ្យនៅក្រៅប្រទេសទេ ។ ដូច្នេះ បញ្ហានេះធ្វើឱ្យយើងទទួលបានបទពិសោធន៍ថា កុំសន្សំប្រាក់នៅក្នុងផ្ទះឱ្យសោះ» ។

បន្ទាប់ពីមានការបង្ហោះរូបក្រដាសប្រាក់ក្នុងបណ្តាញសង្គម ក៏មានអ្នកចូលមកបញ្ចេញមតិប្រមាណ២៦០នាក់ និងត្រូវបានគេចែកចាយបន្តគ្នារហូតដល់ជាង៦៥០លើក ។ មនុស្សមួយចំនួនបានសម្តែងការអាណិតអាសូរលោកយាយ ខណៈមនុស្សខ្លះទៀតនិយាយថា បញ្ហានេះមិនពាក់ព័ន្ធនឹងការសន្សំប្រាក់នៅផ្ទះទេ ប៉ុន្តែវាអាស្រ័យលើវិធីទុកដាក់ប្រាក់ច្រើនជាង ហើយពួកគេនិយាយថា វិធីល្អជាងនេះ គឺត្រូវសន្សំប្រាក់ក្នុងកំប៉ុងសន្សំប្រាក់ ។ ចំណែកមនុស្សមួយចំនួនទៀតណែនាំថា ត្រូវយកប្រាក់ទៅប្តូរជាមាសវិញ ពីព្រោះការផ្ញើប្រាក់នៅធនាគារ ក៏មានហានិភ័យ និងត្រូវគេបោកប្រាស់ផងដែរ ៕ ប្រភព ៖ sanook

ប្រទេសម៉ាឡេស៊ី ៖ ក្រុមហ៊ុន Tesla បានចូលមកកាន់ទីផ្សារប្រទេសម៉ាឡេស៊ីជាផ្លូវការហើយ ក្រោយពីក្រុមហ៊ុននេះធ្វើការសម្ពោធនៅហាងទំនើបមួយឈ្មោះ Pavilion KL ក្នុងទីក្រុងកូឡាឡាំពួរ ។ ម៉ាឡេស៊ី គឺជាទីផ្សារបើកបររថយន្តប្រកាន់ស្តាំចុងក្រោយគេបំផុត ក្រោយពី Tesla បានចូលក្នុងទីផ្សារប្រទេសអង់គ្លេស ហុងកុង ម៉ាកាវ ជប៉ុន អូស្ត្រាលី សិង្ហបុរី និងថៃ ។

នៅក្នុងពិធីសម្ពោធមានការបង្ហាញរថយន្ត Tesla Model Y គ្រប់ប្រភេទជាលើកដំបូង ហើយក្រុមហ៊ុន Tesla បានប្រកាសថា នឹងដំណើរការស្ថានីយសាកថ្មរថយន្ត Supercharging លើកដំបូងនៅប្រទេសម៉ាឡេស៊ី ដែលស្ថិតនៅត្រង់បរិវេណចំណតរថយន្តក្រោមដីរបស់ហាងលក់ទំនិញខាងលើ ។ លើសពីនេះ ក្រុមហ៊ុនមានគម្រោងបើកស្ថានីយ Supercharging ជាច្រើនកន្លែងទៀតនៅតាមទីតាំងយុទ្ធសាស្ត្រផងដែរ ដើម្បីអាចគ្របដណ្តប់ចំណុចគោលដៅពេញនិយមនៅទូទាំងប្រទេស ។

ម៉ាឡេស៊ីស្ថិតក្នុងចំណោមប្រទេសទីផ្សារដែលក្រុមហ៊ុន Tesla មកវិនិយោគយឺតយ៉ាវ ខណៈក្រុមហ៊ុនគូប្រជែងក្នុងផ្នែកឧស្សាហកម្មរថយន្តអគ្គិសនីរឹងមាំជាច្រើនទៀតឈានជើងចូលមកកាន់ទីផ្សារនេះបានមួយរយៈហើយ ដូចជា ក្រុមហ៊ុន Audi, BMW, BYD, Hyundai, Kia, Mercedes Benz, Nissan, Porsche, Smart និង Volvo ។ លើសពីនេះ ក៏មានក្រុមហ៊ុននៅក្នុងស្រុកផងដែរ ដូចជា Proton ដែលសហការជាមួយក្រុមហ៊ុន Geely ។

ទោះយ៉ាងណា តម្លៃដែលអាចប្រកួតប្រជែងបាន និងបច្ចេកវិទ្យាជាន់ខ្ពស់របស់ក្រុមហ៊ុន Tesla អាចជាចំណុចមានប្រៀបមួយ ដែលជួយទាក់ទាញអតិថិជនក្នុងប្រទេសម៉ាឡេស៊ី ព្រមទាំងបង្កើនឱកាសឱ្យក្រុមហ៊ុន Tesla អាចកាន់កាប់ចំណែកទីផ្សារនាំមុខគេបាន ។

តាមទិន្នន័យរបស់ក្រសួងពាណិជ្ជកម្មអន្តរជាតិ និងឧស្សាហកម្មបង្ហាញថា ក្រុមហ៊ុន Tesla ចាំបាច់ត្រូវតែបង្កើតស្ថានីយសាកថ្មរថយន្ត Supercharger សរុបចំនួន៥០កន្លែងឱ្យរួចរាល់ក្នុងរយៈពេល៣ឆ្នាំ ហើយ៣០% របស់ស្ថានីយសាកថ្មទាំងនេះ ត្រូវអនុញ្ញាតឱ្យយីហោផ្សេងប្រើប្រាស់ផងដែរ ។ ហេតុនេះ វាជាការអនុម័តមួយដែលនឹងអនុញ្ញាតឱ្យក្រុមហ៊ុន Tesla អាចបង្កើតស្ថានីយសាកថ្មរថយន្តនៅក្នុងប្រទេសបាន ។

កាលពីដើមឆ្នាំ២០២៣ គេសង្កេតឃើញថា ម៉ាឡេស៊ីមានស្ថានីយសាកថ្មរថយន្តសរុបចំនួន៩០០កន្លែង ហើយគេសង្ឃឹមថា ប្រទេសនេះនឹងមានស្ថានីយសាកថ្មរហូតដល់៤.០០០កន្លែងនៅចុងឆ្នាំ២០២៣ ៕ ប្រភព ៖ AEC connect

បរទេស៖ ធនាគារ Heartland Tri-State Bank ត្រូវបានក្ស័យធននៅថ្ងៃទី ២៨ ខែកក្កដា ដែលក្លាយជាធនាគារទី ៥ នៅសហរដ្ឋអាមេរិក។
យោងតាមប្រធានទីភ្នាក់ងារត្រួតពិនិត្យធនាគារនៅរដ្ឋ Kansas (សហរដ្ឋអាមេរិក) លោក David Herndon កាលពីថ្ងៃទី ២៨ ខែកក្កដាបានប្រកាសថាធនាគារ Heartland Tri-State Bank ត្រូវបានក្ស័យធន។ ទោះជាយ៉ាងណាក៏ដោយ ពួកគេមិនបានផ្តល់ព័ត៌មានលម្អិតបន្ថែមទៀតនោះទេ ដូចជាមូលហេតុដែលធនាគារ Heartland Tri-State ធ្លាក់ក្នុងស្ថានភាពបែបនេះ។

ទីភ្នាក់ងារត្រួតពិនិត្យធនាគារនៅរដ្ឋ Kansas បានតែងតាំង Federal Deposit Insurance Corporation (FDIC) ដែលជាធនាគារសាជីវកម្មធានារ៉ាប់រងប្រាក់បញ្ញើសហព័ន្ធរបស់អាមេរិកឱ្យមកកាន់កាប់ធនាគារ Heartland Tri-State ។ បន្ទាប់មក FDIC ក៏បានចុះហត្ថលេខាលើកិច្ចព្រមព្រៀងមួយដើម្បីទទួល និងកាន់កាប់ធនាគារ Heartland Tri-State ជាមួយនឹងធនាគារ Dream First ដែលជាធនាគារ Kansas មួយផ្សេងទៀត។ នៅដើមសប្តាហ៍ក្រោយ សាខាធនាគារ Heartland Tri-State ចំនួន ៤ នឹងត្រូវបានបើកឡើងវិញជាសាខាថ្មីរបស់ធនាគារ Dream First ។

FDIC បាននិយាយថា អតិថិជនរបស់ Heartland Tri-State Bank អាចចូលប្រើមូលនិធិដោយមូលប្បទានប័ត្រ ឬប័ណ្ណឥណពន្ធ។ ពួកគេមិនចាំបាច់ផ្លាស់ប្តូរធនាគារទេ ព្រោះពួកគេនឹងប្តូរដោយស្វ័យប្រវត្តិទៅជាអតិថិជនរបស់ Dream First Bank។ ប្រាក់កម្ចីដែលមានស្រាប់ក៏មិនរងផលប៉ះពាល់ដែរ ដោយសារ FDIC និង Dream First Bank បានចុះកិច្ចព្រមព្រៀងចែករំលែកការខាតបង់ពីបញ្ហានេះ។

គួរបញ្ជាក់ដែរថា ធនាគារ Heartland Tri-State មានទ្រព្យសម្បត្តិសរុបប្រមាណ ១៣៩ លានដុល្លារ និងប្រាក់បញ្ញើចំនួន ១៣០ លានដុល្លារ។ ធនាគារនេះត្រូវបានបង្កើតឡើងក្នុងឆ្នាំ ១៩៨៥។ បន្ថែមពីលើទីស្នាក់ការកណ្តាលនៅ Elkhart ពួកគេក៏មានសាខាបីផ្សេងទៀតនៅ Attica, Arlington និង Rolla ។

នេះគឺជាធនាគារទី ៥ ហើយនៅសហរដ្ឋអាមេរិកដែលត្រូវបានបិទក្នុងឆ្នាំនេះ បន្ទាប់ពី ធនាគារ First Republic Bank ធនាគារ Signature Bank ធនាគារ Silicon Valley និងធនាគារ Silvergate ។ នៅឆ្នាំ ២០២១ និង ២០២២ សហរដ្ឋអាមេរិកមិនមានការបរាជ័យធនាគារណាមួយឡើយ។ ការបិទធនាគារក្នុងស្រុកជាបន្តបន្ទាប់នៅដើមឆ្នាំនេះបានបង្កឱ្យមានការរំខានដល់ប្រព័ន្ធធនាគាររបស់សហរដ្ឋអាមេរិក ។ នេះធ្វើឱ្យអ្នកបង្កើតគោលនយោបាយស្ថិតនៅក្រោមសម្ពាធក្នុងការណែនាំបទប្បញ្ញត្តិថ្មីដើម្បីការពារប្រាក់បញ្ញើរបស់អតិថិជន និងធ្វើឱ្យប្រព័ន្ធហិរញ្ញវត្ថុមានស្ថេរភាព៕ ប្រភព៖vnexpress

រាជធានីបាងកក៖ នាយករដ្ឋមន្រ្ដីដ៏មានឥទ្ធិពលរបស់ប្រទេសថៃ ត្រូវបានពួកយោធា ធ្វើរដ្ឋប្រហារ បណ្ដេញចេញពីអំណាច នៅក្នុងអំឡុងឆ្នាំ២០០៦ ហើយកំពុងតែរស់នៅនិរទេសខ្លួន នៅក្រៅប្រទេស ប៉ុន្ដែឥឡូវគាត់មានគម្រោងវិលត្រឡប់មកកាន់ប្រទេសកំណើតរបស់គាត់វិញ នៅខែក្រោយ ទើបប៉ូលិស បានប្រកាស អំពីការត្រៀមខ្លួនរបស់ពួកគេ។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃចន្ទ ទី៣១ ខែកក្កដា ថា បើតាមប្រភពជាច្រើន ពីគណបក្សភឿថៃ (Pheu Thai Party) និង ប៉ូលិសភូមិន្ទថៃ (RTP) បានឲ្យដឹង ថា លោក ថាក់ស៊ីន ស៊ីណាវ៉ាត្រា (Thaksin Shinawatra) អតីតនាយករដ្ឋមន្រ្ដីថៃ បានប្រកាស អំពីការវិលត្រឡប់ មកកាន់ប្រទេសថៃ នៅថ្ងៃទី១០ ខែសីហា ដោយមិនមានការកែប្រែនោះឡើយ ក្រោយគាត់បាននិរទេសខ្លួន ដោយខ្លួនឯង រស់នៅក្រៅប្រទេស អស់រយៈពេល១៧ឆ្នាំរួចមក។ គាត់គ្រោងនឹងមកដល់អាកាសយានដ្ឋានដនមឿង (Don Mueang) នៅថ្ងៃដដែលនោះ នាវេលាម៉ោង១០ និង ៣០នាទីព្រឹក។

គណបក្សភឿថៃ បាន និង កំពុងតែបញ្ចេញនូវវីដេអូឃ្លីប ជាបន្តបន្ទាប់ នៅលើទំព័របណ្ដាញសង្គមហ្វេសប៊ុករបស់ខ្លួន ដោយបានបង្ហាញ អំពីការកាត់ក្តី និង ទុក្ខលំបាកទាក់ទងនឹងអាជីពនយោបាយដ៏យូររបស់លោក ថាក់ស៊ីន ចាប់ពីគាត់បានឡើងកាន់តំណែង ជានាយករដ្ឋមន្ត្រី នៅឆ្នាំ ២០០១ រហូតដល់ពួកយោធា បានធ្វើរដ្ឋប្រហារ ផ្ដួលរំលំរដ្ឋាភិបាលថៃរបស់គាត់ ដឹកនាំដោយគណបក្សភឿថៃ។

លោកស្រី លីនធីផន វ៉ារីនវ៉ាតឆារ៉ារ៉ូ (Linthiporn Warinwatchararoj) សមាជិកសភា និង ជាអ្នកនាំពាក្យស្ដីទីរបស់គណបក្សភឿថៃ កាលពីថ្ងៃអាទិត្យ បានអះអាង ថា ឃ្លីបវីដេអូនេះ មានគោលបំណង អប់រំសាធារណជនឲ្យយល់ដឹង អំពីជីវិតនយោបាយរបស់លោក ថាក់ស៊ីន។ ឃ្លីបវីដេអូនេះ ក៏បានជួយបំភ្លឺការពិត និង ដោះស្រាយព័ត៌មានមិនពិត អំពីអ្នកជំនួញ និង អ្នកនយោបាយមានជម្លោះ។

បើទោះជាយ៉ាងណាក៏ដោយ លោកស្រី បានបដិសេធ ថា ឃ្លីបវីដេអូនេះ មានការប៉ុនប៉ងបង្វែរនូវការចាប់អារម្មណ៍របស់សាធារណជន ងាកចេញពីការតស៊ូរបស់គណបក្ស សម្រាប់ការដឹកនាំបង្កើតរដ្ឋាភិបាលថ្មី។

លោកស្រី បានបន្តថា គ្មានការផ្លាស់ប្តូរចិត្ត នៅក្នុងចំណោមគណបក្សទាំង៨ ដឹកនាំដោយគណបក្សឆ្ពោះទៅមុខ (MFP) សម្រាប់ការផ្តល់នូវកិច្ចការ នៅក្នុងការបង្កើតរដ្ឋាភិបាលថ្មី មកដល់គណបក្សភឿថៃ នោះឡើយ។

បើតាមប្រភពពីប៉ូលិសភូមិន្ទថៃ បានអះអាង ថា ក្រុមគ្រួសាររបស់លោក ថាក់ស៊ីន បានជូនដំណឹង មកប៉ូលិស អំពីការវិលត្រឡប់របស់គាត់ ដែលនឹងជិតមកដល់ ហើយការរៀបចំ កំពុងតែដំណើរការ លើវិធានការសន្តិសុខចាំបាច់ សម្រាប់ដោះស្រាយ ចំពោះការមកដល់របស់គាត់។

បើទោះជាយ៉ាងណាក៏ដោយ ប៉ូលិសភូមិន្ទថៃ នឹងតាមដានយ៉ាងដិតដល់ ចំពោះព្រឹត្តិការណ៍ នៅថ្ងៃទី១០ ខែសីហា ខាងមុខនេះ ដោយរួមទាំងសេចក្តីប្រកាសរបស់តុលាការធម្មនុញ្ញ នៅថ្ងៃទី៣ ខែសីហា ថាតើតុលាការ នឹងពិចារណាពិនិត្យឡើងវិញនូវការសម្រេចចិត្តជាមុនរបស់ខ្លួន នៅក្នុងការរារាំងមេដឹកនាំគណបក្សឆ្ពោះទៅមុខ (MFP) លោក ភីថា លីមចារឿនរ៉ាត (Pita Limjaroenrat) ជុំវិញការអនុញ្ញាតដល់គាត់ សម្រាប់ការបោះឆ្នោតសភាជាលើកទី៣ ដើម្បីក្លាយនាយករដ្ឋមន្ត្រីថ្មី ដែរឬយ៉ាងណា។ ប៉ុន្ដែប្រសិនបើតុលាការធម្មនុញ្ញទម្លាក់ចោលញត្តិនោះ សភាអាចកោះប្រជុំរួមគ្នា នៅថ្ងៃបន្ទាប់ សម្រាប់ជ្រើសរើសនាយករដ្ឋមន្ត្រីថ្មី។

ផ្ទុយទៅវិញ ប្រសិនបើបេក្ខជនរបស់គណបក្សភឿថៃ ឈ្នះ និង ដឹកនាំការបង្កើតរដ្ឋាភិបាល ដោយជោគជ័យនោះ លោក ថាក់ស៊ីន នឹងមានអារម្មណ៍ជឿជាក់ នៅក្នុងការវិលត្រឡប់របស់គាត់ មកកាន់មាតុប្រទេសវិញ។ បច្ចុប្បន្ន គាត់នៅតែប្រឈមមុខនឹងសំណុំរឿងព្រហ្មទណ្ឌជាច្រើន ខណៈតុលាការក៏នៅតែមិនទាន់ទម្លាក់ចោលនូវការចោទប្រកាន់ នៅឡើយ៕

ប្រេងឆៅ គឺជាកំណប់ធនធានធម្មជាតិដ៏សំខាន់បំផុតមួយ ដោយវាជាប្រភពថាមពលដ៏ចម្បងសម្រាប់ការរស់នៅរបស់មនុស្សជាតិនៅលើផែនដី។ ភាគច្រើនគេអាចចម្រាញ់ប្រេងឆៅទៅជាប្រេងសាំង ប្រេងម៉ាស៊ូត ឥន្ធនៈយន្តហោះ និងប្រេងរំអិលជាដើម ដោយគិតជាលក្ខណៈសកល រង្វាស់រង្វាល់ប្រេងត្រូវបានគិតជា «បារ៉ែល» ។ ដូច្នេះហើយខាងក្រោមនេះគឺជាប្រទេសទាំង ១០ ដែលមានធនធានប្រេងឆៅច្រើនជាងគេបំផុតនៅលើពិភពលោកក្នុងឆ្នាំ ២០២៣៖

១.ប្រទេសវេណេស៊ុយអេឡា (Venezuela)៖ វេណេស៊ុយអេឡាគឺជាប្រទេសដែលមានធនធានប្រេងឆៅច្រើនជាងគេបំផុតនៅលើពិភពលោក ដោយមានប្រេងឆៅប្រមាណ ៣០០ ពាន់លានបារ៉ែល។

២.ប្រទេសអារ៉ាប៊ីសាអូឌីត (Saudi Arabia)៖ ព្រះរាជាណាចក្រអារ៉ាប៊ូសាអូឌីត មានប្រេងឆៅចំនួន ២៦៧ ពាន់លានបារ៉ែល។

៣.ប្រទេសអ៊ីរ៉ង់ (Iran)៖ ប្រទេសអ៊ីរ៉ង់ មានធនធានប្រេងឆៅប្រមាណ ២០៨.៦ ពាន់លានបារ៉ែល។

៤.ប្រទេសកាណាដា (Canada)៖ កាណាដាជាប្រទេសទីបួននៅលើពិភពលោក ដែលមានធនធានប្រេងឆៅប្រមាណ ១៧១ ពាន់លានបារ៉ែល។

៥.ប្រទេសអ៊ីរ៉ាក់ (Iraq)៖ ប្រទេសនៅតំបន់មជ្ឈិមបូព៌ាមួយនេះ មានធនធានប្រេងឆៅប្រមាណ ១៤៥ ពាន់លានបារ៉ែល។

៦.ប្រទេសអារ៉ាប់រួម (UAE)៖ ប្រទេសអារ៉ាប់មួយនេះ មានធនធានប្រេងឆៅប្រមាណ ១១១ ពាន់លានបារ៉ែល។

៧.ប្រទេសគុយវែត (Kuwait)៖ គុយវែតជាប្រទេសដែលមានបរិមាណប្រេងឆៅប្រមាណ ១០១.៥ ពាន់លានបារ៉ែល។

៨.ប្រទេសរុស្ស៊ី (Russia)៖ រុស្ស៉ី ជាប្រទេសធំជាងគេបំផុតនៅលើពិភពលោក ដែលមានស្តុកទុកនូវធនធានប្រេងឆៅប្រមាណ ៨០ ពាន់លានបារ៉ែល។

៩.ប្រទេសអាមេរិក (USA)៖ សហរដ្ឋអាមេរិកជាប្រទេសជាប់ចំណាត់ថ្នាក់ទីប្រាំបួននៅលើពិភពលោក ដែលមានបរិមាណប្រេងឆៅប្រមាណ ៦៨.៨ ពាន់លានបារ៉ែល។

១០.ប្រទេសលីប៊ី (Libya)៖ ប្រទេសលីប៊ី ស្ថិតនៅតំបន់ភាគខាងជើងនៃទ្វីបអាហ្រ្វិក ដែលមានបរិមាណប្រេងឆៅប្រមាណ ៤៨.៣ ពាន់លានបារ៉ែល៕