សហអាមេរិក៖ លោកស្រី Tosca Musk គឺជាប្អូនស្រីបង្កើតរបស់មហាសេដ្ឋីពិភពលោក Elon Musk នឹងជាផលិតករភាពយន្តរបស់អាមេរិក។ Tosca Musk បាននិយាយថា ការក្លាយជាប្អូនស្រីរបស់មហាសេដ្ឋីអាមេរិកគឺជា “ពរជ័យមួយ ហើយក៏ជាបណ្តាសា” ផងដែរ ដោយសារតែការជួលទីតាំងសម្រាប់ថតភាពយន្តថ្មីរបស់ខ្ញុំគឺមានតម្លៃខ្ពស់ពេក។

លោកស្រីបន្តទៀតថា៖ តំបន់សម្រាប់ការថតភាពយន្តនោះជាធម្មតាមានតម្លៃត្រឹមតែ ៥,០០០ ដុល្លារក្នុងមួយថ្ងៃ ប៉ុន្តែនៅពេលគេឮឈ្មោះខ្ញុំ អ្នកដែលកាន់កាប់តំបន់នោះបែរជាដំឡើងតម្លៃភ្លាមរហូតទៅដល់ ២,៥០០០ ដុល្លារក្នុងមួយថ្ងៃ។ ដោយពួកគេយល់ច្រឡំថាបងប្រុសច្បងរបស់ខ្ញុំចំណាយគ្រប់យ៉ាងសម្រាប់ខ្ញុំ ប៉ុន្តែវាមិនពិតទេ។

យោងតាមលោកស្រី Tosca Musk បានឱ្យដឹងថា ការធ្វើជាសាច់ញាតិរបស់ Elon Musk ក៏ជា “ដាវមុខពីរ” ផងដែរព្រោះវាជួយបង្កើតទំនាក់ទំនងការងារក្នុងសង្គមកាន់តែច្រើន ប៉ុន្តែក៏បណ្តាលឱ្យគាត់ជួបប្រទះសម្ពាធកាន់តែច្រើនផងដែរ។ ទោះជាយ៉ាងណាក៏ដោយ Tosca បាននិយាយថាការមាននាមត្រកូល Musk គឺជាពរជ័យមួយ ហើយគាត់មិនដែលចង់ផ្លាស់ប្តូរទេ។

លោកស្រី Tosca Musk កើតនៅឆ្នាំ ១៩៧៤ បន្ទាប់ពី Elon Musk និងបងប្រុសធំម្នាក់ទៀតគឺលោក Kimbal Musk ។ លោកស្រីបានចាប់ផ្តើមធ្វើការនៅក្នុងផលិតកម្មភាពយន្តក្នុងឆ្នាំ ២០០១ ហើយបានផលិតខ្សែភាពយន្តជាង ៥០ មកទល់ពេលនេះ។ ហើយគាត់ក៏ជាស្ថាបនិក និងជានាយកប្រតិបត្តិនៃ Passionflix ដែលជាក្រុមហ៊ុនផលិត និងសេវាកម្មស្ទ្រីមដែលមានឯកទេសក្នុងខ្លឹមសារមនោសញ្ចេតនាផងដែរ៕ ប្រភព៖vnexpress

TasteAtlas គឺជាគេហទំព័រពេញនិយមផ្នែកត្រួតពិនិត្យម្ហូបអាហារល្បីៗនៅលើពិភពលោក បានចាត់ចំណាត់ថ្នាក់ម្ហូបចំនួន១០មុខ ដែលធ្វើពីសាច់គោឆៅដ៏ឆ្ងាញ់បំផុតនៅលើពិភពលោក ។ ក្នុងចំណោមម្ហូបទាំងនោះ ម្ហូបទទួលបានចំណាត់ថ្នាក់ពីលេខ១ ដល់លេខ១០ រួមមាន ៖

១-Yukhoe ៖ មកពីប្រទេសកូរ៉េខាងត្បូង ម្ហូបនេះធ្វើពីសាច់គោឆៅ ដោយគេបានហាន់វាជាបន្ទះវែងៗ និងផ្សំគ្រឿងដោយអំបិល ស្ករ ប្រេងល្ង ម្រេច ខ្ទឹមសរ និងដាក់ស៊ុតក្រហមឆៅពីលើ ។

២-Carpaccio ៖ មកពីប្រទេសអ៊ីតាលី ម្ហូបនេះធ្វើពីសាច់គោឆៅហាន់ជាបន្ទះស្តើងៗ និងរោយពីលើដោយប្រេងម្កាក់ និងផ្សិតពណ៌ស ហើយគេអាចបរិភោគវាឆៅៗជាមួយនំប៉័ង ។

៣-Hackepeter ៖ មកពីប្រទេសអាល្លឺម៉ង់ ម្ហូបនេះជាប្រភេទនំប៉័ងដាក់សាច់ឆៅពីលើ ។ គេចម្អិនវាដោយដាក់អំបិល ម្រេច និងដាក់គ្រឿងទេសបន្តិច ។

៤-Steak Tartare ៖ មកពីប្រទេសបារាំង គេបានយកសាច់គោទៅកិនឱ្យល្អិត រួចយកសាច់គោឆៅដែលកិនរួចមកផ្សំគ្រឿងជាមួយទឹកជ្រលក់ ម្ទេសចិញ្ច្រាំ ខ្ទឹមបារាំង និងម្រេច បន្ទាប់មក គេដាក់ស៊ុតឆៅពីលើ ។

៥-Cig Kofte ៖ មកពីប្រទេសតួកគី គេបានយកសាច់គោឆៅទៅកិនឱ្យល្អិត និងដាក់បញ្ចូលនូវគ្រឿងផ្សំផ្សេងៗ បន្ទាប់មក គេយកវាមកសូនឱ្យដូចគ្នានឹងប្រហិតដែរ ។

៦-Filet Americain ៖ មកពីប្រទេសបែលហ្សិក វាជាប្រភេទ Steak Tartare ប៉ុន្តែគេយកវាមកបរិភោគជាមួយនំប៉័ង ។

៧-Carne Salada ៖ មកពីប្រទេសអ៊ីតាលី គេបានយកសាច់គោមកហាន់ជាបន្ទះស្តើងៗ បន្ទាប់មក រោយអំបិល និងម្រេចពីលើ ។

៨-Kebbeh nayyeh ៖ មកពីប្រទេសលីបង់ គេយកសាច់គោឆៅទៅកិនឱ្យល្អិត រួចលាយជាមួយគ្រឿងផ្សំផ្សេងៗ និងគ្រឿងទេស ។ ក្រៅពីនេះ គេនឹងដាក់គ្រាប់ស្រូវសាឡីស្ងួតពីលើ ដែលធ្វើឱ្យវាស្រួយពេលទំពារចូលក្នុងមាត់ ។

៩-Kitfo ៖ មកពីប្រទេសអេត្យូពី គេយកសាច់គោឆៅទៅក្រឡុកជាមួយប័រហឹរ និងដាក់គ្រឿងទេសមានរសជាតិហឹរខ្លាំង ។

១០-Carne de onca ៖ មកពីប្រទេសប្រេស៊ីល ម្ហូបនេះធ្វើឡើងដោយយកសាច់គោកិនឱ្យល្អិត រួចយកវាផ្សំគ្រឿងជាមួយខ្ទឹមសរ ខ្ទឹមបារាំង ស្លឹកខ្ទឹម ប្រេងម្កាក់ និងម្ទេសម៉ត់ បន្ទាប់មក គេយកវាទៅដាក់ពីលើនំប៉័ង ៕ ប្រភព ៖ Amarin News

រាជធានីប៊្រុចសែលស៍៖ សង្គ្រាមរបស់មេដឹកនាំវិមានក្រឹមឡាំង លោក វ៉្លាឌីមៀ ពូទីន នៅលើទឹកដីរបស់អ៊ុយក្រែន អស់រយៈពេលជាង១ឆ្នាំកន្លងមកនេះ បាន និង កំពុងតែបំផ្លិចបំផ្លាញហេដ្ឋារចនាសម្ព័ន្ធរបស់ប្រទេសជិតខាងមួយនេះ អស់ទឹកប្រាក់ រាប់រយពាន់លានដុល្លារ ហើយថែមទាំងបានសម្លាប់ជនស៊ីវិល និង ទាហានទាំងសងខាង អស់រាប់សែននាក់ ខណៈការវាយប្រយុទ្ធគ្នា កំពុងតែបន្ដ រកទីបញ្ចប់មិនទាន់ឃើញ ទើបក្រុមមេដឹកនាំសហភាពអឺរ៉ុប បានអំពាវនាវ ដល់ប្រទេសចិន ឲ្យជួយបញ្ចប់សង្គ្រាមដ៏ឃោរឃៅនេះ។

ទីភ្នាក់ងារសារព័ត៌មានរបស់ចក្រភពអង់គ្លេស Reuters បានចេញផ្សាយ នៅថ្ងៃពុធ ទី២១ ខែមិថុនា ថា បើតាមមន្រ្ដីជាន់ខ្ពស់មួយរូបរបស់សហភាពអឺរ៉ុប បានបញ្ជាក់ ថា ក្រុមមេដឹកនាំសហភាពអឺរ៉ុប នៅសប្ដាហ៍ក្រោយនេះ មានផែនការ អំពាវនាវដល់ប្រទេសចិន ឲ្យជួយបញ្ចប់សង្គ្រាម នៅក្នុងប្រទេសអ៊ុយក្រែន ហើយជំរុញឲ្យចូលរួមដោះស្រាយ ចំពោះបញ្ហាប្រឈមជាសកល ដូចជា ការប្រែប្រួលអាកាសធាតុ នៅលើពិភពលោក និង ធ្វើឱ្យមានតុល្យភាពឡើងវិញនូវទំនាក់ទំនងសេដ្ឋកិច្ចរបស់ក្រុងប៉េកាំង ជាមួយសហភាពអឺរ៉ុប។

ក្រុមមេដឹកនាំសហភាពអឺរ៉ុប នឹងជួបប្រជុំ ជាមួយក្រុមមន្រ្ដីចិន និង សន្តិសុខសេដ្ឋកិច្ច នៅក្នុងចំណោមប្រធានបទសំខាន់ៗ នៅក្នុងកិច្ចប្រជុំកំពូល នៅទីក្រុងប៊្រុចសែលស៍ ប្រទេសប៊ែលហ្ស៊ិក ចន្លោះពីថ្ងៃទី២៩-៣០ ខែមិថុនា។ ចំណែកការអំពាវនាវទៅកាន់ប្រទេសចិន នឹងត្រូវកំណត់ នៅក្នុងសេចក្តីព្រាងការសន្និដ្ឋាន ត្រូវបានរៀបចំឡើង នៅមុនកិច្ចប្រជុំកំពូល។

មន្រ្ដីជាន់ខ្ពស់សហភាពអឺរ៉ុប រូបនោះ បានសង្កត់ធ្ងន់ ថា សេចក្តីព្រាងការសន្និដ្ឋាននោះ នឹងធ្វើឡើង ស្របតាមសេចក្តីប្រកាសរបស់ក្រុមប្រទេសមានសេដ្ឋកិច្ចរីកចម្រើនបំផុត G7 កាលពីខែឧសភា។ ប៉ុន្តែសម្រាប់បញ្ហាជាក់លាក់របស់សហភាពអឺរ៉ុប-ចិន ទំនងជា នឹងធ្វើឱ្យមានតុល្យភាពឡើងវិញនូវទំនាក់ទំនងសេដ្ឋកិច្ច និង តម្រូវការ សម្រាប់គ្នាទៅវិញទៅមក។

ក្រុមអ្នកជំនាញរបស់លោកខាងលិច និង អ៊ុយក្រែន ធ្លាប់លើកឡើង កាលពីចុងឆ្នាំ២០២២ ថា សង្គ្រាមរបស់ក្រុងមូស្គូ បានបំផ្លិចបំផ្លាញអ៊ុយក្រែន អស់ប្រហែលជាង៤០០ពាន់លានដុល្លារ ខណៈសង្គ្រាមកំពុងតែបន្ដ។

អគ្គសេនាធិការកងទ័ពអ៊ុយក្រែន បានបង្ហោះ នៅលើបណ្ដាញសង្គមហ្វេសប៊ុក ថា ចាប់តាំងពីការផ្ទុះសង្គ្រាម នៅថ្ងៃទី២៤ ខែកុម្ភៈ ឆ្នាំ២០២២ ដល់ថ្ងៃទី២១ ខែមិថុនា ឆ្នាំ២០២៣ កងទ័ពអ៊ុយក្រែន បានសម្លាប់ទាហានរុស្ស៊ី ប្រហែល ២២២ ០០០ ដោយរាប់បញ្ចូលទាំងការសម្លាប់ ចំនួន ៥៤០នាក់ កាលពី២៤ម៉ោងមុននេះផងដែរ។ ក្រៅពីនេះ អ៊ុយក្រែន ក៏បានកម្ទេចទ្រព្យសម្បត្ដិការពារជាតិរបស់រុស្ស៊ី មានតម្លៃរាប់សិបពាន់លានដុល្លារថែមទៀតផង។

បើទោះជាយ៉ាងណាក្ដី ទាំងអ៊ុយក្រែន និង រុស្ស៊ី កម្រនឹងបង្ហាញ អំពីចំនួនទាហានរបស់ខ្លួនរងនូវការខូចខាត ស្លាប់ ឬ រងរបួស នៅក្នុងសង្គ្រាមនេះ។ ចំណែកការអះអាងទាំងអម្បាលមាន អំពីចំនួនទាហានរុស្ស៊ីស្លាប់ជាង២សែននាក់នោះ គ្រាន់តែជាការចេញផ្សាយ ពីប្រភពរបស់កងទ័ពអ៊ុយក្រែន តែប៉ុណ្ណោះ ហើយគេក៏មិនអាចផ្ទៀងផ្ទាត់ ពីប្រភពឯករាជ្យណាមួយបាននោះដែរ៕

ប្រទេសឥណ្ឌា ៖ កាលពីថ្ងៃទី១៩ ខែមិថុនា កន្លងមក Airbus ជាក្រុមហ៊ុនអាកាសចរណ៍ និងអវកាសអន្តរជាតិរបស់អឺរ៉ុបបានប្រកាសថា ក្រុមហ៊ុនអាកាសចរណ៍ឈានមុខគេរបស់ប្រទេសឥណ្ឌា ឈ្មោះ IndiGo បានចុះកិច្ចព្រមព្រៀងទិញយន្តហោះដ៏ច្រើនបំផុតក្នុងប្រវត្តិសាស្ត្រអាកាសចរណ៍ពាណិជ្ជកម្ម ។

ក្រុមហ៊ុន Airbus បានចូលរួមក្នុងពិព័រណ៍យន្តហោះអន្តរជាតិនៅទីក្រុងប៉ារីស (Paris Air Show) ប្រទេសបារាំង ប្រចាំឆ្នាំ២០២៣ បញ្ជាក់ថា ក្រុមហ៊ុន IndiGo បានបញ្ជាទិញយន្តហោះប្រភេទ A320 ចំនួន៥០០គ្រឿង ដែលធ្វើឱ្យការបញ្ជាទិញយន្តហោះសរុបពីក្រុមហ៊ុន Airbus របស់ក្រុមហ៊ុនអាកាសចរណ៍ឥណ្ឌាស្មើនឹង១.៣៣០គ្រឿង ។ ដូច្នេះ ប្រទេសឥណ្ឌាបានក្លាយជាអតិថិជនដ៏ធំបំផុតនៅលើពិភពលោក ដែលបានទិញយន្តហោះប្រភេទ A320 ។

ជាមួយគ្នានេះ ក្រុមហ៊ុនអាកាសចរណ៍ Flynas របស់ប្រទេសអារ៉ាប៊ី សាអូឌីត បានបញ្ជាក់ថា នឹងទិញយន្តហោះប្រភេទ A320neo ពីក្រុមហ៊ុន Airbus ចំនួន៣០គ្រឿងផងដែរ ។ ដូច្នេះ ការបញ្ជាទិញយន្តហោះសរុបប្រភេទ A320neo របស់ក្រុមហ៊ុន Flynas ស្មើនឹង១២០គ្រឿង ។ ចំណែកក្រុមហ៊ុនអាកាសចរណ៍ Air Mauritius ជារបស់ប្រទេសស្ថិតក្នុងតំបន់អាហ្វ្រិកខាងកើតនិយាយថា នឹងទិញយន្តហោះប្រភេទ A350 ចំនួន៣គ្រឿង ដើម្បីពង្រីកការហោះហើរក្នុងទ្វីបអឺរ៉ុប និងអាស៊ីខាងត្បូង ។

ក្រុមហ៊ុន Airbus បញ្ជាក់ថា យន្តហោះប្រភេទ A320 មានច្រកផ្លូវធំបំផុតសម្រាប់អ្នកដំណើរដើរ ហើយយន្តហោះនេះបានប្រើប្រាស់បច្ចេកវិទ្យាចុងក្រោយគេ ។ ចំណែកយន្តហោះប្រភេទ A320neo គេបានដំឡើងក្នុងរោងចក្រចំនួន៤កន្លែងនៅប្រទេសអាល្លឺម៉ង់, បារាំង, សហរដ្ឋអាមេរិក និងចិន ។ ការដំឡើងយន្តហោះនៅរោងចក្រចុងក្រោយនៅទីក្រុងធៀនជិនសិ្ថតនៅភាគខាងជើងប្រទេសចិន FAL Asia បានចាប់ផ្តើមដំណើរការតាំងពីឆ្នាំ២០០៨ មកម៉្លេះ ហើយបានដំឡើងយន្តហោះប្រភេទ A320 ចំនួនជាង៦០០គ្រឿង ៕ ប្រភព ៖ TNN World

ប្រទេសចិន ៖ យុវវ័យនៅប្រទេសចិនកំពុងប្រឈមនឹងបញ្ហាពិបាករកការងារធ្វើ ស្របពេលទីផ្សារការងារនៅប្រទេសចិនមានការប្រកួតប្រជែងខ្លាំង ។ និស្សិតភាគច្រើនបានដាក់ពាក្យបម្រើការងារដោយបង្ហាញកម្រិតការសិក្សាខ្ពស់ជាងតួនាទីដែលគេជ្រើសរើស ហើយនិស្សិតខ្លះទៀតបានបញ្ចប់ថ្នាក់អនុបណ្ឌិតទៀតផង ប៉ុន្តែនៅតែមិនទទួលបានការងារធ្វើ ។ នៅទីក្រុងមួយចំនួន មានយុវវ័យគ្មានការងារធ្វើរាប់សែននាក់ ហើយធ្វើឱ្យប្រទេសចិនព្យាយាមស្វែងរកដំណោះស្រាយបញ្ហានេះ ។

ការិយាល័យស្ថិតិជាតិប្រទេសចិនបានបង្ហាញទិន្នន័យកាលពីខែមេសា ឆ្នាំ២០២៣ ថា អត្រាគ្មានការងារធ្វើមានកំណើនរហូតដល់២០% ក្នុងចំណោមក្រុមយុវវ័យចិនដែលមានអាយុចាប់ពី១៦ឆ្នាំ ទៅ២៤ឆ្នាំ ហើយវាជាទិន្នន័យខ្ពស់បំផុត បើគិតចាប់ពីឆ្នាំ២០១៨ មក ។ ក្នុងនិទាឃរដូវនេះ ប្រទេសចិននឹងមាននិស្សិតបញ្ចប់ការសិក្សាថ្មីរហូតដល់១១,៥៨លាននាក់ដែលត្រូវស្វែងរកការងារធ្វើ ។ ជំនួយការនាយកមជ្ឈមណ្ឌលការសិក្សាអាស៊ាន-ចិនវិភាគថា រដ្ឋាភិបាលចិនគួរប្រើប្រាស់គោលនយោបាយលើកកម្ពស់សុខុមាលភាព និងទាក់ទាញកម្លាំងពលកម្មមានជំនាញឱ្យទៅធ្វើការនៅតំបន់ជនបទឆ្ងាយៗ ។

ក្វាងទុង គឺជាខេត្តមួយក្នុងចំណោមខេត្តមានសេដ្ឋកិច្ចរីកចម្រើននៅប្រទេសចិន ហើយកាលពីខែមេសា ឆ្នាំ២០២៣ ខេត្តនេះបានផ្តល់ដំណោះស្រាយថា គួរតែបញ្ជូនយុវវ័យគ្មានការងារឱ្យទៅធ្វើការនៅតំបន់ជនបទរយៈពេល២ឆ្នាំ ទៅ៣ឆ្នាំ ពីព្រោះការធ្វើការនៅស្រុកកំណើតល្អប្រសើរជាងការធ្វើការនៅទីក្រុង ប៉ុន្តែគំនិតនេះមានទាំងអ្នកយល់ស្រប និងមិនយល់ស្រប ។

ការប្រកាសនេះស្របគ្នានឹងការអំពាវនាវរបស់ប្រធានាធិបតីចិន លោក ស៊ី ជិនពីង កាលពីខែធ្នូ ឆ្នាំ២០២២ ដោយលោកប្រធានាធិបតីចិនបានលើកឡើងថា ចង់ឱ្យយុវវ័យនៅទីក្រុងទៅរកការងារធ្វើនៅតាមជនបទ ដើម្បីលើកកម្ពស់សេដ្ឋកិច្ចជនបទ ។

អត្រាគ្មានការងារធ្វើរបស់យុវវ័យភាគច្រើនបណ្តាលមកពីសេដ្ឋកិច្ចចិនធ្លាក់ចុះ ដោយសារគោលនយោបាយគ្រប់គ្រងជំងឺកូវីដរបស់រដ្ឋាភិបាលចិន ហើយធ្វើឱ្យប៉ះពាល់ខ្លាំងដល់ក្រុមហ៊ុនអាជីវកម្មតូចៗក្នុងរយៈពេល៣ឆ្នាំកន្លងមក ។ និស្សិតទើបបញ្ចប់ការសិក្សាពីសាកលវិទ្យាល័យនិយាយថា ពួកគេពិបាកជ្រើសរើសថា នឹងធ្វើការក្នុងការិយាល័យហើយប្រឈមនឹងការបាត់បង់ការងារ ឬពួកគេត្រូវដោះសម្លៀកបំពាក់និស្សិតចេញ រួចទៅធ្វើការដោយប្រើកម្លាំងដែលពួកគេមិនចង់ធ្វើ ៕ ប្រភព ៖ Thai PBS Podcast

បរទេស៖ យោងតាមប្រភពព័ត៌មានរបស់ប្រទេសអូស្ត្រាលីដែលបានរាយការណ៍កាលពីថ្ងៃទី២០ ខែមិថុនា ថា ការលើសចំណុះកំពុងកើតមានឡើងវិញម្តងទៀតនៅលើភ្នំ Everest ដែលធ្វើឱ្យអ្នកឡើងភ្នំស្លាប់ដោយសារខ្វះអុកស៊ីហ្សែននៅពេលដែលកំពុងរង់ចាំ។
ថ្មីៗនេះវីដេអូខ្លីមួយនៅលើ TikTok ដែលបានថតអ្នកឡើងភ្នំដ៏វែងមួយជំហានម្តងៗ ឆ្លងកាត់ផ្លូវភ្នំព្រិល Everest ដ៏គ្រោះបំផុតនៅលើពិភពលោក បានទាក់ទាញអ្នកទស្សនាជាង ៣ លានដង ហើយកំពុងត្រូវបានចែកចាយពេញបណ្តាញសង្គម។

គួររំលឹកដែរថា កាលពីខែឧសភា ឆ្នាំ ២០១៩ ទិដ្ឋភាពនៃមនុស្សរាប់រយនាក់តម្រង់ជួរនៅលើផ្លូវលំក្រោមសីតុណ្ហភាពដក ៣០ ដឺក្រេ ដើម្បីរង់ចាំឡើងភ្នំអេវឺរ៉េសបានបណ្តាលឱ្យមានការកកស្ទះចរាចរណ៍យ៉ាងខ្លាំង ដែលនៅពេលនោះមានមនុស្សចំនួន ១១ នាក់ត្រូវបានស្លាប់ដោយសារការហត់នឿយ និងការខ្វះអុកស៊ីហ្សែន។
យោងតាមមូលដ្ឋានទិន្នន័យហិម៉ាឡៃ បានឱ្យដឹងថា ចំនួនអ្នកស្លាប់ពេលកំពុងឡើងភ្នំ Everest នៅឆ្នាំនេះ ក៏បានកើនលើសចំនួនមនុស្ស ១១នាក់ក្នុងឆ្នាំ ២០១៩ ។ គិតត្រឹមខែមិថុនា មានអ្នកស្លាប់ ១២ នាក់ និងបាត់ខ្លួន ៥ នាក់នៅលើភ្នំនេះផងដែរ។

ការកកស្ទះចរាចរណ៍នៅលើភ្នំអេវឺរេសកើតឡើងដោយសារមូលហេតុសំខាន់ពីរគឺទីមួយចំនួនអ្នកឡើងភ្នំកើនឡើងយ៉ាងខ្លាំង និងលក្ខខណ្ឌអាកាសធាតុមិនល្អ ដោយសារមនុស្សកាន់តែច្រើនការរង់ចាំនៃការឡើងភ្នំកាន់តែយូរ និងអ្នកឡើងភ្នំជាចំណូលថ្មីមិនសូវមានបទពិសោធន៍គ្រប់គ្រាន់ដើម្បីប្រឈមមុខនឹងហានិភ័យនៅលើភ្នំមរណៈនេះ។ ទីពីរគឺ ដោយសារបញ្ហានៃគ្រោះមហន្តរាយកាលពីឆ្នាំ ២០១៩ ដែលបានបណ្តាលឱ្យមនុស្ស ១១ នាក់បានបាត់បង់ជីវិត នៅពេលដែលពួកគេត្រូវជាប់គាំងរង់ចាំរហូតដល់ខ្វះអុកស៊ីហ្សែន ដោយសារអាកាសធាតុត្រជាក់ខ្លាំងពេករួមជាមួយនឹងព្រិល និងខ្យល់បក់ខ្លាំងផងដែរ។

លោក Bigyan Koirala មន្ត្រីក្រសួងទេសចរណ៍នៃប្រទេសនេប៉ាល់បាននិយាយថា ក្នុងរយៈពេលប្រាំខែដំបូងនៃឆ្នាំនេះ មនុស្សចំនួន ៤៧៨ នាក់ត្រូវបានអនុញ្ញាតឱ្យឡើងភ្នំ Everest ដែលកើនឡើងជាង ១០០ នាក់បើធៀបនឹងឆ្នាំមុន។ លោក Bigyan Koirala ក៏បាននិយាយទៀតថា ដើម្បីកាត់បន្ថយអត្រានៃការស្លាប់របស់មនុស្សនៅពេលកំពុងឡើងភ្នំ ខាងមន្ត្រីរបស់យើងនឹងផ្តល់អុកស៊ីសែនឱ្យបានគ្រប់គ្រាន់សម្រាប់អ្នកឡើងភ្នំ និងកាត់បន្ថយចំនួនមនុស្ស ដើម្បីការពារការកកស្ទះចរាចរណ៍យូរ៕ ប្រភព៖vnexpress

រដ្ឋធានីវ៉ាស៊ីនតោន៖ កប៉ាល់ដឹកអ្នកដំណើរដ៏ល្បីល្បាញរបស់ចក្រភពអង់គ្លេស ទីតានិក (Titanic) បានបុកផ្ទាំងទឹកកកលិច នៅក្នុងមហាសមុទ្រអាត្លង់ទិកខាងជើង ដោយបានសម្លាប់មនុស្ស ជាង១៥០០នាក់ ហើយឥឡូវនេះ មហាសេដ្ឋីជាច្រើននាក់ ធ្វើទេសចរណ៍តាមនាវាមុជទឹក ទៅលេងខ្មោចកប៉ាល់នោះ កំពុងតែបាត់ខ្លួន ធ្វើឲ្យអាជ្ញាធរសហរដ្ឋអាមរិក និង កាណាដា កំពុងតែពង្រីកនូវការរុករករបស់ខ្លួន ចូលនៅក្នុងទឹកជ្រៅ នៅឆ្នេរសមុទ្ររបស់កាណាដា។

សារព័ត៌មាន Alarabiya News បានចេញផ្សាយ នៅថ្ងៃពុធ ទី២១ ខែមិថុនា ថា កងឆ្មាំឆ្នេរសមុទ្ររបស់សហរដ្ឋអាមេរិក បានអះអាង កាលពីល្ងាច ថ្ងៃអង្គារ ថា អាជ្ញាធរកំពុងតែពង្រីកនូវការរុករករបស់ខ្លួន ចូលនៅក្នុងសមុទ្រទឹកជ្រៅ ដើម្បីស្វែងរកនាវាមុជទឹកដែលបានបាត់ ខណៈកំពុងតែដឹកអ្នកទេសចរ ជាមហាសេដ្ឋី ធ្វើដំណើរទៅទស្សនាខ្មោចកប៉ាល់ទីតានិក នៅឆ្នេរសមុទ្ររបស់កាណាដា។

លោកឧត្ដមនាវី ចន មោហ្គើរ (John Mauger) មេបញ្ជាការឆ្មាំសមុទ្រសហរដ្ឋអាមេរិក បានបញ្ជាក់ នៅក្នុងការផ្ដល់បទសម្ភាសន៍មួយ ដល់បណ្ដាញទូរទស្សន៍សហរដ្ឋអាមេរិក CNN ថា«យើងកំពុងតែបន្ដស្វែងរកនាវាមុជទឹក ដែលបានបាត់នោះ… ហើយយើងបានធ្វើការពេញមួយយប់ ជាមួយដៃគូរបស់យើង ស្វែងរកនៅលើផ្ទៃទឹក។ ប៉ុន្ដែឥឡូវនេះ យើងកំពុងតែពង្រីកនូវការរុករក នៅក្រោមផ្ទៃទឹក នៅក្នុងតំបន់នោះ»។

កងឆ្មាំឆ្នេរសមុទ្ររបស់សហរដ្ឋអាមេរិក បានបញ្ជាក់ ថា មនុស្សនៅក្នុងនាវាមុជទឹកដែលបានបាត់នោះ មានអ្នកបើកម្នាក់ និង អ្នកដំណើរ ចំនួន៤នាក់។ នាវាមុជទឹកនោះ មានសមត្ថភាពអាចមុជទឹក នៅក្នុងរយៈពេល៩៦ម៉ោង។ ប៉ុន្តែគេនៅតែមិនទាន់ច្បាស់ ថាតើនាវានោះ កំពុងតែស្ថិតនៅក្រោមទឹក ឬ ងើបឡើងមកលើផ្ទៃទឹក ហើយឥឡូវ គេនៅតែមិនទាន់អាចទំនាក់ទំនងបានដដែល។

កងទ័ពរបស់សហរដ្ឋអាមរិក និង កាណាដា បានបញ្ចេញនូវនាវា និង យន្ដហោះជាច្រើនគ្រឿង ស្វែងរកនាវាមុជទឹក ដែលបានបាត់ អស់រយៈពេលជាង១ថ្ងៃកន្លងមកនេះ។ កងយន្ដហោះ និង នាវារបស់សហរដ្ឋអាមរិក និង កាណាដា ទាំងនោះ ក៏កំពុងតែពង្រីកនូវការរុករក នៅក្នុងចម្ងាយ ប្រហែល ១ ៤៥០គីឡូម៉ែត្រ ហើយស្វែងរក នៅក្នុងជម្រៅទឹក រហូតដល់ ៣ ៩៦២ម៉ែត្រ។

លោកឧត្ដមនាវី ចន មោហ្គើរ មេបញ្ជាការឆ្មាំសមុទ្រសហរដ្ឋអាមេរិក បានបញ្ជាក់ ថា «យើងកំពុងតែដាក់ពង្រាយទ្រព្យសម្បត្តិទាំងអស់របស់យើង ដើម្បីធ្វើឲ្យប្រាកដ ថា យើងអាចកំណត់ទីតាំងនាវាមុជទឹកនោះ ហើយជួយសង្គ្រោះមនុស្ស នៅក្នុងនាវា។ ប៉ុន្ដែរហូតមកដល់ល្ងាចអង្គារ យើងនៅតែបន្តហោះហើរយន្តហោះ និង ផ្លាស់ទីនាវាបន្ថែមទៀត។ បន្ថែមពីលើនេះ ក្រុមមន្រ្ដីរបស់យើង កំពុងតែទាក់ទងទៅកាន់នាវាពាណិជ្ជកម្ម សុំឲ្យពួកគេជួយផងដែរ។

ក្រុមហ៊ុនឯកជន ធ្វើប្រតិបត្ដិការលើនាវាមុជទឹក ក៏បានបញ្ជាក់ នៅក្នុងសេចក្ដីថ្លែងការណ៍មួយ កាលពីថ្ងៃចន្ទ ថា ក្រុមហ៊ុន កំពុងតែប្រមែប្រមូលជម្រើសទាំងអស់ ជួយសង្គ្រោះ ដល់មនុស្ស នៅក្នុងនាវាមុជទឹក។

បើតាមបណ្ដាញផ្សព្វផ្សាយសង្គម បង្ហោះដោយសាច់ញាតិ បានឲ្យដឹង ថា លោក ហាមីស ហាឌីង (Hamish Harding) ជាមហាសេដ្ឋីជនជាតិអង់គ្លេស ក៏ស្ថិតក្នុងចំណោមអ្នកទេសចរ នៅក្នុងនាវាមុជទឹកដែលបានបាត់នោះដែរ។

ក្រុមគ្រួសាររបស់ជនរងគ្រោះ បានបញ្ជាក់ នៅក្នុងសេចក្ដីថ្លែងការណ៍មួយ ថា «លោក សាហ្សាដា ដាវូដ (Shahzada Dawood) ជាមហាសេដ្ឋី ជនជាតិប៉ាគីស្ថាន និង កូនប្រុសរបស់គាត់ គឺលោក ស៊ូឡេម៉ាន់ (Suleman) ក៏ស្ថិតក្នុងនាវាមុជទឹកដែលកំពុងបាត់នោះដែរ។ យើងខ្ញុំសូមថ្លែងអំណរគុណយ៉ាងជ្រាលជ្រៅ ចំពោះការព្រួយបារម្ភ ត្រូវបានបង្ហាញ ដោយសហការី និង មិត្តភក្តិរបស់យើង ហើយយើងចង់ស្នើសុំឱ្យអស់លោកទាំងអស់គ្នា អធិស្ឋាន និង បួងសួង សុំឲ្យពួកគេមានសុវត្ថិភាព»។

មន្រ្ដីឆ្មាំឆ្នេរសមុទ្ររបស់សហរដ្ឋអាមេរិក បានសរសេរ នៅលើបណ្ដាញសង្គម Twitter ថា នាវាមុជទឹកមួយគ្រឿង នៅលើផ្ទៃទឹក Polar Prince (ប៉ូឡាប្រាំងស៍) ហើយវាបានបាត់ទំនាក់ទំនងជាមួយនាវាមុជទឹក ឈ្មោះ Titan (ទីតាន) ប្រហែលមួយម៉ោង និង ៤៥នាទី ក្រោយពេលនាវានោះ បានចាប់ផ្តើមមុជទឹក កាលពីព្រឹកថ្ងៃអាទិត្យ ឆ្ពោះទៅរកកន្លែងលិចរបស់កប៉ាល់ទីតានិក (Titanic) ។

កូនប្រសាប្រុសរបស់លោក ហាឌីង មហាសេដ្ឋីជនជាតិអង់គ្លេស បានសរសេរ នៅលើបណ្ដាញសង្គមហ្វេសប៊ុក ថា «ឪពុកក្មេករបស់គាត់ បានបាត់ខ្លួន នៅក្នុងនាវាមុជទឹក ហើយគាត់សូមបួងសួង និង អធិស្ឋាន ឲ្យឪពុកមានសុវត្ថិភាព»។

បើតាមគេហទំព័ររបស់ OceanGate (អូសៀនហ្គេត) បានឲ្យដឹង ថា បេសកកម្ម ទៅកាន់កប៉ាល់ទីតានិក គឺមនុស្សម្នាក់ ត្រូវចំណាយលុយ ចំនួន ២៥០ ០០០ដុល្លារ ដោយចាប់ផ្ដើមចេញដំណើរពី St. John (សេនស៍ ចន) កោះញូវហ្វោនឡែនដ៍ (Newfoundland ) ដោយធ្វើដំណើរ នៅក្នុងចម្ងាយប្រហែល៦៤០គីឡូម៉ែត្រ ចូលទៅក្នុងមហាសមុទ្រអាត្លង់ទិក ឆ្ពោះទៅកាន់កន្លែងដែលកប៉ាល់ទីតានិកនោះបានលិច។

កប៉ាល់ដឹកអ្នកដំណើរដ៏ល្បីល្បាញរបស់ចក្រភពអង់គ្លេស Titanic បានលិច នៅក្នុងឆ្នាំ១៩១២ ក្នុងការធ្វើដំណើរ ជាលើកដំបូងរបស់ខ្លួន ក្រោយពេលវាបានបុកជាមួយនឹងផ្ទាំងទឹកកកដ៏ក្រាស់។ នៅក្នុងឧបទ្ទវហេតុនោះ បានសម្លាប់មនុស្ស ជាង ១ ៥០០នាក់ នៅក្នុងនាវា។ រឿងរ៉ាវទាំងនេះ ក៏ត្រូវបានអ្នកនិពន្ធ លើកយកមកប្រឌិត ធ្វើជាខ្សែភាពយន្តភាគ រឿង «Titanic» នៅឆ្នាំ១៩៩៧ ហើយទទួលបានការទស្សនាយ៉ាងច្រើនផងដែរ៕