ប្រទេសថៃ ៖ ទំព័រហ្វេសប៊ុករបស់ថៃឈ្មោះ TOURLONG បានចុះផ្សាយថា ជនជាតិថៃបានខឹងសម្បារជាខ្លាំង ដោយសារជនជាតិវៀតណាមបានចូលមកប្រកបមុខរបរដែលប្រទេសថៃហាមឃាត់ ។ ជនជាតិវៀតណាមទាំងនេះបានលក់ផ្លែឈើតាមរទេះរុញ និងខ្លះទៀតរែកអម្រែកលក់របស់របរផ្សេងៗនៅកណ្តាលទីក្រុងបាងកក បរិវេណផ្លូវសុខុមវីត (Sukhumvit Road) ។

ទំព័រហ្វេសប៊ុក TOURLONG និយាយថា ប្រទេសទាំងអស់មិនអនុញ្ញាតឱ្យជនបរទេសចូលមករកស៊ីខុសច្បាប់នៅប្រទេសរបស់ខ្លួនទេ ព្រោះមុខរបរទាំងនេះសម្រាប់តែពលរដ្ឋក្នុងប្រទេសប៉ុណ្ណោះ ។ កន្លងមក គេបានឃើញពលរដ្ឋមកពីបណ្តាប្រទេសជិតខាងថៃ ជាច្រើននាក់ចូលមកប្រកបមុខរបរដែលថៃហាមឃាត់ ។ ពួកគេបានប្រកបមុខរបរនេះដោយបើកចំហរ ជាពិសេស ការរែកលក់របស់របរនៅតាមដងផ្លូវ ខណៈអាជ្ញាធរថៃមិនបានចាប់ខ្លួន ឬដាក់ពិន័យអ្វីទេ ។ ហេតុនេះ ទើបមានជនបរទេសជាច្រើននាក់បានមកដណ្តើមការងារពីពលរដ្ឋថៃ ។

ទំព័រហ្វេសប៊ុកនេះបន្តថា កាលពីថ្ងៃទី២០ ខែមិថុនា កន្លងមក មានទំព័រហ្វេសប៊ុកមួយរបស់ថៃបានបង្ហោះរូបភាពបុរសវៀតណាមម្នាក់កំពុងលក់ផ្លែឈើតាមរទេះរុញនៅផ្លូវសុខុមវីត ។ ទំព័រហ្វេសប៊ុកថៃនេះសរសេរថា ៖ «ក្រៅពីមានអ្នកសុំទានខ្មែរនៅពាសពេញទីក្រុងហើយ រទេះលក់ផ្លែឈើវៀតណាម ក៏សម្បូរពេញទីក្រុងផងដែរ ។ ពួកគេបានមករកស៊ីនៅតំបន់ទេសចរណ៍ប្រទេសថៃ ប៉ុន្តែពលរដ្ឋថៃវិញមិនអាចលក់ដូរនៅតំបន់នេះទេ» ។

ទំព័រហ្វេសប៊ុកនេះបន្ថែមថា នៅពេលទំព័រហ្វេសប៊ុករបស់ថៃខាងលើបានបង្ហោះរូបភាពជនជាតិវៀតណាមលក់ផ្លែឈើក្នុងបណ្តាញសង្គម ធ្វើឱ្យអ្នកលេងបណ្តាញសង្គមថៃជាច្រើននាក់សម្តែងការមិនពេញចិត្ត ក្នុងនោះជនជាតិថៃម្នាក់និយាយថា ៖ «ពួកគេនិយាយភាសាថៃបាន ហើយគ្រប់១ខែ ពួកគេនឹងជិះយន្តហោះត្រឡប់ទៅប្រទេសខ្លួនវិញ ហើយ២-៣ថ្ងៃក្រោយ ក៏ត្រឡប់មកថៃទៀត ។ ពេលខ្លះ ពួកគេចេញ-ចូលតាមព្រំដែនផ្លូវគោកជាប់ប្រទេសជិតខាងថៃ ហើយយូរៗត្រូវបានប៉ូលិសអន្តោប្រវេសន៍ថៃបដិសេធ ឬបញ្ជូនពួកគេឱ្យត្រឡប់ទៅប្រទេសវិញ» ។ ជនជាតិថៃម្នាក់ទៀតថា ៖ «ពេលសួរអ្នកមួយចំនួនថា តើចេញ-ចូលប្រទេសថៃរៀងរាល់ខែបែបនេះ ប៉ូលិសអន្តោប្រវេសន៍ថៃមិនបដិសេធទេឬ ? ពួកគេប្រាប់ថា អ្នកខ្លះមិនចំណាយប្រាក់ ទើបចូលថៃអត់បាន» ។ ជនជាតិថៃម្នាក់ទៀតថា ៖ «ជាទូទៅ វៀតណាមធ្វើជាង, មីយ៉ាន់ម៉ាធ្វើរោងចក្រ និងធ្វើសំណង់, ឡាវធ្វើសំណង់, ឥណ្ឌាលក់ក្រណាត់, ខ្មែរសុំទាន ចំណែកជនជាតិថៃធ្វើការនៅការិយាល័យ និងបើករថយន្ត» ។

ជនជាតិថៃម្នាក់ទៀតថា ៖ «អ្នកឈរលក់ប្រហិតចៀននៅមុខហាងលក់ទំនិញ 7-Eleven នៅក្បែរ Terminal 21 មិនមែនជាជនជាតិថៃទេ» ។ ជនជាតិថៃម្នាក់ទៀតថា ៖ «នៅប្រាទូណាមមានជនបរទេសលក់ដូររយៈពេល១០ឆ្នាំហើយ ដូចជា មីយ៉ាន់ម៉ា កម្ពុជា និងឡាវ» ។ ជនជាតិថៃម្នាក់ទៀតថា ៖ «កុំសុបិនថា ជនបរទេសច្រើនជាតិសាសន៍ទាំងនេះនឹងអស់ពីប្រទេសថៃឱ្យសោះ ហើយប្រទេសថៃមើលរំលងរឿងនេះ ដោយសារមានការប្រមូលប្រាក់ប្រចាំថ្ងៃ ឬប្រចាំខែ» ។ ជនជាតិថៃម្នាក់ទៀតថា ៖ «ខ្ញុំធ្វើជាកម្មករសំណង់នៅម្តុំផាយ៉ាថៃ ហើយប៉ូលិសថៃបានមកឆែករកមើលពលករបរទេស ពេលនោះ មានរទេះលក់ការ៉ែមដូងរបស់ជនជាតិវៀតណាម ប៉ុន្តែគ្រាន់តែទូរស័ព្ទទៅប៉ូលិសភ្លាម ប៉ូលិសក៏ដោះលែងតែម្តង» ។ ជនជាតិថៃម្នាក់ទៀតថា ៖ «រ៉ឺម៉កម៉ូតូលក់ប្រហិតចៀននៅទូទាំងទីក្រុងបាងកកប្រមាណជាង៧០% គឺជាជនជាតិវៀតណាមទាំងអស់ ហើយនៅមានរទេះលក់ផ្លែឈើជាច្រើនទៀតនៅម្តុំឡាតប្រាវ ។ ពួកគេនិយាយថៃបានច្បាស់ រហូតដល់គិតថា ជាជនជាតិថៃ» ។

ទំព័រហ្វេសប៊ុក TOURLONG បញ្ជាក់ថា នេះជាការបញ្ចេញមតិរបស់ពលរដ្ឋថៃមួយចំនួនប៉ុណ្ណោះ ដែលខាង TOURLONG យកមកចុះផ្សាយ ហើយបើបងប្អូនថៃប្រទះឃើញជនជាតិវៀតណាមមករកស៊ីនៅប្រទេសថៃ បងប្អូនអាចជូនដំណឹង ឬបញ្ចេញយោបល់ក្នុងបណ្តាញសង្គមបាន ៕

ប្រភព ៖ TOURLONG

តើលោកអ្នកដឹងទេសត្វណាដែលមានមាឌធំជាងគេបង្អស់នៅលើភពផែនដី? ច្បាស់ណាស់ ប្រាកដជាអ្នកគិតថាជាសត្វដំរី ឬសត្វអូដ្ឋហើយ ប៉ុន្តែវាមិនដូច្នោះទេ សត្វដែលធំជាងគេបង្អស់នៅលើភពផែនដីនោះគឺសត្វត្រីបាឡែនខៀវ។

ត្រីបាឡែនខៀវ ច្រើនតែរស់នៅក្នុងមហាសមុទ្រអង់តាក់ទិក គឺជាសត្វដែលមានទំហំធំជាងគេបំផុត ជាមួយនឹងទម្ងន់ប្រហែល ១៨០ តោន និងមានប្រវែងខ្លួនរហូតដល់ ៣០ ម៉ែត្រឯណោះ។ ត្រឹមតែអណ្តាតរបស់ពពួកត្រីនេះ អាចមានទម្ងន់ស្មើទៅនឹងសត្វដំរីមួយក្បាលទៅហើយ ចំណែកឯបេះដូងរបស់វាវិញគឺធ្ងន់ស្មើរថយន្តមួយគ្រឿង។

សត្វត្រីដ៏ធំក្នុងសមុទ្រនេះច្រើនតែស៊ីសត្វតូចៗជាអាហារ ជាពិសេសគឺពពួកប្លង់តុងដែលមានរូបរាងដូចសត្វបង្គារហៅថា ក្រៀល (Krill)។ ត្រីបាឡែនខៀវមួយក្បាល អាចស៊ីសត្វក្រៀលបានចំនួន ៣៦,០០០គីឡូក្រាមក្នុងមួយថ្ងៃ ដោយវាអាចហែលក្នុងល្បឿនចន្លោះពី ៨-៣០គីឡូម៉ែត្រក្នុងមួយម៉ោង។ ពួកវាភាគច្រើនតែងស្វែងរកចំណីរបស់ខ្លួន តាមរយៈការមុជចូលទៅដល់ជម្រៅប្រហែលជាង ៥០០ ម៉ែត្រ។ បើទោះបីជាត្រីបាឡែនខៀវនេះ ជាសត្វប្រមាញ់ចំណីអាហារ នៅក្នុងទឹកជ្រៅក៏ដោយ ក៏ពួកវាត្រូវតែងើបឡើងមកលើផ្ទៃសមុទ្រដើម្បីដកដង្ហើមជានិច្ច ដោយសារជាថនិកសត្វ។

រីឯកូនត្រីបាឡែនខៀវវិញ ពេលកើតមកអាចមានទម្ងន់រហូតដល់ ៣ តោន និងមានប្រវែង ៨ ម៉ែត្រ។ បាឡែនខៀវដែលទើបនឹងកើត តែងត្រូវមេរបស់វា ជួយនាំឡើងទៅលើផ្ទៃទឹកដើម្បីដកដង្ហើមជាលើកដំបូង។ កូនត្រីបាឡែនខៀវផឹកទឹកដោះច្រើនជាង ៦០០ លីត្រក្នុងមួយថ្ងៃ ហើយកើនទម្ងន់ខ្ទង់ ៩០ គីឡូក្រាមជារៀងរាល់ថ្ងៃ សម្រាប់មួយឆ្នាំដំបូងរបស់វា។ ត្រីបាឡែនខៀវជួនកាលហែលជាក្រុមតូចៗ ប៉ុន្តែភាគច្រើនពួកវាធ្វើដំណើរតែឯងៗឬជាគូៗ។ ពួកវាធ្វើការទាក់ទងគ្នាដោយប្រើប្រាស់រលក សំឡេងផ្សេងៗ ខណៈក្នុងស្ថានភាពល្អធម្មតា ត្រីបាឡែនខៀវអាចស្តាប់លឺគ្នានៅចម្ងាយរហូតដល់១,៦០០ គីឡូម៉ែត្រ។
ទោះជាយ៉ាងណាក៏ដោយ ត្រីបាឡែនខៀវត្រូវបានគេដឹងថាពួកវាពេលខ្លះរងការវាយប្រហារដោយត្រីឆ្លាម និងត្រីបាឡែនពិឃាត (Killer Whale) ហើយជាច្រើនក្បាលបានរងរបួសឬក៏ងាប់ជារៀងរាល់ឆ្នាំ ដោយសារតែត្រូវកប៉ាល់ធំៗបុក៕

ប្រទេសកូរ៉េខាងត្បូង ៖ កងទ័ពកូរ៉េខាងត្បូងបានលើកឡើងថា ពួកគេបានប្រមូលផ្នែកខ្លះរបស់គ្រាប់រ៉ុក្កែតដែលប្រើសម្រាប់បង្ហោះផ្កាយរណបចារកម្មរបស់កូរ៉េខាងជើង ។ វាបានផ្ទុះ និងធ្លាក់នៅក្នុងសមុទ្រ កាលពីថ្ងៃទី២១ ខែឧសភា កន្លងមក ហើយពួកគេបានប្រមូលកម្ទេចទាំងនេះអស់រយៈពេល២សប្តាហ៍ ។

អ្នកជំនាញមកពីសហរដ្ឋអាមេរិក និងកូរ៉េខាងត្បូងបានវិភាគកម្ទេចរបស់ផ្កាយរណបរកឃើញថា ផ្កាយរណបចារកម្មរបស់កូរ៉េខាងជើងនេះគ្មានប្រយោជន៍សម្រាប់កងទ័ពទេ ព្រោះផ្កាយរណបអាចតាមដានចំណុចគោលដៅក្នុងកម្រិតទាបបំផុត ហើយវាមិនសាកសមសម្រាប់ប្រើប្រាស់ក្នុងផ្នែកកងទ័ព សូម្បីតែបន្តិច ។ មុននេះ ប្រទេសកូរ៉េខាងជើងទទួលស្គាល់ថា ខ្លួនបានបរាជ័យក្នុងការបង្ហោះផ្កាយរណបចារកម្ម ហើយវាជាការបរាជ័យដ៏ធំមួយ ។ កូរ៉េខាងជើងប្រកាសថា នឹងបង្ហោះផ្កាយរណបឱ្យបានជោគជ័យ ។

ការបង្ហោះផ្កាយរណបរបស់កូរ៉េខាងជើង កាលពីថ្ងៃទី៣១ ខែឧសភា ឆ្នាំ២០២៣ កន្លងមក ត្រូវបានប្រទេសកូរ៉េខាងត្បូង ជប៉ុន និងបណ្តាប្រទេសលោកខាងលិចថ្កោលទោស ដោយពួកគេលើកឡើងថា ការបង្ហោះផ្កាយរណបរបស់កូរ៉េខាងជើង គឺជាការរំលោភច្បាប់របស់ក្រុមប្រឹក្សាសន្តិសុខអង្គការសហប្រជាជាតិ ដែលបានហាមកូរ៉េខាងជើង មិនឱ្យប្រើប្រាស់បច្ចេកវិទ្យាមីស៊ីល ។ ទោះយ៉ាងណា កូរ៉េខាងជើងបានបដិសេធនឹងការចោទប្រកាន់នេះ ព្រមទាំងបញ្ជាក់ថា ប្រទេសលោកខាងលិចរំលោភសិទ្ធិកូរ៉េខាងជើងក្នុងការការពារខ្លួន និងការស្រាវជ្រាវអវកាស ៕ ប្រភព ៖ Mono News

ជាធម្មតា មនុស្សភាគច្រើនតែងធ្វើការចំនួន ៨ ម៉ោងក្នុងមួយថ្ងៃ។ ប៉ុន្តែដោយសារបញ្ហាបន្ទុកការងារ ឬកត្តាសេដ្ឋកិច្ច ទើបធ្វើឱ្យមនុស្សមួយចំនួនសម្រេចចិត្តធ្វើការថែមម៉ោង ដោយមិនមានពេលវេលាគ្រប់គ្រាន់ ដើម្បីថែរក្សាសុខភាពឱ្យបានត្រឹមត្រូវ។ ដូច្នេះហើយខាងក្រោមនេះគឺជា បញ្ហាសុខភាព ៥ យ៉ាងរបស់ “អ្នកធ្វើការ”ដែលគួរប្រុងប្រយ័ត្ន៖

១.រោគសញ្ញាការិយាល័យ៖ មនុស្សជាង ៦០% នៃកម្មករ ជាពិសេសគឺបុគ្គលិកការិយាល័យ ច្រើនតែមានសភាពរឹងក ខ្នង ស្មា កដៃ ម្រាមដៃ…ជាដើម ដោយសារត្រូវអង្គុយនៅមុខកុំព្យូទ័រយូរដោយមិនធ្វើចលនារាងកាយ។ សូម្បីតែពេលសម្រាកក៏អង្គុយមើលអេក្រង់ទូរសព្ទដែរ។ ដូចនេះប្រសិនបើទុកចោលយូរនឹងបណ្តាលឱ្យរលាកសាច់ដុំ រលាកសរសៃពួរ កោងខ្នង ឈឺចុកចាប់ត្រង់កមិនបាត់ ខ្វិន និងឈឺក្បាលរ៉ាំរ៉ៃ ជាដើម។
ដំណោះស្រាយគឺផ្លាស់ប្តូរអាកប្បកិរិយាដោយការគេងតិចតួច និងហាត់ប្រាណខ្លះៗដើម្បីសម្រួលឥរិយាបទនៅពេលដែលសម្រាកពីការងារ។

២.ប្រឈមនឹងជំងឺបាក់ទឹកចិត្ត៖ ជំងឺបាក់ទឹកចិត្តតែងតែគំរាមកំហែងដល់អាយុជីវិតមនុស្សជាពិសេសក្នុងវ័យធ្វើការ។ មូលហេតុនៃ ការធ្លាក់ទឹកចិត្ត គឺបណ្តាលមកពីកត្តាជាច្រើនទាំងតំណពូជ សារធាតុគីមីក្នុងខួរក្បាល និងចរិតលក្ខណៈផ្ទាល់ខ្លួន…។ ដូច្នេះដើម្បីបំបាត់រោគសញ្ញាទាំងអស់នេះអ្នកត្រូវទៅជួបគ្រូពេទ្យជំនាញ ដើម្បីដោះស្រាយបញ្ហាផ្លូវចិត្ត។

៣.សម្ពាធឈាមឡើងខ្ពស់៖ អ្នកធ្វើការភាគច្រើនតែងមានភាពតានតឹង ស្មុគស្មាញ រហូតដល់មានជំងឺលើសឈាម ឬឡើងសម្ពាធឈាម។ ដូចនេះដំណោះស្រាយគឺត្រូវបរិភោគអាហារដែលសម្បូរវីតាមីន ទទួលទានផ្លែឈើឱ្យបានច្រើន ជៀសវាងគ្រឿងស្រវឹង បារី អាហារដែលផ្អែម និងប្រៃពេក។

៤.ប្រឈមនឹងបញ្ហាក្រពះ៖ អ្នកធ្វើការភាគច្រើនតែងបរិភោគអាហាររហ័សដែលមិនសូវមានគុណភាព និងតម្លៃថោក ដែលធ្វើឱ្យក្រពះរបស់យើងឈឺ ពិបាកបន្ទោរបង់ រហូតដល់ រលាកក្រពះ ដំបៅក្រពះ ឬការស្ទះក្រពះជាដើម។ ដំណោះស្រាយនោះគឺអ្នកត្រូវកាត់បន្ថយអាហារដែលមានជាតិ fermented អាហារហឹរ, អាហារខ្លាញ់, អាហារចៀន, ឬភេសជ្ជៈផ្អែម…ជាដើម។

៥.ប្រឈមនឹងការបាក់សម្រស់៖ ពិតណាស់អ្នកធ្វើការភាគច្រើនតែងតែមិនសូវមានពេលវេលាគ្រប់គ្រាន់សម្រាប់ការថែរក្សាសម្រស់ ដែលធ្វើឱ្យយើងគិតច្រើន គេងមិនលក់ សម្រស់ធ្លាក់ចុះ សុខភាពចុះខ្សោយ ឡើងគីឡូ…។ ដំណោះស្រាយ អ្នកគួរតែចំណាយពេលវេលាខ្លះដើម្បីខ្លួនឯង ស្រូបយកខ្យល់បរិសុទ្ធ បរិយាកាសធម្មជាតិ ដើរកំសាន្តបំបាត់ស្ត្រស គិតរឿងល្អៗ ឬទទួលទានអាហារឆ្ងាញ់ៗ…ជាដើម៕ ប្រភព៖sanook

កាលពីថ្ងៃទី៤ ខែកក្កដា លោក Petteri Thalas អគ្គលេខាធិការអង្គការឧតុនិយមពិភពលោក (World Meteorological Organization) ប្រកាសថា បាតុភូតអេលនីណូ (El Nino) បានចាប់ផ្តើមហើយ ។ វានឹងធ្វើឱ្យសីតុណ្ហភាពកើនឡើងខ្ពស់ និងអាកាសធាតុក្តៅខ្លាំងនៅតំបន់ជាច្រើនលើពិភពលោក និងក្នុងមហាសមុទ្រ ។

ការប្រកាសលើកនេះ គឺជាការជូនដំណឹងទៅកាន់ប្រទេសនានាលើពិភពលោក ឱ្យត្រៀមខ្លួនទប់ស្កាត់ផលប៉ះពាល់ចំពោះសុខភាព ប្រព័ន្ធអេកូឡូស៊ី និងសេដ្ឋកិច្ច ។ ក្រៅពីនេះ ក៏ដើម្បីរក្សាជីវិត និងការរស់នៅរបស់ពលរដ្ឋផងដែរ ដោយរដ្ឋាភិបាលប្រទេសនានាត្រូវដាស់តឿនពលរដ្ឋជាមុន និងត្រៀមទប់ស្កាត់អាកាសធាតុអាក្រក់នៅឆ្នាំ២០២៣ ។

នៅពេលកើតបាតុភូតអេលនីណូ គឺសីតុណ្ហភាពនៅមហាសមុទ្រប៉ាស៊ីហ្វិកខាងកើតតំបន់ត្រូពិច នឹងកើនឡើង០,៥អង្សារសេបន្ថែមទៀតពីមធ្យមភាគរយៈពេលវែង ។ បាតុភូតនេះមានរយៈពេលចាប់ពី៩ខែ ទៅ១២ខែ ហើយវាកើតឡើងរៀងរាល់២ឆ្នាំ ទៅ៧ឆ្នាំ ។

អង្គការឧតុនិយមពិភពលោកដាស់តឿនថា បាតុភូតអេលនីណូលើកដំបូងក្នុងរយៈពេល៧ឆ្នាំនេះ រួមបញ្ចូលទាំងទង្វើរបស់មនុស្សដែលធ្វើឱ្យពិភពលោកក្តៅ ដោយសារការប្រើប្រាស់ប្រេងឥន្ធនៈហ្វូស៊ីល ហើយវានឹងធ្វើឱ្យឆ្នាំ២០២៣ និងឆ្នាំ២០២៤ គឺជាឆ្នាំក្តៅបំផុត ។ អង្គការនេះបញ្ជាក់ថា នឹងមានឱកាសច្រើនដល់៩០% ដែលអាចកើតបាតុភូតអេលនីណូជាបន្តបន្ទាប់ក្នុងឆមាសទី២ ឆ្នាំ២០២៣ ។ ការកើនឡើងនៃសីតុណ្ហភាពសមុទ្រ និងបាតុភូតអេលនីណូ នឹងធ្វើឱ្យមានភ្លៀងធ្លាក់ច្រើននៅភាគខាងត្បូងរបស់អាមេរិកខាងត្បូង, អាមេរិកកណ្តាល, ភាគខាងត្បូងសហរដ្ឋអាមេរិក និងទ្វីបអាហ្វ្រិក ។

បាតុភូតនេះអាចបណ្តាលឱ្យកើតគ្រោះរាំងស្ងួតធ្ងន់ធ្ងរ រលកកំដៅ និងភ្លើងឆេះព្រៃនៅប្រទេសអូស្ត្រាលី, ឥណ្ឌូណេស៊ី, តំបន់ខ្លះនៃអាស៊ីខាងត្បូង, អាមេរិកកណ្តាល និងផ្នែកខាងជើងនៃអាមេរិកខាងត្បូង ។ ជាមួយគ្នានេះ វានឹងបង្កខ្យល់ព្យុះស៊ីក្លូននៅមហាសមុទ្រប៉ាស៊ីហ្វិកផងដែរ ៕ ប្រភព ៖ Nation World News

ប្រទេសថៃ ៖ ការធ្វើសាច់ក្រកឦសាន គឺជាមុខរបរមួយដែលបង្កើតប្រាក់ចំណូលអស់រយៈពេល៣០ឆ្នាំហើយ សម្រាប់ពលរដ្ឋចាស់ៗរស់នៅស្រុកស៊ីថូរ៉ាភូមិ ខេត្តសុរិន្ទ ប្រទេសថៃ ។ អ្នកស្រុកនៅទីនេះបានចេះចាំរូបមន្តធ្វើសាច់ក្រកឦសានឱ្យមានរសជាតិឆ្ងាញ់ និងលក់ចែកចាយនៅខេត្តសុរិន្ទផង និងលក់នៅតាមខេត្តផ្សេងៗផង ។

លោកយាយ វ៉ាន់ថង ឌួងអ៊ីន អាយុ៧៥ឆ្នាំ និយាយថា គាត់បានអង្គុយចងសាច់ក្រកអស់ប្រមាណ១០ឆ្នាំហើយ ដោយធ្វើការ២ថ្ងៃ ទៅ៣ថ្ងៃក្នុង១សប្តាហ៍ ។ ក្នុង១ថ្ងៃៗ គាត់អាចចងសាច់ក្រកបានចំនួន២.០០០ដុំ ហើយប្រាក់ចំណូលដែលទទួលបាននោះ គាត់សន្សំទុកសម្រាប់ព្យាបាលជំងឺប្រចាំកាយ ។

លោកយាយប្រាប់ថា ៖ «ពេលបានប្រាក់មក ខ្ញុំទុកទិញអង្ករហូបខ្លះ និងទិញម្ហូបអាហារប្រចាំថ្ងៃខ្លះ ហើយសល់ពីនេះ ទុកព្យាបាលជំងឺ ។ ក្នុង១ថ្ងៃ ខ្ញុំទទួលបានប្រាក់ចំនួន២០០បាត ហើយថ្ងៃខ្លះទៀតបានជាង១០០បាត គឺអាស្រ័យលើការធ្វើច្រើន ឬតិច ។ ប៉ុន្តែការងារនេះក៏នឿយហត់ដែរ ពីព្រោះខ្ញុំមានអាយុច្រើនហើយ» ។

ចំណែកពលរដ្ឋវ័យចំណាស់ខ្លះទៀតបានធ្វើសាច់ក្រក និងលក់ដោយខ្លួនឯងនៅតាមតំបន់ផ្សេងៗ ឬនៅតាមពិធីបុណ្យ ។ ពួកគាត់ចាប់ផ្តើមលក់សាច់ក្រកចាប់ពីពេល រសៀលរហូតដល់ព្រលប់ ក្នុងនោះសាច់ក្រក១ដុំ (តូច) មានតម្លៃចាប់ពី១បាត ទៅ២បាតប៉ុណ្ណោះ ។

អ៊ំប្រុសម្នាក់លក់សាច់ក្រកនៅតាមភូមិនិយាយថា ៖ «ខ្ញុំបានជិះម៉ូតូលក់សាច់ក្រកនៅតាមភូមិអស់ជាង២០ឆ្នាំ ហើយក្នុងមួយថ្ងៃៗ ខ្ញុំអាចរកប្រាក់បានចំនួន៣០០បាតដែរ ។ កាលពីមុន ខ្ញុំលក់សាច់ក្រកដាច់ជាងនេះ ប៉ុន្តែបច្ចុប្បន្ន មានអ្នកលក់ច្រើនគ្នា» ។

ប្រធានក្រុមផលិតសាច់ក្រកឦសានប្រចាំខេត្តសុរិន្ទ លោក ថាវីរ៉ាត់ សាណាមថង លើកឡើងថា ៖ «ការផលិតសាច់ក្រកនៅខេត្តសុរិន្ទបានលក់ចែកចាយទៅតាមខេត្តជាច្រើន និងបែងចែកតំបន់រៀងៗខ្លួន ដើម្បីកុំឱ្យពួកគេលក់ក្នុងតំបន់ដូចគ្នា ។ ការលក់សាច់ក្រកក្នុង១ឆ្នាំៗទទួលបានប្រាក់ច្រើនគួរសមអាចជួយគ្រួសារបាន ហើយក្នុងឋានៈខ្ញុំជាប្រធានក្រុម ខ្ញុំបានព្យាយាមសុំចុះឈ្មោះសហគ្រាស» ។

បច្ចុប្បន្ន មានអ្នកភូមិប្រមាណ១០០នាក់បានលក់សាច់ក្រកតាមម៉ូតូ ក្នុងនោះពួកគេបានលក់នៅខេត្តសុរិន្ទ និងខេត្តផ្សេងទៀតដូចជា បុរីរាំ ស៊ីសាកេត រ៉យអេត ឆាក់ឈើងសៅ និងសមុទ្រប្រាកាន ។ អ្នកភូមិ៨០% ក្នុងចំណោមអ្នកភូមិទាំងអស់ បានរកប្រាក់ចំណូលពីការលក់សាច់ក្រកឦសានចូលសហគមន៍ គឺជាមធ្យមចំនួន១៥លានបាតក្នុង១ឆ្នាំ ៕ ប្រភព ៖ Thai PBS

សហរដ្ឋអាមេរិក៖ អគារបោះពុម្ព 3D ដ៏ធំបំផុតរបស់ពិភពលោក ដែលមានទំហំជិត ៩៤០ ហ្វីតការ៉េនៅរដ្ឋផ្លរីដាត្រូវបានសាងសង់ជិតរួចហើយ ដែលវាមានគុណសម្បត្តិអាចទប់ទល់នឹងលក្ខខណ្ឌអាកាសធាតុខ្លាំងដូចជាការឡើងកំដៅខ្លាំង និងព្យុះភ្លៀងផងដែរ។

យោងតាមប្រភពព័ត៌មាន New Atlas កាលពីថ្ងៃទី ៤ ខែកក្កដា បានឱ្យដឹងថា ជាមួយនឹងគម្រោងអគារទីក្រុងចំនួន ១០០ នៅ Austin រដ្ឋ Texas និងបរិស្ថាន Mars របស់ NASA ស្ថាបត្យកម្មបោះពុម្ព 3D កំពុងមានការកើនឡើងយ៉ាងខ្លាំងនៅក្នុងសហរដ្ឋអាមេរិក។ ព្រឹត្តិការណ៍ដ៏សំខាន់មួយទៀតគឺ Printed Farms ដែលជាអគារបោះពុម្ព 3D ដ៏ធំបំផុតរបស់ពិភពលោកហៀបនឹងបញ្ចប់។

អគារបោះពុម្ព 3D Printed Farms មានបណ្តោយប្រវែង ៤៧ម៉ែត្រ ទទឹង ២៥ម៉ែត្រ និងកម្ពស់ ៤ម៉ែត្រ។ ដើម្បីសាងសង់អាគារ Printed Farms នេះបាន យើងត្រូវប្រើម៉ាស៊ីនព្រីន BOD2 3D របស់ក្រុមហ៊ុន COBOD ដែលជាម៉ាស៊ីនបង្កើតផ្ទះបោះពុម្ព 3D ពីរជាន់ដំបូងគេនៅអឺរ៉ុប។ ស្រដៀងនឹងគម្រោងបោះពុម្ព 3D ផ្សេងទៀតដែរ ដំណើរការសាងសង់ពាក់ព័ន្ធនឹងម៉ាស៊ីនរ៉ូបូតដ៏ទំនើប ដែលបាញ់ល្បាយដូចស៊ីម៉ងត៍ចេញពីក្បាលម៉ាស៊ីន បង្កើតជាជញ្ជាំងក្នុងស្រទាប់ជាច្រើន។ ម៉ាស៊ីនព្រីនមិនមានទំហំធំល្មមសម្រាប់សាងសង់លំនឹងទាំងមូលក្នុងពេលតែមួយនោះទេ ផ្ទុយទៅវិញវាត្រូវបានបោះពុម្ពតាមតំបន់ ដោយចាប់ផ្តើមពីផ្នែកម្ខាងនៃអគារ និងបញ្ចប់វិញដោយផ្នែកកណ្តាល។

នៅពេលដែលការបោះពុម្ព 3D ត្រូវបានបញ្ចប់ អ្នកសាងសង់បានដំឡើងដំបូល បង្អួច និងទ្វារ អមដោយឧបករណ៍អគ្គិសនី និងបរិក្ខារជាច្រើនទៀត។ អគារនេះត្រូវបានរចនាឡើងដោយគិតពីលក្ខខណ្ឌអាកាសធាតុក្នុងតំបន់ ដូច្នេះវាអាចទប់ទល់នឹងកំដៅខ្លាំង រួមជាមួយខ្យល់បក់ខ្លាំង និងជាពិសេសនោះវាអាចទប់ទល់នឹងព្យុះត្រូពិចបានទៀតផង។ ភាពបត់បែន និងអត្ថប្រយោជន៍នៃការបោះពុម្ព 3D ក៏ត្រូវបានឆ្លុះបញ្ចាំងនៅក្នុងជញ្ជាំងអគារផងដែរ ជាមួយនឹងរន្ធខ្យល់ដើម្បីធ្វើឱ្យអគារត្រជាក់ដោយធម្មជាតិ ៕ ប្រភព៖vnexpres