ប្រទេសថៃ ៖ លោក Pita Limjaroenrat មេដឹកនាំគណបក្សកាវក្លៃ និងជាបេក្ខជននាយករដ្ឋមន្ត្រីប្រទេសថៃ បានបង្ហោះវីដេអូមួយក្នុងបណ្តាញសង្គមថា បើលោកបានធ្វើអស់ពីសមត្ថភាពហើយ ប៉ុន្តែគ្មានឱកាស គឺលោកនឹងបើកផ្លូវឱ្យគណបក្សភឿថៃដឹកនាំបង្កើតរដ្ឋាភិបាលថ្មី ។ ប៉ុន្តែលោក លោក Pita លើកឡើងថា យើងនឹងមិនព្រមចុះចាញ់ឡើយ ។

លោក Pita បាននិយាយក្នុងវីដេអូថា សួស្តី អ្នកទាំងអស់គ្នា ជាដំបូង ខ្ញុំសូមអរគុណដល់សមាជិករដ្ឋសភាទាំង៣២៤សំឡេង ជាពិសេស សមាជិកព្រឹទ្ធសភាចំនួន១៣រូប ដែលបានបោះឆ្នោតគាំទ្រខ្ញុំ Pita Limjaroenrat ឱ្យធ្វើជានាយករដ្ឋមន្ត្រី ។ ខ្ញុំដឹងច្បាស់ថា សមាជិកព្រឹទ្ធសភាជាច្រើនរូបបានប្រឈមនឹងការដាក់សម្ពាធខ្លាំងក្លាក្នុងការសម្រេចចិត្តលើកនេះ ។ ចំណុចសំខាន់បំផុត ខ្ញុំសូមអរគុណកម្លាំងចិត្ត ការគាំទ្រពីពលរដ្ឋទាំងអស់ ប៉ុន្តែសូមអភ័យទោសអ្នកទាំងអស់ផង ដែលយើងមិនទាន់ទទួលបានជោគជ័យ ។

ទោះយ៉ាងណា ក្នុងឋានៈគណបក្សនយោបាយដែលទទួលបានសំឡេងឆ្នោតច្រើនលំដាប់ទី១ ក្នុងការបោះឆ្នោត គណបក្សកាវក្លៃមានភារកិច្ចត្រូវទទួលខុសត្រូវចំពោះពលរដ្ឋ គឺការបង្កើតរដ្ឋាភិបាលឱ្យបាន ។ យើងព្យាយាមធ្វើគ្រប់វិធីសាស្ត្រតាមលទ្ធិប្រជាធិបតេយ្យ ដើម្បីឱ្យសំឡេងរបស់ពលរដ្ឋទទួលបានការគាំទ្រ និងការគោរពសំឡេងឆ្នោតពលរដ្ឋ ។

នេះជាការតស៊ូរួមគ្នា ហើយក៏មិនមែនជាការតស៊ូរបស់គណបក្សកាវក្លៃតែមួយទេ ហើយ១៤លានសំឡេងដែលបោះឆ្នោតជ្រើសរើសគណបក្សកាវក្លៃ គឺមិនមែនជាការតស៊ូរបស់គណបក្សនយោបាយចំនួន៨ ដែលតំណាងឱ្យ២៧លានសំឡេងទេ ប៉ុន្តែវាជាការតស៊ូរបស់ពលរដ្ឋថៃនៅទូទាំងប្រទេសដើម្បីបញ្ជាក់ថា សំឡេងឆ្នោតរបស់ពលរដ្ឋត្រូវតែជាសំឡេងកំណត់អនាគតប្រទេសជាតិ ។

សូមយើងដើរទាំងអស់គ្នាបន្តទៀត ដោយបង្កើតរដ្ឋាភិបាលរបស់ពលរដ្ឋឱ្យបាន ប៉ុន្តែពេលវេលារបស់យើងនៅសល់មិនច្រើនទេ ព្រោះខ្ញុំដឹងច្បាស់ថា ប្រទេសថៃដើរទៅមុខទៀតដោយគ្មានរដ្ឋាភិបាលរបស់ពលរដ្ឋបែបនេះមិនបានយូរទេ ។ ក្នុងរយៈពេលមានកំណត់នេះ យើងនៅសល់ឱកាសមិនប៉ុន្មានលើកទៀតទេ ដែលត្រូវតស៊ូរួមគ្នាក្នុងសមរភូមិចំនួន២ ដើម្បីបង្កើតរដ្ឋាភិបាលតាមមតិសាធារណៈឱ្យបានជោគជ័យ ។

សមរភូមិទី១ នឹងកើតឡើងនៅថ្ងៃខាងមុខ គឺការបោះឆ្នោតជ្រើសរើសនាយករដ្ឋមន្ត្រីថៃ នៅថ្ងៃទី១៩ ខែកក្កដា ឆ្នាំ២០២៣ ។ ចំណែកសមរភូមិទី២ គឺជាការស្នើធ្វើវិសោធនកម្មរដ្ឋធម្មនុញ្ញ មាត្រា២៧២ ដើម្បីកាត់បន្ថយអំណាចរបស់សមាជិកព្រឹទ្ធសភាជារៀងរហូត ក្នុងការបោះឆ្នោតជ្រើសរើសនាយករដ្ឋមន្ត្រី ។

សមរភូមិទាំងពីរនេះនឹងមិនទទួលជោគជ័យទេ បើយើងមិនអាចធ្វើឱ្យសមាជិកព្រឹទ្ធសភាប្តូរចិត្ត ឱ្យពួកគេគាំទ្រសំឡេងឆ្នោតរបស់ពលរដ្ឋ ។ ហេតុនេះ ខ្ញុំសូមឱ្យពលរដ្ឋគ្រប់រូបរួមគ្នាបំពេញភារកិច្ចជាមួយខ្ញុំក្នុងសមរភូមិទាំងពីរនេះ ដោយការផ្ញើសារទៅសមាជិកព្រឹទ្ធសភាគ្រប់មធ្យោបាយ និងជួយគ្នាអញ្ជើញឱ្យសមាជិកព្រឹទ្ធសភាបោះឆ្នោតជ្រើសរើសនាយករដ្ឋមន្ត្រីតាមមតិពលរដ្ឋ ឬបោះឆ្នោតលុបចោលមាត្រា២៧២ ដើម្បីផ្តល់អំណាចឱ្យពលរដ្ឋវិញ ។

បើពួកយើងធ្វើអស់ពីសមត្ថភាពចំពោះសមរភូមិទាំងពីរហើយ ហើយគណបក្សកាវក្លៃគ្មានឱកាសដឹកនាំបង្កើតរដ្ឋាភិបាលបានជោគជ័យ ខ្ញុំសូមបើកឱកាសឱ្យប្រទេសថៃ ដោយបើកផ្លូវឱ្យគណបក្សលំដាប់ទី២ គឺគណបក្សភឿថៃដឹកនាំបង្កើតរដ្ឋាភិបាលរបស់គណបក្សចំនួន៨ នៅក្រោមកិច្ចព្រមព្រៀងធ្វើរួមគ្នា (MOU) ហើយអ្នកតំណាងរាស្ត្រមកពីគណបក្សកាវក្លៃគ្រប់រូបនឹងគាំទ្របេក្ខជននាយករដ្ឋមន្ត្រីរបស់បក្សភឿថៃ ។

ប៉ុន្តែមុននឹងដល់ថ្ងៃនោះ យើងនឹងមិនព្រមចុះចាញ់ដាច់ខាត ហើយសូមអ្នកទាំងអស់គ្នារួមសហការតស៊ូឱ្យដល់ទីបំផុត ។ ខ្ញុំតែម្នាក់ ឬគណបក្សកាវក្លៃតែមួយ មិនអាចប្តូរចិត្តរបស់សមាជិកព្រឹទ្ធសភា និងឈានទៅបង្កើតរដ្ឋាភិបាលរបស់ពលរដ្ឋបានទេ ។ ហេតុនេះ យើងសូមកម្លាំងចិត្តពីគ្រប់គ្នាសហការបំពេញភារកិច្ចនេះ ដើម្បីឱ្យយើងអាចបង្កើតរដ្ឋាភិបាលរបស់ពលរដ្ឋបានជោគជ័យ ។ អនាគតរបស់គណបក្សកាវក្លៃដើម្បីបង្កើតរដ្ឋាភិបាល គឺស្ថិតក្នុងកណ្តាប់ដៃរបស់អ្នកទាំងអស់គ្នា និងសហការគ្នាផ្ញើសារឱ្យសមាជិកព្រឹទ្ធសភាប្តូរចិត្ត ៕ ប្រភព ៖ Chiang Mai News

បរទេស៖ មហាសេដ្ឋី Elon Musk ដែលជាម្ចាស់ Twitter របស់វេទិកាបណ្តាញទំនាក់ទំនងសង្គមបានបាត់បង់ប្រហែលពាក់កណ្តាលនៃប្រាក់ចំណូលពីការផ្សាយពាណិជ្ជកម្មរបស់ខ្លួន។

យោងតាមក្រុមហ៊ុនស្រាវជ្រាវទីផ្សារ Insider Intelligence កាលពីថ្ងៃទី ១៥ ខែកក្កដា បានឱ្យដឹងថា Twitter បានកំណត់គោលដៅនៃប្រាក់ចំណូលចំនួន ៣ ពាន់លានដុល្លារក្នុងឆ្នាំនេះ ប៉ុន្តែវាមិនដូចការគ្រោងទុកនោះទេ ពោលគឺប្រាក់ចំណូលរបស់ Twitter បានធ្លាក់ចុះប្រហែលជាង ៣០% ស្មើនឹង ៧.៦ លានដុល្លារបើធៀបនឹងឆ្នាំមុន។ លោក Elon Musk បានទទួលស្គាល់ដោយស្មោះត្រង់នូវការលំបាកដែល Twitter កំពុងប្រឈមមុខដោយប្រកាសថា “លំហូរសាច់ប្រាក់របស់យើងនៅតែអវិជ្ជមាន ដោយសារតែការថយចុះនៃប្រាក់ចំណូលផ្សាយពាណិជ្ជកម្មប្រហែល ៥០% បូកនឹងបន្ទុកបំណុលផ្សេងទៀត” ។

Twitter បច្ចុប្បន្នកំពុងប្រឈមមុខនឹងការលំបាកជាច្រើនចាប់តាំងពីការផ្លាស់ប្តូរគោលនយោបាយរបស់ខ្លួនជានិច្ច។ ថ្មីៗនេះ ថៅកែ Twitter បានបង្ហាញពីការកំណត់គណនីយ៉ាងចម្រូងចម្រាសសម្រាប់អ្នកប្រើប្រាស់ ដោយអតិថិជន Twitter Blue អាចមើលបានរហូតដល់ ១០,០០០ ប្រកាសក្នុងមួយថ្ងៃ និងគណនីដែលបានបង្កើតឡើងយូរអាចមើលបាន ១.០០០ ប្រកាស ខណៈដែលគណនីដែលទើបបង្កើតថ្មីអាចមើលបានត្រឹមតែ ៥០០ ប្រកាសប៉ុណ្ណោះ។

Twitter ក៏កំពុងជួបប្រទះនឹងបញ្ហានេះឥតឈប់ឈរផងដែរ ដូចជាការរអាក់រអួលនៃសេវាកម្ម ភាពមិនប្រក្រតី API និងតំណភ្ជាប់ tweet ដែលខូចនៅពេលចែករំលែកជាដើម។ យោងតាមសារព័ត៌មាន Bloomberg បានឱ្យដឹងថា Twitter នឹងកាន់តែលំបាកនៅពេលដែលលោក Mark Zuckerberg បានបើកដំណើរការវេទិកាស្រដៀងគ្នាមួយដែលមានឈ្មោះថា Threads ហើយ ឈានដល់កំណត់ត្រា អ្នកប្រើប្រាស់ ១០០ លាននាក់ក្នុងរយៈពេលត្រឹមតែ ៥ ថ្ងៃ។ ខណៈពេលដែល Threads បន្តកើនឡើងនៅក្នុងលក្ខខណ្ឌនៃអ្នកប្រើប្រាស់ Twitter មាន និន្នាការធ្លាក់ចុះយ៉ាងខ្លាំងនៅក្នុងចរាចរណ៍ នាពេលថ្មីៗនេះ៕ ប្រភព៖vnexpress

កូរ៉េខាងត្បូង៖ ភ្លៀងមូសុងរបស់កូរ៉េខាងត្បូងបានបង្កឱ្យមានការបាក់ដី និងទឹកជំនន់យ៉ាងខ្លាំងដែលបណ្តាលឱ្យមនុស្សចំនួន ៣៧ នាក់បានបាត់បង់ជីវិត។

យោងតាមប្រភពព័ត៌មាន The New York Time កាលពីថ្ងៃអាទិត្យ ទី១៦ ខែកក្កដា បានឱ្យដឹងថា ក្រុមមន្ត្រី និងបុគ្គលិកសង្រ្គោះ រួមមាន អ្នកមុជទឹក ជិត ៤០០ នាក់បានរកឃើញមនុស្សចំនួន ៨ នាក់បាត់បង់ជីវិតក្នុងរូងផ្លូវក្រោមដីនៅទីក្រុងឆុងជូ( Cheongju) នៃប្រទេសកូរ៉េខាងត្បូង ដែលបច្ចុប្បន្ននាំឱ្យចំនួនអ្នកស្លាប់នៅក្នុងទឹកជំនន់នាពេលថ្មីៗនេះកើនឡើងរហូតដល់ ៣៧ នាក់។

គិតត្រឹមល្ងាចថ្ងៃអាទិត្យនេះ ទឹកជំនន់ និងការបាក់ដីក៏បានធ្វើឱ្យមនុស្សយ៉ាងហោចណាស់ ៣៥ នាក់រងរបួស និង ៩ នាក់ផ្សេងទៀត បានបាត់ខ្លួន នេះបើយោងតាមសេចក្តីថ្លែងការណ៍ដែលចេញផ្សាយដោយក្រសួងមហាផ្ទៃ។ រថយន្តចំនួន ១៥ គ្រឿងក៏បានលិចទឹកក្នុងផ្លូវក្រោមដីនៃទីក្រុង Cheongju ដែលមានចម្ងាយប្រហែល ៧០ ម៉ាយពីភាគខាងត្បូងនៃទីក្រុងសេអ៊ូល នៅពេលដែលវាបានជន់លិចប្រហែលម៉ោង ៨:៣០ នាទីយប់ម្សិលមិញនេះ។

គួរបញ្ជាក់ដែរថា កូរ៉េខាងត្បូងបានជួបប្រទះនឹងការធ្លាក់ភ្លៀងខ្លាំងចាប់តាំងពីថ្ងៃទី ៩ ខែកក្កដា មកម្លេះ ដោយបង្ខំឱ្យមនុស្សជិត ៦.០០០ នាក់ភៀសខ្លួននិងផ្ទះជិត ៣០.០០០ គ្មានអគ្គិសនីប្រើប្រាស់នៅប៉ុន្មានថ្ងៃមកនេះ ដោយទឹកជំនន់បានបំផ្លាញផ្ទះជាច្រើន នេះបើយោងតាមក្រសួងមហាផ្ទៃនិងសុវត្ថិភាព។ ក្នុងពេលជាមួយគ្នានោះដែរ ទីភ្នាក់ងារអាកាសធាតុកូរ៉េខាងត្បូង ក៏បាននិយាយថា ផ្នែកខ្លះនៃប្រទេសនឹងបន្តជួបការធ្លាក់ភ្លៀងយ៉ាងខ្លាំងបន្ថែមទៀត៕

រាជធានីបាងកក៖ ក្រុមអ្នកជំនាញវិស័យឯកជន មានការរំពឹងទុកទៅលើគណបក្សភឿថៃ នឹងដឹកនាំសេដ្ឋកិច្ចឲ្យរីកច្រើនឡើងវិញ ប្រសិនបើគណបក្សប្រឆាំងមួយនេះ នឹងត្រូវសភាទាំង២បោះឆ្នោតផ្ដល់ទំនុកចិត្ដ ហើយការលើកឡើងបែបនេះ បានកើតឡើង ក្រោយពេលមេដឹកនាំគណបក្សឆ្ពោះទៅមុខ មិនទទួលបានការគាំទ្រ ពីសភាឲ្យបានគ្រប់គ្រាន់តាមច្បាប់កំណត់ នៅក្នុងការបោះឆ្នោតជ្រើសរើសនាយករដ្ឋមន្រ្ដី កាលពីថ្ងៃទី១៣ ខែកក្កដា។

សារព័ត៌មានរបស់ថៃ Bangkok Post បានចេញផ្សាយ កាលពីព្រឹក ថ្ងៃចន្ទ ទី១៧ ខែកក្កដា ថា វិស័យឯកជន នៅក្នុងប្រទេស កំពុងតែចាប់អារម្មណ៍ និង បង្ហាញនូវការគាំទ្រយ៉ាងខ្លាំង ទៅលើគណបក្សភឿថៃ (Pheu Thai) សម្រាប់ការដឹកនាំរដ្ឋាភិបាលថ្មី ព្រោះគោលនយោបាយសេដ្ឋកិច្ចរបស់គណបក្សមួយនេះ នឹងជួយបង្វែរសេដ្ឋកិច្ច ឲ្យវិលមករកភាពប្រក្រតី និង រីកចម្រើនឡើងវិញ។

លោក សាណាន អានហ្គូបូលគុល (Sanan Angubolkul) ប្រធានសភាពាណិជ្ជកម្មថៃ បានប្រាប់ដល់ Bangkok Post ថា វិស័យឯកជន មានទំនុកចិត្ត ទៅលើការរីកច្រើនយ៉ាងលឿន ប្រសិនបើគណបក្សភឿថៃ អាចបង្កើតរដ្ឋាភិបាលថ្មីបាន ដោយមានបេក្ខជនរបស់ខ្លួនជានាយករដ្ឋមន្រ្ដី និង គណបក្សចំនួន៧ផ្សេងទៀត ជាសម្ពន្ធភាព ស្ថិតក្នុងកិច្ចព្រមព្រៀងអនុស្សរណៈរបស់ពួកគេ ដែលបានចុះហត្ថលេខារួមគ្នា។

លោក សាណាន អានហ្គូបូលគុល បានបញ្ជាក់ ថា «គណបក្សភឿថៃ បានឆ្លងកាត់បទពិសោធន៍ជាច្រើន នៅក្នុងការដឹកនាំប្រទេស នាពេលកន្លងមក។ គោលនយោបាយជាច្រើនរបស់គណបក្សភឿថៃ ក៏បានយកទៅអនុវត្ដ ប្រកបដោយជោគជ័យរួចមកហើយផងដែរ។ អ្នកជំនាញជាច្រើន នៅក្នុងគណបក្សភឿថៃ ពោរពេញទៅដោយសមត្ថភាព និង បទពិសោធន៍ នៅក្នុងការគ្រប់គ្រងសេដ្ឋកិច្ច»។

លោកប្រធានសភាពាណិជ្ជកម្មថៃ បានសង្កត់ធ្ងន់ ថា «សភាពាណិជ្ជកម្មថៃ មានទំនុកចិត្តយ៉ាងខ្លាំង ប្រសិនបើគណបក្សភឿថៃ វិលមកដឹកនាំបង្កើតរដ្ឋាភិបាលថៃជាថ្មី។ គោលនយោបាយសេដ្ឋកិច្ចរបស់គណបក្សមួយនេះ អាចនឹងជួយជំរុញឲ្យសេដ្ឋកិច្ចរបស់ប្រទេសថៃ ឲ្យដើរឆ្ពោះទៅមុខ ជាពិសេស ការជំរុញកំណើនសេដ្ឋកិច្ច និង ការកាត់បន្ថយនូវវិសមភាព»។

ស្របគ្នានេះដែរ គណបក្សឆ្ពោះទៅមុខ (Move Forward Party) ហៅកាត់ MFP របស់លោក ភីថា លីមចារឿនរ៉ាត ក៏បានអះអាង ផងដែរ ថា គណបក្ស MFP នឹងមានសុច្ឆន្ទៈ បើកផ្លូវជូដៃគូចម្រុះរបស់ខ្លួន គឺគណបក្សភឿថៃ មានលទ្ធភាពបង្កើតរដ្ឋាភិបាល ប្រសិនបើបរាជ័យរបស់មេដឹកនាំគណបក្ស MFP គឺលោក ភីថា លីមចារឿនរ៉ាត (Pita Limjaroenrat) នៅក្នុងការក្លាយជានាយករដ្ឋមន្ត្រីថ្មីរបស់ប្រទេសថៃ។

បន្ថែមពីលើនេះ លោក សាណាន អានហ្គូបូលគុល បានជំរុញឲ្យរដ្ឋាភិបាលថ្មីរបស់ប្រទេស ត្រូវតែដោះស្រាយនូវបញ្ហាជាច្រើន ដោយទាមទារឱ្យមានវិធានការជាបន្ទាន់ ជាពិសេស បញ្ហានានា នាំឲ្យប៉ះពាល់ដល់ជីវភាពជាប្រចាំថ្ងៃរបស់ប្រជាពលរដ្ឋ ក៏ដូចជា លើកកម្ពស់នូវការជួយគាំទ្រ ដល់សហគ្រាសខ្នាតតូច និង ខ្នាតមធ្យម។ រដ្ឋាភិបាល ក៏គួរតែសម្លឹងមើលនូវការកាត់បន្ថយ សម្រាប់ការចំណាយលើជីវភាពរស់នៅ និង ជួយបង្កើនប្រាក់ចំណូលដោយផ្ទាល់ សម្រាប់ប្រជាពលរដ្ឋ ឲ្យមានប្រាក់ចំណូលបន្ថែមទៀត សម្រាប់ការចំណាយ។ រីឯសហគ្រាសខ្នាតតូច និង មធ្យម ត្រូវការចាំបាច់ ត្រូវតែទទួលបានប្រភពមូលនិធិជាច្រើន សម្រាប់ការកសាងអាជីវកម្មរបស់ខ្លួនឡើងវិញ បន្ទាប់ពីវិបត្ដិកូវីដ-១៩។ រដ្ឋាភិបាល ក៏គួរតែតាមដាននូវការវិវឌ្ឍតាមប្រព័ន្ធឌីជីថល ដើម្បីកែលម្អសេវាសាធារណៈ និង ធានាឱ្យមានតម្លាភាព។

លោក សាណាន អានហ្គូបូលគុល ប្រធានសភាពាណិជ្ជកម្ម បានបន្ថែម ថា រដ្ឋាភិបាល ត្រូវតែបង្កើតផែនការដោះស្រាយបញ្ហាគ្រោះរាំងស្ងួត អាចកើតឡើង ដោយសារបាតុភូតអាកាសធាតុ El Niño (អែលនីញ៉ូ) ព្រោះវាអាចនឹងនាំឲ្យប៉ះពាល់ ដល់វិស័យកសិកម្ម។ បច្ចុប្បន្ន តម្លៃកសិផល កំពុងតែឡើងថ្លៃ ខណៈតម្រូវការស្បៀងអាហារជាសកល ក៏កំពុងតែកើនឡើង។ សកម្មភាពទាំងនេះ នឹងក្លាយជាឱកាសដ៏ល្អបំផុត សម្រាប់ប្រទេសថៃ ត្រូវចាប់យក។ ដូច្នេះ ទាំងរដ្ឋាភិបាល និង វិស័យឯកជន ក៏គួរតែរួមគ្នាបង្កើតផែនការគ្រប់គ្រងទឹក សម្រាប់ធានាដល់ការផ្គត់ផ្គង់ទឹក ឲ្យបានគ្រប់គ្រាន់ ដើម្បីទ្រទ្រង់ដល់វិស័យកសិកម្ម និង ឧស្សាហកម្ម។

ការលើកឡើងរបស់ប្រធានសភាពាណិជ្ជកម្មរបស់ប្រទេសថៃ បានកើតឡើង ក្រោយពេលមេដឹកនាំគណបក្សឆ្ពោះទៅមុខ លោក ភីថា មិនទទួលបានគាំទ្រ ពីសភាទាំង២ នៅក្នុងការក្លាយជានាយករដ្ឋមន្រ្ដី។ ក្រោមច្បាប់រដ្ឋធម្មនុញ្ញរបស់ប្រទេសថៃ ចែងថា នាយករដ្ឋមន្រ្ដី ត្រូវតែទទួលបានសំឡេងគាំទ្រ យ៉ាងតិច ៣៧៦នាក់ ពីក្នុងចំណោមសមាជិកសភា ៥០០នាក់ និង សមាជិកព្រឹទ្ធសភា ចំនួន២៥០នាក់។ ប៉ុន្ដែបច្ចុប្បន្ន សម្ពន្ធមិត្តចំនួន៨គណបក្ស ដឹកនាំដោយគណបក្សឆ្ពោះទៅមុខ មានសមាជិកសរុប ៣១២នាក់ នៅក្នុងរដ្ឋសភា ឬសភាជាន់ទាប។

សភាទាំង២របស់ប្រទេសថៃ កាលពីថ្ងៃព្រស្បតិ៍ ទី១៣ ខែកក្កដា បានប្រជុំរួម និង បោះឆ្នោតជ្រើសរើសនាយករដ្ឋមន្រ្តីថ្មី។ ប៉ុន្ដែលោក ភីថា លីមចារឿនរ៉ាត ប្រធានគណបក្សឆ្ពោះទៅមុខ ទទួលបានសំឡេងគាំទ្រមិនគ្រប់គ្រាន់ តាមច្បាប់កំណត់ សម្រាប់តំណែងនាយករដ្ឋមន្រ្ដីថៃ។

មេដឹកនាំគណបក្សឆ្ពោះទៅមុខ គឺលោក ភីថា ត្រូវការសំឡេងគាំទ្រ យ៉ាងតិចបំផុតចំនួន៣៧៥សំឡេង មកពីក្នុងចំណោមសមាជិកសភា ចំនួន៥០០នាក់ និង សមាជិកព្រឹទ្ធសភា ចំនួន២៥០នោះ ខណៈឥឡូវសមាជិកព្រឹទ្ធសភា នៅសល់តែ ចំនួន២៤៩នាក់ ដោយសារសមាជិកព្រឹទ្ធសភាម្នាក់ បានលាលែងពីតំណែង នៅមុនថ្ងៃបោះឆ្នោតនាយករដ្ឋមន្រ្ដី ត្រឹមតែ១ថ្ងៃ។ នៅក្នុងចំណោមសមាជិកសភាទាំង២នោះ បានចូលរួមបោះឆ្នោតគាំទ្រលោក ភីថា ឲ្យធ្វើជានាយករដ្ឋមន្រ្ដី ត្រឹមតែចំនួន៣២៤សំឡេង ដោយរួមបញ្ចូលទាំងសមាជិកព្រឹទ្ធសភា ចំនួន១៣សំឡេងផងដែរ។ រីឯសំឡេងប្រឆាំង មានចំនួន១៨២សំឡេង និង អនុបវាទ ចំនួន១៩៩សំឡេង។

ដូច្នេះសភារបស់ប្រទេសថៃ នឹងរៀបចំការបោះឆ្នោតជាថ្មី នៅសប្តាហ៍នេះ។ បេក្ខជនដដែល នឹងនៅតែអាចឈរឈ្មោះជាម្ដងទៀត ឬ ក៏បេក្ខជនផ្សេង ត្រូវបានតែងតាំងឱ្យចូលរួមប្រជែងតំណែងកំពូលមួយនេះ។ រីឯនីតិវិធីរបស់សភា នឹងត្រូវធ្វើឡើង រហូតទាល់តែមានបេក្ខជនណាម្នាក់ ទទួលបានសំឡេងគាំទ្រគ្រប់គ្រាន់ ដោយមិនបានកំណត់ពីចំនួន នៃការបោះឆ្នោត ឬ កាលបរិច្ឆេទផុតកំណត់នោះទេ៕