ប្រទេសថៃ ៖ កងទ័ពថៃបានធ្វើសកម្មភាពឈ្លានពា.នដោយប្រដាប់អាវុ.ធមកលើដែនអធិបតេយ្យកម្ពុជាកាន់តែខ្លាំងដើម្បីបំពេញមហិច្ឆតាពង្រីកទឹកដី បន្ទាប់ពីមេដឹកនាំថៃទាត់ចោលការអន្តរាគមន៍សម្របសម្រួលរបស់ម៉ាឡេស៊ីជាប្រធានអាស៊ាន មហាអំណាចអាមេរិក និងមហាអំណាចចិន ។ កាលពីថ្ងៃទី១៦ ខែធ្នូ ឆ្នាំ២០២៥ គណៈរដ្ឋមន្ត្រីថៃបានអនុម័តថវិការហូតដល់ជាង២ពាន់ ៤រយលានបាត (ឬជាង៧៧លាន ៦សែនដុល្លារ) សម្រាប់ឱ្យកងទ័ពធ្វើប្រតិបត្តិការនៅព្រំដែនកម្ពុជា-ថៃ ខណៈកងទ័ពភូមិភាគ២ថៃហាមពលរដ្ឋបង្ហោះរូបភាព វីដេអូ ឬចែកចាយទីតាំងឈរជើងកងទ័ព និងកុំផ្សព្វផ្សាយពីផែនការវាយប្រ.ហារជាដាច់ខាត ។

កាលពីថ្ងៃទី១៦ ខែធ្នូ អ្នកនាំពាក្យរដ្ឋាភិបាលថៃ លោក Siripong Angkasakulkiat បាននិយាយក្រោយកិច្ចប្រជុំគណៈរដ្ឋមន្ត្រីថា គណៈរដ្ឋមន្ត្រីថៃបានសម្រេចអនុម័តថវិកាជាង២ពាន់ ៤រយលានបាត សម្រាប់ប្រតិបត្តិការកងទ័ពនៅព្រំដែនជាប់កម្ពុជា តាមសំណើរបស់ក្រសួងការពារជាតិបន្ទាប់ពីមានការស្នើសុំពីកងទ័ពជើងគោក និងជើងទឹក ។ រដ្ឋាភិបាលថៃរីករាយក្នុងការផ្តល់ថវិកានេះសម្រាប់ចំណាយពាក់ព័ន្ធនឹងសកម្មភាពកងទ័ពនៅព្រំដែនភាគខាងកើតប្រទេសថៃ ។

ចំណែកកងទ័ពភូមិភាគ២ថៃបានហាមពលរដ្ឋបង្ហោះរូបភាព វីដេអូ ឬចែកចាយទីតាំងឈរជើងកងទ័ព និងកុំផ្សព្វផ្សាយពីផែនការវាយប្រ.ហារជាដាច់ខាតដើម្បីកុំឱ្យសត្រូវដឹងខ្លួនមុន ។ កងទ័ពភូមិភាគ២ថៃបញ្ជាក់ថា ការចែកចាយទាំងនេះធ្វើឱ្យសត្រូវប្រុងប្រយ័ត្ន ត្រៀមខ្លួនទាន់ពេលវេលា និងប៉ះពាល់ដល់ប្រតិបត្តិការរបស់កងទ័ពថៃ ។

សារព័ត៌មាន Daily News រាយការណ៍នៅថ្ងៃទី១៧ ខែធ្នូ ឆ្នាំ២០២៥ ថា កងទ័ពថៃបានបើកការវាយប្រ.ហារកម្ពុជាជាបន្តបន្ទាប់ ហើយការចែកចាយទីតាំងឈរជើងកងទ័ព និងផ្សព្វផ្សាយពីផែនការកងទ័ពវាយប្រហារសត្រូវ គឹមិនផ្តល់ផលល្អទេ ។ ហេតុនេះ កងទ័ពភូមិភាគ២ សំណូមពរឱ្យពលរដ្ឋបញ្ឈប់ការចែកចាយទីតាំងឈរជើងកងទ័ព ហាមផ្សព្វផ្សាយពីផែនការវាយសត្រូវ ពីព្រោះនឹងធ្វើឱ្យសត្រូវដឹងខ្លួនមុន និងត្រៀមខ្លួនទាន់ពេលវេលា ថែមទាំងបង្កគ្រោះថ្នាក់ដល់កងទ័ពថៃដែលកំពុងធ្វើសង្គ្រាមឈ្លានពាន ។

គួរបញ្ជាក់ថា សកម្មភាពឈ្លានពានដោយប្រដាប់អាវុធរបស់កងទ័ពថៃបានបង្កឱ្យមានការខូចខាតយ៉ាងធ្ងន់ធ្ងរ ដោយគិតត្រឹមថ្ងៃទី១៦ ខែធ្នូ ជនស៊ីវិលកម្ពុជាបានបាត់បង់ជីវិតកើនឡើងរហូតដល់ចំនួន១៧នាក់ (ទារក១នាក់) និងរងរបួសជនស្លូតត្រង់ ៧៧នាក់ ។ កម្ពុជាសូមអំពាវនាវឱ្យសហគមន៍អន្តរជាតិថ្កោលទោសយ៉ាងម៉ឺងម៉ាត់ចំពោះការរំលោភបំពានសេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា-ថៃ និងសកម្មភាពឧក្រិដ្ឋកម្មសង្គ្រាមខុសច្បាប់របស់ថៃម្តងហើយម្តងទៀត ដោយទាមទារឱ្យថៃទទួលខុសត្រូវទាំងស្រុងចំពោះការរំលោភបំពានដ៏កំរោលនេះ ។

កម្ពុជាអំពាវនាវឱ្យថៃបញ្ឈប់រាល់អរិភាពជាបន្ទាន់ ដោយដកកម្លាំងចេញពីដែនអធិបតេយ្យរបស់កម្ពុជា និងចៀសវាងសកម្មភាពឈ្លានពានដែលគំរាមកំហែងសន្តិភាព និងស្ថិរភាពក្នុងតំបន់ ។ ទន្ទឹមនឹងនេះ កម្ពុជាអំពាវនាវឱ្យភាគីថៃងាកមកគោរពកិច្ចព្រមព្រៀងបទឈប់បាញ់ សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាព និងកាតព្វកិច្ចទាំងឡាយនៅក្រោមច្បាប់អន្តរជាតិឱ្យបានម៉ឺងម៉ាត់ ស្មោះត្រង់ និងដោយសុច្ឆន្ទៈពិតប្រាកដ ។

ក្រសួងការពារជាតិកម្ពុជាបានចេញសេចក្តីអំពាវនាវដល់ពលរដ្ឋដើម្បីចូលរួមរក្សាសុវត្ថិភាពកងកម្លាំងរបស់យើង ក៏ដូចជារក្សាការសម្ងាត់យោធា សូមបញ្ឈប់ការផ្សព្វផ្សាយជាបន្ទាន់នូវរាល់ព័ត៌មាន វីដេអូ ឬរូបភាពផ្សេងៗដែលអាចបង្ហាញពីសកម្មភាពប្រតិបត្តិការយោធា, ផែនទី, ការបង្ហាញពីការចល័ត ឬដាក់ពង្រាយកងទ័ព, ទីតាំងឈរជើង លេណដ្ឋាន (ត្រង់សេ), ជំរំជម្រក, ការចល័តសព្វាវុធ, ផ្លូវផ្គត់ផ្គង់សម្ភារៈបរិក្ខារ ឬស្បៀងអាហាររបស់កងទ័ព តាមគ្រប់បណ្តាញទំនាក់ទំនងសង្គម ដូចជា ៖ Facebook, TikTok, YouTube ឬប្រព័ន្ធផ្សព្វផ្សាយផ្សេងៗជាដាច់ខាត ៕

ប្រទេសថៃ៖ កីឡាការិនីកីឡាអេឡិចត្រូនិក (E-Sport ) តំណាងម្ចាស់ផ្ទះថៃ Warasin Naraphat ឬមានរហ័សនាមថា “Tokyogurl” ត្រូវបានដកសិទ្ធិចេញពីការប្រកួតកីឡាស៊ីហ្គេមលើកទី 33 បន្ទាប់ពីត្រូវបានគេចាប់បានថា បានប្រើប្រាស់កម្មវិធីដែលគ្មានការអនុញ្ញាតដើម្បីបន្លំក្នុងអំឡុងពេលការប្រកួត Arena of Valor ទល់នឹងក្រុមវៀតណាម។

យោងតាមការចុះផ្សាយរបស់សារព័ត៌មានក្នុងស្រុករបស់ថៃ នៅថ្ងៃទី១៦ ខែធ្នូ ឆ្នាំ២០២៥ សហព័ន្ធកីឡាអេឡិចត្រូនិកថៃ (TESF) បានបញ្ជាក់ថា កីឡាការនី Naraphat ត្រូវបានដកសិទ្ធិកាលពីថ្ងៃអង្គារ ទី១៦ ខែធ្នូ ឆ្នាំ២០២៥តទៅ បន្ទាប់ពីក្រុមបច្ចេកទេសបានរកឃើញថា នាងបានរំលោ.ភយ៉ាងធ្ងន់ធ្ងរលើបទប្បញ្ញត្តិបច្ចេកទេស តាមរយៈការប្រើប្រាស់កម្មវិធីជំនួយលើទូរស័ព្ទដៃ ដែលអាចអនុញ្ញាតឱ្យជនទី៣ អាចចូលលេងជំនួសនាងបាន អំឡុងពេលការប្រកួតនោះ ហើយនាងគ្រាន់តែអង្គុយបង្ហាញសកម្មភាព ដូចជានាងកំពុងតែប្រកួតផ្ទាល់តែប៉ុណ្ណោះ។

លើសពីនេះ Tokyogurl ក៏ថែមទាំងបានប្រើប្រាស់កាយវិការមិនសមរម្យ ក្នុងពេលផ្សាយផ្ទាល់ការប្រកួត ដោយការលើកម្រាមដៃកណ្តាល បង្ហាញនៅចំពោះមុខកាម៉េរាថែមទៀតផង ដែលរឿងនេះបានធ្វើឱ្យមហាជនរិះគន់លើនាងកាន់តែខ្លាំង។

ក្រោយកើតមានភាពចម្រូងចម្រាស់ទាំងនេះ ក្រុមកីឡាអេឡិចត្រូនិក Arena of Valor របស់ម្ចាស់ផ្ទះថៃ នៅតែចាញ់ការប្រកួតនេះដដែល ដោយត្រូវបានក្រុមនារីវៀតណាម ផ្ដួលក្រោមលទ្ធផល ៣-០ កាលពីថ្ងៃទី១៥ ខែធ្នូ ដែលធ្វើឲ្យអ្នកគាំទ្រក្រុមម្ចាស់ផ្ទះថៃកាន់តែបាក់មុខថែមមួយកម្រិតទៀត។

យ៉ាងណាក្រោយមានរឿងនេះកើតឡើង ការស៊ើបអង្កេតខ្លីបានធ្វើឡើង ពីសំណាក់ផ្នែកបច្ចេកទេសកីឡាស៊ីហ្គេម ហើយបានរាយការណ៍បញ្ហានោះទៅអ្នករៀបចំ។ បន្ទាប់មកល្បិចរបស់ កីឡាការិនី Tokyogurl ត្រូវបានលាតត្រដាង នាងត្រូវរងនូវពិន័យយ៉ាងធ្ងន់ ដោយត្រូវបានលុបឈ្មោះចេញពីព្រឹត្តិការណ៍ស៊ីហ្គេម លើកទី៣៣ ដោយស្វ័យប្រវត្តិ។

ដោយឡែក មិត្តរួមក្រុមរបស់នាង ក៏បានបង្ហាញអារម្មណ៍ខកចិត្តចំពោះទង្វើពិបាកនឹងទទួលយកនោះ លើបណ្តាញសង្គមថែមទៀតផង។ ប៉ុន្មានម៉ោងក្រោយពីមានរឿងអាស្រូវក្លែងបន្លំប្រើកម្មវិធីជំនួយនេះ សហព័ន្ធកីឡាអេឡិចត្រូនិកថៃ (TESF) ក៏បានសម្រេចចិត្តដកក្រុមនារីកីឡាអេលិចត្រូនិក លើវិញ្ញាសា Arena of Valor ទាំងអស់ចេញពីការប្រកួតស៊ីហ្គេមតែម្តង។

ជាមួយគ្នានេះដែរក្លឹបរបស់ Naraphat គឺ Talon ក៏បានយល់ស្របនឹងការសម្រេចចិត្តនេះផងដែរតាមរយៈការប្រកាសបញ្ចប់កិច្ចសន្យារបស់ Naraphat ភ្លាមៗដោយគ្មានការស្ទាក់ស្ទើ។ តាមការបញ្ជាក់ ការសម្រេចនេះនឹងចូលជាធរមាន ចាប់ពីថ្ងៃទី១៦ ធ្នូ នេះតទៅ៕

អគ្គរាជទូតខ្មែរប្រចាំនៅប្រទេសបារាំង បានណែនាំឲ្យអ្នកដំណើរបរទេស ដែលមានបំណងធ្វើដំណើរមកកាន់ប្រទេសកម្ពុជា ប៉ុន្តែត្រូវប្ដូរជើងហោះហើរនៅប្រទេសថៃ ឲ្យមានការប្រុងប្រយ័ត្ន ឬបើអាចគួរប្ដូរជើងហោះហើរតែម្ដង ព្រោះមានរបាយការណ៍ជាច្រើនបានបង្ហាញថា អ្នកដំណើរជាច្រើនត្រូវបានរំខានដោយការសួរសំណួរ និងត្រួតពិនិត្យដ៏តឹងរឹង មុននឹងពួកគេត្រូវបានអនុញ្ញាតឲ្យហោះមកប្រទេសកម្ពុជា ដែលបណ្ដាលឲ្យប៉ះពាល់អារម្មណ៍យ៉ាងខ្លាំង។

តាមរយៈការចែករំលែកនៅលើទំព័រហ្វេសប៊ុក កាលពីថ្ងៃទី១៥ ខែធ្នូ ឆ្នាំ២០២៥ លោក Luy David អគ្គរាជទូតខ្មែរប្រចាំនៅប្រទេសបារាំង បានលើកឡើងពីផលលំបាកយ៉ាងធ្ងន់ធ្ងរសម្រាប់អ្នកដំណើរបរទេស ជាពិសេសមកពីខាងប៉ែកអ៊ឺរ៉ុប ដែលត្រូវហោះហើយមកកាន់ប្រទេសកម្ពុជាតាមរយៈជើងហោះហើរពីទីក្រុងបាងកក ប្រទេសថៃ។

យោងតាមការដកស្រង់ពីរបាយការណ៍របស់អ្នកដំណើរបរទេសដេលបានមកដល់កម្ពុជា បានបង្ហាញថា អ្នកដំណើរជាច្រើនបានជួបប្រទះនឹងបញ្ហារំខានមួយចំនួននៅព្រលានយន្តហោះថៃ ដោយមន្រ្តីអាកាសចរណ៍ថៃបានសួរចម្លើយពួកគេយ៉ាងយូរ, ទាមទារហួសហេតុសម្រាប់ភស្តុតាងនៃមធ្យោបាយហិរញ្ញវត្ថុ, ត្រួតពិនិត្យលម្អិតជ្រុលហួសហេតុនៃការកក់សណ្ឋាគារ និងអ្នកដំណើរខ្លះបានអះអាងថា ពួកគេត្រូវបានដាក់ឲ្យរង់ចាំនៅក្នុងបរិយាកាសដ៏គួរឲ្យខ្លាច និងមានសម្ពាធ ហើយជួនកាលត្រូវជាប់ពាក់ព័ន្ធនឹងការសង្ស័យមិនសមហេតុផល។

ក្នុងករណីខ្លះទៀត ស្ថានភាពទាំងនេះត្រូវបានបណ្ដាលឲ្យមានបញ្ហាបាត់បង់ឥវ៉ាន់ ឬវ៉ាលីរបស់ពួកគេថែមទៀត នៅពេលធ្វើដំណើរមកដល់អាកាសយានដ្ឋានកម្ពុជា ដោយគ្មានការពន្យល់ឬបកស្រាយភ្លាមៗឡើយ។
ដោយសង្កេតឃើញពីការកើនឡើងនៃករណីទាំងនេះ លោក Luy David ក៏បានផ្ដល់ការណែនាំ ឲ្យអ្នកធ្វើដំណើរផ្សេងៗទៀតគួរជៀសវាងការឆ្លងកាត់ប្រទេសថៃ និងប្រើប្រាស់ក្រុមហ៊ុនអាកាសចរណ៍ថៃនៅពេលធ្វើដំណើរមកកាន់ប្រទេសកម្ពុជា ដើម្បីជាការប្រុងប្រយ័ត្ន និងបង្ការការរំខានផ្សេងៗ។

លោកបន្ថែមថា មានក្រុមហ៊ុនអាកាសចរណ៍អន្តរជាតិ និងផ្លូវឆ្លងកាត់ជំនួសជាច្រើនក្រៅពីក្រុមហ៊ុនថៃ ដែលផ្តល់ជូននូវសេវាកម្មល្អប្រសើរដោយការគោរព និងផ្ដល់នូវបទពិសោធន៍ធ្វើដំណើររលូនដោយគ្មានការរើសអើង ចំពោះអ្នកដំណើរដែលចង់ធ្វើដំណើរមកកម្ពុជា។

អគ្គរាជទូតកម្ពុជារូបនេះ ក៏បានឆ្លៀតគូសបញ្ជាក់ដែរថា ប្រទេសកម្ពុជានៅតែជាគោលដៅទេសចរណ៍ដ៏ស្វាគមន៍ និងមានសុវត្ថិភាពបំផុត។ តែទោះជាយ៉ាងណា ក៏យើងមានការសោកស្ដាយ ចំពោះបញ្ហាអកុសលទាំងឡាយ ដែលអ្នកដំណើរបានជួបប្រទះនៅមុនពេលបានមកដល់ទឹកដីកម្ពុជា៕

ប្រទេសវៀតណាម ៖ វៀតណាមបានបង្ហាញចំនួនភ្ញៀវទេសចរបរទេសដែលមកលេងប្រទេសរបស់ខ្លួនចាប់ពីដើមខែមករា រហូតដល់ពាក់កណ្តាលខែធ្នូ ឆ្នាំ២០២៥ លើសគោលដៅ និងច្រើនជាងបណ្តាឆ្នាំមុនៗ គឺស្មើរហូតដល់២១លាននាក់ បើទោះជាវៀតណាមប្រឈមបញ្ហាធូលីកខ្វក់ និងទឹកជំនន់ខ្លាំងក្តី ។ ភ្ញៀវទេសចរមកលេងវៀតណាមច្រើនជាងគេ គឺភ្ញៀវទេសចរចិន បន្ទាប់មក កូរ៉េខាងត្បូង តៃវ៉ាន់ អាមេរិក និងជប៉ុន ដោយសារវៀតណាមមានទីតាំងជាប់ឆ្នេរសមុទ្រ ធនធានធម្មជាតិសម្បូរបែប និងការចាប់អារម្មណ៍វប្បធម៌-ប្រវត្តិសាស្ត្រ ។

តាមការចុះផ្សាយរបស់សារព័ត៌មានបរទេសកាលពីថ្ងៃទី១៦ ខែធ្នូ ឆ្នាំ២០២៥ ក្រសួងវប្បធម៌ កីឡា និងទេសចរណ៍វៀតណាមបញ្ជាក់ថា ភ្ញៀវទេសចរបរទេសមកលេងប្រទេសវៀតណាម ចាប់ពីដើមខែមករា រហូតដល់ពាក់កណ្តាលខែធ្នូ ឆ្នាំ២០២៥ គឺស្មើរហូតដល់២១លាននាក់ ដែលជាចំនួនច្រើនបំផុតទោះជាវៀតណាមប្រឈមនឹងបញ្ហាធូលីកខ្វល់លើអាកាស និងទឹកជំនន់ធ្ងន់ធ្ងរក្តី ។ នេះជាការកើនឡើងចំនួនភ្ញៀវទេសចរបរទេសគួរឱ្យកត់សម្គាល់បន្ទាប់ពីជំងឺកូវីដ-១៩ ឆ្លងរាតត្បាត ដែលធ្វើឱ្យភ្ញៀវទេសចរបរទេសមកវៀតណាមធ្លាក់ចុះ ។

បច្ចុប្បន្ន វៀតណាមបានក្លាយជាគោលដៅទេសចរណ៍ដ៏លេចធ្លោទាក់ទាញភ្ញៀវទេសចរបរទេសមកកម្សាន្តក្នុងចំណោមបណ្តាប្រទេសនៅតំបន់អាស៊ីអាគ្នេយ៍ ដោយសារវៀតណាមមានទីតាំងនៅជាប់ឆ្នេរសមុទ្រ ធនធានធម្មជាតិសម្បូរបែប ទេសភាពធម្មជាតិដ៏ស្រស់ស្អាត ព្រមទាំងការចាប់អារម្មណ៍ប្រវត្តិសាស្ត្រ និងវប្បធម៌ពីសំណាក់ភ្ញៀវទេសចរ ។

កាលពីថ្ងៃទី១៥ ខែធ្នូ ក្រសួងវប្បធម៌ កីឡា និងទេសចរណ៍វៀតណាមបានរៀបចំពិធីអបអរមួយនៅកោះ Phu Quoc (កោះត្រល់) ដែលបច្ចុប្បន្ន ស្ថិតនៅខេត្តអានសាង បន្ទាប់ពីភ្ញៀវទេសចរបរទេសមកលេងវៀតណាមរហូតដល់២១លាននាក់ និងលើសគោលដៅកំណត់ត្រឹមតែ២០លាននាក់នៅឆ្នាំ២០២៥ ។ នេះជាឆ្នាំដំបូងដែលវៀតណាមទទួលបានភ្ញៀវទេសចរលើសគោលដៅ និងខ្ពស់ជាងអំឡុងពេលមុនជំងឺកូវីដ-១៩ ឆ្លងរាតត្បាត ។

នៅមុនពេលជំងឺកូវីដ-១៩ ឆ្លងរាតត្បាត វៀតណាមធ្លាប់ទទួលបានភ្ញៀវទេសចរច្រើនបំផុតត្រឹមតែ១៨លាននាក់ប៉ុណ្ណោះ ។ បន្ទាប់មក នៅឆ្នាំ២០២១ ចំនួនភ្ញៀវទេសចរបរទេសបានធ្លាក់ចុះយ៉ាងខ្លាំង គឺភ្ញៀវទេសចរបរទេសមកលេងវៀតណាមមិនដល់១៦ម៉ឺននាក់ទេ ។

ចំនួនភ្ញៀវទេសចរបរទេសមកលេងវៀតណាមនៅឆ្នាំ២០២៥ កើនឡើងលើសឆ្នាំ២០២៤ រហូតដល់១៩.៣% ទោះជានៅឆ្នាំនេះ ទីក្រុងហាណូយមានធូលីកខ្វក់ខ្លាំង និងទីក្រុងវ៉េ ទីក្រុងហយអាន់ និងទីក្រុងញ៉ាចាង ដែលសុទ្ធតែជាទីក្រុងពេញនិយមបំផុតសម្រាប់ភ្ញៀវទេសចរ បានលិចលង់ដោយទឹកជំនន់ធ្ងន់ធ្ងរក្តី ។ តាមសេចក្តីរាយការណ៍ពីការិយាល័យស្ថិតិជាតិ ចាប់ពីមករា ដល់ខែវិច្ឆិកា ឆ្នាំ២០២៥ ភ្ញៀវទេសចរចិនបានមកលេងវៀតណាមច្រើនជាងគេ បន្ទាប់មក ភ្ញៀវទេសចរកូរ៉េខាងត្បូង តៃវ៉ាន់ អាមេរិក និងជប៉ុន ៕

ប្រទេសថៃ ៖ រដ្ឋមន្ត្រីក្រសួងឧស្សាហកម្ម និងពាណិជ្ជកម្មឡាវបានបញ្ជាក់កាលពីថ្ងៃទី១៦ ខែធ្នូ ឆ្នាំ២០២៥ ថា ប្រេងឥន្ធនៈដែលនាំចូលពីថៃ គឺប្រើប្រាស់តែក្នុងប្រទេសឡាវប៉ុណ្ណោះ គ្មានការនាំចេញបន្តទៅកម្ពុជាទេ ពីព្រោះខុសច្បាប់ ឡាវនឹងសហការត្រួតពិនិត្យ និងចែករំលែកទិន្នន័យការជួញដូរប្រេងជាមួយថៃ ។ ការច្រានចោលព័ត៌មាននាំចេញប្រេងថៃបន្តទៅកម្ពុជា ក្រោយពីថៃរឹតបន្តឹងការនាំចេញប្រេងទៅឡាវតាមច្រកព្រំដែនឆងម៉េត ឃុំឆងម៉េត ស្រុកស៊ិរិន ខេត្តឧប៊ុនរ៉ាជថានី ដោយសារខ្លា.ចមានការនាំចេញបន្តទៅកម្ពុជា បណ្តាលឱ្យរថយន្តដឹកប្រេងរាប់សិបគ្រឿងកកស្ទះនៅច្រកព្រំដែនឆងម៉េតកាលពីថ្ងៃទី១៥ ខែធ្នូ ។

កាលពីថ្ងៃទី១៦ ខែធ្នូ លោក ម៉ាឡៃថង កុមម៉ាស៊ីត រដ្ឋមន្ត្រីក្រសួងឧស្សាហកម្ម និងពាណិជ្ជកម្មឡាវ បានប្រជុំជាមួយរដ្ឋមន្ត្រីក្រសួងថាមពលថៃ ដោយលោក ម៉ាឡៃថង បានបង្ហាញក្តីបារម្ភ និងយល់ពីថៃរឹតបន្តឹងការនាំចេញប្រេងមកប្រទេសឡាវដើម្បីកុំឱ្យឡាវនាំចេញបន្តទៅកម្ពុជា និងបញ្ជាក់ថា ឡាវមិនបាននាំចេញប្រេងបន្តទៅកម្ពុជាទេ ពីព្រោះខុសច្បាប់ពាក់ព័ន្ធនឹងទំនិញឆ្លងកាត់ឡាវ ។ ក្រៅពីនេះ ឡាវរីករាយសហការត្រួតពិនិត្យ និងចែករំលែកទិន្នន័យការជួញដូរប្រងជាមួយថៃ ដើម្បីបង្ហាញភាពច្បាស់លាស់ ។ នេះបើតាមការលើកឡើងរបស់លោក ប្រាសឺត សិនសុខប្រាសឺត មន្ត្រីក្រសួងថាមពលថៃ ។

ថៃបាននាំចេញប្រេងទៅប្រទេសឡាវក្នុងបរិមាណធម្មតា មិនកើនឡើងទេ ដោយសារមានការបញ្ជាក់ច្បាស់លាស់ពីឈ្មួញនាំចូលប្រេង និងនាយកដ្ឋានគយឡាវ ប៉ុន្តែឡាវទទួលស្គាល់ថា ការនាំចូលប្រេងពីថៃមានបរិមាណខុសៗគ្នាក្នុង១លើកៗ និងមានរថយន្តដឹកប្រេងជាមធ្យមប្រមាណ២០គ្រឿងក្នុង១ថ្ងៃ បើកឆ្លងកាត់ច្រកព្រំដែនឆងម៉េត ។ នៅថ្ងៃខ្លះ រថយន្តដឹកប្រេងពីថៃនាំចូលឡាវមានតែ៥គ្រឿងប៉ុណ្ណោះ ថ្ងៃខ្លះទៀតមានច្រើនរហូតដល់៥០គ្រឿង ។ ចាប់ពីខែវិច្ឆិកា ដល់ខែមេសា ជារៀងរាល់ឆ្នាំ គឺជាពេលបញ្ចប់រដូវវស្សាគ្មានភ្លៀង ប្រទេសឡាវមានតម្រូវការប្រេងច្រើនជាងរដូវវស្សា សម្រាប់ប្រើប្រាស់ក្នុងប្រតិបត្តិការអាជីវកម្មនៅប្រទេសឡាវ ជាពិសេស ឧស្សាហកម្មរ៉ែនៅភាគខាងត្បូង ។

លោក ម៉ាឡៃថង រដ្ឋមន្ត្រីក្រសួងឧស្សាហកម្ម និងពាណិជ្ជកម្មឡាវបញ្ជាក់ថា ៖ «ក្រសួងថាមពលឡាវ ឈ្មួញជួញដូរប្រេង នាយកដ្ឋានគយ និងស្ថាប័នពាក់ព័ន្ធ ផ្តល់ភាពសំខាន់ និងតាមដានត្រួតពិនិត្យយ៉ាងតឹងរ៉ឹងលើការនាំចេញប្រេងបន្ត ។ ប្រេងដែលនាំចូលពីថៃសម្រាប់តែប្រើប្រាស់ក្នុងប្រទេសឡាវប៉ុណ្ណោះ គ្មានការនាំចេញបន្តទៅកម្ពុជាទេ ហើយក្រសួងថាមពល និងស្ថាប័នពាក់ព័ន្ធអនុវត្តគ្រប់វិធានការដើម្បីឱ្យប្រាកដចិត្តថា គ្មានការនាំចេញប្រេងទៅកម្ពុជាតាមវិធីណាទាំងអស់» ។

កាលពីថ្ងៃទី១៦ ខែធ្នូ បន្ទាប់ពីបញ្ចប់កិច្ចប្រជុំក្រុមប្រឹក្សាសន្តិសុខជាតិនៅវិមានរដ្ឋាភិបាល នាយករដ្ឋមន្ត្រីថៃចាំផ្ទះ លោក Anutin Charnvirakiul និយាយថា តាមការត្រួតពិនិត្យ គឺគ្មានការនាំចេញប្រេងបន្តទៅកម្ពុជាឡើយ ។ បន្ទាប់មក ថៃក៏បានសូមទោសឡាវចំពោះការរឹតបន្តឹងការនាំចេញប្រេងតាមច្រកព្រំដែនឆងម៉េត ដោយថាខ្លួនគ្មានចេតនាធ្វើបាបឡាវ ឬបង្កការលំបាកដល់ពលរដ្ឋឡាវទេ ប៉ុន្តៃដោយសារស្ថានការណ៍ព្រំដែនរវាងកម្ពុជា-ថៃ និងមិនពាក់ព័ន្ធជាមួយប្រទេសផ្សេងៗ ។

គួរបញ្ជាក់ថា ថ្មីៗនេះ ថៃចាប់ផ្តើមរឹតបន្តឹងការនាំចេញប្រេងទៅកាន់ឡាវ ដើម្បីកុំឱ្យឡាវលក់ប្រេងបន្តឱ្យកម្ពុជា ដែលធ្វើឱ្យរថយន្តដឹកប្រេងរហូតដល់៨០គ្រឿង កកស្ទះបន្តគ្នារង់ចាំឆ្លងកាត់ច្រកព្រំដែនឆងម៉េតទៅឡាវ ។ ស្ថានភាពនេះកើតឡើងក្រោយពីលោក វីរៈយុទ្ធ រ៉ាក់ស៊ីន មេបញ្ជាការកងទ័ពភូមិភាគទី២ថៃ បានចុះហត្ថលេខាលើបទបញ្ជាមួយដើម្បីគ្រប់គ្រងការនាំចេញប្រេង និងសម្ភារៈយោធានៅច្រកព្រំដែនឆងម៉េតជាអចិន្ត្រៃយ៍ ដោយអនុវត្តចាប់ពីម៉ោង២៤និង០០នាទីថ្ងៃទី១៥ ខែធ្នូ ។

ការធ្វើបែបនេះដោយសារមានការសង្ស័យឡាវអាចនាំចេញប្រេងបន្តទៅកម្ពុជា ហើយថៃមើលឃើញថា បច្ចុប្បន្ន កម្ពុជាកំពុងប្រឈមនឹងការខ្វះខាតប្រេង និងសម្ភារៈយុទ្ធសាស្ត្រផ្សេងៗ ។ ហេតុនេះ ថៃក៏សម្រេចចិត្តរឹតបន្តឹងការនាំចេញប្រេងទៅឡាវ ក្នុងគោលបំណងទប់ស្កាត់ការចែកចាយបន្តទៅឱ្យកម្ពុជាដើម្បីដាក់សម្ពាធកម្ពុជា ។

តាំងពីថៃបិទព្រំដែនគោកជាឯកតោភាគីមក រាជរដ្ឋាភិបាលកម្ពុជាបានប្រកាសរួចហើយថា នឹងបញ្ឈប់ការនាំចូលប្រេងគ្រប់ប្រភេទពីថៃ ដោយស្វែងរកការនាំចូលពីប្រទេសផ្សេងជំនួសវិញ ខណៈពលរដ្ឋកម្ពុជាក៏ឈប់គាំទ្រប្រេងថៃដូចមុន ។ ថៃនៅតែយល់ច្រឡំថា កម្ពុជាប្រើប្រាស់ប្រេងរបស់ខ្លួន ទើបបិទការនាំចេញប្រេងទៅឡាវ ប៉ុន្តែគ្មានប្រយោជន៍ ដោយសារកម្ពុជាឈប់ប្រើប្រាស់ប្រេងថៃយូរមកហើយ ៕