នៅព្រឹកថ្ងៃទី៩ តុលា តម្លៃប្រេងឆៅប្រេនធ៍(Brent) របស់អង់គ្លេសបានកើនឡើង៤.៩%ប្រមាណ ៨៨.៧ដុល្លារក្នុងមួយបារ៉ែល ខណៈតម្លៃប្រេងឆៅតិចសាស់អាម៉េរិកភាគខាងលិច(U.S. West Texas Intermediate) បានកើនឡើង ៥.១ភាគរយនាំឱ្យប្រេងឡើងដល់ ៨៧ដុល្លារក្នុងមួយបារ៉ែល។ នេះបើតាមការចុះផ្សាយរបស់សារព័ត៌មានរ៉យទ័រ។

អ្នកវិភាគនៅធនាគារ បានឱ្យដឹងថាអស្ថិរភាពនយោបាយនៅមជ្ឈិមបូព៌ានឹងធ្វើឱ្យតម្លៃប្រេងមានការកើនឡើង ហើយការប្រែប្រួលនាពេលអនាគតត្រូវបានគេរំពឹងថានឹងមានកាន់តែច្រើនអាចឈានដល់១០០ដុល្លារក្នុងមួយបារ៉ែល ប្រសិនបើសហរដ្ឋអាម៉េរិករឹតបណ្តឹងការអនុវត្តទណ្ឌកម្ម។

ព្រឹត្តិការណ៍នេះអាចអូសទាញកិច្ចខិតខំប្រឹងប្រែងរបស់អាម៉េរិកក្នុងការផ្សះផ្សាអារ៉ាប៊ីសាអូឌីត និងអ៊ីស្រាអែល។ ប្រសិនបើអារ៉ាប៊ីសាអូឌីត ធ្វើឱ្យមានទំនាក់ទំនងធម្មតាជាមួយអ៊ីស្រាអែល នោះនឹងមានកិច្ចព្រមព្រៀងការពារជាតិជាមួយអាម៉េរិក ហើយត្រូវតែបង្កើនការផលិតប្រេង។ នេះនឹងជួយកាត់បន្ថយការខ្វះខាតការផ្គត់ផ្គង់កាលពីប៉ុន្មានខែមុន ដោយសារតែរុស្ស៊ី និងអារ៉ាប៊ីសាអូឌីតរឹតបន្តឹងការផលិតប្រេងឆៅ។បច្ចុប្បន្នទីផ្សារកំពុងរង់ចាំការឆ្លើយតបរបស់អ៊ីរ៉ង់ ខណៈដែលអ៊ីស្រាអែលបានចោទប្រកាន់ប្រទេសនេះថាបានចូលរួមក្នុងការវាយប្រហារនេះ។ មន្ត្រីអាម៉េរិកបាននិយាយនៅថ្ងៃទី ៨ ខែតុលាថា ពួកគេកំពុងស៊ើបអង្កេតតួនាទីរបស់អ៊ីរ៉ង់ ប៉ុន្តែមិនបានឃើញភស្តុតាងណាមួយទេ។

ការវាយប្រហារនេះនឹងមានឥទ្ធិពលធំ និងយូរអង្វែងលើទីផ្សារប្រេង ប្រសិនបើការផ្គត់ផ្គង់ត្រូវបានកាត់បន្ថយជាបន្តបន្ទាប់ ហើយសកម្មភាពដឹកជញ្ជូនត្រូវបានរំខាន។ ប្រសិនបើបណ្តាប្រទេសលោកខាងលិចជឿថាអ៊ីរ៉ង់មានតួនាទីនៅក្នុងព្រឹត្តិការណ៍នេះ ការផ្គត់ផ្គង់ និងការនាំចេញពីអ៊ីរ៉ង់ពិតជាត្រូវបានគំរាមកំហែង៕

ប្រទេសថៃ ៖ នៅដើមខែតុលា ឆ្នាំ២០២៣ លោក សេដ្ឋា ថាវីស៊ីន នាយករដ្ឋមន្ត្រី និងជារដ្ឋមន្ត្រីក្រសួងហិរញ្ញវត្ថុប្រទេសថៃ ព្រមទាំងមន្ត្រីពាក់ព័ន្ធបានចុះតាមតំបន់ផ្សេងៗដើម្បីតាមដាន និងដោះស្រាយបញ្ហាស្ថានការណ៍ទឹកជំនន់ ។ លើសពីនេះ លោកនាយករដ្ឋមន្ត្រីក៏បាននាំយកអំណោយជាច្រើនមកចែកជូនពលរដ្ឋរស់នៅក្នុងតំបន់ ហើយលោកបញ្ជាក់ថា ពលរដ្ឋថៃគ្រប់រូបនឹងទទួលបានប្រាក់ម្នាក់១ម៉ឺនបាត បើទោះជាគ្មានទូរស័ព្ទដៃក្តី ។

កម្រិតទឹកឡើងខ្ពស់នៅទន្លេឈី បានបណ្តាលឱ្យមានទឹកជំនន់នៅតាមតំបន់កសិកម្មក្នុងស្រុកខាំខឺនកែវ ខេត្តយ៉ាក់សូថន ។ កម្រិតទឹកមានកម្ពស់ចាប់ពី៣០សង់ទីម៉ែត្រ ទៅ៦០សង់ទីម៉ែត្រ បានធ្វើឱ្យលោកនាយករដ្ឋមន្ត្រីថៃ និងក្រុមមន្ត្រីត្រូវជិះរថយន្តមានកម្ពស់ខ្ពស់របស់ភ្នាក់ងារការពារ និងកាត់បន្ថយគ្រោះថ្នាក់ ចុះមកជួបពលរដ្ឋនៅក្នុងតំបន់ដើម្បីប្រគល់អំណោយផ្សេងៗដល់ពួកគេ ។

ក្នុងអំឡុងពេលលោកនាយករដ្ឋមន្ត្រីចូលថ្វាយបង្គំព្រះសង្ឃនៅស្រុកខាំខឺនកែវ ពលរដ្ឋក៏បានសាកសួរពីការវិវឌ្ឍទៅមុខនៃគម្រោងចែកប្រាក់ឌីជីថលចំនួន១ម៉ឺនបាត ហើយលោកនាយករដ្ឋមន្ត្រីបញ្ជាក់ថា សព្វថ្ងៃ រដ្ឋាភិបាលកំពុងអនុវត្តគម្រោងនេះ បើទោះជាមានមតិប្រឆាំងក៏ដោយ ។ ក្រោយពីលោកនាយករដ្ឋមន្ត្រីបានឆ្លើយតបរឿងនេះទៅកាន់ពលរដ្ឋរួចហើយ លោកនាយករដ្ឋមន្ត្រីក៏បានធ្វើដំណើរទៅជួបពលរដ្ឋមួយចំនួនទៀតដែលបានមករង់ចាំ ។ លោកបញ្ជាក់ថា នឹងមានការសាងសង់ស្ពានបន្ថែមទៀតនៅចំណុចមួយចំនួន ដើម្បីឱ្យពលរដ្ឋងាយស្រួលធ្វើដំណើរ ។

ពលរដ្ឋមកចូលរួម ក៏បាននាំគ្នាថ្លែងអំណរគុណលោកនាយករដ្ឋមន្ត្រី ដែលមានគម្រោងចែកប្រាក់១ម៉ឺនបាតដល់ពលរដ្ឋ ។ ក្នុងចំណោមពលរដ្ឋទាំងនោះ លោកយាយម្នាក់ អាយុ៧០ឆ្នាំ បានប្រាប់លោកនាយករដ្ឋមន្ត្រីថា លោកយាយសប្បាយចិត្តណាស់ ដែលរដ្ឋាភិបាលមានគម្រោងចែកប្រាក់ឌីជីថលឱ្យពលរដ្ឋ ។ លោកយាយបន្តថា លោកយាយក៏ខ្លាចដែរថា នឹងមិនបានទទួលប្រាក់នេះ ព្រោះយាយគ្មានទូរស័ព្ទដៃប្រើប្រាស់ ។ ប៉ុន្តែលោកនាយករដ្ឋមន្ត្រីបញ្ជាក់ថា មិនចាំបាច់មានទូរស័ព្ទដៃទេ ឱ្យតែមានអត្តសញ្ញាប័ណ្ណសញ្ជាតិថៃ គឺពលរដ្ឋគ្រប់រូបនឹងទទួលបានប្រាក់ចំនួន១ម៉ឺនបាតពីរដ្ឋាភិបាល ។

ក្នុងអំឡុងពេលលោកនាយករដ្ឋមន្ត្រី សេដ្ឋា ថាវីស៊ីន ធ្វើដំណើរចាកចេញពីតំបន់នេះ ដោយសារតែកម្រិតទឹកជំនន់ឡើងខ្ពស់បានធ្វើឱ្យលោកនាយករដ្ឋមន្ត្រីត្រូវដើរឆ្លងកាត់ទឹក ដើម្បីយកអំណោយទៅចែកជូនពលរដ្ឋក្នុងតំបន់រងគ្រោះដោយទឹកជំនន់ ។ លោកបានផ្តល់កម្លាំងចិត្តទៅកាន់ពលរដ្ឋថា សូមឱ្យតស៊ូ និងអត់ធ្មត់បន្តទៀត ៕ ប្រភព ៖ Thai PBS

ប្រទេសម៉ិកស៊ិក ៖ គេសង្កេតឃើញថា កាលពីដើមខែតុលា ឆ្នាំ២០២៣ មានជនភៀសខ្លួន និងអ្នកស្វែងរកសិទ្ធិជ្រកកោនប្រមាណ១ម៉ឺននាក់បានធ្វើដំណើរមកដល់ព្រំដែនអាមេរិក និងម៉ិកស៊ិក ស្របពេលមនុស្សជាច្រើននាក់ទៀតបានធ្វើចំណាកស្រុកឆ្លងទ្វីបសំដៅទៅទិសខាងជើង ។ ជារៀងរាល់ថ្ងៃ មានជនភៀសខ្លួនប្រមាណ៦.០០០នាក់បានលួចចូលមកកាន់តំបន់ភាគខាងត្បូងប្រទេសម៉ិកស៊ិក ។

ប្រធានាធិបតីប្រទេសម៉ិកស៊ិក លោក លូបែស អូប្រាឌ័រ (López Obrador) ថ្លែងថា នៅដើមខែតុលា ឆ្នាំ២០២៣ មានជនភៀសខ្លួនចំនួន១ម៉ឺននាក់បានធ្វើដំណើរមកដល់ព្រំដែនភាគខាងជើងប្រទេសម៉ិកស៊ិកជារៀងរាល់ថ្ងៃ ។ កាលពីខែកញ្ញា ឆ្នាំ២០២៣ គេប្រទះឃើញចំនួនជនភៀសខ្លួននៅព្រំដែនអាមេរិក និងម៉ិកស៊ិក បានកើនឡើងយ៉ាងឆាប់រហ័ស ហើយចំនួននេះអាចវ៉ាដាច់ចំនួនជនភៀសខ្លួនខ្ពស់បំផុត កាលពីខែសីហា កន្លងមក ។

ប្រធានាធិបតីប្រទេសម៉ិកស៊ិក លោក លូបែស អូប្រាឌ័រ បញ្ជាក់ថា អាជ្ញាធរត្រូវតែដោះស្រាយបញ្ហានេះជាបន្ទាន់ និងស្វែងរកមូលហេតុនៃការធ្វើចំណាកស្រុក ។ លើសពីនេះ អាជ្ញាធរត្រូវគិតពីការស្វែងរកការងារធ្វើរបស់ពួកគេ ព្រមទាំងលើកកម្ពស់គុណភាពនៃការរស់នៅឱ្យល្អប្រសើរផងដែរ ។ លោកបានថ្លែងនៅមុនកិច្ចប្រជុំជាមួយរដ្ឋមន្ត្រីក្រសួងការបរទេសមកពីអាមេរិកឡាទីន និងមន្ត្រីអាមេរិកថា ៖ «អ្វីដែលយើងត្រូវមាន គឺបង្កើតការយោគយល់ និងកិច្ចសហការគ្នា ដើម្បីកុំឱ្យពួកគេបង្ខំចិត្តធ្វើចំណាកស្រុក» ។

ក្រៅពីនេះ លោក លូបែស អូប្រាឌ័រ ក៏បានសម្តែងការសោកស្តាយចំពោះការស្លា.ប់របស់ជនភៀសខ្លួនជនជាតិគុយបាចំនួន១០នាក់ ដោយសារគ្រោះថ្នាក់ចរាចរណ៍នៅរដ្ឋឈីប៉ាស ដែលស្ថិតនៅភាគខាងត្បូងប្រទេសម៉ិកស៊ិក កាលពីថ្ងៃទី៨ ខែតុលា ឆ្នាំ២០២៣ ៕ ប្រភព ៖ TNN World

រាជធានីតូក្យូ៖ នៅក្នុងរយៈពេលប៉ុន្មានឆ្នាំចុងក្រោយនេះ ចិន បាន និង កំពុងតែបង្កើនសកម្មភាពយោធាយ៉ាងខ្លាំង នៅជុំវិញកោះតៃវ៉ាន់ ហើយសកម្មភាពបែបនេះ មិនខុសពីដាស់យក្សឲ្យភ្ញាក់ពីដំណេកនោះឡើយ ខណៈជប៉ុន បានដេកលង់លក់ នៅក្នុងសន្ដិភាព អស់រយៈពេលជាច្រើនទសវត្សរ៍កន្លងមកហើយ ក្រោយការចាញ់ នាដំណាក់កាលចុងក្រោយបង្អស់ នៃសង្គ្រាមលោកលើកទី២ រហូតមក ហើយឥឡូវមហាយក្សអាស៊ីបូព៌ា កំពុងតែដាក់ពង្រាយនូវកម្លាំងស័្វយការពាររបស់ខ្លួន គួរឲ្យព្រួយភ័យខ្លាច។

សារព័ត៌មាន The Japan Times បានចេញផ្សាយ កាលពីព្រឹក ថ្ងៃចន្ទ ទី៩ ខែតុលា ដោយដកស្រង់ប្រភពពីក្រសួងការពារជាតិជប៉ុន បានអះអាង ថា ជប៉ុន កំពុងតែពង្រីកអង្គភាពកងកម្លាំងស្វ័យការពាររបស់ខ្លួន នៅក្នុងតំបន់គីស៊ូ ( Kyushu) ។ កងទ័ពទាំងនោះ មានទាំងក្រុមយន្តហោះចម្បាំងបំបាំងកាយ F-35B និង អង្គភាពមីស៊ីល បាញ់ពីលើដី ទៅលើកប៉ាល់ នៅក្នុងតំបន់នេះ។

ប្រទេសជប៉ុន បានបង្កើនកម្លាំងការពាររបស់ខ្លួន កាន់តែខ្លាំង ជាមួយនឹងការចំណាយកញ្ចប់ថវិកាជាតិ កាន់តែច្រើនឡើង ស្របពេលប្រទេសចិន បាន និង កំពុងតែបង្កើនសកម្មភាពខ្លាំងឡើង នៅជិតខេត្តអូគីណាវ៉ាវ៉ា (Okinawa) និង តៃវ៉ាន់។ អង្គភាពមីស៊ីល និង យន្ដហោះចម្បាំងបំបាំងកាយ F-35B នៃកម្លាំងស្វ័យការពាររបស់ជប៉ុន នឹងត្រូវបង្កើតឡើង នៅក្នុងឆ្នាំសារពើពន្ធ ២០២៤ ដោយនឹងត្រូវចាប់ផ្តើម នៅខែមេសា ឆ្នាំ២០២៤។

ក្រសួងការពារជាតិជប៉ុន បានបញ្ជាក់ទៀត ថា ដោយសារតែការព្យាយាមលុបបំបាត់នូវការខ្វះចន្លោះកិច្ចការពារ នៅលើកោះណានសេ (Nansei) តភ្ជាប់ពីខេត្តកាហ្គោស៊ីម៉ា (Kagoshima) និង អូគីណាវ៉ា (Okinawa ) នោះ ក្រសួងការពារជាតិ កំពុងតែប្រញាប់ប្រញាល់ បង្កើនសមត្ថភាពទប់ទល់ នៅលើកោះគីស៊ុ (Kyushu) ព្រោះវានឹងរួមចំណែក ជួយដល់កោះណានសេ (Nansei) ផងដែរ។

នៅក្នុងឆ្នាំសារពើពន្ធ ២០២៤ ជប៉ុន នឹងដាក់ពង្រាយយន្តហោះចម្បាំងបំបាំងកាយ ប្រភេទ F-35B ចំនួន៦ មានសមត្ថភាពហោះហើរចម្ងាយជិត និង ចុះចតជាលើកដំបូង នៅលើមូលដ្ឋានណីតាបារុ (Nyutabaru) ស្ថិតក្នុងខេត្តមីយ៉ាហ្សាគី (Miyazaki) កោះគីស៊ុ។ យន្តហោះ F-35B នឹងត្រូវចុះចតនៅលើនាវាពិឃាតអ៊ីហ្ស៊ូមូ (Izumo) និង កាហ្កា (Kaga) របស់កងកម្លាំងការពារដែនសមុទ្រជប៉ុន សម្រាយជួយថែរក្សាឧត្តមភាពដែនអាកាស នៅក្នុងតំបន់ភាគនិរតីដ៏ធំល្វឹងល្វើយ។

នៅក្នុងកិច្ចប្រជុំមួយ នៅមន្ទីរបញ្ចកោណ កាលពីពេលកន្លងទៅថ្មីៗនេះ លោក មីណូរុ គីហារ៉ា (Minoru Kihara) រដ្ឋមន្ត្រី ក្រសួងការពារជាតិជប៉ុន និង សមភាគីសហរដ្ឋអាមេរិក លោក ឡយ អូស្ទីន (Lloyd Austin) បានយល់ព្រមបង្កើនវត្តមានកងទ័ពរបស់ប្រទេសជប៉ុន និងសហរដ្ឋអាមេរិក ដោយគិតគូរ អំពីសារៈសំខាន់ សម្រាប់ការឆ្លើយតបទៅនឹងឧបទ្ទវហេតុនានា អាចនឹងកើតមាន នៅលើតៃវ៉ាន់ និង ការការពារខ្សែការពារកោះណានស៊ី (Nansei)។

យន្តហោះទម្លាក់គ្រាប់បែករបស់ចិន ប្រភេទ H-6 តែងតែហោះហើរជាញឹកញាប់ នៅជុំវិញកោះអូគីណាវ៉ា ហើយត្រូវគេជឿ ថា វាមានសមត្ថភាពអាចផ្ទុកមីស៊ីល ប្រឆាំងនៅលើផ្ទៃទឹក បាញ់ចម្ងាយឆ្ងាយជាង ១ ៥០០គីឡូម៉ែត្រ។ នេះមានន័យថា ប្រទេសជប៉ុន កំពុងតែប្រឈមមុខនឹងតម្រូវការជាបន្ទាន់ នៅក្នុងការពង្រឹងសមត្ថភាពការពាររបស់ខ្លួន ដើម្បីទប់ទល់នឹងគ្រឿងសព្វាវុធ បាញ់ប្រហារ ចម្ងាយឆ្ងាយបែបនេះ។

ជាមួយគ្នានេះ កងវរសេនាធំមីស៊ីល បាញ់ពីលើដីទៅកប៉ាល់ នឹងត្រូវបង្កើតឡើងនៅជំរំរបស់កងកម្លាំងស្វ័យការពារដីគោកយូហ្វីន (Yufuin) ស្ថិតក្នុងខេត្តអូអ៊ីតា ( Oita) នៅក្នុងទីក្រុង Kyushu ដើម្បីត្រៀមរៀបចំទប់ទល់ សម្រាប់ឧបទ្ទវហេតុណាមួយ អាចនឹងកើតមាន នៅក្នុងតំបន់។ បន្ថែមពីលើនេះ ក្រសួងការពាជាតិជប៉ុន ក៏នឹងសាងសង់ឃ្លាំងរំសេវ នៅមន្ទីរ GSDF អនុជំរុំ Oita ដែលនឹងត្រូវប្រតិបត្តិការរួមគ្នា ជាមួយកងវរសេនាធំមីស៊ីល៕

ប្រទេសចិន៖ យោងតាមប្រភពព័ត៌មាន CNN ដែលបានរាយការណ៍កាលពីថ្ងៃទី ៧ ខែតុលាថា ប្រទេសចិនគ្រោងនឹងពង្រីកស្ថានីយអវកាសរបស់ខ្លួន ឱ្យធំជាងទំហំស្ថានីយអវកាស NASA ក្នុងរយៈពេល ៣ ឆ្នាំខាងមុខ ដើម្បីប្រកួតប្រជែងជាមួយអាមេរិក ដោយផ្តល់ជូនអវកាសយានិកមកពីប្រទេសផ្សេងទៀតនូវវេទិកាជំនួសសម្រាប់បេសកកម្មនៅជិតផែនដី។

ដូច្នេះ ស្ថានីយ៍អវកាសរបស់ប្រទេសចិន ត្រូវបានគេស្គាល់ថា Tiangong ឬ Celestial Palace ដោយផ្ទុកអវកាសយានិកអតិបរមាបីនាក់នៅរយៈកម្ពស់ដល់ទៅ ៤៥០ គីឡូម៉ែត្រ ខណៈដែលស្ថានីយអវកាស NASA ផ្ទុកនាវិកបានត្រឹមតែពីរនាក់ប៉ុណ្ណោះ។ ទោះជាយ៉ាងណាក៏ដោយ ចិននឹងពង្រីកបន្ថែមទៀតនូវទំហំស្ថានីយអវកាសរបស់ខ្លួន Tiangong រហូតដល់ ៦ ម៉ូឌុល ដែលវាអាចមានសមត្ថភាពផ្ទុកនាវិកបានប្រាំពីរនាក់ នឹងត្រូវបានគេរំពឹងថាដាក់ឱ្យដំណើរការនៅឆ្នាំ ២០៣០។

ប្រទេសចិនបាននិយាយនៅក្នុងសារព័ត៌មានថាខ្លួននឹងក្លាយទៅជា “មហាអំណាចអវកាស”ដំបូងក្នុងឆ្នាំ ២០៣០។ ប្រព័ន្ធផ្សព្វផ្សាយរដ្ឋរបស់ចិនក៏ធ្លាប់បាននិយាយកាលពីឆ្នាំ ២០២២ ដែរថា ប្រទេសជាច្រើនបានស្នើសុំឱ្យបញ្ជូនអវកាសយានិករបស់ពួកគេទៅកាន់ស្ថានីយចិន នៅពេលដែល ISS របស់ NASA ជិតចូលនិវត្តន៍។
ដូច្នេះយោងតាម Global Times បានឱ្យដឹងថា ស្ថានីយអវកាសរបស់ចិន នឹងក្លាយជានិមិត្តរូបនៃកម្លាំង និងទំនុកចិត្ត ដែលកំពុងប្រកួតប្រជែងជាមួយសហរដ្ឋអាមេរិក។ ទោះជាយ៉ាងណាក៏ដោយ ទីភ្នាក់ងារអវកាសអឺរ៉ុប (ESA) បាននិយាយថា បច្ចុប្បន្ននេះអវកាសយានិកទាំងអស់នៅតែស្ថិតក្នុងស្ថានីយអវកាសរបស់ NASA នៅឡើយទេ៕

ប្រទេសអ៊ីស្រាអែល ៖ ហេតុការណ៍វា.យប្រហា.រលើប្រទេសអ៊ីស្រាអែលនៅដើមខែតុលា ឆ្នាំ២០២៣ បានបណ្តាលឱ្យពលករថៃរ.ងរបួ.សចំនួន៨នាក់ និងត្រូវបានគេចាប់ខ្លួនធ្វើជាចំណាប់ខ្មាំងចំនួន១១នាក់ ។ ចុងក្រោយ លោក សេដ្ឋា ថាវីស៊ីន នាយករដ្ឋមន្ត្រីប្រទេសថៃលើកឡើងថា មានជនជាតិថៃស្លា.ប់បា.ត់ប.ង់ជីវិតចំនួន២នាក់ នៅប្រទេសអ៊ីស្រាអែល ។

លោក ប៉ានព្រី ផានីថានណុកន (Panpree Phitthanukorn) ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសថៃ បានចេញសេចក្តីថ្លែងការណ៍មួយពីការវា.យប្រហា.រនៅប្រទេសអ៊ីស្រាអែលថា ការទំនាក់ទំនងរបស់ស្ថានទូតថៃនៅអ៊ីស្រាអែលជាមួយនាយកដ្ឋានការងារអ៊ីស្រាអែលឃើញថា មានពលករថៃរងរបួ.សចំនួន៨នាក់ ហើយពួកគេកំពុងរង់ចាំការជួយសង្គ្រោះពីកងទ័ព៣នាក់ ក្នុងនោះពលករថៃ៥នាក់ទទួលបានការព្យាបាលនៅមន្ទីរពេទ្យសូរ៉ូកា ។ ប៉ុន្តែមានពលករថៃចំនួន២នាក់បានស្លា.ប់ក្នុងហេតុការណ៍វា.យប្រហា.រនេះ ចំណែកជនជាតិថៃ១១នាក់ទៀតត្រូវបានគេចាប់ខ្លួនធ្វើជាចំណាប់ខ្មាំង ។

មន្ត្រីអ៊ីស្រាលអែលរាយការណ៍ថា អាជ្ញាធរមិនអាចចូលទៅកាន់តំបន់មួយចំនួនបានទេ ។ ដូច្នេះ ទើបមិនអាចបញ្ជាក់ពីតួលេខ ឬព័ត៌មានផ្សេងៗជាផ្លូវការបាន ។ ចំណែកឈ្មោះរបស់ពលករដែលទទួលរងផលប៉ះពាល់ ខាងអាជ្ញាធរថៃនឹងទំនាក់ទំនងទៅកាន់ក្រុមគ្រួសាររបស់ពលករ បន្ទាប់មក ផ្សព្វផ្សាយឈ្មោះពលករជាសាធារណៈ ។

លោក ប៉ានព្រី ផានីថានណុកន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសថៃបញ្ជាក់ថា លោក សេដ្ឋា ថាវីស៊ីន នាយករដ្ឋមន្ត្រីថៃ បានបញ្ជាទៅកងទ័ពអាកាសឱ្យត្រៀមយន្តហោះ ដើម្បីដឹកជញ្ជូនជនជាតិថៃនៅប្រទេសអ៊ីស្រាអែល ត្រឡប់មកប្រទេសថៃវិញ ។

ប្រទេសជាច្រើនមិនអាចជម្លៀសពលរដ្ឋរបស់ខ្លួនបានទេ ដោយសារបច្ចុប្បន្ន ប្រទេសអ៊ីស្រាអែលកំពុងកើតសង្គ្រា.មខ្លាំងក្លា ។ បើទោះជាគ្មានការបិទដែនអាកាសក្តី ប៉ុន្តែគេប្រកាសថា យន្តហោះដែលហោះឆ្លងកាត់ប្រទេសអ៊ីស្រាអែល ត្រូវទំនាក់ទំនងជាមួយមជ្ឈមណ្ឌលគ្រប់គ្រងចរាចរណ៍ផ្លូវអាកាសគ្រប់ពេលវេលា ។ អាជ្ញាធរបានហាមឃាត់ជនជាតិអ៊ីស្រាអែល និងជាតិសាសន៍ផ្សេងទៀត មិនឱ្យចេញក្រៅលំនៅឋាន ហើយត្រូវលាក់ខ្លួននៅក្នុងលេនដ្ឋានគ្រប់ពេលវេលា ។

ចំណែកលោកស្រី ផាន់ណាផា ចាន់ដ្រារុំ (Phannapha Chandrarom) ឯកអគ្គរាជទូតថៃប្រចាំទីក្រុងអាវីវ និយាយថា បច្ចុប្បន្ន អ៊ីស្រាអែលកំពុងប្រយុទ្ធគ្នាជាមួយក្រុមហាម៉ាស់ ជាពិសេស នៅតំបន់ព្រំដែនហ្គាហ្សា ។ អ៊ីស្រាអែលបានព្យាយាមយកមកវិញនូវតំបន់មួយចំនួន ហើយវាមិនមែនជាតំបន់ដែលជនជាតិថៃត្រូវគេចាប់ខ្លួនធ្វើជាចំណាប់ខ្មាំងទេ ។ ដូច្នេះ ស្ថានទូតថៃមិនអាចទាក់ទងជាមួយពលករថៃបានទេ ព្រោះពួកគេស្ថិតក្នុងតំបន់ដែលពួកហាម៉ាស់កាន់កាប់ ។

គួរបញ្ជាក់ថា អ្នកដែលត្រូវគេចាប់ធ្វើជាចំណាប់ខ្លាំង មិនមែនមានតែពលករថៃនោះទេ ប៉ុន្តែមានទាំងជនជាតិអ៊ីស្រាអែល និងពលករបរទេសផ្សេងទៀតផងដែរ ។ ស្ថានទូតថៃនៅអ៊ីស្រាអែលបញ្ជាក់ថា នឹងតាមដានស្ថានការណ៍នេះយ៉ាងដិតដល់ ។ ទោះយ៉ាងណា ពលករថៃមិនមែនជាគោលដៅរបស់ពួកហាម៉ាស់ទេ គឺពលករថៃគ្រាន់តែស្ថិតនៅក្នុងតំបន់នោះដែរ ទើបត្រូវគេចាប់ធ្វើជាចំណាប់ខ្មាំងតែម្តង ៕ ប្រភព ៖ Bangkok biznews