ស្ថានការណ៍តម្លៃប្រេងឥន្ធនៈថ្លៃ, តម្លៃប្រាក់ដុល្លារអាមេរិកកើនឡើង និងអស្ថិរភាពផ្នែកភូមិសាស្ត្រនយោបាយកំពុងតែដាក់សម្ពាធមកលើប្រទេសថៃ, ឥណ្ឌា និងឥណ្ឌូណេស៊ី ដែលស្ថិតក្នុងចំណោមទីផ្សារថ្មីនៅតំបន់អាស៊ី ។ ចំណែកប្រទេសនាំចេញថាមពលដូចជា ម៉ាឡេស៊ី អាចទទួលបានផលប្រយោជន៍ ។

សេដ្ឋវិទូជាច្រើននាក់បានសម្តែងការបារម្ភពីផលប៉ះពាល់ ដែលប្រទេសកំពុងអភិវឌ្ឍន៍នៅតំបន់អាស៊ីនឹងរងផលប៉ះពាល់ដោយសារសង្គ្រាមរវាងប្រទេសអ៊ីស្រាអែល និងក្រុមប្រដាប់អាវុធហាម៉ាស់រាលដាលកាន់តែខ្លាំង ។ អ្នកកំណត់គោលនយោបាយអាចវាយតម្លៃពីលទ្ធផលនៃការផ្គត់ផ្គង់ប្រេងឥន្ធនៈ និងផលប៉ះពាល់ដល់ការរីកលូតលាស់ ។ លើសពីនេះ ការកើនឡើងនៃប្រាក់ដុល្លារអាមេរិកអាចបង្កើនហានិភ័យដល់ប្រទេសមានឱនភាពគណនីចរន្តខ្ពស់ផងដែរ ។

ចំណែកតម្លៃប្រេងឆៅបានកើនឡើងជិត២០% ក្នុងត្រីមាសទី៣ ឆ្នាំ២០២៣ ។ Bloomberg Economics រំពឹងថា តម្លៃប្រេងឆៅអាចកើនឡើងរហូតដល់១៥០ដុល្លារអាមេរិកក្នុង១ធុង (ខណៈតម្លៃបច្ចុប្បន្ន ស្មើនឹង៩០ដុល្លារអាមេរិកក្នុង១ធុង) បើស្ថានការណ៍ជម្លោះនៅមជ្ឈិមបូព៌ានៅតែបន្តរាលដាលដល់ប្រទេសអ៊ីរ៉ង់ ។

Lavanya Venkateswaran សេដ្ឋវិទូជាន់ខ្ពស់មកពី Oversea-Chinese Banking Corp. Ltd និយាយថា បើតម្លៃប្រេងឥន្ធនៈនៅតែកើនឡើងជាបន្តបន្ទាប់រយៈពេលយូរនោះ ប្រទេសឥណ្ឌា, ថៃ និងឥណ្ឌូណេស៊ី នឹងមានវិបត្តិពាណិជ្ជកម្មកាន់តែច្រើន ។

ទោះយ៉ាងណា សេដ្ឋវិទូមើលឃើញថា ប្រទេសមួយនឹងទទួលបានផលប្រយោជន៍ពីតម្លៃប្រេងឥន្ធនៈកើនឡើង គឺម៉ាឡេស៊ី ទាំងក្នុងល័ក្ខខ័ណ្ឌកំណើន និងស្ថានភាពហិរញ្ញវត្ថុរបស់ប្រទេស ។ គេនឹងឃើញពន្ធនាំចេញ, ពន្ធលើប្រាក់ចំណូលប្រេង និងការបង្កើនភាគលាភពីសហគ្រាសរដ្ឋ Petronas ។ ដូច្នេះ វានឹងបង្កើនចំណូលផ្នែកពន្ធរបស់ប្រទេសនេះ ៕ ប្រភព ៖ AEC connect

ប្រទេសថៃ ៖ ក្រសួងការពារជាតិថៃបានលើកឡើងថា រដ្ឋាភិបាលថៃអាចនឹងទិញនាវាចម្បាំងពីចិនជំនួសនាវាមុជទឹករបស់ចិនវិញ បន្ទាប់ពីថៃបានដឹងថាក្រុមហ៊ុនផលិតនាវារបស់ចិនមិនអាចដាក់បញ្ចូលម៉ាស៊ីនស្តង់ដាអាល្លឺម៉ង់ដូចទៅនឹងសេចក្តីបញ្ជាក់នៅក្នុងកិច្ចព្រមព្រាងដែលមានចែងនៅក្នុងកិច្ចសន្យាទិញលក់ជាមួយគ្នានោះ។សូមរំលឹកថាប្រទេសថៃបានចំណាយប្រាក់ប្រមាណ ១៩៣.៧លានដុល្លារ និងបានទូទាត់ជាបណ្តើរៗទៅឲ្យភាគីចិនសម្រាប់ការទិញនាវាមុជទឹក១ក្នុងចំណោម៣គ្រឿង ដែលមានឈ្មោះថា Yuan Class S26T ដែលបំពាក់មកជាមួយនឹងម៉ាស៊ីនម៉ាស៊ូតរបស់អាល្លឺម៉ង់ ប៉ុន្តែកិច្ចព្រមព្រៀងនេះត្រូវបានពន្យាពេល គឺនៅពេលដែលអាល្លឺម៉ង់បានហាមឃាត់ការប្រើប្រាស់ម៉ាស៊ីនរបស់ខ្លួនសម្រាប់ការនាំចេញរបស់យោធាចិន។

ភាគីប្រទេសចិនក៏បានស្នើឲ្យមានការជំនួសម៉ាស៊ីនអាល្លឺម៉ង់ដោយគ្រឿងឧបករណ៍ ម៉ាស៊ីនផលិតនៅចិនវិញ ប៉ុន្តែកិច្ចចរចាប៉ុន្មានលើកនោះនៅតែមិនទាន់ទទួលបាននូវលទ្ធផលសម្រេចជាផ្លែរផ្កានៅឡើយទេ។

រាជរដ្ឋាភិបាលដែលទើបឡើងកាន់អំណាចថ្មីរបស់ថៃ គឺលោកនាយករដ្ឋមន្ត្រីសេដ្ឋា ថាវីស៊ីនបាននិយាយថាខ្លួនបានដាក់សំណើរនៅក្នុងដំណើរទស្សនៈកិច្ចរបស់ខ្លួននៅក្នុងវេទិកាផ្លូវខ្សែរក្រវាត់ Belt and Road Forum នាទីក្រុងប៉េកាំងប្រទេសចិនកាលពីសប្តាហ៍មុនរួចហើយ គឺថៃចង់ឲ្យមានការផ្លាស់ប្តូរក្នុងការទិញនាវាមុជទឹក ទៅជានាវាចម្បាំងវិញ។

កាលពីថ្ងៃ២៤ខែតុលានេះ រដ្ឋមន្រ្តីក្រសួងការពារជាតិថៃ លោកសូទីន គ្លុងសាង ប្រាប់ទៅសារព័ត៌មានក្នុងស្រុកថា ពួកយើងបានស្នើទៅកាន់ភាគីខាងចិនរួចរាល់ហើយ ហើយពួកគេគឺកំពុងតែធ្វើការពិចារណា គាត់បានបន្តថា អាចនឹងមានការពិភាក្សាទៅលើផែនការថ្មីៗបន្ថែមទៀតនៅខែក្រោយ។

រដ្ឋាភិបាលមុនរបស់ថៃក៏បានបញ្ចប់នូវកិច្ចព្រមព្រៀងនៅឆ្នាំ២០១៧ក្នុងការទិញនាវាមុជទឹក១ក្នុងចំណោម៣គ្រឿងដែរក្នុងតម្លៃប្រមាណ ៣៧៣.៥៥លានដុល្លារ។ ហើយនៅឆ្នាំ២០២០ក៏មានការអនុម័តពីគណៈកម្មាធិការសភាក្នុងការបញ្ជាទិញនាវាមុជទឹក២គ្រឿងផ្សេងទៀតផងដែរក្នុងតម្លៃ ៦២២.៥៨លានដុល្លារ។

បើទោះជាយ៉ាងណាក៏ដោយ កិច្ចព្រមព្រៀងទិញនាវាមុជទឹកពីចិនគឺទទួលបានការរិះគន់ពីសារធារណៈជនជាច្រើនផងដែរ ចំពោះរដ្ឋាភិបាលថៃអាណត្តិមុនផងដែរ ដោយក្រុមអ្នកប្រឆាំងនិងអ្នករិះគន់បានលើកជាសំនួរថា តើការទិញនាវាមុជទឹកនោះពិតជាបម្រើដល់ផលប្រយោជន៍សារធារណៈនិងមានសារៈសំខាន់សម្រាប់សន្តិសុខជាតិដែរឬយ៉ាងណា?

រីឯក្រុមកងទ័ពជើងទឹករបស់ប្រទេសថៃវិញក៏បានលើកឡើងដែរថា ការទិញនាវាមុជទឹកគឺពិតជាមានសារៈសំខាន់ណាស់នៅក្នុងកិច្ចការ ការពារផលប្រយោជន៍ប្រទេសថៃទាំងមូលនៅក្នុងរយៈពេលវែង៕
CAN News

ប្រទេសថៃ ៖ កាលពីថ្ងៃទី២៤ ខែតុលា ឆ្នាំ២០២៣ ទំព័រហ្វេសប៊ុកថៃឈ្មោះ «Bad Student» បានអំពាវនាវឱ្យសាលារៀននានានៅទូទាំងប្រទេសថៃប្រមូលកូនសិស្សមកចូលរួមក្នុងគម្រោងសមាធិចំនួន១លាននាក់ ដើម្បីបំបែកកំណត់ត្រាពិភពលោក ។ ការប្រមូលផ្តុំកូនសិស្សមកអង្គុយសមាធិនេះ ក្នុងគោលបំណងបង្កើតសន្តិភាពពិភពលោក, បង្កើតការផ្លាស់ប្តូរល្អ និងលើកស្ទួយថៃជាប្រទេសគោរពព្រះពុទ្ធសាសនា ។

ទំព័រហ្វេសប៊ុក Bad Student បញ្ជាក់ថា កាលពីថ្ងៃទី២៤ ខែតុលា ខាងទំព័រហ្វេសប៊ុកបានទទួលដំណឹងថា មានកូនសិស្សមកពីសាលារៀនជាច្រើននៅទូទាំងប្រទេសថៃ ត្រូវបានសាលារៀនតម្រូវឱ្យធ្វើសមាធិ និងថតរូប ដើម្បីចូលរួមក្នុងគម្រោងសមាធិ ក្នុងគោលបំណងបង្កើតសន្តិភាពពិភពលោក (Meditation For World Peace) ។ ហេតុនេះ ទំព័រហ្វេសប៊ុក Bad Student បានដាក់គោលដៅឱ្យកូនសិស្សមកចូលរួមអង្គុយសមាធិឱ្យបាន១លាននាក់ ។

បុគ្គលិកសាលារៀនមួយកន្លែងលើកឡើងថា ខាងសាលារៀនបានសុំការសហការពីគ្រូបន្ទុកថ្នាក់ និងគ្រូផ្សេងទៀត ដើម្បីជួយប្រមូលកូនសិស្សមកអង្គុយសមាធិក្រោយពីបញ្ចប់កម្មវិធីនៅមុខដងទង់ជាតិ ។ សាលារៀនសង្ឃឹមថា ការសមាធិនេះនឹងជួយបង្កើតសន្តិភាពពិភពលោក និងបង្កើតការផ្លាស់ប្តូរដ៏ល្អ ក៏ដូចជាលើកស្ទួយព្រះពុទ្ធសាសនានៅប្រទេសថៃផងដែរ ។

ប៉ុន្តែសាលារៀនខ្លះទៀតលើកឡើងថា ការអង្គុយសមាធិមិនបានធ្វើឱ្យប្រទេសជាតិមានសន្តិភាពនោះទេ ។ ចំណុចសំខាន់ ការអង្គុយសមាធិ មិនគួររៀបចំឡើងដើម្បីលើកស្ទួយព្រះពុទ្ធសាសនាទេ ពីព្រោះប្រទេសថៃមិនមែនជារដ្ឋសាសនា ។ ការអង្គុយសមាធិនេះ គួរតែធ្វើឡើងតាមការស្ម័គ្រចិត្តរបស់កូនសិស្ស រួមទាំងការតម្រង់ជួរនៅមុខដងទង់ជាតិពេលព្រឹកផងដែរ ។

គម្រោងសមាធិនេះជាកិច្ចសហការរវាងអង្គការសន្តិភាពពិភពលោក, អង្គការព្រះពុទ្ធសាសនាពិភពលោក ជាមួយវត្តព្រះធម្មកាយ និងបណ្តាញជាច្រើនដើម្បីសម្រេចគោលដៅអង្គុយសមាធិបានឱ្យ១លាននាក់ ។ សម្រាប់អ្នកចាប់អារម្មណ៍ចង់ចូលរួម ពួកគេត្រូវបំពេញទិន្នន័យ និងផ្ញើរូបថតភ្ជាប់ជាមួយ ។ បច្ចុប្បន្ន អ្នកចុះឈ្មោះចូលរួមអង្គុយសមាធិមានចំនួនគ្រប់១លាននាក់ហើយ ប៉ុន្តែគម្រោងនេះនឹងបញ្ចប់ការចុះឈ្មោះ នៅថ្ងៃទី៣១ ខែតុលា ឆ្នាំ២០២៣ ។

ក្រោយពីគម្រោងនេះបានផ្សព្វផ្សាយ ធ្វើឱ្យអ្នកលេងបណ្តាញសង្គមថៃជាច្រើននាក់ចូលមកបញ្ចេញមតិ ក្នុងនោះជនជាតិថៃម្នាក់និយាយថា ៖ «តើវាមានប្រយោជន៍អ្វីខ្លះ?» ។ រីឯជនជាតិថៃម្នាក់ទៀតថា ៖ «ប្រទេសថៃនឹងមានកិត្តិយស ពីព្រោះបានធ្វើរឿងល្អ» ៕ ប្រភព ៖ 3plus News

ប្រទេសអេស្ប៉ាញ ៖ ជារៀងរាល់ឆ្នាំ ទីក្រុងម៉ាឌ្រីដបានរៀបចំពិធីបុណ្យគង្វាលចៀម (Fiesta de la Trashumancia) ដែលតម្រូវឱ្យកសិករចិញ្ចឹមចៀមលែងហ្វូងចៀមរាប់ពាន់ក្បាលរបស់ពួកគេឱ្យដើរមកកាន់ទីក្រុង ។ វាជាប្រពៃណីមួយបង្ហាញពីរបៀបរស់នៅតាមបែបបុរាណរបស់កសិករអេស្ប៉ាញ ក៏ដូចជាទាក់ទាញភ្ញៀវទេសចរជាតិ និងអន្តរជាតិផងដែរ ។

គេបានឃើញហ្វូងចៀមរាប់ពាន់ក្បាលដើរតម្រៀបគ្នា និងយំពាសពេញទីក្រុងម៉ាឌ្រីដ ជំនួសឱ្យការបើកបររថយន្តនៅតាមផ្លូវ ។ លើសពីនេះ ក៏មានសំឡេងតន្ត្រី និងការច្រៀងនៅតាមផ្លូវរបស់បណ្តាអ្នកចិញ្ចឹមចៀមក្នុងពិធីបុណ្យគង្វាលចៀមក្នុងទីក្រុងផងដែរ ។ វាជាប្រពៃណីបុរាណដែលរៀបចំឡើងជារៀងរាល់ឆ្នាំនៅប្រទេសអេស្ប៉ាញ ដើម្បីទាក់ទាញឱ្យភ្ញៀវទេសចរជាតិ និងអន្តរជាតិមកទស្សនាការឃ្វាលចៀមបែបបុរាណ ដែលព័ទ្ធជុំវិញទៅដោយអគារ និងលំនៅឋានតាមសម័យបច្ចុប្បន្ន ។

លោក ជីសាស់ ប៉ាស់សាល អតីតអ្នកចិញ្ចឹមចៀម ប្រាប់ថា ៖ «ខ្ញុំបានមកកាន់ Sol Square ពីព្រោះវាធ្វើឱ្យខ្ញុំនឹកឃើញឡើងវិញពីការចងចាំល្អៗ ។ ខ្ញុំធ្លាប់ចិញ្ចឹមចៀមពីមុន ហើយមនុស្សភាគច្រើនមិនធ្លាប់បានដឹងពីរឿងនេះទេ ។ វាជាមុខរបរមួយពិបាក ដែលគ្មានអ្នកណាចង់ធ្វើទេ ហើយយើងនឹងចងចាំវា តាមអ្វីដែលយើងអាចធ្វើបាន ព្រោះវាជារឿងពិសេសខ្លាំងណាស់» ។

ការរៀបចំពិធីបុណ្យគង្វាលចៀមនៅទីក្រុងម៉ាឌ្រីដ គឺដើម្បីបង្ហាញពីរបៀបរស់នៅតាមបែបបុរាណរបស់កសិករនៅប្រទេសអេស្ប៉ាញ ដែលពួកគេត្រូវឃ្វាលចៀមដើម្បីរកចំណីនៅភាគខាងត្បូងប្រទេសក្នុងរដូវរងា ។

រីឯអ្នកស្រី សានដ្រា ផានអាឃ្លេម ជាភ្ញៀវទេសចរមកលេងប្រទេសអេស្ប៉ាញនិយាយថា ៖ «វាពិតជាអស្ចារ្យណាស់! ខ្ញុំគិតថា នេះជាប្រពៃណីមានជាយូរមកហើយ ។ វាពិតជាល្អណាស់ ហើយខ្ញុំបានឃើញមនុស្សម្នាជាច្រើននាក់មកចូលរួមក្នុងពិធីបុណ្យ ហើយរីករាយជាមួយប្រពៃណីនេះ» ។

គួរបញ្ជាក់ថា ពិធីបុណ្យគង្វាលចៀមនៅក្នុងទីក្រុងម៉ាឌ្រីដ ត្រូវបានគេផ្អាកអស់រយៈពេលជាច្រើនឆ្នាំហើយ ។ ក្រោយមក រដ្ឋាភិបាលអេស្ប៉ាញសម្រេចឱ្យរៀបចំពិធីបុណ្យនេះឡើងវិញនៅឆ្នាំ១៩៩៤ ដោយត្រូវរៀបចំឡើងនៅខែតុលា ជារៀងរាល់ឆ្នាំ ៕ ប្រភព ៖ TNN World

សហរដ្ឋអាមេរិក៖ ក្រុមហ៊ុន Meta កំពុងត្រូវបានប្តឹងដោយរដ្ឋចំនួន ៤១ របស់សហរដ្ឋអាមេរិក ដោយអះអាងថា បណ្តាញសង្គម Facebook និង Instagram បានប៉ះពាល់អវិជ្ជមានដល់កុមារ។

យោងតាមការចុះផ្សាយរបស់ The Washington Post កាលពីថ្ងៃទី ២៤ ខែតុលាថា ថ្មីៗនេះរដ្ឋចំនួន ៣០ បានដាក់ពាក្យបណ្តឹងរួមគ្នាមួយនៅតុលាការសហព័ន្ធក្នុងសង្កាត់ភាគខាងជើងនៃរដ្ឋកាលីហ្វ័រញ៉ា ដោយរដ្ឋចំនួន ១១ ទៀតបានដាក់ពាក្យបណ្តឹងតាំងពីឆ្នាំ ២០២១ មកម្លេះ។

ក្នុងពាក្យបណ្ដឹងដែលមាន ២៣៣ ទំព័រដែលដាក់ដោយរដ្ឋកាលីហ្វ័រញ៉ា Meta ត្រូវបានចោទប្រកាន់ថា “គ្រោងកេងប្រវ័ញ្ចអ្នកប្រើប្រាស់វ័យក្មេងដើម្បីរកប្រាក់ចំណេញដោយការបំភាន់ពួកគេអំពីសុវត្ថិភាព និងប្រជាប្រិយភាពនៃមាតិកាដែលរំខាន រួមទាំងការរំលោភលើច្បាប់ឯកជនភាពរបស់កុមារនៅក្នុងសហព័ន្ធ។ រដ្ឋក៏ជឿជាក់ផងដែរថា ក្រុមហ៊ុនរបស់លោក Mark Zuckerberg មានចេតនាអនុវត្តមុខងារដើម្បីរក្សាអនីតិជននៅលើ Facebook និង Instagram ឱ្យបានយូរតាមតែអាចធ្វើទៅបាន ដែលនាំឱ្យប៉ះពាល់ដល់សុខភាពរបស់ពួកគេ។

លោក Phil Weiser តំណាងតុលាការនៃរដ្ឋ Colorado បាននិយាយថា “នេះគឺជាពេលវេលាសម្រាប់ពួកយើងដើម្បីចូលរួមកម្លាំងដោះស្រាយបញ្ហាចាំបាច់បំផុត”។ លោក Rob Bonta អគ្គមេធាវីរដ្ឋកាលីហ្វ័រញ៉ាក៏បានថ្លែងថា “ការស៊ើបអង្កេត bipartisan របស់យើងបានឈានដល់ការសន្និដ្ឋានដ៏សំខាន់មួយដោយ Meta បានធ្វើឱ្យប៉ះពាល់ដល់កុមារ និងក្មេងជំទង់ជាមួយនឹងលក្ខណៈពិសេសដែលធ្វើឱ្យកុមារញៀន ដើម្បីផលប្រយោជន៍បង្កើនប្រាក់ចំណេញរបស់ក្រុមហ៊ុន”។

យោងតាមអ្នកនាំពាក្យរបស់ក្រុមហ៊ុន Meta លោកស្រី Liza Crenshaw បាននិយាយថា ក្រុមហ៊ុន “ខកចិត្តព្រោះ Meta បានធ្វើការប្រកបដោយប្រសិទ្ធភាពជាមួយអ្នកលេងឧស្សាហកម្មដើម្បីបង្កើតស្តង់ដារច្បាស់លាស់ និងសមស្របតាមអាយុសម្រាប់កម្មវិធីជាច្រើនដែលប្រើដោយមនុស្សវ័យជំទង់” ប៉ុន្តែនៅតែប្តឹង។

ទោះជាយ៉ាងណាក៏ដោយ ផលប៉ះពាល់ដ៏គ្រោះថ្នាក់នៃប្រតិបត្តិការ Meta Platform ដូចជា Facebook និង Instagram លើកុមារបានក្លាយជាចំណុចចាប់អារម្មណ៍នៅក្នុងសហរដ្ឋអាមេរិកចាប់តាំងពីឆ្នាំ ២០២១ នៅពេលដែលអតីតបុគ្គលិក Frances Haugen បានបង្ហាញថាក្រុមហ៊ុនបានដឹងពីកម្រិតគ្រោះថ្នាក់របស់ Facebook និង Instagram ចំពោះអនីតិជនតាមរយៈផ្ទៃក្នុង ប៉ុន្តែក្រុមហ៊ុនមិនអើពើនោះទេដើម្បីចំណេញ។

គួរបញ្ជាក់ដែរថា បច្ចុប្បន្នរដ្ឋកាលីហ្វ័រញ៉ាបានអនុម័តបទប្បញ្ញត្តិដែលតម្រូវឱ្យក្រុមហ៊ុនដូចជា Meta សាកល្បងផលិតផលសម្រាប់ហានិភ័យ មុនពេលបញ្ចេញវាដល់អ្នកប្រើប្រាស់ ក៏ដូចជាបង្កើតការការពារសុវត្ថិភាព និងឯកជនភាពទៅក្នុងឧបករណ៍របស់ពួកគេ៕

ប្រទេសរុស្ស៊ី ៖ អ្នកនាំពាក្យវិមានប្រធានាធិបតីរុស្ស៊ីបានបដិសេធព័ត៌មានចចាមអារ៉ាមថា ប្រធានាធិបតីរុស្ស៊ី លោក វ្ល៉ាឌីមៀ ពូទីន កំពុងមានជំងឺ រហូតដល់បញ្ជូនឱ្យមន្ត្រីដែលមានរូបរាងស្រដៀងគ្នាជាមួយលោក មកចូលរួមក្នុងកម្មវិធីផ្សេងៗជំនួសលោក ។ អ្នកនាំពាក្យរូបនេះបញ្ជាក់ថា មេដឹកនាំប្រទេសរុស្ស៊ីមានសុខភាពល្អជាធម្មតាទេ ។

អ្នកនាំពាក្យវិមានប្រធានាធិបតីរុស្ស៊ីបានផ្តល់សម្ភាសន៍ជាមួយក្រុមអ្នកសារព័ត៌មាន ដែលពួកគេបានសាកសួរពាក់ព័ន្ធនឹងព័ត៌មានតាមតេឡេក្រាមនៅរុស្ស៊ី ហើយក្រុមសារព័ត៌មាននៅប្រទេសលោកខាងលិច ក៏បានយកព័ត៌មាននេះទៅចុះផ្សាយបន្តថា មេដឹកនាំរុស្ស៊ី លោក ពូទីន មានជំងឺកាលពីថ្ងៃទី២២ ខែតុលា ឆ្នាំ២០២៣ រហូតដល់លោកត្រូវបញ្ជូនមន្ត្រីដែលមានមុខមាត់ស្រដៀងលោក ទៅចូលរួមក្នុងកម្មវិធីផ្សេងៗជំនួសលោក ។

អ្នកនាំពាក្យរូបនេះបញ្ជាក់ថា លោក ពូទីន មានសុខភាពរឹងមាំល្អធម្មតា ហើយពាក្យចចាមអារ៉ាមអំពីសុខភាពរបស់លោក គឺជារឿងគ្មានប្រយោជន៍ ។ លោកប្រធានាធិបតី ពូទីន បានឈានចូលអាយុ៧១ឆ្នាំ កាលពីថ្ងៃទី៧ ខែតុលា កន្លងមក ហើយលោកជាមេដឹកនាំប្រទេសដែលបានហាត់ប្រាណតាមវិធីច្រើនយ៉ាង ជាពិសេស កីឡាយូដូ ។

កន្លងមក លោក ពូទីន បានបង្ហាញខ្លួននៅតាមកម្មវិធី និងក្នុងប្រព័ន្ធផ្សព្វផ្សាយផ្សេងៗជាបន្តបន្ទាប់ រួមទាំងការធ្វើដំណើរទស្សនកិច្ចទៅប្រទេសចិននៅខែតុលា ឆ្នាំ២០២៣ ផងដែរ ហើយលោកបានមកកាន់ទីក្រុងចំនួន២ របស់រុស្ស៊ី ក្នុងពេលលោកត្រឡប់ពីចិន ។

នៅពេលលោក ពូទីន ផ្តល់សម្ភាសន៍ទៅកាន់ក្រុមសារព័ត៌មានកាលពីឆ្នាំ២០២០ មេដឹកនាំរុស្ស៊ីក៏បានបដិសេធព័ត៌មានដូចគ្នានេះថា លោកបានប្រើប្រាស់មន្ត្រីដែលមានរូបរាង និងមុខមាត់ស្រដៀងគ្នាជាមួយលោកទៅចូលរួមក្នុងកម្មវិធីផ្សេងៗ ។ ប៉ុន្តែលោកទទួលស្គាល់ថា លោកត្រូវគេស្នើឱ្យធ្វើបែបនេះកាលពីមុន ដោយសារហេតុផលសុវត្ថិភាព ៕ ប្រភព ៖ TNN World