កូរ៉េខាងត្បូង៖ កាលពីថ្ងៃសៅរ៍ទី២៧ខែតុលានេះ សេចក្តីរាយការណ៍មួយចេញពីទីក្រុងសេអ៊ូលបានលើកថា កូរ៉េខាងត្បូងនិងសហរដ្ឋអាមេរិកនឹងបើកប្រតិបត្តិការសមយុទ្ធរួមគ្នាមួយនាពេលអនាគតទៅលើការកែច្នៃយន្តហោះគ្មានមនុស្សបើក និងបំពាក់ឧបករណ៍ចាប់សញ្ញ”ឡាស៊ែរ” ដែលជាកិច្ចខិតខំប្រឹងប្រែងមួយក្នុងការធ្វើទំនើបកម្មយោធារបស់ពួកគេ។

យុទ្ធនាការនេះបានកើតឡើងនៅពេលដែលយោធារបស់កូរ៉េខាងត្បូងបានធ្វើសមយុទ្ធមួយឈ្មោះ Hogok កាលពីរដូវស្លឹកឈើជ្រុះមុននេះ ក្នុងគោលបំណងដើម្បីទប់ទល់ជាមួយអាវុធនុយក្លេអ៊ែរនិងមីស៊ីលរបស់កូរ៉េខាងជើង។

គេសង្កេតឃើញថាមានកូនទាហានចំនួនជាង១២០នាក់របស់កូរ៉េខាងត្បូងនិងអាមេរិកដែលបានចូលរួមបណ្តុះបណ្តាលត្រៀមប្រយុទ្ធក្នុងការធ្វើសឹកសង្គ្រាមជាមួយនឹងសត្រូវ ដែលការវឹកហាត់នេះមានមជ្ឈមណ្ឌលវឹកហាត់កងទ័ពនៅលើភ្នំមួយ គឺមានលក្ខណៈស្រដៀងគ្នានឹងការវឹកហាត់នាទីក្រុងព្យុងយ៉ាងនៃប្រទេសកូរ៉េខាងជើងដែរ។

ម៉្យាងវិញទៀត សមយុទ្ធនេះបានបំពាក់ជាមួយនឹងគ្រឿងសព្វាវុធបច្ចេកទេសខ្ពស់ទាំងអស់នៅក្នុងគោលបំណងពង្រឹងនូវសមត្ថិភាពសមយុទ្ធនាពេលអនាគតដោយបានបំពាក់ជាមួយនឹងប្រព័ន្ធភ្ជាប់ឡាស៊ែរចម្រុះដើម្បីធ្វើជាឧបករណ៍ចាប់សញ្ញាផ្សេងៗក្នុងពេលធ្វើសមយុទ្ធជាក់ស្តែង។

យន្តហោះគ្មានមនុស្សបើកនេះជាច្រើនប្រភេទផ្សេងទៀតធ្វើឡើងក្នុងគោលបំណងដើម្បីធ្វើជាឈ្លបយកការ កំណត់អន្តសញ្ញាណសត្រូវ វាស់ស្ទង់ការស្លាប់របស់សត្រូវ ក៏ដូចជាបំពាក់កាំភ្លើងក្នុងការវាយប្រហារដោយស្វ័យប្រវត្តិជាដើម ខណៈកូរ៉េខាងជើងបានផលិតយន្តហោះគ្មានអ្នកបើកនេះឡើងដើម្បីដឹកមនុស្សដែលរងរបួសពីសង្គ្រាម។

មេបញ្ជាការកងពលថ្មើរជើងជំនាន់ទី២៥របស់កូរ៉េខាងត្បូងបាននិយាយថា យើងនឹងអាចដឹងពីសកម្មភាពបម្លាស់ទីរបស់សត្រូវតាមរយៈការប្រើប្រាស់ត្រូននេះ ហើយវាយប្រហារទៅលើពួកគេតាមរយៈឧបករណ៍ដ៏ទំនើបនេះ ដែលធ្វើឲ្យពួកយើងមានប្រៀបជាងនៅក្នុងការយកជ័យជំនះទៅលើសត្រូវ និងកាត់បន្ថយការខាតបង់ក៏ដូចជាកាត់បន្ថយចំនួនអ្នករងរបួស អ្នកស្លាប់នៅក្នុងជួររកងទ័ពយើងផងដែរ។

គួរបញ្ជាក់ផងដែរថា កូរ៉េខាងជើងក៏បានបង្កើតនៅក្រុមកងពលតូចមួយផងដែរដែលគឺឲ្យឈ្មោះថា Tiger កាលពីឆ្នាំមុន គឺជាអង្គភាពសាកល្បងសម្រាប់ធ្វើប្រតិបត្តិការសមយុទ្ធយោធាដំបូងនាពេលអនាគតតាមរយៈការប្រើប្រាស់ត្រូនឬគេហៅថាយន្តហោះគ្មានមនុស្សបើក ដាក់នូវប្រព័ន្ធចាប់សញ្ញា និងបំពាក់នូវឧបករណ៍វាយប្រហារដោយស្វ័យប្រវត្តិ ក្នុងគោលបំណងដើម្បីផ្លាស់ប្តូរទៅជាសមប្រយុទ្ធសម័យទំនើបផ្នែកលើគំរូនៃឆ្នាំ២០៤០។ បន្ថែមពីលើសមយុទ្ធរួមនេះ កូរ៉េខាងត្បូងក៏បានរៀបចំនូវព្រឹត្តិការប្រកួតធ្វើសង្គ្រាម«ប្រដាប់អាវុធអនាគតលក្ខណៈអន្តរជាតិ» ជាលើកដំបូងរបស់ខ្លួន ដែលមានរយៈពេល៥ថ្ងៃដោយបានបញ្ចប់នៅថ្ងៃទី២៨ខែតុលានេះផងដែរ ដែលមានការចូលរួមដោយកងទ័ពប្រមាណ៣០០នាក់ ក្នុងចំណោម៥ប្រទេសរួមមាន អាមេរិក កូរ៉េខាងត្បូង អង់គ្លេស អ៊ូសបេគីស្ថាន និងកម្ពុជា។ CAN News

បរទេស៖ យោងតាមគណៈកម្មាធិការការពារអ្នកសារព័ត៌មាន (CPJ) បានឱ្យដឹងថា បីសប្តាហ៍កន្លងមកនៃសង្រ្គាមអ៊ីស្រាអែល និងហាម៉ាស គឺជាគ្រោះថ្នាក់បំផុតសម្រាប់អ្នកកាសែតដែលគ្របដណ្តប់ជម្លោះក្នុងរយៈពេលជាងបីទសវត្សរ៍។
CPJ បាននិយាយនៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃទី ២៧ ខែតុលាថា យ៉ាងហោចណាស់អ្នកកាសែតចំនួន ២៩ នាក់ត្រូវបានសម្លាប់ចាប់តាំងពីការវាយប្រហារលើកដំបូងដោយក្រុមហាម៉ាសកាលពីថ្ងៃទី ៧ ខែតុលា។ អង្គការនេះបានបន្ត ទៀតថា ខ្លួនបានចាប់ផ្តើមតាមដានការស្លាប់របស់អ្នកកាសែតដែលរាយការណ៍ពីជម្លោះតាំងពីឆ្នាំ ១៩៩២ មកម្លេះ។

ក្នុងចំណោមអ្នកកាសែតដែលបានស្លាប់នោះ យ៉ាងហោចណាស់មានជនជាតិប៉ាឡេស្ទីន ២៤នាក់ អ៊ីស្រាអែល ៤នាក់ និងលីបង់ ១នាក់។ ទោះជាយ៉ាងណាក៏ដោយ ក្រុមតស៊ូមតិសារព័ត៌មានបានបន្ថែមថា ពួកយើងពិតជាមានការព្រួយបារម្ភជាខ្លាំងដោយសារការដាច់ចរន្តទំនាក់ទំនងនៅហ្គាហ្សា។ សេចក្តីថ្លែងការណ៍របស់ CPJ បានសង្កត់ធ្ងន់ថា “នៅពេលដែលការិយាល័យព័ត៌មានបាត់បង់ទំនាក់ទំនងជាមួយក្រុម និងអ្នករាយការណ៍របស់ពួកគេនៅហ្គាហ្សា ដែលជាសាក្សីឯករាជ្យដែលផ្តល់ព័ត៌មានអំពីការវិវត្ត និងការស្លាប់នៅក្នុងសង្គ្រាមនេះ នោះពិភពលោកកំពុងបាត់បង់បង្អួចចូលទៅក្នុងការពិតនៃគ្រប់ភាគីពាក់ព័ន្ធក្នុងជម្លោះ”។

យោងតាមក្រុមហ៊ុនផ្តល់សេវាទូរគមនាគមន៍ក្នុងស្រុក Jawwal បានឱ្យដឹងថា ទំនាក់ទំនងនៅហ្គាហ្សាត្រូវបានរំខានយ៉ាងខ្លាំងក្នុងរយៈពេលប៉ុន្មានម៉ោងចុងក្រោយនេះ ដោយសារតែការវាយប្រហារតាមអាកាសរបស់អ៊ីស្រាអែល។ ទន្ទឹមនឹងនេះ កងកម្លាំងការពារអ៊ីស្រាអែល (IDF) បាននិយាយថា ពួកគេមិនអាចធានាសុវត្ថិភាពរបស់អ្នកកាសែតដែលរាយការណ៍ពីតំបន់ហ្គាហ្សាបាននោះទេ។

មិនត្រឹមតែអ្នកសារព័ត៌មាន បុគ្គលិកនៃអង្គការអន្តរជាតិ និងអង្គការមនុស្សធម៌ក៏ប្រឈមមុខនឹងគ្រោះថ្នាក់ដល់អាយុជីវិតរបស់ពួកគេនៅក្នុងតំបន់ហ្គាហ្សាផងដែរ។ យោងតាមសេចក្តីថ្លែងការណ៍របស់ទីភ្នាក់ងារការងារជំនួយរបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) នៅថ្ងៃទី ២៧ ខែតុលា ចំនួនបុគ្គលិកអង្គការសហប្រជាជាតិដែលត្រូវបានសម្លាប់នៅហ្គាហ្សាបានកើនឡើងដល់ ៥៣ នាក់ បន្ទាប់ពីមនុស្ស ១៤ នាក់បានស្លាប់នៅក្នុងការវាយប្រហាររយៈពេល ២៤ ម៉ោងចុងក្រោយនេះ៕
ប្រភព៖cfef.com

ប្រទេសថៃ ៖ គេហទំព័របរទេសឈ្មោះ Nomad List បានបង្ហាញទីកន្លែងចំនួន១០ នៅលើពិភពលោក ដែលបានជាប់ចំណាត់ថ្នាក់ជាទីកន្លែងគួរឱ្យចង់រស់នៅសម្រាប់អ្នកធ្វើការតាមប្រព័ន្ធអនឡាញ (Digital Nomad) ។ ការចាត់ចំណាត់ថ្នាក់នេះបានវាស់ស្ទង់ដោយផ្អែកលើលក្ខខណ្ឌចម្បងៗចំនួន៤ រួមមាន ៖ ការចំណាយក្នុងការរស់នៅ, ល្បឿនអ៊ីនធើណេតជាមធ្យម, ភាពសប្បាយរីករាយ និងផ្នែកសុវត្ថិភាព ។

គេហទំព័រ Nomad List បានចាត់ចំណាត់ថ្នាក់ទីក្រុងបាងកក និងខេត្តឈៀងម៉ៃ ប្រទេសថៃ ឱ្យជាប់ចំណាត់ថ្នាក់ទី១ និងទី២ ដោយសារទីក្រុងបាងកក និងខេត្តឈៀងម៉ៃ បានទទួលពិន្ទុខ្ពស់ផ្នែកល្បឿនអ៊ីនធើណេតជាមធ្យម ក្នុងនោះទីក្រុងបាងកក មានល្បឿនអ៊ីនធើណេតស្មើ 69 Mbps និងខេត្តឈៀងម៉ៃ មានល្បឿនអ៊ីនធើណេតស្មើ 51 Mbps ។ លើសពីនេះ ការចំណាយក្នុងការរស់នៅសម្រាប់ទីកន្លែងទាំងពីរមិនខ្ពស់ខ្លាំងទេ ។ ដូច្នេះ គេវាយតម្លៃថា អ្នកធ្វើការតាមប្រព័ន្ធអនឡាញ (Digital Nomad) នៅទីក្រុងបាងកក ប្រទេសថៃ នឹងចំណាយប្រាក់ក្នុងម្នាក់ប្រមាណ១.៣៣៨ដុល្លារអាមេរិកក្នុង១ខែ ឬស្មើប្រមាណ៤៨.៤៥៩បាត ។

ក្រៅពីនេះ គេបានវាយតម្លៃថា អ្នកធ្វើការតាមប្រព័ន្ធអនឡាញនៅខេត្តឈៀងម៉ៃ នឹងចំណាយប្រាក់ប្រមាណ ៩៩១ដុល្លារអាមេរិកក្នុង១ខែ ឬស្មើប្រមាណ ៣៥.៨៩២បាត ។ ដូច្នេះ ទីក្រុងបាងកកទទួលបានពិន្ទុច្រើនជាងខេត្តឈៀងម៉ៃ ក្នុងផ្នែកសប្បាយរីករាយ និងល្បឿនអ៊ីនធើណេតជាមធ្យម ។ រីឯផ្នែកសុវត្ថិភាពវិញ ទីក្រុងបាងកក និងខេត្តឈៀងម៉ៃ ទទួលបានពិន្ទុប្រហាក់ប្រហែលគ្នា ។

នេះជាចំណាត់ថ្នាក់ពីលេខ១ ដល់លេខ១០ សម្រាប់អ្នកធ្វើការតាមប្រព័ន្ធអនឡាញ (Digital Nomad) រួមមាន ៖
១-ទីក្រុងបាងកក ប្រទេសថៃ
២-ខេត្តឈៀងម៉ៃ ប្រទេសថៃ
៣-ទីក្រុង Azores ប្រទេសព័រទុយហ្គាល់
៤-ភូមិ Changgu ខេត្ត Bali ប្រទេសឥណ្ឌូណេស៊ី
៥-ទីក្រុង Buenos Aires ប្រទេសអាហ្សង់ទីន
៦-ទីក្រុងអ៊ីស្តង់ប៊ុល ប្រទេសតួកគី
៧-កោះកាណារី ប្រទេសអេស្ប៉ាញ
៨-ទីក្រុង Zagreb ប្រទេសក្រូអាត
៩-ទីក្រុង Lagos ប្រទេសព័រទុយហ្គាល់ និង
១០-ទីក្រុង Penang ប្រទេសម៉ាឡេស៊ី ៕

ប្រភព ៖ chiangmai news

ប្រទេសថៃ ៖ វេជ្ជបណ្ឌិតប្រទេសថៃបានដាស់តឿនយុវជនសម័យថ្មី អំពីផលប៉ះពាល់ដោយសារការជក់បារីថា ពួកគេអាចប្រឈមនឹងជំងឺមហារីកមាត់ ។ វេជ្ជបណ្ឌិតថៃបញ្ជាក់ថា បច្ចុប្បន្ន ជនជាតិថៃជាច្រើននាក់បានកើតជំងឺមហារីកមាត់ស្ថិតក្នុងលំដាប់ទី៦ ក្នុងចំណោមអ្នកកាត់ជំងឺមហារីកថ្មីទាំងអស់ ។

នៅខែតុលា ឆ្នាំ២០២៣ វេជ្ជបណ្ឌិតថៃបានចេញសេចក្តីព្រមានមួយទៅកាន់អ្នកជក់បារីថា ពួកគេនឹងរងផលប៉ះពាល់ដល់សុខភាពបណ្តាលមកពីសារធាតុគូទីន ដែលវាជាសារធាតុផ្សំដ៏សំខាន់របស់ផលិតផលថ្នាំជក់គ្រប់ប្រភេទ ។ សារធាតុនេះមិនត្រឹមតែធ្វើឱ្យប៉ះពាល់ដល់រាងកាយប៉ុណ្ណោះទេ ប៉ុន្តែវានឹងធ្វើឱ្យអ្នកជក់បារីប្រឈមនឹងជំងឺមហារីកមាត់ទៀតផង ។

លោកវេជ្ជបណ្ឌិត Pairot Saonuam ដែលមានតួនាទីជាជំនួយការនាយកគ្រប់គ្រងមូលនិធិគាំទ្រការលើកកម្ពស់សុខភាពលើកឡើងថា នៅក្នុងបារីមានសារធាតុបង្កជំងឺមហារីកជាច្រើនប្រភេទ ហើយវាជាកត្តាសំខាន់ដែលធ្វើឱ្យកោសិកាមានភាពមិនប្រក្រតីនៅក្នុងមាត់ ។ លើសពីនេះ ភាពក្តៅចេញពីផ្សែងបុរីនឹងជំរុញឱ្យមានការផ្លាស់ប្តូរកោសិកានៅក្នុងមាត់ ហើយនេះគឺជាចំណុចចាប់ផ្តើមដែលបង្កបញ្ហាដល់សុខភាពមាត់ និងបណ្តាលឱ្យកើតជំងឺមហារីកមាត់ ។

តាមការស្រាវជ្រាវរបស់ក្រុមគ្រូពេទ្យប្រចាំសាកលវិទ្យាល័យ Southern California បានបង្ហាញថា ពួកគេបានប្រទះឃើញអ្នកជក់បារីអេឡិចត្រូនិកមាន DNA របស់កោសិកាជំងឺមហារីកមាត់ ហើយវាបានបង្កជំងឺរហូតដល់២.៦ដង ។ ចំណែកអ្នកជក់បារីធម្មតាវិញ មាន DNA របស់កោសិកាជំងឺមហារីកមាត់ចំនួន២.២ដង បើធៀបជាមួយអ្នកមិនធ្លាប់ជក់បារីពីមុន ។

យោងតាមទិន្នន័យរបស់ការិយាល័យសុខភាពមាត់ធ្មេញ នៃនាយកដ្ឋានសុខាភិបាលប្រទេសថៃ ប្រចាំឆ្នាំ២០២៣ បញ្ជាក់ថា ប្រទេសថៃមានពលរដ្ឋកើតជំងឺមហារីកមាត់ខ្ពស់ស្ថិតក្នុងលំដាប់ទី៦ ដោយសារការជក់បារី ក្នុងចំណោមអ្នកកើតជំងឺមហារីកថ្មីទាំងអស់ ៕ ប្រភព ៖ Mono News

ប៉េកាំង៖ កាលពីថ្ងៃសុក្រទី២៧ខែតុលាឆ្នាំ២០២៣នេះ អតីតនាយករដ្ឋមន្រ្តីចិនឡើងកាន់អំណាចនៅឆ្នាំ២០១៣និងជានាយករដ្ឋមន្រ្តីទី៧របស់ចិន គឺលោក លី ឃើឈែង បានទទួលមរណៈភាពហើយដោយសារតែជំងឺគាំងបេះដូង។

ទីភ្នាក់ងាររបស់សារព័ត៌មាន CCTV បានរាយការណ៍ថា លោកលី ឃើឈែង ខណៈពេលដែលសម្រាកនៅទីក្រុងសៀងហៃប៉ុន្មានថ្ងៃមកនេះ បានរើឡើងនៃជំងឺបេះដូងហើយធ្វើទុកភ្លាមៗកាលពីថ្ងៃទី២៦ខែតុលាឆ្នាំ២០២៣ ហើយជាអកុសលគាត់មិនអាចយកឈ្នះលើជំងឺនេះបានទេ បើទោះបីជាមានកិច្ចខិតខំប្រឹងប្រែងជួយគាត់យ៉ាងអស់ពីលទ្ធភាពពីសំណាក់គ្រូពេទ្រយ៉ាងណាក្តី។ គាត់ក៏ត្រូវបានលាចាកលោកនៅទីក្រុងសៀងហៃនៅពាក់កណ្តាលអាធ្រាតឈានចូលថ្ងៃសុក្រទី២៧ខែតុលានេះនៅក្នុងវ័យ៦៨ឆ្នាំ។

មេដឹកនាំដែលជាគូប្រជែងកំពូលរបស់បក្សកុម្មនីស្សចិន គឺលោកលី ឃើឈែង ដែលត្រូវបានគេសម្មត់ថាជាអនាគតប្រធានាធិបតេយ្យចិននាពេលបច្ចុប្បន្ននេះ ប៉ុន្តែត្រូវបានវ៉ាដាច់ដោយលោកស៊ីជីនពីងទៅវិញ។ ព្រោះក្នុងគ្រានោះក្រុមអ្នកសេដ្ឋវិទូគឺមានការគាំទ្រទៅលើការធ្វើទីផ្សារសេរីជាង ដែលជំរុញឲ្យមានការធ្វើកំណែទម្រង់ Lionomics ដែលជាទីផ្សារផែនការរបស់គាត់ ព្រោះការអនុវត្តលើផែនការរនេះមិនសូវបានល្អប៉ុន្មានទេ។ Lionomics គឺជាកំណែទម្រង់ក្នុងការកាត់បន្ថយបំណុល និងហេដ្ឋាសម្ព័ន្ធនៅទូទាំងប្រទេស។ ទោះជាយ៉ាងណាក៏ដោយ នៅទីបំផុត គាត់ក៏ត្រូវបានគេងាករេទៅមើលលើរបៀបគ្រប់គ្រងរដ្ឋតាមទស្សនៈវិស័យរបស់លោកស៊ីជីនពីងជំនួសវិញ ទើបធ្វើឲ្យអំណាចរបស់លោកលី ឃើឈែង នាពេលនោះមានការធ្លាក់ចុះ។

បើក្រឡេកមកមើលលើប្រព័ន្ធផ្សព្វផ្សាយរបស់រដ្ឋចិនវិញគឺមានការតក់ស្លុតនិងសោកសៅជាខ្លាំងបន្ទាប់ពីបានឃើញថា គេហទំព័ររដ្ឋាភិបាលមួយចំនួនដាក់រូបស ខ្មៅនិងសរសេរនូវសាររំលែកទុកយ៉ាងក្រៀមក្រំទៅកាន់លោកលី ឃើឈែង។ មរណៈភាពរបស់លោកនាពេលនេះគឺមានន័យថា ជាការបាត់បង់សំឡេងក្នុងការសម្របសម្រួលដ៏សំខាន់មួយក្នុងអង្គគណៈរដ្ឋមន្ត្រីជាន់ខ្ពស់នៃបក្សកុម្មនីស្តចិន ដោយគ្មាននរណាអាចមកជំនួសកន្លែងគាត់បានឡើយ។

អ្នកលេងបណ្តាញសង្គម Weibo របស់ចិន បាននិយាយថា «លឿនពេកហើយ ទាំងដែលគាត់នៅវ័យក្មេងសោះ» ហើយអ្នកខ្លះក៏បានលើកឡើងដែរថា ការបាត់បង់រូបលោកដូចជាបាត់បង់សរសរផ្ទះដែលជាគ្រឹះដ៏រឹងមាំរបស់ពួកយើងអ៊ីចឹង។

គួរបញ្ជាក់ផងដែរថា លោកលីឃើជែងគឺជាអតីតនាយករដ្ឋមន្រ្តីឡើងកាន់អំណាចនៅឆ្នាំ២០១៣ដល់២០២៣ និងជាសមាជិកលំដាប់រងទី២ គណៈកម្មាធិការអចិន្ត្រៃយ៍ការិយាល័យនយោបាយនៃបក្សកុម្មនីស្តចិន មុនពេលដែលគាត់បានធ្វើការលាលែងនៅគ្រប់មុខតំណែងនយោបាយទាំងអស់កាលពីខែមីនាឆ្នាំ២០២៣នេះ។ គាត់ត្រូវបានគេស្គាល់ថាជាសេដ្ឋវិទូនិងឥស្សរជននយោបាយវៃឆ្លាតម្នាក់ក្នុងជំនាន់របស់គាត់។ គាត់ក៏បានក្លាយជាប្រធានក្រុមប្រឹក្សានិសិត្សនៅក្នុងសកលវិទ្យាល័យច្បាប់ដ៏មានសក្តានុពលមួយនាទីក្រុងប៉េកាំងបន្ទាប់ពីសលកវិទ្យាល័យនោះបានបើកឡើងវិញនៅក្នុងបដិវត្តវប្បធម៌របស់លោកម៉ៅសេទុង។ គាត់ត្រូវបានគេលើកឡើងថាជាបុគ្គលល្អបំផុតនៅក្រៅប្រទេសផងដែរ ហើយឈ្មោះ Li Keqiang នេះ ត្រូវបានដាក់ដោយក្រុមសេដ្ឋវិទូ ដើម្បីតំណាងដល់វឌ្ឍនភាពសេដ្ឋកិច្ចនៃប្រទេសចិនផងដែរ។ BBC News & CNA News