ប្រទេសវៀតណាម ៖ Nguyen Duc Toan ជានាយកប្រតិបត្តិរបស់ Google Cloud នៅប្រទេសវៀតណាម ជឿជាក់ថា Generative AI នឹងមានឥទ្ធិពលយ៉ាងខ្លាំងលើឧស្សាហកម្មហ្គេម ក្រោយពីការបង្ហាញខ្លួននៃរូបរាងក្រាហ្វិក 3D សម្រាប់ Real Time និងស្មាតហ្វូន ។ ក្រៅពីនេះ ឧស្សាហកម្មហ្គេមនឹងបំពេញតួនាទីជាសញ្ញាមួយដល់អាជីវកម្មផ្សេងៗ ព្រមទាំងណែនាំពីវិធីថ្មីដើម្បីផ្តល់ដំណឹង, ទាក់ទាញ និងតភ្ជាប់មនុស្សក្នុងទ្រង់ទ្រាយធំ ។

បណ្តាក្រុមហ៊ុនហ្គេមរបស់វៀតណាម ដូចជា VNG Games, Amanotes និង Wolffun Game បានបញ្ចេញមតិអំពីតួនាទីរបស់បច្ចេកវិទ្យា AI ដូចៗគ្នាថា បច្ចេកវិទ្យានេះបានចូលមកជួយដោះស្រាយបញ្ហាផ្សេងៗជាច្រើនទាំងផ្នែកខាងក្នុង និងខាងក្រៅនៃឧស្សាហកម្មហ្គេម ។

Vo Tuan Binh ជានាយកប្រតិបត្តិ និងសហស្ថាបនិកក្រុមហ៊ុន Amanotes លើកឡើងថា កត្តាមួយក្នុងចំណោមកត្តាដែលជួយឱ្យផលិតផលហ្គេមរបស់ក្រុមហ៊ុនមានចំនួនដោនឡូតតាមរយៈ App Stores ខ្ពស់បំផុតរហូតដល់៣ពាន់លាន គឺដោយសារការប្រើប្រាស់បច្ចេកវិទ្យា AI វិភាគទិន្នន័យ ។

រីឯ Nguyen Dinh Khanh ជានាយកប្រតិបត្តិរបស់ក្រុមហ៊ុន Wolffun Game លើកឡើងថា បុគ្គលិករបស់ក្រុមហ៊ុនអាចស្វែងរកដំណោះស្រាយក្នុងការងារផ្សេងៗពីបច្ចេកវិទ្យា AI ច្រើនជាង CEO ហើយអ្នកសរសេរ Code ក៏មានកំហុសឆ្គងតិចជាងមុនផងដែរ ព្រោះពួកគេយកបច្ចេកវិទ្យា AI មកជួយ ។ ក្រៅពីនេះ ក្រុមហ៊ុនបានដាក់គម្រោងយក Generative AI មកប្រើប្រាស់នៅក្នុង App ឈ្មោះ Thetan Creator ។ ដូច្នេះ វានឹងធ្វើឱ្យអ្នកប្រើប្រាស់អាចសម្រេចការងាររបស់ពួកគេតាមតម្រូវការ ។

ចំណែក Le Trong Giap មកពី VNG Games គឺជាក្រុមហ៊ុនចាប់ផ្តើមអាជីវកម្ម Unicorn របស់វៀតណាមមើលឃើញថា វាមិនត្រឹមតែជាឧស្សាហកម្មហ្គេមប៉ុណ្ណោះទេ ប៉ុន្តែបច្ចេកវិទ្យា AI ជាប្រធានបទក្តៅនៅគ្រប់វិស័យអាជីវកម្ម ។ ក្រុមហ៊ុន VNG Games កំពុងទាញយកបច្ចេកវិទ្យា AI មកប្រើប្រាស់ជាមួយហ្គេមដែលក្រុមហ៊ុនបានផលិតឡើង រួមទាំងហ្គេមជាច្រើនទៀតដែលក្រុមហ៊ុនបានលក់ ។ ហេតុនេះ បច្ចេកវិទ្យា AI នឹងជួយកាត់បន្ថយដំណើរការការងារ ជាពិសេស ពេលវេលាចំណាយលើការអភិវឌ្ឍផលិតផល ៕ ប្រភព ៖ AEC connect

សហរដ្ឋអាមេរិក៖ Meta ដែលជាក្រុមហ៊ុនមេរបស់ Facebook គ្រោងនឹងជ្រើសរើសបុគ្គលិកថ្មីជាច្រើននាក់បន្ថែមទៀត បន្ទាប់ពីបានកាត់បន្ថយបុគ្គលិកចំនួន ២១,០០០ នាក់ក្នុងរយៈពេលពីរជុំកន្លងមក។
យោងតាមគេហទំព័រ The Washington Post បានឱ្យដឹងថា ថ្មីៗនេះក្រុមហ៊ុនរបស់មហាសេដ្ឋី Mark Zuckerburg បានកត់ត្រាលទ្ធផលអាជីវកម្មនៅត្រីមាសទី ៣ ដ៏ផ្ទុះបន្ទាប់ពីនាំមកនូវប្រាក់ចំណូលចំនួន ៣៤,១៥ ពាន់លានដុល្លារអាមេរិក កើនឡើង ២៣% ធៀបនឹងរយៈពេលដូចគ្នាកាលពីឆ្នាំមុន ហើយប្រាក់ចំណេញសុទ្ធបានកើនឡើង ១៦៤% ដល់ ១១,៥៨ ពាន់លានដុល្លារ។ ដូច្នេះ ក្រុមហ៊ុន Meta គ្រោងនឹងបង្កើនការចំណាយសម្រាប់ការជ្រើសរើសបុគ្គលិកថ្មីបន្ថែមទៀតនៅក្នុងឆ្នាំ ២០២៤។

Meta បាននិយាយថា Reality Labs ដែលជាផ្នែកទទួលបន្ទុកបង្កើតពិភពនិម្មិត metaverse ទំនងជានឹងទទួលរងការខាតបង់កាន់តែច្រើននៅឆ្នាំក្រោយ។ ទន្ទឹមនឹងនេះ ក្រុមហ៊ុនបាននិយាយថា ខ្លួននឹងបន្ថែមធនធានមនុស្សបន្ថែមទៀត ដើម្បីគាំទ្រដល់វិស័យអាទិភាព ក៏ដូចជាបង្កើនចំនួនបុគ្គលិកបច្ចេកទេសខ្ពស់។ យោងតាមលោក Mark Zuckerburg ក៏បានប្រកាសដែរថា ក្រុមហ៊ុននឹងពន្លឿនការជ្រើសរើសបុគ្គលិកជាបណ្ដោះអាសន្ននៅឆ្នាំក្រោយ ដើម្បីដោះស្រាយភាពយឺតយ៉ាវនេះ។

គួរបញ្ជាក់ដែរថា កាលពីខែវិច្ឆិកា ឆ្នាំ២០២២ ក្រុមហ៊ុន Meta បានកាត់បន្ថយបុគ្គលិកប្រហែល ១១,០០០ នាក់ ដែលជាការបញ្ឈប់ការងារដ៏ធំលើកដំបូងនៅក្នុងប្រវត្តិសាស្រ្តរបស់ក្រុមហ៊ុន។ បន្ទាប់មកនៅខែមីនា ឆ្នាំ២០២៣ ក្រុមហ៊ុនបច្ចេកវិទ្យាយក្សនេះក៏បានប្រកាសពីផែនការបញ្ឈប់បុគ្គលិកចំនួន ១០,០០០ នាក់បន្ថែមទៀតដែលជាលើកទីពីររបស់ខ្លួនក្នុងការបញ្ឈប់បុគ្គលិក។ មូលហេតុនៃការបញ្ឈប់បុគ្គលិកគឺដោយសារក្រុមហ៊ុនមានភាពទន់ខ្សោយ ក៏ដូចជាខាតបង់ប្រាក់ជាច្រើនផងដែរ។

ទោះជាយ៉ាងណាក៏ដោយ បច្ចុប្បន្នក្រុមហ៊ុន Meta កំពុងបង្កើនការជ្រើសរើសបុគ្គលិកបន្ថែមទៀត ដើម្បីធ្វើការវិនិយោគក្នុងការអភិវឌ្ឍន៍ឧបករណ៍ AI សម្រាប់អ្នកផ្សាយពាណិជ្ជកម្ម និងអាជីវកម្មបញ្ញាសិប្បនិមិត្ត ក៏ដូចជាគាំទ្រដល់អាជីវកម្មដែលប្រើប្រាស់ AI ក្នុងការកំណត់អត្តសញ្ញាណអតិថិជន។ លោក Susan Li ប្រធានផ្នែកហិរញ្ញវត្ថុរបស់ Meta បានជូនដំណឹងថា បន្ថែមពីលើ AI ក្រុមហ៊ុននឹងផ្តោតលើការជួលក្នុងផ្នែកផ្សេងទៀត រួមទាំងការរកប្រាក់ ការបំប្លែងសារ និងការអនុលោមតាមច្បាប់៕

ប្រទេសថៃ ៖ លោក Chakra Yodmanee អគ្គនាយករងនៃនាយកដ្ឋានពាណិជ្ជកម្មផ្ទៃក្នុងប្រទេសថៃលើកឡើងថា កាលពីថ្ងៃទី២៩ ខែតុលា ឆ្នាំ២០២៣ លោកបានចុះត្រួតពិនិត្យមើលហាងលក់ផលិតផល Safe Mart នៅខេត្តឧត្តរថានី ដើម្បីតាមដានស្ថានការណ៍លក់ផលិតផលតាមគោលនយោបាយ «បញ្ចុះតម្លៃផលិតផលតាមការបញ្ជារបស់ក្រសួងពាណិជ្ជកម្ម» ។ គោលនយោបាយនេះស្ថិតក្រោមការត្រួតពិនិត្យរបស់លោក Phumitham Wechachai ឧបនាយករដ្ឋមន្ត្រី និងរដ្ឋមន្ត្រីក្រសួងពាណិជ្ជកម្ម ដើម្បីសម្រាលបន្ទុកការរស់នៅប្រចាំថ្ងៃរបស់ពលរដ្ឋ ។

ហាងលក់ផលិតផល Safe Mart និងហាងលក់ផលិតផលនៅតាមតំបន់ផ្សេងៗដែលស្ថិតក្នុងបណ្តាញហាងលក់រាយ និងលក់ដុំ ចំនួនជាង៦០ហាង ស្មើជាង៥០០សាខានៅទូទាំងប្រទេសថៃ បានរួមសហការជាមួយក្រសួងពាណិជ្ជកម្ម ដើម្បីបញ្ចុះតម្លៃផលិតផល គ្រឿងឧបភោគបរិភោគចាំបាច់ រួមទាំងចំណីអាហារ និងសម្ភារៈប្រើប្រាស់ ដូចជា សាប៊ូម្សៅ, សាប៊ូកក់សក់, សាប៊ូលាងចាន, អង្ករការ៉ុង, គ្រឿងទេស, មីកញ្ចប់, ប្រេងសណ្តែក និងស្ករសជាដើម ។

ចំណែកស្ករស ការិយាល័យគ្រប់គ្រងដំណាំអំពៅ និងស្ករស ទើបតែប្រកាសផ្លាស់ប្តូរតម្លៃនាពេលកន្លងមក ។ ដូច្នេះ ហាងលក់ផលិតផល Safe Mart នៅតែរក្សាតម្លៃលក់រាយធម្មតាតាមក្រសួងពាណិជ្ជកម្មស្នើឱ្យសហការរឿងតម្លៃ ដោយក្រសួងពាណិជ្ជកម្មបានស្នើឱ្យបញ្ចុះតម្លៃលក់ស្ករស ស្មើនឹង២៣បាតក្នុង១គីឡូក្រាម ។

ចំពោះស្ថានការណ៍ទូទៅ គឺពលរដ្ឋថៃបានទិញផលិតផលនានាជាធម្មតា ហើយផលិតផលលក់ដាច់ភាគច្រើនជាផលិតផលអាហារ និងគ្រឿងទេសផ្សេងៗ ។ ហេតុនេះ ហាងក៏បានត្រៀមផលិតផលសម្រាប់លក់ឱ្យបានគ្រប់គ្រាន់ ថែមទាំងបានផ្សព្វផ្សាយបញ្ចុះតម្លៃជាមួយក្រុមហ៊ុនផលិតផងដែរ ។ នេះចាត់ទុកថា វាជាការជួយសម្រាលបន្ទុកការចំណាយប្រចាំថ្ងៃដល់ពលរដ្ឋ ព្រមទាំងជំរុញឱ្យពលរដ្ឋទិញផលិតផល និងជំរុញសេដ្ឋកិច្ចថៃ ។

ក្រៅពីនេះ បណ្តាញហាងលក់ផលិតផលក្នុងស្រុកបានសហការជាមួយក្រសួងពាណិជ្ជកម្មរហូតមក ដើម្បីកំណត់ទីតាំងលក់ផលិតផលកសិកម្ម ជាពិសេស ផ្លែឈើតាមរដូវកាល ។ ការសហការនេះមានចំណែកជួយឱ្យបងប្អូនកសិករអាចលក់ទិន្នផលក្នុងតម្លៃល្អ ស្របតាមគោលនយោបាយ «កាត់បន្ថយការចំណាយ និងបង្កើនប្រាក់ចំណូល» ព្រមទាំងពង្រីកឱកាសសម្រាប់រដ្ឋាភិបាល ។

ចំណែកលោក Kanphong Surawanwijit នាយកហាងលក់រាយ និងលក់ដុំប្រចាំប្រទេសថៃ និងជាម្ចាស់ហាងលក់ផលិតផល Safe Mart លើកឡើងថា លោកត្រូវអរគុណដល់នាយកដ្ឋានពាណិជ្ជកម្មផ្ទៃក្នុងនៃក្រសួងពាណិជ្ជកម្ម ដែលបានគាំទ្របណ្តាញហាងលក់ផលិតផល ។ នេះជាហាងក្នុងស្រុកដែលបានចូលរួមអនុវត្តគោលនយោបាយរបស់ក្រសួង ព្រោះលោកយល់ឃើញថា វានឹងប៉ះពាល់ដល់ជីវភាពពលរដ្ឋ ដោយសារតម្លៃផលិតផលកើនឡើង ។

លោកបន្តថា ហាងរបស់លោកបានរៀបចំការផ្សព្វផ្សាយបញ្ចុះតម្លៃផលិតផលសម្រាប់អតិថិជនជាបន្តបន្ទាប់ ។ នៅថ្ងៃអនាគត ហាងរបស់លោកនឹងរួមសហការជាមួយគម្រោងផ្សេងៗដើម្បីជួយសម្រាលបន្ទុកពលរដ្ឋបន្តទៀត ៕ ប្រភព ៖ Mono News

ហ្វីលីពីន៖ ប៉ូលីសហ្វីលីពីនបានចាប់ខ្លួនក្រុមពេស្យាចារ និងអ្នកក្លែងបន្លំតាមអ៊ីនធឺណែតក្នុងទីក្រុងម៉ានីលចំនួនជិត ៦០០ នាក់ដើម្បីកំណត់អត្តសញ្ញាណជនរងគ្រោះពីការជួញដូរមនុស្ស។

យោងតាមគណៈកម្មាធិការប្រឆាំងឧក្រិដ្ឋកម្មដែលរៀបចំដោយប្រធានាធិបតីហ្វីលីពីន (PAOCC) បានប្រកាសកាលពីថ្ងៃទី ២៨ ខែតុលា អំពីការស្វែងរកកន្លែងមួយដែលត្រូវបានគេសង្ស័យថាជាកន្លែងជួញដូរមនុស្ស និងការក្លែងបន្លំតាមប្រព័ន្ធអ៊ីនធឺណែត ក្នុងតំបន់ទីប្រជុំជននៃរដ្ឋធានីម៉ានីល ដោយកាលពីយប់មុន ពលរដ្ឋហ្វីលីពីន និងជនបរទេសចំនួន ៧៣១ នាក់ត្រូវបានរកឃើញនៅទីនេះផងដែរ ក្នុងនោះមានពលរដ្ឋវៀតណាម កូរ៉េ និងចិន។

រដ្ឋមន្ត្រីក្រសួងយុត្តិធម៌លោក Crispin Remulla បាននិយាយថា បច្ចុប្បន្នទីភ្នាក់ងារស៊ើបអង្កេតបានឃុំខ្លួនមនុស្សចំនួន ៥៩៨ នាក់ ដើម្បីសាកសួរ និងកំណត់អត្តសញ្ញាណជនរងគ្រោះ ក៏ដូចជាជនសង្ស័យបន្ថែមទៀត។ មន្ត្រីហ្វីលីពីនក៏បានស្នើឱ្យស្ថានទូតចិននៅទីក្រុងម៉ានីលជួយកំណត់អត្តសញ្ញាណបុគ្គលចំនួន ៩ នាក់ ដែលសង្ស័យថាជាក្រុមប្រតិបត្តិករខុសច្បាប់ដែលក្លែងបន្លំជាក្រុមហ៊ុនហ្គេមអនឡាញ។

យោងតាម PAOCC ក៏បាននិយាយដែរថា ពួកគេបានរកឃើញជនជាតិចិនយ៉ាងហោចណាស់ពីរនាក់ដែលមានដាននៃការធ្វើទារុណកម្មលើរាងកាយរបស់ពួកគេ។ មនុស្សទាំងនេះបាននិយាយថា ពួកគេត្រូវបានឃុំខ្លួន និងបង្ខំឱ្យធ្វើការប្រហែល ១៥ ម៉ោងក្នុងមួយថ្ងៃ។ ជនរងគ្រោះទាំងនោះក៏បានបន្តទៀតថា ពួកគាត់ត្រូវបានគេចាប់ពង្រត់ទៅកាន់ក្រុមហ៊ុនល្បែងអនឡាញមួយក្នុងប្រទេសហ្វីលីពីន បន្ទាប់មកលក់ក្នុងតម្លៃ ៥០០,០០០ ប៉េសូ (ប្រមាណជាង ៨,៧០០ ដុល្លារអាមេរិក)។

គួរបញ្ជាក់ដែរថា កាលពីខែមិថុនាកន្លងទៅ ប៉ូលីសហ្វីលីពីនបានរកឃើញមនុស្សជាង ២,៧០០ នាក់ដែលកំពុងធ្វើការនៅក្នុងគ្រឹះស្ថានបោកប្រាស់ជាច្រើនក្នុងទីក្រុងម៉ានីល រួមទាំងជនរងគ្រោះនៃការជួញដូរមនុស្សជាច្រើននាក់ផងដែរ៕