យោងតាមសារព័ត៌មានបរទេសរាយការណ៍ថា បុគ្គលិកបម្រើការនៅលើយន្តហោះម្នាក់ឈ្មោះ ខេវីន បានបង្ហោះវីដេអូមួយក្នុងបណ្តាញសង្គម ហើយត្រូវបានមនុស្សជាច្រើននាក់ជជែកគ្នាអំពីវីដេអូនេះ ។ បុគ្គលិកបម្រើការនៅលើយន្តហោះរូបនិយាយថា អ្នកដំណើរពុំគួរពិសារកាហ្វេដែលខាងយន្តហោះយកមកជូនទេ ។

លោក ខេវីន បានបង្ហោះវីដេអូនេះក្នុងបណ្តាញសង្គម TikTok ហើយលោកបានឆ្លើយសំណួររបស់អ្នកលេងបណ្តាញសង្គម ដែលសួរថា ៖ «ក្នុងឋានៈលោកជាបុគ្គលិកបម្រើការនៅលើយន្តហោះ តើអ្វីជាភាពកខ្វក់ក្នុងការងាររបស់លោក?» ។

លោក ខេវីន ជាបុគ្គលិកបម្រើការលើយន្តហោះនិយាយថា សូមអ្នកដំណើរកុំពិសារកាហ្វេនៅលើយន្តហោះឱ្យសោះ ពីព្រោះធុងដាក់ទឹកស្ទើរតែពុំទទួលបានការសម្អាតឡើយ ហើយបុគ្គលិកក៏ប្រើប្រាស់ទឹកក្នុងធុងនេះសម្រាប់ឆុងកាហ្វេ ។ លោក ខេវីន បានប្រាប់ត្រង់ៗថា កាហ្វេនៅលើយន្តហោះខ្វះអនាម័យពិតមែន ហើយមិនត្រឹមតែមិនបានសម្អាតធុងដាក់ទឹកប៉ុណ្ណោះទេ ប៉ុន្តែហេតុផលមួយទៀត គឺប៉ាន់កាហ្វេ ។

បុគ្គលិកបម្រើការលើយន្តហោះរូបនេះបន្តថា កាហ្វេនៅសល់ក្នុងប៉ាន់កាហ្វេ ពួកគេមិនអាចចាក់ចោលទៅក្នុងបំពង់បង្ហូរទឹកបានទេ ។ ហេតុនេះ ពួកគេត្រូវចាក់វាចោលក្នុងចានបង្គន់ ហើយដើម្បីកុំឱ្យវាខ្ទាតចេញក្រៅ គឺត្រូវយកប៉ាន់កាហ្វេចាក់ឱ្យកៀកនឹងចានបង្គន់ ។ ហេតុនេះ វាធ្វើឱ្យមេរោគផ្សេងៗខ្ទាតចូលក្នុងប៉ាន់កាហ្វេដោយផ្ទាល់ ។

ក្រៅពីនេះ បុគ្គលិកបម្រើការនៅលើយន្តហោះបានណែនាំអ្នកដំណើរថា នៅពេលធ្វើដំណើរតាមយន្តហោះ អ្នកដំណើរត្រូវមកដល់អាកាសយានដ្ឋានឱ្យបានមុនពេលហោះហើរ និងទិញកាហ្វេខាងក្រៅយន្តហោះផឹកជំនួសវិញ ។

ក្រោយពីវីដេអូនេះបានបង្ហោះក្នុងបណ្តាញសង្គមធ្វើឱ្យអ្នកលេងបណ្តាញសង្គមចាប់អារម្មណ៍យ៉ាងខ្លាំង ហើយមនុស្សភាគច្រើននិយាយថា ៖ «អរគុណ សម្រាប់ការណែនាំ ចាប់ពីពេលនេះទៅ ពួកគេនឹងមិនផឹកកាហ្វេនៅលើយន្តហោះទៀតទេ» ។ មនុស្សខ្លះទៀតថា ៖ «នៅពេលឮបុគ្គលិកបម្រើការលើយន្តហោះសួរថា តើចង់ពិសារកាហ្វេ ឬទឹកតែ? អ្នកដំណើរនឹងព្រឺសម្បុរមិនខាន» ៕ ប្រភព ៖ khaosod

វៀតណាម៖ អ្នកជំនាញទេសចរណ៍ជាច្រើនសង្ឃឹមថាដំណើរទស្សនកិច្ចរបស់ប្រធានាធិបតី Xi Jinping ក្នុងសប្តាហ៍នេះនឹងជួយទីផ្សារទេសចរណ៍ចិនទៅកាន់ប្រទេសវៀតណាមកាន់តែច្រើនដែលឈានដល់អត្រាងើបឡើងវិញពី ៨០% ទៅ ៩០% នៅឆ្នាំ ២០២៤។យោងតាមប្រធានលេខាធិការដ្ឋានក្រុមប្រឹក្សាទេសចរណ៍របស់វៀតណាម (TAB) បាននិយាយថា ទីផ្សារទេសចរណ៍ចិនបានដើរតួនាទីយ៉ាងសំខាន់ក្នុងការបង្កើតការលើកទឹកចិត្តសម្រាប់ការអភិវឌ្ឍន៍នៃភ្ញៀវអន្តរជាតិមិនត្រឹមតែក្នុងប្រទេសវៀតណាមប៉ុណ្ណោះទេ ថែមទាំងក្នុងបណ្តាប្រទេសអាស៊ាន និងពិភពលោកទាំងមូលផងដែរ។ ដូច្នេះ ប្រទេសចិនតែងតែជាទីផ្សារបញ្ជូនដ៏ធំបំផុតរបស់ប្រទេសវៀតណាម។

យោងតាមរដ្ឋបាលទេសចរណ៍ជាតិបានឱ្យដឹងទៀតថា ក្នុងឆ្នាំ ២០១៩ គឺជាពេលដែលទេសចរណ៍វៀតណាមបានស្វាគមន៍ភ្ញៀវអន្តរជាតិច្រើនជាងគេក្នុងប្រវត្តិសាស្ត្រដែលមានចំនួនជាង ១៨ លាននាក់ ដោយភ្ញៀវទេសចរចិនបានមកច្រើនជាងគេរហូតទៅដល់ ៥.៨ លាននាក់ ប្រមាណ ៣២.២% នៃចំណែកទីផ្សារ។ ទោះជាយ៉ាងណា បន្ទាប់ពីមានជំងឺរាតត្បាត ទីផ្សារភ្ញៀវទេសចរចិនបានថយចុះយ៉ាងខ្លាំង។ គិតត្រឹមដំណាច់ខែវិច្ឆិកា ឆ្នាំ ២០២៣ នេះវៀតណាមបានស្វាគមន៍ភ្ញៀវចិនជាង ១.៥ លាននាក់ ដែលស្មើនឹង ១៣.៤% នៃចំណែកទីផ្សារ និងជាប់ចំណាត់ថ្នាក់ទីពីរបន្ទាប់ពីកូរ៉េខាងត្បូង។ អត្រាស្ទុះងើបឡើងវិញនៃភ្ញៀវទេសចរចិនក្នុងប្រទេសវៀតណាមគឺត្រឹមតែ ២៨.៨% ប៉ុណ្ណោះបើប្រៀបធៀបទៅនឹងមុនការរីករាលដាល។

ទោះជាយ៉ាងណាក៏ដោយ អ្នកជំនាញទេសចរណ៍ជាច្រើនរបស់វៀតណាមបាននិយាយថា ដំណើរទស្សនកិច្ចរបស់ប្រធានាធិបតី Xi Jinping នៅថ្ងៃទី ១២-១៣ ខែធ្នូនេះ នឹងមានសារៈសំខាន់ខ្លាំងណាស់ ដែលអាចបង្កើតលក្ខខណ្ឌសម្រាប់ប្រជាជនចិនជឿជាក់លើកិច្ចសហប្រតិបត្តិការជិតស្និទ្ធរវាងប្រទេសទាំងពីរ។ អ្នកជំនាញជឿថា បន្ទាប់ពីដំណើរកម្សាន្តរបស់លោក Xi នឹងជួយឱ្យទីផ្សារទេសចរណ៍ចិនទៅកាន់ប្រទេសវៀតណាមឈានដល់អត្រាងើបឡើងវិញពី ៨០% ទៅ ៩០% នៅឆ្នាំ ២០២៤។

ហេតុនេះហើយ បច្ចុប្បន្នវៀតណាមកំពុងរៀបចំគោលនយោបាយបន្ធូរបន្ថយ ឬលើកលែងទិដ្ឋាការសម្រាប់ភ្ញៀវទេសចរចិន ក៏ដូចជាជំរុញការផ្សព្វផ្សាយជាគោលដៅសុវត្ថិភាព មិត្តភាព និងស្វាគមន៍ភ្ញៀវទេសចរចិនដោយរួសរាយរាក់ទាក់ រួមទាំងទាក់ទាញអតិថិជនក្រុមនេះឱ្យត្រឡប់ទៅប្រទេសវៀតណាមវិញ ចាំបាច់ត្រូវមានផលិតផលក្នុងស្រុកជាច្រើនដែលមានគុណភាពខ្ពស់និងសេវាកម្មសមរម្យ៕

ប្រទេសអ៊ីតាលី ៖ កាលពីថ្ងៃទី១២ ខែធ្នូ ឆ្នាំ២០២៣ សារព័ត៌មានបរទេសរាយការណ៍ថា Lamborghini គឺជាក្រុមហ៊ុនរថយន្តទំនើបលំដាប់ពិភពលោក នៅប្រទេសអ៊ីតាលី បានចុះកិច្ចព្រមព្រៀងមួយជាមួយសហជីពការងារនៅអឺរ៉ុប អំពីការកាត់បន្ថយចំនួនថ្ងៃធ្វើការរបស់បុគ្គលិកផ្នែកផលិត នៅសល់ត្រឹមតែ៤ថ្ងៃប៉ុណ្ណោះក្នុង១សប្តាហ៍ ។ វាបានធ្វើឱ្យ Lamborghini ក្លាយជាក្រុមហ៊ុនរថយន្តដំបូងគេ ដែលបានចុះកិច្ចព្រមព្រៀងកាត់បន្ថយចំនួនថ្ងៃធ្វើការរបស់បុគ្គលិក ។

សហជីពការងារនៅអឺរ៉ុប FIOM និង FIM-CISL បញ្ជាក់ថា ការចុះកិច្ចព្រមព្រៀងលើកនេះ គឺជាព្រឹត្តិការណ៍ប្រវត្តិសាស្ត្រមួយ ខណៈក្រុមហ៊ុន Lamborghini មិនបានកាត់បន្ថយប្រាក់ខែរបស់បុគ្គលិកទេ បើទោះជាពួកគេកាត់បន្ថយចំនួនថ្ងៃធ្វើការក្តី ។ ផ្ទុយទៅវិញ ក្រុមហ៊ុនបានដំឡើងប្រាក់ខែឱ្យបុគ្គលិកបន្ថែមទៀត ពីព្រោះក្រុមហ៊ុនជឿជាក់ថា ចំនួនថ្ងៃធ្វើការធ្លាក់ចុះនឹងធ្វើឱ្យបុគ្គលិកធ្វើការកាន់តែមានប្រសិទ្ធភាពជាងមុន ។

ការចុះកិច្ចព្រមព្រៀងរបស់ក្រុមហ៊ុន Lamborghini ជាមួយសហជីពការងារនៅអឺរ៉ុប ស្របពេលក្រុមហ៊ុនជាច្រើនទៀតបានពិចារណាកាត់បន្ថយចំនួនថ្ងៃធ្វើការរបស់បុគ្គលិកក្នុង១សប្តាហ៍ ។ ការកាត់បន្ថយចំនួនថ្ងៃធ្វើការនេះ គឺដើម្បីលើកកម្ពស់គុណភាពជីវិតរបស់បុគ្គលិក, ជួយសន្សំសំចៃការចំណាយរបស់ក្រុមហ៊ុន និងកាត់បន្ថយការចំណាយដើមទុនដែលកើនឡើងខ្ពស់ផងដែរ ។

គម្រោងឱ្យបុគ្គលិកបំពេញការងារត្រឹមតែ៤ថ្ងៃក្នុង១សប្តាហ៍ ត្រូវបានបណ្តាប្រទេសជាច្រើននៅតំបន់អឺរ៉ុបយកមកអនុវត្ត ក្នុងនោះមានប្រទេសអង់គ្លេស ជាដើម ។ រីឯក្រុមហ៊ុនដែលបានសាកល្បងគម្រោងឱ្យបុគ្គលិកបំពេញការងារចំនួន៤ថ្ងៃក្នុង១សប្តាហ៍ឱ្យដឹងថា បុគ្គលិកអាចបំពេញការងារបានច្រើន នៅពេលចំនួនថ្ងៃធ្វើការរបស់ពួកគេធ្លាក់ចុះ ខណៈការសុំច្បាប់ឈឺ ក៏ធ្លាក់ចុះដែរ ។ ក្រៅពីនេះ ការជួលបុគ្គលិក និងការរក្សាបុគ្គលិកឱ្យធ្វើការជាមួយក្រុមហ៊ុនបន្តទៀត ក៏ល្អប្រសើរឡើងផងដែរ ៕ ប្រភព ៖ beartai BRIEF

បរទេស៖ ក្រុមហ៊ុន Apple បានទាក់ទងទៅក្រុមហ៊ុន Samsung Display ដើម្បីឱ្យជួយផលិតអេក្រង់ដែលអាចបត់បានសម្រាប់ iPhone,iPad និង MacBook របស់ខ្លួន។

យោងតាមប្រភពព័ត៌មាន iDrop News ដែលបានរាយការណ៍នៅថ្ងៃទី១២ ខែធ្នូថា Samsung Display បានកំពុងពង្រឹងមុខងាររអាជីវកម្មរបស់ខ្លួន ដោយផ្តោតលើសមត្ថភាពក្នុងការបំពេញតម្រូវការអេក្រង់ដែលអាចបត់បែនបានសម្រាប់ Apple ។ ក្រុមហ៊ុននេះក៏កំពុងត្រូវបានផ្តល់អាទិភាពក្នុងការជួយឧបករណ៍ដែលអាចបត់បានក្លាយជាការពេញនិយមនាពេលអនាគត។ ប្រាក់ចំណូល និងប្រាក់ចំណេញរបស់ក្រុមហ៊ុន Samsung Display នៅក្នុងវិស័យស្មាតហ្វូនភាគច្រើនស្ថិតនៅក្នុងផ្នែកអេក្រង់ OLED។ ក្រៅពីផលិតផលកំពូល Galaxy ទូរស័ព្ទ iPhone ក៏ជាប្រភពចំណូលដ៏សំខាន់របស់ក្រុមហ៊ុននេះផងដែរ។

បច្ចុប្បន្ន Samsung Display កំពុងឈានមុខគេនៅលើទីផ្សារអេក្រង់ដែលអាចបត់បានដោយការផ្តល់ជូនផ្តាច់មុខនូវបន្ទះ Galaxy Z Fold និង Z Flip ចាប់តាំងពីឆ្នាំ ២០១៩។ ការរៀបចំរចនាសម្ព័ន្ធនេះគឺមានគោលបំណង ដើម្បីការពារដៃគូប្រកួតប្រជែងពីការកាន់កាប់ទីផ្សារ។ សម្រាប់ LG Display វិញក៏ត្រូវបានគេនិយាយថានឹងចូលរួមក្នុងគម្រោងដែលទាក់ទងនឹងអេក្រង់បត់របស់ Apple រួមទាំងបន្ទះទំហំ 20.25 អ៊ីងផងដែរ។

យោងតាម Apple Insider បានឱ្យដឹងទៀតថា បច្ចុប្បន្ន Apple កំពុងអភិវឌ្ឍយ៉ាងស្ងៀមស្ងាត់ជាមួយ “iPhone Fold” ដែលមានអេក្រង់អាចបត់បានពាក់កណ្តាល ដោយដៃគូ Apple មួយចំនួននៅក្នុងប្រទេសកូរ៉េ អាចនឹងទទួលការកុម្ម៉ង់ក្នុងពេលឆាប់ៗនេះ ដើម្បីផលិតគ្រឿងបន្លាស់ដែលពាក់ព័ន្ធ។

ទោះបីជា iPhone ដែលអាចបត់បានទទួលបានការចាប់អារម្មណ៍ច្រើនពីសាធារណជនក៏ដោយ ក៏ក្រុមហ៊ុន Apple គ្រោងនឹងនាំយកអេក្រង់ដែលអាចបត់បានទៅកាន់ iPad និង MacBook Pro ជាមុនសិន ដែលរំពឹងថានឹងបង្ហាញខ្លួននៅក្នុងឆ្នាំ ២០២៤ ឬ ២០២៥។

យោងតាមអ្នកជំនាញបាននិយាយទៀតថា បន្ទាប់ពីបញ្ចេញ Galaxy Fold ជំនាន់ទី ៥ Samsung Display មានបទពិសោធន៍ច្រើនក្នុងការផលិតឧបករណ៍ដែលអាចបត់បាន។ កំណែទម្រង់នេះបង្ហាញថាក្រុមហ៊ុនកំពុងផ្តល់អាទិភាពដល់ការអភិវឌ្ឍន៍បច្ចេកវិទ្យាថ្មី ដោយធានាថាវាអាចបម្រើតម្រូវការអតិថិជន និងរក្សាបាននូវតំណែងឈានមុខគេនៅក្នុងទីផ្សាររបស់ពិភពលោក៕

ប្រទេសថៃ ៖ បើតាមវីដេអូថតដោយកាមេរ៉ាសុវត្ថិភាព កាលពីថ្ងៃទី១១ ខែធ្នូ ឆ្នាំ២០២៣ នៅក្បែរតារាងបាល់ទាត់ «យ៉ាតធៀម» ក្នុងស្រុកឡាំលូកា ខេត្តប៉ាធុមថានី ប្រទេសថៃ បង្ហាញថា ពីដំបូង គេបានឮសូរសំឡេងអ្នកគាំទ្របាល់ទាត់ស្រែកគាំទ្រយ៉ាងសប្បាយរីករាយ ប៉ុន្តែមួយសន្ទុះក្រោយមក ស្រាប់តែឮសំឡេងកាំភ្លើ.ងចំនួន៥គ្រាប់ ។ ហេតុការណ៍នេះបានធ្វើឱ្យមនុស្សម្នានៅទីនោះភ័យខ្លាច និងជ្រួលច្របល់យ៉ាងខ្លាំង ។

បើតាមអ្នកទៅមើលការប្រកួតបាត់ទាត់ប្រាប់ថា មុនដំបូង ពួកគេមានជម្លោះពាក្យសម្តីជាមួយគ្នា បន្ទាប់មក ជនល្មើសបានយកកាំភ្លើ.ងមកបាញ់គំរាមគូជម្លោះតែម្តង ។ សំណាងល្អ ហេតុការណ៍នេះគ្មានអ្នកម្នាក់រងរបួស ឬមានគ្រោះថ្នាក់ដល់ជីវិតទេ ។

ជនល្មើសបង្កហេតុក្នុងតារាងបាល់ទាត់ ឈ្មោះ ឌួង ភេទប្រុស អាយុ២១ឆ្នាំ ជនជាតិខ្មែរ ត្រូវបានសមត្ថកិច្ចថៃចាប់ខ្លួននៅចំណុចព្រំដែនបានឡែម ខេត្តចាន់ថៈបុរី ខណៈរូបគេបម្រុងរត់គេចខ្លួនទៅប្រទេសកម្ពុជា ។ ជនល្មើសសារភាពថា ខ្លួនបានបោះចោលកាំភ្លើ.ងបង្កហេតុនៅស្ពាន «ឌែងប៉ាកខ្លងរាំងស៊ីត» បន្ទាប់មក ខ្លួនបានជិះរថយន្តសំដៅទៅព្រំដែនបានឡែម ខេត្តចាន់ថៈបុរី បម្រុងរត់គេចខ្លួនទៅប្រទេសកម្ពុជា ។

ជនល្មើសសារភាពទៀតថា ខ្លួនជាមនុស្សតែម្នាក់គត់ ដែលបានបង្កហេតុក្នុងតារាងបាល់ទាត់នេះ ដោយសារខ្លួនមានជម្លោះជាមួយភាគីម្ខាងទៀត ហើយជម្លោះនេះមិនពាក់ព័ន្ធនឹងការប្រកួតបាល់ទាត់ទេ ។ រីឯកាំភ្លើ.ងបង្កហេតុ គឺខ្លួនបានទិញតាមអនឡាញ ក្នុងតម្លៃ៤ពាន់បាត ។

ក្រោយមក ក្រុមការងារសារព័ត៌មាន Thairath បានធ្វើដំណើរទៅកាន់ទៅផ្សារ «ស៊ីមុំមឿង ប៉ាធុមថានី» ជាកន្លែងធ្វើការរបស់ជនល្មើស ហើយខាងសារព័ត៌មាន Thairath ក៏បានជជែកជាមួយអតីតអ្នកគ្រងគ្រងជនល្មើសឱ្យដឹងថា ជនល្មើសមានក្រុមប្រមាណ១០០នាក់ ឈ្មោះថា «ក្រុម BK គុនខ្មែរ» ហើយសមាជិកក្រុមនេះបានសាក់សញ្ញាសម្គាល់នៅត្រង់ដៃ និងក ព្រមទាំងមានសម្លៀកបំពាក់ប្រចាំក្រុមទៀតផង ។ លើសពីនេះ ជនល្មើសចូលចិត្តធ្វើខ្លួនជាក្មេងស្ទាវ និងរករឿងអ្នកដទៃដោយគ្មានហេតុផល ។=

អតីតអ្នកគ្រងគ្រងជនល្មើស ក៏បាននាំក្រុមការងារសារព័ត៌មាន Thairath ទៅមើលបន្ទប់ជួលរបស់ជនល្មើស ហើយបានសាកសួរអ្នករស់នៅក្បែរនោះប្រាប់ថា ជននេះមានទំនាស់ជាមួយគេឯងគ្រប់គ្នា និងវាយតប់ទៀតផង ។ ក្រោយពីជនល្មើសបានបា.ញ់នៅតារាងបាល់ទាត់ គេបានឃើញជនល្មើសមកប្រមូលសម្ភារៈនៅបន្ទប់ជួល និងរត់គេចខ្លួន ។

ចំណែកគូជម្លោះជាមួយជនល្មើស ប្រាប់សមត្ថកិច្ចថា ខ្លួនសប្បាយចិត្តណាស់ ដែលសមត្ថកិច្ចចាប់ខ្លួនជនល្មើសបាន ។ ជនល្មើសបានបង្ករឿងរ៉ាវច្រើនណាស់ ហើយជននេះធ្លាប់ដេញកាប់ក្បាលមិត្តភក្តិរបស់ខ្លួនទៀតផងកាលពីពេលកន្លងមក ។ នៅថ្ងៃកើតហេតុ ជនល្មើសបានមកតារាងបាល់ទាត់ជាមួយបក្ខពួក៦នាក់ទៀត ហើយពេលចូលបន្ទប់ទឹក ជនល្មើសសួរថា «មើលអី?» ខ្លួនក៏ឆ្លើយថា «មើលមិនបានទេឬ?» ហើយភាគីទាំងពីរក៏ចាប់ផ្តើមមានជម្លោះពាក្យសម្តីគ្នា ។ ចុងក្រោយ ជនល្មើសក៏បានបា.ញ់កាំភ្លើ.ងឡើងលើជាច្រើនគ្រាប់ ។ គូជម្លោះបន្តថា ខ្លួនមិនបានណាត់គ្នាជាមួយជនល្មើសនៅតារាងបាល់ទាត់ទេ ប៉ុន្តែវាជាការជួបគ្នាដោយចៃដន្យ ។

រីឯអ្នកគ្រប់គ្រងនៅតារាងបាល់ទាត់បានទៅដាក់ពាក្យបណ្តឹងជនល្មើសនៅស្ថានីយប៉ូលិស ហើយជំហានដំបូង សមត្ថកិច្ចបានសាកសួរពីទ្រព្យសម្បត្តិមួយចំនួនដែលខូចខាត ។ ចំណែកតារាងបាល់ទាត់ត្រូវបិទទ្វារហាមចូលលេងបាល់ទាត់ ចំនួន១ថ្ងៃ ។ សមត្ថកិច្ចឱ្យដឹងថា ជនល្មើសឈ្មោះ ឌួង មិនត្រឹមតែជាប់ពន្ធនាគារទេ តែត្រូវសងប្រាក់ថ្លៃខូចខាតទៅតារាងបាល់ទាត់ផងដែរ ។

សមត្ថកិច្ចចោទប្រកាន់ថា ជនល្មើសបានបាញ់កាភ្លើ.ងនៅទីសាធារណៈ ហើយសមត្ថកិច្ចនឹងតាមចាប់បក្ខពួកផ្សេងទៀតដើម្បីចាត់ការតាមផ្លូវច្បាប់ បើទោះជាជនល្មើសសារភាពថា ខ្លួនបានបង្កហេតុតែម្នាក់ឯងក្តី ។ តាមរយៈការត្រួតពិនិត្យបង្ហាញថា ជនល្មើសបានស្នាក់នៅប្រទេសថៃ លើសថ្ងៃដែលថៃអនុញ្ញាត (Over Stay) តាំងពីខែកុម្ភៈ ឆ្នាំ២០២៣ មកម្ល៉េះ ៕ ប្រភព ៖ Thairath

ប្រទេសថៃ ៖ គណៈរដ្ឋមន្ត្រីថៃមានគម្រោងលើកលែងទិដ្ឋាការដល់វិនិយោគិនជប៉ុន ដោយពួកគេអាចស្នាក់នៅប្រទេសថៃបានរយៈពេល៣០ថ្ងៃ ហើយប្រទេសថៃនឹងចាប់ផ្តើមអនុវត្តគម្រោងនេះ ចាប់ពីថ្ងៃទី១ ខែមករា ឆ្នាំ២០២៤ រហូតដល់ថ្ងៃទី៣១ ខែធ្នូ ឆ្នាំ២០២៦ ។ ការលើកលែងទិដ្ឋាការដល់វិនិយោគិនជប៉ុន ក្នុងគោលបំណងផ្តល់ភាពងាយស្រួលក្នុងការចរចាអាជីវកម្ម និងការធ្វើកិច្ចសន្យាវិនិយោគនៅប្រទេសថៃ ខណៈជប៉ុនជាវិនិយោគិនលំដាប់ទី១ របស់ថៃអស់រយៈពេលយូរឆ្នាំមកហើយ ។

លោក Karom Phonphonklang អ្នកនាំពាក្យរងប្រចាំការិយាល័យនាយករដ្ឋមន្ត្រីថៃ បានលើកឡើងថា ក្នុងកិច្ចប្រជុំគណៈរដ្ឋមន្ត្រី នៅថ្ងៃទី១២ ខែធ្នូ ឆ្នាំ២០២៣ បានអនុម័តគម្រោងលើកលែងទិដ្ឋាការសម្រាប់វិនិយោគិនជប៉ុន តាមការស្នើសុំរបស់ក្រសួងការបរទេស ។

គម្រោងលើកលែងទិដ្ឋាការសម្រាប់វិនិយោគិនជប៉ុន ដើម្បីឱ្យពួកគេអាចស្នាក់នៅប្រទេសថៃរយៈពេល៣០ថ្ងៃ ដោយពុំចាំបាច់ស្នើសុំទិដ្ឋាការធ្វើដំណើរចូលមកប្រទេសថៃទេ ខណៈកន្លងមក ប្រទេសថៃបានលើកលែងទិដ្ឋាការដល់ភ្ញៀវទេសចរជប៉ុនតែប៉ុណ្ណោះ ។ គម្រោងលើកលែងទិដ្ឋាការនេះ នឹងអនុវត្តចាប់ពីថ្ងៃទី១ ខែមករា ឆ្នាំ២០២៤ រហូតដល់ថ្ងៃទី៣១ ខែធ្នូ ឆ្នាំ២០២៦ ។

លោក Karom Phonphonklang អ្នកនាំពាក្យរងប្រចាំការិយាល័យនាយករដ្ឋមន្ត្រីថៃ បន្តថា គម្រោងនេះនឹងជួយផ្តល់ភាពងាយស្រួលដល់បណ្តាវិនិយោគិនជប៉ុន ដែលជាវិនិយោគិនលំដាប់ទី១ នៅប្រទេសថៃអស់រយៈពេលយូរឆ្នាំមកហើយ ។ លើសពីនេះ ប្រទេសជប៉ុន គឺជាដៃគូពាណិជ្ជកម្មលំដាប់ទី៣ របស់ថៃផងដែរ ដែលថៃចាត់ទុកថា ជប៉ុនជាអ្នកជំនួញដ៏សំខាន់បំផុតសម្រាប់សេដ្ឋកិច្ចថៃ ។

រីឯលោក Chai Watcharong អ្នកនាំពាក្យប្រចាំការិយាល័យនាយករដ្ឋមន្ត្រីថៃឱ្យដឹងដែរថា ជាធម្មតា វិនិយោគិនជប៉ុនបានធ្វើដំណើរមកប្រទេសថៃ ដើម្បីចរចាពីការវិនិយោគទុន និងការធ្វើកិច្ចសន្យាជាច្រើន ។ ការលើកលែងទិដ្ឋាការនេះ នឹងជួយឱ្យពួកគេអាចធ្វើដំណើរមកកាន់ប្រទេសថៃកាន់តែងាយស្រួល ។ ចំណែកវិនិយោគិន និងភ្ញៀវទេសចរថៃ ក៏អាចធ្វើដំណើរទៅកាន់ប្រទេសជប៉ុន តាមវិធានការស្រដៀងគ្នានេះដែរ ៕ ប្រភព ៖ Bangkok biznews