បរទេស៖ ប៉ូលីសបារាំងបានបញ្ឈប់យន្តហោះ Airbus A340 ដែលដឹកអ្នកដំណើរឥណ្ឌាជាង ៣០០ នាក់ បន្ទាប់ពីទទួលបានរបាយការណ៍ថាជើងហោះហើរនេះ “មានជនរងគ្រោះនៃការជួញដូរមនុស្ស” ។

យោងតាមប្រភពព័ត៌មាន WIONEWS ដែលបានរាយការណ៍នៅថ្ងៃទី២២ ខែធ្នូថា យន្តហោះ Airbus A340 បានចុះចតនៅអាកាសយានដ្ឋាន Vatry ភាគខាងកើតប្រទេសបារាំងដើម្បីត្រួតពិនិត្យបច្ចេកទេស។ បន្ទាប់មកអាជ្ញាធរបារាំងក៏បានបញ្ឈប់យន្តហោះ A340 ហើយបានចាប់ខ្លួនមនុស្សពីរនាក់ បន្ទាប់ពីទទួលបានព័ត៌មានអនាមិកថា មានអ្នកដំណើរនៅលើយន្តហោះនោះគឺជា “ជនរងគ្រោះនៃការជួញដូរមនុស្ស”។

ព្រះរាជអាជ្ញាបាននិយាយថា អង្គភាពប្រឆាំងឧក្រិដ្ឋកម្មដែលរៀបចំដោយ JUNALCO របស់ប្រទេសបារាំងកំពុងស៊ើបអង្កេតការចោទប្រកាន់នេះ។ ការិយាល័យរដ្ឋអាជ្ញាទីក្រុងប៉ារីសបានប្រកាសថា “យើងកំពុងពិនិត្យមើលអត្តសញ្ញាណរបស់ 303 និងនាវិក” ដោយនិយាយថាពួកគេក៏បានពិចារណាអំពីស្ថានភាពនៃអ្នកដំណើរ និងគោលបំណងនៃការធ្វើដំណើរផងដែរ។

យន្តហោះ Airbus A340 ដែលត្រូវបានរារាំងនោះគឺជាកម្មសិទ្ធិរបស់ក្រុមហ៊ុនអាកាសចរណ៍ Legend ដោយចេញដំណើរពីសហព័ន្ធអារ៉ាប់រួម (UAE) ទៅកាន់ប្រទេស នីការ៉ាហ្គានៅអាមេរិកកណ្តាល។ ប្រភពមួយបាននិយាយថា អ្នកដំណើរខ្លះនៅលើជើងហោះហើរគ្រោងទៅអាមេរិកកណ្តាល ហើយបន្ទាប់មករកផ្លូវឆ្លងព្រំដែនចូលទៅ អាមេរិក ឬកាណាដា។

ទោះជាយ៉ាងណាក៏ដោយ យោងតាមអ្នកតំណាងក្រុមហ៊ុនអាកាសចរណ៍ Legend Airlines បានបញ្ជាក់ថា ក្រុមហ៊ុនអាកាសចរណ៍នេះមិនបានធ្វើអ្វីខុស និងគ្មានបទឧក្រិដ្ឋនោះទេ។ Legend Airlines គឺជាក្រុមហ៊ុនអាកាសចរណ៍តូចមួយរបស់រ៉ូម៉ានីដែលមានយន្តហោះចំនួន ៤ ប៉ុណ្ណោះ។

ហេតុនេះហើយ ឆ្មាំព្រំដែនបារាំងមានសិទ្ធិបញ្ឈប់ និងឃុំខ្លួនជនបរទេសដែលសង្ស័យថាបានប្រព្រឹត្តបទឧក្រិដ្ឋរហូតដល់ ៤ ថ្ងៃនៅពេលពួកគេមកដល់ប្រទេស។ ប្រសិនបើចៅក្រមយល់ព្រមនោះ រយៈពេលនៃការឃុំខ្លួនអាចបន្តរហូតដល់អតិបរមា ២៦ ថ្ងៃ។ ដូច្នេះការជួញដូរមនុស្សនៅប្រទេសបារាំងត្រូវផ្តន្ទាទោសដាក់ពន្ធនាគារអតិបរមា ២០ ឆ្នាំ៕

និស្សិតរាប់សិបនាក់ក្នុងប្រទេសកូរ៉េខាងត្បូងកំពុងទាមទារសំណងពីរដ្ឋាភិបាល បន្ទាប់ពីការប្រឡងចូលមហាវិទ្យាល័យដ៏សំខាន់មួយបានបញ្ចប់មុនរយៈពេល ៩០ វិនាទី (១នាទីកន្លះ)ដោយបញ្ជាក់ថាវាជាពេលវេលាដ៏មានន័យណាស់។

កាលពីថ្ងៃអង្គារទី១៩ ខែធ្នូ ឆ្នាំ២០២៣នេះ យ៉ាងហោចណាស់មានសិស្សចំនួន ៣៩ នាក់បានដាក់ពាក្យប្តឹងទៅតុលាការទីក្រុងសេអ៊ូល ដោយម្នាក់ៗទាមទារប្រាក់ចំនួន ២០ លានវ៉ុន (១៥ ០០០ ដុល្លារ) ជាប្រាក់ថ្លៃសងការសិក្សារយៈពេល១ឆ្នាំ ដើម្បីធ្វើការប្រឡងឡើងវិញនៅឆ្នាំក្រោយទៀត។

ការធ្វើតេស្តចូលរៀននៅមហាវិទ្យាល័យដ៏ល្បីរបស់ប្រទេសកូរ៉េខាងត្បូង ដែលត្រូវបានគេស្គាល់ថា ស៊ុន អ៊ឹង ដែលជាការប្រឡងដ៏ពិបាកបំផុតមួយក្នុងពិភពលោក និងតម្រូវឲ្យមានការរត់ម៉ារ៉ាតុងរយៈពេលប្រាំបីម៉ោង។ ការដែលបានចូលរៀននៅសាកលវិទ្យាល័យនេះ មិនត្រឹមតែផ្តល់នូវការបង្រៀនដែលមានគុណភាពខ្ពស់ប៉ុណ្ណោះទេ តែវាផ្សារភ្ជាប់ជាមួយនឹងទំនាក់ទំនងនាពេលអនាគតរួមមានទាំងអាជីព ឋានៈមុខមាត់ក្នុងសង្គម និងសូម្បីការរៀបអាពាហ៍ពិពាហ៍ជាមួយនរណាម្នាក់ ក៏អាស្រ័យទៅលើថាតើបុគ្គលម្នាក់នោះពិតជាបានរៀននៅសកលវិទ្យាល័យដ៏មានកិត្យានុភាពដែរ។

លទ្ធផលប្រឡងឆ្នាំនេះត្រូវបានចេញផ្សាយតាំងពីថ្ងៃទី ៨ ខែធ្នូ ហើយពាក្យបណ្តឹង ត្រូវបានប្តឹងកាលពីថ្ងៃទី១៩ ខែធ្នូ ដោយសិស្សយ៉ាងហោចណាស់ ៣៩ នាក់បានអះអាងថាកណ្តឹងបានបន្លឺឡើងមុនកំណត់ អំឡុងពេលប្រឡងមុខវិជ្ជាភាសាកូរ៉េដំបូងរបស់ពួកគេ។

នៅអំឡុងពេលនោះ សិស្សខ្លះបានតវ៉ាភ្លាមៗ ប៉ុន្តែអនុរក្សនៅតែបន្តយកឯកសាររបស់ពួកគេចេញទៅ។ បន្ទាប់មក អនុរក្សក៏បានទទួលស្គាល់កំហុស ហើយបានផ្តល់រយៈពេលមួយនាទីកន្លះត្រឡប់ទៅពួកគេវិញក្នុងអំឡុងពេលសម្រាកអាហារថ្ងៃត្រង់។ ពួកគេអាចបំពេញបានតែចន្លោះដែលនៅសល់ និងមិនអនុញ្ញាតឲ្យធ្វើការផ្លាស់ប្តូរចម្លើយដែលមានស្រាប់ជាដាច់ខាត។

ទីភ្នាក់ងារសារព័ត៌មាន Yonhap បានរាយការណ៍ថា សិស្សទាំងនោះបាននិយាយថា ពួកគេមានការខកចិត្តយ៉ាងខ្លាំង ដែលពួកគេមិនអាចផ្តោតលើការប្រឡងដែលនៅសេសសល់ ហើយក៏មានអ្នកខ្លះក៏បានបោះបង់ការប្រឡងចោល និងបានត្រឡប់មកផ្ទះវិញ។

ទោះជាយ៉ាងណា អាជ្ញាធរអប់រំមិនបានផ្តល់ការសុំទោស ឬការពន្យល់ណាមួយទេ ខណៈមេធាវីក៏បានចោទប្រកាន់ដោយបន្ថែមថា អនុរក្សបានប្រើឧបករណ៍ផ្ទាល់ខ្លួនជំនួសឱ្យនាឡិកាកំណត់របស់រដ្ឋ។

គួរបញ្ជាក់ផងដែរថា នេះមិនមែនជាលើកទីមួយទេ ដែលនិស្សិតប្ដឹងទៅលើការបញ្ឈប់ការប្រលងមុនកំណត់បែបនេះ។ ដោយកាលពីខែមេសា ឆ្នាំ២០២១នេះ តុលាការទីក្រុងសេអ៊ូលបានផ្តល់សំណងចំនួន ៧លានវ៉ុន ( ៥ ២៥០ ដុល្លារ) ដល់សិស្សបានប្តឹងការប្រឡង Suneung ដោយសារតែបានបញ្ឈប់ការប្រឡងរបស់ពួកគេមុនប្រហែល២នាទី។ រីឯកាលពីឆ្នាំ ២០១២វិញ បុរសម្នាក់នៅក្នុងប្រទេសចិនត្រូវបានកាត់ទោសព្យួររយៈពេល ១ ឆ្នាំ សម្រាប់ការបន្លឺកណ្ដឹងនិងបញ្ឈប់ការប្រឡងរបស់សិស្សមុនកំណត់(រយៈពេល ៤ នាទី ៤៨ វិនាទី) សម្រាប់ការប្រឡងចូលមហាវិទ្យាល័យថ្នាក់ជាតិមួយក្នុងខេត្ត Hunan ផងដែរ៕

សោកនាដកម្ម១០ឆ្នាំត្រូវបានផ្ទុះកក្រើកសាជាថ្មីបន្ទាប់ពីជនជាប់ចោទជាឪពុកបានសម្លាប់កូនស្រីរបស់ខ្លួនវ័យ១៣ឆ្នាំដោយបានសារភាពថាខ្លួនទប់កំហឹងមិនជាប់បន្ទាប់ពីកូនស្រីមិនប្រឹងខិតខំរៀនសូត្រ ស្រលាញ់ងប់ងល់ខ្លាំងជាមួយតារា K-Pop EXO ហើយថែមទាំងកូនស្រីនិយាយថាស្រលាញ់ក្រុមនេះជាងឪពុកម្តាយ១០០០ដង។ ហេតុការណ៍នេះគឺបានកើតឡើងនៅឯប្រទេសចិន។

យោងតាមការចុះផ្សាយរបស់សារព័ត៌មាន Koreaboo បានឱ្យដឹងថា សោកនាដកម្មនេះបានចាប់ផ្តើមនៅក្នុងខែវិច្ឆិកា ឆ្នាំ២០១៣ នៅពេលដែលក្មេងស្រីម្នាក់គេចមិនទៅសាលារៀន បន្ទាប់ពីក្នុងកាតាបរបស់គេរកមិនឃើញសម្ភារៈសិក្សា។ ឪពុកក្មេងស្រីនោះមានឈ្មោះ Zhou Kai បានត្អូញត្អែរអំពីអាកប្បកិរិយាព្រងើយកន្តើយរបស់កូនខ្លួនចំពោះការសិក្សា។ លោកកត់សម្គាល់ដឹងយ៉ាងច្បាស់ថាកូនស្រីរបស់ខ្លួនចាប់អារម្មណ៍នឹងក្រុមដែលកូនស្រីចូលចិត្តជាងគេគឺ EXO ជាងការសិក្សាទៀត។

បុរសជាឪពុកបានដាស់តឿនកូនស្រី ព្រោះតែកូនស្រីរបស់ខ្លួនគិតតែពីអង្គុយមុខកុំព្យូទ័រ គ្រប់ពេលដឹងតែពីការចាយមិនដឹងថាប្រាក់ពិបាករកប៉ុណ្ណានោះទេ ឯកូនស្រីបានបោះសម្តីវិញថា ខ្លួនអាចសងលុយបុរសជាឪពុកវិញនៅពេលអនាគត។ បុរសជាឪពុកនោះបានបន្តដោយប្រើពាក្យសម្តីទន់ភ្លន់ទៀតថា ឪពុកម្តាយគឺយកចិត្តទុកដាក់ចំពោះកូនស្រីច្រើនជាងក្រុម K-Pop ដែលកូនចូលចិត្តទៅទៀត មិនថាតារាទាំងនោះពូកែប៉ុណ្ណាក៏ដោយ ក៏គេមិនស្រឡាញ់កូនស្រីដូចឪពុកម្ដាយដែរធ្វើដូចនេះវាប៉ះពាល់ដល់ការសិក្សា។
យ៉ាងណាមិញ ស្ថានភាពពីការប្រើសម្តីទន់ភ្លន់បែរជាឈានដល់ចាក់សម្លាប់កូនស្រីខ្លួនព្រោះតែប្រយោគពីរឃ្លារបស់កូនស្រី ។ កេ្មងស្រីនោះបាននិយាយថា« នាងស្រលាញ់ក្រុម EXO ជាងនាងស្រលាញ់ឪពុក១០០០ដង !Idol ល្អជាងឪពុកទៅទៀត។
ដោយមានកំហឹង បុរសជាឪពុកបានដកកាំបិតចេញពីផ្ទះបាយ ដោយមានបំណងចង់គំរាមកូនស្រី។ ទោះបីជាយ៉ាងណាក៏ដោយ កូនស្រីបុរសនោះស្រែកថា “Idols ល្អជាងឪពុកម្តាយល្អជាងឪពុក បានធ្វើឱ្យបុរសនោះមិនអាចទប់កំហឹងបានហើយចាក់កូនស្រីរបស់ខ្លួនតែម្តង។

បន្ទាប់ពីចាក់សម្លាប់កូនស្រី បុរសនោះក៏បានអារកដៃរបស់ខ្លួនដែរដោយសារដឹងកំហុសរបស់ខ្លួននៅពេលឃើញរាងកាយកូនស្រីដេកស្តូកស្តឹងនៅចំពោះមុខ ប៉ុន្តែបុរសនោះបានឆ្លងផុតតំណាក់កាលគ្រោះថ្នាក់បន្ទាប់ពីត្រូវបានគេនាំទៅបន្ទប់សង្គ្រោះបន្ទាន់នៅក្បែរនោះ។ បុរសនោះបានសារភាពថាបានប្រព្រឹត្តបទឧក្រិដ្ឋនេះមួយឆ្នាំក្រោយមកនៅក្នុងតុលាការដោយ បានពន្យល់នៅចំពោះមុខចៅក្រមថា ទំនាក់ទំនងរបស់ខ្លួនជាមួយកូនស្រី កាន់តែតានតឹងនៅពេលដែលកូនស្រីខ្លួនចាប់ផ្តើមឈ្លក់វង្វេងនឹង EXO ។ នៅក្នុងបន្ទប់កូនស្រីខ្លួនពីលើចុះក្រោមសុទ្ធតែផ្ទាំងរូបភាព និងទំនិញរបស់ក្រុមចម្រៀងនេះថែមទាំងមិនឱ្យនរណាទៅជិតកុំព្យូទ័ររបស់នាទេ ហើយចំណាយពេលភាគច្រើនរបស់នាងរៀបចំព្រឹត្តិការណ៍សម្រាប់អ្នកគាំទ្រ EXO ដែលនាងបានចូលរួម។

នៅពេលមួយ នាងថែមទាំងទាមទារឱ្យឪពុករបស់នាងចេញថ្លៃសំបុត្រយន្តហោះសម្រាប់ខ្លួននាង និងមិត្តភក្តិរបស់នាង ដើម្បីមើលក្រុម EXO សម្តែងផ្ទាល់នៅទីក្រុងប៉េកាំងហើយជើងហោះហើរតែមួយមានតម្លៃ១,២០០ យន់ (ប្រមាណ១៦៨ដុល្លារ) ដែលច្រើនជាងប្រាក់ខែប្រចាំខែរបស់បុរសជាឪពុកទៅទៀត។ យាយរបស់ក្មេងស្រីនោះបានចំណាយប្រាក់ ២ ៧០០ យន់ (ប្រមាណ ៣៨០ ដុល្លារ) ដើម្បីបំពេញបំណងប្រាថ្នាចៅស្រី។ នៅក្នុងតុលាការ លោក Zhou Kai បានសម្តែងការសោកស្ដាយយ៉ាងនៅចំពោះមុខតុលាការនូវអំពើរបស់ខ្លួន៕

បរទេស៖ ព្រះវិហារ Minderbroeders ដែលបានសាងសង់ក្នុងសតវត្សទី ១៨ នៅទីក្រុង Sint-Truiden ប្រទេសប៊ែលហ្ស៊ិក បច្ចុប្បន្នបានប្រែក្លាយទៅជាកន្លែងជិះស្គីទឹកកកសម្រាប់ពិធីបុណ្យណូអែល។

យោងតាមគេហទំព័រអន្តរជាតិ Reuters ដែលបានចុះផ្សាយនៅថ្ងៃទី២២ ខែធ្នូថ្មីៗនេះថា អ្នកទេសចរណ៍ទាំងអស់អាចមកជិះស្គីទឹកកកក្នុងព្រះវិហារ Minderbroeders ដោយសេរី ជាមួយនឹងការចាក់តន្ត្រីជាបន្តបន្ទាប់ រួមទាំងមានរូបភាពភ្លើងពណ៌នៃរាត្រីដែលមានផ្កាយបញ្ចាំងនៅលើពិដានដ៏ស្រស់ស្អាតផងដែរ។Ella-june Briers អាយុ ១២ ឆ្នាំបាននិយាយថា “ការជិះស្គីទឹកកកនៅក្នុងព្រះវិហារធ្វើឱ្យបរិយាកាសបុណ្យណូអែលកាន់តែសប្បាយខ្លាំង និងអស្ចារ្យណាស់សម្រាប់នាង”។
ជាធម្មតា អ្នករៀបចំពិព័រណ៍បុណ្យណូអែលនៅទីក្រុង Sint-Truiden ដែលជាទីក្រុងមួយនៅភាគខាងកើតប្រទេសបែលហ្ស៊ិក បានបង្កើតកន្លែងជិះស្គីលើទឹកកកនៅខាងក្រៅ ប៉ុន្តែនៅឆ្នាំនេះ ពួកគេបានរើកន្លែងជិះស្គីក្នុងព្រះវិហារវិញ ដើម្បីជៀសវាងភាពត្រជាក់ និងទាញយកអត្ថប្រយោជន៍ពីកន្លែងប្រពៃណីផងដែរ។

លោក Philip Bronckaerts ប្រធានសមាគមពាណិជ្ជកម្ម Sint-Truiden ដែលជាអ្នករៀបចំពិព័រណ៍បាននិយាយថា “នេះគឺជាកន្លែងជិះស្គីអេកូឡូស៊ី ដែលមិនមានការបំភាយឧស្ម័ន CO2 ឡើយ ដោយព្រះវិហារនេះបានឈប់ធ្វើជាកន្លែងគោរពបូជាតាំងពីយូរយារណាស់មកហើយ”។

ទោះជាយ៉ាងណាក៏ដោយ កន្លែងជិះស្គីលើទឹកកក និងពិព័រណ៍បុណ្យណូអែលរបស់ទីក្រុងគឺបើករហូតដល់ថ្ងៃទី ៧ ខែមករា ឆ្នាំ ២០២៤។
គួរបញ្ជាក់ដែរថា វិហារ Minderbroeders ត្រូវបានសាងសង់ឡើងនៅក្នុងឆ្នាំ ១៧៣១ ដោយស្ថាបត្យកម្ម Baroque និងគោរពបូជា Saint Francis Solanus ដែលជាព្រះសង្ឃអេស្ប៉ាញដែលគោរពបូជាភាគច្រើននៅអាមេរិកខាងត្បូង៕

ប្រទេសវៀតណាម ៖ ប្រទេសវៀតណាមបានធ្វើកិច្ចព្រមព្រៀងជាមួយប្រទេសថៃ និងហ្វីលីពីន ដើម្បីពង្រឹងកិច្ចសហការនាំចេញអង្ករទៅកាន់ទីផ្សារពិភពលោក ។ ការសហការគ្នានេះ មានគោលបំណងធានានូវសន្តិសុខស្បៀងលំដាប់ពិភពលោក និងតំបន់ ។

ការសម្រេចបាននូវកិច្ចព្រមព្រៀងរួមគ្នាបានកើតឡើងនៅពេលលោក Pham Minh Chin នាយករដ្ឋមន្ត្រីវៀតណាម បានជួបជាមួយនាយករដ្ឋមន្ត្រីថៃ លោក សេដ្ឋា ថាវីស៊ីន និងប្រធានាធិបតីហ្វីលីពីន លោក Ferdinand Romualdez Marcos ក្នុងកិច្ចប្រជុំកំពូលអាស៊ាន-ជប៉ុន កាលពីថ្ងៃទី១៧ ខែធ្នូ ឆ្នាំ២០២៣ ។

បច្ចុប្បន្ន ប្រទេសថៃ គឺជាដៃគូពាណិជ្ជកម្មធំបំផុតរបស់វៀតណាមនៅតំបន់អាស៊ាន ។ ជាមួយគ្នានេះ ថៃ គឺជាវិនិយោគិនបរទេសលំដាប់ទី៩ របស់វៀតណាមផងដែរ ។ ប្រទេសវៀតណាម និងថៃ មានគំនិតផ្តួចផ្តើមលើការភ្ជាប់ផ្នែកចំនួន៣ ហើយប្រទេសទាំងពីរនឹងផ្តល់ភាពសំខាន់លើកិច្ចសហការថ្មីៗ ដូចជា ៖ ការឈានទៅរកបច្ចេកវិទ្យាឌីជីថល និងសេដ្ឋកិច្ចបៃតង ។

នាយករដ្ឋមន្ត្រីវៀតណាម និងប្រធានាធិបតីហ្វីលីពីនបានយល់ព្រមបង្កើនកិច្ចសហការនាំចេញអង្ករ ដើម្បីធានានូវសន្តិសុខស្បៀងលំដាប់ពិភពលោក និងតំបន់ ខណៈប្រទេសទាំងពីរនេះបាននាំចេញអង្ករទៅកាន់បណ្តាប្រទេសជាច្រើន ។

ប្រទេសហ្វីលីពីន ក៏បាននាំចូលអង្ករពីវៀតណាមផងដែរ ហើយក្នុងចំណោមប្រទេសនាំចូលអង្ករពីវៀតណាម គឺហ្វីលីពីនបាននាំចូលអង្ករវៀតណាមច្រើនបំផុត ។ ជាក់ស្តែង ក្នុងរយៈពេល៩ខែដំបូងនៃឆ្នាំ២០២៣ ហ្វីលីពីនបាននាំចូលអង្ករវៀតណាម រហូតដល់២លាន៤សែនតោនឯណោះ ។

នៅឆ្នាំ២០២៣ នេះ តម្លៃជាមធ្យមរបស់អង្ករវៀតណាម គឺស្មើនឹង៥៦៨ដុល្លារអាមេរិកក្នុង១តោន កើនឡើង១៧% បើធៀបនឹងរយៈពេលដូចគ្នាកាលពីឆ្នាំ២០២២ ៕ ប្រភព ៖ AEC connect