បរទេស៖ ក្រុមហ៊ុនអាកាសចរណ៍ចិនចំនួន ១០ បានលុបចោលជើងហោះហើរទៅកាន់ប្រទេសថៃក្នុងខែធ្នូ និងខែមករា ឆ្នាំ ២០២៤ ដោយសារតែតម្រូវការទេសចរណ៍ទាប។

យោងតាមលោក Suttipong Kongpool អគ្គនាយកអាជ្ញាធរអាកាសចរណ៍ស៊ីវិលថៃ (CAAT) បានឱ្យដឹងថា ក្រុមហ៊ុនអាកាសចរណ៍ចិនចំនួន ១០ ដែលលុបចោលជើងហោះហើររួមមាន Air China, China Eastern, Shanghai Airlines, Spring Airlines, China Southern, Shenzhen Airlines, Juneyao Airlines, Ok Airways, Hainan Airlines និងរដ្ឋធានីប៉េកាំង។

ដំបូង ជើងហោះហើរជិត ១១,០០០ ត្រូវបានគ្រោងទុកសម្រាប់ខែធ្នូ និងខែមករា ប៉ុន្តែបច្ចុប្បន្នមានតែ ៦,០០០ ប៉ុណ្ណោះត្រូវបានបញ្ជាក់ ដែលនេះគឺជាការថយចុះ ៤៦% បើធៀបនឹងការរំពឹងទុក។ លោក Piyasawat Amranand នាយកប្រតិបត្តិនៃផែនការស្តារអាជីវកម្មរបស់ក្រុមហ៊ុន Thai Airways International បានចាត់ទុកការលុបចោលជើងហោះហើរនេះថាជាការធ្លាក់ចុះសេដ្ឋកិច្ចរបស់ប្រទេសចិន និងគោលនយោបាយលើកកម្ពស់ទេសចរណ៍ក្នុងស្រុករបស់ប្រទេស។ លោក Piyasawat បានបន្តទៀតថា ទោះបីប្រទេសថៃលើកលែងទិដ្ឋាការបណ្តោះអាសន្នសម្រាប់ភ្ញៀវចិនក៏ដោយ ក៏មិនអាចជំរុញទីផ្សារចិនខ្លាំងដូចការរំពឹងទុកដែរ។

បច្ចុប្បន្នចំនួនភ្ញៀវទេសចរចិនទៅកាន់ប្រទេសថៃមានជិត ៤០% បើធៀបនឹងឆ្នាំ ២០១៩ ដែលបណ្តាលឱ្យក្រុមហ៊ុន Thai Airways ផ្ទេរយន្តហោះដែលត្រៀមសម្រាប់ទីផ្សារចិនទៅកាន់ទីផ្សារសក្តានុពលផ្សេងទៀត។ លោក Korakot Chatasingha នាយកពាណិជ្ជកម្មនៃក្រុមហ៊ុនអាកាសចរណ៍ជាតិ Thai Airways បាននិយាយថា ក្រុមហ៊ុនអាកាសចរណ៍មិនទាន់មានការកើនឡើងខ្លាំងនៃការលក់សំបុត្រសម្រាប់បុណ្យចូលឆ្នាំថ្មីខាងមុខនេះទេ ហើយចាំបាច់ត្រូវសង្កេតបន្ថែមទៀតបន្ទាប់ពីខែធ្នូ។

ទោះជាយ៉ាងណាំក៏ដោយ ការលុបចោលជើងហោះហើរនេះគឺ “គ្មានអ្វីចម្លែកទេ” ដោយសារតែក្រុមហ៊ុនអាកាសចរណ៍តែងតែធ្វើបែបនេះដើម្បីធានាប្រាក់ចំណេញអាជីវកម្ម។ ក្រៅពីនេះ ទីផ្សារទេសចរណ៍សំខាន់របស់ថៃនៅមិនទាន់ងើបឡើងវិញ រួមទាំងប្រទេសចិនផងដែរ។ ដូច្នេះជើងហោះហើរដែលត្រឡប់ដោយក្រុមហ៊ុនអាកាសចរណ៍ចិនចំនួន ១០ នឹងត្រូវបានផ្ទេរទៅក្រុមហ៊ុនអាកាសចរណ៍មកពីអឺរ៉ុបខាងលិច និងស្កែនឌីណាវី៕

ប្រទេសថៃ ៖ យោងតាមលទ្ធផលស្ទង់មតិអំពីការប្រើប្រាស់ភាសាអង់គ្លេសនៅតាមបណ្តាប្រទេសនានាលើពិភពលោកបង្ហាញថា ប្រទេសថៃបានជាប់ចំណាត់ថ្នាក់ចុងក្រោយគេផ្នែកនិយាយភាសាអង់គ្លេស ។ លើសពីនេះ ប្រទេសថៃបានជាប់ចំណាត់ថ្នាក់នៅក្រោមប្រទេសមីយ៉ាន់ម៉ា និងកម្ពុជាផងដែរ ។

EF Education First គឺជាស្ថាប័នអប់រំភាសាអង់គ្លេសដ៏ល្បីល្បាញនៅលើពិភពលោក បានបង្ហាញលទ្ធផលស្ទង់មតិមួយអំពីសមត្ថភាពប្រើប្រាស់ភាសាអង់គ្លេស EF FPI (EF English Proficiency Index) ប្រចាំឆ្នាំ២០២៣ ថា ក្នុងចំណោមប្រទេសចំនួន១១៣ នៅទូទាំងពិភពលោក គឺប្រទេសហូឡង់ បានជាប់ចំណាត់ថ្នាក់ទី១ ដោយសារពលរដ្ឋហូឡង់អាចនិយាយភាសាអង់គ្លេសបានល្អ ។

ចំណែកប្រទេសថៃវិញ បានជាប់ចំណាត់ថ្នាក់ទី១០១ នៅទូទាំងពិភពលោក ហើយចំណាត់ថ្នាក់របស់ថៃ គឺស្ថិតនៅក្រោមប្រទេសមីយ៉ាន់ម៉ា និងកម្ពុជា ។ ការស្ទង់មតិនេះបានចាត់ចំណាត់ថ្នាក់ឱ្យប្រទេសថៃស្ថិតនៅកម្រិតទាបបំផុត ខណៈប្រទេសថៃទទួលបានពិន្ទុត្រឹមតែ៤១៦ពិន្ទុប៉ុណ្ណោះពីការចាត់ចំណាត់ថ្នាក់ប្រទេសចំនួន១១៣ ។

រីឯប្រទេសកម្ពុជាស្ថិតក្នុងចំណាត់ថ្នាក់ទី៩៨ និងទទួលបានពិន្ទុរហូតដល់៤២១ពិន្ទុ ។ លើសពីនេះ ប្រទេសមីយ៉ាន់ម៉ាស្ថិតក្នុងចំណាត់ថ្នាក់ទី៩០ និងទទួលបានពិន្ទុរហូតដល់៤៥០ពិន្ទុ ។ នេះបង្ហាញថា ពលរដ្ឋខ្មែរ និងមីយ៉ាន់ម៉ាមានសមត្ថភាពនិយាយភាសាអង់គ្លេសបានល្អ និងស្ទាត់ជំនាញជាងពលរដ្ឋថៃ ។

ពិន្ទុជាមធ្យមសម្រាប់ការចាត់ចំណាត់ថ្នាក់ប្រទេសនានានៅលើពិភពលោក គឺស្មើនឹង៥០២ពិន្ទុ ។ បើតាមការចាត់ចំណាត់ថ្នាក់តាំងពីឆ្នាំ២០១១ រហូតមក ប្រទេសថៃធ្លាប់ទទួលបានពិន្ទុ៤១៤ ។ រីឯខេត្តរបស់ថៃដែលទទួលបានពិន្ទុខ្ពស់ជាងគេ គឺខេត្តឈៀងម៉ៃ បន្ទាប់មក ទីក្រុងបាងកក, ភូកេត និងប្រាជួប សិរ៉ីខាន់ ៕

សហគ្រិនចក្រភពអង់គ្លេសម្នាក់បាននិយាយថា អីវ៉ាន់ជជុះរាប់លានប្រភេទរបស់ក្រុមហ៊ុន Amazon នៃចក្រភពអង់គ្លេសនិងសហភាពអ៊ឺរ៉ុបបានបង្កើតអាជីវកម្មក្រោមទុនចំនួន ១.៣ ពាន់លានដុល្លារអាមេរិក ។

រីឯអ្នកលក់និងអ្នកផលិតទំនិញវិញបានរំពឹងទុកថា និន្នាការនេះនឹងជួយសម្រួលដល់អ្នកទិញទំនិញគ្រប់រូប ដូចជាទប់ស្កាត់ក្នុងការកើនឡើងនៃទំនិញ និងការខ្ចីបំណុលធនាគារជាដើម ហើយជំនួសមកវិញដោយការសន្សំប្រាក់ និងជាការទិញប្រកបដោយនិរន្តរភាព។

លោក John Boumphrey អ្នកគ្រប់គ្រង ក្រុមហ៊ុន Amazon ប្រចាំចក្រភពអង់គ្លេសបាននិយាយថា កាលពីឆ្នាំមុនក្រុមហ៊ុនយក្សមួយនេះ បានលក់ផលិតផលនិងរបស់ប្រើប្រាស់ជជុះបានរហូតដល់ជាង៤លានមុខឯណ្ណោះ។ រីឯរយៈពេល៩ខែដំបូងនៃឆ្នាំ២០២៣នេះ ការលក់ទំនិញជជុះរបស់ក្រុមហ៊ុន Amazon នៅអង់គ្លេសបានកើនឡើង១៥% បើប្រៀបទៅនឹងរយៈពេលដូចគ្នាកាលពីឆ្នាំមុន។

លោកក៏ធ្លាប់បានមានប្រសាសន៍ដែរថា «Second Chance Store» របស់ក្រុមហ៊ុនAmaon នៅចក្រភពអង់គ្លេស ដែលជាថាហាងលក់ទំនិញមួយទឹកដែលកំពុងតែរៀបចំកាន់តែច្រើនបន្ថែមទៀតនៅឯទីក្រុងឡុងដើម្បីអបអរបុណ្យគ្រីសម៉ាក់ខាងមុខនេះផងដែរ៕

ប្រទេសថៃ ៖ អ្នកលេងបណ្តាញសង្គមជាច្រើននាក់នៅប្រទេសថៃ និងប្រទេសជិតខាងបានរិះគន់ពីទង្វើរបស់អាជ្ញាធរថៃមួយក្រុម ដែលបានប្រើវិធីគ្រោះថ្នាក់ដើម្បីឆែកឆេររកពលករបរទេសខុសច្បាប់ នៅចុងខែវិច្ឆិកា ឆ្នាំ២០២៣ ។ វីដេអូមួយដែលត្រូវបានចែកចាយក្នុងបណ្តាញសង្គម TikTok គេបានឃើញអាជ្ញាធរថៃយកដែកមុតស្រួចចាក់ទម្លុះចូលក្នុងបន្លែដឹកតាមរថយន្ត ដើម្បីពិនិត្យរកមើលក្រែងមានពលករខុសច្បាប់សម្ងំលាក់ខ្លួនក្នុងនោះ ។

អាជ្ញាធរថៃបាននាំគ្នាត្រួតពិនិត្យរថយន្តដឹកបន្លែ១គ្រឿង ដោយពួកគេបានប្រើដែកស្រួចចាក់តាមចំណុចផ្សេងៗរបស់បន្លែជាច្រើនលើក ដើម្បីស្វែងរកទំនិញខុសច្បាប់ និងពលករបរទេសលួចចូលមកប្រទេសថៃ ។ បន្ទាប់ពីឃើញពួកគេប្រើប្រាស់ដែកចាក់ទម្លុះចូលក្នុងបន្លែបែបនេះ ធ្វើឱ្យអ្នកលេងបណ្តាញសង្គមជាច្រើននាក់រិះគន់ថា បើពិនិត្យហើយរកមិនឃើញទំនិញខុសច្បាប់ ឬគ្មានពលករខុសច្បាប់ទេនោះ តើការខូចខាតទំនិញទាំងអស់ក្នុងរថយន្ត អ្នកណាទទួលខុសត្រូវ?

អ្នកលេងបណ្តាញសង្គមថៃនិយាយថា ការត្រួតពិនិត្យតាមវិធីនេះគ្រោះថ្នាក់ខ្លាំង និងជ្រុលហួសហេតុពេក ព្រោះវាបណ្តាលឱ្យខូចខាតទំនិញក្នុងរថយន្ត ។ ជនជាតិថៃម្នាក់និយាយថា ៖ «តម្លៃទំនិញថ្លៃ ហើយអាជ្ញាធរអាចចេញថ្លៃខូចខាតបានដែរឬទេ» ។ ជនជាតិថៃម្នាក់ទៀតថា ៖ «ការត្រួតពិនិត្យបែបនេះធ្ងន់ធ្ងរណាស់» ។ ជនជាតិថៃម្នាក់ទៀតថា ៖ «សាហា.វណាស់ តើនៅក្នុងខ្លួនមានភាពជាមនុស្សដែរឬទេ?» ។ ជនជាតិថៃម្នាក់ទៀតថា ៖ «បើមានមនុស្សនៅក្នុងនោះ តើពួកគេនឹងក្លាយទៅជាយ៉ាងណា?» ។ ជនជាតិថៃម្នាក់ទៀតថា ៖ «អាជ្ញាធរគួរតែមានវិធីល្អជាងនេះ» ។

រីឯជនជាតិថៃម្នាក់ទៀតថា ៖ «សូមសរសើរនូវការបំពេញការងាររបស់អាជ្ញាធរថៃ» ។ ជនជាតិថៃម្នាក់ទៀតថា ៖ «ឆ្លាតណាស់ អាជ្ញាធរថៃ» ។ ជនជាតិថៃម្នាក់ទៀតថា ៖ «ប្រសើរណាស់ តើមានអ្នកស្រែកទេ?» ។ ជនជាតិថៃម្នាក់ទៀត ៖ «ការត្រួតពិនិត្យបែបនេះ គឺជាវិធីល្អបំផុតហើយ» ។ ជនជាតិថៃម្នាក់ទៀតថា ៖ «រថយន្តខ្លះបានលាក់ពលករបរទេសនៅខាងក្នុង ទើបត្រូវត្រួតពិនិត្យតាមវិធីនេះ» ។

ទោះយ៉ាងណា ក្រោយពីមានការរិះគន់ក្នុងបណ្តាញសង្គម អាជ្ញាធរថៃបញ្ជាក់ថា ក្រោយការត្រួតពិនិត្យរថយន្តនេះ ពួកគេចាប់បានពលករបរទេសខុសច្បាប់ចំនួន២៦នាក់ដែលលួចចូលមកប្រទេសថៃ ប៉ុន្តែពួកគេពុំបានបញ្ជាក់ថា ពលករទាំងនេះមកពីប្រទេសណាខ្លះទេ ៕

ជំងឺមហារីក គឺជាជំងឺមួយដែលកើតឡើងនៅពេលកោសិកាសាហាវរីកលូតលាស់ខុសធម្មតានៅក្នុងរាងកាយ។ បច្ចុប្បន្នជំងឺនេះ នៅតែជាប្រធានបទដ៏ក្ដៅគគុកមិនថា នៅក្នុងប្រទេសកម្ពុជា ឬនៅទូទាំងពិភពលោកឡើយ ព្រោះជំងឺមហារីកបានបង្កឱ្យមានមនុស្សស្លាប់រាប់លាននាក់ជារៀងរាល់ឆ្នាំ។ ដូច្នេះហើយ តើអ្នកដឹងទេថា ជំងឺមហារីកណាខ្លះ ដែលមានអត្រាមរណភាពខ្ពស់បំផុតលើពិភពលោក?

យោងតាមការស្ទង់មតិលើអ៊ីនធឺណិតដោយសេវាពិនិត្យ Hancut Health One-Line Review បានឱ្យដឹងថា ជំងឺមហារីកដែលគ្រោះថ្នាក់បំផុត ក៏ដូចជាប្រឈមនឹងហានិភ័យនៃការស្លាប់ខ្ពស់បំផុតនោះគឺ ជំងឺមហារីកសួត មហារីកថ្លើម មហារីកពោះវៀនធំ មហារីកលំពែង និងមហារីកក្រពះ ដោយមានអត្រាមរណភាព ៦៣% ប្រមាណ ៣៧២.៩៣៩នាក់។បើប្រៀបធៀបមហារីកធំៗទាំងប្រាំ មហារីកខ្ពស់បំផុតក្នុងចំណោមបុរស និងស្ត្រីនោះគឺមហារីកសួត (១៨,៥៨៤ នាក់) ស្មើនឹង ២២.៤% នៃចំនួនសរុប។ បន្ទាប់មក អត្រាខ្ពស់ទីពីគឺ មហារីកថ្លើម (១០.២១២ នាក់) ១២.០%, មហារីកពោះវៀនធំ (៩.១៦៤ នាក់) ១១.០%, មហារីកលំពែង (៧.៣២៥ នាក់) ៨.៨% និងមហារីកក្រពះ (៧.១៤៧ នាក់) ៨.៦% ។

ក្នុងចំណោមទាំងនេះ អ្វីដែលគួរឱ្យកត់សម្គាល់ គឺនិន្នាការនៃអត្រាស្លាប់ដោយមហារីកលំពែង។ ដើមឡើយ ចំនួនអ្នកស្លាប់ដោយសារជំងឺមហារីកក្រពះ គឺខ្ពស់ជាងមហារីកលំពែង ប៉ុន្តែបច្ចុប្បន្នជំងឺមហារីកលំពែងកំពុងកើនឡើងយ៉ាងឆាប់រហ័ស ដូច្នេះមហារីកលំពែងនឹងក្លាយទៅជាមហារីកដែលគំរាមកំហែងបំផុតទីពីរសម្រាប់មនុស្សជាតិបន្ទាប់ពីជំងឺមហារីកសួតនៅឆ្នាំ ២០៣០។

មូលហេតុដែលមហារីកលំពែងគួរឱ្យខ្លាចគឺដោយសារតែវាជាសរីរាង្គលាក់កំបាំង មិនសូវមានរោគសញ្ញាជាក់លាក់នោះទេ ហើយត្រូវបានរកឃើញយឺតជាងមហារីកដទៃទៀត។ សូម្បីតែនៅពេលដែលវាត្រូវបានរកឃើញក៏ដោយ វាច្រើនតែវិវត្តន៍ទៅមុខរួចទៅហើយ ដូច្នោះហើយ ការព្យាករណ៍គឺអាក្រក់បំផុត ជាមួយនឹងអត្រារស់រានមានជីវិតគឺទាបបំផុត។

ទោះជាយ៉ាងណាក៏ដោយ ការតាមរកមហារីកលំពែងដែលកំពុងគំរាមកំហែងដល់អាយុជីវិតដោយស្ងាត់ៗហាក់ដូចជាមិនធម្មតាទេ។ ហេតុនេះហើយ អង្គការសុខភាពពិភពលោកសង្ឃឹមថា តាមរយៈការត្រួតពិនិត្យជំងឺមហារីកជាទៀងទាត់ ក៏ដូចជារបៀបរស់នៅដែលមានសុខភាពល្អ អ្នកអាចប្រយុទ្ធប្រឆាំងនឹងជំងឺមហារីកទាំងអស់ផងដែរ៕

ថ្មីៗនេះនៅលើបណ្តាញសង្គមកំពុងមានការចាប់អារម្មណ៍ទៅលើគូស្វាមីភរិយាមួយគូជាជនជាតិអូស្រ្តាលីបានមកកម្សាន្តនៅប្រទេសកម្ពុជាដោយបង្ហាញពីភាពរុសរាយរបស់ប្រជាជន ទំនិញប្រ៊េនៗមានតម្លៃធូរថ្លៃជាងប្រទេសជិតខាង។ នេះក៏ជាហេតុផលជំរុញឱ្យប្តីប្រពន្ធមួយគូនេះនៅបន្តដើរកម្សាន្តច្រើនថ្ងៃ ទាំងគោលបំណងអ្នកទាំងពីរមកលេងប្រទេសកម្ពុជាតែ៣ថ្ងៃប៉ុណ្ណោះ។

តាមការចែករំលែករបស់ផេកមួយឈ្មោះថា «Re-IDEA » បានរៀបរាប់ថា មើលប្តីប្រពន្ធមួយគូជនជាតិអូស្រ្តាលីដើរលេងនៅស្រុកខ្មែរតែបីថ្ងៃ តែជ្រុលដល់ពីរសប្តាហ៍ ដែលវីដេអូ ពួកគាត់ដើរចូលផ្សារអ៊ីអន១និង២ គ្រាន់តែងាកកាមេរ៉ាទៅណា ប្រជាពលរដ្ឋខ្មែរសើចដាក់គាត់ជានិច្ច បុគ្គលិកហាងទោះមិនទិញដើរកាត់ពីមុខក៏ញញឹមដែរ ហើយលឺតែពាក្យ Welcome to Cambodia ពីប្រជាពលរដ្ឋខ្មែរ និង ជួបក្មេងៗសិស្សសាលានិយាយ Hello ទៅកាន់ពួកគាត់រហូត សួរពួកគាត់មកពីណា ហើយតែងតែចប់ដោយពាក្យ Thanks for visiting Cambodia និងពាក្យ Welcome ជានិច្ច»។

ផេកដដែល បានឱ្យដឹងទៀតថា « ហេតុផលនេះហើយដែលពួកគាត់ដើរលេងស្រុកខ្មែរហួសច្រើនថ្ងៃ ។ គាត់ថាមិនដែលមានស្រុកណាមានបុគ្គលិកនៅផ្សារទំនើប Luxury ចេះញញឹមដាក់ និង និយាយលេងជាមួយពួកគាត់នោះទេ មានតែស្រុកខ្មែរនេះឯងដោយគាត់ថា ប្រទេសណាក៏ដោយនៅតាមផ្សារទំនើបប្រភេទ Luxury បែបនេះគឺ គេមិននិយាយរកមុន ឬ ញញឹមដាក់នោះទេ ។ បន្ទាប់មក ពួកគាត់ក៏ទិញអីវ៉ាន់ប្រេនៗ ដោយគាត់ថា អ៊ីវ៉ាន់ប្រេនៗម៉ាកល្បីៗដូច Puma Nike Adidas…និង មុខម្ហូបនៅតាមហាងល្បីៗនៅជុំវិញពិភពលោកនៅស្រុកខ្មែរដូចជា Starbucks, KFC, Texas, Burger King …មានតម្លៃថោកជាងនៅថៃ និង អូស្រ្ដាលី។
ប្រភពដដែលបានបញ្ជាក់ថា ប្តីប្រពន្ធមួយគូនេះនិយាយថានៅស្រុកផ្សេងៗដោយមានថៃដែរពួកគាត់ថាចូលផ្សារទំនើប Luxury គេ ដើរមើលអីវ៉ាន់គេមិនសួរនាំនោះទេ លុះតែគាត់សួររកមុន បាននិយាយរកគាត់ ហើយមិនចេះញញឹមនោះទេតែនៅស្រុកខ្មែរ ដើរកាត់ញញឹមដាក់មុនសួរមួយម៉ាត់តែបកស្រាយអំពីអីវ៉ាន់អស់រលីញម៉ង។ ពួកគាត់បាន Recommend អ្នកចង់shoppingនៅហាងល្បីៗ សាកមកស្រុកខ្មែរម្តងទាំងតម្លៃថោក និង សេវាកម្មល្អ»។

នេះមិនមែនជាលើកទី១នោះទេដែលជនបរទេសកោតសរសើរពីប្រទេសកម្ពុជានិងជាប់ចិត្តពីភាពរុសរាយរបស់ប្រជាជននៅពេលបានមកដើរកម្សាន្តផ្ទាល់ តែងតែលើកសរសើរជាពិសេសក៏បានជួយបន្តផ្សព្វផ្សាយជំរុញឱ្យទេសចរដទៃទៀតមកកម្សាន្តនៅប្រទេសកម្ពុជាផងដែរ៕

បរទេស៖ អ្នកធ្វើដំណើរភាគច្រើន បាននិយាយថា ទីក្រុងប៉ាតាយ៉ាប្រទេសថៃ គឺជាតំបន់ទេសចរណ៍ដែលគ្មានសុវត្ថិភាពសម្រាប់ស្ត្រី។

យោងតាមគេហទំព័រអន្តរជាតិ INSIDER បានរាយការណ៍ថា អ្នកធ្វើដំណើរជុំវិញពិភពលោកវ័យក្មេងម្នាក់ ដែលជាជនជាតិអាមេរិកបានដាក់ឈ្មោះទីក្រុងប៉ាតាយ៉ាថាជាគោលដៅទេសចរណ៍គ្មានសុវត្ថិភាពលេខ១ រួមជាមួយនឹងចំណាត់ថ្នាក់នៃតំបន់ទេសចរណ៍ដែលមិនមានសុវត្ថិភាពកំពូលទាំង ៥ លើពិភពលោក។ Chloe Jade ដែលជាអ្នកមានឥទ្ធិពលជនជាតិអាមេរិកម្នាក់បានចងក្រងឯកសារធ្វើដំណើរជុំវិញពិភពលោករបស់នាងនៅលើ Instagram ដោយនាងតែងតែចែករំលែកបទពិសោធនៃការដើរម្នាក់ឯង ឬដើរទោល។នៅលើ Instagram របស់Chloe មានអ្នកគាំទ្រជាង ១៥០,០០០នាក់ ហើយបច្ចុប្បន្ននាងបានទៅលេងប្រទេសជាង ៨០ ដោយការធ្វើដំណើរម្នាក់ឯង ដើម្បីជួបមនុស្ស និងទទួលបទពិសោធន៍ពីវប្បធម៌ថ្មីៗ។ ក្នុងនោះ Chloe Jade បាននិយាយថា នាងចូលចិត្តដើរផ្សងព្រេងម្នាក់ឯងខ្លាំងណាស់ ហើយកន្លែងដែលនាងគិតថា គ្មានសុវត្ថិភាពបំផុតសម្រាប់ស្ត្រីក្នុងការដើរម្នាក់ឯងនោះគឺទីក្រុងប៉ាតាយ៉ាប្រទេសថៃ ដែលជាគោលដៅទេសចរណ៍លេខ ១ ធ្វើឱ្យនាងមិនមានសុវត្ថិភាពក្នុងការដើរម្នាក់ឯង ព្រោះតំបន់នោះគឺជាកន្លែងនៃការរួមភេទរបស់ប្រទេសថៃ ដូច្នេះបុរសដែលទៅទីក្រុងប៉ាតាយ៉ា ភាគច្រើនគឺមានគោលដៅតែមួយប៉ុណ្ណោះ។

Chloe Jade បានបន្តទៀតថា ចំណាត់ថ្នាក់លេខ ២ គឺទីក្រុង Belgrade ប្រទេសស៊ែប៊ី ព្រោះនៅតំបន់នោះ មនុស្សជាច្រើនបានងាកមើលនាងក្នុងផ្លូវអវិជ្ជមាន ដែលជាហេតុធ្វើឱ្យនាងមានអារម្មណ៍ថាមិនមានសុវត្ថិភាព។ ចំណែកចំណាត់ថ្នាក់លេខ ៣ វិញគឺទីក្រុងប៉ារីសប្រទេសបារាំង ដោយ Chloe បាននិយាយថាពេលនាងទៅប៉ារីស នាងមានបទពិសោធន៍ដ៏គួរឱ្យភ័យខ្លាចជាមួយបុរសម្នាក់ គាត់បង្ខំនាងឱ្យផឹកជាមួយគាត់ រហូតដល់នាងមានអារម្មណ៍ថាឈឺ រហូតមកដល់សព្វថ្ងៃនេះ នាងនៅតែគិតថាដូចជាត្រូវបានគេបំពុល ដូច្នេះហើយនាងបានដាស់តឿនស្ត្រីដែលធ្វើដំណើរតែម្នាក់ឯងឱ្យមានការប្រុងប្រយ័ត្ន ។

រីឯចំណាត់ថ្នាក់លេខ ៤ គឺ Marrakech ប្រទេសម៉ារ៉ុក ព្រោះនៅក្នុងប្រទេសនោះមានប្លង់ទីក្រុងបង្កើតផ្លូវតូចៗធ្វើឱ្យវាគួរឱ្យខ្លាចក្នុងការដើរម្នាក់ឯង ហើយបុរសជាច្រើនមានចរិតឆេវឆាវខ្លាំងណាស់។ ចំពោះចំណាត់ថ្នាក់លេខ ៥ ដែលជាចំណាត់ថ្នាក់ចុងក្រោយវិញគឺ Kingston ប្រទេស Jamaica ដោយ Chloe បាននិយាយថា នៅពេលដែលនាងទៅដល់ប្រទេសនោះ អ្នកស្រុកដែលនាងបានជួប តែងតែរំលឹកអំពីកន្លែងដែលអ្នកមិនគួរទៅ។ ក្រោយមក នាងក៏ត្រូវជួបនឹងឧប្បត្តិហេតុមួយដែលធ្វើឱ្យខ្លួននាងមានអារម្មណ៍ថាគ្មានសុវត្ថិភាព ដូច្នេះស្ត្រីដេលមានបំណងដើរម្នាក់ឯងត្រូវប្រុងប្រយ័ត្នបន្ថែមទៀតពេលនៅទីសាធារណៈ៕

ប្រទេសវៀតណាម ៖ ប្រទេសវៀតណាមនឹងលើកឡើងទិដ្ឋាការដល់ភ្ញៀវទេសចរឥណ្ឌា ខណៈប្រទេសនានានៅទូទាំងពិភពលោកទទួលស្គាល់ថា ភ្ញៀវទេសចរឥណ្ឌាគឺជាកម្លាំងជំរុញដ៏សំខាន់ក្នុងការធ្វើដំណើរកម្សាន្តនៅក្រៅប្រទេស ។ នេះបើតាមការចុះផ្សាយរបស់សារព័ត៌មានបរទេស កាលពីចុងខែវិច្ឆិកា ឆ្នាំ២០២៣ ។

ក្រោយពីប្រទេសស្រីលង្ការ និងថៃបានប្រកាសលើកលែងទិដ្ឋាការដល់ភ្ញៀវទេសចរឥណ្ឌា ប្រទេសវៀតណាមក៏មានគម្រោងលើកលែងទិដ្ឋាការដល់ភ្ញៀវទេសចរឥណ្ឌាដូចគ្នាដែរ ។ លោក Nguyen Van Hung រដ្ឋមន្ត្រីក្រសួងវប្បធម៌ កីឡា និងទេសចរណ៍លើកឡើងថា វៀតណាមបានអនុញ្ញាតឱ្យជនជាតិឥណ្ឌា និងចិនចូលមកកាន់ប្រទេសវៀតណាម ដោយមិនចាំបាច់ប្រើប្រាស់ទិដ្ឋាការសម្រាប់ការធ្វើដំណើររយៈពេលខ្លីៗ ។

ក្នុងរយៈពេល១០ខែដំបូងនៃឆ្នាំ២០២៣ ប្រទេសវៀតណាមទទួលបានភ្ញៀវទេសចរជិតស្មើ១០លាននាក់ ដែលបានកើនឡើងយ៉ាងខ្លាំងបើធៀបនឹងរយៈពេលដូចគ្នាកាលពីឆ្នាំ២០២២ ។ តួលេខនេះខ្ពស់ជាងតួលេខដែលវៀតណាមរំពឹងទុកទៅទៀតថា វៀតណាមនឹងទទួលបានភ្ញៀវទេសចរបរទេសស្មើនឹង១០លាននាក់សម្រាប់រយៈពេលពេញ១ឆ្នាំ ។

ទោះយ៉ាងណា នាពេលថ្មីៗនេះ ប្រទេសស្រីលង្ការ និងថៃបានប្រកាសលើកលែងទិដ្ឋាការដល់ភ្ញៀវទេសចរឥណ្ឌា ដើម្បីជំរុញវិស័យទេសចរណ៍ក្នុងប្រទេសរបស់ពួកគេ ។ កាលពីថ្ងៃទី១០ ខែវិច្ឆិកា ឆ្នាំ២០២៣ ថៃបានលុបចោលការស្នើសុំទិដ្ឋាការសម្រាប់ភ្ញៀវទេសចរឥណ្ឌា ព្រោះថៃរំពឹងថា នឹងធ្វើឱ្យភ្ញៀវទេសចរឥណ្ឌាអាចស្នាក់នៅថៃ រហូតដល់៣០ថ្ងៃ ហើយថៃនឹងអនុវត្តវិធានការលើកលែងទិដ្ឋាការនេះ រហូតដល់ថ្ងៃទី១០ ខែឧសភា ឆ្នាំ២០២៤ ។ រីឯរដ្ឋាភិបាលថៃលើកឡើងថា ថៃនឹងពង្រីកវិធានការនេះបន្តទៀត ប្រសិនបើការធ្វើដំណើរកម្សាន្តរបស់ឥណ្ឌាកើនឡើង ។

ចំណែកប្រទេសស្រីលង្ការបានប្រកាសលើកលែងទិដ្ឋាការដល់ភ្ញៀវទេសចរមកពី៧ប្រទេស ដូចជា ៖ ឥណ្ឌា, ចិន និងរុស្ស៊ី ជាដើម ។ វាជាផ្នែកមួយក្នុងអំឡុងពេលសាកល្បងវិធានការនេះ រហូតដល់ថ្ងៃទី៣១ ខែមីនា ឆ្នាំ២០២៤ ៕