ប្រទេសថៃ៖ ប្រទេសថៃបានកំពុងត្រៀមខ្លួនដើម្បីអបអរសាទរការដាក់បញ្ចូលពិធីបុណ្យ Songkran ទៅក្នុងបញ្ជីបេតិកភណ្ឌវប្បធម៌អរូបីរបស់អង្គការសហប្រជាជាតិ (UNESCO) ដែលនឹងប្រកាសជាផ្លូវការនៅថ្ងៃទី ៦ ខែធ្នូ ឆ្នាំ២០២៣នេះ។
យោងតាមប្រភពព័ត៌មាន Nation Thailand ដែលបានចុះផ្សាយនៅថ្ងៃទី១ ខែធ្នូថា នៅឆ្នាំថ្មីដែលជាប្រពៃណីរបស់ប្រទេសថៃ ត្រូវបានគេស្គាល់ថាជាពិធីបុណ្យ Songkran ដែលស្ថិតក្នុងបញ្ជីសម្រាំងរបស់អង្គការយូណេស្កូចាប់តាំងពីខែមករា នឹងត្រូវបានដាក់ឈ្មោះជាផ្លូវការជាបេតិកភណ្ឌវប្បធម៌អរូបីពិភពលោកក្នុងអំឡុងពេលកិច្ចប្រជុំនេះ។

ក្នុងនោះមានវប្បធម៌អរូបីចំនួនបួនដែលបានបញ្ចូលទៅក្នុងបញ្ជីបណ្តោះអាសន្នគឺ របាំថៃបុរាណ ខុនម៉ាស្សាថៃ របាំប្រជាប្រិយណូរ៉ា និងពិធីបុណ្យសង្ក្រាន្តដែលត្រូវបានបញ្ជូនទៅពិចារណាក្នុងឆ្នាំ ២០២០។ យោងតាមនាយកដ្ឋានផ្សព្វផ្សាយវប្បធម៌ថៃ បានឱ្យដឹងទៀតថា នៅថ្ងៃទី ៧ ខែធ្នូខាងមុខនេះ ខ្លួននឹងរៀបចំព្រឹត្តិការណ៍អបអរសាទរនៅទីលាន Lan Khon Muang ក្នុងទីក្រុងបាងកក ក្រោមអធិបតីភាពនាយករដ្ឋមន្ត្រីស្រី ថាថាវីស៊ីន។

ការប្រារព្ធពិធីនេះនឹងរួមបញ្ចូលនូវសកម្មភាពពិធីបុណ្យសង្ក្រាន្តប្រពៃណីដូចជាការប្រោះទឹកលើព្រះពុទ្ធរូប Phra Phuttha Sihing ហើយនឹងមានការចូលរួមពីសមាជិកគណៈរដ្ឋមន្ត្រី អភិបាលក្រុងបាងកក និងនាយកប្រតិបត្តិនៃការិយាល័យវប្បធម៌ខេត្ត។ ដូច្នេះការចូលរួមក្នុងក្បួនដង្ហែសង្ក្រាន្តនេះ ក៏នឹងមានរាជិនីសម្រស់ថៃ-ដាណឺម៉ាក គឺកញ្ញា Anntonia Porsild ដែលជាលំដាប់រងទី ១ ក្នុងការប្រកួតបវរកញ្ញាចក្រវាល ឆ្នាំ ២០២៣ ដោយនាងនឹងស្លៀកសម្លៀកបំពាក់ជាព្រះនាងមហាថន ទេវី ដែលតំណាងឱ្យថ្ងៃសៅរ៍ ទី១៣ ខែមេសា ឆ្នាំ២០២៤។

ក្បួនដង្ហែ Songkran នេះក៏នឹងមានការសម្តែងរបាំប្រពៃណី និងតន្ត្រីពីតំបន់ចំនួន ៤ នៃប្រទេសថៃ ក្នុងគោលបំណងលើកកម្ពស់ប្រពៃណីរបស់ប្រទេសថៃ និងអញ្ជើញភ្ញៀវទេសចរឱ្យចូលរួមក្នុងការប្រារព្ធពិធីជាក់ស្តែងនៅក្នុងខែមេសាឆ្នាំក្រោយ និងនៅទូទាំងព្រះរាជាណាចក្រផងដែរ៕

Jennifer Lopez តារាចម្រៀងដែលមានវ័យ ៥៤ ឆ្នាំបាននិយាយថាមនុស្សស្រីកាន់តែស្រស់ស្អាតនិងគួរឱ្យចាប់អារម្មណ៍ពីមួយថ្ងៃទៅមួយថ្ងៃគឺជាមនុស្សស្រីដែលមានភាពរីករាយ ច្រើន ព្រមទាំងតស៊ូដើម្បីខ្លួនឯងនិងនៅពេលកាន់តែចាស់។ លើសពីនេះ តារាចម្រៀងរូបនេះត្រូវបានគេដាក់នាមឱ្យថាស្រ្តីដែលកាន់តែស៊ិចស៊ីនៅពេលដែលកាន់តែចាស់ទៅដូចគ្នា។

នៅថ្ងៃទី១ ខែធ្នូ ក្នុងបទសម្ភាសមួយ Jennifer បាននិយាយថា «មនុស្សម្នាជាច្រើនបានដឹងថាស្ត្រីមានភាពទាក់ទាញ គួរឱ្យចាប់អារម្មណ៍នៅពេលពួកគេកាន់តែចាស់ និងមានភាព ស្រស់ស្អាត និងទាក់ទាញខ្លាំងទាំងរូបរាងហើយមានបទពិសោធន៍កាន់តែច្រើន។ តារាចម្រៀងរូបនេះបាននិយាយទៀតថា ខ្លួនសប្បាយចិត្តដែលឃើញស្តង់ដារនៅហូលីវូដមានការផ្លាស់ប្តូរដែលធ្វើឱ្យស្ត្រីមានអារម្មណ៍កោតសរសើរមិនប្រកាន់អាយុ។ សិល្បករជាច្រើនតស៊ូនៅពេលនិយាយអំពីការផលិត និងបង្កើតស្នាដៃរបស់ពួកគេ។ សម្រាប់តារាចម្រៀងរូបនេះផ្ទាល់រឿងសំខាន់គឺត្រូវបន្តអភិវឌ្ឍ ដោយហេតុនេះត្រូវមានកម្លាំងចិត្តព្យាយាមក្នុងអាជីពរបស់ខ្លួនធ្វើការឱ្យបានយូរតាមដែលចង់បានដោយមិនគិតទៅលើអាយុឡើយ។ ជាពិសេសស្រ្តីគឺអាចធ្វើបានដូចជាបុរស មិនថាតែការដឹកនាំប្រទេស ឬអ្វីនោះទេ។

Jennifer Lopez បានប្រាប់អ្នកសារព័ត៌មានទៀតថា ខ្លួនសុខចិត្តសាកល្បងអ្វីដែលថ្មីដូចជាការដឹកនាំជាដើមដោយចង់ផ្តោតលើការអនុវត្តគម្រោងអំពីស្ត្រី ដោយយកទស្សនៈរបស់ពួកគេជាចំណុចផ្តោត ដើម្បីបញ្ជាក់ជំហររបស់នាងដោយមិននៅពីខាងក្រោយនរណាម្នាក់ប៉ុន្តែធ្វើជាខ្លួនឯងផ្ទាល់គឺចង់ធ្វើគ្រប់យ៉ាងដូចជាបុរស។

គួរបញ្ជាក់ថា Jennifer Lopez អាយុ ៥៤ ឆ្នាំ បានសាងភាពល្បីល្បាញជាបន្តបន្ទាប់តាមរយៈបទចម្រៀងដូចជាបទ On The Floor , Let’s Get Loud និងបទមួយចំនួនទៀត។ នៅឆ្នាំ ២០២០ តារាចម្រៀងរូបនេះបានបង្កើតម៉ាកគ្រឿងសំអាង J.Lo Beauty ព្រមទាំងសម្តែងក្នុងខ្សែភាពយន្តជាច្រើនដូចជា The Mother នៅឆ្នាំ២០២៣នេះដើម។ Jennifer បានរៀបការជាមួយតារាសម្តែង Ben Affleck ក្នុងឆ្នាំ២០២២។ បន្ទាប់ពីជិត១០ ឆ្នាំនៃការមិនចេញអាល់ប៊ុមតារាចម្រៀងវ័យជ្រេរូបនេះកំពុងរៀបចំវិលត្រឡប់ទៅកាន់ឧស្សាហកម្មតន្ត្រីនាខែកុម្ភៈ ឆ្នាំ២០២៤៕

បរទេស៖ កូនភ្លោះ Ano Sartania និង Tako Khvitia បានរកឃើញគ្នាទៅវិញទៅមកតាមរយៈវីដេអូ TikTok បន្ទាប់ពីឪពុករបស់ពួកគេបានបំបែកគ្នាតាំងពីកើតមកម្លេះ។

យោងតាមប្រភពព័ត៌មាន New York Post ដែលបានចុះផ្សាយនៅថ្ងៃទី១ ខែធ្នូថា បងប្អូនស្រីភ្លោះ ២ នាក់ឈ្មោះ Ano Sartania និង Tako Khvitia កើតនៅថ្ងៃទី ២០ ខែមិថុនា ឆ្នាំ ២០០២ នៅក្នុងភូមិ Kirtskhi រដ្ឋ Georgia ដែលជាអតីតសាធារណរដ្ឋសូវៀត បានរកឃើញគ្នាទៅវិញទៅមកតាមរយៈការថតវីដេអូរាំលេងនៅក្នុងបណ្តាញសង្គម TikTok ដោយសារតែពួកគេមានមុខដូចគ្នា។

នៅពេលដែលកូនភ្លោះ Ano Sartania និង Tako Khvitia កើតមកភ្លាមៗ ឪពុករបស់ពួកគេក៏សម្រេចលក់ឱ្យគ្រួសារចំនួនពីរ ដោយសារតែគាត់សង្ស័យថាពួកគេមិនមែនជាកូនបង្កើត ខណៈដែលម្តាយរបស់កូនភ្លោះនេះកំពុងសម្រាកនៅក្នុងមន្ទីរពេទ្យ។

Sartania រស់នៅក្នុងតំបន់ Tbilisi ដោយកូនភ្លោះ Khvitia រស់នៅក្នុងតំបន់ Zugdidi ចម្ងាយ ២៦០ គីឡូម៉ែត្រពីគ្នាទៅទិសខាងលិច។ កាលពីមុនពួកគេទាំងពីរមិនបានដឹងថាខ្លួនមានបងប្អូនភ្លោះឡើយ ប៉ុន្តែអស់រយៈពេល ១៩ ឆ្នាំកន្លងមកនេះនៅពេលដែលពួកគេបានលេងកម្មវិធី TikTok មិត្តភ័ក្តិរបស់ Sartania បានប្រទះឃើញមនុស្សស្រីម្នាក់មានមុខមាត់និងរូបរាងដូចនឹង Sartania ហើយក៏បានប្រាប់ Sartania។

មិនយូរប៉ុន្មាន Ano Sartania ក៏បានបង្ហោះវីដេអូក៏ដូចជាទាក់ទងទៅមនុស្សស្រីម្នាក់ដែលមានមុខមាត់ដូចនាង ដែលម្នាក់នោះមានឈ្មោះថា Tako Khvitia រួមទាំងបានធ្វើតេស្ត DNA ជាមួយគ្នាដែលបញ្ជាក់ថាពួកគេពិតជាបងប្អូនភ្លោះនឹងគ្នាមែន។ ទោះជាយ៉ាងណាក៏ដោយ ប្រភពដដែលបានឱ្យដឹងថា អ្នកទាំងពីរបានបដិសេធមិនជួបឪពុកបង្កើតរបស់ពួកគេទេ។

គួរបញ្ជាក់ដែរថា កូនភ្លោះ Sartania និង Khvitia គឺជាជនរងគ្រោះពីរនាក់ក្នុងចំណោមជនរងគ្រោះជាច្រើននៃសង្វៀនស្មុំកូនខុសច្បាប់ដ៏ល្បីល្បាញរបស់ហ្សកហ្ស៊ី ដែលមានកុមារចំនួន ១០០,០០០ នាក់ត្រូវបានលក់នៅចន្លោះឆ្នាំ ១៩៥០ និង ២០០៦ ។ កុមារជាច្រើនត្រូវបានចិញ្ចឹមដោយគ្រួសារអាមេរិក កាណាដា និងអឺរ៉ុបដែលទទួលយកពួកគេដោយគិតថ្លៃ៕

ប្រទេសម៉ាឡេស៊ី ៖ សភាតំណាងរាស្ត្រម៉ាឡេស៊ីបានអនុម័តសេចក្តីព្រាងច្បាប់ប្រឆាំងនឹងការជក់បារី ក្នុងគោលបំណងការពារយុវជនម៉ាឡេស៊ីពីផលប៉ះពាល់ដោយសារផលិតផលមានសារធាតុនីកូទីន ដូចជា ឧបករណ៍ជក់បារីអេឡិចត្រូនិក (Vaping Devices) ។ នេះបើយោងតាមការចេញផ្សាយរបស់សារព័ត៌មានបរទេស កាលពីថ្ងៃទី១ ខែធ្នូ ឆ្នាំ២០២៣ ។

សេចក្តីព្រាងច្បាប់នេះបានស្នើឡើងដោយរដ្ឋមន្ត្រីក្រសួងសុខាភិបាលម៉ាឡេស៊ី លោកស្រី Zaliha Mustafa ។ លើសពីនេះ លោកស្រីក៏បានស្នើឱ្យប្រទេសម៉ាឡេស៊ីហាមឃាត់ការលក់ដូរ និងទិញផលិតផលថ្នាំជក់, ឧបករណ៍សម្រាប់ជក់បារី, ផលិតផលជំនួសថ្នាំជក់ និងការផ្តល់សេវាកម្មផ្សេងៗដល់យុវជនម៉ាឡេស៊ី ដែលពាក់ព័ន្ធនឹងការជក់បារី ។

រដ្ឋមន្ត្រីក្រសួងសុខាភិបាលម៉ាឡេស៊ី លោកស្រី Zaliha Mustafa លើកឡើងថា ៖ «ច្បាប់នេះនឹងគ្រប់គ្រងផលិតផលថ្នាំជក់មួយចំនួន ដូចជា ៖ ថ្នាំជក់កែច្នៃ ឬផលិតផលថ្នាំជក់គ្រប់ប្រភេទដែលបានវេចខ្ចប់ដើម្បីលក់ឱ្យអតិថិជន ។ រីឯសារធាតុផ្សំនៅក្នុងបារីដូចជា សារធាតុនីកូទីន និងសារធាតុផ្សេងទៀត ត្រូវបានគេប្រទះឃើញនៅក្នុងបារីអេឡិចត្រូនិក និងផលិតផលជំនួសថ្នាំជក់ ដែលគេអាចយកមកជក់បាន» ។

លោកស្រី Zaliha Mustafa បន្តថា ប្រទេសម៉ាឡេស៊ីនឹងហាមឃាត់រាល់ការផ្សាយពាណិជ្ជកម្ម, ការជំរុញឱ្យជក់បារី និងការគាំទ្រផលិតផលថ្នាំជក់ ។ បច្ចុប្បន្ន ម៉ាឡេស៊ីបានចាត់វិធានការគ្រប់គ្រងផលិតផលទាំងអស់ ដូចជា បារីអេឡិចត្រូនិក, ផលិតផលថ្នាំជក់, សារធាតុសម្រាប់ជក់បារី និងផលិតផលជំនួសថ្នាំជក់ផងដែរ ។

រដ្ឋមន្ត្រីក្រសួងសុខាភិបាលបន្ថែមថា ច្បាប់នេះក៏បានកំណត់ឱ្យក្រុមហ៊ុននាំចូល និងក្រុមហ៊ុនផលិតថ្នាំជក់ទាំងអស់ត្រូវចុះបញ្ជីផលិតផលនីមួយៗ ដែលផលិតសម្រាប់លក់នៅប្រទេសម៉ាឡេស៊ី ។ ដូច្នេះ វាជាវិធានការដ៏សំខាន់មួយដើម្បីកត់ត្រាទិន្នន័យជាក់លាក់ និងលម្អិតរបស់ផលិតផល ព្រមទាំងកំណត់ឱ្យពលរដ្ឋម៉ាឡេស៊ីអនុវត្តច្បាប់ក្នុងប្រទេស ដូចជា ការកំណត់ផលិតផលមិនបានចុះបញ្ជីត្រឹមត្រូវ ៕

ប្រទេសនូវែលសេឡង់ ៖ កាលពីថ្ងៃទី១ ខែធ្នូ ឆ្នាំ២០២៣ នាយករដ្ឋមន្ត្រីនូវែលសេឡង់ លោក Christopher Luxon បានប្រកាសថា ប្រទេសនូវែលសេឡង់នឹងអនុវត្តវិធានការហាមកូនសិស្សប្រើប្រាស់ទូរស័ព្ទដៃក្នុងសាលារៀននៅទូទាំងប្រទេស ។ ការប្រកាសបែបនេះ ក្រោយពីលោកទើបឡើងកាន់តំណែងជានាយករដ្ឋមន្ត្រីបានចំនួន១០០ថ្ងៃ ។

វិធានការហាមឃាត់ការប្រើប្រាស់ទូរស័ព្ទដៃក្នុងសាលារៀន មានគោលបំណងលើកកម្ពស់គុណភាពការសិក្សានៅតាមសាលារៀននីមួយៗ ខណៈបច្ចុប្បន្ន ការសិក្សារបស់កូនសិស្សភាគច្រើនបានធ្លាក់ចុះខ្លាំង ដូចជា កូនសិស្សខ្សោយក្នុងការអាន ឬខ្សោយសរសេរមេរៀន ជាដើម ។ វិធានការនេះបានសាកល្បងអនុវត្តរួចហើយនៅតាមបណ្តាប្រទេសមួយចំនួន ដូចជា សហរដ្ឋអាមេរិក, អង់គ្លេស និងបារាំង ។ ប៉ុន្តែក្រោយពីប្រទេសទាំងនេះបានអនុវត្តវិធានការនេះរួចមកឃើញថា ពួកគេទទួលបានលទ្ធផលល្អ ។

នាយករដ្ឋមន្ត្រីនូវែលសេឡង់ លោក Christopher Luxon ថ្លែងថា ការអនុវត្តវិធានការនេះនឹងអាចទប់ស្កាត់ការញៀនទូរស័ព្ទដៃរបស់កូនសិស្ស ពីព្រោះការប្រើប្រាស់ទូរស័ព្ទនឹងរំខានដល់ការផ្តោតអារម្មណ៍របស់ពួកគេ ។ លោកសង្ឃឹមថា កូនសិស្សទាំងអស់នឹងងាកមកចាប់អារម្មណ៍លើការរៀនសូត្រជាងមុន រីឯសាស្ត្រាចារ្យវិញនឹងអាចផ្តោតលើការបង្រៀនសិស្សបន្ថែមទៀត ។

កន្លងមក កូនសិស្សនៅប្រទេសនូវែលសេឡង់ ធ្លាប់ទទួលបានពិន្ទុល្អបំផុតនៅលើពិភពលោក ផ្នែកការអាន និងសរសេរអក្សរ ។ ប៉ុន្តែបច្ចុប្បន្ននេះ សមត្ថភាពអាន និងការសរសេរអក្សររបស់ពួកគេបានធ្លាក់ចុះយ៉ាងខ្លាំង រហូតធ្វើឱ្យអ្នកស្រាវជ្រាវបារម្ភថា ការសិក្សារបស់សិស្សនូវែលសេឡង់នឹងឈានដល់កម្រិតទាបបំផុត ។

អ្នកស្រាវជ្រាវម្នាក់មកពីមជ្ឈមណ្ឌលអប់រំសប្បុរសធម៌និយាយថា ៖ «សមត្ថភាពអាន និងការសរសេរអក្សររបស់កូនសិស្សនូវែលសេឡង់បានធ្លាក់ចុះយ៉ាងខ្លាំង តាំងពីឆ្នាំ២០២២ ។ គេរកឃើញថា កូនសិស្សម្នាក់ក្នុងចំណោម៣នាក់ ដែលមានអាយុ១៥ឆ្នាំ ពួកគេមិនចេះអាន និងសរសេរអក្សរបានត្រឹមត្រូវទេ» ៕

ប្រទេសជប៉ុន ៖ សារព័ត៌មានបរទេសរាយការណ៍ថា ក្រុមហ៊ុន IRON FACTORY IKEDA នៅខេត្តហ៊ីរ៉ូស៊ីម៉ា ប្រទេសជប៉ុន បានបង្ហោះរូបផ្លែចេកផលិតពីដែកនៅក្នុងអ៊ីនធើរណេត ព្រមទាំងសរសេរថា វាជាផលិតផលរបស់ក្រុមហ៊ុនសម្រាប់លក់នៅលើទីផ្សារ ។ ក្រុមហ៊ុនបញ្ជាក់ថា បច្ចុប្បន្ន ផលិតផលនេះលក់ដាច់ខ្លាំងលំដាប់ទី១ នៅលើពិភពលោក ហើយមានតែក្រុមហ៊ុននេះមួយប៉ុណ្ណោះ ដែលបានផលិតផ្លែចេកដែកលក់ឱ្យអតិថិជន ។

ការបង្ហាញពីផលិតផលផ្លែចេកដែកក្នុងអ៊ីនធើរណេតបានធ្វើឱ្យមនុស្សជាច្រើននាក់ចាប់អារម្មណ៍ ហើយសង្ស័យថា តើផ្លែចេកដែកជាអ្វី? តើគេទិញវាយកទៅធ្វើអ្វីខ្លះ? មនុស្សមួយចំនួនបានសន្និដ្ឋានខុសៗគ្នាថា វាជាផលិតផលរបស់ប្រទេសជប៉ុន សម្រាប់បម្រើអារម្មណ៍ផ្លូ.វភេ.ទ ។ រីឯអ្នកខ្លះទៀតនិយាយថា វាអាចជាវត្ថុម្យ៉ាងមានថាមពលពិសេស ឬជាឧបករណ៍សម្រាប់សង្កត់នៅលើក្រដាស ។

ប៉ុន្តែសម្រាប់អ្នកដឹងពីមុខងារប្រើប្រាស់របស់ផលិតផលនេះបានចេញមកបកស្រាយ ដើម្បីឱ្យគ្រប់គ្នាអស់ចម្ងល់ពាក់ព័ន្ធនឹងផ្លែចេកដែក ។ ពួកគេបកស្រាយថា វាជាញញួរចេកដែក (Banana Hammer) ប្រើប្រាស់សម្រាប់ដំដែកគោល ។ ឧបករណ៍នេះបានផលិតឡើងតាំងពីឆ្នាំ២០២០ មកម៉្លេះ ដើម្បីបំពេញតម្រូវការរបស់អតិថិជន ដែលពួកគេចង់ប្រើញញួរផ្លែឈើសម្រាប់ដំដែកគោល ។ ផ្លែចេកដែកមានលក្ខណៈពិសេសមួយ គឺគេអាចប្រើប្រាស់វានៅកន្លែងដែលមានសីតុណ្ហភាពខ្ពស់រហូតដល់១.០០០អង្សារសេ ទើបអតិថិជនពេញនិយមវាខ្លាំង ។

ក្រុមហ៊ុន IRON FACTORY IKEDA បញ្ជាក់ថា ផ្លែចេកដែកនេះត្រូវបានផលិតឡើងពីលោហៈទាំងអស់ ហើយផ្លែចេកនីមួយៗមានទំហំ និងរូបរាងមិនដូចគ្នាទេ ។ វាមានទម្ងន់ស្មើនឹង១,៥គីឡូក្រាម ហើយក្រុមហ៊ុនដាក់លក់ក្នុងតម្លៃប្រមាណ៧៨ដុល្លារអាមេរិកប៉ុណ្ណោះក្នុង១ផ្លែ ៕