ឧប្បត្តិហេតុផ្លូវទឹកដ៏មិននឹកស្មានដល់! នាវាចម្បាំងដ៏ធំមួយរបស់កងទ័ពជើងទឹកអាមេរិក បានជ្រុលទៅបុ.កគ្នាជាមួយនាវាផ្គត់ផ្គង់កងទ័ពជើងទឹកក្នុងអំឡុងពេលប្រតិបត្តិការចាក់ប្រេង បណ្ដាលឲ្យកងនាវិកចំនួន ២នាក់បានរងរបួស នេះបើយោងតាមការចុះផ្សាយរបស់ BBC ដោយដកស្រង់ចេញពីរបាយការណ៍របស់ទីបញ្ជាការភាគខាងត្បូងយោធាអាមេរិក។

តាមការឲ្យដឹងរបស់ប្រភពខាងលើនេះ មនុស្សយ៉ាងហោចណាស់ពីរនាក់បានរាយការណ៍ពីរបួសស្រាលក្នុងអំឡុងពេលប្រតិបត្តិការចាក់ប្រេងបំពេញបន្ថែមនៅកណ្ដាលសមុទ្រការប៊ីន ជិតអាមេរិកខាងត្បូងកាលពីថ្ងៃពុធ ។ តាមការបញ្ជាក់នាវាទាំងពីរគ្រឿងដែលបានប៉ះទង្គិចគ្នានេះ មួយគឺជានាវាពិឃាតថ្នាក់ Arleigh Burke USS Truxtun របស់កងទ័ពជើងទឹក និងមួយគ្រឿងទៀតគឺជានាវាគាំទ្រការប្រយុទ្ធរហ័ស Supply-Class USNS Supply ដែលទ្រទ្រង់គ្រឿងភស្តុភារសម្រាប់កងទ័ពជើងទឹកអាមេរិក។

ជុំវិញហេតុការណ៍ដែលបានកើតឡើងនេះ ទីបញ្ជាការភាគខាងត្បូងសហរដ្ឋអាមេរិកមិនបានបញ្ជាក់ពីមូលហេតុនៃការបុ.កគ្នានោះឡើយ ហើយបាននិយាយថាឧប្បត្តិហេតុនេះកំពុងស្ថិតក្រោមការស៊ើបអង្កេតជាបន្ត។

យោងតាមកាសែត Wall Street Journal មូលហេតុដែលកងនាវារបស់សហរដ្ឋអាមេរិកមានវត្តមាននៅក្នុងតំបន់ការ៉ាប៊ីន គឺដោយសារតែវាជាផ្នែកមួយនៃគោលបំណងដែលរដ្ឋបាលលោក ត្រាំ ដើម្បីកំណត់គោលដៅក្រុមជួញដូរគ្រឿងញៀ.ន ចាប់តាំងពីលោក Trump បានចូលកាន់តំណែងឡើងវិញ។

បន្ថែមលើនេះ សហរដ្ឋអាមេរិកក៏បានប្រើប្រាស់វត្តមានយោធារបស់ខ្លួននៅក្នុងតំបន់នោះ ដើម្បីអនុវត្តទណ្ឌកម្មប្រឆាំងនឹងប្រេងរបស់ប្រទេសវេណេស៊ុយអេឡាផងដែរ បន្ទាប់ពីការចាប់ខ្លួនប្រធានាធិបតីប្រទេសនេះ លោក Nicolas Maduro ក្នុងប្រតិបត្តិការឆ្មក់ចូលទាំងកណ្តាលអធ្រាត្រកាលពីខែមករាកន្លងទៅ៕

ក្រោយគំរា.មកំហែ.ងលើជីវិតមនុស្សអស់រយៈពេលជាច្រើនទសវត្សន៍កន្លងមក ឥឡូវនេះមេរោ.គអេដស៍ (HIV) លែងត្រូវបានចាត់ទុកថាជាជំងឺដ៏កា.ចសាហា.វតទៅទៀតហើយ ដោយសារការរីកចម្រើនផ្នែកវេជ្ជសាស្រ្ត និងការអភិវឌ្ឍន៍លើបច្ចេកទេសព្យាបាលរបស់មនុស្ស។ នេះបើតាមការដកស្រង់របាយការណ៍ពីអង្គការសុខភាពពិភពលោក(WHO) ចុះផ្សាយដោយគេហទំព័រ Hashem Al-Ghaili។

នៅក្នុងឆ្នាំដំបូងៗនៃការរាតត្បាតមេរោគអេដស៍ ឬជំងឺអេដស៍ក្នុងទសវត្សរ៍ឆ្នាំ 1980 និង 1990 គេពុំទាន់រកឃើញព្យាបាលណាមួយដែលមានប្រសិទ្ធភាពទេ ដូច្នេះមនុស្សជាច្រើនបានធ្លាក់ខ្លួនឈឺធ្ងន់ ហើយបានស្លាប់។ ប៉ុន្តែសព្វថ្ងៃនេះ ដោយសារការរីកចម្រើនផ្នែកវេជ្ជសាស្រ្ត ឱសថព្យាបាលនិងវិធីព្យាបាលទំនើបៗជាច្រើនត្រូវបានបង្កើតឡើង។

គិតមកត្រឹមឆ្នាំ 2025 ថ្នាំប្រឆាំងមេរោគអេដស៍ (ART) ត្រូវបានដាក់សាកល្បងឲ្យប្រើប្រាស់បានជោគជ័យ ហើយបានផ្លាស់ប្តូរស្ថានភាពនៃជំងឺយ៉ាងខ្លាំង។ អ្នកដែលមានលទ្ធភាពតែងតែស្វែងរកថ្នាំប្រភេទនេះ ដោយពួកគេរំពឹងថា វានឹងអាចជួយពួកគេរស់នៅបានយូរដូចជាមនុស្សធម្មតាដែលគ្មានមេរោគ។

តាម WHO នៅពេលដែលមនុស្សមានផ្ទុកមេរោគអេដស៍ណាម្នាក់បានលេបថ្នាំ ART ជារៀងរាល់ថ្ងៃ នោះមេរោគនឹងចុះខ្សោយខ្លាំងនៅក្នុងខ្លួនរបស់ពួកគេ។ កត្តានេះនឹងជួយឲ្យពួកគេរស់នៅបានយូរ និងរស់នៅបានដូចមនុស្សទូទៅធម្មតា ហើយអាចឲ្យពួកគេធ្វើការ សិក្សា មានគ្រួសារ និងរស់នៅប្រកបដោយសុខភាពល្អ។

អ្វីដែលកាន់តែពិសេស ជាមួយនឹងការព្យាបាលត្រឹមត្រូវក្នុងរយៈពេលយូរ វានឹងអាចកាត់បន្ថយបរិមាណមេរោគនៅក្នុងឈាមឲ្យនៅតិចតួចបំផុត រហូតឈានដល់កម្រិតដែលគេលែងអាចពិនិត្យឃើញតទៅទៀត ដែលជួយឲ្យអ្នកជំងឺមានប្រព័ន្ធភាពស៊ាំរឹងមាំ ហើយមិនអាចចម្លងមេរោគអេដស៍ទៅដៃគូផ្លូវភេទរបស់ពួកគេបានទេ។

យ៉ាងណាមិញ បើទោះជាមានថ្នាំពន្យាដែលមានប្រសិទ្ធភាពខ្ពស់ និងរបៀបព្យាបាលដែលទំនើបៗក្ដី មេរោគអេដស៍នៅតែត្រូវបានចាត់ទុកថាជាជំងឺរ៉ាំរ៉ៃ ប៉ុន្តែអាចគ្រប់គ្រងបាន ដោយលែងជាការគំរា.មកំហែ.ងដល់ជីវិតមនុស្សដ៏គួរឲ្យខ្លាចតទៅទៀតហើយ៕

ទោះជាពលរដ្ឋខេត្តឈុនបុរីរកឃើញភាពខុសប្រក្រតីជាច្រើននៅមណ្ឌលបោះឆ្នោត រាប់សន្លឹកឆ្នោត និងទាមទារឱ្យគណៈកម្មាធិការរៀបចំការបោះឆ្នោតរាប់សន្លឹកឆ្នោតឡើងវិញ ប៉ុន្តែគណៈកម្មាធិការបដិសេធ និងថាគ្មានភាពខុសប្រក្រតីអ្វីឡើយ ។ ការមិនរាប់សន្លឹកឆ្នោតឡើងវិញធ្វើឱ្យពលរដ្ឋខេត្តឈុនបុរី ក៏ដូចជាគណបក្សប្រជាជន (អតីតគណបក្សកាវក្លៃ) ខកចិត្តយ៉ាងខ្លាំងដោយសារការបោះឆ្នោតកាលពីថ្ងៃទី៨ ខែកុម្ភៈ គ្មានភាពត្រឹមត្រូវ សេរី និងយុត្តិធម៌ ព្រមទាំងលម្អៀងទៅគណបក្សភូមិចៃថៃ ។

គណបក្សប្រជាជនបានបង្ហាញការខកចិត្តយ៉ាងខ្លាំងកាលពីថ្ងៃទី១២ ខែកុម្ភៈ ឆ្នាំ២០២៦ ចំពោះគណៈកម្មាធិការរៀបចំការបោះឆ្នោតមិនរាប់សន្លឹកឆ្នោតឡើងវិញក្នុងមណ្ឌល១ ខេត្តឈុនបុរី ទោះជាពលរដ្ឋធ្វើបាតុកម្មជាច្រើនថ្ងៃទាមទារបង្ហាញតម្លាភាពពីការបោះឆ្នោតប្រកបដោយភាពត្រឹមត្រូវ សេរី និងយុត្តិធម៌ក្តី ។ គណបក្សប្រជាជនអំពាវនាវឱ្យគណៈកម្មាធិការនេះរាប់សន្លឹកឆ្នោតដើម្បីឱ្យពលរដ្ឋអស់សង្ស័យពីការលម្អៀងទៅរកគណបក្សភូមិចៃថៃរបស់លោក Anutin Charnvirakul ។

តាមការចុះផ្សាយរបស់សារព័ត៌មាន Khaosod កាលពីថ្ងៃទី១២ ខែកុម្ភៈ គណៈកម្មាធិការរៀបចំការបោះឆ្នោតបានសម្រេចមិនរាប់សន្លឹកឆ្នោតឡើងវិញនៅមណ្ឌល១ ខេត្តឈុនបុរី ដែលការសម្រេចនេះបន្ទាប់ពីគណបក្សប្រជាជនបានប្រមូលភស្តុតាងពីភាពខុសប្រក្រតីជាច្រើនកើតឡើងនៅមណ្ឌលបោះឆ្នោត មណ្ឌលរាប់សន្លឹកឆ្នោត និងបញ្ជូនភស្តុតាងទៅគណៈកម្មាធិការដើម្បីស្នើឱ្យរាប់សន្លឹកឆ្នោតឡើងវិញ ។

គណបក្សប្រជាជនបង្ហាញការខកចិត្តយ៉ាងខ្លាំងដែលគណៈកម្មាធិការមិនប្រើប្រាស់អំណាចស្របច្បាប់របស់ខ្លួនក្នុងការរាប់សន្លឹកឆ្នោតជាថ្មីនៅមណ្ឌលបោះឆ្នោតដែលមានភាពខុសប្រក្រតី ដោយគណបក្សនេះបញ្ជាក់ថា ការរាប់សន្លឹកឆ្នោតជាថ្មីនឹងមិនធ្វើឱ្យលទ្ធផលបោះឆ្នោតផ្លាស់ប្តូរទេ ប៉ុន្តែដើម្បីឱ្យពលរដ្ឋអស់សង្ស័យ និងឈប់ចោទប្រកាន់គណៈកម្មាធិការ ។ វានឹងធ្វើឱ្យពលរដ្ឋមានទំនុកចិត្តលើការបោះឆ្នោតកាលពីថ្ងៃទី៨ ខែកុម្ភៈ ប្រព្រឹត្តទៅដោយតម្លាភាព និងបញ្ជាក់ពីសន្លឹកឆ្នោតរបស់ពលរដ្ឋយ៉ាងត្រឹមត្រូវ ។

គណបក្សប្រជាជនអំពាវនាវឱ្យគណៈកម្មាធិការរាប់សន្លឹកឆ្នោតជាថ្មីនៅមណ្ឌល១ ខេត្តឈុនបុរី និងរាយការណ៍ពីលទ្ធផលការរាប់សន្លឹកឆ្នោតក្នុងមណ្ឌលនេះជាបន្ទាន់ ។ រីឯមណ្ឌលផ្សេងទៀតដែលគណបក្សប្រជាជនរកឃើញភាពខុសប្រក្រតី គឺគណបក្សប្រជាជននឹងបន្តប្រមូលភស្តុតាងបញ្ជូនទៅគណៈកម្មាធិការឱ្យរាប់សន្លឹកឆ្នោតជាថ្មីតាមការប្រកាសជាសាធារណៈកន្លងមក ។

គួរបញ្ជាក់ថា កាលពីថ្ងៃទី១២ ខែកុម្ភៈ គណៈកម្មាធិការរៀបចំការបោះឆ្នោតបានប្រកាសពីការបោះឆ្នោត និងរាប់សន្លឹកឆ្នោតនៅមណ្ឌល១ ខេត្តឈុនបុរី គ្មានភាពខុសប្រក្រតីដូចការលើកឡើងទេ ដូច្នេះ គណៈកម្មាធិការសម្រេចមិនរាប់សន្លឹកឆ្នោតឡើងវិញឡើយ ។

គណបក្សនយោបាយនានា និងពលរដ្ឋបានចាត់ទុកគណៈកម្មាធិការរៀបចំការបោះឆ្នោតធ្វើការលម្អៀងយ៉ាងខ្លាំង និងគាំទ្រគណបក្សភូមិចៃថៃរបស់លោក Anutin ឱ្យទទួលបានសន្លឹកឆ្នោតច្រើនលើសលប់ ។ ពលរដ្ឋតាមបណ្តាខេត្តធ្វើបាតុកម្មទាំងយប់ទាំងថ្ងៃទាមទារឱ្យរាប់សន្លឹកឆ្នោតជាថ្មីដោយសាររកឃើញភាពខុសប្រក្រតីជាច្រើន ប៉ុន្តែគណៈកម្មាធិការថា គ្មានភាពខុសប្រក្រតី ៕

ពិភពលោកចាប់អារម្មណ៍យ៉ាងខ្លាំង និងបារម្ភផងដែរពីមនុស្សនឹងមានគ្រោះថ្នា.ក់ដោយសារមនុស្សយន្តនាថ្ងៃអនាគត បន្ទាប់ពីចិនបញ្ជូនមនុស្សយន្តជាច្រើនគ្រឿងទៅហ្វឹកហាត់ក្បាច់គុនកុងហ្វូជាមួយព្រះសង្ឃវត្តសៅលិញ ។ ប៉ុន្តែចិនចាត់ទុកនេះជាការរួមបញ្ចូលគ្នានូវក្បាច់គុនកុងហ្វូដែលមានអាយុកាលរាប់ពាន់ឆ្នាំរបស់ខ្លួនជាមួយមនុស្សយន្តបំពាក់បច្ចេកវិទ្យា AI ដ៏ទំនើប ។

រូបភាពគួរឱ្យភ្ញាក់ផ្អើល និងមិននឹកស្មានដល់ត្រូវបានចែកចាយនៅទូទាំងពិភពលោក ដែលបង្ហាញពីវត្តសៅលិញដ៏ល្បីល្បាញក្នុងខេត្តហឺណាន ប្រទេសចិន បានអនុញ្ញាតឱ្យមនុស្សយន្ត Humanoids ជាច្រើនគ្រឿងចូលរួមហ្វឹកហាត់ក្បាច់គុនកុងហ្វូជាមួយព្រះសង្ឃវត្តសៅលិញ ។

ចិនចាត់ទុកនេះជាការរួមបញ្ចូលគ្នានូវក្បាច់គុនកុងហ្វូមានអាយុកាលរាប់ពាន់ឆ្នាំរបស់ខ្លួនជាមួយមនុស្សយន្តបំពាក់បច្ចេកវិទ្យា AI ដ៏ទំនើបនាពេលបច្ចុប្បន្ន ។ មនុស្សយន្តបានហ្វឹកហាត់ក្បាច់គុនកុងហ្វូជាមួយកាយវិការដ៏រស់រវើកដូចគ្នានឹងព្រះសង្ឃវត្តសៅលិញដែរ ដែលក្លាយទៅជារូបភាពឆ្លុះបញ្ចាំងពីក្បាច់គុនសម័យកាលបុរាណជាមួយបច្ចេកវិទ្យាបច្ចុប្បន្ន ។

វីដេអូមនុស្សយន្តហាត់ក្បាច់គុនកុងហ្វូជាមួយព្រះសង្ឃវត្តសៅលិញ ផ្ទុះការចាប់អារម្មណ៍យ៉ាងខ្លាំងក្នុងបណ្តាញសង្គម ដោយសារមនុស្សយន្តអាចប្រើប្រាស់ក្បាច់គុននេះដូចមនុស្សពិតៗគ្រប់កាយវិការក្នុងបរិវេណវត្ត ។ ពួកវាបង្ហាញកាយវិការហ្វឹកហាត់ក្បាច់គុនគ្រប់ក្បាច់ ដែលដូចគ្នានឹងកូនសិស្សកំពុងតែរៀនសូត្រពីគ្រូយ៉ាងយកចិត្តទុកដាក់ ។

សមត្ថភាពរបស់មនុស្សយន្តដែលអាចចងចាំក្បាច់គុន និងបញ្ចេញកាយវិការរស់រវើកពេលហ្វឹកហាត់ជាមួយព្រះសង្ឃវត្តសៅលិញនេះ ធ្វើឱ្យផ្ទុះការចាប់អារម្មណ៍ និងកង្វល់ពីបច្ចេកវិទ្យាបង្កគ្រោះថ្នាក់ ។ មនុស្សមួយចំនួនចាត់ទុកនេះជាការបោះជំហ៊ានយ៉ាងសំខាន់សម្រាប់ឧស្សាហកម្មមនុស្សយន្ត ព្រមទាំងឆ្លុះបញ្ចាំងពីភាពរីកចម្រើនផ្នែកផលិតជាមួយបច្ចេកវិទ្យា AI រីកចម្រើនយ៉ាងឆាប់រហ័ស ។

ទន្ទឹមនឹងនេះ មនុស្សមួយចំនួនទៀតបារម្ភពីបច្ចេកវិទ្យារីកចម្រើនខ្លាំងអាចនឹងបង្កគ្រោះថ្នាក់ដល់មនុស្សនាថ្ងៃអនាគត ឬរយៈពេល១០ឆ្នាំខាងមុខ មនុស្សនឹងប្រឈមហានិភ័យដោយសារមនុស្សយន្តមិនខាន ។

គួរបញ្ជាក់ថា ការផលិតមនុស្សយន្តរបស់ចិនកាន់តែទំនើប និងរស់រវើកខ្លាំងឡើង ដើម្បីបម្រើការងារក្នុងឧស្សាហកម្មជាច្រើនទាំងក្នុងរោងចក្រ ក្រុមហ៊ុន និងលំនៅឋាន ។ មនុស្សយន្តចិនអាចរត់ប្រណាំង ប្រដាល់លើសង្វៀន រាំក្នុងកម្មវិធីផ្សេងៗ ធ្វើការលើលំហរអាកាស ហើយចិនគ្រោងដំណើរការមនុស្សយន្តពពោះនៅឆ្នាំ២០២៦ ៕

ភាពតានតឹងនៅឧបទ្វីបកូរ៉េបានកើតឡើងម្តងទៀត បន្ទាប់ពីកូរ៉េខាងជើងព្រមានចាត់វិធានការក្តៅចំពោះកូរ៉េខាងត្បូង ប្រសិនបើនៅតែបង្ហោះដ្រូនឆ្លងកាត់ព្រំដែនចូលទឹកដីខ្លួន ខណៈរដ្ឋាភិបាលកូរ៉េខាងត្បូងក្រោមការដឹកនាំរបស់លោកប្រធានាធិបតី Lee Jae Myung សន្យាស៊ើបអង្កេតរកការពិត និងទម្លាក់កំហុសលើពលរដ្ឋ ។

ការព្រមានរបស់កូរ៉េខាងជើងធ្វើឡើងតាមរយៈសេចក្តីថ្លែងការណ៍របស់អ្នកស្រី Kim Yo Jong ប្អូនស្រីរបស់លោក Kim Jong Un មេដឹកនាំកូរ៉េខាងជើង ដែលត្រូវបានចុះផ្សាយដោយ KCNA ជាសារព័ត៌មានផ្លូវការរបស់ទីក្រុងព្យុងយ៉ាង ថាកូរ៉េខាងជើងនឹងចាត់វិធានការក្តៅចំពោះការល្មើសអធិបតេយ្យនេះ ។

អ្នកស្រី Kim Yo Jong ថា បើកូរ៉េខាងត្បូងនៅតែបង្ហោះដ្រូនឆ្លងកាត់ព្រំដែនទៀត កូរ៉េខាងជើងនឹងចាត់វិធានការយ៉ាងស័ក្តិសម មិនថាអ្នកបង្ហោះដ្រូននេះជាមន្ត្រីរាជការ ឬពលរដ្ឋធម្មតា រដ្ឋាភិបាលទីក្រុងព្យុងយ៉ាងនឹងចាត់វិធានការទាំងអស់ ។ កូរ៉េខាងជើងបានបាញ់ទម្លាក់ដ្រូនស៊ើបការណ៍កាលពីដើមខែមករា ឆ្នាំ២០២៦ ដែលដ្រូននោះបំពាក់ដោយកាមេរ៉ាថតរូប, មានទិន្នន័យបញ្ជាក់ពីគោលដៅសំខាន់ៗ និងរូបភាពព្រំដែនប្រទេសទាំងពីរ ។

ប្រធានាធិបតីកូរ៉េខាងត្បូង លោក Lee Jae Myung ដែលឡើងកាន់តំណែងកាលពីឆ្នាំ២០២៥ និងព្យាយាមស្តារទំនាក់ទំនងជាមួយកូរ៉េខាងជើង បដិសេធថា មិនពាក់ព័ន្ធនឹងការបង្ហោះដ្រូនចូលទឹកដីកូរ៉េខាងជើងទេ វាអាចជាការបង្ហោះរបស់ពលរដ្ឋកូរ៉េខាងត្បូង ។

ក្រុមការងារចម្រុះកងទ័ព និងសមត្ថកិច្ចកូរ៉េខាងត្បូងបានប្រកាសនៅសប្តាហ៍ទី២ ខែកុម្ភៈ ពីការស៊ើបអង្កេតកងទ័ពកូរ៉េខាងត្បូង ចំនួន៣រូប និងមន្ត្រីស៊ើបការណ៍ ១រូប ដើម្បីស្វែងរកការពិតពីការបង្ហោះដ្រូន ខណៈរដ្ឋមន្ត្រីក្រសួងបង្រួបបង្រួមជាតិកូរ៉េខាងត្បុងបង្ហាញការសោកស្តាយយ៉ាងខ្លាំងចំពោះហេតុការណ៍នេះ និងសំណូមពរឱ្យរដ្ឋាភិបាលកាត់បន្ថយភាពតានតឹងជាមួយកូរ៉េខាងជើង ។

បើតាមអ្នកវិភាគ សេចក្តីថ្លែងការណ៍របស់អ្នកស្រី Kim Yo Jong បង្ហាញពីរដ្ឋាភិបាលក្រុងព្យុងយ៉ាងកំពុងឃ្លាំមើលសកម្មភាពរបស់កូរ៉េខាងត្បូងគ្រប់ពេលវេលា ជាពិសេស ពេលភូមិសាស្ត្រនយោបាយតំបន់ឥណ្ឌូប៉ាស៊ីហ្វិកនៅតែផុយស្រួយ ។ ការបង្ហោះដ្រូន ស្របពេលកូរ៉េខាងជើងនឹងរៀបចំកិច្ចប្រជុំសំខាន់នៅចុងខែកុម្ភៈ ដែលកិច្ចប្រជុំនេះរៀបចំឡើងរៀងរាល់៥ឆ្នាំម្តង ដើម្បីកំណត់គោលនយោបាយជាតិ យុទ្ធសាស្ត្រកងទ័ព និងកំណត់ផែនការនុយក្លេអ៊ែររយៈពេល៥ឆ្នាំខាងមុខ ៕

អ្នកចូលចិត្តខាងតារាសាស្រ្តកុំភ្លេចណាត់គ្នាដើម្បីទស្សនា! បាតុភូតដ៏អស្ចារ្យនិងគួរឱ្យចាប់អារម្មណ៍មួយនឹងកើតមាននៅរាត្រីថ្ងៃទី 28 ខែកុម្ភៈ ដោយភពនៅក្នុងគន្លងព្រះអាទិត្យចំនួន ៦ នឹងវិលមកដល់ចំណុចស្មើតម្រៀបគ្នាជាជួរ បង្កើតបានជាទស្សនីយភាពដ៏កម្រនៅលើមេឃដែលអនុញ្ញាតឲ្យមនុស្សរស់នៅលើភពផែនដីអាចមើលឃើញដោយភ្នែកទទេបាន។

យោងតាមការព្យាកររបស់អង្គការ NASA នៅរាត្រីថ្ងៃសៅរ៍ ថ្ងៃទី ២៨ ខែកុម្ភៈ ឆ្នាំ ២០២៦ នៅតាមតំបន់មួយចំនួននៃភពផែនដី មនុស្សនឹងអាចមានឱកាសឃើញភពពុធ ភពសុក្រ ភពព្រហស្បត៍ ភពសៅរ៍ ភពណិបទូន និង ភពអ៊ុយរ៉ានុស ក្នុងពេលតែមួយ ក្រោយព្រះអាទិត្យលិចទៅ។

តាមអង្គការ បាតុភូតនេះ ត្រូវបានគេស្គាល់ថាជាក្បួនដង្ហែរភព ឬការតម្រឹមភព កើតឡើងនៅពេលដែល ភពយ៉ាងហោចណាស់ចំនួន ៤ ឬ ៥ អាចត្រូវបានគេមើលឃើញរួមគ្នាក្នុងពេលតែមួយ ដោយសារតែគន្លងរបស់ពួកវា និងចំណុចរបស់ភពផែនដី ។ នេះនឹងក្លាយជាព្រឹត្តិការណ៍ដ៏អស្ចារ្យមួយនៅពេលព្រលប់ ដែលអ្នកអាចរីករាយនឹងពេលវេលានេះ បើទោះជាគ្មានឧបករណ៍ជំនួយការសង្កេតតារាសាស្រ្តក៏ដោយ។

ជាមួយគ្នានេះដែរ ដើម្បីអាចទស្សនាព្រឹត្តិការនេះឲ្យកាន់តែច្បាស់ ជាដំបូងអ្នកត្រូវជ្រើសរើសទីតាំងបើកចំហរធំទូលាយ ដែលស្រឡះល្អសម្រាប់ការមើលទៅកាន់ផ្ទៃមេឃ ខណៈទីតាំងដែលល្អបំផុតគឺជាតំបន់ដែលនៅឆ្ងាយពីទីក្រុង មានភាពស្ងប់ស្ងាត់ មិនមានអគារ ឬដើមឈើបិទបាំង និងមិនមានពន្លឺភ្លើងឆ្វេចឆ្វាច។ ក៏ប៉ុន្តែ ប្រសិនបើអ្នករស់នៅក្នុងទីក្រុងធំ ហើយមិនចង់ចេញទៅណាឆ្ងាយនោះទេ នោះអ្នកអាចត្រូវការកែវយឹត ឬឧបករណ៍តេឡេស្កុប។

យ៉ាងណាក៏ដោយ ប្រសិនបើចង់ផ្ដិតយករូបភាពពីបាតុភូតនេះឲ្យបានច្បាស់ល្អ អ្នកគួរជ្រើសរើសប្រើប្រាស់កាមេរ៉ា DSLR ដើម្បីចាប់យករូបភាព ដូច្នេះនឹងអាចនឹងទទួលបានលក្ខខណ្ឌកាន់តែប្រសើរឡើងក្នុងការចាប់ប្លង់ថត៕