បរទេស៖ ក្រុមហ៊ុន Prophetic របស់សហរដ្ឋអាមេរិកគ្រោងនឹងបង្កើតឧបករណ៍ថ្មីមួយដែលមានឈ្មោះថា “Halo” ដោយវាមានសមត្ថភាពគ្រប់គ្រងសុបិន្តពេលកំពុងគេង។

យោងតាមប្រភពព័ត៌មាន Business Insider ដែលបានរាយការណ៍កាលពីថ្ងៃទី២ ខែធ្នូថា ឧបករណ៍ពាក់ក្បាលដែលមានឈ្មោះថា “Halo” នឹងនាំមកនូវស្ថានភាពសុបិន្តដ៏ភ្លឺស្វាង ក៏ដូចជាមានសមត្ថភាពគ្រប់គ្រងសុបិន្តពេលកំពុងគេង ដែលវាប្រយោជន៍សម្រាប់ការងារនាពេលអនាគត។ ក្រុមហ៊ុន Prophetic បានឱ្យដឹងទៀតថា ផលិតផលនេះគ្រោងនឹងបង្កើតនៅក្នុងឆ្នាំ ២០២៤ ខាងមុខនេះ ហើយនឹងដាក់លក់ក្នុងតម្លៃ ១,៥០០ ទៅ ២,០០០ ដុល្លារអាមេរិក ជាមួយនឹងផែនការក្នុងការចែកចាយទិន្នន័យពីវិទ្យាស្ថាននៅនិទាឃរដូវឆ្នាំ ២០២៤ និងឧបករណ៍ដឹកជញ្ជូននៅនិទាឃរដូវឆ្នាំ ២០២៥។

Halo គឺជាឧបករណ៍ជំរុញតំបន់ពិសេសនៃខួរក្បាលដែលទាក់ទងនឹងការយល់សប្តិដែល ធ្វើឱ្យសកម្មផ្នែកនៃខួរក្បាល ក៏ដូចជាទទួលខុសត្រូវចំពោះការសម្រេចចិត្ត និងស្មារតី ដោយហេតុនេះបង្កើតភាពច្បាស់លាស់ក្នុងសុបិន្ត។ បច្ចុប្បន្នឧបករណ៍នេះត្រូវបានផ្អែកលើការស្រាវជ្រាវដែលកំពុងបន្តដោយវិទ្យាស្ថាន Donders ក្នុងប្រទេសហូឡង់ ដែលកំណត់គោលដៅលើតំបន់ខួរក្បាលជាក់លាក់ និងប្រេកង់អ៊ុលត្រាសោនសម្រាប់ការបង្កើតសុបិន្តដ៏ល្អឥតខ្ចោះ។

ក្រុមហ៊ុនបាននិយាយថា ការបង្កើតឧបករណ៍នេះក្នុងគោលបំណងបង្កើនសមត្ថភាពរបស់មនុស្សក្នុងការគ្រប់គ្រងសុបិន្ត ដើម្បីត្រៀមខ្លួនអភិវឌ្ឍការងារថ្មីៗនាពេលអនាគត ក៏ដូចជាអាចគ្រប់គ្រងគោលដៅបានកាន់តែល្អប្រសើរជាងមុន។ ក្រុមហ៊ុនក៏បានមើលឃើញការចាប់អារម្មណ៍យ៉ាងខ្លាំង ដោយបង្កើត “ប្រាក់ចំណូលរាប់សែនដុល្លារក្នុងការកក់” រយៈពេលពីរបីសប្តាហ៍ដំបូងកន្លងមកនៃការបើកការកក់ ដោយបង្ហាញអំពីមូលដ្ឋានអ្នកប្រើប្រាស់ដ៏មានសក្តានុពលដែលរំពឹងថានឹងចេញផ្សាយផលិតផលនេះក្នុងឆ្នាំ ២០២៤ ឬ ២០២៥៕

ប្រទេសជប៉ុន ៖ នៅថ្ងៃទី៧ ខែធ្នូ ឆ្នាំ២០២៣ សារព័ត៌មាន Straits Times រាយការណ៍ថា ប៉ូលិសជប៉ុនបានចាប់ខ្លួនបុរសបើកបររថយន្តតាក់ស៊ីម្នាក់នៅទីក្រុងតូក្យូ ដោយបុរសរូបនេះបើកបររថយន្តឆ្លងកាត់ហ្វូងព្រាបដោយចេតនា និងបណ្តាលឱ្យព្រាបងា.ប់១ក្បាល ។ បុរសអ្នកបើកបរតាក់ស៊ីប្រាប់ថា ដោយសារតែខ្លួនគេខឹងសម្បារសត្វព្រាបមកឈរលើផ្លូវ ហើយវាជាផ្លូវរបស់មនុស្សធ្វើដំណើរ ។

អ្នកនាំពាក្យស្ថានីយប៉ូលិសប្រចាំទីក្រុងតូក្យូលើកឡើងថា លោក Atsushi Ozawa អាយុ៥០ឆ្នាំ បានបើករថយន្តកិនព្រាប ខណៈប្រទេសជប៉ុនបានហាមឃាត់ពលរដ្ឋទាំងអស់មិនឱ្យសម្លា.ប់ព្រាបទេ ។ ហេតុនេះ ប៉ូលិសក៏បានចាប់ខ្លួនបុរសបើកបរតាក់ស៊ីរូបនេះ កាលពីថ្ងៃទី៣ ខែធ្នូ ឆ្នាំ២០២៣ ពីបទរំលោភច្បាប់គ្រប់គ្រងសត្វព្រៃ ។

បើតាមសារព័ត៌មានជប៉ុនបញ្ជាក់ថា លោក Atsushi Ozawa បានបើកបររថយន្តក្នុងល្បឿន៦០គីឡូម៉ែត្រក្នុង១ម៉ោង ។ នៅពេលភ្លើងសញ្ញាចរាចរណ៍ចេញពណ៌បៃតង ស្រាប់តែគាត់បើកបរឆ្លងកាត់ហ្វូងបក្សីយ៉ាងលឿន ហើយធ្វើឱ្យអ្នកដំណើរទូទៅភ្ញាក់ផ្អើលយ៉ាងខ្លាំងនាំគ្នាងាកមើល ដោយសារតែពួកគេឮសូរសំឡេងម៉ាស៊ីនរថយន្តខ្លាំងពេក ។

ប៉ូលិសក្រុងតូក្យូនិយាយថា ពេទ្យសត្វបានបញ្ជាក់ពីមូលហេតុបណ្តាលឱ្យព្រាបងា.ប់ថា ដោយសារវារងរបួសខ្លាំងពេក ហើយពេទ្យសត្វមិនអាចជួយសង្គ្រោះជីវិតបាន ។ រីឯលោក Atsushi Ozawa បាននិយាយទៅកាន់ប៉ូលិសផ្នែកស៊ើបអង្កេតថា ផ្លូវនេះជារបស់មនុស្ស ហើយសត្វព្រាបមិនគួរឈរនៅលើផ្លូវទេ ។

ទូរទស្សន៍ Fuji ផ្សាយថា បើតាមការពិចារណារបស់ប៉ូលិស គឺអាកប្បកិរិយារបស់អ្នកបើករថយន្តតាក់ស៊ីនេះបានបង្កគ្រោះថ្នាក់យ៉ាងខ្លាំង ទើបប៉ូលិសសម្រេចចាប់ខ្លួនគាត់ ។ រីឯអ្នកលេងបណ្តាញសង្គមបានបញ្ចេញយោបល់ក្នុងបណ្តាញសង្គម X (ឬឈ្មោះ Twitter) ថា អ្នកបើកបរយានជំនិះទាំងអស់គួរតែចុចស៊ីប្លេ ឬធ្វើអ្វីម្យ៉ាង ជំនួសឱ្យការតាំងចិត្តសម្លាប់បក្សីបែបនេះ ព្រោះវាជាទង្វើមួយជ្រុលហួសហេតុពេក ៕ ប្រភព ៖ khaosod

Master Card និង NEC គឺជាក្រុមហ៊ុនបច្ចេកវិទ្យារបស់ប្រទេសជប៉ុន មានគម្រោងដំណើរការប្រព័ន្ធទូទាត់ប្រាក់នៅតាមហាងលក់ទំនិញផ្សេងៗលើពិភពលោក តាមរយៈការស្កេនផ្ទៃមុខអតិថិជន ។ ប្រព័ន្ធទូទាត់ប្រាក់នេះ នឹងចាប់ផ្តើមសាកល្បងប្រើប្រាស់នៅឆ្នាំ២០២៤ ក្នុងប្រទេសមួយចំនួននៅតំបន់អាស៊ី ដូចជា ៖ សិង្ហបុរី និងឥណ្ឌូណេស៊ី បន្ទាប់មក នឹងពង្រីកមកដល់ប្រទេសថៃ, អូស្ត្រាលី និងជប៉ុន ។

ក្រុមហ៊ុនទាំងពីរនេះយល់ឃើញថា អាស៊ី គឺជាតំបន់គោលដៅដំបូងគេសម្រាប់អនុវត្តប្រព័ន្ធទូទាត់ប្រាក់ថ្មី និងនាំមុខទីផ្សារនៅអាមេរិក និងតំបន់អឺរ៉ុប ។ នាយកគ្រប់គ្រងក្រុមហ៊ុនបានលើកឡើងពីភាពទាក់ទាញក្នុងតំបន់នេះ ទើបក្រុមហ៊ុនគ្រោងយកបច្ចេកវិទ្យាថ្មីមកប្រើប្រាស់ ។ ការប្រកបអាជីវកម្មរបស់ក្រុមហ៊ុន Master Card ជាង៨០% គឺជាការប្រើប្រាស់កាតឥណទាន និងទូរស័ព្ទស្មានហ្វូន ។

Karthik Ramanathan ជាអនុប្រធានជាន់ខ្ពស់ផ្នែកអនឡាញ និងគ្រប់គ្រងព័ត៌មានក្នុងទីផ្សារអាស៊ី-ប៉ាស៊ីហ្វិករបស់ក្រុមហ៊ុន Master Card លើកឡើងថា ក្រុមហ៊ុនទូទាត់ប្រាក់នៅអាមេរិកបានចាប់ដៃគូជាមួយក្រុមហ៊ុនលក់រាយ និងកំពុងស្វែងរកគម្រោងសាកល្បងនៅឆ្នាំ២០២៤ ។ អនុប្រធានជាន់ខ្ពស់ក្រុមហ៊ុនរូបនេះលើកឡើងថា ៖ «យើងជឿជាក់ថា តំបន់អាស៊ីនឹងទទួលបានបទពិសោធន៍ល្អក្នុងការទូទាត់ប្រាក់តាមបច្ចេកវិទ្យាថ្មី» ។

ចំណែកវិធីប្រើប្រាស់វិញ អតិថិជនត្រូវចុះឈ្មោះក្នុង Profile និងថតផ្ទៃមុខរបស់ពួកគេតាមរយៈទូរស័ព្ទស្មាតហ្វូន ដើម្បីបង្ហាញទិន្នន័យផ្ទាល់ខ្លួនជាមុនសិន ។ បន្ទាប់មក ពួកគេត្រូវទៅស្កេនផ្ទៃមុខក្នុងកាមេរ៉ាថេតប្លេតរបស់ហាងលក់ទំនិញ ដោយពុំចាំបាច់ប្រើប្រាស់កាតឥណទាននាំឱ្យពិបាកទេ ។ លើសពីនេះ ហាងលក់ទំនិញអាចកាត់បន្ថយការចំណាយដើមទុនក្នុងការដំឡើងម៉ាស៊ីនឆូតកាតផងដែរ ។

ប្រព័ន្ធទូទាត់ប្រាក់តាមរយៈការស្កេនផ្ទៃមុខ នឹងប្រើប្រាស់ប្រព័ន្ធ Biometric ដែលអភិវឌ្ឍន៍ដោយក្រុមហ៊ុន NEC ។ ប្រព័ន្ធទូទាត់ថ្មីនេះមានភាពត្រឹមត្រូវបំផុត ព្រមទាំងអាចបញ្ជាក់នូវព័ត៌មានលម្អិតទៀតផង ។

ចំណែកការបារម្ភពីព័ត៌មានផ្ទាល់ខ្លួន និងសុវត្ថិភាពអតិថិជន នៅពេលពួកគេទូទាត់ប្រាក់តាមរយៈការស្កេនផ្ទៃមុខ ក្រុមហ៊ុន Master Card គ្រោងបង្កើតគោលការណ៍មួយចំនួនសម្រាប់ក្រុមហ៊ុនផ្សេងៗរួចហើយ ដូចជា ៖ ការលុបទិន្នន័យផ្ទាល់ខ្លួនភ្លាមៗ ដើម្បីកុំឱ្យមានការ Hack គណនី និងការពារកុំឱ្យប្រព័ន្ធ Biometric យកទិន្នន័យអតិថិជនទៅប្រើប្រាស់ក្នុងផ្លូវមិនល្អ ។ នេះបើតាមការលើកឡើងរបស់អនុប្រធានជាន់ខ្ពស់ផ្នែកអនឡាញរបស់ Master Card ៕ ប្រភព ៖ beartai BRIEF

នៅក្នុងរដ្ឋ Johor របស់ប្រទេសម៉ាឡេស៊ីគឺត្រង់តំបន់ព្រៃក្រាស់ក្រាល ដែលគេហៅថា Forest City បន្ទាប់ទទួលបាននូវការអភិវឌ្ឍពីចិន ក៏មានមតិលើកឡើងពីប្រជាជនមួយចំនួនដែលស្នាក់នៅទីនោះបាននិយាយថា ទីនោះគឺជាកន្លែងដែលស្ទើរតែគា្មនមនុស្សចូលមកស្នាក់នៅឬមកកម្សាន្តទាល់តែសោះ ខណៈបានធ្វើឲ្យតំបន់នោះមានសភាពស្ងាត់ជ្រងំ និងគួរឲ្យខ្លាច។

លោក Nazmi Hanafiah ដែលជាអ្នកស្នាក់នៅទីនោះបានប្រាប់សារព័ត៌មាន BBC អំពីការដែលគាត់បានជួលបន្ទប់ចំនួន១សម្រាប់ស្នាក់នៅទីនោះរយៈពេល៦ខែ ដែលជាប៉ម១នៃគម្រោងមេហ្គា ១០០ ពាន់លានដុល្លារនោះបាននិយាយថា «នៅទីនោះស្ងាត់ខ្លាំងណាស់ ខ្ញុំពិតជាតក់ស្លត់ខ្លាំង និងមានអារម្មណ៍ថាឯកោកណ្តោតកណ្តែង ខណៈនៅទីនោះមានតែម្នាក់ឯងព្រមជាមួយនឹងភាពភ័យខ្លាចតែប៉ុណ្ណោះ។

គម្រោងក្រុមហ៊ុនអភិវឌ្ឍន៍អចលនទ្រព្យដ៏ធំបំផុតមួយរបស់ប្រទេសចិន Country Garden បានបង្ហាញខ្លួនកាលពីឆ្នាំ២០១៦ នៅឯប្រទេសម៉ាឡេស៊ី ត្រង់តំបន់ Forest City ដែលគម្រោងនេះត្រូវបានផ្សព្វផ្សាយថាជា “ឋានសួគ៌ានៃក្តីសុបិន” រូមជាមួយនឹងបរិយាកាសល្អនិងកន្លែងទំនើបៗរួមបញ្ចូលនៅចំណុចតែមួយ មានទាំងសួនទឹក ទីលានវាយកូនហ្គោល កន្លែងញ៉ាំអាហារ ហើយយ៉ាងហោចណាស់ក៏មានមនុស្សរស់នៅ១លាននាក់រស់នៅទីនោះ។

ប៉ុន្តែ៨ឆ្នាំក្រោយមក គម្រោងនោះបានបរាជ័យទាំងស្រុង មនុស្សម្នាក៏បានចាប់ផ្តើមបោះបង់ចោលផ្ទះរបស់ពួកគេនៅទៅនោះ ព្រោះតែភាពការដែលរស់នៅទីនោះគ្មានភាពសុខដុមរមនា និងភាពសោះកក្រោះនៃតំបន់ ហើយក៏បានដាក់ឈ្មោះទីនោះថាជាទីក្រុងខ្មោច។ជាការពិតណាស់ កម្រោងអភិវឌ្ឍនៅទីនោះទើបតែបាន១៥%ទេ ខណៈផ្ទះល្វែងត្រឹមតែ១%ប៉ុណ្ណោះដែលត្រូវបានជួល ហើយនៅទីបំផុតគម្រោងនេះទាំងមូលកំពុងតែប្រឈមនឹងបំណុលជិត ២០០ ពាន់លានដុល្លារ។

លោក Hanafiah ក៏បានបន្តទៀតថា ដំបូងគាត់ពិតជាមានការរំពឹងទុកខ្ពស់ណាស់ក្នុងការរស់នៅទីនេះ ប៉ុន្តែចុងក្រោយវាគ្រាន់តែជាបទពិសោធន៍ដ៏អាក្រក់មួយប៉ុណ្ណោះ។ Forest City បន្ទាប់ពីត្រូវបានបោះបង់ចោលហើយ ឥឡូវនេះសូម្បីតែគិតថានឹងវិលត្រឡប់ទៅលេងទីនោះវិញម្តងទៀតក៏ធ្វើឱ្យគាត់«ស្រៀវស្រើប»ដែរ។

ជាមួយគ្នានេះ លោកពិតជាមានអារម្មណ៍ថាសោកស្តាយចំពោះអ្នកដែលបានវិនិយោគ និងទិញផ្ទះនៅទីនោះជាពន់ពេក។ ខណៈ ម្ចាស់គម្រោងគួរតែដំណើរការគម្រោងនេះឲ្យបានល្អទៅតាមកិច្ចសន្យាជាមួយនឹងអតិថិជន ប៉ុន្តែនោះមិនបានដូចអ្វីដែលបានរំពឹងទុកទេ និងបានត្រឹមតែចាត់ទុកថាជាមេរៀនជីវិតមិនល្អទៅចុះ៕

បរទេស៖ ក្នុងចំណោមស្មាតហ្វូនដែលលក់ដាច់បំផុតទាំង ១០ នៅលើពិភពលោកក្នុង QIII/2023 នេះចាប់ពី iPhone 4 រហូតដល់ iPhone 14 សុទ្ធតែជាម៉ូដែលដែលលក់ដាច់ពីមួយជំនាន់ទៅមួយជំនាន់ ខណៈដែល iPhone 15 មិនមានវត្តមានក្នុងបញ្ជីស្មាតហ្វូនដែលលក់ដាច់ជាងគេនោះទេ។

យោងតាមប្រភពព័ត៌មាន Phone Arena ដែលបានចុះផ្សាយកាលពីថ្ងៃទី៥ ខែធ្នូថា ទូរស័ព្ទ iPhone 14 នៅតែជាទូរស័ព្ទដែលពេញនិយមបំផុតក្នុងទីផ្សារពិភពលោកដោយទទួលបានចំណាត់ថ្នាក់លេខ១ បន្ទាប់មកគឺម៉ូដែល 14 Pro Max, 14 Pro និង iPhone 13 ។ រីឯSamsung វិញបានកាន់កាប់តំណែងចំនួន ៥ ដែលជាម៉ូដែលទាំងអស់របស់ Galaxy ស៊េរីរួមមាន A14, A14 5G, A54, A04e និង A34 ។ ចំណែកឯ Xiaomi របស់ចិនវិញជាប់ចំណាត់ថ្នាក់លេខ ៩ ជាមួយនឹងម៉ូដែល Redmi 12C ។

ក្នុងចំណោមស្មាតហ្វូនដែលលក់ដាច់ជាងគេតាំងពីពាក់កណ្ដាលខែកញ្ញាមក គ្មាន iPhone 15 នោះទេ។ ស៊េរី iPhone 15 ត្រូវបានគេចាត់ទុកថា មានកំហុសជាច្រើន និងប្រតិបត្តិការមិនស្ថិតស្ថេរដូច iPhone 14 ឡើយ។ ទោះជាយ៉ាងណាក៏ដោយ ស្ថានភាពរបស់ក្រុមហ៊ុន Apple គឺប្រសើរជាង Samsung ព្រោះថាឆ្នាំនេះ ម៉ូដែលលំដាប់ខ្ពស់របស់ក្រុមហ៊ុនកូរ៉េមិនបង្ហាញក្នុងបញ្ជីខ្ពស់ដូចកាលពីឆ្នាំមុននោះទេ។

កាលពីឆ្នាំ ២០២២ ទូរស័ព្ទ Samsung បានឈរនៅចំនាត់ថ្នាក់លេខ ១ ខណៈដែល iPhone ឈរត្រឹមលេខ ៨ និងលេខ៩។ ប៉ុន្តែនៅឆ្នាំ ២០២៣ នេះវិញ ម៉ូដែល iPhone 14 បានឈរនៅចំនាត់ថ្នាក់លេខ ១ ដោយម៉ូដែល Samsung វិញឈរត្រឹមលេខ ៥ ចុះក្រោមប៉ុណ្ណោះ។
ទោះជាយ៉ាងណាក៏ដោយក្រុមហ៊ុន Apple នៅតែដើរពីក្រោយ Samsung ក្នុងការលក់ស្មាតហ្វូន។ នៅក្នុងត្រីមាសចុងក្រោយនេះ Samsung មានចំណែកទីផ្សារ ២០% ធ្លាក់ចុះត្រឹមតែ ២% ប៉ុណ្ណោះ ខណៈពេលដែល Apple ឡើងដល់ ១៧% ធ្លាក់ចុះ ១% ធៀបនឹងរយៈពេលដូចគ្នាកាលពីឆ្នាំមុន។

ទន្ទឹមនឹងនេះដែរ ម៉ូដែលថោកបំផុតរបស់ Xiaomi បាននាំក្រុមហ៊ុនចិនត្រឡប់ទៅជាកំពូលស្មាតហ្វូនដែលលក់ដាច់បំផុតទាំង ១០ ក្នុងបញ្ជីទីផ្សាររបស់ពិភពលោកដែលក្រុមហ៊ុនបានបង្ហាញខ្លួនជាបន្តបន្ទាប់។ បច្ចុប្បន្ន Xiaomi គឺជាក្រុមហ៊ុនផលិតស្មាតហ្វូនធំជាងគេទី ៣ របស់ពិភពលោកដែលមានចំណែកទីផ្សារ ១៤% ខណៈដែលចំណាត់ថ្នាក់ទី ៤ ជារបស់ Oppo ដែលមានចំណែកទីផ្សារ ១០% ។ Oppo ក៏ជាក្រុមហ៊ុនផលិតធំតែមួយគត់ដែលមានការកើនឡើង បើទោះបីជាមានតែ ១% បើធៀបនឹងត្រីមាសមុនក៏ដោយ៕

អ្នកនយោបាយ Pita Limjaroenrat អតីតតំណាងគណបក្សប្រជាធិបតេយ្យចលនាឆ្ពោះទៅមុខ របស់ប្រទេសថៃ បានទៅបំពេញទស្សនកិច្ចនៅកូរ៉េខាងត្បូង ពីថ្ងៃទី៤-៧ ខែធ្នូ។ អ្នកនយោបាយរូបនេះបានទៅលេងកន្លែងផ្សេងៗ រួមទាំងសាជីវកម្ម និងសាកលវិទ្យាល័យ រួមទាំងក្រុមហ៊ុនកម្សាន្តយក្សមួយគឺ YG Entertainment ។

ពេលទៅទស្សនាអគារ YGE លោក Pita បានថតរូបនៅពីមុខអេក្រង់ LED ដ៏ធំជារូបភាពពី BLACKPINK ដែលក្រុមនេះមានសមាជិកជាជនជាតិថៃគឺ Lisa និងក្រុម BABYMONSTER ក៏មានជនជាតិថៃដូចគ្នានោះគឺ Chiquita និង Pharita ។ បន្ទាប់ពីលោក Pita បង្ហោះរូបភាពនៃការចូលទស្សនៈកិច្ចរបស់ខ្លួននៅលើ Instagram ជាមួយឯកសារដែលបានបិទនៅអាគារ YG មិនយូរប៉ុន្មានបានទទួលការចាប់អារម្មណ៍ពីអ្នកគាំទ្រ K-Pop ។

នៅលើក្រដាសមួយសន្លឹកមានពាក្យថា “BABYMONSTER” នៅផ្នែកខាងលើ មុននឹងរាយបញ្ជី លេខដែលហាក់ដូចជាចំណងជើងបទចម្រៀងដែលមានដូចជា ១. BATTER UP ២. SHUT UP
៣. STUCK IN THE MESS ៤. LOVE ON MY HEART ៥. REALLY LIKE YOU ៦. FALLING IN LOVE
៧. LIKE THAT ៨. WE ARE BABYMONSTER។

គំនូសតាងមួយទៀតដែលបង្ហាញថា “TREASURE 2024” ជាមួយនឹងពាក្យផ្សេងទៀតដោយអ្នកគាំទ្រ K-Pop គិតថា បញ្ជីលេខដែលបានរាយបញ្ជីក្រោមចំណងជើង “BABYMONSTER” ទំនងជាបញ្ជីបទសម្រាប់អាល់ប៊ុមពេញទី១ របស់ BABYMONSTER ដែលរំពឹងថានឹងចេញក្នុងពេលណាមួយនៅឆ្នាំ ២០២៤។ គំនូសតាងដែលបានដាក់នៅក្រោមចំណងជើង “TREASURE 2024” ហាក់ដូចជាបង្ហាញពីកាលវិភាគនាពេលខាងមុខរបស់ TREASURE ក្នុងឆ្នាំ ២០២៤ផងដែរ។

បន្ទាប់ពីឃើញររូបភាពដែលអ្នកនយោបាយបង្ហោះរូបភាពចេញពីអាគារYG អ្នកនិយមលេងអ៊ីនធឺណិតមួយចំនួនបានបញ្ចេញមតិជាច្រើនដោយអ្នកខ្លះគិតថានេះគឺជាវិធីថ្មីក្នុងការធ្វើទីផ្សារដើម្បីឱ្យកាន់តែឆាប់ល្បីល្បាញសម្រាប់ក្រុមចម្រៀងថ្មីរបស់ពួកគេខណៈក្រុមចម្រៀង២ក្រុមដែលអ្នកនយោបាយរូបនេះបង្ហោះសុទ្ធតែមានជនជាតិថៃជាសិល្បករចូលរួមលើវិថី K-Pop៕

ប្រទេសកាណាដា ៖ នេះគឺជាវីដេអូដែលថតបានពីកាមេរ៉ាផ្ទាល់ខ្លួនរបស់ប៉ូលិសនៅតំបន់ដឺរាំ ទីក្រុងអូសាវ៉ា រដ្ឋអនថេរីអូ ប្រទេសកាណាដា ក្នុងអំឡុងពេលប៉ូលិសកំពុងតែដេញចាប់សត្វកង់ហ្គូរូញី១ក្បាល ។ វាបានរួចគេចពីអ្នកមើលថែកង់ហ្គូរូ ក្នុងអំឡុងពេលអ្នកមើលថែរូបនេះបានចតរថយន្តឈប់សម្រាកនៅតាមផ្លូវ មុននឹងបន្តដំណើរទៅកាន់លំនៅឋានថ្មី ។

ក្នុងអំឡុងពេលចតរថយន្តឈប់សម្រាកនោះ ស្រាប់តែកង់ហ្គូរូ១ក្បាលនេះបានរត់គេចខ្លួន ហើយប៉ូលិសប្រចាំតំបន់ក៏បាននាំគ្នាមកជួយចាប់កង់ហ្គូរូ ។ ប៉ុន្តែស្រាប់តែកើតហេតុការណ៍នឹកស្មានពុំដល់នៅពេលដេញចាប់កង់ហ្គូរូ គឺវាបានធាក់ចំមុខប៉ូលិសមួយទំហឹង រួចរត់បន្តទៀត ។ ហេតុការណ៍នេះបានកើតឡើងកាលពីថ្ងៃទី៤ ខែធ្នូ ឆ្នាំ២០២៣ ។

ប៉ូលិសកាណាដានិយាយថា សត្វកង់ហ្គូរូញី១ក្បាលនេះបានរត់គេចក្នុងអំឡុងពេលរថយន្តចតឈប់សម្រាកពេលធ្វើដំណើរចេញពីសួនសត្វអូសាវ៉ា ទៅកាន់កសិដ្ឋានមួយកន្លែង រហូតធ្វើឱ្យប៉ូលិសយាមល្បាតក្នុងតំបន់នេះនាំគ្នាមកជួយចាប់កង់ហ្គូរូ ។

នៅពេលប៉ូលិសចាប់កន្ទុយកង់ហ្គូរូនេះ ស្រាប់តែវាងាកមកក្រោយ និងធាក់មុខប៉ូលិសភ្លាមៗ ហើយវាក៏លោតចេញទៅ ។ ប៉ុន្តែប៉ូលិសគ្មានរបួសស្នាមអ្វីទេ ក្រោយមកទៀត ប៉ូលិស និងអ្នកមើលថែកង់ហ្គូរូ ក៏អាចចាប់វាបានវិញ ៕ ប្រភព ៖ TNN World

ប្រទេសចិន៖ សាលាបណ្ដុះបណ្ដាលរបស់ប្រទេសចិនដែលត្រូវបានរចនាឡើងដើម្បីឱ្យសិស្សសិក្សាស្រាវជ្រាវ និងសម្រាកខួរក្បាល ក៏ដូចជាហាត់កីឡា ឬរៀនសិល្បៈផ្សេងៗ ត្រូវបានមហោស្រពស្ថាបត្យកម្មពិភពលោក (WAF) ដាក់ឈ្មោះជាអគារដ៏ល្អបំផុតរបស់ពិភពលោកប្រចាំឆ្នាំ ២០២៣ កាលពីថ្ងៃទី ១ ខែធ្នូកន្លងទៅ។

យោងតាមប្រភព័ត៌មាន CNN បានឱ្យដឹងថា សាលាវិទ្យាល័យដ៏ល្បីល្បាញនេះមានឈ្មោះថា Huizhen ស្ថិតក្នុងទីក្រុង Ningbo ខេត្ត Zhejiang ភាគខាងកើតប្រទេសចិន។ សាលារៀនដ៏សំខាន់នៃទីក្រុង Ningbo មានទីតាំងនៅលើផ្ទៃដី ៦២,០០០ ម៉ែត្រការ៉េ ដោយមានសួនច្បារលើដំបូល និងមានដើមឈើរាប់រយជុំវិញបរិវេណ រួមទាំងមានទីលានកីឡាដែលមានផ្លូវរត់ប្រវែង ៤០០ ម៉ែត្រផងដែរ។

អគារនេះមានសាលបង្រៀនបើកចំហរចំនួន ៤ និងមានថ្នាក់សម្រាប់សិក្សាចំនួន ៣០ ក៏ដូចជាមានសិស្សប្រមាណ ១,៥០០ នាក់។ នៅក្នុងទីធ្លានៃសាលារៀន Huizhen ក៏មានមានរុក្ខជាតិចំនួន ៤០ ប្រភេទដែលមានខ្យល់ចេញចូលល្អ និងមានកាប៊ីនដែលត្រូវបានរចនាឡើងដូចជាផ្ទះដើមឈើ ឬបន្ទប់ដែលមានតម្លាភាព ដែលអាចឱ្យសិស្សានុសិស្សអង្គុយលេង ឬដាំដើមឈើជាដើម។

យោងតាមស្ថាបត្យកររបស់ Approach Design Studio បាននិយាយថា សាលារៀនគឺជាកន្លែងដែលផ្តោតលើការបង្រៀនប្រកបដោយប្រសិទ្ធភាព ហើយក្នុងពេលតែមួយត្រូវការបំផុសគំនិតដោយសេរី។ នៅក្នុងការពិពណ៌នាគម្រោង ស្ថាបត្យករក៏បានពន្យល់ដែរថាពួកគេចង់ជួយសិស្សឱ្យ “សម្រាក កែសម្រួលគំនិតរបស់ពួកគេ និងស្វែងរកភាពស្រស់ស្អាត” នៅខាងក្រៅថ្នាក់រៀន។ ហេតុនេះហើយ ការរចនានេះនឹងជួយលើកទឹកចិត្តសិស្សឱ្យដើរ ស្រូបខ្យល់អាកាសបរិសុទ្ធ និងបន្ថយសម្ពាធក្នុងការសិក្សា។

ក្រុមស្ថាបត្យករបានបន្តទៀតថា ការរចនាត្រូវបានជ្រើសរើសពីគម្រោងជិត ២៥០ ដែលត្រូវបានជ្រើសរើសក្នុងបញ្ជីសម្រាំង រួមទាំងស្ថានីយថ្មីរបស់អាកាសយានដ្ឋាន Newark Liberty International Airport សារមន្ទីរ Holocaust របស់ប្រទេសអូស្ត្រាលីនៅទីក្រុងមែលប៊ន និងពហុកីឡដ្ឋានជាតិថ្មីទាំងក្នុងប្រទេសកម្ពុជា និងសេណេហ្គាល់។

គួរបញ្ជាក់ដែរថា ពានរង្វាន់កំពូលមួយនៅក្នុងឧស្សាហកម្មស្ថាបត្យកម្មនេះ ត្រូវបានវិនិច្ឆ័យជារៀងរាល់ឆ្នាំដោយក្រុមអ្នកជំនាញដែលមានសមាជិក ១៤០ នាក់ក្នុងអំឡុងពិធីបុណ្យស្ថាបត្យកម្មពិភពលោក។ ការរចនាដែលឈ្នះរង្វាន់លើកទី ១ ក្នុងឆ្នាំនេះត្រូវបានវាយតម្លៃខ្ពស់ដោយគណៈវិនិច្ឆ័យចំពោះការបំបែកអនុសញ្ញារចនាសាលា។ លោក Paul Finch នាយកកម្មវិធីរបស់ WAF បានអត្ថាធិប្បាយថា “គាត់ពិតជាភ្ញាក់ផ្អើលនិងរីករាយខ្លាំងណាស់នៅពេលដែលគាត់ទស្សនាគម្រោងរចនាដ៏ល្អឥតខ្ចោះបែបនេះ”៕