ប្រទេសថៃ ៖ លោក Chatchart Sitthiphan អភិបាលក្រុងបាងកកលើកឡើងថា បើរយៈពេល២ថ្ងៃទៀត បើកម្រិតធូលីនៅតែកើនឡើងខ្ពស់ លោកនឹងប្រកាសឱ្យពលរដ្ឋធ្វើការពីផ្ទះ (Work From Home) ។ រីឯអ្នកហាត់ប្រាណនៅតាមទីសាធារណៈ ក៏ត្រូវផ្អាកហាត់ផងដែរ ដោយសារកម្រិតធូលីកើនឡើងខ្ពស់នៅទីក្រុងបាងកក ។ នេះបើតាមការចុះផ្សាយរបស់សារព័ត៌មានថៃឈ្មោះ Amarin News នៅថ្ងៃទី១៣ ខែធ្នូ ឆ្នាំ២០២៣ ។

លោក Chatchart Sitthiphan អភិបាលក្រុងបាងកកឱ្យដឹងថា នៅពាក់កណ្តាលខែធ្នូ ឆ្នាំ២០២៣ នេះ លោកត្រៀមកំណត់វិធានការសម្រាប់រថយន្តប្រើប្រាស់ប្រេងម៉ាស៊ូតក្នុងរយៈពេលជាង៧ឆ្នាំ ដោយលើកទឹកចិត្តឱ្យពួកគេផ្លាស់ប្តូរប្រេងម៉ាស៊ីនក្នុងតម្លៃថោក ។ រីឯការប្រើប្រាស់រថយន្តបាញ់ទឹក វាអាចជួយកាត់បន្ថយធូលីបានតែមួយកម្រិតប៉ុណ្ណោះ ហើយនៅពេលឈប់បាញ់ទឹក នឹងមានធូលីច្រើនដូចមុន ។

នៅថ្ងៃទី១៣ ខែធ្នូ ឆ្នាំ២០២៣ លោកអភិបាលក្រុងបាងកកលើកឡើងថា លោកបានជួបជាមួយលោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ ដើម្បីវាយតម្លៃអំពីកម្រិតធូលីនៅតំបន់ «រ៉ាជប្រាស៊ុង» ។ តាមការពិនិត្យមើលការវាយតម្លៃបង្ហាញថា នៅថ្ងៃទី១៤ ខែធ្នូ កម្រិតធូលីនឹងធ្ងន់ធ្ងរជាងថ្ងៃទី១៣ ខែធ្នូ ហើយវានឹងកាន់តែធ្ងន់ធ្ងរបំផុត នៅថ្ងៃទី១៧ ខែធ្នូ ។ ប៉ុន្តែក្រោយថ្ងៃទី១៨ ខែធ្នូ កម្រិតធូលីនឹងធ្លាក់ចុះវិញ ហើយបរិយាកាសនឹងល្អប្រសើរឡើង ដោយយើងត្រូវត្រួតពិនិត្យគ្រប់តំបន់ទាំងអស់នៅទីក្រុងបាងកក ។

ចំពោះមូលហេតុបណ្តាលឱ្យមានធូលីខ្ពស់ លោកគិតថា ដោយសារការធ្វើចរាចរចង្អៀតពេក ទើបបណ្តាលឱ្យប៉ះពាល់ដល់បរិយាកាស ។ ហេតុនេះ លោកសូមសំណូមពរឱ្យពលរដ្ឋគ្រប់រូបជួយគ្នា ជាពិសេស អ្នកជិះរថយន្តចាក់ប្រេងម៉ាស៊ូត ដែលមានរយៈពេលលើស៧ឆ្នាំ ។ បច្ចុប្បន្ន រថយន្តប្រើប្រេងម៉ាស៊ូតមានចំនួន១លានគ្រឿង ហើយបើទោះជារថយន្តទាំងនេះបានឆ្លងកាត់ការពិនិត្យផ្សែងខ្មៅក្តី ប៉ុន្តែវានៅតែបញ្ចេញជាតិពុលយ៉ាងច្រើន ។ ដូច្នេះ រថយន្តចាក់ប្រេងម៉ាស៊ូត គួរទៅប្តូរប្រេងម៉ាស៊ីន និងតម្រង ។

កន្លងមក ទីក្រុងបាងកកបានកំណត់វិធានការជាមួយក្រសួងថាមពល ប៉ុន្តែនៅពាក់កណ្តាលខែធ្នូ ឆ្នាំ២០២៣ យើងនឹងកំណត់វិធានការលើកទឹកចិត្តអ្នកជិះរថយន្តប្រើប្រេងម៉ាស៊ូត និងប្រើម៉ាស៊ីនចាស់ ដើម្បីឱ្យពួកគេប្តូរប្រេងម៉ាស៊ីន និងតម្រងក្នុងតម្លៃសមរម្យ ។ លើសពីនេះ យើងនឹងសហការជាមួយក្រុមហ៊ុនរថយន្ត និងក្រុមហ៊ុនផលិតប្រេង ដើម្បីដោះស្រាយបញ្ហានាពេលនេះ ។

លោកអភិបាលក្រុងបាងកកបន្ថែមថា ចាប់ពីពេលនេះទៅ លោកនឹងតាមដាន និងវាយតម្លៃយ៉ាងតឹងរ៉ឹង ហើយបើកម្រិតធូលីនៅតែកើនឡើងខ្ពស់ លោកនឹងប្រកាសឱ្យពលរដ្ឋធ្វើការពីផ្ទះ (Work From Home) ខណៈអ្នកហាត់ប្រាណនៅតាមទីសាធារណៈត្រូវផ្អាកសិន ។

ចំណែកសំណើសុំប្រើប្រាស់រថយន្តបាញ់ទឹកនោះ វាអាចជួយបានមួយកម្រិតប៉ុណ្ណោះ ប៉ុន្តែមិនអាចដោះស្រាយបញ្ហាបានទេ ព្រោះនៅពេលឈប់បាញ់ទឹក កម្រិតធូលីនឹងច្រើនដូចមុន ។ នៅឆ្នាំ២០២៣ មានអ្នកប្រើប្រាស់រថយន្តអគ្គិសនីកាន់តែច្រើន ប៉ុន្តែវាមិនអាចកាត់បន្ថយបរិមាណផ្សែងខ្មៅបានទេ ដោយសារការប្រើប្រាស់រថយន្តម៉ាស៊ូតក្នុងផ្នែកពាណិជ្ជកម្ម ។

អ្នកសារព័ត៌មានបានសួរទៅកាន់លោក Chatchart Sitthiphan អភិបាលក្រុងបាងកកថា នៅពេលព្រឹក ក្រោយពីលោកបានរត់ហាត់ប្រាណ តើលោកបានឃើញកម្រិតធូលីនៅពេលព្រឹកដែរឬទេ? លោកអភិបាលក្រុងឆ្លើយថា ៖ «ពេលនេះ កម្រិតធូលី PM 2.5 ធ្ងន់ធ្ងរណាស់ ។ ដូច្នេះ យើងគួរតែផ្លាស់ប្តូរវិធីហាត់ប្រាណមកហាត់នៅក្នុងក្លិបហាត់ប្រាណវិញ» ៕ ប្រភព ៖ Amarin News

ប្រទេសចិន ៖ ចាប់តាំងពី OpenAI បានបើកដំណើរការកម្មវិធី ChatGPT ជាសាធារណៈកាលពីឆ្នាំ២០២២ បច្ចេកវិទ្យា AI (Artificial Intelligence) ក៏បានផ្លាស់ប្តូរវិធីប្រកបអាជីវកម្មជាច្រើន ជាពិសេស ការផលិតមាតិកា និងការសរសេរផ្សេងៗ ដូចជា ៖ ការសរសេរអ៊ីម៉ែល, ការសរុបរបាយការណ៍, ការសរសេរសុន្ទរកថា និងការបកប្រែភាសា ។

នៅខែធ្នូ ឆ្នាំ២០២៣ សារព័ត៌មាន South China Morning Post រាយការណ៍ថា ការលក់រឿងប្រលោមលោកអនឡាញរបស់ចិននៅក្រៅប្រទេស បានកើនឡើងយ៉ាងខ្លាំង ដោយសារការអភិវឌ្ឍយ៉ាងឆាប់រហ័សនៃបច្ចេកវិទ្យា AI ។ បច្ចេកវិទ្យាទំនើបនេះអាចបកប្រែរឿងប្រលោមលោកអនឡាញចិនជាភាសាផ្សេងៗយ៉ាងឆាប់រហ័ស និងត្រឹមត្រូវ ។

យោងតាមទិន្នន័យពី China Literature ជាកម្មវិធីប្រលោមលោកអនឡាញចិន និងទទួលបានការគាំទ្រយ៉ាងច្រើនឱ្យដឹងថា កាលពីឆ្នាំ២០២២ ការលក់រឿងប្រលោមលោកអនឡាញចិននៅក្រៅប្រទេស បានកើនឡើងជិតស្មើ៤០% បើធៀបនឹងរយៈពេលដូចគ្នានៅឆ្នាំ២០២១ ។ ចំនួនការលក់ប្រលោមលោកចិននៅឆ្នាំ២០២២ ស្មើទឹកប្រាក់ចំនួន៥៧២លានដុល្លារអាមេរិក ។

របាយការណ៍បញ្ជាក់ថា ទិន្នន័យរបស់ China Literature ទទួលបានការគាំទ្រពីភ្នាក់ងាររដ្ឋាភិបាលប្រទេសចិន ។ នេះបង្ហាញពីតួនាទីដ៏សំខាន់របស់បច្ចេកវិទ្យាទំនើបនាសម័យបច្ចុប្បន្ន ជាពិសេស បច្ចេកវិទ្យា Generative AI ក្នុងការបង្កើនប្រសិទ្ធភាព និងកាត់បន្ថយការចំណាយដើមទុន ។

បច្ចុប្បន្ន គេបានប្រើប្រាស់បច្ចេកវិទ្យានេះសម្រាប់បកប្រែភាសាចិនទៅជាភាសាផ្សេងៗ ខណៈកាលពីមុន គេត្រូវការមនុស្សជាច្រើននាក់ដើម្បីបកប្រែភាសា និងអាចមានកំហុសឆ្គងផងដែរ ។ បច្ចេកវិទ្យា AI អាចបកប្រែភាសាបានយ៉ាងត្រឹមត្រូវ ឆាប់រហ័ស និងធ្វើឱ្យទីផ្សារប្រលោមលោកអនឡាញរបស់ចិនរីកចម្រើនបន្ថែមទៀត ។

កាលពីឆ្នាំ២០២២ រឿងប្រលោមលោកចិនបានផ្សាយតាមអនឡាញជាង៣៤លានច្បាប់ ក្នុងនោះប្រលោមលោកមួយចំនួនបានបកប្រែជាភាសាផ្សេងៗប្រមាណជាង២០ភាសា ។ គេបានលក់ប្រលោមលោកចិននៅប្រទេសចំនួន៤០ លើពិភពលោក ដូចជា បណ្តាប្រទេសក្នុងតំបន់អាស៊ីអាគ្នេយ៍, អាមេរិកខាងជើង, អឺរ៉ុប និងអាហ្វ្រិក ៕ ប្រភព ៖ beartai

ប្រទេសកូឡុំប៊ី ៖ គេបានឃើញរថភ្លើងដឹកអ្នកដំណើរមួយខ្សែនៅទីក្រុងបូកូតា ប្រទេសកូឡុំប៊ី បានតុបតែងលម្អទៅដោយភ្លើងចម្រុះពណ៌ដើម្បីស្វាគមន៍ពិធីបុណ្យគ្រិស្តម៉ាស់ នៅឆ្នាំ២០២៣ ។ កូឡុំប៊ីតែងតែប្រារព្ធពិធីបុណ្យគ្រិស្តម៉ាស់រៀងរាល់ចុងឆ្នាំនីមួយៗ ហើយពិធីបុណ្យនេះបានទាក់ទាញឱ្យពលរដ្ឋកូឡុំប៊ីនាំក្រុមគ្រួសារពួកគេមកកម្សាន្តយ៉ាងច្រើនកុះករ ។

អ្នកស្រី ណូរ៉ា អូសេ ជាភ្ញៀវទេសចរមកកម្សាន្តនៅលើរថភ្លើងនិយាយថា ៖ «ចំណុចសំខាន់ ជារៀងរាល់ឆ្នាំ ពួកយើងបាននាំក្រុមគ្រួសារមកជិះរថភ្លើងគ្រិស្តម៉ាស់ ពីព្រោះវាបានផ្តល់ឱ្យយើងនូវអនុស្សាវីយ៍ល្អៗជាច្រើន ។ ខ្ញុំគិតថា វាជាវិធីចែករំលែកនូវសំណើច និងសេចក្តីសុខជាមួយគ្រួសារក្នុងពិធីបុណ្យគ្រិស្តម៉ាស់» ។

ការតុបតែងលម្អភ្លើងពណ៌នៅលើរថភ្លើងនេះ បានធ្វើឱ្យអ្នកមកចូលរួមនឹកឃើញដល់ខ្សែភាពយន្តគ្រិស្តម៉ាស់ផងដែរ ។ រថភ្លើងបានតុបតែងលម្អឱ្យមានភាពទាក់ទាញសម្រាប់ស្វាគមន៍ពិធីបុណ្យគ្រិស្តម៉ាស់នេះ កំពុងតែធ្វើដំណើរទៅកាន់ស្ថានីយរថភ្លើងនៅប្រទេសកូឡុំប៊ី ។ វាបានបង្កើតបរិយាកាសសប្បាយរីករាយដល់ក្មេងៗ និងឪពុក-ម្តាយពួកគេ ដែលបានចែករំលែកនូវសេចក្តីសុខក្នុងពិធីបុណ្យនេះរួមគ្នា ។

លើសពីនេះ ក៏មានតន្ត្រីករនៅលើរថភ្លើងដើម្បីធ្វើឱ្យបរិយាកាសកាន់តែសប្បាយរីករាយថែមទៀត និងទាក់ទាញឱ្យអ្នកដំណើរជាយុវវ័យច្រៀងចម្រៀងគ្រិស្តម៉ាស់យ៉ាងមានក្តីសុខក្នុងអំឡុងពេលធ្វើដំណើរ ។

បុរសតែងខ្លួនជា Santa Claus និយាយថា ៖ «យើងសង្ឃឹមយ៉ាងខ្លាំងថា នៅជិតដាច់ឆ្នាំ២០២៣ រឿងរ៉ាវក្នុងជីវិតរបស់មនុស្សម្នាក់ៗនឹងបញ្ចប់ទៅដោយភាពជោគជ័យ មិនថាពួកគេបានជួបបញ្ហាអ្វីខ្លះទេ ។ ចូរកុំភ្លេចថា បុណ្យគ្រិស្តម៉ាស់ គឺជាក្តីស្រឡាញ់ ហើយវាជាពេលវេលាដែលយើងត្រូវអភ័យទោសឱ្យគ្នាទៅវិញទៅមក និងចែករំលែកនូវអំពើល្អ» ៕ ប្រភព ៖ TNN World

ប្រទេសថៃ៖ អាជ្ញាធរថៃបានរឹបអូសថ្នាំញៀនមេតំហ្វេតាមីនចំនួន ៥០លានគ្រាប់ នៅក្បែរព្រំដែនថៃជាមួយមីយ៉ាន់ម៉ា ដែលជាកំណត់ត្រារឹបអូសថ្នាំញៀនថ្មីមួយក្នុងប្រទេសថៃ និងធំជាងគេទីពីរនៅអាស៊ី។

យោងតាមប្រភពព័ត៌មាន Bangkok Post ដែលបានរាយការណ៍នៅថ្ងៃទី១៣ ខែធ្នូថ្មីៗនេះថា ថ្នាំញៀនមេតំហ្វេតាមីនត្រូវបានលាក់ក្នុងបាវធំនៅខាងក្រោយរថយន្តធំមួយគ្រឿង ដែលត្រូវបានស្ទាក់ចាប់ដោយមន្ត្រីប៉ូលីស និងទាហានថៃកាលពីថ្ងៃអង្គារម្សិលមិញ នៅឯប៉ុស្តិ៍ត្រួតពិនិត្យសន្តិសុខក្នុងខេត្ត Kanchanaburi ភាគខាងលិចប្រទេសថៃ។ ចំណែកឯស្ត្រី និងបុរសដែលបើករថយន្តនោះក៏ត្រូវឃាត់ខ្លួនផងដែរ។

យោងតាមលោក Jeremy Douglas តំណាងប្រចាំតំបន់អាស៊ីអាគ្នេយ៍នៃការិយាល័យអង្គការសហប្រជាជាតិទទួលបន្ទុកគ្រឿងញៀន និងឧក្រិដ្ឋកម្ម បាននិយាយថា ទាក់ទងនឹងការបង្ក្រាបគ្រឿងញៀននៅអាស៊ី ការរឹបអូសនេះគឺស្ថិតនៅលំដាប់ទីពីរ បន្ទាប់ពីថ្នាំញៀនមេតំហ្វេតាមីនជាង ៥៥ លានគ្រាប់ត្រូវបានរឹបអូសក្នុងប្រទេសឡាវកាលពីឆ្នាំ ២០២១ ក្បែរតំបន់ត្រីកោណមាស។

លោក Douglas ក៏បានបន្តទៀតថា ក្រុមឧក្រិដ្ឋកម្មអាស៊ី ដែលធ្វើការជាមួយកងជីវពលប្រដាប់អាវុធជនជាតិភាគតិច ដើម្បីរត់ពន្ធថ្នាំញៀនមេតំហ្វេតាមីនដែលផលិតនៅរដ្ឋ Shan ភាគខាងជើងនៃប្រទេសមីយ៉ាន់ម៉ា បានឆ្ពោះទៅភាគខាងត្បូង ដោយបណ្តាញចែកចាយនេះបច្ចុប្បន្នបានទៅដល់ប្រទេសជប៉ុន និងនូវែលសេឡង់។ លោក Douglas បានបន្ថែមថា ការរឹបអូសដោយអាជ្ញាធរមានផលប៉ះពាល់តិចតួចប៉ុណ្ណោះលើលំហូរនៃគ្រឿងញៀនខុសច្បាប់នៅក្នុងតំបន់ ដោយសារក្រុមឧក្រិដ្ឋកម្មដែលបានរៀបចំកំពុងបង្កើនការផ្គត់ផ្គង់ និងកាត់បន្ថយតម្លៃថ្នាំមេតំហ្វេតាមីន។

ទោះជាយ៉ាងណាក៏ដោយ លោក Douglas ក៏បានសង្កត់ធ្ងន់ដែរថាជម្លោះ និងភាពចលាចលក្នុងប្រទេសមីយ៉ាន់ម៉ា ចាប់តាំងពីឆ្នាំ២០២១មក បានផ្ដល់ឱកាស និងអនុញ្ញាតឱ្យក្រុមឧក្រិដ្ឋជនជួញដូរគ្រឿងញៀនពង្រីកបណ្ដាញ និងប្រតិបត្តិការរត់ពន្ធគ្រឿងញៀនរបស់ពួកគេ៕

ប្រទេសថៃ ៖ នាពេលកន្លងមក មានភ្ញៀវទេសចរតៃវ៉ាន់ម្នាក់មកកម្សាន្តនៅប្រទេសថៃ ប៉ុន្តែត្រូវបានរថយន្តបុកបណ្តាលឱ្យរងរបួសធ្ងន់ និងបាត់បង់ស្មារតី ។ ភ្នាក់ងារជួយសង្គ្រោះប្រចាំប្រទេសថៃបានជួយបញ្ជូនភ្ញៀវទេសចររូបនេះទៅកាន់មន្ទីរពេទ្យឯកជនមួយកន្លែង ដែលមានទីតាំងនៅឆ្ងាយពីកន្លែងកើតហេតុប្រមាណ៥០០ម៉ែត្រ ។

នៅពេលបញ្ជូនអ្នករបួសទៅដល់ មន្ទីរពេទ្យឯកជនបានបដិសេធមិនសង្គ្រោះជីវិតភ្ញៀវទេសចរតៃវ៉ាន់ទេ ហើយប្រាប់ឱ្យភ្នាក់ងារសង្គ្រោះបញ្ជូនភ្ញៀវទេសចររូបនេះទៅមន្ទីរពេទ្យរដ្ឋវិញ ដែលនៅឆ្ងាយពីទីនេះប្រមាណ១០គីឡូម៉ែត្រ ។ ចុងក្រោយ ភ្ញៀវទេសចរតៃវ៉ាន់បានស្លា.ប់ ក្នុងអំឡុងពេលបញ្ជូនទៅកាន់មន្ទីរពេទ្យរដ្ឋ ។

លោក Chonnan Srikaew រដ្ឋមន្ត្រីក្រសួងសុខាភិបាលប្រទេសថៃលើកឡើងថា បន្ទាប់ពីទទួលបានរបាយការណ៍នេះ លោកបានបញ្ជាទៅកាន់នាយកដ្ឋានផ្តល់សេវាសុខភាព និងវិទ្យាស្ថានជាតិវេជ្ជសាស្ត្រសង្គ្រោះបន្ទាន់ ដើម្បីបញ្ជូនក្រុមការងារស៊ើបអង្កេតរកការពិតជាបន្ទាន់ ។ បើរកឃើញថា មន្ទីរពេទ្យឯកជនបានបដិសេធមិនទទួលសង្គ្រោះអ្នករងរបួសធ្ងន់ដូចការចុះផ្សាយទេ ចាត់ទុកថា មន្ទីរពេទ្យនេះបានរំលោភលើគោលការណ៍មនុស្សធម៌ និងរំលោភច្បាប់ពាក់ព័ន្ធ ។ ដូច្នេះ យើងត្រូវអនុវត្តតាមច្បាប់ចំពោះមន្ទីរពេទ្យឯកជនខាងលើ ។

លោក Chonnan Srikaew រដ្ឋមន្ត្រីក្រសួងសុខាភិបាលបញ្ជាក់ថា រដ្ឋាភិបាលថៃបានផ្តល់ភាពសំខាន់លើការថែទាំភ្ញៀវទេសចរបរទេសគ្រប់រូប ដែលពួកគេបានធ្វើដំណើរមកកាន់ប្រទេសថៃ ។ យើងនឹងមិនបណ្តោយឱ្យពួកគេគ្មានសុវត្ថិភាព ឬទទួលរងនូវការប្រព្រឹត្តទង្វើណាមួយ ដែលមិនត្រឹមត្រូវតាមច្បាប់ប្រទេសថៃទេ ។

បើតាមអាជ្ញាធរថៃលើកឡើងថា ពួកគេបានបញ្ជូនអ្នករងរបួសធ្ងន់ជាជនជាតិតៃវ៉ាន់ទៅកាន់មន្ទីរពេទ្យឯកជន ប៉ុន្តែបុគ្គលិកផ្នែកសង្គ្រោះបន្ទាន់ក្នុងមន្ទីរពេទ្យនេះបានបដិសេធមិនទទួលសង្គ្រោះអ្នករបួសទេ ។ មូលហេតុដែលមន្ទីរពេទ្យឯកជនមិនព្រមទទួលអ្នករបួស ដោយសារអ្នករបួសគ្មានសញ្ជាតិថៃ ហើយខាងមន្ទីរពេទ្យពិបាកទទួលប្រាក់ថ្លៃព្យាបាលជនបរទេស ។ ហេតុនេះ អាជ្ញាធរក៏បានបញ្ជូនអ្នករបួសសញ្ជាតិតៃវ៉ាន់ទៅកាន់មន្ទីរពេទ្យមួយទៀតឈ្មោះ «សិរិនថន» ប៉ុន្តែដោយសារតែផ្លូវឆ្ងាយពេក ទើបធ្វើឱ្យអ្នករបួសនេះបានស្លា.ប់នាពេលបន្ទាប់ ។

មន្ទីរពេទ្យនានានៅប្រទេសថៃមានតួនាទីថែរក្សា និងជួយសង្គ្រោះជីវិតអ្នកជំងឺទាំងអស់ មិនថាជនជាតិថៃ ឬជនបរទេស នៅពេលពួកគេស្ថិតក្នុងសភាពគ្រោះថ្នាក់ គឺពួកគេត្រូវតែទទួលបានការសង្គ្រោះបន្ទាន់ ដើម្បីឱ្យអ្នកជំងឺបានរួចផុតពីគ្រោះថ្នាក់ ។ ហេតុនេះ បើបុគ្គលណាមិនអនុវត្តតាមតួនាទីរបស់ខ្លួន គឺត្រូវជាប់ពន្ធនាគារមិនលើស២ឆ្នាំ ឬពិន័យជាប្រាក់មិនលើស៤ម៉ឺនបាត ឬទាំងជាប់ពន្ធនាគារ និងពិន័យជាប្រាក់ ៕ ប្រភព ៖ 3Plus News

យោងតាមសារព័ត៌មានបរទេសរាយការណ៍ថា បុគ្គលិកបម្រើការនៅលើយន្តហោះម្នាក់ឈ្មោះ ខេវីន បានបង្ហោះវីដេអូមួយក្នុងបណ្តាញសង្គម ហើយត្រូវបានមនុស្សជាច្រើននាក់ជជែកគ្នាអំពីវីដេអូនេះ ។ បុគ្គលិកបម្រើការនៅលើយន្តហោះរូបនិយាយថា អ្នកដំណើរពុំគួរពិសារកាហ្វេដែលខាងយន្តហោះយកមកជូនទេ ។

លោក ខេវីន បានបង្ហោះវីដេអូនេះក្នុងបណ្តាញសង្គម TikTok ហើយលោកបានឆ្លើយសំណួររបស់អ្នកលេងបណ្តាញសង្គម ដែលសួរថា ៖ «ក្នុងឋានៈលោកជាបុគ្គលិកបម្រើការនៅលើយន្តហោះ តើអ្វីជាភាពកខ្វក់ក្នុងការងាររបស់លោក?» ។

លោក ខេវីន ជាបុគ្គលិកបម្រើការលើយន្តហោះនិយាយថា សូមអ្នកដំណើរកុំពិសារកាហ្វេនៅលើយន្តហោះឱ្យសោះ ពីព្រោះធុងដាក់ទឹកស្ទើរតែពុំទទួលបានការសម្អាតឡើយ ហើយបុគ្គលិកក៏ប្រើប្រាស់ទឹកក្នុងធុងនេះសម្រាប់ឆុងកាហ្វេ ។ លោក ខេវីន បានប្រាប់ត្រង់ៗថា កាហ្វេនៅលើយន្តហោះខ្វះអនាម័យពិតមែន ហើយមិនត្រឹមតែមិនបានសម្អាតធុងដាក់ទឹកប៉ុណ្ណោះទេ ប៉ុន្តែហេតុផលមួយទៀត គឺប៉ាន់កាហ្វេ ។

បុគ្គលិកបម្រើការលើយន្តហោះរូបនេះបន្តថា កាហ្វេនៅសល់ក្នុងប៉ាន់កាហ្វេ ពួកគេមិនអាចចាក់ចោលទៅក្នុងបំពង់បង្ហូរទឹកបានទេ ។ ហេតុនេះ ពួកគេត្រូវចាក់វាចោលក្នុងចានបង្គន់ ហើយដើម្បីកុំឱ្យវាខ្ទាតចេញក្រៅ គឺត្រូវយកប៉ាន់កាហ្វេចាក់ឱ្យកៀកនឹងចានបង្គន់ ។ ហេតុនេះ វាធ្វើឱ្យមេរោគផ្សេងៗខ្ទាតចូលក្នុងប៉ាន់កាហ្វេដោយផ្ទាល់ ។

ក្រៅពីនេះ បុគ្គលិកបម្រើការនៅលើយន្តហោះបានណែនាំអ្នកដំណើរថា នៅពេលធ្វើដំណើរតាមយន្តហោះ អ្នកដំណើរត្រូវមកដល់អាកាសយានដ្ឋានឱ្យបានមុនពេលហោះហើរ និងទិញកាហ្វេខាងក្រៅយន្តហោះផឹកជំនួសវិញ ។

ក្រោយពីវីដេអូនេះបានបង្ហោះក្នុងបណ្តាញសង្គមធ្វើឱ្យអ្នកលេងបណ្តាញសង្គមចាប់អារម្មណ៍យ៉ាងខ្លាំង ហើយមនុស្សភាគច្រើននិយាយថា ៖ «អរគុណ សម្រាប់ការណែនាំ ចាប់ពីពេលនេះទៅ ពួកគេនឹងមិនផឹកកាហ្វេនៅលើយន្តហោះទៀតទេ» ។ មនុស្សខ្លះទៀតថា ៖ «នៅពេលឮបុគ្គលិកបម្រើការលើយន្តហោះសួរថា តើចង់ពិសារកាហ្វេ ឬទឹកតែ? អ្នកដំណើរនឹងព្រឺសម្បុរមិនខាន» ៕ ប្រភព ៖ khaosod