ប្រទេសជប៉ុន ៖ កាលពីថ្ងៃទី៧ ខែធ្នូ ឆ្នាំ២០២៣ រដ្ឋាភិបាលជប៉ុនបានបង្ហាញផែនការអនុញ្ញាតឱ្យអ្នកបើកបររថយន្ត ដែលមានលិខិតអនុញ្ញាតត្រឹមត្រូវអាចផ្តល់សេវាកម្មជារថយន្តតាក់ស៊ីបាន ដោយប្រើប្រាស់រថយន្តឯកជន ។ ការអនុញ្ញាតនេះដើម្បីដោះស្រាយបញ្ហាការខ្វះខាតអ្នកបើកបររថយន្តតាក់ស៊ីនៅទូទាំងប្រទេសជប៉ុន នាពេលបច្ចុប្បន្ន ។

នៅក្រោមវិធានការបន្ធូរបន្ថយនេះ បុគ្គលដែលគ្មានលិខិតអនុញ្ញាតផ្តល់សេវាកម្ម ពួកគេអាចផ្តល់សេវាកម្មរថយន្តតាក់ស៊ីបាន ដរាបណា ពួកគេបានឆ្លងកាត់ការហ្វឹកហាត់ជាមុន ហើយក្រុមហ៊ុនតាក់ស៊ីបានជួលពួកគេដោយផ្ទាល់ ។ ទោះយ៉ាងណា ពួកគេនឹងមិនទទួលការអនុញ្ញាតឱ្យបើកបររថយន្តតាក់ស៊ីធម្មតាទេ ។

បច្ចុប្បន្ន ប្រទេសជប៉ុនកំពុងខ្វះខាតអ្នកបើកបររថយន្តតាក់ស៊ីយ៉ាងខ្លាំង ស្របពេលការងើបឡើងវិញផ្នែកសេដ្ឋកិច្ច និងកំណើនភ្ញៀវទេសចរមកកម្សាន្តនៅប្រទេសជប៉ុន ក្រោយពីការឆ្លងរាតត្បាតនៃជំងឺកូវីដ-១៩ បានធូរស្រាល ។

ទោះយ៉ាងណា ក្រុមហ៊ុនជប៉ុនជាច្រើនពុំត្រូវការបុគ្គលិកបន្ថែមទៀតទេ ។ ហេតុនេះ គេនឹងរង់ចាំមើលថា តើការផ្លាស់ប្តូរវិធានការផ្សេងៗនឹងមានប្រសិទ្ធភាព ដើម្បីបង្កើនចំនួនបុគ្គលិកបើកបររថយន្តតាក់ស៊ីដែរឬទេ ។ បើទោះជាមានការផ្លាស់ប្តូរក្តី ប៉ុន្តែចំនួនរថយន្តឯកជនដែលអាចប្រើប្រាស់សេវាកម្មជារថយន្តតាក់ស៊ីបាន គឺមិនត្រូវលើសពីចំនួនរថយន្តតាក់ស៊ីទូទៅទេ ។

ចំណែកថ្លៃធ្វើដំណើរ គឺអាស្រ័យលើការកំណត់របស់ភ្នាក់ងារបើកបរប៉ុណ្ណោះ ។ ជាមួយគ្នានេះ រដ្ឋាភិបាលជប៉ុនបានពន្យារពេលការសម្រេចចិត្តថា នឹងលុបចោលបម្រាមប្រើប្រាស់សេវាកម្មហៅរថយន្ត ។ កន្លងមក អតីតនាយករដ្ឋមន្ត្រីជប៉ុន លោក Yoshihide Suga និងរដ្ឋមន្ត្រីក្រសួងឌីជីថល លោក Taro Kono គឺជាអ្នកគាំទ្រការលុបចោលបម្រាមប្រើប្រាស់សេវាកម្មរថយន្តក្រុង ៕ ប្រភព ៖ mgronline

ប្រទេសថៃ ៖ កាលពីថ្ងៃទី៨ ខែធ្នូ ឆ្នាំ២០២៣ ប្រព័ន្ធផ្សព្វផ្សាយថៃឈ្មោះ Thai TV5 រាយការណ៍ថា លោក សេដ្ឋា ថាវីស៊ីន នាយករដ្ឋមន្ត្រី និងរដ្ឋមន្ត្រីក្រសួងហិរញ្ញវត្ថុប្រទេសថៃ នឹងជំរុញកីឡា Muay Thai ឱ្យក្លាយទៅជា Soft Power របស់ថៃ ព្រមទាំងគាំទ្រគ្រូ Muay Thai ទៅបង្រៀននៅក្រៅប្រទេសផងដែរ ។

លោកនាយករដ្ឋមន្ត្រីថៃលើកឡើងបែបនេះ ក្នុងអំឡុងពេលលោក Pimon Srivikorn គណៈកម្មការយុទ្ធសាស្ត្រ Soft Power ផ្នែកកីឡា បានដឹកនាំក្រុម One Championship មកចូលជួបលោក សេដ្ឋា ថាវីស៊ីន នាយករដ្ឋមន្ត្រីថៃ នៅបន្ទប់ពណ៌ស្វាយ អគារថៃឃូហ្វា ក្នុងវិមានរដ្ឋាភិបាល ។ក្រោយពីការជួបគ្នា លោកនាយករដ្ឋមន្ត្រីថៃលើកឡើងថា Muay Thai ចាត់ទុកថា គឺជា Soft Power ដំបូងគេរបស់ប្រទេសថៃ ។ ហេតុនេះ វាជាសកម្មភាពមួយដែលមានពាក្យថា «Thai» នៅក្នុងនោះ ដែលបានផ្តល់តម្លៃជាមួយ Soft Power របស់ប្រទេសថៃ ។ បច្ចុប្បន្ន ប្រទេសអង់គ្លេសមានកន្លែងប្រដាល់ពី៥.០០០ ទៅ៦.០០០កន្លែង ហើយបដិសេធមិនបានថា វាជា Soft Power លំដាប់ទី១ ដែលថៃបានបញ្ជូនទៅកាន់ពិភពលោក ដូចជា ៖ ការផ្សាយបន្តផ្ទាល់ Live Streaming និងលក់ឧបករណ៍កីឡាប្រដាល់ ដែលមានតម្លៃផ្នែកសេដ្ឋកិច្ចដ៏ច្រើនមហាសាល និងផ្តល់ប្រយោជន៍ដល់ប្រទេស ។

លោកនាយករដ្ឋមន្ត្រីថៃក៏បានថ្លែងអំណរគុណដល់លោក Pimon Srivikorn គណៈកម្មការយុទ្ធសាស្ត្រ Soft Power ផ្នែកកីឡា ដែលបានជំរុញកីឡា Muay Thai ។ បច្ចុប្បន្ន ប្រទេសថៃមានអ្នកប្រដាល់លំដាប់ពិភពលោក ដូចជា កីឡាករ បួ ខាវ គឺជាក្តីសង្ឃឹមរបស់ក្មេងជំនាន់ក្រោយ ដែលមានបំណងរួមចំណែកក្នុងកីឡា Muay Thai ។ ចំណែកកម្មវិធីប្រដាល់ One Championship នៅរៀងរាល់ថ្ងៃសុក្រ បានផ្សាយបន្តផ្ទាល់ Live Streaming ដែលធ្វើឱ្យមនុស្សលើពិភពលោករាប់លាននាក់បានទស្សនា ។ ដូច្នេះ រឿង Soft Power កីឡា Muay Thai ជឿថា នៅតែមានសក្តានុពលបន្តទៀត ។

រីឯអាជីពជាអ្នកប្រដាល់ថៃ ពលរដ្ឋថៃចង់បានអាជីពមានស្ថិតស្ថេរ ។ បើក្រឡេកមើលអតីតកាលឃើញថា អាយុរបស់អាជីពប្រដាល់មានរយៈពេលតិចណាស់ ដែលអាចឡើងប្រដាល់បាន ។ បើយើងអាចយកកីឡា Muay Thai ទៅរួមបញ្ចូលក្នុងសកម្មភាពនានាលើពិភពលោក ដោយបង្កើតកន្លែងប្រដាល់ថៃនៅក្រៅប្រទេស យើងនឹងអាចពង្រីកអាជីពនេះដល់អ្នកប្រដាល់បាន ដូចជា អ្នកលេងបាល់ទាត់អាចក្លាយជាគ្រូបង្វឹកបាល់ទាត់ និងក្លាយជាអាជីពមានស្ថេរភាព ។ បច្ចុប្បន្ន មានអ្នកប្រដាល់ថៃជាច្រើននាក់ចង់ទៅបង្រៀន និងបង្កើតកន្លែងប្រដាល់នៅក្រៅប្រទេស ។

ទោះយ៉ាងណា រដ្ឋាភិបាលនឹងជំរុញ ក៏ដូចជាបញ្ជូនអ្នកប្រដាល់ថៃទៅក្រៅប្រទេស និងឱ្យភ្ញៀវទេសចរចូលមករៀនប្រដាល់នៅប្រទេសថៃ រួមទាំងអ្នកចង់បានប្រាក់ចំណូលពីផ្នែកកីឡា ដូចជា អ្នកផលិតឧបករណ៍ប្រដាល់ និងម្ចាស់តារាងបាល់ទាត់ ៕ ប្រភព ៖ Thai TV5

ប្រទេសចិន៖ រដ្ឋាភិបាលចិនបាននិយាយថា ខ្លួននឹងកាត់បន្ថយតម្លៃជាបណ្តោះអាសន្នសម្រាប់ទិដ្ឋាការធ្វើដំណើរក្នុងប្រទេសចំនួន ២៥% ដើម្បីទាក់ទាញចំនួនភ្ញៀវទេសចរបរទេសកាន់តែច្រើន។

យោងតាមប្រភពព័ត៌មាន Nikkei Asia ដែលបានរាយការណ៍នៅថ្ងៃទី៩ ខែធ្នូថ្មីៗនេះថា វិធានការនេះនឹងអនុវត្តចំពោះស្ថានទូតបរទេសទាំងអស់របស់ប្រទេសចិនចាប់ពីថ្ងៃទី១១ ខែធ្នូ ឆ្នាំ២០២៣ រហូតដល់ថ្ងៃទី ៣១ ខែធ្នូ ឆ្នាំ ២០២៤ សម្រាប់ប្រទេសមួយចំនួនដូចជា ថៃ ជប៉ុន ហ្វីលីពីន វៀតណាម ម៉ាឡេស៊ី និងសិង្ហបុរី រួមទាំងប្រទេសអឺរ៉ុបមួយចំនួនទៀតផងដែរ។

លោក Wang Wenbin អ្នកនាំពាក្យក្រសួងការបរទេសរបស់ប្រទេសចិន បាននិយាយថា «យើងត្រៀមខ្លួនជាស្រេចដើម្បីធ្វើការជាមួយប្រទេសពាក់ព័ន្ធ ក៏ដូចជាបង្កើតលក្ខខណ្ឌអំណោយផល និងផ្តល់ភាពងាយស្រួលកាន់តែខ្លាំងសម្រាប់ការធ្វើដំណើរឆ្លងកាត់ព្រំដែនដ៏ងាយស្រួល»។

យោងតាមសេចក្តីថ្លែងការណ៍របស់ក្រសួងការបរទេស និងស្ថានទូតចិន បានឱ្យដឹងទៀតថា នេះគឺជាវិធានការចុងក្រោយបង្អស់ដែលចិនបានអនុវត្តនាពេលថ្មីៗនេះ ដើម្បីបង្កើនការធ្វើដំណើរក្នុងប្រទេសពីអ្នកទេសចរបរទេស និងពាណិជ្ជករ ចំពេលមានការស្ទុះងើបឡើងវិញនៃសេដ្ឋកិច្ចធំបំផុតទីពីររបស់ពិភពលោក។

ទោះជាយ៉ាងណាក៏ដោយ បច្ចុប្បន្នគោលនយោបាយនេះគ្របដណ្តប់អ្នកធ្វើដំណើររាប់រយលាននាក់ពីប្រទេសជាច្រើន ហើយនឹងធ្វើឱ្យវាកាន់តែងាយស្រួល និងថោកសម្រាប់ពួកគេដើម្បីទទួលបានទិដ្ឋាការធ្វើដំណើរទៅកាន់ប្រទេសចិន៕

ប្រទេសថៃ ៖ កាលពីថ្ងៃទី៨ ខែធ្នូ ឆ្នាំ២០២៣ ក្រោយពីទំព័រហ្វេសប៊ុកថៃមួយបានបង្ហោះរូបភាពព្រះសង្ឃ១អង្គដេកកើយភ្លៅនារីវ័យក្មេងនៅលើកៅអីឈើ ព្រមទាំងចាប់ដៃគ្នាយ៉ាងស្និទ្ធស្នាលនោះ បានធ្វើឱ្យអ្នកលេងបណ្តាញសង្គមនៅប្រទេសថៃជាច្រើននាក់ចូលមកបញ្ចេញមតិរិះគន់អំពីទង្វើមិនសមរម្យនេះ ។

ក្រុមការងារសារព័ត៌មានថៃឈ្មោះ Nation បានធ្វើដំណើរទៅកាន់វត្តសួនកែវ ស្ថិតនៅឃុំបាងសែន ស្រុកបាងញ៉ៃ ខេត្តនុនថៈបុរី ប្រទេសថៃ និងជួបជាមួយព្រះសង្ឃព្រះនាម Phayom Kanlayano ជាព្រះចៅអធិការវត្តសួនកែវ ដើម្បីសាកសួរអំពីករណីនេះ ។

ព្រះចៅអធិការវត្តសួនកែវ ព្រះនាម Phayom Kanlayano មានសង្ឃដីកាថា ព្រះសង្ឃបានប្រព្រឹត្តទង្វើមិនសមរម្យនេះ លែងមានឋានៈជាព្រះសង្ឃទៀតហើយ ហើយត្រូវហៅថា «ប្តីវិញ» មិនមែនហៅថា ព្រះសង្ឃទេ ។ ព្រះសង្ឃគួរតែដឹងថា តើអ្វីអាចប្រព្រឹត្តបាន និងអ្វីមិនអាចប្រព្រឹត្តបាន ។

ព្រះចៅអធិការវត្តមានសង្ឃដីកាថា ៖ «យើងត្រូវមើលថា តើនារីនេះពេញចិត្តដែរឬទេ? ប្រសិនបើនាងមិនពេញចិត្តទេ គួរតែរុញ ឬដាក់១កែងដៃ ដើម្បីឱ្យព្រះសង្ឃអង្គនេះដឹងខ្លួនឡើងវិញ ។ ករណីនេះ ប្រសិនបើព្រះចៅអធិការវត្តមិនចាប់ព្រះសង្ឃផ្សឹកទេ ហើយឱ្យគង់នៅវត្តបន្តទៀត វាដូចគ្នានឹងត្រីស្អុយ១ក្បាលធ្វើឱ្យត្រីស្អុយទាំងអស់ ព្រោះបើតាមរូបភាពបង្ហាញថា ព្រះសង្ឃនេះមិនដឹងអ្វីទាល់តែសោះ ។ ព្រះសង្ឃគួរតែប្រព្រឹត្តឱ្យមនុស្សទូទៅគោរព ប៉ុន្តែបែរជាចូលចិត្តធ្វើឱ្យល្បីល្បាញក្នុងបណ្តាញសង្គម មិនគួរធ្វើជាព្រះសង្ឃទៀតទេ» ។

ក្រោយពីរឿងរ៉ាវនេះល្បីល្បាញក្នុងបណ្តាញសង្គម លោក សូក្រៃ ចៃម៉ាន់ ប្រធានការិយាល័យព្រះពុទ្ធសាសនាប្រចាំខេត្តឈៀងរ៉ាយ ក៏បានត្រួតពិនិត្យ ហើយជំហានដំបូងបង្ហាញថា បុរសតែងខ្លួនជាព្រះសង្ឃបានប្រព្រឹត្តនូវទង្វើនេះពិតមែន ហើយវាជារូបភាពចាស់ដែលបានកើតឡើងប្រមាណ៤ឆ្នាំហើយ ។

លោក សូក្រៃ ចៃម៉ាន់ បញ្ជាក់ថា បច្ចុប្បន្ន បុរសតែងខ្លួនជាព្រះសង្ឃនេះអាចទៅរស់នៅព្រំដែនថៃ និងឡាវ ហើយមានជំងឺមិនអាចដើរបានទេ ។ ហេតុនេះ ដើម្បីត្រួតពិនិត្យរកការពិតថា តើបុរសនេះជាព្រះសង្ឃពិតប្រាកដឬអត់នោះ ការិយាល័យព្រះពុទ្ធសាសនាប្រចាំខេត្តឈៀងរ៉ាយ បានបញ្ជូនព័ត៌មានបឋមទៅកាន់ស្ថាប័នព្រះពុទ្ធសាសនាឱ្យស៊ើបអង្កេតរកការពិត ដើម្បីចាត់ការតាមវិធានការរបស់ស្ថាប័នព្រះពុទ្ធសាសនាបន្តទៀត ៕ ប្រភព ៖ nation

បរទេស៖ រដ្ឋាភិបាលរបស់សហរដ្ឋអាមេរិកបានអំពាវនាវឱ្យអ្នកប្រមាញ់មកបរបាញ់សម្លាប់សត្វទីទុយចំនួនជាង ៥០០,០០០ ក្បាល ដើម្បីជួយការពារប្រភេទសត្វដើមដទៃទៀត។

យោងតាមប្រភពព័ត៌មាន Newsweek ដែលបានចុះផ្សាយនៅថ្ងៃទី៨ ខែធ្នូថា សត្វទីទុយគឺជាប្រភេទសត្វដែលរាតត្បាតនៅតំបន់ប៉ាស៊ីហ្វិកភាគពាយ័ព្យ ដែលមានដើមកំណើតនៅឆ្នេរសមុទ្រភាគខាងកើតនៃសហរដ្ឋអាមេរិក ហើយបង្កការគំរាមកំហែងយ៉ាងធ្ងន់ធ្ងរដល់ប្រភេទសត្វដើមដទៃទៀតដែលត្រូវបានការពារ។ ដូច្នេះហើយ នៅក្នុងសេចក្តីព្រាងផែនការគ្រប់គ្រង សេវាត្រី និងសត្វព្រៃរបស់សហរដ្ឋអាមេរិក (FWS) មានបំណងចង់បំផ្លាញប្រភេទសត្វទីទុយដែលឈ្លានពាននេះ ហើយសង្ឃឹមថានឹងអំពាវនាវឱ្យអ្នកប្រមាញ់បាញ់សត្វស្លាបប្រហែលកន្លះលានក្បាលក្នុងរយៈពេល ៣០ ឆ្នាំខាងមុខ។

សត្វទីទុយបានបង្ហាញខ្លួននៅប៉ាស៊ីហ្វិកភាគពាយ័ព្យតាំងពីឆ្នាំ ១៩៥០ ដោយបច្ចុប្បន្ននេះពួកវាមានចំនួនច្រើនជាងសត្វដទៃផ្សេងៗទៀតដែលប្រទះឃើញនៅភាគខាងជើងវ៉ាស៊ីនតោន អូរីហ្គិន និងកាលីហ្វ័រញ៉ា។ ពួកវាបានបង្កការគំរាមកំហែងដល់សត្វដទៃទៀត ដោយសារពួកវាកាន់តែឈ្លានពាន និងមានរបបអាហារចម្រុះ ដោយសុខចិត្តបរិភោគអ្វីទាំងអស់ពីសត្វល្អិត និងសត្វពាហនៈទៅកាន់ត្រី និងសត្វស្លាបជាច្រើនទៀត។

ដូច្នេះ ដើម្បីជួយសង្រ្គោះសត្វប្រភេទផ្សេងៗទៀតដែលប្រទះឃើញនៅភាគខាងជើងពីការលុកលុយរបស់សត្វទីទុយ រដ្ឋាភិបាលសត្វព្រៃរបស់សហរដ្ឋអាមេរិក (FWS) គ្រោងនឹងសម្លាប់សត្វទីទុយប្រហែល ២០,០០០ ក្បាលក្នុងឆ្នាំដំបូង បន្ទាប់មក ១៣,៣៩៧ ក្បាលក្នុងមួយឆ្នាំនៅទសវត្សរ៍ទីមួយ និង ១៦,៣០៣ ក្បាលក្នុងទសវត្សរ៍បន្ទាប់ រួមជាមួយ ១៧,៨៩០ ក្បាលទៀតក្នុងទសវត្សរ៍ទីបី ដោយគេរំពឹងថាផែនការនេះនឹងចាប់ផ្តើមនៅដើមឆ្នាំ ២០២៥។

ទោះជាយ៉ាងណាក៏ដោយ អ្នកជំនាញជឿជាក់ថា កម្មវិធីខាងលើនេះនឹងការពារសត្វប្រភេទដើមដទៃទៀត ដែលលទ្ធផលស្រាវជ្រាវបង្ហាញថា ការសម្លាប់សត្វទីទុយនឹងអាចរារាំងក៏ដូចជាជួយរក្សាលំនឹងចំនួនសត្វផ្សេងៗទៀតដែលកំពុងរងការគំរាមកំហែង។ ហេតុនេះហើយ រដ្ឋាភិបាលមានគោលបំណងលុបបំបាត់ប្រហែល ៣០% នៃចំនួនសត្វទីទុយដែលហាមឃាត់សរុប។ លោក Kessina Lee អ្នកគ្រប់គ្រងការិយាល័យ FWS នៅរដ្ឋ Oregon បាននិយាយចែករំលែកថា “យើងមិនអាចលុបបំបាត់ពួកវាចោលទាំងស្រុងនោះទេ ប៉ុន្តែយើងអាចបង្កើតតំបន់ដែលមានដង់ស៊ីតេទាបនៃសត្វទីទុយដែលប្រទះនោះ ដើម្បីរស់រានមានជីវិត និងលូតលាស់បន្តទៀត”៕

បាងកក៖ ប៉ូលិសថៃបានគំរាមចាត់វិធានការទៅតាមផ្លូវច្បាប់បន្ទាប់ពីតារាTik Tok ចិនមួយរូប បានបង្ហោះដោយនិយាយថា «ទីក្រុងបាងកកជាទីក្រុងដ៏ល្បីលល្បាញមួយដែរ ប៉ុន្តែការដើរលេងពេលយប់គឺគ្មានសុវត្ថិភាពទាល់តែសោះ។

នាយឧត្តមសេនីយ៍ ផាន់ថាណា នុតចាន់ណាត ស្នងការរងនៃការិយាល័យអន្តោប្រវេសន៍ថៃបាននិយាយថា ពេលនេះប៉ូលីសដឹងពីកន្លែងលាក់ខ្លួនរបស់ស្ត្រីជនជាតិចិន ដែលបានបង្ហោះឃ្លីបអវិជ្ជមានអំពី សូយ ណាណា នៅលើផ្លូវ Sukhumvit ។ យ៉ាងណាក៏ដោយ លោកឧត្តមសេនីយ៍បាននិយាយថា ភ្ញៀវទេសចរចិនពិតមានសិទ្ធិក្នុងបង្ហោះឃ្លីបរិះគន់ថៃ។ យ៉ាងណាមិញ ប៉ូលិសថៃនូវវមិនទាន់បានចាត់វិធានការតាមផ្លូវច្បាប់ចំពោះរូបនាងនៅឡើយនោះទេ ប៉ុន្តែប៉ូលីសនឹងកោះហៅនាងមកសួរចម្លើយ ដើម្បីឲ្យដឹងពីមូលហេតុរបស់នាង។

កាលពីថ្ងៃពុធ ទី៦ ខែធ្នូ នៅលើបណ្តាញសង្គមTik Tok ចិន គឺមាននារីស្រស់ស្អាតម្នាក់ដែលជាតារា Tik Tok មួយរូបដែរបានធ្វើការបង្ហោះឃ្លីបវីដេអូមួយដែលធ្វើឲ្យប្រទេសថៃទាំងមូលមានការខកចិត្តនិងអាប់កិត្តិយសយ៉ាងខ្លាំង ដោយនាងបានបញ្ចេញមតិថា នៅលើផ្លូវ Soi Nana នៃទីក្រុងបាំងកកប្រទេសថៃ គឺគ្មានសុវត្ថិភាពទេចំពោះស្រ្តីដែលមានបំណងដើរលេងយប់ព្រលប់តែម្នាក់ឯង។ នាងបានបន្តទៀតថា ៩៩% នៃមនុស្សនៅផ្លូវ Soi Nana សុទ្ធតែជាមនុស្សពាលទាំងអស់។

កាលពីថ្ងៃទី៧ខែធ្នូនេះ ប៉ូលិសនៅតំបន់នោះក៏បានដាក់បញ្ជូនរបាយការណ៍អំពីករណីនេះទៅកាន់ការិយាល័យប៉ូលិសក្រុង។ នៅក្នុងរបាយការណ៍ ស្ថានីយ៍បានកំណត់អត្តសញ្ញាណស្ត្រីជនជាតិចិននោះថា Ziyu Wang អាយុ 28 ឆ្នាំ ដែលបានមកលេងប្រទេសថៃតាមព្រលានយន្តហោះសុវណ្ណភូមិនាទីក្រុងបាំងកក កាលពីថ្ងៃទី ២ ខែវិច្ឆិកា។

តាមរបាយការណ៍ប៉ូលីសបានដកស្រង់សម្តីស្រីស្អាតជនជាតិចិនដែលនិយាយនៅលើវីដេអូឃ្លីបអំពីហានិភ័យរបស់នាង ដើម្បីព្រមានទៅកាន់ស្ត្រីដទៃទៀតអំពីបញ្ហាប្រឈមនិងភាពភ័យខ្លាច ប្រសិនបើមកលេងផ្លូវសយ ណាណា ប្រទេសថៃនាពេលរាត្រីតែម្នាក់ឯង។

យោងតាមរបាយការណ៍បានបញ្ជាក់ទៀតថា នាងបានទៅលេងនៅផ្លូវសយនោះនៅវេលាម៉ោង 11.30 យប់ ហើយអង្គុយនៅទីនោះមួយភ្លេច ហើយក៏មានមនុស្សចម្លែកម្នាក់មកនិយាយជាមួយនាង។ បន្ទាប់ពីម្នាក់នោះបាននិយាយទៅកាន់នាងរួចមក នាងបានដើរចេញទៅ ហើយនិយាយតាមកាមេរ៉ាថា «នាងអាចត្រូវបានជនបរទេសទាញចេញជាមួយដោយមិនដឹងខ្លួនទៀតផង ប្រសិនបើនាងមិនចេះប្រុងប្រយ័ត្ន»។

បើយោងតាមប្រតិបត្តិករទេសចរណ៍នៅក្នុងប្រទេសបាននិយាយថា ឃ្លីបនេះគឺជាការផ្សព្វផ្សាយអវិជ្ជមានដែលធ្វើឱ្យប៉ះពាល់ដល់ផលប្រយោជន៍នៃវិស័យទេសចរណ៍របស់ប្រទេសថៃ។ ពួកគេក៏បាននិយាយទៀតថា វិធានការរបស់រដ្ឋាភិបាលថៃក្នុងការលើកលែងទិដ្ឋការសម្រាប់ភ្ញៀវទេសចរណ៍ចិននេះនឹងមិនមានប្រសិទ្ធភាពទេ គឺដោយសារតែការបង្ហោះវិដេអូផ្សព្វផ្សាយអវិជ្ជមានពីរាជាណាចក្រថៃបែបនេះផងដែរ៕