តារាចម្រៀង និងសម្តែង ឌី សូនិត្តា បានបង្ហាញពីការឈឺចាប់របស់ខ្លួនទាំងទឹកភ្នែកជាលើកដំបូងនៅក្នុងកម្មវិធីមួយដែលត្រូវបានមិត្តភក្តិមានចិត្តមិនស្មោះត្រង់ លួចក្បត់ខ្លួន ធ្វើគ្រប់យ៉ាងដើម្បីតែលុយចង់ឱ្យមានបានស្មើគ្នាស្រួលដើរជាមួយគ្នា។ ការឈឺចាប់នេះវាជាដំបៅកប់ជ្រៅក្នុងចិត្តរបស់ ឌី សូនិត្តា រហូតនាងខ្លាចពាក្យថា «មិត្តភក្តិល្អ»។

នៅក្នុងកម្មវិធី 3fun ដែលបានចាក់ផ្សាយកាលពីយប់ថ្ងៃទី១៩ មករា អ្នកនាង ឌី សូនិត្តា តារាសម្តែង និងជាម្ចាស់ពាន I Am a Singer Cambodia រដូវកាលទី៣ បានចូលរួមជាតារាកិត្តិយសជាមួយកញ្ញា ហេង បូនីកា លំដាប់រងទី២ Miss Universe Cambodia 2022 ដោយបានចែករំលែកទាំងភាពសប្បាយនិងបទពិសោធជីវិតទៅកាន់ទស្សនិកជន។
ក្នុងនោះដែរ អ្នកនាង ឌី សូនិត្តា បានចែករំលែក ធ្លាប់ឈឺចាប់ដោយសារមិត្តរហូតដល់ធ្វើបាបខ្លួនឯង ដែលការឈឺចាប់នេះឈឺជាងស្នេហាទៅទៀត ព្រោះបានជួបមិត្តភក្តិចំនួនពីរនាក់សុទ្ធតែប៉ះរឿងធ្ងន់។ ការឈឺចាប់នេះ ធ្ងន់រហូតដល់ថ្នាក់ម្តាយរបស់នាងទទួលយកអត់បានរហូតគាត់យំធ្វើយ៉ាងមិចក៏បានឱ្យតែកូនគាត់មកវិលមកដូចដើម។

ឌី សូនិត្តា ថាការឈឺចាប់នេះបានក្លាយជារឿងដិតដាមហើយនៅពេលឮពាក្យថាមិត្តភក្តិនាងអួលដើមកនិងខ្លាច សូម្បីពេលនេះកូនចៅរបស់នាងក៏ដោយ និងអ្នកផ្សេងទៀត នាងអត់ចូលចិត្តប្រើពាក្យថាស្រលាញ់ច្រើនទេ ព្រោះខ្លាចពេលកាន់តែស្រលាញ់ កាន់តែបាត់បង់សុខចិត្តធ្វើខ្លួនធម្មតាវិញ។ តារាស្រីរូបនេះថា មិត្តភក្តិទីពីរដែលធ្វើឱ្យខ្លួនឈឺចាប់ គាត់ចង់បានចម្លើយ តែខ្លួនមិនបានប្រាប់ចម្លើយទៅវិញទោះបីជាម្នាក់នោះមកទទួលកំហុសក៏ដោយ ហើយចម្លើយនោះនាងប្រាប់ម្តាយតែម្នាក់គត់។ ប៉ុន្តែពេលនេះនាងសូមនិយាយក្នុងកម្មវិធីតែម្នាក់ម្តង ហើយដឹងថាអតីតមិត្តភក្តិរបស់នាងនឹងចូលមើលដូចគ្នា។

នី សូនិត្តា ថាមិត្តភក្តិទីពីរ គាត់ធ្លាប់មក Surprised ខួបកំណើតនាង ប៉ុន្តែនាងប្រៀបដូចមនុស្សអត់វិញ្ញាណ មិនបាននិយាយអ្វីទាំងអស់ ដោយមិត្តភក្តិរបស់នាងប្រើភាសា សូមទោសដែលគេត្រូវការលុយជាជាងនាង ហើយការធ្វើដូចនេះដើម្បីឱ្យមានស្មើគ្នា មិត្តភក្តិចង់ឃើញមិត្តភក្តិមាន ទៅដើម្បីមាន ពេលមានទៅយើងស្រួលដើរជាមួយគ្នា ដែលការគិតនេះផ្ទុយពីការគិតរបស់ខ្លួនទៅហើយ ទើបនាងអួលដើមកនិយាយមិនចេញសូម្បីមួយម៉ាត់។

ឌី សូនិត្តា លើកឡើងទៀតថា មិត្តភក្តិម្នាក់នោះទៅចង់មានបានទាំងដឹងថាផ្លូវនោះទៅជាមួយមនុស្សដែលកំពុងសម្លាប់នាងតាំងពីដើម ហើយតាំងពីពេលនោះហើយដែលមិត្តភក្តិរបស់នាងបានក្បត់ ហើយការសារភាពរបស់មិត្តភក្តិនាងស្តែងឱ្យដឹងថា ដើម្បីលុយបោះបង់នាងចោល។ រូបភាពមួយទៀតដែលធ្វើឱ្យ ឌី សូនិត្តា ដឹងថាម្នាក់នោះលែងមានឈ្មោះជា Best Friend តទៅទៀតបន្ទាប់ពីឃើញសកម្មភាពរបស់គេលូនក្រាបដើម្បីតែចង់បានលុយ៕

បទចម្រៀងថ្មីរបស់លោក ឆន សុវណ្ណារាជ មានចំណងជើងថា «ពូក៏ដូចប៉ា» កំពុងធ្វើឱ្យអ្នកប្រើប្រាស់បណ្តាញសង្គមចាប់អារម្មណ៍យ៉ាងខ្លាំងទាំងការរិះគន់ និង វែកញែកយ៉ាងច្រើនទៅកាន់តារាចម្រៀងរូបនេះនិងផលិតកម្ម ព្រមទាំងលើកឡើងទៀតថាឆ្នាំ២០២៤ ទៅហើយនៅមានបទរបៀបនេះទៀត។

កាលពីថ្ងៃទី១២ មករា ឆ្នាំ២០២៤ ផលិតកម្មរស្មីហង្សមាសបានទម្លាក់បទចម្រៀងថ្មីរបស់ លោក ឆន សុវណ្ណារាជ តារាចម្រៀងដ៏មានប្រជាប្រិយមានចំណងជើងថា «ពូក៏ដូចប៉ា» ជាប្រភេទ Dance Version ។ ទោះយ៉ាងណា នាពេលថ្មីៗនេះបទថ្មីរបស់លោក ឆន សុវណ្ណារាជ បានធ្វើឱ្យមហាជនរិះគន់ និងអ្នកខ្លះទៀតក៏បានវែកញែក ទៅលើចំណងជើងថ្មីនេះ ដែលនិពន្ធទំនុកច្រៀងពី BELLA YA។

អ្នកលេងបណ្តាញសង្គមបានចូលទៅបញ្ចេញមតិថា «បទនេះធ្វើឱ្យខ្ញុំគិតច្រើនណាស់, អត់ត្រូវទម្រង់ ពូធំជាងប៉ា, អស់បទនិពន្ធហើយមើលទៅ, សម័យនិងហើយនៅមានបទកន្ទបចឹងទៀតប្រូ, ស្ដាប់ហើយមើលអារម្មណ៍ថាកំពុងអង្គុយគិតពីអត្តន័យនៃបទចម្រៀង, គាំទ្រពូ ហើយលុបបទនឹងចេញទៅពូ , ចំណុចពីរោះនៅត្រង់ណា អ្នកណាដឹងជួយReplyប្រាប់ផង,ឆ្ងល់ពូអត់ស្ដាប់បទខ្លួនឯងទេពីរោះឬអត់?»។

ចំណែកឯគណនីមួយបានលើកឡើងថា « ធ្លាប់ឮពាក្យថា ពូធំជាងប៉ា ពោលចេញពីមាត់របស់ក្រុមមនុស្សដែលឆ្កួតនិងទំនោរផ្លូវភេទ ហើយពាក្យនេះសាបព្រោះក្នុងសង្គមតាមរយ: tik tok, facebook, ខ្ញុំមិនដែលគិតថាពាក្យនេះត្រូវបានបុគ្គលល្បីណាម្នាក់ក្នុងវិស័យសិល្ប:អាចយកមកសាបព្រោះបន្តនោះទេ ព្រោះពាក្យនេះវាចាប់កំណើតចេញពីប្រភពពួកបែកស្លុយដែលញៀនខាងទំនោរផ្លូវភេទនោះឯង។ តែសំណាងវិញ បទចម្រៀងមួយនេះ មានចំណងជើងខុសគ្នាតែមួយម៉ាត់គត់គឺ ( ពូធំជាងប៉ា, ពូក៏ដូចប៉ា ) សួរថាដូចប៉ាត្រង់ណា ទំនុកច្រៀងគេរៀបរាប់ថា ដូចត្រង់ស្រឡាញ់ស្មោះ»។ រីឯផេកមួយក៏បានផ្លែផ្កាថា «វាអស់ទំនុកច្រៀងដល់ថ្នាក់យក វាក្យស័ព្ទស្រង់ចេញពីរឿង …មកតោងហើយ!អ្នកចម្រៀងខ្លះ.. (ដាច់ផេកក៏ដាច់ទៅ)»។

គួរបញ្ជាក់ថា លោក ឆន សុវណ្ណារាជ ជាតារាចម្រៀងដ៏ល្បីដែលឈរជើងលើវិស័យសិល្បៈជាច្រើនឆ្នាំមកហើយ និងបានក្តោបតំណែងជាគ្រូបង្វឹក និងគណៈកម្មការ ក្នុងកម្មវិធីប្រលងចម្រៀងលំដាប់ថ្នាក់ពិភពលោកផងដែរ៕

ថ្ងៃទី២២ ខែមករា ដែលតារាចម្រៀងរ៉េប វណ្ណដា ត្រៀមទម្លាក់បទថ្មីជាកាដូដល់អ្នកគាំទ្រក្នុងថ្ងៃខួបកំណើតត្រូវបានដឹងថាជាបទថ្មីសហការជាមួយតារារ៉េបជប៉ុន Awich ។ ទន្ទឹមនឹងដំណឹងបទថ្មីនេះងាកទៅកាន់ហ្វេនៗគុណភាពរបស់ វណ្ណដា វិញបានត្រៀមកាដូជាពិសេសដល់អាយរបស់ខ្លួននឹងមានការចាក់បញ្ចាំងផ្ទាំង LED ចំនួន៤ថ្ងៃនៅទីតាំងមួយក្នុងរាជធានីភ្នំពេញដើម្បីអបអរសាទរខួបកំណើតរបស់តារារ៉េបល្បីឈ្មោះរូបនេះ។

មិនឱ្យហ្វេនៗខកចិត្តក្នុងឱកាសខួបកំណើតរបស់ខ្លួនមានកាដូបទថ្មីទៅដល់អ្នកគាំទ្រជារៀងរាល់ថ្ងៃទី២២ មករា ចាប់តាំងពីឆ្នាំ២០១៩មក ពេលនេះ វណ្ណដា បានបញ្ជាក់នៅលើបណ្តាញសង្គមរបស់លោកថា ថ្ងៃពិសេសនេះលោកនឹងទម្លាក់បទថ្មីមានចំណងជើងថា «៦ Years In The Game» ជាផ្លូវការបន្ទាប់ពីបង្ហើបប្រាប់អ្នកគាំទ្រកាលពីថ្ងៃមុន។ អ្វីដែលកាន់តែពិសេសធ្វើឱ្យហ្វេនៗអន្ទះសារខ្លាំងនោះបទថ្មីក្នុងថ្ងៃខួបកំណើតរបស់ វណ្ណដា ក្នុងឆ្នាំ២០២៤ នេះលោកបានសហការជាមួយតារារ៉េប Awich ដែលជាតារារ៉េបដ៏ល្បីប្រចាំប្រទេសជប៉ុន។

គេចាំបានថា កាលពី វណ្ណដា ចេញទៅច្រៀងនៅជប៉ុនលើកដំបូងក្នុងខែកក្កដា ឆ្នាំ២០២៣ បានប៉ះជាមួយតារារ៉េបដ៏ល្បី Awich ហើយតារាចម្រៀងរូបនេះបានចែករំលែកពីវប្បធម៌របស់ប្រទេសទៅវិញទៅមកប្រកបដោយភាពសិទ្ធស្នាលជាមួយគ្នា។ មិនត្រឹមតែប៉ុណ្ណោះ កាលពីថ្ងៃទី២៤ ធ្នូ ឆ្នាំ២០២៣ តារាចម្រៀង Awich ក៏បានមកសម្តែងនៅលើដីប្រទេសកម្ពុជាដូចគ្នាដោយបានបកស្រាយចម្រៀងជាមួយ វណ្ណដា ក្នុងថ្ងៃផ្តាច់ព្រ័ត្រ The Rapper Cambodia ធ្វើឱ្យហ្វេនៗស្រែកកងរំពងយ៉ាងខ្លាំង។

ជាមួយកាដូបទថ្មី «៦ Years In The Game» ពី វណ្ណដា និង Awich ដែលត្រៀមទម្លាក់ក្នុងថ្ងៃទី២២ មករា ងាកទៅកាន់ហ្វេនៗគុណភាពរបស់ វណ្ណដា វិញក៏មិនណយដូចគ្នាដោយពួកគេបានកៀងគរថវិកាគ្នានឹងចាក់បញ្ចាំងផ្ទាំង LED នៅ The Bridge ភូមិ១៤ ផ្លូវរដ្ឋសភា សង្កាត់ទន្លេបាសាក់ ខណ្ឌចំការមន រាជធានីភ្នំពេញ ដែលចាប់ផ្តើមចាក់នៅម៉ោង ៤:៣១ ល្ងាច ដល់ម៉ោង ៧:៣០យប់ ចំនួន៤ថ្ងៃ ចាប់ពីថ្ងៃទី២០ ដល់២៣ ខែមករា ឆ្នាំ២០២៤ នេះដើម្បីអបអរខួបកំណើតរបស់ វណ្ណដា។

គួរបញ្ជាក់ថា វណ្ណដា បានទម្លាក់បទក្នុងថ្ងៃពិសេសរបស់គេកន្លងមកមានដូចជា J+O , BORN THIS WAY , IF I DIE , KHMER BLOOD ,CHAPTER 1 និងបទក្នុងឆ្នាំនេះ «៦ Years In The Game»៕