មហាសេដ្ឋីកំពូលរបស់ពិភពលោក គឺលោក Hui Ka Yan ជនជាតិចិន វ័យ៦៥ឆ្នំា ស្ថាបនិកក្រុមហ៊ុនអភិវឌ្ឍអចលនទ្រព្យយក្សចិន China Evergrande Group កំពុងត្រូវបានគេរឹបអូសក្រុមហ៊ុន ព្រោះបានជំពាក់បំណុលវ័នកររហូតដល់ ៣០០ពាន់លានដុល្លារ ខណៈរូបគាត់កំពុងស្ថិតក្រោមការស៊ើបអង្កេតពីបទឧក្រិដ្ឋកម្មទៀត។

ក្រុមអភិវឌ្ឍអចលនទ្រព្យចិន China Evergrande Group គឺជាក្រុមហ៊ុនដែលជំពាក់បំណុលគេច្រើនបំផុតលើពិភពលោក និងបានជំពាក់បំណុលរហូតដល់ជាង ៣០០ ពាន់លានដុល្លារអាមេរិក។ តាមរយៈក្រុមហ៊ុននេះក៏បានធ្វើឲ្យវិស័យអចលនទ្រព្យក្នុងប្រទេសចិនកំពុងជួបការលំបាកកាន់តែខ្លាំងឡើង ខណៈដែលបំណុលខ្លួនជំពាក់វ័នករតាំងពីឆ្នាំ ២០២១ មកម្លេះ។

កាលពីថ្ងៃទី២៩ ខែមករានេះ តុលាការហុងកុងបានបញ្ជាឱ្យរំលាយក្រុមហ៊ុនអចលនទ្រព្យយក្សចិន China Evergrande Group ដែលជាការផ្លាស់ប្តូរមួយទំនងជានឹងធ្វើឱ្យមានការរង្គោះរង្គើទីផ្សារហិរញ្ញវត្ថុប្រទេសចិន ខណៈដែលរដ្ឋាភិបាលព្យាយាមទប់ទល់នឹងវិបត្តិដែលកាន់តែយ៉ាប់យឺននេះ។

តាមរយៈសេចក្តីសម្រេចរបស់តុលារការហុងកុងដោយបានគូសបញ្ជាក់ថា “វាដល់ពេលហើយ” ព្រោះក្រុមហ៊ុន Evergrande បានដួលរលំជាង ១៨ ខែមកហើយ ក្នុងការស្វែងរកដំណោះស្រាយវិបត្តិខ្លួនឲ្យមានប្រសិទ្ធភាពជាងនេះ។ ការសម្រេចរំលាយក្រុមហ៊ុនអភិវឌ្ឍន៍ចិនដ៏ធំ ព្រមទាំងបានរឹបអូសយកទ្រព្យសម្បត្តិដែលមាននៅសល់ក្នុងក្រុមហ៊ុនប្រមាណ ២៤០ ពាន់លានដុល្លារ។

ដំណើរការនៃការរំលាយក្រុមហ៊ុនយក្សនេះនឹងផ្តល់នូវផលប៉ះពាល់មួយចំនួនទៅលើប្រតិបត្តិការរបស់ក្រុមហ៊ុន ដូចជាឧស្សាហកម្មធំៗរបស់ក្រុមហ៊ុនរួមទាំងរថយន្តអគ្គីសនី សេវាកម្មអចលនទ្រព្យ គម្រោងផ្ទះល្វែង ការទូទាត់សងប្រាក់ទៅកាន់អតិថិជនវិញជាដើម ហើយវាគឺកាន់តែធ្លាក់ទៅក្នុងស្ថានភាពដ៏គួរឲ្យស្មុគ្រស្មាញ។

ទោះជាយ៉ាងណា ប្រទេសចិនឥឡូវនេះកំពុងប្រឈមមុខនឹងសេដ្ឋកិច្ចជាប់គាំងខ្លាំង ដែលទីផ្សារអចលនទ្រព្យរយៈពេល៩ឆ្នាំចុងក្រោយនេះគឺមានសភាពកាន់តែធ្ងន់ធ្ងរ។ រីឯទីផ្សារភាគហ៊ុនរយៈពេល៥ឆ្នាំនេះ គឺកំពុងតែធ្លាក់ទាបទៅៗ។ ដូច្នេះផលប៉ះពាល់ទៅលើទីផ្សារផ្សេងៗក្នុងប្រទេសចិនជាបន្តបន្ទាប់នេះ អាចនឹងបំផ្លាញដល់កិច្ចខិតខំប្រឹងប្រែងរបស់រដ្ឋាភិបាលក្នុងការស្តារកំណើនសេដ្ឋកិច្ចឡើងវិញផងដែរ៕

ប្រទេសបេឡារុស ៖ បុរសម្នាក់រស់នៅប្រទេសបេឡារុស បានបង្កើតកាណូតទឹកកក១គ្រឿង និងអាចជិះកាណូតនេះលេងបានទៀតផង ។ ក្រោយមក លោកក៏បានបង្ហោះរូបភាព និងវីដេអូស្នាដៃធ្វើកាណូតទឹកកករបស់ខ្លួននៅក្នុង Instagram និងធ្វើឱ្យគេចាប់អារម្មណ៍យ៉ាងខ្លាំង ។

បុរសឈ្មោះ Ivan Karpitsky រស់នៅទីក្រុង Minsk ប្រទេសបេឡារុស បានបង្កើតស្នាដៃសិល្បៈដ៏ល្បីល្បាញផ្នែកការកែច្នៃព្រិល និងទឹកកក នៅស្រុកកំណើតតាំងពីលោកអាយុ៤ឆ្នាំមកម៉្លេះ តាមរយៈស្នាដៃ «Ice Violin» ។ ស្នាដៃរបស់លោកបានល្បីល្បាញយ៉ាងខ្លាំងនៅក្នុងបណ្តាញសង្គម ដោយសារគ្មានអ្នកណាម្នាក់អាចធ្វើបានដូចលោកទេ ។

នៅរៀងរាល់រដូវរងា លោកបានបង្កើតស្នាដៃផ្សេងៗពីព្រិល និងដុំទឹកកក ហើយពីមួយឆ្នាំទៅមួយឆ្នាំ លោកបានបង្កើតស្នាដៃកាន់តែអស្ចារ្យខ្លាំងឡើង ។ នៅដើមឆ្នាំ២០២៤ នេះ លោកបានធ្វើឱ្យអ្នកលេងបណ្តាញសង្គមភ្ញាក់ផ្អើលគ្រប់គ្នា ដោយសារពួកគេឃើញលោកបង្ហាញវីដេអូជិះកាណូតទឹកកកក្នុង Instagram ។

ទោះយ៉ាងណា លោក Ivan Karpitsky ពុំបានបង្ហាញចំណុចលម្អិតអំពីតិចនិកថា តើលោកបានធ្វើបែបណាទេ ដើម្បីឱ្យកាណូតនេះអាចជិះបាន ។ លោកគ្រាន់តែបង្ហោះព័ត៌មានខ្លះៗក្នុងបណ្តាញសង្គមថា កាណូតទឹកកកនេះមិនល្អដូចកាណូតពិតប្រាកដទេ ។

លោកជាអ្នករៀនសូត្រអំពីការងារសិល្បៈដោយខ្លួនឯង ហើយលោកមិនធ្លាប់ឆ្លងកាត់ការរៀនសូត្រផ្នែកសិល្បៈក្នុងស្ថាប័នណាមួយទេ ។ លោកនិយាយថា លោកបានយកដុំទឹកកកមកបន្តគ្នាដោយប្រើប្រាស់ទឹកជំនួសកាវ រហូតដល់ទទួលបានទឹកកកដុំធំ បន្ទាប់មក លោកយកឧបករណ៍មកឆ្លាក់លើផ្ទាំងទឹកកកឱ្យវាក្លាយជាកាណូត សម្រាប់ឱ្យមនុស្សជិះចំនួន២នាក់ ។

លោកបានប្រើប្រាស់ឧបករណ៍ឆ្លាក់ផ្ទាំងទឹកកកដោយការផ្ចត់ផ្ចង់នៅតាមផ្នែកផ្សេងៗនៃកាណូត ដូចជា ៖ ដំបូល និងផ្នែកខាងក្រោយនៃកាណូត ។ បើទោះជាកាណូតទឹកកកនេះប្រើប្រាស់មិនល្អក្តី ប៉ុន្តែវាមានភាពស្រស់ស្អាតខ្លាំង ។ ស្នាដៃរបស់លោកទទួលបានការពេញនិយមយ៉ាងខ្លាំងក្នុងបណ្តាញសង្គម ហើយមានមនុស្សជាច្រើននាក់បានទាក់ទងឱ្យលោកបង្កើតស្នាដៃស្រដៀងគ្នានេះ ប៉ុន្តែលោកបដិសេធរាល់ការស្នើសុំទាំងអស់ ៕

ប្រទេសជប៉ុន៖ កាលពីថ្ងៃទី៣០ ខែមករា ឆ្នាំ២០២៣ ក្រុមហ៊ុន Toyota បាននិយាយថា ខ្លួនកំពុងផ្អាកការនាំចេញរថយន្តចំនួន ១០ ម៉ូដែល ដោយសារតែមានសញ្ញាមិនធម្មតាក្នុងការធ្វើតេស្តទាក់ទងនឹងម៉ាស៊ីនម៉ាស៊ូតដែលប្រើលើម៉ូដែលរថយន្តជាច្រើនរបស់ខ្លួន។ ក្រុមហ៊ុនបានបន្តទៀតថា ក្រុមហ៊ុនបុត្រសម្ព័ន្ធរបស់ខ្លួន Toyota Industries មិនបានធ្វើការតេស្តទិន្នផលសេះត្រឹមត្រូវសម្រាប់ការបញ្ជាក់នៃម៉ូដែលម៉ាស៊ីនម៉ាស៊ូតចំនួនបីនោះទេ។ដូច្នេះម៉ូដែលរថយន្តចំនួន ១០ ដែលក្រុមហ៊ុននឹងផ្អាកការនាំចេញរួមមាន៖ Land Cruiser Prado, Hiace/Grance/Brawny Van ប្រភេទ Mazda, Dina / Dutro ប្រភេទ Hino, LX500d, Land Cruiser 300, Toyota Hilux, និង Toyota Inova។

ការផ្អាកការដឹកជញ្ជូននេះ នឹងប៉ះពាល់ដល់រថយន្តតូយ៉ូតាប្រហែល ៣៦,៥០០ គ្រឿងដែលផលិតជារៀងរាល់ខែ។ ទោះជាយ៉ាងណា ក្រុមហ៊ុន Toyota Industries បាននិយាយនៅក្នុងសេចក្តីថ្លែងការណ៍ដាច់ដោយឡែកមួយថា កម្មកររបស់ខ្លួនបានកែសម្រួលបរិមាណចាក់ប្រេងដើម្បីធ្វើឱ្យទិន្នន័យ “មើលទៅកាន់តែប្រសើរឡើងវិញហើយ” ។ ក្រុមហ៊ុនក៏បានបញ្ជាក់ដែរថា ភាពមិនប្រក្រតីផ្សេងទៀតត្រូវបានគេរកឃើញទាក់ទងនឹងដំណើរការវិញ្ញាបនប័ត្រសម្រាប់ម៉ាស៊ីន forklift និងឧបករណ៍សំណង់ផ្សេងទៀត។

ក្រសួងដែនដី ហេដ្ឋារចនាសម្ព័ន្ធដឹកជញ្ជូន និងទេសចរណ៍ជប៉ុនបានស្នើសុំឱ្យបញ្ឈប់ការផ្តល់គ្រឿងចក្រ រហូតដល់ស្តង់ដារប្រតិបត្តិការបរិស្ថានត្រូវបានបំពេញ ហើយការហៅមកវិញអាចត្រូវបានពិចារណា។ ក្រសួងសេដ្ឋកិច្ចពាណិជ្ជកម្ម និងឧស្សាហកម្មជប៉ុន ក៏នឹងធ្វើការស៊ើបអង្កេតរកមូលហេតុ និងវិធីសាស្ត្រវាស់វែង ដើម្បីទប់ស្កាត់ការកើតឡើងវិញផងដែរ។

គួរបញ្ជាក់ដែរថា ដំណឹងនេះកើតឡើងបន្ទាប់ពីក្រុមហ៊ុនបុត្រសម្ព័ន្ធរបស់ Toyota Daihatsu ដែលផលិតរថយន្តធុនតូចដ៏ពេញនិយមនៅក្នុងប្រទេសជប៉ុនត្រូវផ្អាកការនាំចេញទាំងអស់កាលពីខែមុន បន្ទាប់ពីក្រុមហ៊ុនបានលាតត្រដាងថាខ្លួនមិនបានធ្វើតេស្តសុវត្ថិភាពយានយន្តឱ្យបានត្រឹមត្រូវអស់រយៈពេលជាច្រើនទសវត្សរ៍មកហើយ៕

ប្រទេសចិន ៖ បុរសម្នាក់ អាយុ៣៥ឆ្នាំ រស់នៅខេត្តហឺណាន ប្រទេសចិន រៀបរាប់ថា គាត់មានប្រាក់ចំនួន១លានយាន់ផ្ញើនៅធនាគារ ហើយគាត់អាចរស់នៅបាន ដោយសារយកការប្រាក់មកចាយវាយក្នុងជីវភាពប្រចាំថ្ងៃ ។ គាត់បញ្ជាក់ថា ដើម្បីកុំឱ្យជីវិតរបស់គាត់ជួបបញ្ហា គឺគាត់មិនព្រមរៀបការជាមួយនារីណាទេ ពីព្រោះមិនចង់មានកូននាំឱ្យមានបន្ទុកច្រើន ។

គាត់បន្តថា ការចំណាយលើកន្លែងស្នាក់នៅនាពេលបច្ចុប្បន្ន បានកើនឡើងជាបន្តបន្ទាប់ ហើយថ្លៃបណ្ណាការខ្ពស់ណាស់ ខណៈប្រាក់សម្រាប់ភ្ជាប់ពាក្យវិញក៏ខ្ពស់ដែរ ។ លើសពីនេះ ផ្ទះ, រថយន្ត និងសម្ភារៈប្រើប្រាស់ផ្សេងៗមានតម្លៃខ្ពស់ខ្លាំង ។ ហេតុនេះ ទើបគាត់សម្រេចចិត្តរស់នៅម្នាក់ឯងល្អជាង បើទោះជាគាត់រស់នៅក្នុងផ្ទះមើលទៅដូចគំនរសំរាម ក៏គាត់មិនរៀបការដែរ ។

វីដេអូរបស់បុរសរូបនេះដែលកំពុងសម្រាក, បរិភោគអាហារ និងលេងទូរស័ព្ទនៅលើគ្រែ ត្រូវបានគេចែកចាយយ៉ាងច្រើនក្នុងបណ្តាញសង្គមប្រទេសចិន ។ បុរសនេះសន្សំប្រាក់បានចំនួន១លានយាន់ពីការបំពេញការងារជាច្រើនឆ្នាំ ហើយគាត់មានមោទនភាពដែលមានប្រាក់សន្សំនេះ ។

គាត់និយាយថា គាត់បានរស់នៅយ៉ាងសុខស្រួលដោយសារយកការប្រាក់ពីចាយវាយ ហើយគាត់ពុំចាំបាច់ស្វែងរកប្រាក់បន្ថែមទៀត និងពុំបាច់មានមនុស្សជាទីស្រឡាញ់ទេ ពីព្រោះជីវិតប្តី-ប្រពន្ធ គឺអាចត្រូវគេមើលងាយគ្រប់បែបយ៉ាង ទើបគាត់សម្រេចចិត្តមិនរៀបការតែម្តង ។ គាត់បានរស់នៅតែម្នាក់ឯងមួយរយៈហើយ ហើយគាត់ក៏ចាប់ផ្តើមធ្លាប់នឹងការរស់នៅបែបនេះ ។

បុរសរូបនេះបន្តថា ៖ «ខ្ញុំជក់បារី ហើយផឹកស្រា ហើយខ្ញុំជាអ្នកចូលចិត្តចម្អិនអាហារ តែពេលរស់នៅម្នាក់ឯងបែបនេះ ចាំបាច់ធ្វើអាហារធ្វើអី ។ ខ្ញុំខ្ចិលធ្វើអាហារ ទើបខ្ញុំក៏កុម្ម៉ង់អាហារឱ្យគេយកមកឱ្យដល់ផ្ទះ ហើយពេលហូបឆ្អែត ខ្ញុំក៏បោះសំរាមចោលក្បែរគ្រែគេង» ។

បុរសខាងលើជឿថា សេចក្តីស្នេហា គឺដូចគ្នានឹងគ្រឿងទេសសម្រាប់ជីវិតដែរ ហើយគាត់មិនចាំបាច់មានសេចក្តីស្នេហាទេ ។ មនុស្សម្នាក់អាចមានសេរីភាពគ្មានដែនកំណត់បាន ហើយប្រាក់ទាំងនេះបានមកពីញឺសឈាម និងប្រាជ្ញារបស់ខ្លួនឯង បើទោះជាគាត់ពុំបានស្រឡាញ់នារីណាម្នាក់ ឬរៀបការក្តី ប៉ុន្តែគាត់ក៏អាចហូបអាហារ និងផឹកស្រាម្នាក់ឯងបាន ។ ដូច្នេះ គាត់រីករាយនឹងអ្វីដែលគាត់មានក្នុងជីវិត ហើយរស់នៅដោយគ្មានការដាក់សម្ពាធ និងគ្មានកង្វល់ជាមួយអ្នកជិតខាង ។

រីឯអ្នកលេងបណ្តាញសង្គមយល់ឃើញថា ប្រាក់ចំនួន១លានយាន់នេះមិនគ្រប់គ្រាន់សម្រាប់ការរស់នៅថ្ងៃអនាគតទេ ខណៈអ្នកខ្លះទៀតប្រាប់ថា គាត់គួរតែធ្វើការចាប់ពី៥ឆ្នាំ ទៅ១០ឆ្នាំទៀត ចាំឈប់ធ្វើការ ។ រីឯអ្នកខ្លះទៀតប្រាប់ថា បើទោះជាគាត់បដិសេចសេចក្តីស្រឡាញ់ ប៉ុន្តែគួរតែគាត់សម្អាតផ្ទះខ្លះផង ។ ចំណែកក្រុមហ៊ុនសម្អាតផ្ទះបានចំណាយពេលជាច្រើនម៉ោងដើម្បីសម្អាតផ្ទះឱ្យគាត់ ៕

បាងកក៖ ថ្មីៗនេះ គឺបានកើតមានករណីក្មេងប្រុសជាសិស្សសាលាថៃថ្នាក់ទី៨ម្នាក់ ដែលត្រូវបានគេស្គាល់ថាគាត់ជាមនុស្សមិនប្រក្រតី បានដកកាំបិតចាក់សម្លាប់មិត្តរួមថ្នាក់ខ្លួនភ្លាមៗ ព្រោះបានត្រូវគេមើលងាយ និងចំអកលើរូបគាត់។

ហេតុការណ៍នេះ គឺបានកើតឡើងនៅវេលាម៉ោង ៨ និង៣០នាទីព្រឹក កាលពីថ្ងៃទី២៩ ខែមករា នៅសាលា Nak Nava Upatham ទីក្រុងបាំងកក ប្រទេសថៃ ហើយថ្នាក់រៀនទាំងអស់ត្រូវបានលុបចោលភ្លាមៗ។

មិត្តភក្តិជនរងគ្រោះបានប្រាប់អ្នកយកព័ត៌មានថា ពួកគេបានឃើញជនរងគ្រោះ សើចចំអកឡកឡើយដាក់ក្មេងប្រុសមិនប្រក្រតីម្នាក់នេះ។ ដោយទ្រាំពុំបាន ក្មេងប្រុសមិនប្រក្រតីម្នាក់នេះបានទាញកាំបិតដេញចាក់ក្មេងប្រុសជនរងគ្រោះតែម្តង។

ដំបូងឡើយ ក្មេងប្រុសរងគ្រោះបានព្យាយាមរត់គេចខ្លួន ប៉ុន្តែជនដៃដល់បានរត់តាមពីក្រោយ ហើយបានចាក់គាត់ ចំផ្នែកខាងស្តាំ ចំកញ្ចឹងក ដែលបណ្តាលឲ្យជនរងគ្រោះ ដួលទៅនឹងដី ក្នុងទីលានបាល់បោះ។ ភ្លាមៗនោះ បុគ្គលិកសាលាបានប្រញាប់ប្រញាល់ទៅជួយជនរងគ្រោះនៅកន្លែងកើតហេតុ។

បុគ្គលិកនិយាយថា ក្មេងប្រុសមិនប្រក្រតីម្នាក់នេះ ជារឿយៗគឺគាត់មិនមាត់មិនករអ្វីទេ ហើយគាត់គឺតែងតែត្រូវបានមិត្តរួមថ្នាក់របស់គាត់និយាយលេងសើចចំអកដាក់គាត់ជាញឹកញាប់។

ទោះបីជាបើមានការជួយសង្គ្រោះក្មេងប្រុសនោះនិងបានបញ្ជូនទៅកាន់មន្ទីរពេទ្យភ្លាមៗហើយក៏ដោយ ប៉ុន្តែគឺមិនអាចសង្គ្រោះជីវិតរូបគេបានទេ។ នៅទីបំផុត ក្មេងប្រុសដែលជាជនរងគ្រោះក៏ត្រូវបានប្រកាសថា«ស្លាប់»បាត់ទៅហើយ។

រីឯក្មេងប្រុសបង្កហេតុក៏ត្រូវបានបញ្ជូនទៅនគរបាលប៉ូលីសដើម្បីធ្វើការស៊ើបអង្កេតនិងចាត់វិធានការបន្ត ខណៈដែលមានការព្រមានចំពោះក្មេងៗដទៃទៀតថាមិនឱ្យនិយាយលេងសើច ចំអកឡកឡើយ ឬសម្លុត ( Bully ) ទៅលើក្មេងប្រុសម្នាក់នេះទៀតនោះទេ៕

ប្រទេសថៃ ៖ គ្រូពេទ្យសុខភាពផ្លូវចិត្តនៅប្រទេសថៃបានសំណូមពរឱ្យបញ្ឈប់អាកប្បកិរិយាការនិយាយស្តី និងបង្ហាញកាយវិការ Bully នៅតាមសាលារៀនជាបន្ទាន់ ដោយគ្រូពេទ្យបញ្ជាក់ថា អ្នក Bully, អ្នកត្រូវគេ Bully និងអ្នកឈរមើល គួរតែរក្សាភាពស្ងប់ស្ងាត់, ឈប់ឆេវឆាវ និងបង្កើតកន្លែងមានសុវត្ថិភាព ។ រីឯគ្រូបង្រៀនគួរតែគ្រប់គ្រងស្ថានការណ៍ឱ្យបានល្អ ដើម្បីចៀសវាងមានអំពើហិង្សាកើតឡើង ។

កាលពីថ្ងៃទី៣០ ខែមករា ឆ្នាំ២០២៤ លោក Chonnan Srikaew រដ្ឋមន្ត្រីក្រសួងសុខាភិបាលប្រទេសថៃលើកឡើងថា ក្រោយហេតុការណ៍កូនសិស្សប្រើអំពើហិង្សាដាក់គ្នារហូតដល់ស្លាប់ នាយកដ្ឋានសុខភាពផ្លូវចិត្ត និងស្ថាប័នពាក់ព័ន្ធបានចុះតាមតំបន់ដើម្បីរៀបចំផែនការ និងវាយតម្លៃសុខភាពផ្លូវចិត្តរបស់សិស្សចំនួន៥៥នាក់ និងគ្រូបង្រៀន១២នាក់ ហើយការវាយតម្លៃឃើញថា កូនសិស្សចំនួន៣៦នាក់ និងគ្រូ១២នាក់ មានភាពតានតឹងផ្លូវចិត្ត ។ ហេតុនេះ ក្រសួងសុខាភិបាលបានកំណត់ផែនការព្យាបាលផ្លូវចិត្តរយៈពេលវែង ។

លោកវេជ្ជបណ្ឌិត Phongkasem Kaimook មកពីនាយកដ្ឋានសុខភាពផ្លូវចិត្តថ្លែងថា មូលហេតុឈានដល់ការប្រើប្រាស់អំពើហិង្សា គឺមិនមែនបណ្តាលមកពីកត្តាតែមួយទេ ហើយត្រូវដោះស្រាយគ្រប់កត្តាទាំងអស់ជាមួយគ្នា ដូចជា ៖ កត្តាផ្ទាល់ខ្លួន គឺមានបញ្ហាការគ្រប់គ្រងអារម្មណ៍, ការគ្រប់គ្រងកំហឹង, ខ្វះការអត់ធ្មត់ ឬជំងឺពិបាកគ្រប់គ្រងខ្លួនឯង ។

កត្តាក្រុមគ្រួសារ គឺការប្រើប្រាស់អំពើហិង្សាលើរាងកាយ, ការនិយាយស្តី និងអារម្មណ៍ ទើបធ្វើឱ្យកុមារយកគំរូតាម ។ រីឯកត្តាសាលារៀន, បរិស្ថានជុំវិញ, ការគំរាមកំហែង, ស្ថិតក្នុងចំណោមមិត្តភក្តិចូលចិត្តប្រើប្រាស់ហិង្សា និងថ្នាំញៀន គឺជាការបង្ហាញពីការប្រើអំពើហិង្សាក្នុងជីវិតប្រចាំថ្ងៃ ។ លើសពីនេះ កត្តាផ្នែកអារម្មណ៍នឹងជំរុញឱ្យមានការប្រើអារម្មណ៍ហិង្សាផងដែរ ។

លោកវេជ្ជបណ្ឌិត Phongkasem Kaimook បន្តថា ការដោះស្រាយអាកប្បកិរិយាហិង្សាចំពោះកុមារ គឺយើងគួរតែគ្រប់គ្រងកុមារដោយឱ្យពួកគេបញ្ឈប់ការឆេវឆាវ ដូចជា ៖ យើងអាចឱប ឬចាប់ក្មេងដើម្បីឱ្យពួកគេឈប់ប្រើហិង្សា ហើយពេលក្មេងស្ងប់ស្ងាត់ហើយ យើងគួរតែជជែកជាមួយគេឱ្យនិយាយចេញមក ។ គួរតែចាប់ផ្តើមអប់រំកុមារចាប់ពីអាយុ៣ឆ្នាំឡើងទៅ ដើម្បីឱ្យកុមារចេះគ្រប់គ្រងអារម្មណ៍ខ្លួនឯង ដូចជា ៖ អប់រំឱ្យកុមារចេះបំបែកខ្លួនចេញពេលពួកគេខឹង រួមទាំងបង្ហាត់កុមារឱ្យមានចិត្តមេត្តា និងសប្បុរសចំពោះមនុស្ស និងសត្វ ។

លោកវេជ្ជបណ្ឌិតនិយាយថា ៖ «ការប្រើអំពើហិង្សាដាក់ទោសលើកុមារឆេវឆាវ គឺមិនអាចជួយឱ្យចរិតពួកគេល្អប្រសើរបានទេ ។ យើងមិនគួរចរចាជាមួយកុមារឆេវឆាវ, រិះគន់ និងប្រៀបធៀបទេ ពីព្រោះវានឹងធ្វើឱ្យកុមារមានភាពអន់ថយ» ។

រីឯអ្នកគ្រូពេទ្យ Wimonrat Wanphen នាយកវិទ្យាស្ថានសុខភាពផ្លូវចិត្តកុមារ និងយុវវ័យ និយាយថា បើសង្ស័យថា កូនចៅរបស់យើងទទួលផលប៉ះពាល់ពីអំពើហិង្សា យើងអាចពិនិត្យមើលស្លាកស្នាមលើរាងកាយកើតឡើងពីការប្រើហិង្សា និងអាកប្បកិរិយាកុមារ ។ យើងអាចពិនិត្យការផ្លាស់ប្តូរអារម្មណ៍របស់ពួកគេ ដូចជា ៖ ភ័យខ្លាច, សោកសៅ និងឆេវឆាវ ហើយយើងគួរចំណាយពេលវេលាស្តាប់ និងជជែកជាមួយពួកគេឱ្យបានច្រើន ។

ក្រៅពីនេះ យើងគួរសួរសំណួរងាយៗទៅកាន់ពួកគេ ដូចជា ៖ តើថ្ងៃនេះ យ៉ាងម៉េចដែរ? ថ្ងៃនេះ មានសេចក្តីសុខជាមួយអ្វីខ្លះ? ថ្ងៃនេះ មិត្តភក្តិ និងគ្រូ យ៉ាងម៉េចដែរ? ថ្ងៃនេះ មិនចូលចិត្តអ្វីខ្លាំងបំផុត? បើសង្ស័យថា កូនត្រូវគេធ្វើបាប យើងអាចសន្ទនាជាប្រយោគងាយៗ ដូចជា ៖ បើមានអ្នកណាម្នាក់ធ្វើឱ្យកូនឈឺចាប់ ឬខូចចិត្ត កូនអាចរៀបរាប់ឱ្យប៉ាម៉ាក់ស្តាប់បាន ។ ហេតុនេះ ចូរឱ្យកូនរៀបរាប់រឿងរ៉ាវឱ្យយើងស្តាប់ដោយគ្មានការរអ៊ូរទាំ និងរិះគន់ ។

ចំណែកលោកគ្រូពេទ្យ Yongyut Wongpiromsant ទីប្រឹក្សានាយកដ្ឋានសុខភាពផ្លូវចិត្តនិយាយថា អាកប្បកិរិយាការ Bully នៅសាលារៀន គឺជាអាកប្បកិរិយាគំរាមកំហែងដោយប្រើពាក្យសម្តីធ្ងន់ធ្ងរ ហើយវានឹងប៉ះពាល់ដល់អ្នកត្រូវគេ Bully គឺធ្វើឱ្យពួកគេខ្វះទំនុកចិត្ត និងខ្វះមោទនភាពលើខ្លួនឯង ។ ទីបំផុត ពួកគេមានភាពសោកសៅ ប៉ុន្តែផលប៉ះពាល់ទាំងនេះ មិនបានកើតឡើងលើអ្នកត្រូវគេ Bully ទេ ប៉ុន្តែវាក៏កើតឡើងចំពោះអ្នក Bully គេផងដែរ ។

លោកគ្រូពេទ្យបន្តថា អ្នកត្រូវគេ Bully រឿយៗ គឺចុងក្រោយ អ្នកនោះនឹងក្លាយជាមនុស្សសោកសៅ ហើយអាចធ្វើបាបខ្លួនឯង ឬធ្វើបាបអ្នក Bully ។ នៅបរិវេណសាលារៀននីមួយៗ គួរជាទីកន្លែងមានសុវត្ថិភាពសម្រាប់កូនសិស្ស, គ្មានការប្រើអំពើហិង្សាលើផ្លូវកាយ និងពាក្យសម្តី ។ អ្វីដែលកើតឡើងចំពោះសិស្ស គ្រូបង្រៀនអាចមើលឃើញ និងដោះស្រាយបញ្ហា ព្រមទាំងលើកផលហេតុទៅសិស្សថា Bully គឺជាការគំរាមដោយពាក្យសម្តីដែលខ្លាំងជាងការប្រព្រឹត្តដោយផ្ទាល់ ។ វានឹងធ្វើឱ្យមានរបួសផ្លូវចិត្ត ដូចជា ៖ ការជំរិតទារប្រាក់ ឬវាយដំ ហើយនេះជាការប្រើហិង្សាមួយដែរ ។

លោកគ្រូពេទ្យថា ៖ «គ្រូត្រូវតែយកចិត្តទុកដាក់លើអាកប្បកិរិយារបស់សិស្សក្នុងថ្នាក់រៀន និងដោះស្រាយបញ្ហាភ្លាមៗ មិនមែនបណ្តោយឱ្យវារាលដាលខ្លាំងទេ ។ រីឯអ្នកឈរមើលមិត្តភក្តិត្រូវគេ Bully ចាត់ទុកថា ជាការធ្វេសប្រហែស ។ ហេតុនេះ គ្រូត្រូវប្រើជំនាញជីវិតអប់រំពួកគេ ដើម្បីឱ្យអ្នកឈរមើលគេ Bully នាំគ្នាចូលជួយមិត្ត, ជម្រាបឱ្យគ្រូជ្រាប ឬហាមមិត្តកុំឱ្យ Bully មិត្ត» ។

ចុងក្រោយ លោកគ្រូពេទ្យបញ្ជាក់ថា អ្នកដែលត្រូវគេ Bully ភាគច្រើនជាមនុស្សទន់ខ្សោយ និងមិនហ៊ានប្រឈមមុខជាមួយអ្នកដទៃ ។ ដូច្នេះ បើបានឃើញការ Bully នៅតាមសាលារៀន សូមឱ្យគ្រប់គ្នាជួយបញ្ឈប់ភ្លាមៗ ហើយពុំបាច់គិតពីទំនាក់ទំនងរវាងអ្នកត្រូវគេ Bully និងអ្នក Bully គេនោះទេ ៕