កាលពីថ្ងៃទី២៣ ខែធ្នូ ឆ្នាំ២០២៣ បើយោងទៅលើការបង្ហោះតាមរយៈគណនីផ្លូវការរបស់សម្តេចធីបតីហ៊ុន ម៉ាណែត ប្រមុខររាជរដ្ឋាភិបាលកម្ពុជានាពេលបច្ចុប្បន្នបានគូសបញ្ជាក់ថា បើយោងតាមតារាង FDI Standouts Watchlist 2024, ចន្លោះឆ្នាំ២០០៧-២០២២ កម្ពុជាបានឈរលើលេខរៀងទី១ នៃប្រទេសដែលមានសន្ទុះការវិនិយោគដោយផ្ទាល់ពីបរទេស (FDI) ដោយទទួលបានពិន្ទុ Index Score ៩៦.១១ លើ១០០។

កម្ពុជា ពោរពេញដោយសក្តានុពលសម្រាប់វិនិយោគជាច្រើនឥតគណនាសម្រាប់វិនិយោគិនធ្វើការបោះទុនវិនិយោគ ដោយហេតុថា កម្ពុជាបានរក្សាបាននូវស្ថិរភាពកំណើនសេដ្ឋកិច្ចក្នុងរង្វង់ ៧ភាគរយក្នុងមួយឆ្នាំ ដែលសម្រេចបាននូវវឌ្ឍនភាពលើគ្រប់វិស័យ ដោយទំហំផលិតផលក្នុងស្រុកសរុប (GDP) បានកើនឡើង ១០ដង ពី ៣.១១ពាន់លានដុល្លារក្នុងឆ្នាំ១៩៩៨ រហូតដល់ ២៩.៦០ពាន់លានដុល្លារនៅឆ្នាំ២០២២។ សន្ទុះនៃការវិនិយោគដោយផ្ទាល់ពីបរទេស (FDI) បានកើនឡើង ១៥ដងក្នុងចន្លោះឆ្នាំ២០០៧-២០២២ យោងតាមតារាង FDI Standouts Watchlist 2024, កម្ពុជាបានឈរលើលេខរៀងទី១ នៃប្រទេសដែលមានសន្ទុះការវិនិយោគដោយផ្ទាល់ពីបរទេស (FDI) ដោយទទួលបានពិន្ទុ Index Score ៩៦.១១ លើ១០០។

លើសពីនេះ កម្ពុជាជាប្រទេសពោរពេញទៅដោយកម្លាំងពលកម្មដែលមានវ័យក្មេង ប្រកបដោយសក្តានុពល និងជាកាតាលីករដ៏សំខាន់នៅក្នុងចរន្តសេដ្ឋកិច្ចជាតិ។ កម្ពុជាក៏បានធ្វើទំនើបកម្មហេដ្ឋារចនសម្ព័ន្ធរូបវន្តបានយ៉ាងល្អប្រសើរ រាប់ចាប់ពីអាកាសយានដ្ឋានអន្តរជាតិ កំពង់ផែទឹកជ្រៅ ផ្លូវគោក ផ្លូវទឹក ក៏ដូចជាប្រព័ន្ធឡូជីស្ទីក បូកផ្សំនឹងទីតាំងដ៏មានសក្តានុពលដែលផ្តល់នូវកាលានុវត្តភាពប្លែកពីគេសម្រាប់វិនិយោគ។

សន្តិភាពដែលកម្ពុជារកបាន និងរក្សាបាន ក៏ក្លាយជាឱកាសបន្ថែមដល់ការបើកចំហរជើងមេឃលើមាគ៌ាសេដ្ឋកិច្ចទីផ្សារសេរី ដើម្បីជំរុញដល់វិស័យដទៃទៀត ដូចជា ថាមពលកកើតឡើងវិញ កម្មន្តសាល ព្រមទាំងវិស័យទេសចរណ៍ ដែលជាគន្លឹះសេដ្ឋកិច្ចដ៏សំខាន់នៃកំណើនសេដ្ឋកិច្ចជាតិ។

ចំណែកឯវិស័យកម្មន្តសាល កម្ពុជាបានរៀបចំរចនាសម្ព័ន្ធច្បាស់លាស់ដើម្បីរក្សានូវថ្លៃដើមកម្លាំងពលកម្មសមរម្យ និងមានទីតាំងជាយុទ្ធសាស្ត្រ ដែលជាច្រកដ៏ល្អប្រសើរសម្រាប់ការនាំចេញទំនិញទៅកាន់ប្រទេសដទៃទៀតលើសកលលោក តាមរយៈកិច្ចព្រមព្រៀងពាណិជ្ជកម្មសេរីក្នុងតំបន់អាស៊ាន និងទ្វេភាគីជាច្រើនទៀត។

ចំពោះវិស័យដ៏មានសក្តានុពលដែលកំពុងមានសន្ទុះខ្លាំងក្លានៅកម្ពុជា គឺវិស័យអចលនទ្រព្យ ដោយបច្ចុប្បន្ន វិនិយោគិននឹងអាចពើបប្រទះទៅដោយសំណង់អគារ និងគម្រោងអភិវឌ្ឍន៍ជាច្រើនពាសពេញផ្ទៃប្រទេស។

ក្នុងយុទ្ធសាស្ត្របញ្ចកោណដែលបានដាក់ចេញដោយរាជរដ្ឋាភិបាល នីតិកាលទី៧ ក៏បានបន្ថែមនូវមុំយុទ្ធសាស្ត្រថ្មីបន្ថែមលើបច្ចេកវិទ្យា ដែលកំពុងតែសាយភាយលូតលាស់ពេញស្រទាប់យុវជនវ័យក្មេងរបស់កម្ពុជា ដោយអភិវឌ្ឍបាននូវប្រព័ន្ធឌីជីថលសម្រាប់ប្រើប្រាស់បានដ៏ល្អប្រសើរ។ រដ្ឋាភិបាលកម្ពុជា ក៏ប្តេជ្ញាធ្វើកំណែទម្រង់សេដ្ឋកិច្ច និងទស្សនទានច្បាស់លាស់ ក្នុងការសម្រេចបានជាប្រទេសដែលមានចំណូលមធ្យមកម្រិតខ្ពស់ក្នុងឆ្នាំ២០៣០ និងក្លាយជាប្រទេសដែលមានចំណូលខ្ពស់ក្នុង២០៥០។ មិនតែប៉ុណ្ណោះ តាមរយៈការព្យាករណ៍សេដ្ឋកិច្ចរបស់IMF ក៏បានបង្ហាញថា កម្ពុជាបានកើនឡើងនូវសេដ្ឋកិច្ចក្នុងរង្វង់ ៥.៦ភាគរយ ក្នុងឆ្នាំ២០២៣ ហើយនឹងកើនដល់ ៦.៦ភាគរយក្នុងឆ្នាំ២០២៤។

កម្ពុជាក៏បានត្រៀមខ្លួនរួចជាស្រេចដើម្បីស្វាគមន៍នូវវិនិយោគិនពីគ្រប់តំបន់លើសកលលោក ក្នុងការវិនិយោគនៅព្រះរាជាណាចក្រកម្ពុជា៕

សហរដ្ឋអាមេរិក៖ ទន្លេ និងស្ទ្រីមជាច្រើននៅតំបន់អាឡាស្កាបានប្រែទៅជាពណ៌ទឹកក្រូចភ្លឺយ៉ាងចម្លែក ដោយអ្នកវិទ្យាសាស្ត្រកំពុងស្វែងរកមូលហេតុពិតប្រាកដនៃបាតុភូតនេះ។

យោងតាមគេហទំព័រអន្តរជាតិ Scientific American ដែលបានចេញផ្សាយនៅថ្ងៃទី២៤ ខែធ្នូថា ក្នុងរយៈពេលប៉ុន្មានឆ្នាំចុងក្រោយនេះ អ្នកវិទ្យាសាស្ត្របានសង្កេតឃើញទន្លេ និងស្ទ្រីមជាច្រើនប្រែទៅជាពណ៌ទឹកក្រូចភ្លឺនៅក្នុងតំបន់អាក់ទិកនៃអាឡាស្កា ដែលការប្រែពណ៌នៃទន្លេ Salmon ហូរកាត់ឧទ្យានជាតិ Kobuk Valley គឺពិតជាគួរឱ្យព្រួយបារម្ភខ្លាំងណាស់។

យោងតាមប្រភពដដែលបានឱ្យដឹងទៀតថា ហេតុការណ៍នេះបានកើតឡើងចំពោះទន្លេ និងទឹកហូរពេញជួរភ្នំ Brooks ក្នុងរដ្ឋ Alaska ហើយទំនងជានឹងកើតឡើងនៅកន្លែងជាច្រើនទៀតនៅតំបន់អាក់ទិក។ លោក Patrick Sullivan អ្នកបរិស្ថានវិទ្យានៅសាកលវិទ្យាល័យ Alaska Anchorage និងសហការីរបស់គាត់ជឿថា មូលហេតុនៃការប្រែពណ៌នេះគឺមកពីការប្រែប្រួលអាកាសធាតុ នេះបើតាមលទ្ធផលស្រាវជ្រាវក៏បានបង្ហាញថាតំបន់អាក់ទិកកំពុងឡើងកម្តៅក្នុងអត្រាលឿនជាងពិភពលោក។ ដូច្នេះការកើនឡើងសីតុណ្ហភាពអាចធ្វើឱ្យ permafrost នៅក្នុងឧទ្យានជាតិរលាយបាន។

ទោះជាយ៉ាងណាក៏ដោយ អ្នកស្រាវជ្រាវមិនប្រាកដថា ដីរលាយអាចប្រែទៅជាពណ៌ទឹកក្រូចឬយ៉ាងណានោះទេ។ អ្នកជំនាញខ្លះជឿថា អាស៊ីតដែលចេញពីសារធាតុរ៉ែបានបញ្ចេញជាតិដែកពីថ្ម នៅពេលដែលដីល្បាប់មកប៉ះនឹងទឹកហូរ ឬខ្យល់ ទើបពួកវាប្រែទៅជាពណ៌ទឹកក្រូចបែបនេះ។ ដូច្នេះហើយ ការស្វែងយល់ពីមូលហេតុនៃបាតុភូតនេះមានសារៈសំខាន់ខ្លាំងណាស់ក្នុងការបង្កើនការយល់ដឹងអំពីផលប៉ះពាល់អេកូឡូស៊ី រួមទាំងហានិភ័យចំពោះសត្វព្រៃតាមដងទន្លេ និងសហគមន៍ដែលពឹងផ្អែកលើទឹកផងដែរ។ ហេតុនេះហើយ ដៃទន្លេជាច្រើននៃទន្លេ Wulik បានប្រែទៅជាពណ៌ទឹកក្រូច ដែលអាចប៉ះពាល់ដល់ភូមិរបស់អ្នកស្រុកចំនួន ៤៤៤ ដែលមានជំនាញក្នុងការនេសាទ និងទាញយកទឹកផឹកពីទន្លេ។

យោងតាមការស្ទាបស្ទង់ភូមិសាស្ត្រអាមេរិក (USGS) បានឱ្យដឹងដែរថា បច្ចុប្បន្នអ្នកវិទ្យាសាស្ត្រកំពុងធ្វើការសិក្សាមួយ ដោយពិនិត្យមើលទន្លេ និងអូរពណ៌ទឹកក្រូចនៅអាឡាស្កា ដែលការសិក្សានេះមានគោលបំណងសាកល្បងសម្មតិកម្មជាច្រើនអំពីមូលហេតុនៃបាតុភូត និងទំនាក់ទំនងរបស់វាទៅនឹងអាកាសធាតុក្តៅ និងដីរលាយ។ អ្នកជំនាញ USGS ក៏នឹងពិចារណាពីផលប៉ះពាល់លើគុណភាពទឹក និងប្រព័ន្ធអេកូឡូស៊ីផងដែរ៕

គេហទំព័រ Oddity Central បានសរសេរថា ក្រុមអ្នកវិទ្យាសាស្ត្រនៅប្រទេសដាណឺម៉ាក និងអាមេរិកបានសហការគ្នាបង្កើតគំរូបញ្ញាសិប្បនិម្មិតមួយឈ្មោះ Life2vec ។ បច្ចេកវិទ្យានេះនឹងទទួលបានការហ្វឹកហាត់ចំណេះដឹង និងប្រមូលលទ្ធផលមកពីព័ត៌មានជាច្រើន ដើម្បីទស្សន៍ទាយអំពីជីវិតមនុស្សជាច្រើនផ្នែក ក្នុងនោះវាមានសមត្ថភាពទស្សន៍ទាយពីពេលវេលាស្លា.ប់របស់មនុស្សផងដែរ ។

បើតាមរបាយការណ៍ស្រាវជ្រាវបញ្ជាក់ថា បច្ចេកវិទ្យា Life2vec ទទួលបានព័ត៌មានពីការកត់ត្រាផ្នែកសុខភាព និងទិន្នន័យផ្ទាល់ខ្លួនរបស់ពលរដ្ឋដាណឺម៉ាកចំនួន៦លាននាក់ ដូចជា ៖ ថ្ងៃខែឆ្នាំកំណើត, ទីកន្លែងសិក្សា, ការរៀនសូត្រ, អាសយដ្ឋាន និងព័ត៌មានសុខភាព ។ បន្ទាប់មក បច្ចេកវិទ្យានេះត្រូវបានគេហ្វឹកហាត់ឱ្យវាអាចទស្សន៍ទាយពីអ្វីដែលនឹងកើតឡើងនៅថ្ងៃអនាគត រួមទាំងការទស្សន៍ទាយថា មនុស្សម្នាក់ៗនឹងស្លា.ប់នៅពេលណា ។

ក្រុមអ្នកស្រាវជ្រាវបានបង្ហាញលទ្ធផលគួរឱ្យភ្ញាក់ផ្អើលមួយ នៅពេលបច្ចេកវិទ្យា Life2vec អាចទស្សន៍ទាយដឹងថា មនុស្សម្នាក់ៗនឹងស្លា.ប់នៅពេលណា ដោយសារផ្អែកតាមការវិភាគទិន្នន័យផ្សេងៗ ។ ជាក់ស្តែង មនុស្សមួយក្រុមមានអាយុចាប់ពី៣៥ឆ្នាំ ទៅ៦៥ឆ្នាំ ហើយមនុស្សពាក់កណ្តាលក្នុងចំណោមនេះ បានស្លាប់ចាប់ពីឆ្នាំ២០១៦ ដល់ឆ្នាំ២០២០ ហើយបច្ចេកវិទ្យានេះអាចទស្សន៍ទាយដឹងថា មនុស្សណាខ្លះដែលបានស្លាប់ ហើយមនុស្សណាទៀតនៅមានជីវិត ។ វាអាចទស្សន៍ទាយបានត្រឹមត្រូវរហូតដល់៧៨% ។

សាស្ត្រាចារ្យម្នាក់ឈ្មោះ Sune Lehmann Jorgensen ជាប្រធានដឹកនាំក្រុមស្រាវជ្រាវមកពីសាកលវិទ្យាល័យបច្ចេកទេសនៅដាណឺម៉ាកលើកឡើងថា គេបានហ្វឹកហាត់បច្ចេកវិទ្យា Life2vec តាមរយៈទិន្នន័យជាក់លាក់ គឺសំដៅដល់ទិន្នន័យបានពីពលរដ្ឋដាណាម៉ាក ។ ហេតុនេះ លទ្ធផលដែលទទួលបានអាចមិនដូចគ្នាទេ សម្រាប់អ្នករស់នៅប្រទេសផ្សេងទៀត ។ គេបានអភិវឌ្ឍន៍បច្ចេកវិទ្យានេះឡើងដើម្បីជាប្រយោជន៍ដល់មនុស្ស ប៉ុន្តែវាមិនគួរស្ថិតនៅក្រោមការគ្រប់គ្រងរបស់ក្រុមហ៊ុនមួយចំនួនទេ ដូចជា ក្រុមហ៊ុនធានារ៉ាប់រង ។

រីឯក្រុមអ្នកស្រាវជ្រាវលើកឡើងថា បើទោះជាការប្រើប្រាស់បច្ចេកវិទ្យា AI ប្រឈមនឹងបញ្ហាសីលធម៌ក្តី ប៉ុន្តែវាមានគុណសម្បត្តិល្អមួយ គឺការទស្សន៍ទាយពីការស្លា.ប់អាចជួយឱ្យគេការពារការស្លា.ប់មុនអាយុបាន ។ អ្នកស្រាវជ្រាវអាចរកឃើញពីផលប៉ះពាល់ដល់អាយុជីវិត ដោយសារការបំពេញការងាររបស់មនុស្សម្នាក់ៗ រួមទាំងហេតុការណ៍ផ្សេងៗដែលនឹងកើតឡើងក្នុងជីវិត ៕ ប្រភព ៖ chiangmai news

អង្គការសុខភាពពិភពលោក (WHO) បាននិយាយថាចំនួនករណីថ្មីនៃ COVID-19 បានកើនឡើង ៥២% ក្នុងរយៈពេល ៤ សប្តាហ៍ចុងក្រោយនេះ ជាមួយនឹងករណីថ្មីជាង ៨៥០,០០០ ត្រូវបានរាយការណ៍ក្នុងអំឡុងពេលនេះ។
យោងតាមអង្គការសុខភាពពិភពលោក (WHO) បាននិយាយនៅក្នុងសេចក្តីប្រកាសព័ត៌មានចុងក្រោយរបស់ខ្លួនថា ចំនួនអ្នកស្លាប់ថ្មីបានថយចុះ ៨% បើធៀបនឹងរយៈពេល ២៨ ថ្ងៃមុន ដែលមានអ្នកស្លាប់ថ្មីជាង ៣,០០០ នាក់ត្រូវបានរាយការណ៍។ WHO បានកត់សម្គាល់ថា គិតត្រឹមថ្ងៃទី ១៧ ខែធ្នូ ឆ្នាំ២០២៣ ករណីដែលបានបញ្ជាក់ជាង ៧៧២ លាននាក់ និងការស្លាប់ជិត ៧ លាននាក់ត្រូវបានរាយការណ៍នៅទូទាំងពិភពលោកចាប់តាំងពីការចាប់ផ្តើមនៃ COVID-19។

លើសពីនេះ WHO បាននិយាយទៀតថា ការសម្រាកព្យាបាលនៅមន្ទីរពេទ្យថ្មីនៃ COVID-19 ជាង ១១៨,០០០ និងបន្ទប់ថែទាំដែលពឹងផ្អែកខ្លាំងលើ ICU ថ្មីជាង ១៦០០ ត្រូវបានកត់ត្រា ដោយមានការកើនឡើងជារួម ២៣ ភាគរយ និង ៥១ ភាគរយរៀងគ្នានៅទូទាំងពិភពលោក។ ដូច្នេះ បច្ចុប្បន្ន WHO បានកំពុងតាមដានភស្តុតាងជាបន្តបន្ទាប់ ហើយនឹងធ្វើបច្ចុប្បន្នភាពការវាយតម្លៃហានិភ័យ JN.1 តាមតម្រូវការ។
ហេតុនេះហើយ វ៉ាក់សាំងបច្ចុប្បន្នបន្តការពារប្រឆាំងនឹងជំងឺធ្ងន់ធ្ងរ និងការស្លាប់ពី JN.1 និងវ៉ារ្យ៉ង់ដែលកំពុងចរាចរផ្សេងទៀតនៃ SARS-CoV-2 ដែលជាមេរោគដែលបណ្តាលឱ្យមាន COVID-19 ។

ទោះជាយ៉ាងណាក៏ដោយ កូវីដ-១៩ មិនមែនជាជំងឺផ្លូវដង្ហើមតែមួយគត់ដែលចរាចរនោះទេ។ គ្រុនផ្តាសាយ RSV និងជំងឺរលាកសួតទូទៅក្នុងវ័យកុមារក៏កំពុងកើនឡើងផងដែរ។ ហេតុដូច្នេះ អង្គការសុខភាពពិភពលោក (WHO) បានណែនាំឱ្យប្រជាជននៅទូទាំងពិភពលោកចាត់វិធានការដើម្បីការពារការឆ្លងមេរោគ និងជំងឺធ្ងន់ធ្ងរដោយប្រើឧបករណ៍មួយចំនួនរួមទាំង ការពាក់ម៉ាស ឬរបាំងពេលនៅកន្លែងដែលមានមនុស្សច្រើន ឬកន្លែងដែលមានខ្យល់ចេញចូលមិនសូវល្អ រក្សាគម្លាតសុវត្ថិភាពពីអ្នកដទៃ អនុវត្តសុជីវធម៌ផ្លូវដង្ហើមដោយបិទបាំងក្អក និងកណ្តាស់ សម្អាតដៃឱ្យបានទៀងទាត់ និងធ្វើតេស្តប្រសិនបើមានរោគសញ្ញាណាមួយកើតមិនប្រក្រតីមកលើអ្នក ក៏ដូចជាមិនត្រូវប៉ះពាល់ជាមួយអ្នកដែលមាន COVID-19 ឬគ្រុនផ្តាសាយឡើយ៕

ប្រទេសជប៉ុន ៖ កាលពីថ្ងៃទី២២ ខែធ្នូ ឆ្នាំ២០២៣ គេបានឃើញក្រុម Santa Claus មានចំនួនជិត៣០០នាក់មកចែកកាដូ និងជូនពរទៅកាន់អ្នកដំណើរនៅតាមផ្លូវ និងក្នុងហាងលក់ទំនិញនៅតំបន់ម៉ារូណូអ៊ូស៊ិ ដែលជាតំបន់អាជីវកម្ម និងទិញទំនិញដ៏ធំមួយនៅកណ្តាលទីក្រុងតូក្យូ ប្រទេសជប៉ុន ។

ក្រុម Santa Claus ភាគច្រើន គឺជាបុគ្គលិកធ្វើការក្នុងក្រុមហ៊ុននៅតំបន់ក្បែៗនេះ ។ ពួកគេបានយកកាដូជាច្រើនមកចែកឱ្យអ្នកដំណើរនៅតាមផ្លូវ ដើម្បីបង្កើតក្តីសប្បាយរីករាយឡើងវិញ ក្រោយពីការរៀបចំកម្មវិធីជួបជុំមនុស្សម្នាបានធ្លាក់ចុះនៅប្រទេសជប៉ុន ដោយសារជំងឺកូវីដ-១៩ ឆ្លងរាតត្បាតនាពេលកន្លងមក ។

អ្នករៀបចំកម្មវិធីលើកឡើងថា នៅឆ្នាំ២០២៣ មានអ្នកចូលរួមសរុបចំនួន២៩៤នាក់ ដែលពួកគេមកពីក្រុមហ៊ុនចំនួន៤១ ។ ក្រុម Santa Claus មកចូលរួមក្នុងកម្មវិធីនេះ ត្រូវបានបែងចែកជា៣ក្រុម ដូចជា ៖

-ក្រុមទី១ ៖ ជាក្រុមចែកវត្ថុតូចៗសម្រាប់តុបតែងដើមគ្រិស្តម៉ាសនៅតាមហាងទំនិញ
-ក្រុមទី២ ៖ ជាក្រុមឈររង់ចាំស្វាគមន៍មនុស្សម្នានៅខាងក្រៅហាងទំនិញ និងថតរូបផងដែរ
-ក្រុមទី៣ ៖ ជាក្រុមនាំគ្នាជួយរើសសំរាមនៅតាមដងផ្លូវ និងសម្អាតទីធ្លា

អ្នកនាង យូរិកាក់ អៃសាវ៉ាក់ ជាបុគ្គលិកធ្វើការក្នុងក្រុមហ៊ុនមួយនៅក្បែរតំបន់នេះបញ្ជាក់ថា សេចក្តីស្រឡាញ់ក្នុងពិធីបុណ្យគ្រិស្តម៉ាសរបស់នាង គឺជាកម្លាំងចិត្តដ៏ធំធេងដែលធ្វើឱ្យនាងសម្រេចចិត្តមកចូលរួមក្នុងពិធីនេះ ។ អ្នកនាងនិយាយថា ៖ «ខ្ញុំចូលចិត្តពិធីបុណ្យគ្រិស្តម៉ាសណាស់ ហើយខ្ញុំគិតថា វាជាការល្អប្រសើរ ប្រសិនបើខ្ញុំបានចូលរួមសប្បាយរីករាយជាមួយអ្នករស់នៅក្នុងទីក្រុងនេះ» ៕ ប្រភព ៖ TNN World

មានប្រទេសអ៊ឺរ៉ុបចំនួន ២ និងប្រទេសឈូងសមុទ្រចំនួន ៣ ត្រូវបានគេចាត់ទុកថាជាកន្លែងដ៏ល្អបំផុតក្នុងការវិនិយោគនៅឆ្នាំក្រោយលើផ្ទះល្វែងសម្រាប់ជួល។

យោងតាម “សន្ទស្សន៍នៃការវិនិយោគរបស់ Housearch” ដែលជាវេទិកាសេវាកម្មអចលនទ្រព្យ Housearch ដែលមានមូលដ្ឋាននៅទីក្រុងឌូបៃ (UAE) បានបង្ហាញថា ប្រទេសល្អបំផុតចំនួន ៥ សម្រាប់ការវិនិយោគអចលនទ្រព្យនៅឆ្នាំ ២០២៤ គឺអៀរឡង់ ស៊ីប អូម៉ង់ កាតា និងសហព័ន្ធអារ៉ាប់រួម។

សន្ទស្សន៍នេះបានចាត់ថ្នាក់ដោយផ្អែកលើពិន្ទុរួមនៃលក្ខណៈវិនិច្ឆ័យចំនួន ៤ សម្រាប់ទីផ្សារនីមួយៗ រួមមានប្រាក់ចំណេញនៃការវិនិយោគការជួល ស្ថិរភាពនយោបាយសង្គម កម្មសិទ្ធិអចលនទ្រព្យ និងអត្រាកំណើនសេដ្ឋកិច្ចរបស់ប្រទេស។ ដូច្នេះ នៅក្នុងចំណាត់ថ្នាក់ ប្រទេសអៀរឡង់មានពិន្ទុខ្ពស់ជាងគេបើធៀបនឹងប្រទេសផ្សេងទៀត នេះបើយោងតាមការិយាល័យស្ថិតិជាតិអៀរឡង់ បានឱ្យដឹងថា សេដ្ឋកិច្ចប្រទេសនេះបានកើនឡើងយ៉ាងខ្លាំងប្រមាណ ៩.៤% ក្នុងឆ្នាំ ២០២២ ខណៈដែលនៅឆ្នាំ ២០២៣ នេះត្រូវបានគេព្យាករណ៍ថានឹងធ្លាក់ចុះ ០.៩% ។

ទោះជាយ៉ាងណាក៏ដោយប្រសិទ្ធភាពនៃការវិនិយោគនៅទីនេះនៅតែល្អ ដោយសារ “សន្ទស្សន៍តម្លៃជួល” បានកើនឡើងយ៉ាងខ្លាំង ១០.៧% ក្នុងរយៈពេលដូចគ្នាក្នុងឆ្នាំ ២០២២ ដោយតម្លៃជួលប្រចាំខែជាមធ្យមនៃអចលនទ្រព្យទូទាំងប្រទេសគឺ ១,៨៨៤ ដុល្លារអាមេរិក ដែលនេះគឺជាត្រីមាសទី ១០ ជាប់ៗគ្នាដែលសន្ទស្សន៍បានកើនឡើង។

ចំណាត់ថ្នាក់ទីពីរ ប្រទេសស៊ីបត្រូវបានព្យាករណ៍ដោយគណៈកម្មការអឺរ៉ុប (EC) ថានឹងមានកំណើន GDP ២.២% ក្នុងឆ្នាំ ២០២៣។ ការវិនិយោគលើសំណង់លំនៅដ្ឋាន និងពាណិជ្ជកម្មកំពុងត្រូវបានគាំទ្រដោយកម្មវិធីឧបត្ថម្ភធនការប្រាក់របស់រដ្ឋាភិបាល និងលំហូរដើមទុនខ្លាំងពីក្រុមហ៊ុនបរទេស។ ទន្ទឹមនឹងនេះ វិស័យទេសចរណ៍បានងើបឡើងវិញយ៉ាងពេញលេញបន្ទាប់ពីជំងឺរាតត្បាត។ ដូច្នេះប្រាក់ចំណេញសរុបជាមធ្យមនៃការជួលអាផាតមិននៅប្រទេសស៊ីបបានឈានដល់ ៥.៥៣% ក្នុងត្រីមាសទីបីនៃឆ្នាំ ២០២៣ កើនឡើងពី ៥.១១% ក្នុងរយៈពេលដូចគ្នានៃឆ្នាំ ២០២២។

សម្រាប់តំណែងចំនួនបីដែលនៅសេសសល់ក្នុងកំពូលទាំង ៥ គឺប្រទេសអូម៉ង់ កាតា និងអារ៉ាប់រួម។ យោងតាមទស្សនាវដ្តីធុរកិច្ចអារ៉ាប់ បានឱ្យដឹងថា តំបន់ឈូងសមុទ្របានលេចចេញជាគោលដៅវិនិយោគដែលមានស្ថិរភាព និងអាចទុកចិត្តបាន ជាពិសេសនៅក្នុងបរិបទដែលជាទីផ្សារអចលនទ្រព្យនៅអឺរ៉ុប និងអាមេរិកខាងជើងបានចុះត្រជាក់ដោយសារការរំពឹងទុកអត្រាការប្រាក់ខ្ពស់ជាងក្នុងរយៈពេលយូរ។

លោក Mark Wilson ប្រធានផ្នែកស្រាវជ្រាវនៅ Housearch បាននិយាយថា លទ្ធផលវិជ្ជមានរបស់ Oman, Qatar និង UAE នៅក្នុងសន្ទស្សន៍ឆ្លុះបញ្ចាំងពីការបង្កើនទំនុកចិត្តរបស់វិនិយោគិននៅក្នុងតំបន់ឈូងសមុទ្រទាំងមូល។ លោកបានអត្ថាធិប្បាយថា “ជាមួយនឹងទិន្នផលការជួលសរុបចាប់ពី ៦% នៅក្នុងប្រទេសកាតាបានឡើងដល់ ១០% នៅក្នុងតំបន់មួយចំនួន ដែលទីផ្សារទាំងនេះផ្តល់នូវឱកាសដ៏ល្អសម្រាប់អ្នកដែលកំពុងស្វែងរកប្រាក់ចំណូលស្ថិរភាពនៅក្នុងបរិយាកាសសេដ្ឋកិច្ចបច្ចុប្បន្ន៕