គេហទំព័រ The Independent រាយការណ៍ថា ក្រុមអ្នកវិទ្យាសាស្ត្របានប្រទះឃើញពស់យក្សពូជថ្មីនៅតំបន់អាម៉ាហ្សូន ដែលគេធ្លាប់បានកត់ត្រាក្នុងឯកសារកាលពីមុន ។ អ្នកវិទ្យាសាស្ត្របញ្ជាក់ថា ពស់យក្សនេះអាចធំលូតលាស់បានប្រវែង៧,៥ម៉ែត្រ និងមានទម្ងន់រហូតដល់ជិត៥០០គីឡូក្រាម ។ ហេតុនេះ ធ្វើឱ្យវាក្លាយជាពស់យក្សដ៏ធំបំផុត និងធ្ងន់បំផុតនៅលើពិភពលោក ។

បច្ចុប្បន្ន មនុស្សលើពិភពលោក បានស្គាល់ពស់យក្សចំនួន៤ពូជ ហើយពូជពស់ដែលធំបំផុត គឺពស់យក្សពណ៌បៃតង ។ ពស់ប្រភេទនេះបានរស់នៅតំបន់ត្រូពិករបស់អាមេរិកខាងត្បូង ដូចជា ៖ អាងនៃទន្លេអាម៉ាហ្សូន Orinoco និងទន្លេ Ezequibo រួមទាំងរស់នៅតំបន់ប្រភពទឹកតូចៗមួយចំនួនទៀត ។

គេបានប្រទះឃើញពស់យក្សទាំងនេះនៅក្នុងទន្លេ និងតំបន់ដីសើមនៅអាមេរិកខាងត្បូង ។ គេដឹងច្បាស់ថា ពស់យក្សអាចបន្លាស់ទីក្នុងល្បឿនលឿន និងចាប់ចំណីបានលឿន ហើយវាបានចាប់រឹតសត្វផ្សេងៗដើម្បីឱ្យសត្វទាំងនេះដកដង្ហើមលែងបាន ។ បន្ទាប់មក ពស់យក្សក៏ចាប់ផ្តើមលេបចំណីចូលក្នុងពោះបន្តិចម្តងៗរហូតដល់អស់ ។

បើតាមការស្រាវជ្រាវមួយដែលបានធ្វើឡើងអស់រយៈពេលជាច្រើនឆ្នាំ និងបោះពុម្ភផ្សាយជាសាធារណៈបង្ហាញថា ពស់យក្សពណ៌បៃតងបានបន្តពូជខុសគ្នាពីពស់យក្សផ្សេងទៀត ។ រីឯអ្នកស្រាវជ្រាវបានសហការជាមួយជនជាតិដើមភាគតិច Waorani ដើម្បីសិក្សាពីគំរូពស់យក្សបៃតងនៅតំបន់ភាគខាងជើង ដែលពួកគេទើបតែដាក់ឈ្មោះថ្មីឱ្យពស់ជាច្រើនក្បាលនៅតំបន់អាម៉ាហ្សូន ។

គេបានប្រទះឃើញពស់យក្សថ្មីនេះ ក្នុងអំឡុងពេលការថតភាពយន្តឯកសាររបស់ National Geographic ដែលផ្សាយនៅលើ Disney ។ វាជាការរៀបចំឡើងដោយ Will Smith ជាអ្នកទទួលបានពានរង្វាន់អូស្កា ។ ក្នុងអំឡុងពេលក្រុមអ្នកវិទ្យាសាស្ត្រអុំទូកនៅតាមដងទន្លេអាម៉ាហ្សូន ពួកគេក៏បានថតរូបភាពពស់យក្សជាច្រើនក្បាលសុទ្ធតែជាពូជថ្មីៗ ខណៈពួកវាលាក់ខ្លួននៅក្នុងទឹករាក់ៗដើម្បីសម្ងំចាប់ចំណី ។

សាស្ត្រាចារ្យម្នាក់ឈ្មោះ Brian Fry មកពីសាកលវិទ្យាល័យ Queensland ដែលបានចូលរួមស្រាវជ្រាវសត្វព្រៃ និយាយថា ទំហំពស់យក្សទាំងនេះ គួរឱ្យភ្ញាក់ផ្អើលខ្លាំងណាស់ គឺពស់យក្សញី១ក្បាលដែលពួកយើងបានឃើញនេះ វាមានប្រវែងរហូតដល់៦,៣ម៉ែត្រ ។ លើសពីនេះ មានរបាយការណ៍ពីជនជាតិដើមភាគតិចថា ពស់យក្សផ្សេងទៀតមានប្រវែងរហូតដល់៧,៥ម៉ែត្រឯណោះ និងមានទម្ងន់ប្រមាណ៥០០គីឡូក្រាម ។

ពស់យក្សពូជថ្មីនេះ ត្រូវបានគេពន្យល់នៅក្នុងទស្សនាវដ្តី Diversity ថា វាបានបំបែកខ្លួនចេញពីពស់យក្សបៃតងដែលរស់នៅតំបន់ភាគខាងត្បូង កាលពីប្រមាណ១០លានឆ្នាំមុន ហើយវាមានភាពខុសប្លែកគ្នាផ្នែកបន្តពូជ រហូតដល់៥,៥% ។ អ្នកស្រាវជ្រាវបញ្ជាក់ថា ការប្រទះឃើញពស់យក្សដ៏ធំនេះ គឺជាជំហានសំខាន់ដើម្បីអភិរក្សពូជពស់យក្ស និងមានសារៈសំខាន់សម្រាប់ការរក្សាតុល្យភាពក្នុងប្រព័ន្ធអេកូឡូស៊ីរបស់ពួកវា ។

ចំណែកសាស្ត្រាចារ្យម្នាក់ទៀតឈ្មោះ Freak Wonk ជាមនុស្សម្នាក់ក្នុងចំណោមអ្នកប្រទះឃើញពស់យក្ស បានផ្សព្វផ្សាយវីដេអូមួយក្នុងអំឡុងពេលគាត់ហែលទឹកទន្ទឹមគ្នាជាមួយពស់យក្សដ៏គួរឱ្យខ្លាច ។ គាត់និយាយថា វាជាពស់យក្សធំបំផុតក្នុងចំណោមពស់យក្សផ្សេងទៀតដែលគាត់ធ្លាប់បានឃើញ គឺពស់១ក្បាលនេះមានប្រវែងរហូតដល់៨ម៉ែត្រ និងទម្ងន់២០០គីឡូក្រាម ៕

វៀតណាម៖ កាលពីពេលថ្មីៗនេះ តម្លៃអង្ករនាំចេញរបស់ប្រទេសវៀតណាមបានធ្លាក់ចុះយ៉ាងខ្លាំង មកត្រឹមកម្រិតទាបជាងតម្លៃអង្កររបស់ប្រទេសថៃ និងប៉ាគីស្ថាន បន្ទាប់ពីការកើនឡើងតម្លៃអង្ករកាលពីចុងសប្តាហ៍មុន។
យោងតាមទិន្នន័យពីសមាគមស្បៀងអាហារវៀតណាមបានបង្ហាញថា ក្នុងវគ្គជួញដូរនៅថ្ងៃទី ២២ ខែកុម្ភៈ ឆ្នាំ២០២៤ ការនាំចេញអង្ករបាក់ ៥% របស់ប្រទេសនេះបានធ្លាក់ចុះយ៉ាងខ្លាំងពី ៦៦៣ ដុល្លារក្នុងមួយតោន មកត្រឹម ៦០៩ ដុល្លារ/តោនវិញ ដោយតម្លៃអង្ករបាក់ ៥ ភាគរយបានធ្លាក់ចុះរហូតដល់ ៥៤ ដុល្លារក្នុងមួយតោន ស្មើនឹង ៨,១ ភាគរយ។

ជាមួយនឹងតម្លៃប្រតិបត្តិការខាងលើ វៀតណាមបានបាត់បង់ដំណែងនៃតម្លៃនាំចេញអង្ករខ្ពស់បំផុតរបស់ពិភពលោក នៅពេលដែលអង្ករបាក់ ៥% នៅក្នុងប្រទេសនេះកំពុងត្រូវបានផ្តល់ជូនសម្រាប់លក់ក្នុងតម្លៃ ៦១២ ដុល្លារ/តោន។ តម្លៃអង្ករបាក់ ២៥% របស់វៀតណាមក៏ធ្លាក់ចុះ ២០ ដុល្លារ/តោនផងដែរ ក្នុងវគ្គជួញដូរចុងក្រោយនេះ ដែលកត់ត្រាត្រឹម ៥៨៤ ដុល្លារ/តោន ខណៈអង្ករថៃធ្លាក់ចុះ ២ ដុល្លារ/តោន មកត្រឹម ៥៦១ ដុល្លារ/តោន និងអង្ករប៉ាគីស្ថាន ធ្លាក់ចុះ ៥ ដុល្លារ/តោន មកត្រឹម ៥៧០ ដុល្លារ/តោន។

ជាមួយនឹងអង្ករបាក់ ១០០% អង្ករវៀតណាមបានរក្សាស្ថិរភាពតម្លៃ ៥០៩ ដុល្លារ/តោន ខណៈអង្ករថៃកើនឡើងយ៉ាងខ្លាំងពី ១៩ ដុល្លារ/តោន ដល់ ៤៨៣ ដុល្លារ/តោន អង្ករប៉ាគីស្ថានកើនឡើង ១ ដុល្លារ/តោន ដល់ ៤៦៥ ដុល្លារ/តោន។ មូលហេតុនៃការធ្លាក់ចុះតម្លៃអង្ករត្រូវបានគេលើកឡើងដោយអាជីវកម្មដែលតម្រូវការពីអតិថិជនធំៗរបស់ឥណ្ឌូនេស៊ីបានធ្លាក់ចុះ។ ប្រទេសនេះកំពុងត្រៀមខ្លួនចូលក្នុងខែរ៉ាម៉ាដាន ហើយមុននេះបានបិទកិច្ចសន្យាចំនួន ៥០ ម៉ឺនតោននៅចុងខែមករា ជាចម្បងជាមួយប្រទេសវៀតណាម និងថ្មីៗនេះប្រហែល ២៣ ម៉ឺនតោនជាមួយប្រទេសថៃ។

ទន្ទឹមនឹងនោះ ការផ្គត់ផ្គង់នៅលើទីផ្សារក៏មានច្រើនដែរ ដោយសារវៀតណាម និងប្រទេសមួយចំនួនកំពុងឈានចូលដល់រដូវប្រមូលផលស្រូវថ្មី។ អាជីវករជឿថា ទំនោរធ្លាក់ចុះនៃតម្លៃស្រូវនឹងមិនមានរយៈពេលយូរទេ ដោយសារអាជីវកម្មដែលមានលក្ខខណ្ឌហិរញ្ញវត្ថុគ្រប់គ្រាន់នឹងនាំចូលទំនិញ បន្ទាប់មកលក់វានៅពេលរដូវប្រមូលផលបញ្ចប់។

ការព្យាករណ៍ពីមុនក៏បង្ហាញដែរថាតម្លៃអង្ករនាំចេញនឹងបន្តប្រែប្រួលក្នុងទិសដៅកើនឡើងនៅឆ្នាំ ២០២៤ ដោយសារការផ្គត់ផ្គង់តឹងតែង។ ខណៈកំណើនតម្រូវការនាំចូលរបស់ប្រទេសជាច្រើនដូចជា ឥណ្ឌូនេស៊ី និងហ្វីលីពីន នឹងបង្កើនតម្លៃអង្ករនាំចេញ។

បើយោងតាមស្ថិតិបឋមរបស់អគ្គនាយកដ្ឋានគយបានបង្ហាញថា កាលពីខែមករាកន្លងទៅ ប្រទេសរបស់វៀតណាមបាននាំចេញអង្ករគ្រប់ប្រភេទបានជាង ៥១២,០០០ តោន ដោយទទួលបានចំណូល ៣៦២,៣ លានដុល្លារអាមេរិក។ បើប្រៀបធៀបទៅនឹងខែដូចគ្នាកាលពីឆ្នាំមុន ការនាំចេញអង្កររបស់ប្រទេសនេះបានកើនឡើងចំនួន ៤២.៨% ក្នុងបរិមាណ ប៉ុន្តែតម្លៃបានកើនឡើងយ៉ាងខ្លាំង ៩៤.៥% ដោយសារតែតម្លៃទំនិញនេះឡើងខ្ពស់៕

ក្រុមហ៊ុន Amazon បានផ្ញើអ៊ីម៉ែលដាស់តឿនបុគ្គលិកថា ពួកគេមិនគួរប្រើប្រាស់បច្ចេកវិទ្យា Generative AI ពីខាងក្រៅមកជួយធ្វើការទេ ពីព្រោះវាជាព័ត៌មានសម្ងាត់របស់ក្រុមហ៊ុន ហើយក្រុមហ៊ុនបារម្ភអំពីការរក្សាសិទ្ធិ, ការលេចធ្លាយព័ត៌មាន និងព័ត៌មានក្លែងក្លាយ ។ បច្ចេកវិទ្យា Generative AI គឺប្រើប្រាស់សម្រាប់ស្វែងរកគំនិតបង្កើតមាតិកា ដើម្បីធ្វើ Marketing បានយ៉ាងងាយស្រួល និងឆាប់រហ័ស ។

សារព័ត៌មាន Business insider រាយការណ៍ថា ក្រុមហ៊ុន Amazon បានផ្ញើអ៊ីម៉ែលទៅកាន់បុគ្គលិករបស់ខ្លួនដើម្បីដាស់តឿនថា ពួកគេពុំគួរប្រើប្រាស់បច្ចេកវិទ្យា Generative AI ពីខាងក្រៅមកជួយធ្វើការងារទេ ជាពិសេស ទិន្នន័យសម្ងាត់របស់អតិថិជន និងបុគ្គលិកក្រុមហ៊ុន ដោយសារក្រុមហ៊ុនបារម្ភពីការលេចធ្លាយព័ត៌មាន, ការរំលោភកម្មសិទ្ធិ និងព័ត៌មានក្លែងក្លាយ ។

ក្រុមហ៊ុននេះលើកឡើងថា បើទោះជាបច្ចេកវិទ្យា Generative AI អាចជួយឱ្យបុគ្គលិកធ្វើការងារងាយស្រួលជាងមុនក្តី ប៉ុន្តែពួកគេពុំគួរប្រើប្រាស់វាសម្រាប់ការងារសម្ងាត់របស់ Amazon ទេ ។ ក្រុមហ៊ុនបារម្ភពីគោលនយោបាយផ្ទៃក្នុងរបស់ខ្លួនថា អ្នកផ្តល់សេវាបច្ចេកវិទ្យា Generative AI នៅខាងក្រៅក្រុមហ៊ុន អាចស្នើសុំសិទ្ធិប្រើប្រាស់ ឬសុំធ្វើជាម្ចាស់ទិន្នន័យដែលបុគ្គលិកបំពេញចូល ដូចជា ៖ កម្មវិធី ChatGPT របស់ក្រុមហ៊ុន OpenAI ជាដើម ។

កន្លងមក ធ្លាប់មានករណីបុគ្គលិកក្រុមហ៊ុន Amazon ប្រើប្រាស់កម្មវិធី ChatGPT ក្នុងការជួយសរសេរកូដ ហើយក្រោយមក គេកត់សម្គាល់ឃើញថា ចម្លើយរបស់ ChatGPT ស្រដៀងគ្នានឹងទិន្នន័យផ្ទៃក្នុងរបស់ Amazon ។ ហេតុនេះ ទើបក្រុមហ៊ុនប្រកាសឱ្យបុគ្គលិកគ្រប់រូបអនុវត្តតាមគោលនយោបាយស្តង់ដាររបស់ Amazon ពាក់ព័ន្ធនឹងទិន្នន័យដែលបំពេញក្នុង Generative AI ដោយប្រុងប្រយ័ត្ន ។

ទោះយ៉ាងណា បុគ្គលិកអាចប្រើប្រាស់បច្ចេកវិទ្យា AI ពីខាងក្រៅសម្រាប់ការងារបាន ដរាបណា ពួកគេទទួលបានការអនុម័តពីក្រុមហ៊ុន និងផ្នែកច្បាប់ ក៏ដូចជាបានឆ្លងកាត់ការត្រួតពិនិត្យសុវត្ថិភាព ។ រីឯអ៊ីម៉ែលដែលក្រុមហ៊ុននេះផ្ញើទៅបុគ្គលិក បញ្ជាក់ថា បុគ្គលិកមួយចំនួនអាចប្រើប្រាស់បច្ចេកវិទ្យា Bedrock របស់ក្រុមហ៊ុនបាន ព្រោះវាមានសុវត្ថិភាពជាង ។

ចំណែកអ្នកនាំពាក្យរបស់ក្រុមហ៊ុន Amazon ឈ្មោះ Adam Montgomery និយាយថា ក្រុមហ៊ុនបានអភិវឌ្ឍន៍បច្ចេកវិទ្យា AI ប្រកបដោយភាពច្នៃប្រឌិតអស់រយៈពេលយូរមកហើយ ខណៈបុគ្គលិកក៏បានប្រើប្រាស់បច្ចេកវិទ្យា AI របស់ Amazon ជារៀងរាល់ថ្ងៃ ។ ហេតុនេះ បច្ចេកវិទ្យារបស់ក្រុមហ៊ុនមានវិធានការទប់ស្កាត់ការប្រើប្រាស់បច្ចេកវិទ្យារបស់បុគ្គលិក និងការពារទិន្នន័យសម្ងាត់ ប៉ុន្តែការប្រើប្រាស់បច្ចេកវិទ្យាពីខាងក្រៅ គឺជាបញ្ហាគួរឱ្យបារម្ភសម្រាប់ក្រុមហ៊ុនអាជីវកម្ម ៕

លោក Mark Zuckerberg បានផ្តល់បទសម្ភាសន៍មួយពាក់ព័ន្ធនឹងជីវិតផ្ទាល់ខ្លួនថា កូនស្រីរបស់លោកគិតថា លោកធ្វើការនៅកសិដ្ឋានចិញ្ចឹមគោ ។ លោកទទួលស្គាល់ថា វាជារឿងពិបាកយ៉ាងខ្លាំងដើម្បីលោកអាចពន្យល់ពីការងាររបស់ខ្លួនប្រាប់ឱ្យកូនស្រីស្តាប់ និងងាយយល់ ។

កម្មវិធី Morning Brew Daily បានអញ្ជើញលោក Mark Zuckerberg ជានាយកគ្រប់គ្រង និងសហស្ថាបនិកក្រុមហ៊ុន Meta មកធ្វើជាភ្ញៀវកិត្តិយស ។ កម្មវិធីនេះបានលើកឡើងនូវប្រធានបទគួរឱ្យចាប់អារម្មណ៍ជាច្រើន ហើយប្រធានបទមួយក្នុងចំណោមនោះ គឺរឿងជីវិតផ្ទាល់ខ្លួនរបស់លោក Mark Zuckerberg ។

លោក Mark Zuckerberg និយាយថា កូនស្រីរបស់លោកគិតថា លោកធ្វើការផ្នែកបសុសត្វ ប៉ុន្តែការពិត វាគ្រាន់តែជាចំណង់ចំណូលរបស់លោកប៉ុណ្ណោះ ។ ទោះយ៉ាងណា លោកទទួលស្គាល់ថា វាជារឿងពិបាកដូចគ្នាដើម្បីពន្យល់កូនស្រីថា ការងារចម្បងរបស់លោក គឺការគ្រប់គ្រងក្រុមហ៊ុន Meta ពីព្រោះកូនស្រីនៅតូចណាស់ ។ ហេតុនេះ កូនស្រីពិបាកនឹងយល់ពីការងារដែលលោកធ្វើ ។ផ្ទុយទៅវិញ ការពន្យល់ពីការងារនៅក្នុងកសិដ្ឋានចិញ្ចឹមគោ ដើម្បីផលិតសាច់គោមានគុណភាពខ្ពស់តាមតម្រូវការរបស់លោក Mark Zuckerberg គឺជាអ្វីដែលងាយស្រួលយល់ ។ រីឯកូនស្រីរបស់លោក ក៏បានជួយដាំដើមឈើសម្រាប់ធ្វើជាចំណីគោ ហើយនាងបានថែទាំសត្វផ្សេងៗក្នុងកសិដ្ឋានផងដែរ ។ លោកប្រាប់ថា ៖ «ប្រសិនបើអ្នកជាកុមារ គឺវាជារឿងពិបាកខ្លាំងណាស់ដើម្បីយល់ថា តើក្រុមហ៊ុន Meta គឺជាអ្វី» ។

ការធ្វើការក្នុងកសិដ្ឋានចិញ្ចឹមគោរបស់លោក Mark Zuckerberg គ្រាន់តែជាចំណង់ចំណូលចិត្តមួយរបស់លោកប៉ុណ្ណោះ ។ លោកមានគោលបំណងផលិតសាច់គោមានគុណភាពខ្ពស់បំផុតនៅលើពិភពលោក ដើម្បីបរិភោគក្នុងក្រុមគ្រួសារ និងជាមួយមិត្តភក្តិប៉ុណ្ណោះ មិនមែនសម្រាប់ជួញដូរទេ ។

ចំណែកចំណង់ចំណូលចិត្តផ្សេងទៀត លោកប្រាប់ថា លោកចូលចិត្តការហាត់ក្បាច់គុន ។ គេបានឃើញលោកហ្វឹកហាត់ការប្រដាល់ជាមួយកីឡាករប្រដាល់អាជីព បន្ទាប់មក លោកបង្ហោះរូបភាពក្នុងបណ្តាញសង្គម រួមទាំងការទៅបង្ហាញខ្លួនក្នុងកម្មវិធីប្រដាល់ UFC ជាដើម ។

រីឯកសិដ្ឋានចិញ្ចឹមគោវិញ លោក Mark Zuckerberg បន្តថា លោកធ្លាប់បាននិយាយលេងជាមួយគ្រួសារថា បើលោកដល់ពេលចូលនិវត្តន៍ពីការងារក្រុមហ៊ុន Meta អ្វីដែលលោកចង់ធ្វើបន្តទៀតនោះ គឺការធ្វើកសិដ្ឋានចិញ្ចឹមគោ ។

បច្ចុប្បន្ន ក្រុមហ៊ុន Meta បានព្យាយាមអភិវឌ្ឍន៍ Metaverse ប៉ុន្តែពុំទាន់ទទួលបានប្រាក់ចំណេញច្រើនប៉ុន្មានទៀត បើធៀបជាមួយការវិនិយោគទុនចាប់តាំងពី Rebrand ពីហ្វេសប៊ុកទៅជា Meta ៕

ប្រទេសថៃ ៖ ម្ចាស់ក្រុមហ៊ុន Bangkok Airways លើកឡើងថា នៅឆ្នាំ២០២៣ ក្រុមហ៊ុនបានទទួលប្រាក់ចំណេញចំនួន៣.១១០លានបាត ដោយសារក្រុមហ៊ុនលក់សំបុត្រយន្តហោះថ្លៃជាងមុន គឺតម្លៃមធ្យមស្មើនឹង១៩% សម្រាប់កៅអីមួយ ។ នេះបើតាមការចុះផ្សាយរបស់សារព័ត៌មានថៃឈ្មោះ BrandCase កាលពីថ្ងៃទី២៣ ខែកុម្ភៈ ឆ្នាំ២០២៤ ។

ម្ចាស់ក្រុមហ៊ុន Bangkok Airways បានបង្ហាញពីប្រាក់ចំណូលនៅឆ្នាំ២០២៣ ថា ក្រុមហ៊ុនបានទទួលប្រាក់ចំណូលចំនួន២១.៧៣៣លានបាត និងទទួលបានប្រាក់ចំណេញចំនួន៣.១១០លានបាត ។ នេះចាត់ទុកថា នៅឆ្នាំ២០២៣ គឺជាឆ្នាំដំបូងគេ ដែលក្រុមហ៊ុន Bangkok Airways អាចរកបានប្រាក់ចំណេញ បើគិតចាប់តាំងពីឆ្នាំ២០២០ ដល់ឆ្នាំ២០២២ កន្លងមក គឺក្រុមហ៊ុនបានខាតដើមទុនរហូត ដោយសារជំងឺកូវីដ-១៩ ឆ្លងរាតត្បាត ។

វាឆ្លុះបញ្ចាំងឱ្យឃើញថា តម្រូវការប្រើប្រាស់សេវាកម្មរបស់ក្រុមហ៊ុនអាកាសចរណ៍ Bangkok Airways បានកើនឡើងខ្ពស់ ទើបធ្វើឱ្យក្រុមហ៊ុននេះអាចដំឡើងថ្លៃសំបុត្រយន្តហោះបានមួយកម្រិត ។ រីឯប្រាក់ចំណូលចម្បងដែលបានមកពីការលក់សំបុត្រយន្តហោះរបស់ក្រុមហ៊ុននេះ គឺជើងហោះហើរទៅ-មក នៅអាកាសយានដ្ឋានសាមុយ (Samui Airport) ខណៈអាកាសយានដ្ឋានសាមុយ មិនមែនជាអាកាសយានដ្ឋានរបស់រដ្ឋទេ ។

ប៉ុន្តែអាកាសយានដ្ឋានសាមុយ គឺជាអាកាសយានដ្ឋានដែលម្ចាស់របស់ក្រុមហ៊ុន Bangkok Airways បានកាន់កាប់ភាគហ៊ុន ដើម្បីវិនិយោគលើសិទ្ធិជួលអចលនទ្រព្យអាកាសយានដ្ឋាន (BAREIT) ។ ម្ចាស់របស់ក្រុមហ៊ុន Bangkok Airways បានកាន់កាប់ភាគហ៊ុន BAREIT ស្មើនឹង២៥% ។

ក្នុងរយៈពេល៩ខែដំបូងនៃឆ្នាំ២០២៣ ប្រាក់ចំណូលបានពីការធ្វើដំណើរទៅ-មក របស់អាកាសយានដ្ឋានសាមុយ ស្មើនឹង៤៤% នៃប្រាក់ចំណូលរបស់ក្រុមហ៊ុនអាកាសចរណ៍នេះទាំងអស់ ។ បើតាមទិន្នន័យរបស់វិទ្យុអាកាសចរណ៍បង្ហាញថា កាលពីថ្ងៃទី១៧ ខែកុម្ភៈ ឆ្នាំ២០២៤ អាកាសយានដ្ឋានសាមុយ មានចំនួនជើងហោះហើររហូតដល់៩៧ជើងឯណោះ ។

ហេតុនេះ ចំនួនជើងហោះហើរនៅអាកាសយានដ្ឋានសាមុយបានកើនឡើង បើធៀបនឹងខែកញ្ញា ឆ្នាំ២០២៣ ដែលពេលនោះ អាកាសយានដ្ឋានសាមុយ មានជើងហោះហើរប្រមាណតែ៦០ជើងប៉ុណ្ណោះក្នុង១ថ្ងៃ ។ ចំណែកជើងហោះហើរចំនួន៩៧ជើង ដែលបានចុះចតនៅអាកាសយានដ្ឋានសាមុយ គឺជាជើងហោះហើររបស់ក្រុមហ៊ុនអាកាសចរណ៍ Bangkok Airways ទាំងអស់ ៕

ជាការពិតណាស់ មនុស្សភាគច្រើនប្រាកដជាចង់ដឹងហើយថា នៅពេលដែលយើងផ្លាស់ក្នុងល្បឿនពន្លឺ តើនឹងមានអ្វីខ្លះកើតឡើងសម្រាប់ខ្លួនយើង? ល្បឿនពន្លឺ គឺជាល្បឿនដែលពន្លឺដាលឫរត់នៅក្នុងមជ្ឈដ្ឋានមួយ។ នៅក្នុងសុញ្ញកាស ល្បឿនពន្លឺមានតំលៃ ២៩៩ ៧៩២ និង ៤៥៨ m/s (ប្រហែល ៣សែនគីឡូម៉ែត្រក្នុងមួយវិនាទី)។ មានន័យថា ពន្លឺដាលពីព្រះអាទិត្យមកផែនដី ចំណាយពេល ៨នាទី ២០វិនាទី និងពីព្រះច័ន្ទមកផែនដីចំណាយពេល ២វិនាទី និងរត់ ៧ជុំកន្លះផែនដីក្នុងរយៈពេលតែ ១វិនាទីប៉ុណ្ណោះ។ ល្បឿនពន្លឺជាល្បឿនកំណត់ មានន័យថាអង្គធាតុដែលមានម៉ាស់ទាំងអស់មិនអាចធ្វើដំណើរលឿនជាងល្បឿនពន្លឺដាច់ខាត។

ដូច្នេះដើម្បីផ្លាស់ទីក្នុងល្បឿនពន្លឺ មនុស្សត្រូវស៊ូទ្រាំនឹងកម្លាំងបង្កើនល្បឿនដ៏ធំដែលអាចគំរាមកំហែងដល់អាយុជីវិត។ បញ្ហាដ៏ធំបំផុតដែលមនុស្សនឹងត្រូវប្រឈមដំបូងគេនោះគឺការឈានដល់ល្បឿននៃពន្លឺ នៅពេលដែលយើងឈានដល់ល្បឿនពន្លឺរាងកាយរបស់យើង នឹងចុះខ្សោយភ្លាមៗ ដែលជាហេតុបណ្តាលឱ្យមានរបួសធ្ងន់ធ្ងរឬដួលសន្លប់ភ្លាមៗជាដើម។ ប្រសិនបើកម្លាំងនៃផលប៉ះពាល់មិនត្រូវបានកាត់បន្ថយ ឬបញ្ឈប់ទេនោះ អ្នកនឹងស្លាប់ជាយថាហេតុ ដោយសារតែរាងកាយរបស់អ្នកត្រូវបានបង្អត់អុកស៊ីសែន ដែលដឹកជញ្ជូនតាមឈាម។

ជាទូទៅមនុស្សភាគច្រើនអាចទប់ទល់នឹងកម្លាំងបង្កើនល្បឿនប្រហែល ៤ – ៦ ដងនៃទំនាញផែនដីក្នុងរយៈពេលខ្លី។ នៅពេលដែលមនុស្សផ្លាស់ទីក្នុងល្បឿនពន្លឺដ៏លឿនបំផុតនោះ សមត្ថភាពរាងកាយរបស់មនុស្សក្នុងការចរាចរឈាមពីជើងទៅក្បាលគឺមានកម្រិត ដែលធ្វើឱ្យវាពិបាកសម្រាប់ឈាមដើម្បីបូមទៅអវយវៈ ហើយរាងកាយរបស់យើងអាចនឹងខ្ទេចភ្លាមៗក្នុងរយៈពេលខ្លី នេះបើយោងតាម Space។ ទោះជាយ៉ាងណាក៏ដោយ លោក Michael Pravica សាស្ត្រាចារ្យរូបវិទ្យានៅសាកលវិទ្យាល័យ Nevada នៃទីក្រុង Las Vegas សហរដ្ឋអាមេរិក បាននិយាយថា ការឈានដល់ល្បឿនដ៏ធំនោះគឺមិនអាចទៅរួចទេ។

ទ្រឹស្តីពិសេសនៃទំនាក់ទំនងរបស់អាញ់ស្តាញបង្ហាញថា នៅពេលដែលវត្ថុដែលមានម៉ាស់ជិតដល់ល្បឿនពន្លឺ ម៉ាស់របស់វានឹងចាប់ផ្តើមកើនឡើង។ ប្រសិនបើវត្ថុមួយឈានដល់ល្បឿននៃពន្លឺ វានឹងក្លាយទៅជាធំខ្លាំង ហើយត្រូវការថាមពលគ្មានកំណត់ ដើម្បីរក្សាល្បឿនរបស់វា។ Pravica ក៏បានបន្តទៀតថា ប្រសិនបើអ្នកអាចធ្វើដំណើរជិតល្បឿនពន្លឺ នោះអ្នកនឹងជួបប្រទះឥទ្ធិពលទាក់ទងគ្នាតាមពេលវេលា ហើយពេលវេលាអាចនឹងដើរយឺតជាងអ្វីដែលយើងគិត៕

វៀតណាម៖ ឈូងសមុទ្រ Ha Long របស់ប្រទេសវៀតណាម ត្រូវបានគេផ្តល់កិត្តិយសឱ្យជាប់ចំណាត់ថ្នាក់លេខ ២ ក្នុងគោលដៅទេសចរណ៍ធម្មជាតិដ៏ស្រស់ស្អាតបំផុតទាំង ២៥ នៅលើពិភពលោក នេះបើយោងតាមការប្រកាសរបស់ Tripadvisor ដែលចេញផ្សាយនៅថ្ងៃទី២៣ ខែកុម្ភៈ ឆ្នាំ២០២៤។ឆ្នេរសមុទ្រហាឡុងគឺជាគោលដៅដ៏ល្បីល្បាញ ជាមួយនឹងធម្មជាតិដែលមានកោះថ្មកំបោររាប់ពាន់មានរាងខុសៗគ្នា មានល្អាងជាច្រើនដែលត្រូវរុករកដូចជា ល្អាងធៀនគុង គុហាស៊ុងសត និងល្អាងតាមគង់។ សកម្មភាពបទពិសោធន៍នៅឈូងសមុទ្រដែលស្នើដោយ Tripadvisor រួមមានការទិញដំណើរកម្សាន្តតាមទូក និងចំណាយពេលមួយយប់នៅឈូងសមុទ្រ ជិះទូកកាយ៉ាក់ ទស្សនារូងភ្នំដ៏ល្បីល្បាញ និងរីករាយជាមួយអាហារសមុទ្រដ៏ល្អប្រណិត។

ឈូងសមុទ្រ Ha Long ស្ថិតនៅក្នុងខេត្ត Quang Ninh ប្រទេសវៀតណាម ដែលភ្ញៀវទេសចរអន្តរជាតិជាច្រើនស្គាល់ថាជាតំបន់បេតិកភណ្ឌធម្មជាតិពិភពលោកមួយដែលត្រូវបានទទួលស្គាល់ដោយអង្គការយូណេស្កូ។ សម្រាប់គោលដៅអាស៊ីផ្សេងទៀតក៏ស្ថិតនៅកំពូលផងដែរ រួមមាន Tangalle ដែល Tripadvisor ហៅថា “ត្បូងលាក់របស់ស្រីលង្កា” និងវាលខ្សាច់ Wadi Rum របស់ហ្ស៊កដានី ក៏ដូចជាកោះ Lombok ក្នុងប្រទេសឥណ្ឌូនេស៊ី រួមទាំងកំពូល ២៥ គឺជារដ្ឋធានី Kathmandu របស់ប្រទេសនេប៉ាល់ ដែលព័ទ្ធជុំវិញដោយជ្រលងភ្នំដែលមានទីតាំងប្រវត្តិសាស្ត្រជាច្រើនដែលមានភូមិ និងប្រាសាទបុរាណ។

ពីមុនឆ្នេរសមុទ្រហាឡុង ក៏ត្រូវបាន Tripadvisor ផ្តល់កិត្តិយសក្នុងចំណាត់ថ្នាក់ World’s Leading Trend Destination 2023 ដែលជាប់ចំណាត់ថ្នាក់ទីបី បន្ទាប់ពីទីក្រុងតូក្យូ ប្រទេសជប៉ុន និងទីក្រុងសេអ៊ូល ប្រទេសកូរ៉េ។លក្ខណៈវិនិច្ឆ័យនៃការជ្រើសរើសគឺផ្អែកលើតម្រូវការដូចជាគោលដៅដែលមានទេសភាពធម្មជាតិដ៏ស្រស់ស្អាត និងអស្ចារ្យ អ្នកទេសចរអាចជ្រមុជខ្លួននៅក្នុងធម្មជាតិបានយ៉ាងងាយស្រួល និងនាំមកនូវអារម្មណ៍រីករាយ។

គួរបញ្ជាក់ដែរថា Tripadvisor គឺជាក្រុមហ៊ុនអាមេរិកដែលប្រតិបត្តិការភ្នាក់ងារទេសចរណ៍អនឡាញដ៏ធំបំផុតរបស់ពិភពលោក និងជាគេហទំព័រសម្រាប់ភ្ញៀវទេសចរធ្វើការបោះឆ្នោតដោយសេរីនូវទិសដៅដែលពួកគេស្រឡាញ់ចូលចិត្ត។ ហេតុនេះហើយ ការជ្រើសរើសអ្នកធ្វើដំណើរល្អបំផុតនៃប្រភេទបោះឆ្នោតល្អបំផុតនឹងត្រូវបានប្រកាសជាបន្តបន្ទាប់ពេញមួយឆ្នាំ ជំនួសឱ្យពេលតែមួយ៕