ប្រទេសឥណ្ឌា ៖ ក្រុមហ៊ុន Starbucks គ្រោងពង្រីកសាខានៅប្រទេសឥណ្ឌា ចំនួន១.០០០កន្លែងក្នុងឆ្នាំ២០២៨ ក្រោយពីពលរដ្ឋឥណ្ឌាមានជីវភាពមធ្យមនិយមផឹកកាហ្វេកាន់តែច្រើន ។ ការពង្រីកសាខានេះ នឹងធ្វើឱ្យប្រទេសឥណ្ឌាក្លាយជាទីផ្សារកាហ្វេក្រៅប្រទេសដ៏ធំមួយរបស់ក្រុមហ៊ុន Starbucks ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី៩ ខែមករា ឆ្នាំ២០២៤ ។

សារព័ត៌មានបរទេសរាយការណ៍ថា ក្រុមហ៊ុន Starbucks មានផែនការពង្រីកសាខានៅប្រទេសឥណ្ឌា លើសមុនទ្វេដងក្នុងរយៈពេល៤ឆ្នាំ ដោយសារចំនួនពលរដ្ឋឥណ្ឌាមានជីវភាពមធ្យមកើនឡើង និងជំរុញឱ្យមានការផឹកកាហ្វេកាន់តែច្រើន ។

ក្រុមហ៊ុនកាហ្វេលំដាប់ពិភពលោក ថ្លែងថា ក្រុមហ៊ុននឹងពង្រីកសាខានៅឥណ្ឌា ឱ្យបាន១.០០០កន្លែងនៅឆ្នាំ២០២៨ និងពង្រីកហាងកាហ្វេលក់២៤ម៉ោងផងដែរ ។ ក្រុមហ៊ុនសង្ឃឹមថា នឹងមានបុគ្គលិកឥណ្ឌាធ្វើការក្នុងហាងកាហ្វេ រហូតដល់៨.៦០០នាក់ ។

ទឹកតែ ជាពិសេស តែទឹកដោះគោឥណ្ឌា បានក្លាយជាភេសជ្ជៈដ៏ពេញនិយមនៅឥណ្ឌា ប៉ុន្តែការផឹកកាហ្វេទទួលបានការពេញនិយមកាន់តែខ្លាំងពីអតិថិជន ។ បច្ចុប្បន្ន អតិថិជនឥណ្ឌាបានមកកាន់ហាងកាហ្វេកាន់តែច្រើន ។ ក្រៅពីកាហ្វេ Starbucks ហាងកាហ្វេល្បីៗ និងហាងកាហ្វេក្នុងស្រុក ដូចជា Blue Tokai ក៏បានពង្រីកសាខាជាច្រើនដែរនៅឥណ្ឌា ។ រីឯគ្រឿងផ្សំភាគច្រើនដែលពួកគេយកមកលក់ ភាគច្រើនបានមកពីដំណាំដាំដុះក្នុងស្រុក ។

Lakshman Narasimhan ជានាយកក្រុមហ៊ុន Starbucks លើកឡើងថា ៖ «ក្នុងរយៈពេល១១ឆ្នាំកន្លងមក ការលក់កាហ្វេ Starbucks នៅឥណ្ឌាបានរីកចម្រើនខ្លាំងបំផុត ដោយសារចំនួនពលរដ្ឋមានជីវភាពមធ្យមកើនឡើង ។ ដូច្នេះ យើងរីករាយក្នុងការចូលទីផ្សារនេះ និងផ្សព្វផ្សាយពីវប្បធម៌ផឹកកាហ្វេ» ។

គួរបញ្ជាក់ថា ក្រុមហ៊ុន Starbucks បានដំណើរការនៅឥណ្ឌាតាំងពីឆ្នាំ២០១២ ដោយវិនិយោគជាមួយក្រុមហ៊ុន Tata Consumer Products Ltd. ។ បច្ចុប្បន្ន Starbucks មានសាខានៅឥណ្ឌា ចំនួន៣៩០កន្លែង ក្នុងទីក្រុងចំនួន៥៤ ។ រីឯប្រាក់ចំណូលគិតត្រឹមថ្ងៃទី៣០ ខែកញ្ញា ឆ្នាំ២០២៣ បានកើនឡើង១៤% បើធៀបនឹងឆ្នាំ២០២២ ។

គោលដៅពង្រីកសាខាកាហ្វេនៅឥណ្ឌាឱ្យបានចំនួន១.០០០កន្លែងនេះ អាចធ្វើឱ្យឥណ្ឌាក្លាយជាទីផ្សារមួយដ៏ធំនៅក្រៅប្រទេសរបស់ក្រុមហ៊ុន Starbucks ខណៈបច្ចុប្បន្ន ឥណ្ឌាមានសាខា Starbucks តិចជាងប្រទេសចិន ដែលមានសាខារហូតដល់៦.៥០០កន្លែង ៕

ប្រទេសថៃ ៖ កាលពីថ្ងៃទី៩ ខែមករា ឆ្នាំ២០២៤ មហាជនថៃបានចែកចាយវីដេអូមួយក្នុងបណ្តាញសង្គម ដែលក្នុងវីដេអូនេះបង្ហាញពីព្រះចៅអធិការវត្តកំពុងអង្គុយសូត្រធម៌ជាមួយព្រះសង្ឃជាច្រើនអង្គទៀតក្នុងព្រះវិហារ ។ ក្នុងអំឡុងពេលសូត្រធម៌នោះ ស្រាប់តែព្រះចៅអធិការវត្តបានក្រោកឈរឡើង រួចដើរទៅទះក្បាលលោកនេន១អង្គជាច្រើនដៃ និងធាក់១ជើង ដែលបណ្តាលឱ្យឮសំឡេងខ្លាំងពេញព្រះវិហារ ។

ហេតុការណ៍នេះបានកើតឡើងនៅពេលព្រះចៅអធិការវត្តបាននាំព្រះសង្ឃជាច្រើនអង្គអង្គុយសូត្រធម៌នៅពេលល្ងាច ។ ក្រោយពីរឿងនេះបានបង្ហោះក្នុងបណ្តាញសង្គម ធ្វើឱ្យមហាជនថៃជាច្រើននាក់រិះគន់ពីទង្វើពុំសមរម្យរបស់ព្រះអង្គ ដោយមតិមួយចំនួនលើកឡើងថា វាជាទង្វើជ្រុលហួសហេតុពេក ។ក្រុមការងារសារព័ត៌មានបានធ្វើដំណើរទៅកាន់វត្តនេះ និងជជែកជាមួយព្រះចៅអធិការវត្តណងគង់ និងជាប្រធានសង្ឃប្រចាំខេត្តខនកែន ព្រះនាម ថេវិសុទ្ធីគុណ ព្រមទាំងលោកនេន អាយុ១៤ឆ្នាំ ។ ព្រះចៅអធិការវត្ត ព្រះនាម ថេវិសុទ្ធីគុណ មានសង្ឃដីកាថា បាននាំព្រះសង្ឃ និងលោកនេន អង្គុយសូត្រធម៌ពេលល្ងាច ក្នុងនោះមានលោកនេន អាយុ១៤ឆ្នាំ មកសូត្រធម៌ក្នុងព្រះវិហារដែរ ហើយការសូត្រធម៌នេះ ព្រះអង្គបាន Live ក្នុងហ្វេសប៊ុក ។

ក្នុងអំឡុងពេលសូត្រធម៌ មានអ្នកចូលមើលការ Live ផ្ញើសារមកប្រាប់ព្រះចៅអធិការវត្តថា ៖ «មានលោកនេន១អង្គដេកលក់» ។ ហេតុនេះ ព្រះអង្គក៏ក្រោកឈរឡើង និងដើរទៅទះត្រង់កលោកនេន១ដៃ មិនមែនទះក្បាលដូចមហាជនលើកឡើងនោះទេ ។ ពេលព្រះអង្គទះកលោកនេនរួច ព្រះអង្គក៏សូត្រធម៌បន្តទៀត ។

ព្រះចៅអធិការវត្តបន្តថា ជាធម្មតា បើលោកនេនប្រព្រឹត្តខុសវិន័យសង្ឃ ព្រះអង្គនឹងដាក់ទោស ។ រីឯអ្នករិះគន់ពីទង្វើនេះ ពួកគេគួរតែមកសួរព្រះអង្គថា តើមានរឿងអ្វីកើតឡើង? មិនមែនយកវីដេអូនេះទៅបង្ហោះក្នុងបណ្តាញសង្គម ហើយធ្វើឱ្យមានមតិរិះគន់ព្រះអង្គបែបនេះទេ ។

ព្រះចៅអធិការវត្តមានសង្ឃដីកាថា ៖ «ពេលអាត្មាកំពុង Live ផ្ទាល់ពីការសូត្រធម៌ក្នុងព្រះវិហារ ស្រាប់តែលោកនេនដេកលក់ ហើយអាត្មាប្រាប់ថា ភ្ញាក់ឡើង ព្រោះយើងកំពុង Live ក្នុងបណ្តាញសង្គម តែលោកនេនមិនព្រមភ្ញាក់ ។ ដូច្នេះ អាត្មាក៏ដើរទៅទះកតែម្តង» ។

រីឯលោកនេនដែលត្រូវបានព្រះចៅអធិការវត្តទះនោះ ក៏បានទៅថ្វាយបង្គំព្រះចៅអធិការវត្ត និងមានសង្ឃដីកាថា ចាប់ពីពេលនេះតទៅ នឹងមិនដេកលក់ទៀតទេពេលសូត្រធម៌ ។ បើថ្ងៃក្រោយ លោកនេនដេកលក់ទៀត នឹងយល់ព្រមទទួលទោស ។

អ្នកស្រី ឆាង៉ាវ៉ាត់ ឆារ៉ា ជាអ្នកភូមិនិយាយថា ព្រះចៅអធិការវត្ត គឺជាមនុស្សច្បាស់លាស់ ហើយព្រះសង្ឃគ្រប់អង្គក្នុងវត្តត្រូវតែគោរពតាមវិន័យយ៉ាងតឹងរ៉ឹង ។ ហេតុនេះ អ្នកស្រីគិតថា វាជារឿងធម្មតា ហើយការទះលោកនេនបណ្តាលឱ្យឮសំឡេងខ្លាំងបែបនេះ អាចបណ្តាលមកពីសូត្រធម៌ក្នុងព្រះវិហារ ។ បើទោះជាធ្វើអ្វីមួយ ឬនិយាយស្តីអ្វីបន្តិច វានឹងមានសំឡេងខ្ទរមកវិញ ហើយធ្វើឱ្យវីដេអូទះលោកនេន មើលទៅមានសភាពធ្ងន់ធ្ងរ ៕

បរទេស៖ ការលក់ iPhone របស់ក្រុមហ៊ុន Apple នៅក្នុងប្រទេសចិនបានធ្លាក់ចុះយ៉ាងខ្លាំងក្នុងសប្តាហ៍ទីមួយនៃឆ្នាំ ២០២៤ ដោយសារតែសម្ពាធនៃការប្រកួតប្រជែងក្នុងស្រុកជាមួយក្រុមហ៊ុន Huawei ។

យោងតាមគេហទំព័រអន្តរជាតិ CNBC ដែលបានចុះផ្សាយនៅថ្ងៃទី៩ ខែមករាថា ក្រុមហ៊ុន Apple គឺជាក្រុមហ៊ុនតែមួយគត់ដែលមានការធ្លាក់ចុះនៃការលក់នៅក្នុងប្រទេសចិននៅដើមឆ្នាំជាមួយនឹងការថយចុះរហូតដល់ ៣០% ។ ទន្ទឹមនឹងនេះដែរ ក្រុមហ៊ុនស្មាតហ្វូនឈានមុខគេផ្សេងទៀតនៅក្នុងទីផ្សារនេះកំពុងតែរីកចម្រើន ជាពិសេសក្រុមហ៊ុន Huawei ជាមួយនឹងត្រកូលស្មាតហ្វូន Mate 60 ដែលបានដាក់លក់នៅខែកញ្ញា ឆ្នាំ ២០២៣។

ដូច្នេះហើយ បច្ចុប្បន្នការលក់ iPhone កំពុងធ្លាក់ចុះជាបន្តបន្ទាប់ បើទោះបីជាក្រុមហ៊ុនបានកែសម្រួលតម្លៃ iPhone ជាច្រើនម៉ូដែល តាមរយៈបណ្តាញអនឡាញក្នុងប្រទេសចិន ដូចជា iPhone 15 Pro និង 15 Pro Max ជាមួយនឹងការបញ្ចុះតម្លៃ ១៦% ក្នុងសប្តាហ៍ដំបូងនៃឆ្នាំនេះក៏ដោយ ក៏ការលក់នៅតែបន្តធ្លាក់ចុះយ៉ាងខ្លាំងដដែល។

នេះបើតាមស្ថិតិពីក្រុមហ៊ុនស្រាវជ្រាវទីផ្សារ Jeffries បាននិយាយថា តួលេខ ៣០% គឺខ្ពស់ជាងរយៈពេលដូចគ្នាក្នុងឆ្នាំ ២០២៣ រហូតទៅដល់ ១០ ដងឯណោះ។ ក្នុងសប្តាហ៍ដំបូងនៃឆ្នាំមុន ការលក់របស់ក្រុមហ៊ុន Apple នៅក្នុងប្រទេសចិនបានថយចុះត្រឹមតែ ៣% ប៉ុណ្ណោះ។ ប៉ុន្តែសម្រាប់ការលក់ iPhone ក្នុងឆ្នាំ ២០២៤ វិញបានធ្លាក់ចុះរហូតទៅដល់ ៣០% ដែលធ្វើឱ្យក្រុមហ៊ុននេះប្រឈមមុខនឹងការប្រកួតប្រជែងខ្លាំងពីគូប្រជែងរបស់ចិន។

Jeffries ក៏បានប៉ាន់ប្រមាណដែរថាក្រុមហ៊ុន Huawei បាននាំចេញស្មាតហ្វូនចំនួន ៣៥ លានគ្រឿងកាលពីឆ្នាំមុន ហើយនឹងកើនឡើងក្នុងពេលខាងមុខនេះ ខណៈដែលក្រុមហ៊ុន Apple នឹងបន្តប្រឈមមុននឹងការលំបាកបន្ថែមទៀតនៅឆ្នាំនេះ ដោយសារតែប្រទេសចិនត្រូវបានគេរំពឹងថានឹងពង្រឹងបទប្បញ្ញត្តិហាមឃាត់ការប្រើប្រាស់ iPhone នៅទីភ្នាក់ងាររដ្ឋាភិបាល និងក្រុមហ៊ុនគ្រប់គ្រងដោយរដ្ឋ៕

តាមការស្រាវជ្រាវរបស់សហរដ្ឋអាមេរិក បានរកឃើញថា ទឹកបរិសុទ្ធ ១ លីត្រដែលរក្សាទុកក្នុងដបប្លាស្ទិកមានភាគល្អិតប្លាស្ទិកមីក្រូទស្សន៍ជាមធ្យមចំនួន ២៤០,០០០ ដុំ។ ភាគល្អិតប្លាស្ទិកមីក្រូទស្សន៍ គឺជាភាគល្អិតតូចៗដែលមានអង្កត់ផ្ចិតតិចជាងប្រាំមីលីម៉ែត្រដែលវាមានសារធាតុបំពុលនិងមានគ្រោះថ្នាក់បំផុតចំពោះបរិស្ថាន និងសុខភាពសត្វ។

មីក្រូប្លាស្ទីកនេះជាទូទៅកើតចេញពីការអភិវឌ្ឍន៍ផលិតផលពាណិជ្ជកម្ម និងការបំបែកប្លាសស្ទិចធំៗ។ នេះបើតាមការចុះផ្សាយនៅថ្ងៃទី៨ ខែមករាក្នុងទស្សនាវដ្ដី Proceedings of National Academy of Sciences បានឱ្យដឹងថា ចំនួនភាគល្អិតដែលនៅក្នុងដបទឹកបរិសុទ្ធនេះគឺខ្ពស់ជាងការប៉ាន់ស្មានពីមុនពី ១០ ទៅ ១០០ ដងឯណោះ។

យោងតាមអ្នកជំនាញ ភាគល្អិត microplastic មានសមត្ថភាពជ្រាបចូលទៅក្នុងកោសិកាមនុស្ស ចូលទៅក្នុងឈាម ក៏ដូចជាសរីរាង្គ ដែលអាចបង្កគ្រោះថ្នាក់ដល់រាងកាយ។ ជាការពិតណាស់ មីក្រូប្លាស្ទីកត្រូវបានរកឃើញនៅគ្រប់ទីកន្លែង ចាប់ពីចំណុចជ្រៅបំផុតក្នុងមហាសមុទ្រ រហូតដល់រាងកាយមនុស្សតាំងពីកំណើត។

ទោះជាយ៉ាងណាក៏ដោយ មុននោះការសិក្សាបានបង្ហាញថា ដបប្លាស្ទិកនីមួយៗមានផ្ទុកមីក្រូប្លាស្ទិកប្រហែល ៣២៥ ដុំប៉ុណ្ណោះ ប៉ុន្តែសម្រាប់ការងារថ្មីៗនេះបានបង្ហាញថាចំនួនពិតប្រាកដគឺខ្ពស់ជាង ១០០ ដង ដែលវាអាចបង្កបញ្ហាប្រឈមទៅនឹងស្តង់ដារពីមុនសម្រាប់សុវត្ថិភាពទឹកបរិសុទ្ធក្នុងដបប្លាស្ទិក។

ដូច្នេះហើយ ដើម្បីធ្វើការស្រាវជ្រាវ ពួកគេបានប្រើប្រាស់គំរូដបចំនួន ៥ ពីម៉ាកចំនួន ៣ នៅសហរដ្ឋអាមេរិក ហើយបានរកឃើញកម្រិតមីក្រូប្លាស្ទិកចាប់ពី ១១០,០០០ ទៅ ៤០០,០០០ ក្នុងមួយលីត្រ ជាមួយនឹងភាគល្អិតប្រហែល ២៤០,០០០ នៅក្នុងដបពីប្លាស្ទិកចំនួន ៧ ប្រភេទ។

ហេតុនេះហើយ បច្ចុប្បន្នក្រុមអ្នកស្រាវជ្រាវបានកំពុងសិក្សាបន្ថែមអំពីថាតើវាមានគ្រោះថ្នាក់ដល់កម្រិតខ្លាំងប៉ុណ្ណា ដោយគេដឹងថាពួកវាកំពុងចូលទៅក្នុងជាលិកា ហើយការងារបន្ថែមទៀត ក្រុមអ្នកស្រាវជ្រាវនឹងពិនិត្យមើលពីរបៀបដែលពួកវាដំណើរការនៅក្នុងកោសិកា៕

សហរដ្ឋអាមេរិក ៖ នៅថ្ងៃទី៩ ខែមករា ឆ្នាំ២០២៤ សារព័ត៌មានបរទេសរាយការណ៍ថា មានហេតុការណ៍ផ្ទុះកើតឡើងក្នុងសណ្ឋាគារមួយឈ្មោះ «សែនម៉ែន» នៅរដ្ឋតិចសាស់ សហរដ្ឋអាមេរិក ។ ហេតុការណ៍ផ្ទុះក្នុងសណ្ឋាគារនេះបានបណ្តាលឱ្យមនុស្សរងរបួសចំនួន២១នាក់ និងមានមនុស្សមួយចំនួនទៀតជាប់នៅជាន់ក្រោមដីរបស់សណ្ឋាគារផងដែរ ។

ក្រោយពីកើតហេតុការណ៍ផ្ទុះក្នុងសណ្ឋាគារកាលពីថ្ងៃទី៨ ខែមករា ឆ្នាំ២០២៤ បានបណ្តាលឱ្យសណ្ឋាគារ «សែនម៉ែន» ខូចខាតយ៉ាងខ្លាំង និងធ្លាក់កំទេចថ្មពាសពេញផ្លូវនៅខាងមុខសណ្ឋាគារ ។ ការខូចខាតបានកើតឡើងនៅបរិវេណជាន់ខាងក្រោមនៃសណ្ឋាគារ ប៉ុន្តែអគារនៅទល់មុខគ្នានេះពុំរងការខូចខាតទេ ។

សណ្ឋាគារ «សែនម៉ែន» មានកម្ពស់២០ជាន់ មានទីតាំងស្ថិតនៅចំណុចកណ្តាលទីក្រុងហ្វតវឺស រដ្ឋតិចសាស់ ។ ក្រោយកើតហេតុ ភ្នាក់ងារពន្លត់ភ្លើង និងភ្នាក់ងារជួយសង្គ្រោះប្រចាំទីក្រុងហ្វតវឺស បញ្ជាក់ថា ហេតុការណ៍នេះបណ្តាលឱ្យមនុស្សរងរបួសចំនួន២១នាក់ ក្នុងនោះមានម្នាក់រងរបួសធ្ងន់ធ្ងរ ។ រីឯមនុស្សខ្លះទៀតជាប់នៅជាន់ក្រោមដីនៃសណ្ឋាគារ ។

ក្រោយកើតហេតុ អាជ្ញាធរបានសុំឱ្យពលរដ្ឋចៀសវាងកុំធ្វើដំណើរមកកាន់ចំណុចកើតហេតុដើម្បីសុវត្ថិភាព ។ អាជ្ញាធរបានសន្និដ្ឋានអំពីមូលហេតុនៃការផ្ទុះថា អាចបណ្តាលមកពីការធ្លាយធុងហ្គាសនៅក្នុងសណ្ឋាគារ ។ ម្យ៉ាងទៀត ក្នុងពេលកើតហេតុ ក៏មានការកែលម្អសណ្ឋាគារផងដែរ ប៉ុន្តែមិនដឹងថា តើវាពាក់ព័ន្ធនឹងការផ្ទុះដែរឬទេ?

គួរបញ្ជាក់ថា សណ្ឋាគារ «សែនម៉ែន» មានបន្ទប់សម្រាកចំនួន២៤៥បន្ទប់ ហើយសណ្ឋាគារនេះបានសាងសង់ឡើងនៅឆ្នាំ១៩២០ ។ បើគិតរហូតមកដល់បច្ចុប្បន្ន សណ្ឋាគារនេះមានអាយុកាលជាង១០០ឆ្នាំហើយ ។ សណ្ឋាគារ «សែនម៉ែន» ធ្លាប់បានចុះឈ្មោះជាតំបន់បុរាណរបស់អាមេរិក តាំងពីឆ្នាំ១៩៧៩ ៕

បរទេស៖ ប្រទេសកូរ៉េខាងត្បូងបានអនុម័តច្បាប់ហាមឃាត់ការលក់ ឬការបរិភោគសត្វឆ្កែចាប់ពីឆ្នាំ ២០២៧ ដូច្នេះអ្នកដែលបំពានច្បាប់នេះនឹងត្រូវប្រឈមមុខនឹងការជាប់ពន្ធនាគាររយៈពេល ៣ ឆ្នាំ ឬពិន័យជាប្រាក់ ៣០ លានវ៉ុន (ប្រមាណ ២២,៨០០ ដុល្លារអាមេរិក)។

យោងតាមប្រភពព័ត៌មាន BBC ដែលបានរាយការណ៍នៅថ្ងៃទី៩ ខែមករាថា ប្រទេសកូរ៉េខាងត្បូងបានអនុម័តច្បាប់មួយក្នុងគោលបំណងបញ្ចប់ការសម្លាប់ និងលក់សាច់ឆ្កែ ក៏ដូចជាបញ្ចប់វប្បធម៌បរិភោគសាច់ឆ្កែនៅកូរ៉េខាងត្បូងដែលបានបន្តអស់រយៈពេលជាច្រើនទសវត្សរ៍មកហើយ។

នៅក្រោមច្បាប់ថ្មី ការចិញ្ចឹម ឬសម្លាប់សត្វឆ្កែដើម្បីបរិភោគ នឹងត្រូវជាប់ពន្ធនាគារអតិបរមា ៣ ឆ្នាំ ឬពិន័យជាប្រាក់ ៣០ លានវ៉ុន (ប្រមាណ ២២,៨០០ ដុល្លារអាមេរិក) ដែលច្បាប់នេះនឹងចូលជាធរមាននៅឆ្នាំ ២០២៧។ ហេតុផលដែលច្បាប់នេះនឹងចូលជាធរមាននៅឆ្នាំ ២០២៧ គឺដើម្បីផ្តល់ឱកាសសម្រាប់ភោជនីយដ្ឋាន និងកសិដ្ឋានចិញ្ចឹមឆ្កែ ស្វែងរកប្រភពចំណូលផ្សេងទៀត ក៏ដូចជាស្វែងរកអាជីវកម្មថ្មី។

យោងតាមស្ថិតិរបស់រដ្ឋាភិបាលកូរ៉េខាងត្បូង បានឱ្យដឹងទៀតថា កាលពីឆ្នាំ ២០២៣ ប្រទេសនេះមានភោជនីយដ្ឋានសាច់ឆ្កែប្រហែល ១,៦០០ និងកសិដ្ឋានសាច់ឆ្កែ ១,១៥០ ទោះជាយ៉ាងណាក៏ដោយ ប្រជាប្រិយភាពរបស់សាច់ឆ្កែបានធ្លាក់ចុះយ៉ាងខ្លាំងកាលពីឆ្នាំមុន។

គួរបញ្ជាក់ដែរថា ការបរិភោគសាច់ឆ្កែគឺជាទំនៀមទម្លាប់ដែលមានអាយុកាលរាប់សតវត្សមកហើយនៅលើឧបទ្វីបកូរ៉េ។ ម្ហូបនេះត្រូវបានចាត់ទុកថាជាប្រភពនៃថាមពលក្នុងរដូវក្តៅក្តៅ។ ប៉ុន្តែចំនួនកើនឡើងនៃប្រជាជនកូរ៉េខាងត្បូង ចង់ឱ្យរដ្ឋាភិបាលហាមឃាត់សាច់ឆ្កែ ជាមួយនឹងការព្រួយបារម្ភកាន់តែខ្លាំងឡើងអំពីសិទ្ធិសត្វ និងការព្រួយបារម្ភអំពីមុខមាត់អន្តរជាតិរបស់ប្រទេស៕